নাজিৰাৰ আকাশত প্ৰচণ্ড ধুমুহা বৰষুণৰ মাজতে ১৭ আৰু ১৮ জুনৰ নিশা প্ৰায় ১১মান বজা চকুত পৰে এটা জোন অথবা তৰা সদৃশ এক মৃদু পোহৰৰ উৎস । নাজিৰাৰ ব’ৰ্ডিং ৰোডৰ এজন নাগৰিকে প্ৰথমে কলাঘন আকাশত প্ৰচণ্ড ডাৱৰৰ মাজতে পূব আৰু দক্ষিণ আকাশত দেখা পোৱা এই পোহৰৰ উৎস কোনো তৰা বুলি ঠাৱৰ কৰিবলৈও অৱকাশ নাছিল । নিশাই কেইবাজনো বন্ধুক ব্যক্তিজনে এই কলা ডাৱৰৰ মাজত জিলিকি থকা পোহৰৰ কথা ফোনযোগে জনোৱাত কোনো কোনোৱে প্ৰত্যক্ষ কৰিবলৈ সক্ষম হয় । স্থানীয় সাংবাদিক সকলেও সেই পোহৰ উৎসৰ ফটো লোৱাৰ প্ৰয়াস কৰিও কেমেৰাৰে ঢুকি পোৱাত বিফল  হয় । নাজিৰা ব’ৰ্ডিং ৰোডৰ পৰা এই প্ৰতিবেদকে  কেমেৰাৰে প্ৰচেষ্টা চলাই ফটো তুলিবলৈ সক্ষম হয় । কোনো সময়ত লুকাই পৰা পোহৰ উৎস ক্ৰমাৎ দক্ষিণ আকাশমুখী হোৱা প্ৰত্যক্ষ কৰাৰ লগতে নিশা ১ বজা পৰ্য্যন্ত ছেগা-চোৰোকাকৈ প্ৰত্যক্ষ কৰা হয় এই পোহৰ । হঠাৎ  ধুমুহা বৰষুণৰ পাছতে ডাৱৰ ভৰা আকাশৰ সকলো জ্যোতিস্ক নিস্প্ৰভ হৈ ৰোৱাৰ সময়ত এই পোহৰৰ উৎস প্ৰকৃততে কি ? কোনো কোনো অনুসন্ধিৎসু ব্যক্তিয়ে এয়া কোনো অনুসন্ধানকাৰী সংস্থাৰ উপগ্ৰহৰ বিচৰণ নতুবা “ইউএফঅ’ বুলি কোৱাৰ বিপৰীতে আন একাংশই ইছৰ’ অথবা  নাছাৰ মিছনবুলি অভিহিত কৰিছে ।  আকাশৰ বুকুত আকস্মিকভাৱে আৱিৰ্ভাৱ হোৱা এই পোহৰ উৎসই এক ৰহস্যৰ সৃষ্টি কৰিছে ।

ৰাজ্যত অৱশেষত বাতিল কৰা হ’ল ২০২১ বৰ্ষৰ HSLC আৰু HS চূড়ান্ত পৰীক্ষা। দীঘলীয়া বৈঠকৰ অন্তত এই ঘোষণা কৰিলে শিক্ষামন্ত্ৰী ৰণোজ পেগুৱে।আজি পৰীক্ষা অনুষ্ঠিত কৰাৰ সন্দৰ্ভত ৰাজ্যৰ কেইবাটাও দল-সংগঠনৰ সৈতে যেনে AASU, NBVP, RSS, SEBA, HSLC বৈঠকত বহিছিল ৰাজ্যৰ শিক্ষা বিভাগ। আৰু কোভিড পৰিস্থিতিৰ পৰিপ্ৰেক্ষিতত পৰীক্ষা বাতিলৰ সিদ্ধান্ত গ্ৰহণ কৰা হয়।আজিৰ বৈঠকত স্বাস্থ্য বিভাগে শেহতীয়া পৰিস্থিতিৰ সন্দৰ্ভত এখন প্ৰেজেণ্টেশ্যন দিয়ে।

বৰ্তমান মেট্ৰিক আৰু উচ্চতৰ মাধ্যমিক পৰীক্ষাৰ ফলাফল পূৰ্বৰ নম্বৰৰ ভিত্তিত দিয়া হ’ব। কাইলৈৰ দিনটোত দুখন কমিটী গঠন কৰিব ৰাজ্যৰ শিক্ষা বিভাগে। দুয়োখন কমিটীয়ে তৈয়াৰ কৰা মডেলিটীৰ ভিত্তিত অহা ৩১ জুলাইৰ পূৰ্বে উচ্চতৰ মাধ্যমিক আৰু হাইস্কুল শিক্ষান্ত পৰীক্ষাৰ ফলাফল ঘোষণা কৰা হ’ব।

তিনিচুকীয়া জিলাৰ ১২৫ নং ডুমডুমা বিধান সভা সমষ্টিৰ অন্তৰ্গত মুঠ পোন্ধৰ কিলোমিটাৰ দৈঘ্যৰ ফিল’বাৰী -কাকপথাৰ সংযোগী লোক নিৰ্মাণ বিভাগৰ অধীনৰ পথৰ  প্ৰায় ২ কিলোমিটাৰ দৈৰ্ঘ্যৰ অংশ বিগত দুবছৰ ধৰি  বিধস্ত হৈ থকা অৱস্থাই জ্বলা-কলা খুৱাইছে অঞ্চলটোৰ ৰাইজক । ডুমডুমা-ফিল’বাৰী ঘাই পথৰ পৰা গৌৰীপুৰ, শিতলপুৰ,  নগাঁও, ৰুমাই গাভৰু আদি গাঁৱৰ মাজেদি পাৰহৈ  কাকপথাৰ- টঙনা পথত সংযোগ হোৱা দুৱাৰমৰা খেৰজান পথ নামেৰে লোক নিৰ্মান বিভাগে নাম কৰণ কৰা তথা ফিল’বাৰীৰ ৰাইজৰ কাকপথাৰস্থিত উন্নয়ন খণ্ড কাৰ্য্যালয়লৈ যাতায়তৰ একমাত্ৰ  পথটোৰ   ডুমডুমা নদীৰ দলঙৰ দুয়ো পাৰে বিধস্ত হোৱা প্ৰায় তিনি কিলোমিটাৰ অংশ মেৰামতিৰ দাবীত বাৰম্বাৰ দাবী সাব্যস্ত কৰি অহা হৈছে যদিও কোনো গুৰুত্ব প্ৰদান কৰা নাই গড়কাপ্তানী বিভাগ আৰু জনপ্ৰতিনিধিয়ে। প্ৰায় চাৰি বছৰৰ আগতে প্ৰধানমন্ত্ৰী গ্ৰাম চৰক যোজনাৰ অধীনত পকীকৈ নিৰ্মাণ কৰা এই পথটোৰ  বৰ্তমান ফিল’বাৰী নেপালী প্ৰাথমিক বিদ্যালয়ৰ পৰা   ডাঙৰীয়া থান লৈকে প্ৰায়  তিনি কিলোমিটাৰ অংশত সৃষ্টি হৈছে প্ৰকাণ্ড প্ৰকাণ্ড গাঁতৰ। যাৰ ফলত, দুচকীয়া-চাৰিচকীয়া বাহনটো বাদেই, পদচাৰীয়েও সেই পথ অংশ অতিক্ৰম কৰাত অসুবিধাৰ সৃষ্টি হয়। সেই পথেৰে  বিশেষকৈ  ৰোগীক অনা নিয়া কৰাটো হৈ পৰিছে অন্যতম প্ৰত্যাহ্বান। বিগত সময়ত তদানীন্তন কংগ্ৰেছী বিধায়ক দুৰ্গা ভূমিজক ৰাইজে বহুবাৰ আবেদন জনোৱাত  তেওঁ সেই ভগ্ন অংশ মেৰামতিৰ আশ্বাস দিছিল যদিও, এই আবেদন অৰণ্য ৰোদনত পৰিণত হয়। তদুপৰি, বৰ্তমান ডুমডুমা সমষ্টিৰ নৱনিৰ্বাচিত বিজেপি দলৰ বিধায়ক ৰূপেশ গোৱালায়ো এই ক্ষেত্ৰত নীৰৱতা অৱলম্বন কৰা দেখা গৈছে। উল্লেখ্য যে , প্ৰধানমন্ত্ৰী গ্ৰাম চৰক যোজনাৰ নীতি অনুসৰি , সংশ্লিষ্ট নির্মাণকাৰী সংস্থাই নিৰ্দিষ্ট সময়লৈকে পথৰ মেৰামতি কৰিব লাগে যদিও, লোকনিৰ্মান বিভাগৰ গুৰুত্বহীনতাত কোনো ধৰণৰ মেৰামতি কৰা নাই। কিন্তু, লোক নিৰ্মাণ  বিভাগৰ অকৰ্মণ্যতাতেই হওক কিম্বা জনপ্ৰতিনিধিসকলৰ অমনোযোগিতাই হওক এই পথঅংশৰ মেৰামতি বা পুনৰ নিৰ্মাণৰ ক্ষেত্ৰত বাৰে বাৰে  বঞ্চিত হোৱাত অঞ্চলবাসীৰ পুঞ্জীভূত ক্ষোভৰ উদ্গীৰণ যে নিশ্চিতভাৱে এদিন হব সেইয়া ধূৰুপ ।

লখিমপুৰ জিলাৰ ঢকুৱাখনা মহকুমাৰ বিভিন্ন চৰকাৰী বিভাগবোৰৰ মুৰব্বী বিষয়া সকলক লৈ আজি ঢকুৱাখনাৰ মহকুমাধিপতিৰ কাৰ্যলয়ৰ সভা কক্ষত এখন গুৰুত্বপূৰ্ণ বৈঠক অনুষ্ঠিত হয়।আজি ঢকুৱাখনা মহকুমাধি পতিৰ কাৰ্যালয়ৰ সভাকক্ষত লখিমপুৰ জিলাৰ উপায়ুক্ত সুমিত সৎৱানৰ উপস্থিতিত বিধায়ক নৱ কুমাৰ দলেৰ অধ্যক্ষতাত আৰু ঢকুৱাখনাৰ মহকুমাধিপতি গুৰনেইল সিঙৰ সহযোগত অনুষ্ঠিত সভাখনত ঢকুৱাখনা মহকুমাটোৰ-স্বাস্থ্য বিভাগ,শিক্ষা বিভাগ,লোক নিৰ্মাণ বিভাগ,জন স্বাস্থ্য কাৰিকৰী বিভাগ,পশুপালন বিভাগ,কৃষি বিভাগ,বিদ্যুৎ বিভাগ,জল সিঞ্চন বিভাগ,পঞ্চায়ত আৰু গ্ৰামোন্নয়ন বিভাগৰ লগতে অন্যান্য চৰকাৰী বিভাগৰ মুৰব্বী বিষয়া সকলে অংশগ্ৰহণ কৰে।সভাত জিলা উপায়ুক্ত আৰু বিধায়ক গৰাকীৰ আগত বিভিন্ন চৰকাৰী বিভাগবোৰে মহকুমাটোত ৰূপায়ন কৰা ভিন্ন আঁচনিৰ কাম-কাজৰ অগ্ৰগতিৰ সন্দৰ্ভত এক পৰ্যালোচনা আগবঢ়াই। তদুপৰি এই সভাখনতে ক’ভিড-১৯ মহামাৰীয়ে সৃষ্টি কৰা সাম্প্ৰতিক পৰিস্থিতি,সম্ভাব্য বানপানী,খহনীয়া সমস্যা আৰু ইয়াৰ সমাধান, কৃষি, যাতায়ত-যোগাযোগ ব্যৱস্থা আদি কৰি বিভিন্ন বিষয়ৰ ওপৰত আলোচনা কৰা হয়। বৈঠকত লখিমপুৰ জিলা পৰিষদৰ সভানেত্ৰী মঞ্জু বৰগোঁ‌হাই,ঢকুৱাখনা, ঘিলামৰা আৰু বগীনদী উন্নয়ন খণ্ডৰ খণ্ড উন্নয়ন বিষয়া সকলৰ লগতে ভালে সংখ্যক অন্যান্য বিভাগৰ বিষয়া-কৰ্মচাৰী সকলো উপস্থিত থাকে।