সুদূৰ কেৰেলাৰ পৰা দুমাহ পূৰ্বে নগাওঁলৈ শ্ৰমিক থবলৈ আহি ক’ভিড কেন্দ্ৰীক পৰিস্থিতিৰ  পৰিপ্ৰেক্ষিতত  আন্তঃ ৰাজ্যিক বন্ধৰ বাবে নগাঁওত আৱদ্ধ হৈ থাকি ১৬ জুনত এক দুৰ্ভাগ্যজনক পৰিস্থিতিত  অকাল মৃত্যুক সাৱটি লোৱা কেৰেলাৰ ক’চিৰ অভিজিৎ এম এম নামৰ বাছ চালক জনৰ মৃতদেহটো ১৭ জুনৰ দিনা সন্ধিয়া মুখ্যমন্ত্ৰী ডঃ হিমন্ত বিশ্ব শৰ্মাৰ নিৰ্দেশত পৰিবহন বিভাগে বিমানেৰে নিজ গৃহলৈ প্ৰেৰণ কৰে । জানিব পৰা মতে অকাল মৃত্যুক সাৱটি লোৱা চালক জনৰ মৃতদেহটো উপযুক্ত মৰ্য্যদা সহকাৰে যাতে বিমানেৰে প্ৰেৰণ কৰা হয় তাৰ বাবে মুখ্যমন্ত্ৰী ডঃ হিমন্ত বিশ্ব শৰ্মাই ১৬ জুনৰ দিনা নিশাই ৰাজ্যৰ পৰিবহন মন্ত্ৰী চন্দ্রমোহন পাটোৱাৰী আৰু পৰিবহন আয়ুক্ত আদিল খানক নিৰ্দেশ দিয়ে । মুখ্যমন্ত্ৰীৰ নিৰ্দেশৰ পাছতেই পৰিবহন মন্ত্ৰী আৰু পৰিবহন আয়ুক্তই ত ততালিকে কেৰেলালৈ যোৱা বিমানৰ সন্ধান কৰে । অৱশেষত গুৱাহাটীৰ পৰা নতুন দিল্লী হৈ কেৰেলাৰ ক’চিলৈ যোৱা এয়াৰ ইণ্ডিয়াৰ কাৰ্গ বিমান এখনত মৃতদেহ লৈ যোৱাৰ সিদ্ধান্ত গ্ৰহণ কৰা হয়  । সেই অনুসৰি কামৰূপ মহানগৰ জিলাৰ  জিলা পৰিবহন বিষয়াদ্বয়  গৌতম দাস আৰু হিমাংশু দাসৰ তত্বাৱধানত মৃতদেহ বৰঝাৰস্থিত লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰলৈ অনা হয় । বৰঝাৰ বিমান বন্দৰত দুয়োগৰাকী  জিলা পৰিবহন বিষয়াৰ উপৰি যান বাহন পৰিদৰ্শক জয় সিং ৰংফাৰ , প্ৰৱৰ্তক পৰিদৰ্শক নিতুল চেতীয়াকে ধৰি বিভাগৰ কেবাজনো কৰ্মীয়ে চালক অভিজিৎ এম এমৰ নশ্বৰ দেহত শেষ শ্ৰদ্ধা নিবেদন কৰে । তাৰ পাছত উপযুক্ত মৰ্যাদা সহকাৰে মৃতদেহটো  কেৰেলা চৰকাৰৰ সৈতে কৰা  যোগাযোগ অনুসৰি মৃত চালক জনৰ সহযোগী মহম্মদ লটিফৰ দায়িত্বত বিমানত প্ৰেৰণ কৰা হয় । ইতিমধ্যে মৃতদেহটো চালক জনৰ ঘৰ পোৱা বুলি কেৰেলা চৰকাৰে অসম চৰকাৰক জনাইছে ।

সমগ্ৰ ৰাজ্য মহামাৰী ক’ৰণাৰ গ্ৰাসত পৰাৰ সময়ত সাধাৰণ জনতাৰ সমান্তৰালভাৱে শিল্পীসকলৰ জীৱনলৈ নামি আহিছে অন্ধকাৰ। তাৰ মাজতেই যুৱপ্ৰজন্মৰ সংগীত শিল্পী অসীম ৰঞ্জনৰ এটি গানে বেছ চৰ্চা লাভ কৰিছে। পাতি ৰাভাসকলৰ ভাষাত এগৰাকী যুৱতীৰ বৰ্ণনাৰে কবি বিৰিঞ্চি ৰাভাই ৰচনা কৰা গীতটি কণ্ঠদান কৰিছিল উদীয়মান কণ্ঠশিল্পী অসীম ৰঞ্জনে। যোৱা জানুৱাৰী মাহত অসম মেঘালয় সীমান্তবৰ্তী চানডুবিৰ বাকৰিত ৰাইজৰ বাবে মুকলি কৰি দিয়া গীতটিয়ে সূদুৰ দক্ষিণ আফ্ৰিকাৰ দৰে দেশ এখনত চৰ্চিত হৈছে। আফ্ৰিকান লোকে উক্ত গীতৰ তালে তালে নৃত্যত মতলীয়া হৈ পৰাৰ দৃশ্য কেমেৰাত বন্দি কৰি এৰি দিছিল সামাজিক মাধ্যম CLIN CLASSIC নামৰ পেজ এটিত। ইয়াৰ পিছতেই চাৰিওফালে গীতৰ তালে তালে নৃত্য কৰা আফ্ৰিকান দুই যুৱকৰ ভিডিঅ’ ৰাজ্যত প্ৰচাৰ হোৱাত উৎফুল্লিত হৈ পৰিছে কণ্ঠশিল্পী অসীম ৰঞ্জনে। এই সন্দৰ্ভত কণ্ঠশিল্পী গৰাকীয়ে জানিবলৈ দিয়ে যে, যিকোনো শিল্পীয়ে কণ্ঠদান কৰা গীতত বৰ্হি: ৰাজ্যত এনেদৰে সমাদৰ লাভ কৰা বিষয়টো সচাকৈয়ে আনন্দৰ বিষয়। দেশ তথা ৰাজ্যত এনে দুৰ্যোগৰ সময়তো এনে ধৰণৰ খৱৰে বৰুকৈয়ে উৎসাহিত কৰা বুলি মন্তব্য কৰে কণ্ঠশিল্পী অসীম ৰঞ্জনে। লগতে কণ্ঠদান কৰা পাতি ৰাভাৰ “জেৱা এগো দেখা পালো চুলি জেল জেল” গীতটিৰ দুফাকি পৰিবেশন কৰি ‘জেৱা’ এগৰাকী ছোৱালী আৰু এই ছোৱালী গৰাকীকলৈয়ে ৰোমান্তিক গীতটিত পৰিস্ফূত হৈছে বুলি প্ৰকাশ কৰে কণ্ঠশিল্পী অসীমে। উল্লেখ্য যে, দক্ষিণ কামৰূপৰ ছয়গাঁও সমষ্টিৰ উদীয়মান কণ্ঠশিল্পী অসীম ৰঞ্জনে বৰ্তমানলৈ প্ৰায় ২০০ টি গীত নিজশ্ব কণ্ঠত পৰিবেশন কৰি ৰাইজৰ মাজত মুকলি কৰিছে। ছয়গাঁও নিবাসী যদিও বহুদিন ধৰি পলাশবাৰী সমষ্টিৰ মিৰ্জাত ভাড়াঘৰত সংগীতৰ চৰ্চা কৰি থকাৰ লগতে নিজা প্ৰচেষ্টাত ‘মা’ নামৰ ষ্টুডিঅ’ এটি খুলি সংগীত চৰ্চা কৰি আছে। আনহাতে অহা ২০ জুনত ‘ৰাভা দিৱস’ত কলাগুৰু বিষ্ণু প্ৰসাদ ৰাভাৰ ওপৰত নিজেই ৰচনা কৰা গীত এটিত কণ্ঠ নিগৰাই ৰাইজৰ মাজত মুক্তি দিয়াৰ চিন্তা চৰ্চা কৰাৰ  লগতে গীতটিৰ যাৱতীয় কাম প্ৰায় সম্পূৰ্ণ হৈ উঠা বুলি জানিবলৈ দিয়ে কণ্ঠশিল্পী অসীম ৰঞ্জনে।

কেন্দ্ৰীয় চৰকাৰৰ নিৰ্দেশ অনুযায়ী দিল্লীলৈ ৰাওঁনা হয় অসমৰ প্ৰাক্তন মুখ্য মন্ত্ৰী তথা বৰ্তমানৰ মাজুলীৰ বিধায়ক সৰ্বানন্দ সোণোৱাল। বৰঝাৰ বিমানবন্দৰৰ পৰা ১২:৩০ মিনিটত ‘ ভিষ্টাৰা ইউ কে-৭২১’ বিমানেৰে ৰাওঁনা প্ৰাক্তন মুখ্যমন্ত্ৰী গৰাকী। সূত্ৰ অনুসৰি এক বিশেষ আলোচনাৰ বাবে কেন্দ্ৰীয় চৰকাৰৰ দ্বাৰা তেওঁক তৎকালীনভাৱে মাতি পঠিওৱা হৈছে।

অন্তহীন দুৰ্নীতিৰ বোকাত বুৰ যোৱা অভিযুক্ত মনেশ্বৰ ডেকাই শৰণ ল’লে এইবাৰ ভগৱানৰ। দীৰ্ঘদিনীয়া অপেক্ষাৰ পিছত সংযোগ স্থাপন হোৱা আমাৰ এক আছুতীয়া সাক্ষাৎকাৰত তেওঁ এই কথা ব্যক্ত কৰে। তেওঁ কয় যে তেওঁৰ বিৰুদ্ধে উত্থাপন হোৱা অভিযোগ, অপবাদবোৰ মিছা আৰু ইয়াৰ বিচাৰ হেনো ঈশ্বৰে দিব। Attention বৰ্তমানৰ জলসিঞ্চন বিভাগৰ মন্ত্ৰী অশোক সিংহল। অসমৰ কোনো এটা চৰকাৰী বিভাগত শীৰ্ষ বিষয়াৰ নাটনি হোৱাটো স্বাভাৱিক। আৰু ইতিমধ্যে এই কথা বৰ্তমানৰ মূখ্যমন্ত্ৰী ড০ হিমন্ত বিশ্ব শৰ্মাই স্বীকাৰ কৰিছে। সেয়েহে তেওঁ এক লাখ বিষয়াক নতুনকৈ নিযুক্তি প্ৰদান কৰাৰ সিদ্ধান্ত গ্ৰহণ কৰে। আমাৰ পূৰ্বৰ প্ৰতিবেদনত উল্লেখ্য প্ৰাক্তন মন্ত্ৰী ভৱেশ কলিতাৰ সৈতে হোৱা এক টেলিফোনিক সাক্ষাৎকাৰত তেওঁ জানিবলৈ দিয়া মতে তেওঁৰ কাৰ্যকালত হেনো উচ্চ পদস্থ বিষয়াৰ খুবেই নাটনি আছিল। সেই বাবে মনেশ্বৰ ডেকাৰ দৰে এগৰাকী কনিষ্ঠ বিষয়াক ভাৰপ্ৰাপ্ত কাৰ্যবাহী অভিযন্তা হিচাপে পদস্থ কৰা হৈছিল। কিন্তু প্ৰকৃততে তেনে ভাৰপ্ৰাপ্ত বিষয়াৰ কাৰ্যকাল থাকে প্ৰায় ছমাহ। এতিয়া প্ৰশ্ন হৈছে যদিহে বিভাগীয় নিয়মানুবৰ্তিতা অনুসৰি এগৰাকী কনিষ্ঠ বিষয়াক মাত্ৰ ছমাহলৈ হে ভাৰপ্ৰাপ্ত বিষয়া ৰূপে পদস্থ কৰিব পৰা যায়। কিন্তু দুৰ্নীতিৰ অভিযোগত অভিযুক্ত মনেশ্বৰ ডেকাই সুকলমে অতিক্ৰম কৰে তিনিটা বছৰ। জলসিঞ্চন বিভাগৰ দৰে অসমৰ এক প্ৰধান আগশাৰীৰ চৰকাৰী বিভাগত হোৱা এনে দুৰবস্থাৰ চূড়ান্ত দুৰ্ভাগ্যজনক আৰু চিন্তনীয় বিষয় । আমাৰ পূৰ্বৰ সকলো প্ৰতিবেদনত ফাদিল হোৱা কিছু নাভূত নাশ্ৰুত কথা বিভাগটোৰ একাংশৰ মতে এক লজ্জাজনক আৰু চিন্তাৰ বিষয় হৈ পৰিছে। দীৰ্ঘদিন ধৰি বিভাগত চলাই অহা তেওঁৰ একনায়কত্ববাদ, বিষয়াৰ পদোন্নটি আৰু বদলিকৰণত কমিচনৰ মুকলি বজাৰ চলোৱাৰ লগতে আঁচনি ৰূপায়ণৰ ক্ষেত্ৰত কৰা দুৰ্নীতিৰ অভিযোগ উত্থাপন হোৱা মনেশ্বৰ ডেকাৰ মূৰৰ পৰা তদানীন্তন মন্ত্ৰীয়ে হাত উঠুৱাৰ পিছতেই তেওঁ সকলো ঈশ্বৰৰ বিচাৰত এৰি দিয়ে। বিভাগীয় দুৰৱস্থাক এতিয়া কোনে চকু দিব সেইয়া এক ডাঙৰ প্ৰশ্ন। প্ৰাক্তন মন্ত্ৰীৰ কাৰ্যকালত হোৱা এনে দূৰৱস্থাক এপলক চকু ফুৰাব নে বৰ্তমানৰ মন্ত্ৰী অশোক সিংহালে? অৱশেষত কেইবাদিনজোৰা প্ৰচেষ্টাৰ অন্তত আমাৰ সাংবাদিকৰ সৈতে হোৱা এক আছুতীয়া আলাপত তেখেতে কয় যে যদিহে তেওঁ ইমানেই লুণ্ঠন আৰু দুৰ্নীতি কৰা বুলি উত্থাপন হৈছে তেন্তে তেখেতৰ বিভাগীয় কৰ্তিপক্ষৰদ্বাৰা তেওঁৰ ওপৰত কোনো শীৰ্ষ বিষয়াই কিয় কোনো তদন্ত চলোৱা নাই অৰ্থাৎ Higher Authority য়ে কোনো ব্যৱস্থা গ্ৰহণ কৰা নাই কিয় । তেওঁ ব্যক্ত কৰে যে বিভাগত হোৱা যিকোনো কাৰ্যৰ বাবে লোৱা সিদ্ধান্ত তেওঁৰ দ্বাৰা গ্ৰহণ হোৱাৰ পিছত শীৰ্ষ বিষয়ালৈও প্ৰেৰণ কৰা হয়। ঠিক তেনে স্থলত যদিহে দুৰ্নীতি আৰু লুণ্ঠন কাৰ্য সংঘটিত হৈছে তেনেহলে ইয়াতে বিভাগীয় শীৰ্ষ বিষয়া আৰু বিভাগীয় কতৃপক্ষও সমানে জড়িত হৈ আছে।

ক’ভিড কেন্দ্ৰীক ভয়াবহতা স্বত্তেও গুৱাহাটী মহানগৰীত একাংশ লোকে কৌশলৰে চলাই আছে দেশী – বিদেশী অবৈধ সুৰাৰ বেহা । এনে অবৈধ বেহা বন্ধ কৰিবলৈ   আবকাৰী বিভাগৰ  কামৰূপ মহানগৰ জিলাৰ আবকাৰী অধীক্ষক মানৱী দাস আৰু উপ আবকাৰী অধীক্ষক  ভূপেন্দ্ৰ নাথ শৰ্মাৰ নেতৃত্বত  আজি দিনৰ ভাগত  গুৱাহাটী সদৰৰ আবকাৰী চক্ৰই  মহানগৰীৰ বিভিন্ন অঞ্চলত অবৈধ সুৰাৰ বিৰুদ্ধে এক অভিযান চলায় । আৱকাৰী বিভাগৰ সূত্ৰই সদৰি কৰা ফটাশিল আমবাৰীৰ হৰিজন কলনী আৰু আঠগাঁওৰ উৰণীয়া সেতুৰ তলত   চলোৱা অভিযানত  ১৪  কার্টুন বিভিন্ন ব্ৰেণ্ডৰ বিদেশী সুৰা , ৫ কাৰ্টুন বিয়েৰ আৰু প্ৰায় ৫০০ লিটাৰ চুলাই মদ  জব্দ কৰে ।  অৱশ্যে  অভিযানকাৰী দলটোৱে এই সন্দৰ্ভত কোনো লোককে আটক কৰা নাই বুলি জানিব পৰা গৈছে ।

যোৱা নিশা মুষলধাৰ বৰষুণৰ ফলত কৃত্ৰিম বানৰ গ্ৰাহত পৰিল ঐতিহাসিক নাজিৰা নগৰ । ১৯০৯চনত স্থাপিত হোৱা এই নাজিৰা নগৰৰ নলা – নৰ্দমা সমূহৰ  পৰিস্কাৰকৰণ  , পকী নলা নিৰ্মাণ , পদ পথ নিৰ্মাণ আদি সুপৰিকল্পিত ভাৱে কামবোৰ কৰাৰ ক্ষেত্ৰত নিৰ্বাচিত জনপ্ৰতিনিধি সকলৰ লগতে পূৰ্বৰ নগৰ সমিতি তথা বৰ্তমানৰ পৌৰসভা – পৌৰ প্ৰশাসনৰ অপিপক্কতাৰ বাবেই এজাক পাতল বৰষুণতে ডুব যায় নগৰখনৰ ভালেকেইটা ৱাৰ্ড । তাৰোপৰি ক্ষমতাৰ খকত বলিয়ান জনপ্ৰতিনিধি সকলৰ জ্ঞানহীনতা আৰু গোপন ধনৰ খকৰ বাবেই যধে – মধে পকী গৃহ – সীমা বেৰা নিৰ্মাণৰ অনুমতি দিয়া অথবা অনুমতি বিহীন ভাৱেও নিৰ্মাণ হোৱা গৃহ – পকী বেৰা আদি বোৰৰ বাবেও নলা সমূহ ঠেক আৰু পানী ওলাই যাব নোৱাৰাকৈ নলা সমূহ বন্ধ কৰি ৰখা তথাকথিত সম্ভ্ৰান্ত পৰিয়ালৰ লোকসকলৰ কাণ্ডজ্ঞানহীনতাৰ বাবেই এনে কৃত্ৰিম বানত জোলোকা – জোলোকে জীয়াতু ভোগিব লগা হৈছে জনগণে । এজাক পাতল বৰষুণতে নগৰৰ মাজমজীয়াৰ চৰকাৰী সাহাৰ্য প্ৰাপ্ত চিকিৎসালয় , ২ , ৩ , ৪ , ৫ ,৬ , ৭ , ৮ , ৯ আৰু ১০ নং ৱাৰ্ডৰ বিভিন্ন স্থান , পথ আদি ডুব যায় । যোৱা নিশা অহা মুষলধাৰ বৰষুণৰ ফলত উক্ত ৱাৰ্ডৰ পথ সমূহৰ লগতে ভালেকেইটা গৃহত পানী সোমাই বিস্তৰ ক্ষতি কৰে । পৰিতাপৰ বিষয় যে , পৌৰ কৰ্তৃপক্ষই নিয়মীয়াকৈ নলা – নৰ্দমা পৰিস্কাৰ নকৰাৰ ফলত পানী ওলাই যাব নোৱাৰাৰ বাবেই এনেদৰে কৃত্ৰিম বানৰ সমস্যাৰ সন্মুখীন হৈ আহিছে নগৰৰ জনগণ । অবশ্যে মাজে মাজে নলাসমূহ পৰিস্কাৰ কৰে যদিও নলাৰ পৰা তুলি থোৱা জাবৰ – আবৰ্জনা আদিবোৰ পৌৰ কৰ্তৃপক্ষৰ গাড়ী থকাৰ পিছতো উঠাই নি নিৰ্দিষ্ট স্থানত পেলোৱাৰ সুপৰিকল্পিত ব্যৱস্থা নোহোৱাৰ বাবেই পুনৰ সেইবোৰ নলাত পৰি পোত যায় । যাৰ বাবে বৰষুণৰ পানী সহজতে ওলাই যাব নোৱাৰে । আনহাতে নগৰৰ নলাৰ পানী ওলাই যোৱাৰ বাবে আমোলাপট্টি এলেকাত পূৰ্বে থকা এটা নলা এতিয়া দখল কৰি বন্ধ কৰি দিয়াৰ উপৰি অপৰিকল্পিত ভাৱে নিৰ্মাণ হোৱা পকী নলা বোৰেদি পানী ওলাই যোৱাৰ সুগম নহয় । আনফালে নলাৰ পানী নাফুক জানত পেলোৱাৰ সুগম দিশ আছে যদিও কৰ্তৃপক্ষই আজি পৰ্যন্ত নলা সমূহেই নিৰ্মাণ কৰি সম্পূৰ্ণ কৰিব নোৱাৰাটো চৰম পৰিতাপৰ বিষয় হৈ পৰিছে ।