জাতি, মাটি ভেটি সুৰক্ষাৰ কথা কোৱা চৰকাৰৰ দিনতে ভূমিৰ অভাৱত চৰকাৰে দিয়া প্ৰধানমন্ত্ৰী আৱাস যোঁজনা আঁচনিৰ গৃহ নিৰ্মান কৰিছে গংগাধাৰ নৈৰ বুকুত । দ্বীপ সদৃশ চৰ এখনত ওপৰা ওপৰিকৈ নিৰ্মাণ কৰিছে প্ৰায় এশ টা প্ৰধানমন্ত্ৰী আৱাস যোঁজনা আঁচনিৰ গৃহ । চৰ খন নিশ্চিত ভাবে নৈৰ বুকুত বিলীন হোৱা কথাটো জনা সত্বেও হিতাধিকাৰীয়ে নিৰ্মান কৰিবলৈ লৈছে প্ৰধান মন্ত্ৰী আবাশ যোজনাৰ গৃহ । ধুবুৰী জিলা গ্ৰাম্য বিকাশ অভিকৰণৰ হাতীধুৰা উন্নয়ন খণ্ডৰ কামানডাংগা গাঁও পঞ্চায়তৰ অন্তৰ্গত জোংবন্ধা গাঁৱত প্ৰধানমন্ত্ৰী আৱাস যোঁজনা আঁচনিৰ গৃহ নিৰ্মাণত চৰম খেলি মেলি আৰু অনিশ্চয়তাই দেখা দিছে । উল্লেখ্য যে প্ৰায় কুৰি বছৰ পূৰ্বে অসম-বংগ সীমান্তৰ ধুবুৰী জিলাৰ কামানডাংগা গাঁও পঞ্চায়তৰ অন্তৰ্গত  জোংবন্ধা গাঁও খন গৰাখহনীয়াৰ কবলত পৰি গংগাধৰ নদীৰ বুকুত সম্পূৰ্ণৰূপে বিলীনহৈ গৈছে । অসমৰ আন কোনো ঠাইত মাটি নথকাৰ বাবে উক্ত জোংবন্ধা গাঁও খনৰ ৰাইজে গাতে লাগি থকা চুবুৰীয়া ৰাজ্য পশ্চিমবংগৰ কোচবিহাৰ জিলাৰ ছাটফলিমাৰী গাঁৱত গৈ অস্থায়ী ভাবে বসবাস কৰিবলৈ আৰম্ভ কৰে । তেতিয়াৰ পৰা জোংবন্ধা গাঁও খনৰ বাসিন্দা সকল পশ্চিমবংগৰ ভূখণ্ডত অস্থায়ী ভাবে বসবাস কৰি আহিছে যদিও অসমৰ নাগৰিক হিচাপে অসমত নিয়মিত ভাবে ভোটাধিকাৰ সাব্যস্ত কৰি আহিছে । শৈক্ষিক, আৰ্থিক আদি সকলো ক্ষেত্ৰতে পিছ পৰি থকা উক্ত জোংবন্ধা গাঁও খনৰ বাসিন্দা সকলক অলপ সকাহ দিয়াৰ উদ্যেশ্যেৰে কামানডাংগা গাঁও পঞ্চায়ত কৰ্তৃপক্ষই গাঁও খনৰ প্ৰায় এশটা পৰিয়ালৰ নামত প্ৰধানমন্ত্ৰী আৱাস যোজনা আঁচনিৰ গৃহ মঞ্জুৰী দিয়ে । কিন্তু অসম চৰকাৰৰ আঁচনিৰ ধনেৰে পশ্চিমবংগৰ ভূমিত গৃহ নিৰ্মাণৰ ক্ষেত্ৰত আইন গত ভাবে বাধা থকাৰ বিপৰীতে অসমৰ কোনো ঠাইতে মাটি নথকাৰ ফলত উক্ত গাঁও খনৰ ৰাইজ প্ৰধানমন্ত্ৰী আৱাস যোঁজনা আঁচনিৰ গৃহ নিৰ্মাণৰ ক্ষেত্ৰত আন এক অসুবিধাৰ সন্মুখীন হৈ পৰে । ইতিমধ্যে গংগাধৰ নদীৰ পানী কিছু কমি অহাত জোংবন্ধা গাঁও খনৰ কিছু অংশ ভাহি উঠি চৰত পৰিণত হয় । উপায়ন্তৰহৈ পৰা উক্ত ভূক্তভোগী লোক সকল অৱশেষত চৰত পৰিণত হোৱা গাঁও খনৰ আংশিক অংশত মঞ্জুৰীকৃত ধনেৰে প্ৰধানমন্ত্ৰী আৱাস যোঁজনা আঁচনিৰ এশটা গৃহ নিৰ্মাণ কৰিবলৈ আৰম্ভ কৰে । কিন্তু গৃহ নিৰ্মাণৰ ক্ষেত্ৰতো আন এক সমস্যাৰ সন্মুখীন হবলগীয়া হৈছে দূৰ্ভগীয়া হাতাধিকাৰী সকল । মঞ্জুৰীকৃত ধনৰ পৰা প্ৰথম কিস্তিৰ ধন হিচাপে লাভ কৰা ৩২,৫০০ টকাৰে হিতাধিকাৰী সকলে গৃহ সমুহ নিৰ্মাণৰ কাম আৰম্ভ কৰে যদিও আজি এবছৰ উকলি যোৱাৰ পিছতো কামানডাংগা গাঁও পঞ্চায়ত কৰ্তৃপক্ষই পৰবৰ্তী কিস্তিৰ ধন মোকোলাই দিয়া নাই । ফলত অৰ্ধনিৰ্মিত প্ৰধানমন্ত্ৰী আৱাস যোঁজনাৰ গৃহ সমুহ জহি খহি যাবলৈ আৰম্ভ কৰিছে । ফলত প্ৰধানমন্ত্ৰী আৱাস যোঁজনাৰ গৃহ নিৰ্মাণ কাৰ্য্য এক প্ৰহসনত পৰিনত হৈ পৰিছে । আনহাতে সকলো দিশতে অকল প্ৰবঞ্চনাৰ বলি হব লগা হৈছে এই সকল প্ৰকৃত অসমৰ নাগৰিকে । গতিকে চৰজমিন তদন্ত ক্ৰমে জোংবন্ধা গাঁও খনৰ স্থায়ী বাসিন্দা সকলৰ উক্ত সমস্যা সমুহ দূৰ কৰি প্ৰধানমন্ত্ৰী আৱাস যোঁজনা আঁচনিৰ গৃহ নিৰ্মাণৰ কাম সম্পূৰ্ণ কৰি দিয়াৰ বাবে  ভূক্তভোগী ৰাইজে উৰ্ধতন কৰ্তৃপক্ষ তথা বিভাগীয় মন্ত্ৰী গৰাকীৰ ওচৰত দাবী জনাইছে । 

গহপুুুৰ মহকুমাৰ দক্ষিণ কলাবাৰীস্থিত আউনীআটী সত্ৰৰ শাখা হিচাপে পৰিচিত শ্ৰীশ্ৰীনীল গোবিন্দ কামদেৱাল সত্ৰৰ বৰ্তমানৰ সত্ৰাধিকাৰ তথা অসম চৰকাৰৰ শিল্পী পেঞ্চনাৰ শোভনচন্দ্ৰ গোস্বামীৰ যোৱা নিশা ৮.৪৫ বজাত ক’ৰোনাত আক্ৰান্ত হৈ চিকিৎসাধীন অৱস্থাত প্ৰায় ৭০ বছৰ বয়সত পৰলোকপ্ৰাপ্তি ঘটে। উল্লেখ্য যে ক’ভিডত আক্ৰান্ত হৈ তেজপুৰ মেডিকেল কলেজত তেওঁ চিকিৎসাধীন হৈ আছিল। এগৰাকী বিশিষ্ট সমাজকৰ্মী হিচাপেও সেৱা আগবঢ়াই অহা গোস্বামীয়ে অসম বৈদিক বৈষ্ণৱ মহাসভাৰ প্ৰতিষ্ঠাপক সভাপতি হিচাপে কাৰ্যনিৰ্বাহ কৰিছিল। অসম সাহিত্য সভাৰ আজীৱন সভ্য এইগৰাকী সাংস্কৃতিক কৰ্মী উত্তৰ-পূৰ্বাঞ্চলৰ সাংস্কৃতিক বিকাশ কেন্দ্ৰৰ সদস্য হিচাপে সেৱা আগবঢ়াই আহিছিল। অসম চৰকাৰৰ সত্ৰীয়া সংগীত প্ৰতিষ্ঠানৰ গুৰি ধৰোতা এইগৰাকী সত্ৰাধিকাৰৰ নেতৃত্বত দিল্লী, চেন্নাই, কলিকতাকে ধৰি ভাৰতবৰ্ষৰ বিভিন্ন ৰাজ্যৰ লগতে শ্ৰীলংকাতো অসমৰ সত্ৰীয়া আৰু বিহু নৃত্যৰ দল লৈ প্ৰদৰ্শন কৰাই বিপুল জনপ্ৰিয়তা লাভ কৰিছিল। দ’লগুৰি  বিহুক স্থায়ীত্ব প্ৰদান কৰাৰ ক্ষেত্ৰত বিশেষ ভূমিকা গ্ৰহণ কৰা এইগৰাকী শিল্পী দক্ষিণ কলাবাৰী, কলাবাৰীকে ধৰি গহপুুুৰ মহকুমাৰ বিভিন্ন অনুষ্ঠান-প্ৰতিষ্ঠানৰ লগত ওতপ্ৰোতভাৱে জড়িত হৈ আহিছিল। তেওঁ ৰংতলিস্থিত চিত্ৰকলা সাংস্কৃতি কেন্দ্ৰ, সদৌ অসম মইনা পাৰিজাতৰ লগত জড়িত হোৱাৰ লগতে দক্ষিণ কলাবাৰী শাখা সাহিত্য সভাৰ লগতো বিশেষভাৱে জড়িত হৈ আছিল। এইগৰাকী সৰবৰহী সাংস্কৃতিক কৰ্মী সদৌ অসম সাংস্কৃতিক সন্থাৰ প্ৰতিষ্ঠাপক সভাপতি হোৱাৰ লগতে তেওঁ এগৰাকী খোল বাদ্য আৰু সত্ৰীয়া নৃত্যৰ বিষাৰদ আছিল। সদৌ অসম মইনা পাৰিজাতৰ আজীৱন সভ্য এইগৰাকী সত্ৰাধিকাৰৰ বিদেহ আত্মাৰ চিৰশান্তি কামনা কৰাৰ লগতে শোকসন্তপ্ত পৰিয়ালবৰ্গক সমবেদনা জ্ঞাপন কৰিছে স্থানীয় বিধায়ক উৎপল বৰা, ৰাজ্যসভাৰ সাংসদ ৰিপুন বৰা, অসম বৈদিক বৈষ্ণৱ মহাসভাৰ সভাপতি মহেন্দ্ৰ নাথ কোঁৱৰ, প্ৰধান সম্পাদক খগেন গগৈ, ছয়দুৱাৰ মহাবিদ্যালয়ৰ অধ্যক্ষ ড০ অঞ্জন কুমাৰ ওজা, কলাবাৰী মহাবিদ্যালয়ৰ অধ্যক্ষ ড০ প্ৰদীপ শৰ্মা, বিশিষ্ট কবি জ্ঞান পূজাৰী, বিশিষ্ট কবি নগেন কোঁৱৰ, বিশ্বনাথ জিলা নাট্য সন্মিলনৰ সভাপতি বংশী বৰা, অবিভক্ত শোণিতপুৰ জিলা সাহিত্য সভাৰ সভাপতি লোকেশ্বৰী সন্দিকৈ, বিশ্বনাথ জিলা কবি সন্মিলনৰ সভাপতি সবিতা কোঁৱৰকে ধৰি গহপুুুৰ জিলা বৈদিক বৈষ্ণৱ মহাসভা, বিশ্বনাথ জিলা সাহিত্য সভা, দক্ষিণ কলাবাৰী শাখা সাহিত্য সভাকে ধৰি বিভিন্ন অনুষ্ঠান-প্ৰতিষ্ঠানে সত্ৰাধিকাৰ তথা সাংস্কৃতিক কৰ্মী শোভন চন্দ্ৰ গোস্বামীৰ বিয়োগত মৰ্মাহত হৈ শোক সন্তপ্ত পৰিয়ালবৰ্গক সমবেদনা জ্ঞাপন কৰে।নিতুল বৰা হাৱাজান ।