অসম চৰকাৰৰ শেহতীয়া এক সিদ্ধান্তৰ বাবে একাংশ ৰাইজৰ মাজত মিশ্ৰিত প্ৰতিক্ৰিয়াৰ সৃষ্টি হৈছে। আধা কিল’মিটাৰ ব্যাসাৰ্ধৰ ভিতৰত থকা যিবোৰ নিম্ন প্ৰাথমিক বিদ্যালয়ত ছাত্ৰ-ছাত্ৰীৰ সংখ্যা এশতকৈ কম, প্ৰতিটো শ্ৰেণীত চল্লিশজনতকৈ কম থকা আৰু এক কিল’মিটাৰ ব্যাসাৰ্ধৰ ভিতৰত থকা উচ্চ প্ৰাথমিক বিদ্যালয় একত্ৰীকৰণ সন্দৰ্ভত চৰকাৰীভাৱে জাৰি কৰা নিৰ্দেশৰ পৰিপ্ৰেক্ষিতত পূব নলবাৰী শিক্ষাখণ্ডৰ অধীনস্থ ১নং খাতা মণ্ডল সমল কেন্দ্ৰৰ এখন জৰুৰী সভা কালি ক্ষুদ্ৰচেনিকুছি প্ৰাথমিক বিদ্যালয়ত অনুষ্ঠিত হয়। ক’ভিড প্ৰ’ট’কল সম্পূৰ্ণৰূপে মানি অনুষ্ঠিত সভাখনত পৌৰহিত্য কৰে সমল কেন্দ্ৰটোৰ সমন্বয়ক সুভাষ বৰ্মনে। সভাখনত উত্তৰ পূব খাতা বিদ্যাপীঠ মধ্য ইংৰাজী বিদ্যালয়-ক্ষুদ্ৰচেনিকুছি প্ৰাথমিক বিদ্যালয় আৰু দিব্যজ্যোতি বালিকা বিদ্যাপীঠ মধ্য ইংৰাজী বিদ্যালয়-প্ৰেম নাৰায়ণ প্ৰাথমিক বিদ্যালয়-৮৩৩নং গন্ধিয়াতোলা প্ৰাথমিক বিদ্যালয়ৰ একত্ৰীকৰণ সন্দৰ্ভত বিস্তৃতভাৱে আলোচনা কৰা হয়। সমন্বয়ক সুভাষ বৰ্মনে বিভাগীয় নীতি-নিৰ্দেশনাখিনি তুলি ধৰাত শিক্ষকসকলে বিদ্যালয় পৰিচালনা সমিতিৰে প্ৰস্তাৱটো আলোচনা কৰাৰ পোষকতা কৰে যদিও চৰকাৰীভাৱে সময় নিদিয়াত শিক্ষকসকল বিপাঙত পৰে। আজি উত্তৰ পূব খাতা বিদ্যাপীঠৰ হৈ প্ৰধান শিক্ষক ৰজনী কান্ত হালৈ, জ্যেষ্ঠ সহঃ শিক্ষক অমূল্য তালুকদাৰ, ক্ষুদ্ৰচেনিকুছি প্ৰাথমিক বিদ্যালয়ৰ প্ৰধান শিক্ষয়িত্ৰী যামিনী দাস, দিব্যজ্যোতি বালিকা বিদ্যাপীঠ মধ্য ইংৰাজী বিদ্যালয়ৰ প্ৰধান শিক্ষক যাদব দাস,সহঃ শিক্ষকদ্বয় অৰবিন্দ ডেকা আৰু চক্ৰধৰ পাঠক, প্ৰেম নাৰায়ণ প্ৰাথমিক বিদ্যালয়ৰ প্ৰধান শিক্ষক দেবেন দাস আৰু ৮৩৩নং গন্ধিয়াতোলা প্ৰাথমিক বিদ্যালয়ৰ প্ৰধান শিক্ষক যতীন বৈশ্যই নিজ নিজ অভিমত তুলি ধৰে। বিদ্যালয়ৰ একত্ৰীকৰণৰ কথাখিনি প্ৰচাৰ হোৱাৰ লগে লগে স্থানীয় ৰাইজৰ মাজত প্ৰতিক্ৰিয়াৰ সৃষ্টি হয়। একাংশই একত্ৰীকৰণ প্ৰক্ৰিয়া আদৰণি জনোৱাৰ বিপৰীতে আন একাংশই অসমীয়া মাধ্যমৰ বিদ্যালয় ক্ষতিগ্ৰস্ত হ’ব বুলি আশংকা ব্যক্ত কৰে।

ক’ভিড মহামাৰীৰ উপদ্ৰপৰ পৰা ৰক্ষা পোৱাৰ হেতু ৰাজ্যৰ চহৰ, নগৰ, গ্ৰাম্যাঞ্চলত ১৮ বছৰ আৰু ৪৫ বছৰৰ উৰ্ধৰ বয়সৰ লোকসকলক বিনামূলীয়া ভাৱে সহজলভ্য কভিড ভেকচিন উপলব্ধ কৰা হৈছে। নলবাৰী জিলাৰ অন্তৰ্গত ঘগ্ৰাপাৰ ৰাজহ চক্ৰৰ কঞাকুছি প্ৰাথমিক বিদ্যালয়ত যোৱা ২১ জুনত ২২০ জনক, ২২ জুনত ১৩০ জনক ইতিমধ্যে ভেকচিন দিয়া হৈ গৈছে। ২৩ জুনটো একে ঠাইতে ৰাতিপুৱা ৯ বজাৰ পৰা ভেকচিন দিয়া হ’ব বুলি জানিব পৰা গৈছে। এতিয়ালৈ কেন্দ্ৰটোত কভিড পজিটিভ ব্যাক্তি ওলোৱা নাই। কভিড পজিটিভ হ’লে এতিয়াৰ পৰাই হোম কোৱাৰেন্টেন হ’ব নোৱাৰিব আৰু ৰোগী জনক বাহিৰে বাহিৰে চিকিৎসালয়লৈ প্ৰেৰণ কৰা হ’ব। এই ভয়তে এতিয়াও বহুতেই ভেকচিনটো লোৱাৰ পৰা বিৰত আছে। কঞাকুছি গাওঁৰ গাওঁবুঢ়া ৰমেশ কলিতাই অৱশ্যে মানুহক সজাগ আৰু সচেতনতা বৃদ্ধি কৰিবলৈ প্ৰচেষ্টা অব্যাহত ৰাখিছে। সহজতে উপলব্ধ কোনা ধৰণৰ সমস্যা নোহোৱাকৈয়ে বিভিন্ন গাওঁৰ মানুহে কেন্দ্ৰটো সুন্দৰ পৰিপাটিৰে ভেকচিন লৈছে। কেন্দ্ৰটোৰ দায়িত্বত থকা আটায়ে অতি নিয়াৰিকৈ কাম বিলাক কৰি ৰাইজক সহায়-সহযোগিতা আগবঢ়োৱা পৰিলক্ষিত হৈছে। অৱশ্যে ৰাইজে মাস্ক পৰিধান কৰিলেও দূৰত্ব বজাই ৰখা পৰিলক্ষিত হোৱা নাই। আশা কৰা হৈছে ভেকচিনটো সকলোৱে লৈ মহামাৰী ক’ৰোনাক প্ৰতিহত কৰি সুস্থ-সৱল সমাজ গঢ়াত সহযোগিতা আগবঢ়াব।

অতি কম খৰছী, কম ঠাইত খেলিব পৰা, আঘাটৰ বিশেষ কোনো সমস্যা নথকা ভলীবল খেল অসমৰ এক অতি জনপ্ৰিয় খেল । জনপ্ৰিয় হ’লেও কিন্তু ৰাষ্ট্ৰীয় পৰ্যায়ৰ ভলীবল প্ৰতিযোগিতাত বৰ্তমান সময়ত অসমৰ ফলাফল উন্নত নহয় । মাজে মাজে দুই এখন ৰাষ্ট্ৰীয় পৰ্যায়ৰ ভলীবল প্ৰতিযোগিতাত ভাল ফলাফল দেখুৱাবলৈ সক্ষম হৈছে যদিও ধাৰাবাহিকতা ৰক্ষা কৰিব পৰা নাই । অসমৰ ভলীবলৰ ক্ষেত্ৰখনক আৰু অধিক আগবঢ়াই নি ৰাষ্ট্ৰীয় পৰ্যায়ত অসমে কি দৰে ধাৰাবাহিকভাৱে ভাল প্ৰদৰ্শন ডাঙি ধৰি প্ৰতিষ্ঠা লাভ কৰিব পাৰে তাৰ বাবে ভলীবল প্ৰশিক্ষক গনেশ শৰ্মাই তেখেতৰ মনৰ ভাৱ ব্যক্ত কৰিছে । তেখেতৰ মতে ৰাষ্ট্ৰীয় পৰ্যায়ত অসমে উন্নত ফলাফল লাভ কৰিবলৈ হ’লে বা এই ধাৰাবাহিকতা ৰক্ষা কৰাতো আমাৰ সকলোৰে লক্ষ্য হোৱা উচিত ৷ অসমৰ ভলীবলৰ ক্ষেত্ৰখনৰ ভেটিটো বহল আৰু শক্তিশালী কৰা । ভেটিটো বহল কৰিবলৈ অধিক সংখ্যক চেমনীয়া খেলুৱৈক ভলীবলৰ প্ৰতি আকৰ্ষিত কৰিব লাগিব । ইয়াক শক্তিশালী কৰিবলৈ অৰ্হতাসম্পন্ন প্ৰশিক্ষকৰ দ্বাৰা বিজ্ঞানসন্মতভাবে দীৰ্ঘকালীন প্ৰশিক্ষণৰ ব্যৱস্থা কৰিব লাগিব । এনে ধৰনৰ ভেটি গঢ়ি তুলিবলৈ হ’লে সমান্তৰালকৈ সুচিন্তিত, বিজ্ঞানসন্মত, দীৰ্ঘকালীন আঁচনিও প্ৰস্তুত কৰিব লাগিব । এই আঁচনি প্ৰস্তুত কৰোঁতে গুৰুত্ব দিবলগীয়া বিষয়সমূহ হ’ল-

(১) প্ৰশিক্ষকৰ সংখ্যা বৃদ্ধি :- প্ৰশিক্ষকৰ সংখ্যা বৃদ্ধি হ’লেহে খেলুৱৈৰ সংখ্যা বৃদ্ধি হ’ব । এই ক্ষেত্ৰত চৰকাৰৰ ক্ৰীড়া বিভাগত নিয়োজিত হৈ থকা শাৰীৰিক নিৰ্দেশক, যিসকল একোজন প্ৰাক্তন ৰাষ্ট্ৰীয় পৰ্যায়ৰ সুদক্ষ ভলীবল খেলুৱৈ, তেখেতসকলক বছৰেকত এজনকৈ হ’লেওঁ এবছৰীয়া ডিপ্ল’মা পাঠ্যক্ৰমৰ বাবে পঠাব পাৰে বা ইচ্ছুক খেলুৱৈ ক্ৰীড়া সংগঠকসকলক এই সুবিধা প্ৰদান কৰিব পাৰে । তাৰোপৰি অসম ভলীবল সন্থাইও ইচ্ছুক প্ৰাক্তন খেলুৱৈ তথা ক্ৰীড়া সংগঠকক উক্ত পাঠ্যক্ৰমৰ বাবে পঠোৱাৰ দিহা কৰিব পাৰে । ইয়াৰ উপৰিও অসম ভলীবল সন্থাই বছৰেকত ২০-৩০ জন ইচ্ছুক প্ৰাক্তন খেলুৱৈক চমু প্ৰশিক্ষণৰ পাঠ্যক্ৰমৰ ব্যৱস্থা কৰিব পাৰে । ইয়াৰ বাবে বাহিৰৰ প্ৰশিক্ষকৰ প্ৰয়োজন নাই । তেওঁলোকক প্ৰশিক্ষণ দিব পৰাকৈ অসমত ভলীবল প্ৰশিক্ষকৰ অভাৱ নহ’ব । ইয়াৰ বাবে বহুত টকা-পইচাৰো আবশ্যক নহয় ।
(২) প্ৰশিক্ষণ কেন্দ্ৰৰ সংখ্যা বৃদ্ধি কৰা:- সৰু সজাইৰ বাহিৰে অসমত থকা ইণ্ডোৰ ষ্টেডিয়ামসমূহৰ অৱস্থা সুবিধাজনক নহয় । ছাইৰ অধীনত উত্তৰ পূৰ্বাঞ্চলৰ ভিতৰত অসমত এটি ভলীবলৰ একাডেমী প্ৰতিষ্ঠা হ’ব লাগিব । লগতে ৰাজ্য চৰকাৰৰ পৰাও অসমত এটি একাডেমী গঢ়ি তোলাটো নিতান্তই প্ৰয়োজনীয় । কিয়নো আমাৰ খেলুৱৈসকলৰ এই সুবিধা নথকা বাবে বছৰজোৰা অনুশীলনৰ পৰা বিৰত থাকিবলগীয়া হৈছে । ইয়াৰ উপৰিও অসম ভলীবল মিছন-১০০ৰ প্ৰশিক্ষণ শিৱিৰৰ লগতে স্থায়ী প্ৰশিক্ষণ শিৱিৰসমূহো সমান্তৰালভাৱে চলি থাকিব লাগিব ।
(৩) প্ৰতিযোগিতাৰ সংখ্যা বৃদ্ধি:- বিশেষকৈ মিনি আৰু চাব-জুনিয়ৰ ভলীবল প্ৰতিযোগিতাত অধিক গুৰুত্ব দিব লাগিব । কিয়নো এই খেলুৱৈসকলৰ বাবে আন্তঃজিলা প্ৰতিযোগিতাৰ বাহিৰে অসমত অইন প্ৰতিযোগিতা অনুষ্ঠিত নহয় । অসমত আমন্ত্ৰনমূলক প্ৰাইজমানি চিনিয়ৰ ভলীবল প্ৰতিযোগিতাহে অনুষ্ঠিত হৈ থাকে । উক্ত প্ৰতিযোগিতাত অসমৰ বছা বছা প্ৰায় ৪০ জনমান খেলুৱৈহে অংশগ্ৰহণ কৰা পৰিলক্ষিত হৈ আহিছে । ইয়াত মিনি বা ছাব-জুনিয়ৰৰ খেলুৱৈসকলৰ খেলিবলৈ সুযোগ আৰু সুবিধা নাথাকে । অথচ এইসকল খেলুৱৈৰ বাবেহে অধিক ভলীবল প্ৰতিযোগিতাৰ আৱশ্যক । কিয়নো এইসকল খেলুৱৈৰ দ্বাৰাইহে অদূৰ ভবিষ্যতে ৰাষ্ট্ৰীয় পৰ্যায়ৰ ভলীবল প্ৰতিযোগিতাত সুফল আশা কৰিব পৰা যায় ।
(৪) প্ৰতিভা অন্নেষণ:- কোনজন খেলুৱৈয়ে ভলীবল খেলিলে লাভৱান হ’ব পাৰিব এই কথাটো বিচাৰ বিশ্লেষণ কৰিহে খেলুৱৈগৰাকীক অনুশীলন কৰাব লাগে । তেতিয়াহে প্ৰতিভাৱান খেলুৱৈসকলে ৰাষ্ট্ৰীয় পৰ্যায়ৰ ভলীবল প্ৰতিযোগিতাত সুফল কঢ়িয়াই আনিবলৈ সক্ষম হ’ব ।
(৫) উপযুক্ত প্ৰশিক্ষণৰ বাবে খেলৰ সা-সামগ্ৰী:- বল ২টা আৰু নেট ১ খনৰ জড়িয়তে খেলুৱৈক প্ৰশিক্ষণ দি ভাল ফলাফল আশা কৰাতো আকাশত চাং পতাৰ দৰে কথা হ’ব । অইন ৰাজ্যসমূহৰ লগত আমাৰ খেলুৱৈয়ে ফেৰ মাৰিবলৈ হ’লে অত্যাধুনিক খেলৰ সামগ্ৰীৰ দ্বাৰাই অনুশীলন কৰিবই লাগিব । অন্যথা প্ৰতিযোগিতাত যোগদান কৰাৰ বাহিৰে ফলাফলৰ নামত থাকিব বৃহৎ শূন্য । সকলো কেন্দ্ৰতে এই সুবিধা থকাটো বাঞ্চনীয় ।
(৬) পূজি বৃদ্ধি:- পূজি নহ’লে আঁচনি ৰূপায়ন কৰাটো সম্ভৱ নহয় । অসম ভলীবল সন্থাৰ পূজি বুলি ক’বলৈ একোৱেই নাই । জোৰা-টাপলি মাৰিহে কিবাকৈ কামবোৰ কৰি থকা হৈছে । পূজিৰ অভাৱতে বহুত কামেই পৰি ৰৈছে । স্থায়ী পূজি এই ক্ষেত্ৰত লাগিবই । অন্যথা ভৱা কথা মনতে মাৰ যাব । ইয়াৰ বাবে এটি মাল্টিদিচিপ্লিনাৰী টাস্কফ’ৰ্চ গঠন কৰাৰ বাবেও প্ৰশিক্ষক গনেশ শৰ্মাই আহ্বান জনায় । পূজি সংগ্ৰহ কৰাৰ উপৰিও এই কমিটিৰ সদস্যসকলে ৪-৫ জনীয়া গ্ৰুপ হৈ প্ৰশিক্ষণ, প্ৰতিযোগিতা অনুষ্ঠিত কৰা, প্ৰতিভা অন্বেষণ, প্ৰচাৰ, ৰাষ্ট্ৰীয় ভলীবল প্ৰতিযোগিতাত অসম দলৰ অংশগ্ৰহণ ইত্যাদি ইত্যাদি বিভিন্ন কামৰ বাবে বিভাগে বিভাগে কাম কৰিব পাৰিলেহে অসমৰ ভলীবল লাভৱান হ’ব ।
(৭) মিনি ভলীবল ফেষ্টিভেলৰ আয়োজন:-মিনি ভলীবল ফেষ্টিভেল অনুষ্ঠিত কৰাৰ পোষকতা কৰে প্ৰশিক্ষকগৰাকীয়ে । ৮-১৪ বছৰীয়া ল’ৰা-ছোৱালীক জড়িত কৰাই ভলীবলৰ এক জাগৰণ আনিবলৈ চেষ্টা কৰিব পাৰি । জিলাভিত্তিত ২০০-৩০০ খেলুৱৈক লগ লগাই কেইবাখনো খেলপথাৰ তৈয়াৰ কৰি তাত 2 vs 2, 3 vs 3, 4 vs 4 ইত্যাদিৰে ভলীবল প্ৰতিযোগিতা অনুষ্ঠিত কৰা, ভলীবল সম্পৰ্কীয় কুইজ, চিত্ৰাঙ্কন প্ৰতিযোগিতা, প্ৰদৰ্শনী শিৱিৰ, অন্তৰঙ্গ আলাপ, কৰ্মশালা, ভলীবল খেলৰ বিভিন্ন ভিডিঅ’ প্ৰদৰ্শন, বঁটা-মানপত্ৰ প্ৰদান ইত্যাদিৰ ব্যৱস্থা থাকিব উক্ত ফেষ্টিভেলত । ইয়াৰ দ্বাৰাই নিশ্চিতভাৱে ভলীবলৰ এক বহল আৰু সুদৃঢ় ভেটি নিৰ্মাণ হ’ব ।
(৮) কৰ্মসংস্থাপন:- খেলুৱৈ, প্ৰশিক্ষক, ক্ৰীড়া সংগঠকসকলৰ কৰ্মসংস্থাপন অতি গুৰুত্বপূৰ্ণ কথা। সন্মুখত উজ্বল ভবিষ্যৎ এটা নাথাকিলে আজিকালি কোনে ক্ৰীড়া কৰিবলৈ ওলাই আহিব । সেয়েহে পৰ্যায়ক্ৰমে এইসকলক চৰকাৰীভাৱে সংস্থাপনৰ দিহা কৰিবই লাগিব । ইয়াৰ উপৰিও ৰেল, পুলিচ, অ এন জি চি, অসম ৰাজ্যিক বিদ্যুৎ পৰিষদ আদিত নতুনকৈ খেলুৱৈসকলক মকৰলৰ সুবিধা থাকিব লাগিব । তেতিয়াহে খেলুৱৈসকলে খেলৰ প্ৰতি আগ্ৰহ প্ৰকাশ কৰিব । অন্যথা সকলো থাকিও সংস্থাপন অবিহনে খেলুৱৈসকলক খেল পথাৰলৈ অনাটো টান হ’ব ।
(৯) মহিলা ভলীবলৰ ওপৰত গুৰুত্ব:- অসমত মহিলা ভলীবলৰ ওপৰত অধিক জোৰ দিব লাগিব। আঁচনিসমূহত মহিলা ভলীবলক অন্তৰ্ভুক্ত কৰি জিলাই জিলাই ইয়াৰ সঠিক ৰূপায়নৰ বাবে প্ৰচেষ্টা হাতত ল’ব লাগিব । আন্তঃজিলা ভলীবল প্ৰতিযোগিতাৰ লগতে বিভিন্ন ধৰণৰ মহিলা ভলীবল প্ৰতিযোগিতা অনুষ্ঠিত কৰি তেওঁলোকৰ সাহস আৰু একাগ্ৰতা বৃদ্ধি কৰিব লাগিব । অসম ভলীবল সন্থাক ইউথ ভলীবল প্ৰতিযোগিতা অনুষ্ঠিত কৰাৰ বাবে আহ্বান জনাইছে প্ৰশিক্ষকগৰাকীয়ে লগতে উক্ত প্ৰতিযোগিতাখন ক্ৰীড়া সংগঠক প্ৰয়াত কাজল দাসৰ সোঁৱৰণত অনুষ্ঠিত কৰাৰ বাবেও বিনম্ৰ অনুৰোধ জনাইছে ।
অসমৰ গ্ৰাম্যাঞ্চলত এতিয়াও সন্মানসহকাৰে ভলীবল খেল জীয়াই আছে, এতিয়াও আদৰ কমা নাই । ভলীবল প্ৰতিযোগিতা বুলি ক’লেই ৰাইজ হিলদ’ল ভাঙি ওলাই আহে । বিৰ দি বাট নোপোৱা অৱস্থাৰ সৃষ্টি হয় । ওচৰৰ পৰা খেলবিধক প্ৰত্যক্ষ কৰিব পৰা আৰু ফলাফলৰ বাবে ঘণ্টাৰ পিছত ঘণ্টা ৰৈ থাকিব নলগা এই খেলবিধৰ জনপ্ৰিয়তাৰ প্ৰতি লক্ষ্য ৰাখি আমি ঐক্যবদ্ধভাৱে উপৰোক্ত কথাবোৰৰ ওপৰত গুৰুত্ব প্ৰদান কৰি ভলীবলক আৰু অধিক আগবঢ়াই নিবলৈ যত্নপৰ হওঁ আহক। অসমক দেশখনৰ ভিতৰতে অধিক ভলীবল খেলা ৰাজ্য হিচাপে পৰিগণিত কৰো আহক । তেতিয়াহে ৰাষ্ট্ৰীয় ভলীবল প্ৰতিযোগিতাত অসম দলে পদক পোৱাৰ উপৰিও ধাৰাবাহিকতা অক্ষুন্ন ৰাখিবলৈ সমৰ্থৱান হ’ব ।

২০২০ চনৰ ১৫ জুনত সৰ্থেবাৰীৰ মাজদিয়াত সংঘটিত ট্ৰাক হাইজেক কাণ্ডটোৰ লগত জৰিত থকা তিনিজন অভিযুক্তক আটক। বৰপেটা জিলাৰ মাজদিয়া আৰক্ষীৰ জালত পৰিছে তিনি অভিযুক্ত । ধৃত তিনি অভিযুক্ত ক্ৰমে সৰ্থেবাৰী থানাৰ অন্তৰ্গত মাজদিয়াৰ পশ্চিম পাৰাৰ আৰফান খান, চুৰফান খান আৰু ৰৌছান খান বুলি জানিব পৰা গৈছে। গোপন খবৰৰ ভিত্তিত মাজদিয়া আৰক্ষী চকীৰ ভাৰপ্ৰাপ্ত আৰক্ষী বিষয়া প্ৰণৱ কুমাৰ দাসে অভিযান চলাই মংগলবাৰে পুৱতি নিশা আটক কৰে ধৃত অভিযুক্ত তিনিটাক। উল্লেখ্য যে ২০২০ চনৰ ১৫ জুনত মাজদিয়াত সংঘটিত হৈছিল এক চাঞ্চল্যকৰ ট্ৰাক হাইজেক কাণ্ড । দীৰ্ঘদিন ধৰি পলাতক হৈ আছিল ধৃত ট্ৰাক হাইজেকত অভিযুক্ত তিনিওজন। গুৱাহাটীৰ পৰা অহা মালভৰ্তি এ এচ ০১- এইচ চি- ৪০৯০ (AS01-HC- 4090)নম্বৰৰ ট্ৰাকখন হাইজেক কৰিছিল দুৰ্বত্তৰ দলে। ২০২০ চনৰ ১৫ জুনত মাজদিয়া আৰক্ষীয়ে মাজদিয়াত উদ্ধাৰ কৰিছিল হাইজেক হোৱা ট্ৰাকখন। ট্ৰাক হাইজেক কাণ্ডটোৰ লগত জৰিত থকাৰ অভিযোগত ইয়াৰ পূৰ্বে ৬ গৰাকী দুৰ্বত্তক আৰক্ষীয়ে গ্ৰেপ্তাৰ কৰাৰ পিছত আদালতে জে’ললৈ প্ৰেৰণ কৰিছিল। পূৰ্বতে গ্ৰেপ্তাৰ হোৱা দুৰ্বত্ত ৬টা ক্ৰমে হাইজেক কাণ্ডটোৰ মূল মাষ্টৰমাইণ্ড আলতাফ খান, ট্ৰাকখনৰ চালক চহিদুল ইছলাম, আমজাদ আলী, জাকিৰ আলী, ফুলচান খান আৰু ৰশ্মিল আলী। ট্ৰাক হাইজেক কাণ্ডটোৰ লগত জৰিত থকাৰ অভিযোগত বৰ্তমানলৈ ৯ গৰাকী ব্যক্তিক গ্ৰেপ্তাৰ কৰিবলৈ সক্ষম হৈছে মাজদিয়া আৰক্ষীয়ে। সৰ্থেবাৰী থানাত ২০৭/২০২০ নম্বৰ গোচৰ আৰু ভাৰতীয় দণ্ড বিধি আইনৰ ৩৯৫ ধাৰাত ট্ৰাক হাইজেক সন্দৰ্ভত গোচৰ ৰুজু হৈছিল।