ধুবুৰী জিলাৰ তামাৰহাট থানাৰ অন্তৰ্গত কাছাৰিগাঁওত  বৃহস্পতি বাৰে মাৰহাট থানাৰ টহল দাৰী আৰক্ষীৰ দল এটাই এখন ছুইফ্ট  ডিজেয়াৰ গাড়ীত দুটা বহি:ৰাজ্যৰ গৰু লৈ যোৱা অৱস্থাত আটক কৰিবলৈ সক্ষম হয় । জানিব পৰা মতে বৃহস্পতি বাৰে আবেলি তামাৰহাট থানাৰ আৰক্ষীৰ দল এটাই থানা খনৰ অন্তৰ্গত কাছাৰিগাঁওত টহল দি আছিল । সেই সময়তে পশ্চিমবংগৰ ফালৰ পৰা তামাৰহাট অভিমুখে আহি থকা এ এছ ১৮ এ  ৫৭৮৬  নম্বৰৰ এখন ছুইফ্ট ডিজেয়াৰ গাড়ী দেখা পাই সন্দেহ বশত: আৰক্ষীৰ দলটোৱে  গাড়ী খন ৰখাবলৈ নিৰ্দেশ দিয়ে  । লগে লগে গাড়ী খন ৰখাই চালক জন পলাই যায় । পিছত গাড়ী খনত তালাচী কৰাত গাড়ী খনৰ পাছ ফালৰ  ডিগিত ঠেং বন্ধা অৱস্থাত দুটা গৰু উদ্ধাৰ হয় যদিও এটা গৰুৰ ইতিমধ্যে মৃত্যু হয় । পিছত আৰক্ষীয়ে জীয়াই থকা গৰুটো কাছাৰিগাঁওত থকা খোৱাৰত জমা দিয়াৰ বিপৰীতে মৃত গৰুটোৰ সৈতে ছুইফ্ট গাড়ী খন থানালৈ লৈ যায় । উল্লেখযোগ্য যে অসম-বংগ সীমান্তত সক্ৰিয়হৈ থকা অবৈধ গৰু ব্যাৱসায়ী চক্ৰই  বহি:ৰাজ্যৰ পৰা উন্নত জাতৰ গৰু আনি অসম-বংগ সীমান্তৰ গংগাধৰ নদী পাৰ কৰি তামাৰহাট থানাৰ অন্তৰ্গত বিভিন্ন  ভিতৰুৱা পথেৰে বাংলাদেশলৈ সৰবৰাহ কৰি ৰমৰমীয়া ব্যাৱসায় চলাই আছে ।

উত্তৰ-পূৱ ভাৰতৰ সৰ্বশ্ৰেষ্ঠ মহাপুৰুষ- জগতগুৰু শ্ৰীমন্ত শংকৰদেৱ গুৰুজনাৰ নামত প্ৰতিষ্ঠিত শ্ৰীমন্ত শংকৰদেৱ সংঘ ওদালগুৰি জিলা শাখাৰ সপ্তদশ বাৰ্ষিক আই-মাতৃ-যুৱ সমাৰোহ, গুৰু আসন প্ৰতিষ্ঠা দিৱস আৰু ৫৭৩ সংখ্যক গুৰু আৱিৰ্ভাৱ মহোৎসৱটি  ২৭ অক্টোবৰত হৈ যায়  ওৰাঙৰ নিকটবৰ্ত্তী ধনশ্ৰীঘাটস্থিত জিলা শাখাৰ কেন্দ্ৰীয় নামঘৰত দিনজোৰা ভক্তিময় কাৰ্যক্ৰমণিকাৰে আয়োজিত এই অনুষ্ঠানৰ শুভ অনুষ্ঠানটো  ৰাতিপুৱা ৫ বজাত নিৰ্মোহ বৈষ্ণৱ তথা নামঘৰীয়া মেনাৰাম ৰাভাৰ পৰিচালনাত প্ৰাত:প্ৰসংগৰে হৈ যায় ।ইয়াৰ পিছতে ক্ৰমে মূলৰ সদস্য বিষ্ণু ঠাকুৰীয়াৰ দ্বাৰা বৃক্ষ ৰোপন, জিলা শাখাৰ সভাপতি শশীন্দ্ৰ মোহন নাথৰ দ্বাৰা ধৰ্মধ্বজা উত্তোলণ,সামৃহিক নাম প্ৰসংগ,সাহিত্য আৰু সংস্কৃতি শাখাৰ প্ৰতিযোগিতা  আৰাম্ভ কৰা হয় ৷ অপৰাহ্ন ২ বজাত অনুষ্ঠিত হ’ব জিলা শাখাৰ সভাপতি শশীন্দ্ৰ মোহন নাথৰ পৌৰহিত্যত তথা মূলৰ প্ৰাক্তন সদস্য লংকেশ্বৰ ডেকাৰ উদ্বোধনেৰে মূল ধৰ্মালোচনা সভা ।বক্তাৰ আসনত থাকিব অগ্ৰণী ভক্তপ্ৰাণ ব্যক্তি ক্ৰমে ধীৰেন্দ্ৰ শইকীয়া , পূৰ্ণৰাম ডেকা ,  মৃণাল কলিতা ,কুন্তী বৰা (আই বক্তা) আৰু মুখ্য অতিথি হিচাপে মুলৰ প্ৰচাৰক  মনিৰাম দাস আদি সকল উপস্থিত থাকি অনুষ্ঠানটো সৌষ্ঠৱ আগবঢ়ায় ৷

২৪ অক্টোবৰত বাক্সা জিলাৰ বাগানপাৰা আৰক্ষী চকীৰ অন্তৰ্গত উত্তৰপাৰৰ একৰাকী ২২ বছৰীয়া যুৱতীক ৩ জনকৈ নৰপিশাচে দলবদ্ধভাৱে ধৰ্ষণ কৰি যুৱতীগৰাকীক হত্যা কৰাৰ কাণ্ডই সমগ্ৰ অঞ্চলবাসীৰ লগতে ৰাজ্যবাসীৰ মনত তীব্ৰ চাঞ্চল‍্যৰ সৃষ্টি হৈ আছে‌। উক্ত জঘন্য ধৰ্ষণৰ লগতে হত‍্যাকাণ্ডটোৰ  লগত জড়িত তিনিজন যুৱক ক্ৰমে জনচন বান্দ, অভিজিত তিৰ্কী আৰু ডেচলিন খাল্কোক বৰবৰী আৰক্ষী আৰু বাগানপাৰা আৰক্ষীয়ে যুটীয়া অভিযান চলাই গ্ৰেপ্তাৰ কৰে। যদিওবা আৰক্ষীয়ে দোষীক গ্ৰেপ্তাৰ কৰিছে উক্ত নিৰ্মম-জঘন্য কাণ্ডৰ দোষীয়ে যাতে কোনো প্ৰকাৰে পুনৰ মুকলি আকাশৰ তলত ওলাই আহিব নোৱাৰে তাৰবাবে ৰুচিতা এক্কাৰ পৰিয়ালৰ লগতে অঞ্চলবাসী তথা বিভিন্ন দল-সংগঠনে কৰযোৰে চৰকাৰক অনুৰোধ জনায়। আনহাতে সদৌ অসম আদিবাসী ছাত্ৰ সন্থা ওদালগুৰি জিলা সমিতি আৰু পানেৰী আঞ্চলিক সমিতি, আছাৰ যৌথ উদ‍্যোগত ২৭ অক্টোবৰ বুধবাৰে সন্ধিয়া হাতত মমবাতি লৈ এক বিশাল মৌন শান্তি সমদলেৰে পানেৰী আঞ্চলিক আদিবাসী ছাত্ৰ সন্থাৰ কাৰ্যালয়ৰ পৰা কচুবিল চ’কৰ মাজমজিলৈকে ৰেলীৰ জৰিয়তে ৰুচিতা এক্কাৰ আত্মাৰ শান্তি কামনাৰ লগতে তেওঁ লগত সংঘটিত হোৱা জঘন্য কাণ্ডৰ উচিত ন‍্যায় বিচাৰি চৰকাৰক   দাবী জনোৱাৰ লগতে সমগ্র ঘটনাটোক তীব্ৰ গৰিহণা প্ৰদান কৰে। উক্ত ৰেলীত উপস্থিত দল-সংগঠনৰ বিষয়ববীয়া তথা নেতাকৰ্মীসকলে এই জঘন্য ঘটনাৰটোৰ লগত জড়িত যুৱক কেইজনক ফাষ্ট্ৰেক আদালতৰ জৰিয়তে বিচাৰ কৰি উচিত শাস্তি প্ৰদানৰ বাবে দাবী জনায়। লগতে এই ধৰ্ষণ কাণ্ডৰ দৰে ঘটনাবোৰ ৰোধ কৰিবলৈ হলে শাস্তি হিচাবে চৰকাৰ তথা দেশৰ ন‍্যায়িক ব‍্যৱস্থাই একমাত্ৰ ফাঁচী দিয়া ব‍্যৱস্থা কৰিলেহে কিছু পৰিমাণে এনেবোৰ ঘটনা হ্ৰাস পোৱাৰ আশা কৰিব পাৰি বুলি মন্তব্য কৰে ওদালগুৰি জিলা সমিতিৰ উপ সভাপতি খগেন তাঁতীয়ে। আনহাতে ধৰ্ষণৰ বলি হৈ মৃত্যুক সাবটিবলগীয়া হোৱা ২২ বছৰীয়া ৰুচিতা এক্কাৰ আত্মাৰ লগতে তেওঁৰ পৰিয়ালে যদি উচিত ন‍্যায় নাপাই তথা দোষীক ফা‍ঁচী কাঠত মৃত্যুদণ্ড নিদিয়ালৈকে বিশেষকৈ সদৌ অসম ছাত্ৰ সন্থাৰ আন্দোলন-প্ৰতিবাদৰ কেতিয়াও অন্ত নপৰিব বুলি স্পষ্ট কৰি কয় পানেৰী আঞ্চলিক সমিতি, আছাৰ সাধাৰণ সম্পাদক তিলক ৰৌচন বাৰাই। বুধবাৰৰ সন্ধিয়াৰ হাতে-হাতে মমবাতি জ্বলাই কৰা বিশাল মৌন শান্তি সমদল কাৰ্যসূচীত উপস্থিত থাকে ক্ৰমে, ওদালগুৰি জিলা সমিতিৰ উপ সভাপতি খগেন তাঁতী, যুটীয়া সম্পাদক লক্ষীন্দৰ মূলা, পানেৰী আঞ্চলিক সমিতিৰ সভাপতি ৰাজা এক্কা, সম্পাদক তিলক ৰৌচন বাৰা, সাংগঠনিক সম্পাদক প্ৰদীপ তাঁতী, শিক্ষা সম্পাদক বিকাশ তাঁতীৰ লগতে আৱা’ৰ সদস্যা বৃন্দ। অসম উড়িয়া যুৱ পৰিষদ জিলা সমিতিৰ সভাপতি সুৰেন বাগ আৰু সমাজ সেৱক জিতেন শৰ্মাৰ লগতে বহুতো সাধাৰণ ৰাইজ উপস্থিত আছিল।

কৰ্মচাৰীক মেনেজ কৰি একাংশ কাঠ মাফিয়াই কামৰূপ জিলাৰ বকো সমষ্টিৰ অন্তৰ্গত নগৰবেৰাৰ বিভিন্ন অঞ্চলত মুকলিকৈ  চোৰাং কাঠৰ ৰমৰমীয়া ব্যৱসায় চলাই থকাৰ গুৰুতৰ অভিযোগ উঠিছে ।এনে চোৰাং কাঠৰ ৰমৰমীয়া ব্যৱসায় চলি থকাৰ সময়তে আজি জিলা খনৰ নগৰবেৰা নদী সংৰক্ষিত বনাঞ্চলিক কাৰ্যালয় এলেকাধীন জাওঁকাটাদিয়াত  বন বিভাগে এক অতৰ্কিতে অভিযান চলোৱা পৰিলক্ষিত হয় ।বন বিভাগৰ এই অভিযানত অভিযানকাৰীৰ দলটোৱে বৃহৎ পৰিমাণৰ চোৰাং কাঠ জব্দ কৰাৰ লগতে  এটা অবৈধ কাঠফলা মিল উৎক্ষাত কৰিবলৈ সক্ষম হয় ।জব্দকৃত কাঠখিনিৰ আনুমানিক বজাৰ মূল্য প্ৰায় লক্ষাধিক টকা হব বুলি জানিব পৰা গৈছে।বন্দাপাৰা ৰেঞ্জৰ বন বিষয়া ৰিংকুমনি বৰাৰ নেতৃত্বত  এই অভিযান চলোৱা হয় বুলি জানিব পৰা গৈছে। উল্লেখ্য যে নগৰবেৰা নদী সংৰক্ষিত বনাঞ্চলিক কাৰ্যালয় এলেকাত বন্দাপাৰাৰ পৰা আহি অভিযান চলোৱা কাৰ্যত নগৰবেৰা নদী সংৰক্ষিত বনাঞ্চলিক কাৰ্যালয়ৰ প্ৰকৃত স্বৰূপ উদঙাই দিছে।নগৰবেৰা নদী সংৰক্ষিত বনাঞ্চলিক বিষয়াৰ কাৰ্যালয়ৰ অধীনস্থ বিভিন্ন এলেকাত সুদীৰ্ঘ দিন ধৰি  চোৰাং কাঠৰ লগতে অবৈধভাৱে বালিৰ ৰমৰমীয়া ব্যৱসায় চলি আহিছে ।

মৰিগাঁও জিলাৰ ভূৰাগাঁও আৰক্ষী থানাৰ অন্তৰ্গত হাতীলৰুৱা পথাৰ গাঁৱৰ মোতালেৱ আলীৰ পুত্ৰ জয়নাল আবদিনে ককাইয়েকৰ সৈতে কৰ্মসূত্ৰে আছিল অৰুণাচল প্ৰদেশৰ বৰডুংচা থানাৰ অন্তৰ্গত NIB ইটা ভাটাত। যোৱা ২৬ তাৰিখ ১১বজাৰ পৰা কিশোৰ নিৰুদ্দেশ হৈ আছে। কিশোৰ জনৰ নিৰুদ্দেশৰ খবৰে শোকৰ ছাঁ পেলাইছে সমগ্ৰ গাওঁখনতে। ঘটনা সন্দৰ্ভত পৰিয়ালৰ লোকে ভূৰাগাঁও থানাত এজাহাৰ দাখিল কৰিছে । যদি কোনোবাই কিশোৰ জনৰ সন্ধান পায় তেন্তে 7896292465 নম্বৰত যোগাযোগ কৰিবলৈ আহব্বান জনাইছে পৰিয়ালৰ লোকে।