গোৰ্খা জনগোষ্ঠীৰো এটি অন্যতম বাপতি সাহোন উৎসৱ হৈছে তিহাৰ অৰ্থাৎ দেৱালী উৎসৱৰ এক বিস্তৃত ৰূপ। এই পৱিত্ৰ উৎসৱ তিহাৰৰ লগত সংগতি ৰাখি দৰং জিলাৰ ছিপাঝাৰ ৰাজহ চক্ৰ অন্তৰ্গত  কিৰিংবৰী শাৰদা ভাই ভাই জ্যোতি সংঘৰ উদ্যোগত বিগত বছৰবোৰৰ দৰে ২১ সংখ্যক তিহাৰ সন্মিলনৰ ৮ তাৰিখে সামৰণি পৰে। পুৱা কিৰিংবৰী গাঁও উন্নয়ন সমিতিৰ সভাপতি গোবিন্দ অধিকাৰীয়ে পতাকা উত্তোলনৰ পাছতেই ক্ৰমে  স্মৃতি তৰ্পন, বৃক্ষপুলি ৰোপন , খেল-ধেমালি আৰু সাহিত্য প্ৰতিযোগিতা, নেপালী কৃষ্টি প্ৰদৰ্শনী কাৰ্যসূচী সম্পন্ন হয়। আবেলি কুৰুৱা উচ্চতৰ মাধ্যমিক বিদ্যালয়ৰ অৱসৰী অধ্যক্ষ বল বাহাদুৰ ছেত্ৰীৰ সভাপতিত্বত অনুষ্ঠিত মুকুলি সভাত দৰং জিলাৰ আৰক্ষী অধীক্ষক সুশান্ত বিশ্ব শৰ্মা, দেওমৰনৈ উচ্চতৰ মাধ্যমিক বিদ্যালয়ৰ অধ্যক্ষ অক্ষয় কুমাৰ নাথ, উত্তৰ গুৱাহাটী মহাবিদ্যালয়ৰ অধ্যাপক ড° ললিত শ্ৰেষ্ঠ, অসম চৰকাৰৰ হিচাব নিধি বিভাগৰ অৱসৰী উপ-সঞ্চালক গণেশ‌ প্ৰসাদ ছেত্ৰী, ছিপাঝাৰ উচ্চতৰ মাধ্যমিক বিদ্যালয়ৰ বিষয় শিক্ষক পৱন কুমাৰ কলিতা, দৰং জিলা গোৰ্খা সন্মিলনৰ সম্পাদক টংক প্ৰসাদ ভট্টৰায়, দৰং জিলা সাহিত্য সভাৰ সহকাৰী সম্পাদক ধকমান শ্ৰেষ্ঠ, ধৰ্ম দাস প্ৰমুখ্য বিশিষ্ট ব্যক্তি সকল উপস্থিত থাকি ভাষণ প্ৰদান কৰে।

 নাজিৰা মহকুমাৰ শিমলুগুৰি নগৰৰ প্ৰভাতীপুৰৰ নিবাসী, অৱসৰপ্ৰাপ্ত শিক্ষয়িত্ৰী, শিশু সাহিত্যিক – কবি ফুল চাংমাই গগৈলৈ আগবঢ়োৱা হৈছে সমাজসেৱিকা কুশলতা শইকীয়া সোঁৱৰণী ২০২১ বৰ্ষৰ “দিখৌ পাৰৰ সাহিত্য বঁটা”। শিৱসাগৰ জিলা সাহিত্য সভাৰ অন্তৰ্গত শিমলুগুৰি শাখা সাহিত্য সভাই চলিত বৰ্ষৰ পৰা আৰম্ভ কৰা এই বঁটা প্ৰতিবছৰে বৃহত্তৰ শিমলুগুৰি অঞ্চলৰ সমাজ, সাহিত্য আৰু সাংস্কৃতিক ক্ষেত্ৰলৈ আগবঢ়োৱা উল্লেখযোগ্য অৱদানৰ বাবে প্ৰদান কৰা হব। চলিত বৰ্ষৰ বটাঁ প্ৰাপক ফুল চাংমাই গগৈয়ে দলবাগান উচ্চতৰ মাধ্যমিক বিদ্যালয়ৰ পৰা শিক্ষয়িত্ৰী হিচাপে অৱসৰ গ্ৰহণ কৰাৰ পাছত শিশুসকলৰ উপযোগীকৈ কেইবাখনো শিশু গ্ৰন্থ প্ৰকাশ কৰে। “ইৰাণৰ সাধু শুনো আহা, ইণ্ডোনেছিয়াৰ সাধু, নেপালৰ সাধু, থাইলেণ্ডৰ সাধু, চাওতালীৰ সাধু, ইয়ো এক গল্প (দেশ বিদেশৰ জনশ্ৰুতিমূলক গল্প), শিৱসাগৰ জিলাৰ আহোম যুগৰ স্হাপত্য, অসম ইতিহাসৰ ত্যাগী পুৰুষসকল আৰু উত্তৰ পূৰ্বাঞ্চলৰ ঐতিহাসিক ৰমণীসকল” আদিকে ধৰি কুৰিখনৰো অধিক শিশু গ্ৰন্থ ৰচনা কৰা ফুল চাংমাই গগৈয়ে অঞ্চলটোৰ বিভিন্ন সামাজিক অনুষ্ঠান প্ৰতিষ্ঠানৰ সৈতে বৰ্তমানেও ওতঃপ্ৰোত ভাৱে জড়িত হৈ আছে। অহা ১৪ নৱেম্বৰৰ শিশু দিৱসৰ দিনা শিমলুগুৰি আঞ্চলিক ছাত্ৰ সন্থাৰ কাৰ্যলয় ‘শ্বহীদ ভৱন’ ত আয়োজিত এক অনুষ্ঠানত বিশিষ্ট শিশু সাহিত্যিক গৰাকীক এই বটাঁ প্ৰদান কৰা হব। এই বঁটাত আছে এখন প্ৰশষ্টি প্ৰত্ৰ, এটা স্মাৰক, চেলেং চাদৰ, গামোছা আৰু গ্ৰন্থৰ টোপোলা। এক প্ৰেছ বিবৃতিৰ জৰিয়তে শিমলুগুৰি শাখা সাহিত্য সভাৰ সভানেত্ৰী কৃষ্ণা শইকীয়া আৰু সম্পাদিকা ইলা মহন বুঢ়াগোঁহায়ে এই বটাঁৰ বিষয়ে জানিবলৈ দিয়াৰ লগতে বটাঁ প্ৰদানৰ দিনা সাহিত্যপ্ৰেমী ৰাইজৰ একান্ত উপস্থিত কামনা কৰিছে।

দেশৰ স্বাধীনতাৰ ৭৫  সংখ্যক বর্ষপূৰ্তিৰ লগত সংগতি ৰাখি পালন কৰি অহা “আজাদি কা অ মৃত মহোৎসৱ” উপলক্ষে ভাৰত চৰকাৰৰ প্ৰতিৰক্ষা মন্ত্ৰণালয়ৰ অধীনৰ সীমান্ত পথ সংগঠন চমুকৈ বি আৰ অ’ই  ১৪ অক্টোবৰত  নতুন দিল্লীৰ পৰা দেশজুৰি আৰম্ভ কৰিছিল মটৰ চাইকেল ৰেলী । ৭৫ দিনত ২০,০০০ কিঃমিঃ যাত্ৰা  পথ  এই অতিক্ৰম কৰাৰ লক্ষ্য নিৰ্ধাৰণ কৰা  ৰেলীত বি আৰ অ’ৰ বিভিন্ন পদমৰ্যাদাৰ ৭৫ জন জন বিষয়া , জুনিয়ৰ কমিচনড বিষয়া , নন কমিচনড বিষয়াই ভাগ লৈছে । ৰেলীত ভাগ লোৱা মটৰ চাইকেল ৰাইডাৰ সকলে ভাগে ভাগে দেশৰ দুৰ্গম স্থান সমূহলৈ যাত্ৰা কৰিছে । এই ৰেলীত ভাগ লোৱা ১৫ জনীয়া এটা দল কালি সন্ধিয়াৰ ভাগত পশ্চিমবঙ্গৰ হাচিমাৰাৰ পৰা প্ৰায় ৩৪০ কিঃমিঃ যাত্ৰা পথ অতিক্ৰম কৰি গুৱাহাটীৰ লংকেশ্বৰত থকা বি আৰ অ’ৰ পূব মণ্ডল মুখ্য কাৰ্যালয়ত আহি উপস্থিত হয় । নিশাটো পূব মণ্ডল মুখ্য কাৰ্যালয়ত থকাৰ পাছত দলটোৱে আজি পুৱা তেজপুৰলৈ যাত্ৰা কৰে । পুৱা পতাকা জোকাৰি তেজপুৰ অভিমুখে যোৱা দলটোৰ যাত্ৰাৰ শুভাৰম্ভ কৰে বি আৰ অ’ৰ পূব মণ্ডলৰ ভাৰপ্ৰাপ্ত উপ সঞ্চালক প্ৰধান ( ডি ডি জি ) শ্যামন্ত ৰায়ে । তেজপুৰৰ পৰা দলটোৱে অৰুণাচল প্ৰদেশৰ ভাৰত – চীন সীমান্ত অভিমুখে যাত্ৰা কৰিব । দলটোত দুজন কমিচনড বিষয়া , এজন জুনিয়ৰ কমিচনড বিষয়া আৰু ১০ জন নন কমিচনড তথা  অন্যান্য পদবীৰ  কৰ্মচাৰীয়ে ভাগ লৈছে । উল্লেখযোগ্য যে অহা ২৭ ডিচেম্বৰত এই ৭৫ দিনীয়া যাত্ৰাৰ সামৰণি পৰিব বুলি বি আৰ অ’ৰ সূত্ৰত প্ৰকাশ ।