হোজাই জিলাৰ উদালিৰ ফুলতলী মডেল হাস্পতালত এগৰাকী চিকিৎসকক নির্মমভাৱে প্রহাৰ কৰা ঘটনা সন্দর্ভত নিজাববীয়া গোচৰ ৰুজু কৰিছে গুৱাহাটী উচ্চ ন্যায়ালয়ে৷ ক’ভিড কেয়াৰ চেণ্টাৰত কর্তব্যৰত চিকিৎসকজনক প্রহাৰ কৰা ঘটনা সন্দর্ভত ৰুজু কৰা ৪/২০২১ নম্বৰৰ ৰাজহুৱা স্বার্থজড়িত গোচৰৰ শুনানি গ্রহণ কৰি মঙলবাৰে ন্যায়ালয়ে ঘটনা সন্দর্ভত তদন্তৰ খতিয়ান দাখিল কৰিবলৈ নির্দেশ দিছে৷

দুসপ্তাহৰ ভিতৰত উচ্চ ন্যায়ালয়ত ৰাজ্য চৰকাৰে দাখিল কৰিব লাগিব এই প্রতিবেদন৷ তদুপৰি মুখ্য ন্যায়াধীশ সুধাংশু ঢুলীয়া আৰু ন্যায়াধীশ মানস ৰঞ্জন পাঠকৰ খণ্ড বিচাৰপীঠে এনে ঘটনা ভৱিষ্যতে ৰোধ কৰাৰ বাবে চৰকাৰে কি ব্যৱস্থা গ্রহণ কৰিছে, সেই সন্দর্ভতো সবিশেষ প্রতিবেদন দাখিল কৰিবলৈ নির্দেশ দিছে৷ দুসপ্তাহৰ ভিতৰতে ৰাজ্য চৰকাৰে উচ্চ ন্যায়ালয়ত এই প্রতিবেদন দাখিল কৰিব লাগিব৷

ইপিনে, মাৰণাস্ত্র লৈ যাতে কোনো লোক হাস্পতালৰ ভিতৰত প্রৱেশ কৰিব নোৱাৰে, সেয়া নিশ্চিত কৰিবলৈ নির্দেশ দিছে৷ একেদৰে এই সন্দর্ভত প্রতিখন মেডিকেল কলেজ হাস্পতালৰ বাহিৰত সঠিক সতর্কবাণীৰ জাননী আঁৰিবলৈ নির্দেশ দিছে গুৱাহাটী উচ্চ ন্যায়ালয়ে৷

উল্লেখ্য যে অহা ১৪ জুলাইত গোচৰটোৰ পৰৱর্তী শুনানিৰ দিন ধার্য কৰা হৈছে৷ উল্লেখ্য যে কিছুদিন পূর্বে সেউজ কুমাৰ সেনাপতি নামৰ এগৰাকী চিকিৎসকক বর্বৰভাৱে প্রহাৰ কৰিছিল একাংশ উন্মত্ত লোকে৷ এজন ৰোগীক লৈ সৃষ্টি হোৱা উত্তপ্ত পৰিস্থিতিৰ পিছতে উত্তেজিত লোকসকলে চিকিৎসকগৰাকীৰ লগতে কর্তব্যৰত নার্ছ আৰু স্বাস্থ্যকর্মীক প্রহাৰ কৰিছিল৷ এই সমগ্র ঘটনাই দেশজুৰি প্রতিক্রিয়াৰ সৃষ্টি কৰাৰ লগতে ৰাজ্যজুৰি চিকিৎসকসকলে প্রতিবাদ সাব্যস্ত কৰে৷ চিকিৎসকৰ সুৰক্ষা নিশ্চিত কৰিবলৈ ৰাজ্যবাসীয়ে একমুখে দাবী উত্থাপন কৰিছিল৷

ক’ভিড মহামাৰীয়ে জটিল পৰিস্থিতিৰ সৃষ্টি কৰাৰ সময়তে চিকিৎসকক প্রহাৰৰ ঘটনাক সমাজৰ সকলো স্তৰৰ লোকে গৰিহণা দিছিল৷ অৱশ্যে তাৎক্ষণিকভাৱে আৰক্ষীয়ে ঘটনাত জড়িত লোকসকলক গ্রেপ্তাৰ কৰিবলৈ সক্ষম হৈছিল৷

মৰিগাঁও জিলাৰ লাহৰীঘাট থানাৰ ভাৰপ্ৰাপ্ত আৰক্ষী বিষয়া অদিত বঢ়োৰ নেতৃত্বত আৰক্ষী সজাতী দলে গোপন সূত্ৰৰ পমখেদি দুটা ড্ৰাগছ সৰবৰাহী   আটক  কৰে। আৰক্ষীয়ে আটক কৰা ড্ৰাগছ সৰবৰাহকাৰী   কেইটা ক্ৰমে দক্ষিণ চেনিমাৰি গাৱৰ  মকবুল ইছলাম ( ৩৭ ) আৰু ধিঙৰআটি গাৱৰ জেহিৰুল ইছলাম ( ৩৫ )  । ধৃত  ড্ৰাগছ সৰবৰাহী দুজনৰ  পৰা   ৮ টা হি’ৰইন ভৰ্তি ,৩টা খালি কণ্টেইনাৰ আৰু এটা মবাইল  উদ্ধাৰ কৰা হৈছে । ধৃত ড্ৰাগছ সৰবৰাহী দুটাৰ  বিৰুদ্ধে 345/21 U/S 21(a)/25/29 NDP’S Act ৰ অধীনত গোচৰ ৰুজু কৰি জেল হাজোতলৈ প্ৰেৰণ কৰে।

ৰাজ্যখনৰ বিভিন্ন জিলাত  প্ৰশাসনে উচ্ছেদ অভিযান আৰম্ভ কৰিছে । এই সকল উচ্ছেদিত লোকে কলৈ গৈছে, কি খাইছে কাৰোৰে জ্ঞাত নহয় যদিও  পাৰ্শ্বৱৰ্তী অঞ্চলৰ   জিলা সমুহত  উচ্ছেদিত লোক সকলে  থিতাপি লোৱাৰ  তথ্য সম্প্ৰতি পোহৰলৈ আহিছে । এক নিৰ্ভৰযোগ্য সুত্ৰে জানিব পৰা মতে  ভিন্ন জিলাৰ একাংশ উচ্ছেদিত লোকে  ব্ৰহ্মপুত্ৰ বুকুৱেদি নাৱৰে আহি ওৰাং ৰাষ্ট্ৰীয় উদ্যানৰ আশে পাশে থিতাপি লোৱাৰ কথা জানিব পৰা গৈছে ।  এই সকল সন্দেহযুক্ত নাগৰিকে  যিকোনো  সময়ত ওৰাং ৰাষ্ট্ৰীয় উদ্যানৰ পাৰ্শ্বৱৰ্তী অঞ্চলত  ৰাষ্ট্ৰীয় উদ্যান খনৰ মাটি বেদখল কৰাৰ সম্ভাৱনা প্ৰকট হৈ পৰিছে। জানিব পৰা মতে একাংশ লোকে বহ্নি জিলাৰ পৰা অহা লোক সকলক আশ্ৰয় দি উদ্যানৰ ভুমি বেদখল কৰাৰ পৰিকল্পনা কৰাৰ কথাও জানিব পৰা গৈছে । আনহাতে ৰাজ্যখনৰ উচ্ছেদিত লোকক  চৰকাৰ তথা স্থানীয় প্ৰশাসনে পুনৰ সংস্থাপনৰ ব্যৱস্থা গ্ৰহণ কৰিব লাগিছিল যদিও সেই সকল লোকক কোনো ধৰনৰ ব্যৱস্থা গ্ৰহণ নকৰাৰ বাবে এনেদৰে সন্দেহ জনক নাগৰিকৰ আগ্ৰাসন ঘটিছে ওৰাং ৰাষ্ট্ৰীয় উদ্যানৰ পাৰ্শ্বৱৰ্তী অঞ্চলত ।

মহানগৰ আৰক্ষীয়ে চোৰাং ব্যৱসায়ীৰ পৰা জব্দ কৰিছে বৃহৎ পৰিমাণৰ সোণ। ভৰলুমুখত  দুজন চোৰাং ব্যৱসায়ীৰ পৰা বৃহৎ পৰিমাণৰ সোণৰ বিস্কুট, মুদ্ৰা আৰু চেইন জব্দ কৰিছে আৰক্ষীয়ে। জব্দ সোণখিনি নগাঁৱৰ পৰা গুৱাহাটীলৈ অনা হৈছিল।

মহানগৰ আৰক্ষী আৰু ভৰলু আৰক্ষীযে AS-02-Z-9705 নম্বৰৰ চাৰিচকীয়া বাহন এখনৰ পৰা উদ্ধাৰ কৰে সোণখিনি । আৰক্ষীয়ে আটক কৰে মনোজ শ্বাহ আৰু আমান আলী নামৰ দুজন লোকক । জব্দ সোণখিনিৰ মূল্য প্ৰায় ৫০ লাখ টকা। পশ্চিম গুৱাহাটী জিলা আৰক্ষীয়ে তদন্ত অব্যাহত ৰাখিছে ।

নগাঁও চহৰৰ খুটিকটীয়াৰ স্বৰ্গীয় গোলোক চন্দ্ৰ মহন্ত আৰু স্বৰ্গীয় জেউতি মহন্তৰ শিল্পী পুত্ৰ  চিত্তদেৱ মহন্ত অসমৰ সাংস্কৃতিক ক্ষেত্ৰ খনৰ এক পৰিচিত নাম । বৰ্তমান  শিল্পী গৰাকীৰ বয়স ৭৪ বছৰ । আজীৱন সংগীতৰ সুৰীয়া যাত্ৰাতে নিমগ্ন একৰডিয়ান বাদক চিত্ত দেৱ মহন্তই নগাঁও ড’চন উচ্চতৰ মাধ্যমিক বিদ্যালয়ত শিক্ষা গ্ৰহণ কৰি থাকোতেই নগাঁৱৰ বিখ্যাত তবলাবাদক স্বৰ্গীয় বিবেকানন্দ ভট্টাচাৰ্য্যৰ তত্বাৱধানত তবলাৰ প্ৰশিক্ষণ লয় । প্ৰথমতে অৱশ্যে তেখেতে শাস্ত্ৰীয় সংগীতজ্ঞ সুশীল বেনাৰ্জীৰ ওচৰত প্ৰশিক্ষণ লৈছিল যদিও তবলাৰ প্ৰতি বেছি আকৰ্ষিত হোৱাত পাছত তবলাৰ প্ৰশিক্ষণ লয় । অসমৰ বিভিন্ন প্ৰান্তত বিভিন্ন মঞ্চত বহু কণ্ঠ শিল্পীৰ লগত তেওঁ তবলা সংগত কৰিছিল । সেই সমূহ অনুষ্ঠানৰ ভিতৰত স্মৰণীয় অনুষ্ঠান হিচাপে ১৯৭০ চনত নগাঁও জিলাৰ ধিং সাহিত্য সভাৰ অধিৱেশনত অসম তথা ভাৰতবৰ্ষৰ বিশিষ্ট কণ্ঠ শিল্পী পাৰবীন চুলতানা আৰু সেই সময়ৰ জনপ্ৰিয় পেৰডী গায়ক ৱাহিদুৰ ৰহমানৰ লগত অসমৰ বিভিন্ন ঠাইত অনুষ্ঠান পৰিৱেশন কৰিছিল । ইয়াৰ উপৰিও অসমৰ সেই খিনি সময়ৰ প্ৰায় সংখ্যাক খ্যাতনমা শিল্পীৰ লগত তবলা সংগত কৰিবলৈ সুবিধা পাইছল তেওঁ । সেই সকলৰ ভিতৰত তাৰিকউদ্দিন আহমেদ, চেতাৰ বাদক মতিউৰ ৰহমান , বেহেলাবাদক নিতাই চৰকাৰ , বাহী বাদক পাই দাস , বৰেণ্য কণ্ঠ শিল্পী খগেন মহন্ত, সূৰ্য দাস , চুয়েজ বৰদলৈ, ফুনু গোস্বামী, তুনু দেৱীকে লৈ বহু শিল্পীৰ লগত তবলা সংগত কৰিছিল তেওঁ । ১৯৭৯  চনত ‘সুৰ সমলয় সাংস্কৃতিক গোষ্ঠী’ প্ৰতিষ্ঠা কৰি নগাঁৱৰ ভালেসংখ্যক ন শিকাৰু শিল্পীক প্ৰতিষ্ঠিত কৰিছিল । চিত্তদেৱ মহন্তৰ ভগ্নী সাহিত্যিক, শিল্পী  অঞ্জলী মহন্তই আৰম্ভ কৰা অসমৰ প্ৰথমটো মহিলা মিউজিকেল বেণ্ড  ‘সুৰ সমলয়’ৰ মুখ্য পৰিছালক তেওঁ । ১৯ ৮২ চনত সুৰ সমলয়ৰ প্ৰযোজনাত ‘ গুৱাহাটীৰ জ্যোতি চিত্ৰবন ষ্টুডিঅত এখন গ্ৰামফোন ৰেকৰ্ডত প্ৰথম চাৰিটা গীত বানীবদ্ধ কৰোৱাইছিল । অসমৰ বিশিষ্ট কণ্ঠ শিল্পী অপূৰ্ব বেজবৰুৱা ,তৃষাৰাণী শইকীয়া, দিপ্তি দাস  আৰু ঘন বৰদলৈৰ কণ্ঠত বানীবদ্ধ কৰাইছিল সেই গীত সমুহ । চিত্তদেৱ মহন্তৰ সংগীতেৰে সজাই তোলা সেই গীত সমূহে তেতিয়া যঠেষ্ট সমাদৰ লাভ কৰিছিল । ১৯৮৪ চনত কলিকতাৰ এইচ এম ভি ত শিল্পী দ্বিজেন কাকতি আৰু কল্পনা ভূঞাই কণ্ঠ দান কৰা গ্ৰামফোন ৰেকৰ্ড খনিতো সংগীত পৰিছালনা কৰিছিল তেওঁ । ইয়াৰ পাছতেই তেওঁ একৰডিয়ানৰ প্ৰতি আকৰ্ষিত হয় । যি সময়ত তেওঁ এই বিধ বাদ্য যন্ত্ৰৰ প্ৰতি আকৰ্ষিত হৈছিল সেইখিনি সময়ত একৰডিয়ান নামৰ এই বিধ বাদ্যযন্ত্ৰৰ  কথা জনাই নাছিল বহুতে । বিশিষ্ট একৰডিয়ান বাদক ৰঞ্জিত ডে আৰু ৰাজেশ্বৰ বৰদলৈৰ ওচৰত  একৰডিয়ানৰ প্ৰশিক্ষণ লৈ তেওঁ আৰম্ভ কৰিছিল সংগীতৰ আন এক যাত্ৰা । নগাঁৱত প্ৰথম তেৱেঁই বিভিন্ন মঞ্চত একৰডিয়ান বজাইছিল । এটা সময়ত চিত্তদেৱ মহন্তৰ পৰিচয় অসমৰ সাংস্কৃতিক ক্ষেত্ৰ খনত এগৰাকী জনপ্ৰিয় একৰডিয়ান বাদক বুলিয়েই সকলোৱে জানিছিল আৰু এতিয়াও তেনেকৈয়ে জানে ।    এই গৰাকী বৰ্তমান ৭৪ বছৰীয়া শিল্পীয়ে বাৰ কেজি ওজনৰ একৰডিয়ান খন বুকুত লৈ আজিও বহু শিল্পীৰ লগত মঞ্চত অনুষ্ঠান পৰিবেশন কৰি আছে । চিত্তদেৱ মহন্তই সংগীত পৰিছালনা কৰা জনপ্ৰিয় কেছেট সমূহ আছিল  ‘মন কলিজা’, ‘ঢুলীয়া নাচনী’ ,’জয় হনুমান’, আদি । বিশিষ্ট শিল্পী অৱনী ৰঞ্জন পাঠকৰ প্ৰযোজনাত ‘এই চহৰৰ মায়াজাল’ নামৰ ভিডিঅ ছবি খনতো সংগীত পৰিছালনা কৰিছিল তেওঁ । ইয়াৰ উপৰিও ১৯ ৮৬ চনত অসম চৰকাৰৰ জনস্বাস্থ্য কৰিকৰী বিভাগৰ দ্বাৰা প্ৰযোজিত বিশুদ্ধ খোৱা পানীৰ উপৰত এখন তথ্য চিত্ৰও নিৰ্মাণ কৰিছিল তেওঁ ।       এই গৰাকী আজীৱন শিল্পীয়ে সংগীতৰ এই যাত্ৰাত বহু তিতা মিঠা অভিজ্ঞতাৰ সন্মোখিন হৈছে । কিন্তু শ্ৰোতা দৰ্শকৰ অভূতপূৰ্ব সমাদৰত আজিও জীপাল হৈ আছে তেখেতৰ শিল্পী মনটো । ১৯৭৯ চনত দুটি শিশু শিল্পী সুবীৰ গাংগুলী আৰু পাৰ্থ দাসক লগত লৈ শ্বিলং বঙাইগাঁও, গুৱাহাটীৰ দীপক সংঘ আৰু বহুতো ঠাইত কৰা অনুষ্ঠানে যঠেষ্ট জনপ্ৰিয়তা লাভ কৰিছিল । ওৰেটো জীৱন সংগীতৰ মাজেৰে পাৰ কৰা এই গৰাকী শিল্পীয়ে জীৱনকালত অসম সাহিত্য সভাকে লৈ বহু অনুষ্ঠান প্ৰতিষ্ঠানৰ পৰা বহু সন্মান বটা লাভ কৰাৰ লগতে অসম চৰকাৰেও এগৰাকী শিল্পী হিচাপে এককাললীন সাহাৰ্য আগবঢ়াইছিল । কিন্তু জীৱনৰ বিয়লি বেলাত আৰ্থিক নিৰাপত্তাৰহীনতাত ভুগিছে এই গৰাকী নগাঁৱৰ শিল্পীয়ে ।

শিৱসাগৰ জিলাৰ ১০৭ নং থাওৰা বিধান সভা সমষ্টিৰ অতিকৈ ভিতৰুৱা নিতাই মৌজাৰ গোঁহাইপুখুৰী পঞ্চায়তৰ জৰাজীৰ্ণ তথা বিধস্ত লাইবিলৰ দিহিঙৰ মথাউৰি আজি দিনৰ প্ৰায় ১১-৩০ মান বজাত পৰিদৰ্শন কৰে ৰাজ্যৰ  জলসম্পদ মন্ত্ৰী পিযুজ হাজৰিকাৰ । মন্ত্ৰীজনে সমষ্টিটোৰ  নিতাই মৌজাৰ লাইবিলৰ দিহিং নদী আৰু বকতা মৌজাত দিচাং  নদীৰ গৰাখহনীয়া হোৱা স্থানসমূহ পৰিদৰ্শন কৰি এক স্থায়ী সমাধানৰ পোষকতা কৰে। মন্ত্রীগৰাকীৰ লগত সাংসদ তপন কুমাৰ গগৈ, থাওৰা সমষ্টিৰ বিধায়ক সুশান্ত বৰগোহাঁই আৰু প্ৰাক্তন বিজেপি  বিধায়ক কুশল দুৱৰী, শিৱসাগৰ জিলা উপায়ুক্ত বিষ্ণুকমল বৰাসহ জলসম্পদ বিভাগৰ  অভিযন্তা,ঠিকাদাৰসহ প্ৰায় অৰ্ধশতাধিক বিষয়াৰ সৈতে নিতাইপুখুৰী মৌজাৰ দিহিং নৈ-পৰীয়া লাইবিলত  উপস্থিত হৈ দিহিঙৰ বিধস্ত খহনীয়াস্থলী প্ৰত্যক্ষ কৰে আৰু স্থানীয় ৰাইজৰ সৈতে বাৰ্তালাপ কৰি তেওঁলোকৰ মনৰ ভাৱ বুজ লয়। যোৱা কেইবাটাও দশক ধৰি ৰাজ্যৰ কোনো এজন বাননিয়ন্ত্ৰণ মন্ত্রীয়ে এই বিধস্ত দিহিং নদীৰ লাইবিলত উপস্থিত হোৱা নাছিল আৰু আজি মন্ত্রী পিয়ুষ হাজৰিকাই নতুনকৈ দায়িত্ব লাভ কৰিয়েই সেই স্হানত খহনীয়া ৰোধৰ বাবে দিহিঙৰ মথাউৰিৰ ৫০ মিটাৰ দৈৰ্ঘৰ অংশত অব্যাহত থকা চেমি পাৰমেনেন্ট জিঅ বেগৰ কামৰ অগ্ৰগতিৰ বুজ লয়।মন্ত্রীজনে পূৰ্বতকৈ ক্ষীপ্ৰগতিৰে ৰাজ্যৰ বিভিন্ন স্হানত মন্ত্ৰীজনে   পৰ্যায়ক্ৰমে মথাউৰি নিৰ্মাণ আৰু গৰাখহনীয়াৰ কাম কৰি যোৱা হ’ব বুলি ঘোষণা কৰে। দিহিঙৰ মথাউৰি পৰিদৰ্শন কালত জলসম্পদ বিভাগৰ মন্ত্ৰী পীয়ুস হাজৰিকাক ডিমৌৰ সাংবাদিকক কয় যে  মুখ্যমন্ত্ৰীৰ নিৰ্দেশ মৰ্মে মই প্ৰতিটো অঞ্চললৈ গৈ গৰাখহনীয়া পৰিদৰ্শন কৰিছো আৰু সমস্যা সমাধান কৰিবলৈ যত্ন কৰিম। থাওৰাৰ লাইবিল আৰু দিহিং কলঘৰৰ গৰাখহনীয়া সমস্যাটো স্থায়ী সমাধান কৰা হ’ব বুলি মন্ত্ৰী গৰাকীয়ে ৰাইজক প্ৰতিশ্ৰুতি দিয়ে। তেওঁ কয় যে ইতিমধ্যে জিঅ’বেগ দি প্ৰতিৰোধৰ ব্যৱস্থা কৰা হৈছে। এই জিঅ’বেগ সমুহৰ ২৫ বছৰ ভেলিডেটি আৰু তিনি বছৰলৈকে এই অংশ সুৰক্ষিত হৈ থাকিব বুলি কয়। ইফালে বহুল চৰ্চিত ডিমৌ নদীৰ  মথাউৰি নিৰ্মাণৰ তিনিমাহ নহওঁতেই ছিৰাল ফাট মেলা বিষয়ত মন্ত্ৰী পীয়ুজ হাজৰিকাই কয় যে উক্ত কামৰ বিল ঠিকাদাৰক মুকলি কৰি দিয়া হোৱা নাই। কাম সম্পূৰ্ণ নকৰালৈকে কোনো ঠিকাদাৰক বিল মুকলি কৰি নিদিবলৈ আৰু কামৰ তদন্ত কৰিবলৈ বিভাগীয় কাৰ্যবাহী অভিযন্তাক নিৰ্দেশ দিয়ে।  বাৰিষা আহিলেহে জলসম্পদ বিভাগে মথাউৰিৰ কাম কৰে বুলি সোধা সাংবাদিকৰ প্ৰশ্নৰ উত্তৰত মন্ত্ৰী হাজৰিকাই কয় মই বাৰিষা হোৱা মন্ত্ৰী। প্ৰথমবাৰলৈ দিহিমুখলৈ আহি কেনে লাগিল বুলি সাংবাদিকে সোধা প্ৰশ্নত মন্ত্ৰী গৰাকীয়ে কয় যে খিলঞ্জীয়া, ভূমিপুত্ৰৰ অঞ্চললৈ আহিছো ভাল লাগিছে। এই অঞ্চলত ভাল কাম এটা কৰিব পাৰিলে বেছি সুখী হম।  ইয়াৰ পিছতে তেওঁ থাওৰা সমষ্টিৰ বকতা কোঁৱৰ গাঁৱৰ দিচাঙৰ মথাউৰি পৰিদৰ্শন কৰে আৰু আবেলি দিচাংমুখৰ অফলাত দিচাঙৰ গৰাখহনীয়া পৰিদৰ্শন কৰিব ।