দঃশালমাৰা মানকাচৰ জিলাৰ ২১ নং মানকাচাৰ সমষ্টিৰ অন্তৰ্গত মানকাচৰ শিক্ষা খণ্ডৰ বিষয়াৰ দুৰ্বলতাৰ সুযোগ গ্ৰহণ কৰি প্ৰায় ২ কৌটি টকাৰ লকডাউনৰ সময়ত মধ্যাহ্ন ভোজনৰ চাউল ডালি, নগদ ধনৰ নামত এক ভয়ংকৰ কেলেংকাৰী অভিযোগ উত্থাপন হৈছে ।অভিযোগ মতে বাঘাপাৰাৰ আপাৰ বান শালী প্ৰাথমিক বিদ্যালয়, গাৰোপাহাৰ এলপি স্কল, কুকুৰ মাৰা ওকৰাবাৰী এলপি স্কল, নমদাস পাৰা এলপি স্কল, শান্তি পুৰ এলি স্কুল, মালিৰ আলগা বৰ্মন পাৰা এলপি স্কল, দক্ষিণ দয়াৰ চৰ এলপি স্কল, পাগলাৰতোলা এলপি স্কল, বেপাৰী পাৰা এলপি স্কল আদিকে ধৰি প্ৰায় ১০০ টা স্কলত মধ্যাহ্ন ভোজনৰ নামত লুণ্ঠন চলাই কাগজে কলমে বিভাগীয় নথিপত্ৰৰ কাম সম্পূৰ্ণ কৰি কেইবাজনো ছি আৰ ছি ছি আৰু স্কলৰ প্ৰধান শিক্ষকে বিলাসী জীৱন জাপন কৰি আছে। ইয়াৰ উপৰিও মানকাচৰ শিক্ষা খণ্ডত প্ৰায় ৫০০০ হাজাৰ ভূৱা ছাত্ৰ ছাত্ৰীৰ নামত মাহিলী এক বৃহৎ পৰিমাণৰ চৰকাৰী ধন অপচয় কৰি আছে যদিও শিক্ষা খণ্ড বিষয়া জন নিমাত। মানকাচৰ সমষ্টিৰ প্ৰায় ৪০ টা প্ৰাইভেট বেচৰকাৰী জাতীয় বিদ্যালয় আছে। উক্ত জাতীয় বিদ্যালয়ত অধ্যয়নত শ শ ছাত্ৰ ছাত্ৰীৰ নাম বিভিন্ন চৰকাৰী প্ৰাথমিক বিদ্যালয়ৰ এপিয়াৰ লিষ্টত সন্নিৱিষ্ট কৰি একাংশ ছি আৰ ছি ছিৰ সহযোগত প্ৰধান শিক্ষকে পোছাকৰ নামত ধন, মধ্যাহ্ন ভোজনৰ চাউল ডালি আৰু নগদ ধনৰ লুণ্ঠন চলাই আছে। একাংশ ছি আৰ ছি ছি স্কলৰ সময়ত নিজৰ কৰ্তব্য পালন নকৰি হাটশিঙিমাৰীৰ ছুপাৰ মাৰ্কেটত অযথা ঘুৰি ফুৰি সময় অতিবাহিত কৰা আমি প্ৰায় দেখিবলৈ পাও। আন এক অভিযোগ মতে চৰকাৰী ভাবে প্ৰতিজন ছাত্ৰ ছাত্ৰীক চাৰিযোৰ কৰি স্কলৰ পোছাক যোগান ধৰাৰ পৰিবৰ্তে বহু স্কলত মাথো দুজৰা পোছাক যোগান দি বাকী টকা আত্মসাৎ কৰিছে। গতিকে অনতি পলমে অসম চৰকাৰ শিক্ষা মন্ত্ৰী মহোদয়ে বিভাগীয় ভাবে মানকাচৰ শিক্ষা খণ্ডৰ দুৰ্ণীতিৰ বিৰুদ্ধে উচ্চ পৰ্যায়ৰ তদন্ত কৰি দোষী ব্যক্তিৰ বিৰুদ্ধে প্ৰশাসনিক ব্যৱস্থা লোৱাৰ দাবী জনায় সচেতন মহলে আৰু বিভিন্ন অভিভাৱকে।
অসম মীন আইন -১৯৫৩ আৰু অসম মীন নীতিৰ প্ৰয়োজনীয় সংশোধনৰ ব্যৱস্থা
গুৱাহাটীৰ লাষ্টগেটস্থীত লোকনিৰ্মান প্ৰশিক্ষণ কেন্দ্ৰত আয়োজিত এক সংবাদমেলত মীন আৰু আবকাৰী বিভাগৰ মন্ত্ৰী পৰিমল শুক্লবৈদ্যই বিগত ১৬-১৭ বিত্তীয় বৰ্ষৰ পৰা বৰ্তমানলৈকে মীন আৰু আবকাৰী বিভাগে ৰূপায়ন কৰা বিভিন্ন আচঁনি আৰু ইয়াৰ ফলাফল সমূহৰ বিষয়ে অৱগত কৰে ।
সংবাদমেলখনত মন্ত্ৰী গৰাকীয়ে দাঙি ধৰা তথ্য অনুসৰি মাছ উৎপাদনৰ ক্ষেত্ৰত ৰাজ্য খনে ২০১৫-১৬ৰ পৰা ২০১৯-২০ বৰ্ষলৈ ২৬.৮৭ শতাংশলৈ বৃদ্ধি কৰিবলৈ সক্ষম হৈছে । মাছৰ পোনা উৎপাদন ২০১৫-১৬ৰ পৰা ২০১৯-২০ বৰ্ষলৈ ৬৭.৬৫ শতাংশলৈ বৃদ্ধি হৈছে ।
বিগত চাৰি বছৰত কেন্দ্ৰীয় চৰকাৰৰ সাহায্যত ৰূপায়িত ‘ঘৰে ঘৰে পুখুৰী ঘৰে ঘৰে মাছ’ আদি আঁচনিৰ জৰিয়তে ৰাজ্য খনত প্ৰায় ১২৫০০ ব্যাক্তিগত আৰু ৰাজহুৱা নতুন পুখুৰী নিৰ্মাণ কৰি মাছ পালন কৰি থকা হৈছে ।
‘ৰাজ্যৰ প্ৰায় ১৪০০০০ মাছমৰীয়াক বিনামূলীয়া জীৱন বীমাৰ সুবিধা আগবঢ়োৱা হৈছে । খচৰা ৰাজ্যিক মীন নীতি চুড়ান্ত হৈ উঠিছে আৰু মহামান্য অসম কেবিনেটৰ অনুমোদন পোৱাৰ পৰ্যায়ত আছে । অসম মীন আইন -১৯৫৩ আৰু অসম মীন নীতিৰ প্ৰয়োজনীয় সংশোধনৰ ব্যৱস্থা চলি আছে ।’ : মন্ত্ৰী পৰিমল শুক্লবৈদ্য
‘২০১৮ চনৰ ১৫ জুনত চৰকাৰী অধিসূচনা মৰ্মে ‘ফিছফেড’ৰ প্ৰশাসনিক কৰ্তৃত্ব মীন বিভাগলৈ হস্তান্তৰ হোৱাৰ পিছত মহানগৰীত সমবায় সমিতিসমূহৰ স্থানীয় উৎপাদিত মাছ মধ্যভোগী ব্যতিৰেকে বিপণনৰ ব্যৱস্থা আৰম্ভ আৰু বছৰি নাৰ্য্যমূল্যত প্ৰায় ৪৫,০০০ কেজি মৎস বিপণন সুনিশ্চিত কৰা হয় । পৰৱৰ্তী সময়ত ‘ফিছফেড’ৰ বিপণন পৰিক্ৰমা শক্তিশালী কৰাৰ লগতে ঘৰে ঘৰে অত্যাধুনিক এপ ব্যৱহাৰ কৰি মৎস্য যোগানৰ ব্যৱস্থা কৰা হ’ব বুলি মন্ত্ৰী গৰাকীয়ে জানিবলৈ দিয়াৰ লগতে ২১ নৱেম্বৰত নতুন দিল্লীত আয়োজিত ৰাষ্ট্ৰীয় পৰ্যায়ৰ বিশ্ব মৎস্য দিৱসৰ কাৰ্যসূচীত ‘ফিছফেড’লৈ উত্তৰ-পূৱ আৰু পাহাৰীয়া ৰাজ্য শিতানত শ্ৰেষ্ঠ নিকায়ৰ বটা লাভ কৰে বুলি মন্তব্য কৰে ।‘
আনহাতে, আবকাৰী বিভাগ সম্পৰ্কত মন্ত্ৰী পৰিমল শুক্লবৈদ্যই জনোৱা অনুসৰি ‘ কেইবাটাও ধাৰাৰ অধীনত জৰিমনা ব্যৱস্থা অধিক কঠোৰ আৰু কাৰ্যকৰী কৰাৰ বাবে ২০১৮ চনত সংশোধন কৰা অসম আবকাৰী আইন ২০০০ । আবকাৰী বিভাগক আবকাৰী আইন উলংঘন আৰু আবকাৰী অপৰাধ বোৰ যথেষ্ট পৰিমাণে প্ৰতিহত আৰু নিয়ন্ত্ৰন কৰাত সহায় কৰিছে ।’
যমুনামুখত এআইইউডিএফৰ স্থিতি থৰক-বৰকঃ সুযোগৰ অপেক্ষাত বিজেপি,অজাপ
ৰাজ্যৰ এক গুৰুত্বপূৰ্ণ সমষ্টি হিচাপে পৰিচিত যমুনামুখ সমষ্টি ৷ বৰ্তমান সমষ্টিটোৰ বিধায়ক আব্দুৰ ৰহিম আজমল ৷ তেখেত ধুবুৰীৰ সাংসদ মৌলানা বদৰুদ্দিন আজমলৰ দ্বিতীয় পুত্ৰ ৷ ১৯৫১ চনৰ পৰা সমষ্টিটোক একাধিক্ৰমে ১৬ গৰাকী বিধায়কে প্ৰতিনিধিত্ব কৰাৰ সুযোগ লাভ কৰিছে ৷ ১৯৫১ চনত কংগ্ৰেছ দলৰ বিমলাকান্ত বৰা, ১৯৫৭ চনত কংগ্ৰেছৰ পৰা ৰহিমুদ্দিন আহমেদ, ১৯৬২ চনত কংগ্ৰেছৰ পৰা বেগম আফিয়া, ১৯৬৭ চনত লক্ষ্মীপ্ৰসাদ গোস্বামী, ১৯৭২ চনত কংগ্ৰেছ দলৰ পৰা দেবেন্দ্ৰনাথ বৰা, ১৯৭৮ চনত জনতা দলৰ পৰা মোজাম্মিল আলী চৌধুৰী, ১৯৮৩ চনত কংগ্ৰেছ দলৰ পৰা ফৰমান আলী, ১৯৮৫ চনত ইউএমএফৰ পৰা মৌলানা আব্দুল জলিল ৰাগিবী, ১৯৯১ চনত কংগ্ৰেছ দলৰ পৰা দ্বিতীয় বাৰৰ বাবে মৌলানা আব্দুল জলিল ৰাগিবী নিৰ্বাচিত হয় ৷ একেদৰে ১৯৯৬ আৰু ২০০১ চনত সমষ্টিটোৰ পৰা একেৰাহে দুবাৰকৈ অগপ দলৰ পৰা আলহাজ খলিলুৰ ৰহমান চৌধুৰী বিধায়ক নিৰ্বাচিত হৈছিল ৷ ২০০৬ চনত সমষ্টিটোৰ পৰা বিধায়ক নিৰ্বাচিত হয় মৌলানা বদৰুদ্দিন আজমল ৷ তেওঁ এআইইউডিএফৰ পৰা বিধায়ক নিৰ্বাচিত হয় ৷ বদৰুদ্দিন আজমলে সেই বছৰ দুটা সমষ্টি ক্ৰমে দক্ষিণ শালমাৰা আৰু যমুনামুখ সমষ্টিৰ পৰা নিৰ্বাচিত হোৱাত তেওঁ যমুনামুখ আসন খন এৰি দিয়ে ৷ অনুষ্ঠিত হয় উপ নিৰ্বাচন ৷ ২০০৬ চনত অনুষ্ঠিত উপ নিৰ্বাচনত এআইইউডিএফৰ পৰা বিধায়ক নিৰ্বাচিত হয় বদৰুদ্দিন আজমলৰ ভাতৃ ছিৰাজুদ্দিন আজমল ৷ তাৰ পিছৰ পৰা ক্ৰমান্বয়ে ২০১১ চনত ছিৰাজুদ্দিন আজমল, ২০১৪ চনৰ উপ নিৰ্বাচনত আব্দুৰ ৰহিম আজমল, ২০১৬ চনৰ বিধানসভা নিৰ্বাচনত আব্দুৰ ৰহিম আজমল পুনৰ বিধায়ক নিৰ্বাচিত হয় ৷ সমষ্টিটোত এতিয়ালৈকে দুটাকৈ উপ নিৰ্বাচন সহ মুঠ ১৬ বাৰ বিধানসভা নিৰ্বাচন অনুষ্ঠিত হয় ৷ তাৰে মৌলানা আব্দুল জলিল ৰাগিবী, আলহাজ খলিলুৰ ৰহমান চৌধুৰী, ছিৰাজুদ্দিন আজমল, আব্দুৰ ৰহিম আজমল সমষ্টিটোৰ পৰা দুবাৰকৈ নিৰ্বাচিত হোৱাৰ বিপৰীতে বাকীসকল এবাৰকৈ নিৰ্বাচিত হৈ সমষ্টিটোক প্ৰতিনিধিত্ব কৰা সুযোগ পায় ৷ এতিয়ালৈকে সমষ্টিটোক মুঠ ১২ গৰাকী ব্যক্তিয়ে প্ৰতিনিধিত্ব কৰাৰ সুযোগ লাভ কৰিছে ৷ তাৰে মোজাম্মিল আলী চৌধুৰী (১৯৭৮), ফৰমান আলী (১৯৮৩), মৌলানা আব্দুল জলিল ৰাগিবী (১৯৮৫, ১৯৯১), আলহাজ খলিলুৰ ৰহমান চৌধুৰী (১৯৯৬, ২০০১) যমুনামুখৰ স্থানীয় ভোটাৰ হোৱাৰ বিপৰীতে বাকী আটাইসকল সমষ্টিৰ বাহিৰৰ লোকে এই সমষ্টিটোক প্ৰতিনিধিত্ব কৰে ৷ সমষ্টিটোৰ বৰ্তমানৰ বিধায়ক গৰাকীও হোজাই সমষ্টিৰ গোপালনগৰৰ ভোটাৰ ৷ অসম বিধানসভা নিৰ্বাচনলৈ মাজত মাত্ৰ এমাহ মান সময় বাকী ৷ এনে অৱস্থাত ৰাজ্যৰ অন্যান্য সমষ্টিৰ লগতে যমুনামুখতো আৰম্ভ হৈছে নিৰ্বাচনী তৎপৰতা ৷ এই পৰ্যন্ত সমষ্টিটোত নিৰ্বাচনী যুঁজত নামিবলৈ যিসকল ব্যক্তিৰ নাম উচ্চাৰণ হৈছে, সেই সকল হৈছে ক্ৰমে এআইইউডিএফৰ পৰা বৰ্তমানৰ বিধায়ক আব্দুৰ ৰহিম আজমল, প্ৰাক্তন বিধায়ক তথা বৰপেটাৰ প্ৰাক্তন সাংসদ ছিৰাজুদ্দিন আজমল, বিধায়কৰ নমিনি মোহাম্মদ আলী, হাম হস্পিটালৰ ন্যাসৰক্ষী শ্বহিদ হুছেইন, ডবকাৰ বিশিষ্ট সমাজকৰ্মী আনোৱাৰ হুছেইন আৰু মৌলানা আব্দুল কাদিৰ কাছিমী ৷ নৱগঠিত আঞ্চলিক দল অসম জাতীয় পৰিষদ চমুকৈ এজেপিৰ পৰা প্ৰাৰ্থিত্ব প্ৰত্যাশীসকল হৈছে ক্ৰমে সাংবাদিক জিয়াউৰ ৰহমান, অধিবক্তা আব্দুল হাচিব, পঞ্চায়ত সভাপতি বদৰুল হক, গুৱাহাটী উচ্চ ন্যায়ালয়ৰ অধিবক্তা আবু জাফৰ আটিয়া ৷ একেদৰে অগপৰ পৰা এনামুল কৰিম চৌধুৰী, ৰেজাউল কৰিম চৌধুৰী, জিয়া উদ্দিন আহমেদৰ নাম চৰ্চালৈ আহিছে ৷ কংগ্ৰেছৰ দলীয় টিকটৰ বাবে আবেদন কৰিছে যুৱ নেতা ৰেহান উদ্দিন, মাহমুদ হুছেইন, ৰেজিয়া চুলতানা, আব্দুল হান্নান আৰু চাহাবুদ্দিন মজুমদাৰে ৷ শাসকীয় বিজেপিৰ পৰা চৰ্চালৈ অহা নাম কেইটা হৈছে ক্ৰমে অমৰজ্যোতি শইকীয়া, নজমুল আলম লস্কৰ আৰু বিলাল উদ্দিন ৷ অখিল গগৈৰ ৰাজনৈতিক পাৰ্টি ৰাইজৰ দলৰ পৰা টিকটৰ আশাত বন্দী দিলোৱাৰা বেগম চৌধুৰী ৷ সমষ্টিটোৰ বিগত ছটা বিধানসভা নিৰ্বাচনৰ বিজয়ী প্ৰাৰ্থী আৰু প্ৰতিদ্বন্দ্বী প্ৰাৰ্থীয়ে লাভ কৰা ভোটৰ এক তথ্য এনে ধৰণৰ ৷ ১৯৯১ চনত যমুনামুখ সমষ্টিত মুঠ ১৬ গৰাকী প্ৰাৰ্থী অৱতীৰ্ণ হৈছিল ৷ বিজয়ী হয় কংগ্ৰেছৰ মৌলানা আব্দুল জলিল ৰাগিবী ৷ তেওঁ লাভ কৰিছিল ১৪১৯২ টা ভোট ৷ তেওঁৰ নিকটতম নিৰ্দলীয় প্ৰাৰ্থী আবু জাফৰ আটিয়াই ১২৩৮৫ টা ভোট, চিপিআইৰ নুৰুল হুছেইনে ৯৩৭৪ টা ভোট, অগপৰ আব্দুৰ ৰহমান বৰভূঞাই ৭১৬৮ টা ভোট, নিৰ্দলীয় প্ৰাৰ্থী বসিৰ উদ্দিন লস্কৰে লাভ কৰিছিল ৬৮৪৫ টা ভোট ৷ প্ৰায় ১৮০৭ টা ভোটত জয়ী হৈছিল কংগ্ৰেছ প্ৰাৰ্থী আব্দুল জলিল ৰাগিবী ৷ ১৯৯৬ চনত অনুষ্ঠিত যমুনামুখ বিধানসভা সমষ্টিত মুঠ ১৪ গৰাকী প্ৰাৰ্থী অৱতীৰ্ণ হৈছিল ৷ সেই বছৰ সমষ্টিটোৰ পৰা বিধায়ক নিৰ্বাচিত হৈছিল অগপৰ খলিলুৰ ৰহমান চৌধুৰী ৷ তেওঁ লাভ কৰিছিল ২৮৮৯৯ টা ভোট ৷ তেওঁৰ নিকটতম প্ৰতিদ্বন্দ্বী ক্ৰমে কংগ্ৰেছৰ মৌলানা আব্দুল জলিল ৰাগিবীয়ে ১৯৬৩৪ টা ভোট, নিৰ্দলীয় ৰূপত অৱতীৰ্ণ হোৱা আবু জাফৰ আটিয়াই ১১৮৯২ টা ভোট, বিজেপিৰ আবুল হুছেইনে ৫৫১৪ টা ভোট, নিৰ্দলীয় আব্দুল হান্নানে ৩১০২ টা ভোট আৰু চিপিআইৰ নুৰুল হুছেইনে লাভ কৰিছিল ২০৮৩ টা ভোট ৷ সেই বছৰ অগপৰ খলিলুৰ ৰহমান চৌধুৰী ৯২৬৫ টা ভোটত জয়ী হৈছিল ৷ ২০০১ চনত যমুনামুখ সমষ্টিত মুঠ ৩ গৰাকী প্ৰাৰ্থী নিৰ্বাচনী ৰণত অৱতীৰ্ণ হয় ৷ জয়ী হৈছিল অগপৰ প্ৰাৰ্থী খলিলুৰ ৰহমান চৌধুৰী ৷ তেওঁ লাভ কৰিছিল ৪৭২৫৫ টা ভোট ৷ তেওঁৰ নিকটতম প্ৰতিদ্বন্দ্বী মৌলানা আব্দুল জলিল ৰাগিবীয়ে ৩৭৬১৪ টা ভোট লাভ কৰিছিল ৷ ৯৬৪১ টা ভোটৰ ব্যৱধানত জয় লাভ কৰে খলিলুৰ ৰহমান চৌধুৰীয়ে ৷ ২০০৬ চনৰ বিধানসভা নিৰ্বাচনত যমুনামুখ সমষ্টিত মুঠ ৯ গৰাকী প্ৰাৰ্থী নিৰ্বাচনী ৰণত অৱতীৰ্ণ হৈছিল ৷ নৱগঠিত ৰাজনৈতিক দল এআইইউডিএফৰ প্ৰাৰ্থী হিচাপে সমষ্টিটোত প্ৰতিদ্বন্দ্বিতা কৰি মৌলানা বদৰুদ্দিন আজমলে ৫৩০৪০ টা ভোট লাভ কৰি বিজয় সাব্যস্ত কৰে ৷ তেওঁৰ নিকটতম প্ৰতিদ্বন্দ্বী ক্ৰমে অগপৰ খলিলুৰ ৰহমান চৌধুৰীয়ে ৩২৬১১ টা ভোট, এনচিপিৰ চামচুল হক তালুকদাৰে ১৪৫৫৫ টা ভোট, বিজেপিৰ আবুল হুছেইনে ১৮৪২ টা ভোট আৰু কংগ্ৰেছ সমৰ্থিত নিৰ্দলীয় প্ৰাৰ্থী আনোৱাৰ হুছেইনে লাভ কৰিছিল ২৬৭৩ টা ভোট ৷ বদৰুদ্দিন আজমল ২০৪২৯ টা ভোটৰ ব্যৱধান জয়ী হয় ৷ সেই বৰ্ষত অনুষ্ঠিত উপ নিৰ্বাচনত আজমলৰ ভাতৃ চিৰাজুদ্দিন আজমল সমষ্টিটোৰ পৰা নিৰ্বাচিত হয় ৷ তেওঁ লাভ কৰে ৫৮২১০ টা ভোট আৰু তেওঁৰ প্ৰতিদ্বন্দ্বী কংগ্ৰেছ দলৰ প্ৰাৰ্থী খলিলুৰ ৰহমান চৌধুৰীয়ে লাভ কৰে ৪৫০৪৩ টা ভোট ৷ ভোটৰ ব্যৱধান হয় ১৩১৬৭ টা ভোট ৷ ২০১১ চনৰ বিধানসভা নিৰ্বাচনত যমুনামুখ সমষ্টিত মুঠ ১২ গৰাকী প্ৰাৰ্থী অৱতীৰ্ণ হয় ৷ বিজয়ী হৈছিল এআইইউডিএফৰ প্ৰাৰ্থী চিৰাজুদ্দিন আজমল ৷ তেওঁ লাভ কৰিছিল ৬১২৬৭ টা ভোট ৷ তেওঁৰ নিকটতম প্ৰতিদ্বন্দ্বী কংগ্ৰেছৰ ৰেজাউল কৰিম চৌধুৰীয়ে ৪৮৫৪১ টা ভোট লাভ কৰাৰ বিপৰীতে বিজেপিৰ নজমুল আলম লস্কৰে লাভ কৰে ৪২৩৮ টা ভোট ৷ ১২৭২৬ টা ভোটৰ ব্যৱধানত জয়ী হৈছিল ছিৰাজুদ্দিন আজমল ৷ ২০১৪ চনৰ লোকসভা নিৰ্বাচনত চিৰাজুদ্দিন আজমল বৰপেটাৰ পৰা সাংসদ নিৰ্বাচিত হোৱাত সমষ্টিটোত পুনৰবাৰ উপ নিৰ্বাচন অনুষ্ঠিত হয় ৷ উপ নিৰ্বাচনত বদৰুদ্দিন আজমল নেতৃত্বাধীন এআইইউডিএফ দলৰ প্ৰাৰ্থী হয় তেওঁৰ পুত্ৰ আব্দুৰ ৰহিম আজমল ৷ তেওঁ লাভ কৰে ৬২১৫৩ টা ভোট আৰু তেওঁৰ প্ৰতিদ্বন্দ্বী কংগ্ৰেছ প্ৰাৰ্থী বসিৰ উদ্দিন লস্কৰে লাভ কৰে ৩৯১৯৪ টা ভোট ৷ ২০১৬ চনত অনুষ্ঠিত বিধানসভা নিৰ্বাচনতো বিজয়ধ্বজা উৰুৱাবলৈ সক্ষম হয় এআইইউডিএফে ৷ বিজয়ী হয় এআইইউডিএফৰ প্ৰাৰ্থী আব্দুৰ ৰহিম আজমল ৷ সমষ্টিটোৰ পৰা মুঠ ১৫ গৰাকী প্ৰাৰ্থী অৱতীৰ্ণ হৈছিল ৷ আজমল-পুত্ৰই লাভ কৰে ৬৫৫৯৯ টা ভোট ৷ তেওঁৰ নিকটতম প্ৰতিদ্বন্দ্বী নিৰ্দলীয় প্ৰাৰ্থী আলহাজ ৰেজাউল কৰিম চৌধুৰীয়ে লাভ কৰে ৫২১৯৫ টা ভোট, কংগ্ৰেছৰ বসিৰ উদ্দিন লস্কৰে ২৩৮৪৯ টা ভোট, অগপৰ প্ৰাৰ্থী জিয়া উদ্দিন আহমেদে লাভ কৰে ৪৭৩২ টা ভোট ৷ ১৩৪০৪ টা ভোটৰ ব্যৱধানত জয়ী হয় আব্দুৰ ৰহিম আজমল ৷ আজমলৰ দখলত থকা সমষ্টিটোত তেওঁৰ বিৰুদ্ধে প্ৰৱল হৈ উঠিছে প্ৰতিষ্ঠান বিৰোধী ঢৌ ৷ এই দৃষ্টিত এইবাৰ আজমলৰ বাবে মুঠেই মসৃণ হৈ থকা নাই সমষ্টিটো পুনৰুদ্ধাৰ কৰা ৷ কাৰণ, বছৰটোৰ সৰহ সময় মুম্বাই-ডুবাইত থকা আজমল পুত্ৰই সমষ্টিত ভৰি দিয়াৰ লগে লগে ৰাইজৰ তীব্ৰ ক্ষোভৰ সন্মুখীন হবলগীয়া হৈছে ৷ ইতিমধ্যে কেবাবাৰো জনৰোষৰ বলি হৈছে আজমল-তনয় ৷ এনে অৱস্থাত আজমলৰ বাবে সমষ্টিটো উদ্ধাৰৰ কৌশল হৈছে কংগ্ৰেছৰে মিত্ৰতা ৷ মিত্ৰ কংগ্ৰেছৰ কান্ধত বন্দুক থৈ আজমলে নিৰ্বাচনী বৈতৰণী পাৰ কৰিব খুজিছে ৷ সমষ্টিটো উদ্ধাৰৰ বাবে আজমলৰ ওচৰত এই সময়ত মিত্ৰতাৰ বিকল্প নাই ৷ কংগ্ৰেছ-এআইইউডিএফৰ মিত্ৰতা হোৱাৰ সূত্ৰে সমষ্টিটো আজমলৰ ভাগত পৰিলে উদ্ধাৰ হোৱাৰ এক ক্ষীণ আশা আছে ৷ যদি কংগ্ৰেছ কৰ্মীসকলে সেই মিত্ৰতা মানি নলৈ অন্য কোনো স্থানীয় বিকল্প প্ৰাৰ্থীক সমৰ্থন কৰে, তেন্তে আজমলৰ বাবে নিশ্চিত বিপদ ঘন্টা বাজিব ৷ আজমলৰ বিৰুদ্ধে প্ৰৱল অধিষ্ঠান বিৰোধী ঢৌৰ সুযোগ গ্ৰহণ কৰি সমষ্টিটোত কংগ্ৰেছে এক শক্তিশালী খোপনি পুতিবলৈ সক্ষম হৈছে ৷ বিগত পঞ্চায়ত নিৰ্বাচনত সমষ্টিটোত চমকপ্ৰদ সফলতা লাভ কৰিবলৈ সক্ষম হয় কংগ্ৰেছ দলে ৷ এনে অৱস্থাত কংগ্ৰেছে সমষ্টিটো একেবাৰে সহজতে বদৰুদ্দিন আজমলক এৰি দিবলৈ প্ৰস্তুত নহয় ৷ কংগ্ৰেছৰ সমানে সমষ্টিটোত ৰাইজৰ দলেও প্ৰচাৰৰ ক্ষেত্ৰত পিছপৰি ৰোৱা নাই ৷ বিশিষ্ট ব্যৱসায়ী ইমদাদ আলীৰ পত্নী তথা যমুনামুখৰ দুবাৰৰ বিধায়ক প্ৰয়াত খলিলুৰ ৰহমান চৌধুৰীৰ কন্যা দিলোৱাৰা বেগম চৌধুৰীয়ে ৰাইজৰ দলৰ হৈ তীব্ৰ প্ৰচাৰ অভিযান আৰু জনসংযোগ যাত্ৰা আৰম্ভ কৰিছে ৷ সামাজিক মাধ্যমৰ জৰিয়তেও চলাইছে জোৰদাৰ প্ৰচাৰ ৷ অসম জাতীয় পৰিষদেও সমষ্টিটোত সৱল কৰি তুলিছে সাংগঠনিক ভেটি ৷ ইতিমধ্যে লুৰিণজ্যোতি গগৈয়ে দুবাৰকৈ আহি সমষ্টিটোত চলাই গৈছে প্ৰচাৰ ৷ শাসকীয় বিজেপি দলে সমষ্টিটো নিজৰ দখলত নিবলৈ যৎপৰোনাস্তি চেষ্টা চলাইছে ৷ দলটোৰ হৈ অধিবক্তা অমৰজ্যোতি শইকীয়া শক্তিশালী প্ৰাৰ্থিত্বৰ দাবীদাৰ ৷ বুথ সভা, পৃষ্ঠা প্ৰমূখ সন্মিলন পাতি অমৰজ্যোতি শইকীয়াই সমষ্টিটোত বিজেপিৰ সৱল সাংগঠনিক ভেটিৰ উমান দিছে দলৰ শীৰ্ষ নেতৃত্বক ৷ সমষ্টিটোত এক শক্তিশালী গণভিত্তি থকা প্ৰয়াত বিধায়ক খলিলুৰ ৰহমান চৌধুৰীৰ উত্তৰসূৰী ৰেজাউল কৰিম চৌধুৰীয়ে সমষ্টিটোত প্ৰচাৰ অভিযানৰ সমানে ভোটাৰৰ ঘৰে ঘৰে গৈ প্ৰচাৰ চলোৱা দেখা গৈছে ৷ তেওঁক সাংগঠনিক কাম-কাজত সহযোগ কৰিছে ব্যৱসায়ী ভাতৃ এনামুল কৰিম চৌধুৰীয়ে ৷ মুঠতে সমষ্টিটোত কোনো দলে প্ৰচাৰৰ ক্ষেত্ৰত কৃপণালি কৰা নাই ৷ এজেপি-ৰাইজৰ দলৰ মিত্ৰতা, বিজেপি-অগপৰ মিত্ৰতা, কংগ্ৰেছ-এআইইউডিএফৰ মিত্ৰতা ঠিকে থাকিলে আৰু অনাগত সময়ত আৰু বহু ৰাজনৈতিক সমীকৰণ ওলাব ৷
চৰাইদেউ জিলাত দিনক দিনে বৃদ্ধি পাইছে পথ দুৰ্ঘটনা, চিন্তিত সচেতন মহল
চৰাইদেউ জিলাৰ বিভিন্ন স্থানৰ লগতে বিশেষকৈ জিলাখনৰ মাহমৰা, সোণাৰি আৰু মৰাণ নগৰৰ মাজেদি যোৱা ধোদৰ আলিত দিনকদিনে বৃদ্ধি পাইছে পথ দুর্ঘটনাৰ সংখ্যা । যানবাহন আইনক ভৰিৰে মােহাৰি চালকৰ কোনাে অনুজ্ঞাপত্ৰ নােহােৱা একাংশৰ মইমতালিৰ বাবে প্রতিদিনে সংঘটিত হবলৈ ধৰিছে দুর্ঘটনা । দুর্ঘটনাত যোৱা এটা মাহৰ ভিতৰতে কেবাজন লােকে মৃত্যুক আঁকোৱালি লৈছে আৰু কেইবাজনো লোক চিকিৎসাধীন হোৱাৰ বিপৰীতে বহুকেইজনে পংগুত্ব জীৱনক আঁকোৱালি লবলগীয়া হৈছে । জিলাখনৰ বিভিন্ন প্ৰান্তত সঘনাই সংঘটিত দুর্ঘটনা সমূহে স্থানীয় ৰাইজক আতংকিত কৰি তুলিছে । দুর্ঘটনাৰ মূল কাৰণ তীব্র বেগত গাড়ী চলােৱা , যানবাহন আইনক বুঢ়া আঙুলি দেখুৱাই বিপৰীত দিশেৰে গাড়ী চলােৱা , যতে মন যায় তাতে গাড়ী পার্কিং কৰি ৰখা , চালকৰ অনুজ্ঞাপত্ৰ নথকাকৈ গাড়ী চলােৱা , ১৮ বছৰৰ তলৰ কণ কণ কিশােৰৰ গাড়ী চলােৱা , ডাম্পাৰৰ অবাধ চলন , দিনে – নিশাই ৫০ – ১০০ ডাম্পাৰ তীব্র বেগত ৰাজপথেৰে চলি থকা , পথৰ দুয়োকাষে অবৈধভাৱে দোকান বজাৰ বহুওৱা আদি ইত্যাদি । চৰকাৰৰ এটা বিয়াগােম পৰিবহণ বিভাগ থকাৰ পাছতাে যদি এই ধৰণে নীতি নিয়মক একাংশ লােকে বুঢ়া আঙুলি দেখুৱাই যি মন যায় তাকে কৰি আছে , যাৰ পৰিণতিত সংঘটিত হােৱা দুর্ঘটনাবােৰে – বহু লােকৰ জীৱনলৈ অমানিশা কঢ়িয়াই আনে । স্থানীয় ৰাইজে এই পথ দুর্ঘটনাসমূহৰ মূল কাৰণসমূহ নিয়ন্ত্রণ কৰি দুর্ঘটনাসমূহ হ্রাস কৰিবলৈ দাবী জনাই আহিছে যদিও বিয়াগােম পৰিবহণ বিভাগটোৱে দুৰ্ঘটনাৰ মূল কাৰণসমূহ নিয়ন্ত্রণ কৰিব নােৱাৰে । দিনে নিশাই জে চি বি ডাম্পাৰসমূহ চলি থকা , চালকৰ অনুজ্ঞাপত্ৰ নথকা কম বয়সীয়া যুৱকৰ দ্বাৰা টাটা মেজিকসমূহ চলােৱা আদি ঘটনাসমূহক আচৰিত বুলি মন্তব্য কৰিছে অঞ্চলটোৰ ৰাইজে । এই ক্ষেত্ৰত বিশেষ ব্যৱস্থা গ্ৰহণ নকৰিলে বহু লােকক দুর্ঘটনাত হেৰুৱাব লগা হ’ব বুলি ৰাইজে মন্তব্য কৰিছে । অনতিপলমে দুর্ঘটনা নিয়ন্ত্ৰণৰ উপযুক্ত পদক্ষেপ গ্রহণ কৰিবলৈ জিলা প্ৰশাসনক আহ্বান জনাইছে ভুক্তভোগী ৰাইজে।
২৬ ফেব্ৰুৱাৰীত চৰাইদেউ জিলালৈ মন্ত্ৰী ড° হিমন্ত বিশ্ব শৰ্মা
অহা ২৬ ফেব্ৰুৱাৰীত অসম চৰকাৰৰ বিত্ত, স্বাস্থ্য,শিক্ষা আৰু লোক নিৰ্মাণ বিভাগৰ মন্ত্ৰী ড° হিমন্ত বিশ্ব শৰ্মাই কেইবাটাও চৰকাৰী কাৰ্যসূচী লৈ চৰাইদেউ জিলালৈ আহিব । সেইদিনা মন্ত্ৰী গৰাকীয়ে জিলাখনৰ সদৰ সোণাৰি নগৰৰ সমীপৱৰ্তী ৰজাপুখুৰীত স্থাপন হবলগীয়া চৰাইদেউ চিকিৎসা মহাবিদ্যালয়ৰ ভূমি পূজন কৰাৰ লগতে মাহমৰাৰ দিচাং নদীৰ ওপৰত ভজো আৰু দিচাংপানীত নিৰ্মাণ হবলগীয়া পকী দলং দুখন আধাৰশিলা স্থাপন আৰু অসম দৰ্শন আঁচনিৰ অধীনত নিৰ্মাণ হবলগীয়া ঐতিহাসিক নাহৰ আলি আধাৰশিলা স্থাপন কৰি কামৰ শুভাৰম্ভ কৰিব ।
অৱসৰী জীৱন সুৰক্ষিত কৰাৰ দাবী সদৌ অসম চৰকাৰী এন পি এছ কৰ্মচাৰী সন্থাৰ
চৰকাৰী কৰ্মচাৰী সমাজ, প্ৰশাসন ব্যৱস্থাৰ অভিন্ন অংগ। তেওঁলোকৰ দ্বাৰাই ৰাজ্য তথা দেশৰ প্ৰগতি হৈছে। তেওঁলোক সমাজ আৰু সভ্যতাৰ উত্তৰণৰ বাবে মুখ্যত: কাম কৰি আহিছে। এই সকল ব্যক্তিৰ অৱসৰী জীৱনৰ দায়িত্ব চৰকাৰে ল’বই লাগিব। এয়া ভাৰতৰ সভ্যতা, সংস্কৃতি আৰু সমাজ ব্যৱস্থাই নিৰ্দেশ দিয়ে। চৰকাৰে এন পি এছ ব্যৱস্থাৰে অসমৰ বিষয়া- শিক্ষক- আৰক্ষী- কৰ্মচাৰী সমাজক অন্ধকাৰ ভবিষ্যতলৈ নিয়া কাৰ্য ভাৰতীয় ঐতিহ্য, সভ্যতা, সংস্কৃতিৰ পৰিপন্থী। সেয়েহে অনতিপলমে চৰকাৰে এন পি এছ ব্যৱস্থা বন্ধ কৰি অসমৰ সকলো শিক্ষক, বিষয়া, আৰক্ষী, কৰ্মচাৰী সকলক The Assam Services Pension Rules 1969 (পুৰণি পেঞ্চন ব্যৱস্থা)ৰ যোগেদি অৱসৰী জীৱনক সুৰক্ষিত কৰিবলৈ দাবী জনাইছে সদৌ অসম চৰকাৰী এন পি এছ কৰ্মচাৰী সন্থাৰ সভাপতি অচ্যুতানন্দ হাজৰিকা আৰু সম্পাদক অপূৰ্ব শৰ্মাই। অসমত পুৰণি পেঞ্চন ব্যৱস্থা প্ৰৱৰ্তনৰ দাবী জনাই অহা সদৌ অসম চৰকাৰী এন পি এছ কৰ্মচাৰী সন্থাই ইং ৩১ জানুৱাৰী তাৰিখে ‘গণ অভিৱৰ্তন’ অনুস্থিত কৰিছিল। এই গণ অভিৱৰ্তনত ৰাজ্যৰ বিশিষ্ট শিক্ষাবিদ, অৰ্থনীতিবিদ, সাংবাদিক, বুদ্ধিজীৱী, প্ৰতিষ্ঠিত কৰ্মচাৰী সন্থা- সংঘৰ প্ৰতিনিধিসকলে এক কণ্ঠেৰে এন পি এছ ব্যৱস্থাই অসমৰ সামাজিক আৰু অৰ্থনৈতিক ক্ষেত্ৰত বিৰূপ প্ৰভাৱ পেলাব বুলি মত পোষণ কৰি অসম চৰকাৰৰ যোগাত্মক সঁহাৰিৰ বাবে আহ্বান জনাইছিল । এই আহ্বানৰ প্ৰতি অসম চৰকাৰে সদিচ্ছা নেদেখুওৱাই চৰকাৰৰ নেতিবাচক মনোভাব স্পষ্ট কৰিছে। অসমৰ মাননীয় বিধান সভাইয়ো এন পি এছ ব্যৱস্থাৰ নেতিবাচক প্ৰভাৱ স্বীকাৰ কৰাৰ পিছতো অসম চৰকাৰে দাখিল কৰা ৰাজ্যিক বাজেটতো এই বিষয়টি উল্লেখ নকৰি অসমৰ কৰ্মচাৰী সমাজৰ মাজত সৃষ্টি হোৱা অৱসৰী জীৱনৰ প্ৰতি শংকাক চৰকাৰে ভেঙুচালি কৰা বুলি প্ৰকাশ কৰিছে সন্থাৰ সভাপতি আৰু সম্পাদকে। যি ক্ষেত্ৰত অসমৰ লাখ লাখ কৰ্মচাৰীয়ে চৰকাৰৰ প্ৰতি আশাৰে বাট চাই আছিল, চৰকাৰে কৰা এনে উদাসীন ব্যৱহাৰৰ প্ৰতি সদৌ অসম চৰকাৰী এন পি এছ কৰ্মচাৰী সন্থাই তীব্ৰ অসন্তুষ্টি প্ৰকাশ কৰিছে। চৰকাৰৰ কাৰ্যসূচীক সততে সহযোগ কৰি অহা সন্থাই ৰাজ্য চৰকাৰৰ উদাসীনতাৰ বাবে বাধ্য হৈ ৰাজ্যত অ পি এছ ব্যৱস্থা বলবৎ কৰাৰ বাবে পুনৰ দাবী জনাই আজিৰে পৰা সন্থাৰ আহ্বানত আন্দোলনৰ কাৰ্যসূচী আৰম্ভ কৰিছে। এই আন্দোলনৰ অংশ হিচাপে অসমৰ এন পি এছ আঁচনিৰ অন্তৰ্ভূক্ত শিক্ষক, বিষয়া, আৰক্ষী, কৰ্মচাৰীয়ে নিজ নিজ কৰ্তব্যস্থলীত উপস্থিত থাকি চৰকাৰী কামৰ পৰা বিৰত হৈ জনসাধাৰণক পণবন্দী নকৰাকৈ অসহযোগ আন্দোলনত অংশ গ্ৰহণ কৰিছে। সন্থাৰ সভাপতি-সম্পাদকে অসমৰ বিত্ত মন্ত্ৰীয়ে ঘোষণা কৰা কাৰ্যকালৰ কোনো বাধ্য বাধকতা নথকাকৈ অৱসৰ প্ৰাপ্ত কৰ্মচাৰীয়ে পাবলগীয়া নিম্নতম ১০ লাখ টকাৰ অৱসৰকালীন আনুতোষিক (Retirement Gratuity) ৰ ক্ষেত্ৰত কোনো ধৰণৰ চৰকাৰী নিৰ্দেশ আজিলৈ প্ৰকাশ নকৰাত ক্ষোভ প্ৰকাশ কৰি এই ক্ষেত্ৰত সোনকালে ব্যৱস্থা গ্ৰহণ কৰিবলৈ অসম চৰকাৰক দাবী জনাইছে।
আজিৰ আন্দোলন কাৰ্যসুচীত অংশগ্ৰহণ কৰি নিজৰ পাপ্যৰ হকে মাত মতা আৰু অসমৰ কৰ্মচাৰী সমাজৰ ভৱিষ্যতৰ হকে আগবাঢ়ি অহা প্ৰতিজন সন্মানীয় বিষয়া, শিক্ষক, আৰক্ষী, কৰ্মচাৰীক সন্থাৰ হৈ কৃতজ্ঞতা প্ৰকাশ কৰিছে সভাপতি- সম্পাদকে। একেলগে যি কেইটা অসমৰ কৰ্মচাৰী সন্থা- সংঘই এই অ পি এছ প্ৰতিষ্ঠাৰ সংগ্ৰামত সমৰ্থন দিছে তেওঁলোককো ধন্যবাদ জনাই ৰাজ্যৰ আন কৰ্মচাৰী সন্থা, সংঘক সদৌ অসম চৰকাৰী এন পি এছ কৰ্মচাৰী সন্থাৰ সংগ্ৰামক স্পষ্ট সমৰ্থন দিবলৈ সভাপতি অচ্যুতানন্দ হাজৰিকা আৰু সম্পাদক অপূৰ্ব শৰ্মাই অনুৰোধ জনাইছে। ইয়াৰ অংশ হিচাপে ডিব্ৰুগড় জিলা চৰকাৰী এন পি এছ কৰ্মচাৰী সন্থাৰ উদ্যোগত কৰ্মবিৰতি সুকলমে সমাপন হয়। জিলা সমিতিৰ সভাপতি ডিম্বেধৰ চেতিয়া আৰু সম্পাদক মনোজ মহন কাৰ্যসূচী সফল ৰূপায়ণৰ বাবে কৰ্মচাৰী, বিভিন্ন কৰ্মচাৰী সন্থাক ধন্যবাদ জনাইছে।
Miss Grand International 2020ত অসম জীয়ৰী চিমৰন শৰ্মা
অসম জিয়ৰী চিমৰন শৰ্মা Miss Grand International 2020ৰ বাবে ভাৰতৰ অফিচিয়েল এণ্টেৰী লাভ কৰিছে।
গুৱাহাটিত জন্মলাভ কৰাৰ লগতে গুৱাহাটিতে ডাঙৰ হোৱা চিমৰন বৰ্তমান জয়পুৰত থাকে।
Miss Grand Internatinal 2020ৰ অনুষ্ঠান ২১ মাৰ্চ ২০২১ত থাইলেণ্ডত অনুষ্ঠিত হ’ব ।
নগাঁও সদৰ সমষ্টিত একেদিনাই ৬৬ টা উন্নয়ণ মূলক কামৰ শুভ উদ্ধোধন বিধায়ক ৰূপক শৰ্মাৰ
নগাঁও সদৰ সমষ্টিত উন্নয়নৰ ধাৰাবাহিকতা ৰক্ষা কৰি আজি সমষ্টিটোৰ বিধায়ক ৰূপক শৰ্মাই নতুনকৈ নিৰ্মাণ কৰা আৰু নিৰ্মাণ কাৰ্য আৰম্ভ কৰাকে ধৰি মুঠ ৬৬ টা উন্নয়ণ মূলক কামৰ শুভ উদ্বোধন কৰে। সদৰ সমষ্টিৰ অন্তৰ্গত কেন্দুগুৰি গাঁও পঞ্চায়তত চতুৰ্দশ বিত্তীয় আয়োগৰ অধীনত নিৰ্মাণ কাৰ্য সম্পূৰ্ণ হৈ উঠা ২৪ টাকৈ বিভিন্ন উন্নয়ন মূলক আঁচনিৰ আজি শুভ উদ্ধোধন কৰে বিধায়ক শৰ্মাই ।
আনহাতে কেন্দুগুৰি গাওঁ পঞ্চায়তত অনুষ্ঠিত এখন ৰাজহুৱা সভাত অংশগ্ৰহণ কৰি বিধায়ক শৰ্মাই কয় : বিজেপিৰ মিত্ৰ জোঁটৰ চৰকাৰখনে চহৰাঞ্চলৰ সমানে গ্ৰামাঞ্চলৰ উন্নয়ণৰ ওপৰত সদায় গুৰুত্ব আৰোপ কৰি আহিছে। বিশেষকৈ অসমৰ মুখ্যমন্ত্রী সৰ্বানন্দ সোণোৱাল আৰু বিত্তমন্ত্রী ড: হিমন্ত বিশ্ব শৰ্মাৰ সদিচ্ছাত নগাঁও সদৰ সমষ্টিত দ্ৰুত গতিত উন্নয়ণ মূলক কাম কাজ সম্ভৱ হৈ উঠিছে ।
বৰ্তমানেও সমষ্টিটোৰ প্ৰায় সকলো স্হানত উন্নয়ন মূলক কাম কাজ ৰূপায়ণ হৈ আহিছে । ইয়াৰ দ্ধাৰা সমষ্টিবাসী নিশ্চয়কৈ উপকৃত হব। ৰাইজৰ আশীৰ্বাদ লৈ পৰৱৰ্তী সময়তো আমি এই উন্নয়নৰ ধাৰা অটুত ৰাখিম। ইপিনে আজি বিধায়ক গৰাকীয়ে সমষ্টিটোৰ খাগৰিজান উন্নয়ন খন্ডৰ অন্তৰ্গত বিভিন্ন স্হানত পাঁচটাকৈ উন্নয়ন মূলক কামৰ শুভাৰম্ভ কৰে।
আঞ্চলিক পঞ্চায়তৰ পঞ্চদশ বিত্তীয় আয়োগৰ অধীনত নিৰ্মাণ হবলগীয়া আজি কামৰ শুভাৰম্ভ কৰা উন্নয়ন মূলক কাম সমূহ হৈছে ক্ৰমে কেন্দুগুৰি এম ই মাদ্ৰাছাৰ চাৰিসীমা বেৰৰ পুনৰ নিৰ্মাণ,ডিমৌ বাইপাছৰ নলা পুনৰ নিৰ্মাণ,কহুৱাআটি কলা কৃষ্টি কেন্দ্ৰৰ ৰাজহুৱা ভৱন ,বৰগাঁও সাহিত্য মঞ্চ আৰু সাংস্কৃতিক কেন্দ্ৰৰ পুনৰ নিৰ্মাণ,১ নং শেনছোৱা ব্লক প্ৰাথমিক বিদ্যালয়ৰ মুকলি সাংস্কৃতিক মঞ্চৰ আধাৰশিলা।ইয়াৰ লগতে বিধায়ক গৰাকীয়ে মহাবীৰ লাচিত চিলাৰায় সেতু নিৰ্মাণ অভিযানৰ গ্ৰাম্য আন্তঃগাথনি উন্নয়ন পূঁজিৰ জৰিয়তে নগাঁও সদৰ সমষ্টিৰ বিভিন্ন অঞ্চলত তিনিখনকৈ নবনিৰ্মিত দলঙৰ শুভ উদ্ধোধন কৰে ।
আজি উদ্ধোধন কৰা দলং তিনিখন হৈছে ক্ৰমে নগাঁও ধিং পথৰ পৰা উত্তৰ শিমলুগুৰি পথৰ দলং,সোনাই চাইদৰীয়া পথৰ দলং আৰু নগাঁও -জুৰীয়া বালিকটীয়া পথৰ পৰা আমতলা হেৰাপট্টি পথৰ দলং।আনহাতে নগাঁও চহৰৰ অগ্ৰণী শিক্ষানুষ্ঠান নগাঁও কিৰণৱালা গোস্বামী বালিকা বিদ্যালয়ত আজি এটি বিজ্ঞান কক্ষ আৰু কম্পিউটাৰ কক্ষ ছাত্ৰী সকলৰ বাবে মুকলি কৰে বিধায়ক শৰ্মাই । কক্ষ দুটা মুকলি কৰি বিধায়ক শৰ্মাই ইয়াৰ দ্ধাৰা বিদ্যালয়খনৰ ছাত্ৰী সকলে শৈক্ষিক ক্ষেত্রত সন্মুখীন হৈ অহা অভাৱ দূৰ হব বুলি আশা প্ৰকাশ কৰে ।লগতে বিদ্যালয় খনৰ সন্মুখত ৰাজ্যৰ স্ব -শিতানৰ অগ্ৰাধিকাৰ দাবী আঁচনিৰ জৰিয়তে নতুনকৈ নিৰ্মাণ হবলগীয়া এটি উপপথৰ কামৰো আজি শুভাৰম্ভ কৰে।ইয়াৰোপৰি বিধায়ক গৰাকীয়ে আজি ডাকৰঘাট গাঁও পঞ্চায়তত চুৰ্তুদশ বিত্তীয় আয়োগৰ অধীনত ১০ টা নবনিৰ্মিত বিভিন্ন উন্নয়ন মূলক কামৰ শুভ উদ্ধোধন কৰাৰ লগতে নগাঁও সদৰ সমষ্টিৰ অন্তৰ্গত তিৱা স্বায়ত্ব শাসিত পৰিষদ এলেকাত ২২ টাকৈ বিভিন্ন উন্নয়ন মূলক কামৰো শুভাৰম্ভ কৰে।
বি টি আৰত মূল্যবোধৰ ৰাজনীতি চলিছে, হিংসাৰ ৰাজনীতি বন্ধ হৈছে : প্ৰমোদ বড়ো
”সম্পূৰ্ণ পৰিৱৰ্তন বিচাৰিছে বি টি আৰ বাসীয়ে । তাৰ বাবে ইউ পি পি এল দলত দিনক দিনে যোগদান দিব ধৰিছে সকলো শ্ৰেণীৰ লোকে ৷ দূৰ্নীতি ভ্ৰষ্টাচাৰ হিংসা মুক্ত সমাজ গঢ়াৰ পক্ষপাতীত সকলোৱেই আগুৱাই আহিছে ৷ বি টি আৰত এতিয়া মূল্যবোধৰ ৰাজনীতি চলিছে ,হিংসাৰ ৰাজনীতি বন্ধ হৈছে ৷” এনে দৰে কয় বি টি আৰৰ মূখ্য কাৰ্যবাহী সদস্য প্ৰমোদ বড়োৱে ৷
আজি অসম বংগ সীমান্তৱৰ্তী বাজুগাঁৱত ইউ পি পি এল দলৰএখন যোগদান সভাত অংশ গ্ৰহণ কৰি বড়োৱে আৰু কয় যে বি পি এফৰ শাসন কালত দূৰ্নীতিয়ে ছানি ধৰাখিনি ছাপা কৰিব লাগিব ৷বি টি আৰত বড়ো অবড়োৰ ৰাজনীতিৰো যৱনিকা পৰিছে ৷ নিৰ্বাচন আহিব যাব ৷ কিন্ত সমাজ পাতি যুগ যুগান্তৰ বসবাস কৰিব লাগিব ৷ সেয়ে এখন সুন্দৰ সবল সমাজ গঢ়াৰ বাবে সকলোৱে হাতে হাত ধৰি আগুৱাই আহিব লাগিব ৷
কোনোবাই যদি ভবিছে আমি আকৌ জংঘল মুখী হম আৰু সমাজত অশান্তি কৰিম ৷তেনে চিন্তা সমুলি পৰিত্যাগ কৰা ভাল কাৰণ সমাজত অশান্তি কৰিব নিদিম ৷বি টি আৰ নিৰ্বাচনত ইউ পি পি এল দলে ৰাইজক যি সমূহ প্ৰতিশ্ৰুতি প্ৰদান কৰিছিল সেই সমূহ বাস্তৱিক কৰিবলৈ দল সংকল্পবদ্ধ ৷ইউ পি পি এলৰ দলৰ যুৱ নেতা মিঠুন বসুমাতাৰীৰ পৰিচালনাত অনুষ্ঠিত হোৱা যোগদান সভাত এ আই ইউ ডি এফ ,কংগ্ৰেছ ,বিজেপি আদি দল ত্যাগ কৰি প্ৰায় ৪০ গৰাকী পূৰুষ- মহিলাই ইউ পি পি এল দলত যোগদান কৰে ৷
আজিৰ এই যোগদান কাৰ্যসূচীত ২০১৬ চনৰ বিধান সভা নিৰ্বাচনত এ আই ইউ ডি এফ দলৰ পৰা টিকট লৈ গোসাইগাঁও বিধান সভা সমষ্টিত প্ৰতিদ্বন্দ্বীতা আগবঢ়াই পৰাজিত হোৱা ৰবি শংকৰ কাশী ৰেড্ডী ইউ পি পি এল দলত যোগদান কৰে ৷
যোগদানকাৰী সকলক বি টি আৰৰ চীফ্ প্ৰমোদ বড়োৱে আৰনাই, ফুলাম গোমছাৰে আদৰি লয় ৷ যোগদান সভাত ইউ পি পি এল দলৰ নেতা হোপনা সৰেন, আবজালুৰ ৰহমান, জিৰন বসুমাতাৰী, সোমনাথ বসুমাতাৰী, খাইৰুল আলম মিঞা, আবুক্কৰ ছিদ্দিক উপস্থিত আছিল ৷
বিশ্বনাথ জিলাৰ বিহালীত ভেঞ্চাৰ স্কুল বন্ধ কৰাৰ প্ৰতিবাদত নিখিল ভাৰত ছাত্ৰ সন্থাৰ ধৰ্ণা
আজি নিখিল ভাৰত ছাত্ৰ সন্থাই শেহতীয়াকৈ বিজেপি চৰকাৰে ভেঞ্চাৰ স্কুল সমূহ বন্ধ কৰি দৰিদ্ৰ ছাত্ৰ ছাত্ৰীক শিক্ষাৰ অধিকাৰৰ পৰা বঞ্চিত কৰাৰ প্ৰতিবাদত বিশ্বনাথ জিলাৰ বিহালী প্ৰাথমিক শিক্ষা খণ্ডৰ শিক্ষা বিষয়াৰ কাৰ্যালয়ত এক ধৰ্ণা কাৰ্যসূচী ৰূপায়ন কৰে। বিহালীৰ কেইবাখনো ভেঞ্চাৰ স্কুল সমূহৰ ছাত্ৰ ছাত্ৰী আৰু অভিভাৱক সকলে এই কাৰ্যসূচীত অংশগ্ৰহণ কৰে। বৰগাও চাহ বাগিছাৰ খেলপথাৰৰ পৰা দুই কিলোমিটাৰ পথ সমদল কৰি প্ৰতিবাদকাৰী সকল বিহালী প্ৰাথমিক শিক্ষা খণ্ডৰ কাৰ্যালয়ত উপস্থিত হৈ শিক্ষা বিষয়া গৰাকীৰ জৰিয়তে অসম প্ৰাথমিক বিদ্যালয়ৰ শিক্ষা সঞ্চালকালয়লৈ এখন স্মাৰক পত্ৰ প্ৰেৰণ কৰে ।
স্মাৰক পত্ৰত উল্লেখ যে, বিদ্যালয় প্ৰাদেশিকৰণৰ নামত ৰাজ্যৰ বিজেপি চৰকাৰে ৩৭০০ খন ভেঞ্চাৰ স্কুল বন্ধ কৰাৰ নিৰ্দেশনা জাৰি কৰিছে। ইয়াৰ ভিতৰত বিহালী শিক্ষা খণ্ডৰ অন্তৰ্গত টুংবাৰী প্ৰাথমিক বিদ্যালয়,বৰঝাৰণি বঙালী প্ৰাথমিক বিদ্যালয়, জ্যোতিৰ্ময় প্ৰাথমিক বিদ্যালয়,ৰামধন প্ৰাথমিক বিদ্যালয়, লক্ষ্মীনাথ বেজবৰুৱা প্ৰাথমিক বিদ্যালয়, জংঘলবস্তী প্ৰাথমিক বিদ্যালয়, আনন্দৰাম প্ৰাথমিক বিদ্যালয়,শংকৰজ্যোতি প্ৰাথমিক বিদ্যালয়,যশৰানী দেৱান মধ্য ইংৰাজী বিদ্যালয়,শলমাৰী মধ্য ইংৰাজী বিদ্যালয়,মিজিকা ছোৱালী মধ্য ইংৰাজী বিদ্যালয়, চেৰেলীয়া মধ্য ইংৰাজী বিদ্যালয়, বিমলা আদৰ্শ মধ্য ইংৰাজী বিদ্যালয়, মহানন্দ শৰ্মা মধ্য ইংৰাজী বিদ্যালয়,মকবুল হুচেইন মধ্য ইংৰাজী বিদ্যালয়কে ধৰি ১৫ খনতকৈ অধিক প্ৰাধমিক আৰু মজলীয়া বিদ্যালয় আছে।
এই বিদ্যালয় সমূহত পাচ সহস্ৰাধিক ছাত্ৰ ছাত্ৰীয়ে ২৫-৩০ বচৰ ধৰি শিক্ষা গ্ৰহণ কৰি আহিছে। এই বিদ্যালয় সমূহ প্ৰাদেশিকৰণ নকৰি চৰকাৰে বিদ্যালয়ৰ শিক্ষক কৰ্মচাৰী সকলক আন চৰকাৰী বিদ্যালয়ত নিযুক্তি দিছে। তাৰে বহুতো শিক্ষকক শিক্ষা গুৰুৰ মৰ্যদা দিয়াৰ সলনি টিউটৰ হিচাপেহে ঠিকাভিত্তিক নিযুক্তি দিছে। যি সকল শিক্ষকে চৰকাৰৰ নিৰ্দেশনা অনুসৰি ডি এল ই ডি পৰীক্ষাত উত্তীৰ্ণ হোৱাকে ধৰি বিভিন্ন প্ৰশিক্ষণ লব লগা হৈছিল। এতিয়া তেওঁলোকৰ জ্যেষ্ঠতাক মান্যতা নিদি টিউটৰ হিচাপে নিয়োগ কৰি চৰম অপমান কৰিছে।
বচৰ বছৰ ধৰি বিনা বেতনে শিক্ষা দানত নিযুক্ত শিক্ষক সকলক নিজৰ ন্যায় সংগত অধিকাৰৰ পৰা বঞ্চিত কৰাৰ লগতে বিহালীৰ পাচ সহস্ৰাধিক ছাত্ৰ ছাত্ৰীৰ শিক্ষা জীৱন ধ্বংসৰ গৰাহত পৰিছে। ৰাইজে গাঠিৰ ধন ভাঙি স্কুল সমূহ স্থাপন কৰি নিজৰ সন্তান সকলক শিক্ষাগ্ৰহণৰ ব্যৱস্থা কৰিছিল আৰু আশা কৰিছিল চৰকাৰে স্কুল সমূহ প্ৰাদেশিকৰণ কৰি সেই স্কুলতে শিক্ষক সকলক স সন্মানে নিযুক্তি দি ছাত্ৰ ছাত্ৰী সকলৰ ভৱিষ্যত জীৱন সুৰক্ষিত কৰিব। চৰকাৰৰ এই সিদ্ধান্ত শিক্ষাৰ অধিকাৰ আইন ২০০৯ ৰ পৰীপন্থী আৰু জনবিৰোধী।
চৰকাৰে ৰাইজে কষ্ঠ আৰু পৰিশ্ৰমৰে গঢ়া বিদ্যালয় সমূহ বন্ধ কৰা নিৰ্দেশনা বাতিল কৰা, বিজেপি চৰকাৰে ৰাজহুৱা শিক্ষা অনুষ্ঠান ধ্বংস কৰিব বিচৰা নীতি বন্ধ কৰা, শিক্ষাৰ অধিকাৰ আইন ২০০৯ কঠোৰ ভাৱে ৰূপায়ন কৰা,কেৱল পদ প্ৰাদেশিকৰণ নহয় স্কুল সমূহ প্ৰাদেশিকৰণ কৰি সেই বিদ্যালয়তে শিক্ষক কৰ্মচাৰী সকলক নিযুক্তি দি আন শিক্ষক সকলৰ সমাহাৰত দৰমহা দিয়া, দৰিদ্ৰ পৰিয়ালৰ লৰা ছোৱালীক শিক্ষাৰ পৰা বঞ্চিত কৰা বন্ধ কৰা আদি দাবী সমূহ স্মাৰক পত্ৰত সন্নিবিষ্ট কৰা হয়।
এই প্ৰতিবাদী কাৰ্যসূচী নিখিল ভাৰত ছাত্ৰ সন্থাৰ ৰাজ্যিক সভাপতি সুব্ৰত তালুকদাৰ, উপ সভাপতি জ্যোতি প্ৰকাশ বৰা,ৰাজ্যিক সম্পাদক ধনঞ্জয় দাস,অসম সংগ্ৰামী চাহ শ্ৰমিক সংঘৰ লক্ষ্মীকান্ত কুৰ্মী আৰু চিপিআই(এম-এল) দলৰ বিশ্বনাথ জিলা সম্পাদক অনন্ত হাজৰিকাই নেতৃত্ব দিয়ে।