শিৱসাগৰ জিলাৰ ১০৭ নং থাওৰা বিধান সভা সমষ্টিৰ অতিকৈ ভিতৰুৱা নিতাই মৌজাৰ গোঁহাইপুখুৰী পঞ্চায়তৰ জৰাজীৰ্ণ তথা বিধস্ত লাইবিলৰ দিহিঙৰ মথাউৰি আজি দিনৰ প্ৰায় ১১-৩০ মান বজাত পৰিদৰ্শন কৰে ৰাজ্যৰ  জলসম্পদ মন্ত্ৰী পিযুজ হাজৰিকাৰ । মন্ত্ৰীজনে সমষ্টিটোৰ  নিতাই মৌজাৰ লাইবিলৰ দিহিং নদী আৰু বকতা মৌজাত দিচাং  নদীৰ গৰাখহনীয়া হোৱা স্থানসমূহ পৰিদৰ্শন কৰি এক স্থায়ী সমাধানৰ পোষকতা কৰে। মন্ত্রীগৰাকীৰ লগত সাংসদ তপন কুমাৰ গগৈ, থাওৰা সমষ্টিৰ বিধায়ক সুশান্ত বৰগোহাঁই আৰু প্ৰাক্তন বিজেপি  বিধায়ক কুশল দুৱৰী, শিৱসাগৰ জিলা উপায়ুক্ত বিষ্ণুকমল বৰাসহ জলসম্পদ বিভাগৰ  অভিযন্তা,ঠিকাদাৰসহ প্ৰায় অৰ্ধশতাধিক বিষয়াৰ সৈতে নিতাইপুখুৰী মৌজাৰ দিহিং নৈ-পৰীয়া লাইবিলত  উপস্থিত হৈ দিহিঙৰ বিধস্ত খহনীয়াস্থলী প্ৰত্যক্ষ কৰে আৰু স্থানীয় ৰাইজৰ সৈতে বাৰ্তালাপ কৰি তেওঁলোকৰ মনৰ ভাৱ বুজ লয়। যোৱা কেইবাটাও দশক ধৰি ৰাজ্যৰ কোনো এজন বাননিয়ন্ত্ৰণ মন্ত্রীয়ে এই বিধস্ত দিহিং নদীৰ লাইবিলত উপস্থিত হোৱা নাছিল আৰু আজি মন্ত্রী পিয়ুষ হাজৰিকাই নতুনকৈ দায়িত্ব লাভ কৰিয়েই সেই স্হানত খহনীয়া ৰোধৰ বাবে দিহিঙৰ মথাউৰিৰ ৫০ মিটাৰ দৈৰ্ঘৰ অংশত অব্যাহত থকা চেমি পাৰমেনেন্ট জিঅ বেগৰ কামৰ অগ্ৰগতিৰ বুজ লয়।মন্ত্রীজনে পূৰ্বতকৈ ক্ষীপ্ৰগতিৰে ৰাজ্যৰ বিভিন্ন স্হানত মন্ত্ৰীজনে   পৰ্যায়ক্ৰমে মথাউৰি নিৰ্মাণ আৰু গৰাখহনীয়াৰ কাম কৰি যোৱা হ’ব বুলি ঘোষণা কৰে। দিহিঙৰ মথাউৰি পৰিদৰ্শন কালত জলসম্পদ বিভাগৰ মন্ত্ৰী পীয়ুস হাজৰিকাক ডিমৌৰ সাংবাদিকক কয় যে  মুখ্যমন্ত্ৰীৰ নিৰ্দেশ মৰ্মে মই প্ৰতিটো অঞ্চললৈ গৈ গৰাখহনীয়া পৰিদৰ্শন কৰিছো আৰু সমস্যা সমাধান কৰিবলৈ যত্ন কৰিম। থাওৰাৰ লাইবিল আৰু দিহিং কলঘৰৰ গৰাখহনীয়া সমস্যাটো স্থায়ী সমাধান কৰা হ’ব বুলি মন্ত্ৰী গৰাকীয়ে ৰাইজক প্ৰতিশ্ৰুতি দিয়ে। তেওঁ কয় যে ইতিমধ্যে জিঅ’বেগ দি প্ৰতিৰোধৰ ব্যৱস্থা কৰা হৈছে। এই জিঅ’বেগ সমুহৰ ২৫ বছৰ ভেলিডেটি আৰু তিনি বছৰলৈকে এই অংশ সুৰক্ষিত হৈ থাকিব বুলি কয়। ইফালে বহুল চৰ্চিত ডিমৌ নদীৰ  মথাউৰি নিৰ্মাণৰ তিনিমাহ নহওঁতেই ছিৰাল ফাট মেলা বিষয়ত মন্ত্ৰী পীয়ুজ হাজৰিকাই কয় যে উক্ত কামৰ বিল ঠিকাদাৰক মুকলি কৰি দিয়া হোৱা নাই। কাম সম্পূৰ্ণ নকৰালৈকে কোনো ঠিকাদাৰক বিল মুকলি কৰি নিদিবলৈ আৰু কামৰ তদন্ত কৰিবলৈ বিভাগীয় কাৰ্যবাহী অভিযন্তাক নিৰ্দেশ দিয়ে।  বাৰিষা আহিলেহে জলসম্পদ বিভাগে মথাউৰিৰ কাম কৰে বুলি সোধা সাংবাদিকৰ প্ৰশ্নৰ উত্তৰত মন্ত্ৰী হাজৰিকাই কয় মই বাৰিষা হোৱা মন্ত্ৰী। প্ৰথমবাৰলৈ দিহিমুখলৈ আহি কেনে লাগিল বুলি সাংবাদিকে সোধা প্ৰশ্নত মন্ত্ৰী গৰাকীয়ে কয় যে খিলঞ্জীয়া, ভূমিপুত্ৰৰ অঞ্চললৈ আহিছো ভাল লাগিছে। এই অঞ্চলত ভাল কাম এটা কৰিব পাৰিলে বেছি সুখী হম।  ইয়াৰ পিছতে তেওঁ থাওৰা সমষ্টিৰ বকতা কোঁৱৰ গাঁৱৰ দিচাঙৰ মথাউৰি পৰিদৰ্শন কৰে আৰু আবেলি দিচাংমুখৰ অফলাত দিচাঙৰ গৰাখহনীয়া পৰিদৰ্শন কৰিব ।

ৰাজ্যজুৰি ধপাত, মাদক দ্ৰব্য, ড্ৰাগছ আদিৰ বিৰুদ্ধে আৰক্ষীৰ ধাৰাবাহিক অভিযানৰ সময়তে অসম বংগ সীমান্তৰ শ্ৰীৰামপুৰত যোৱা নিশা দুখন ধপাত ভৰ্তি ট্ৰাক আৰক্ষীয়ে জব্দ কৰিছে৷মহকুমাৰ শিমুলটাপু আৰক্ষী চকীৰ ভাৰপ্ৰাপ্ত আৰক্ষী বিষয়াই সদৰি কৰা মতে ৩১ নং চি ৰাষ্ট্ৰীয় ঘাইপথত নিয়মিত তালাচী চলাই থকাৰ সময়তে পশ্চিম বংগৰ পৰা ত্ৰিপুৰাগামী দুখন ধপাত ভৰ্তি ট্ৰাক শ্ৰীৰামপুৰত প্ৰবেশ কৰাৰ পিছতে আৰক্ষীৰ জালত পৰে৷তথ্য মতে এ এছ ১৭ বি/২৩৯৬ নম্বৰৰ ট্ৰাকৰ পৰা ১২২৫০ কেজি ওজনৰ মুঠ ২৪৫ বস্তা আৰু এ এছ ১৭ বি/১২৫১ নম্বৰৰ ট্ৰাকত থকা ১২৪৫০ কেজিৰ ২৪৯ বস্তা ধপাত জব্দ কৰে৷পশ্চিম বংগৰ দিনহাটাৰ পৰা ত্ৰিপুৰাৰ আগৰতলালৈ সৰবৰাহ কৰিবলৈ অনা ট্ৰাকৰ চালক ক্ৰমে কোচবিহাৰ জিলাৰ নেহৰু নগৰৰ দীপক কুমাৰ পাল(৫৮) আৰু প্ৰথম খণ্ড ভগ্নীৰ বিষ্ণু দাস(৪২) ক আটক কৰিছে৷একেটা সুত্ৰে সদৰি কৰা মতে ই-ওৱে বিল আৰু টেক্স ইনভইচ্ কাগজৰ সহায়ত পশ্চিম বংগৰ কোচবিহাৰ জিলাৰ দীনহাটাৰ পৰা ত্ৰিপুৰালৈ অবৈধভাৱে দুয়োটা ধপাত ভৰ্তি ট্ৰাক বৰ্তমানে শিমুলটাপু আৰক্ষী চকীত জব্দ কৰি আইনী প্ৰক্ৰিয়া চলোৱাৰ ব্যৱস্থা গ্ৰহন কৰি থকা হৈছে৷

যোৰহাটৰ ৰাজপথত অনাই বনাই  ঘূৰি ফুৰা ৯০ দশকৰ এজন  সংগীত শিল্পী। নাম পিকু মালাকাৰ। ইতিমধ্যে শিল্পী জনৰ ছবি ছছিয়েল মিডিয়াত ভাইৰেল হোৱাৰ লগে লগে পৰিচয় ওলাল তেওঁৰ। এসময়ত জুবিন গাৰ্গৰ সৈতে একেলগে সংগীত পৰিবেশন কৰা শিল্পী তেওঁ।
মানসিক ৰোগত আক্ৰান্ত হৈ বহুদিন ধৰি যোৰহাটৰ ৰাজপথত অনাই বনাই  ঘূৰি ফুৰিছিল পিকু মালাকাৰে ৷ ইতিমধ্যে যোৰহাট নগৰৰ পৰা পিকু মালাকাৰক উদ্ধাৰ কৰি অনা হয় নাজিৰাৰ হাতীপটিস্থিত হিউমেন ৱেলফেয়াৰ ছচাইটিৰ জ্যোতিগৃহলৈ ৷

নাজিৰাৰ এই স্বেচ্ছাসেৱী সংগঠনটোৱে চিকিৎসাৰ দায়িত্ব ল’লে পিকু মালাকাৰৰ।

হিউমেন ৱেলফেয়াৰ ছচাইটিৰ মানসিক ৰোগী পুনঃসংস্থাপন কেন্দ্ৰ জ্যোতিগৃহত বৰ্তমান ৰখা হৈছে পিকু মালাকাৰক ৷ সময়ৰ গতিত সামাজিক জীৱনৰ পৰা প্ৰায় বিচ্ছিন্ন হোৱা অসমৰ যুৱপ্ৰজন্মৰ হাৰ্ট থব জুবিন গাৰ্গৰ সৈতে কেইবাটাও গীত গোৱা, ৯০ দশকৰ এজন প্ৰবীণ শিল্পী, গীটাৰিষ্ট পিকু মালাকাৰৰ এতিয়া নতুন ঠিকনা নাজিৰা৷

নাজিৰা হাতীপটীৰ জ্যোতিগৃহলৈ অহাৰ পিছতে পিকু মালাকাৰৰ হাতত তুলি দিয়া হ’ল এখন গীটাৰ ৷ গীটাৰখন হাতত লৈ যেন নষ্টালজিক হৈ পৰিল পিকু মালাকাৰ ৷ পিকু মালাকাৰৰ গীটাৰত ভাহি আহিল বহুকেইটা পুৰণি গীত ৷সংবাদ মাধ্যম, জুবিন ফ্রেইণ্ডছ ক্লাৱৰ সদস্য আৰু জুবিন গাৰ্গেও পিকু মালাকাৰক সহায়ৰ বাবে জনাইছিল আহ্বান৷যোৱা কালিলৈকে যোৰহাটৰ  কে বি ৰ’ডত ঘুৰি ফুৰা মানসিক ভাৰসাম্য হেৰুৱা পিকু মালাকাৰক চিকিৎসাৰ বাবে আগবাঢ়ি আহে হিউমেন ৱেলফেয়াৰ ছচাইটিৰ তত্বাৱধায়ক নাছেৰ খান ৷ জুবিন ফ্রেইণ্ডছ ক্লাব, যোৰহাট, যোৰহাটৰ প্ৰবীণ শিল্পী সমাজ, সাংবাদিক আৰু যোৰহাটৰ সচেতন ব্যক্তিৰ স্বাক্ষৰিত এখন আবেদনৰ ভিত্তিত শিল্পী পিকু মালাকাৰক যোৰহাটৰ পৰা নাজিৰাৰ হাতীপটিস্থিত জ্যোতিগৃহলৈ লৈ অনা হয়।

যমুনামুখ সমষ্টিৰ বানে ছিঙা বিধ্বস্ত পথৰ  বাতৰি এক মাত্ৰ আমাৰ কাকত খনত প্ৰকাশ পাইছিল। যোৱা ১৩ জুন তাৰিখে আমি যমুনামুখ সমষ্টিৰ অন্তৰ্গত চাৰ্লক, যমুনামুখ, বালিৰাম,নগাঞাপাম,চাংমাজি আদি অঞ্চল সমূহৰ লগতে লক্ষাধিক লোকৰ যাতায়তৰ মাধ্যম স্বৰূপ ডবকা-যমুনামুখ সংযোগী গড়কাপ্তানী পথৰবাতৰি প্ৰকাশ কৰোঁ। বাতৰি প্ৰকাশৰ লগে লগে যমুনামুখ সমষ্টিৰ বিধায়ক আলহাজ ছিৰাজ উদ্দিন আজমলৰ অনুপস্থিতিত তেওঁৰেই প্ৰতিনিধি বিশিষ্ট সমাজসেৱক আনৱাৰ হুছেইন, এ আই ই উডিএফৰ যমুনামুখ সমষ্টি সমিতিৰ সাধাৰণ সম্পাদক আলহাজ মোহাম্মদ আলীৰ নেতৃত্বত এটা  দলে অঞ্চল সমুহ পৰিদৰ্শন কৰে । প্ৰতিনিধিৰ দলটোৱে পথকেইটাৰ বৰ্তমানৰ অৱস্থা পৰিদৰ্শনৰ লগতে বিধ্বস্ত হৈ পৰা পথকেইটাৰ পুনৰ মেৰামতিৰ প্ৰদক্ষেপ গ্ৰহণ কৰে। উল্লেখযোগ্য কথা হ’ল অসম চৰকাৰৰ এটা বিয়াগোম গড়কাপ্তানী বিভাগৰ চকু এতিয়া লৈকে মেলখোৱা নাই। বিধায়ক ছিৰাজ উদ্দিন আজমলৰ নিজা উদ্যোগত ব্যক্তিগত পুঁজিৰে মেৰামতি কৰি যাতায়তৰ ব্যৱস্থা সুচল কৰাৰ পদক্ষেপ গ্ৰহণ কৰে। আজমলে পথকেইটা মেৰামতি কৰিবলৈ কেনে পদক্ষেপ গ্ৰহণ কৰে, সেয়া সময়ত স্পষ্ট হ’ব।