“শিক্ষাগুৰুৰ প্ৰতি শ্ৰদ্ধা জনাই অৰ্পণ কৰা বঁটা আজি মোলৈ আগবঢ়াই একপ্ৰকাৰ জীৱন মোৰ ধন্য কৰিলে ৷ লেখক বা বিভিন্ন কৰ্মক্ষেত্ৰত সেৱা আগবঢ়োৱা যি কোনো  ব্যক্তিয়ে কৰ্মনুসাৰে লাভ কৰা সন্মান বা স্বীকৃতিয়ে তেওঁৰ মনলৈ আনন্দ কঢ়িয়াই আনে যদিও আজি বিখ্যাত গল্পকাৰ যতীন বৰাৰ সোঁৱৰণত আগবঢ়োৱা বঁটা লাভ কৰি মই একপ্ৰকাৰ দুখহে অনুভৱ কৰিছোঁ ৷  জীৱনত পোৱা সন্মান বা স্বীকৃতিয়ে  সকলো লোককে আনন্দ দান কৰিলেও আজি বিখ্যাত গল্গকাৰ তথা শিক্ষাগুৰুৰ নামত আগবঢ়োৱা এই প্ৰাপ্তিয়ে অন্তৰত মাথোঁ সৃষ্টি কৰি গ’ল বেদনা ৷” নগাঁও জিলা সাহিত্য সভাৰ কমলা দেৱী তোদী স্মৃতি ভৱন প্ৰেক্ষাগৃহত আজি নগাঁও জিলা চৰকাৰী পেঞ্চনাৰ সন্থাৰ উদ্যোগত গল্প সৌৰভ যতীন বৰাৰ দ্বাদশ বৰ্ষ স্মাৰক বক্তৃতা অনুষ্ঠান আৰু গল্প সৌৰভ যতীন বৰা সোঁৱৰণী সাহিত্য বঁটা প্ৰদান অনুষ্ঠানটিত বঁটা গ্ৰহণ কৰি এইদৰে অভিমত ব্যক্ত কৰে ৰামধেনু যুগৰ বিশিষ্ট গল্পকাৰ ভদ্ৰেশ্বৰ ৰাজখোৱাই ৷ 

নগাঁও জিলা চৰকাৰী পেঞ্চনাৰ সন্থাৰ সভাপতি আব্দুল হুছেইনৰ পৌৰোহিত্যত অনুষ্ঠিত অনুষ্ঠানটিৰ আৰম্ভণিতে সমবেত ৰাইজক উদ্দেশ্যি আদৰণি ভাষণ আগবঢ়াই সন্থাৰ প্ৰাক্তন সভাপতি, অৱসৰপ্ৰাপ্ত অধ্যক্ষ মুকুল শইকীয়াই ৷ সন্থাৰ সম্পাদক জীৱ প্ৰসাদ বৰকটকীয়ে উদ্দেশ্য ব্যাখ্যা কৰা অনুষ্ঠানত নিৰ্দিষ্ট বক্তা হিচাবে উপস্থিত থাকি  নাৰী সৱলীকৰণ শীৰ্ষক স্মাৰক বক্তৃতা প্ৰদান কৰি নগাঁও মহাবিদ্যালয়ৰ অৱসৰপ্ৰাপ্ত অধ্যাপিকা তথা বিশিষ্টা লেখিকা কল্পনা হাজৰিকা গায়নে নাৰী সৱলীকৰণ বিষয়টো কিয়নো আহিল বুলি উত্থাপনৰ জৰিয়তে নাৰী সকলক দুৰ্বল বুলি প্ৰমাণ কৰাৰ লগতে পুৰুষ সৱলীকৰণ বুলি আমি কিয় নকও বুলি গুৰুত্বপূৰ্ণ  মন্তব্য কৰে ৷ 

গায়নে প্ৰসঙ্গক্ৰমে নাৰীয়ে নিজক দুৰ্বল বুলি ভাবে ঠিক তেনে হোৱা হ’লে সন্তান জন্ম দিব নোৱাৰিলেহেঁতেন ৷ শস্য সংৰক্ষণ, বীজ ৰোপণ আদি কাৰ্যত  শংকৰদেৱ, মাধৱদেৱে নাৰীক দুৰ্বল বুলি ভবা নাছিল আৰু আধুনিক মানুহেও নাভাবে বুলি উল্লেখ কৰাৰ লগতে  নাৰীয়ে নিজেই নিজক বিভিন্ন ক্ষেত্ৰত অৱনমিত কৰা বুলিহে অভিযোগ কৰি পুৰুষতকৈ নাৰীয়েহে নাৰীৰ বেছি অনিষ্ট কৰাৰ বিষয়ে দোহাৰি নাৰী সৱলীকৰণ মানে নাৰীয়ে নিজক দুৰ্বল বুলি ভবা মানসিকতাৰ পৰা ঘটোৱা উত্তৰণ আৰু নিজৰ ৰুচিবোধৰ সিদ্ধান্ত গ্ৰহণ কৰি নিজৰ আৰু সমাজৰ সংস্কাৰ সাধন কৰা বুলি তাৎপৰ্যপূৰ্ণ বক্তব্য ব্যক্ত কৰে ৷ 

গুৱাহাটী বিশ্ববিদ্যালয়ৰ অসমীয়া বিভাগৰ প্ৰাক্তন মুৰব্বী অধ্যাপিকা তথা গল্প সৌৰভ খ্যাত প্ৰয়াত কথা সাহিত্যিক যতীন বৰাৰ পত্নী লীলাৱতী শইকীয়া বৰা অনুষ্ঠানত অংশ গ্ৰহণ কৰি সৰ্বপ্ৰথম বাৰৰ বাবে তেখেতৰ স্বামীৰ নামত উৎসৰ্গা কৰা বঁটা স্বামীৰ একালৰ প্ৰিয় ছাত্ৰ তথা ৰামধেনু যুগৰ প্ৰখ্যাত গল্পকাৰ ভদ্ৰেশ্বৰ ৰাজখোৱাক নগাঁও পেঞ্চনাৰ সন্থাৰ জৰিয়তে আগবঢ়াবলৈ পাই কৃতাৰ্থ হোৱা বুলি অনুভৱ প্ৰকাশ কৰে ৷ 

যুৱ লেখক-সাংবাদিক প্ৰাঞ্জল বৰদলৈয়ে গল্পকাৰ ৰাজখোৱাৰ গল্প সম্পৰ্কে শ্ৰুতি-মধুৰ বক্তব্য দাঙি ধৰা অনুষ্ঠানটিত চন্দ্ৰকান্ত হাজৰিকা, যতীন্দ্ৰনাথ হাজৰিকা, ৰত্নমালা শইকীয়া, মহেন্দ্ৰ মহন্ত,মাধন শইকীয়া, অনিমা শৰ্মা,লম্বোদৰ হাজৰিকা, ঠগীত মহন্ত, ভৱেশ মেধি, ৰিণি নেওগ বৰাকে ধৰি অসম চৰকাৰৰ বিভিন্ন বিভাগৰ পৰা অৱসৰ গ্ৰহণ কৰা  আঢ়ৈ কুৰিৰো অধিক লোকৰ  সমাবেশ ঘটা অনুষ্ঠানটিত মোম্বাইৰ ছবি জগতৰ বিখ্যাত কৰিঅগ্ৰাফাৰ কমল নাথ উপস্থিত থাকে ৷

অনুষ্ঠানটিত গল্পকাৰ ৰাজখোৱাক প্ৰদান কৰা বঁটাৰ লগত ফুলাম গামোচা,জাপি, চেলেং, সন্মান পত্ৰ, স্মাৰক আৰু নগদ পাঁচ হেজাৰ টকা আগবঢ়োৱা হয় ৷ লেখক লুইত দত্তই শলাগৰ শৰাই আগবঢ়োৱাৰ অন্তত জাতীয় সংগীত পৰিৱেশনেৰে অনুষ্ঠানৰ সামৰণি পৰে ৷

সংযুক্ত মুক্তি বাহিনী আলফাই দুই কুইপ বিষয়াক অপহৰণ কৰা কণ্ডত ৰাজ্যজুৰি হোৱা চাঞ্চল্য মাৰ নৌযাওতেই পুনৰ পলাশবাৰীৰ মিৰ্জাত যোৱা নিশা হোৱা ব্যৱসায়ী এজনক অপৰহণ কৰা কাণ্ডই দক্ষিণ কামৰূপ অঞ্চলত তীব্ৰ প্ৰতিক্ৰীয়াৰ সৃষ্টি কৰিছে। ব্যৱসায়ীক সংঘাতৰ পৰিণতি নে ধন দাবীৰ বাবেই অপহৃত হ’ল মিৰ্জাৰ ব্যৱসায়ী মুনিন্দ্ৰ তালুকদাৰ। নিশাৰে পৰা তদন্ত চলায়ো শুংসূত্ৰ উলিয়াব পৰা নাই আৰক্ষীয়ে। পলাশবাৰীত মিৰ্জাত যোৱা নিশা সংঘটিত হয় চাঞ্চল্যকৰ অপহৰণ কাণ্ডটি। নিশা প্ৰায় ন বজাত  মিৰ্জা মিলনপুৰৰ ব্যৱসায়ী মুনীন্দ্ৰ তালুকদাৰ ওৰফে মণিক বাট আগচি ধৰি কোনো দুৰ্বৃত্তই অপহৰণ কাণ্ড সংঘটিত কৰে। পলাশবাৰী থানাৰ অন্তৰ্গত মিৰ্জা চ’কত থকা নিজা ব্যৱসায়ীক প্ৰতিষ্ঠান বন্ধ কৰি ঘৰলৈ গৈ থকা অৱস্থাত ঘৰৰ সমীপতে বাট আগুচি ধৰি মণিক গাড়ীৰ পৰা নমাই চাৰিচকীয়া বাহনত অহা দুৰ্বৃত্তৰ দলে অপহৰণ কৰি লৈ যায়। ঘটনাস্থলীত পলাশবাৰী আৰক্ষীৰ লগতে উচ্চ পদস্থ বিষয়াই উপস্থিত হৈ এটা খালি মেগজিনো উদ্ধাৰ কৰাৰ লগতে অভিযান অব্যাহত ৰাখিছে। প্ৰশ্ন উঠিছে ব্যৱসায়ীক সংঘাতৰ পৰিণতি নে ধন দাবীৰ বাবেই অপহৃত হল মিৰ্জাৰ ব্যৱসায়ী মুনিন্দ্ৰ তালুকদাৰ। উল্লেখ্য যে প্ৰায় দুবছৰ পূৰ্বে অবৈধ গুটখাৰ  বেহাত জড়িত হৈ এইগৰাকী মুনিন্দ্ৰ তালুকদাৰে আৰক্ষীৰ হাতত ধৰা পৰি ৰঙাঘৰৰ আলহী হ’ব লগা হৈছিল। এতিয়া তদন্ত চলায়ো আৰক্ষীয়ে শুংসূত্ৰই উলিয়াব পৰা নাই। এই ঘটনাকলৈ মিৰ্জা অঞ্চলত আতংকৰ সৃষ্টি হৈছে। কোনে কিয় অপহৰণ কৰিলে সেয়া স্পষ্ট হোৱা নাই যদিও পৰিয়ালৰ লোকে  হাহাকাৰ কৰিছে। কোবৌ কাকুতি কৰিছে মুক্তিৰ বাবে। এতিয়া কোনে কিহৰ বাবে অপহৰণ কৰিলে মুনিন্দ্ৰ তালুকদাৰক তাক লৈ সৃষ্টি হৈছে নানা ৰহস্যৰ।

কভিড ১৯ ৰ সংক্ৰমণ কিছু হ্ৰাস পোৱাৰ পিছত বিশ্বনাথ কৃষি মহাবিদ্যালয়লৈ অসম তথা ভাৰত বৰ্ষৰ বিভিন্ন ৰাজ্যৰ পৰা অহা শ্নাতক আৰু শ্নাতোকোত্তৰ পাঠ্যক্ৰমৰ প্ৰথম বৰ্ষৰ ছাত্ৰ ছাত্ৰী সকলক আদৰণি জনোৱাৰ বাৱে ২০ ফেব্ৰুৱাৰী তাৰিখে নৱাগত আদৰণি সভাৰ লগতে সাংস্কৃ তি ক সন্ধিয়াৰ  আয়োজন কৰা হয়।মহাবিদ্যালয় খনৰ প্ৰেক্ষাগৃহত বন্তি প্রজ্বলনেৰে শুভ আৰম্ভণি হোৱা অনুষ্ঠানৰ মুকলি সভাত মহাবিদ্যালয়ৰ সহযোগী বিজ্ঞান গুৰু ড° ৰনেন্দ্ৰ নাথ বৰ্মনে তেখেতৰ ভাষণত  ছাত্ৰ-ছাত্ৰী সকলক আদৰণি জনোৱাৰ লগতে কৃষি পাঠ্যক্ৰমত কেৰিয়াৰ সম্পৰ্কে অৱগত কৰে। অসম কৃষি বিশ্ববিদ্যালয়ৰ স্নাতকোত্তৰ পাঠ্যক্ৰমৰ সঞ্চালক ড° অজিত বৈশ্যই সন্মানীয় অতিথি হিচাপে অংশ গ্ৰহণ কৰা মুকলি সভাৰ ভাষণত ছাত্ৰ ছাত্ৰী সকলক উৎসাহিত কৰাৰ লগতে কৃষি খণ্ডত ভৱিষ্যত আৰু আধুনিক প্ৰযুক্তিবিদ্যাৰ বিষয়ে সদৰী কয়। সভাৰ সন্মানীয় অতিথি বিশ্বনাথ জিলাৰ উপায়ুক্ত শ্ৰী যুত প্ৰণৱ কুমাৰ শৰ্মাই ছাত্ৰ-ছাত্ৰী সকলক কোভিড নিয়মাৱলীৰ মাজেৰে কৰ্তব্য আগুৱাই নিবলৈ পৰামৰ্শ আগবঢ়াই। মুল সভাত অধ্যাপক ড° ৰত্নকিংকৰ গোস্বামীয়ে নিজৰ ভাষণত নবাগত ছাত্ৰ ছাত্ৰী সকলক আদৰণি জনায়।সহকাৰী অধ্যাপক সীমনা তামুলীয়ে আঁ‌ত ধৰা মুল সভাত  সহকাৰী অধ্যাপক ড° ৰাণীমা মিশ্ৰই শলাগৰ শৰাই আগবঢ়ায়। সন্ধিয়া  আকৰ্ষণীয় সাংস্কৃতিক সন্ধ্যাৰ কাৰ্যসূচীৰে অনুষ্ঠানৰ সামৰণি পৰে।

মাজুলীত অনুষ্ঠিত হ’ৱ লগা ২০২০-২১ বৰ্ষৰ “সহোদৰ” শীৰ্ষক অনুষ্ঠানত বিভিন্ন জাতি জনগোষ্ঠীৰ ৬০০ শিল্পীয়ে অংশগ্ৰহণ কৰিব ৷ ১০০ খুলীয়াই শুভাৰম্ভ কৰিব সহোদৰ অনুষ্ঠানটিৰ |বিভিন্ন জাতি জনগোষ্ঠীৰ লোকৰ সমন্বয়ৰ ক্ষেত্ৰ হ’ব মাজুলী |
অহা  ২১ আৰু ২২ ফেব্ৰুৱাৰীত মাজুলীত হ’বলগীয়া “সহোদৰ” সমন্বয় আৰু ভাতৃত্ববোধৰ এক প্ৰয়াস অনুষ্ঠান অনুষ্ঠিত হ’ৱ  জেংৰাইমুখৰ মৰাসুঁতিৰ পাৰত । অসমৰ সাংস্কৃতিক প্ৰাণকেন্দ্ৰ মাজুলীত অনুষ্ঠিত হ’ব এই বৰ্ষৰ সহোদৰ ২০২০-২১। মাজুলীৰ অনন্য সংস্কৃতি আৰু সৃষ্টিশীল স্থানীয় বৈশিষ্ট সমূহক অসমৰ প্ৰতিটো প্ৰান্তত প্ৰচাৰ তথা সমাদৰ লাভৰ নিমিত্তে মাজুলীত এই সহোদৰ অনুষ্ঠানটি আয়োজন কৰা হৈছে।  কিয়নো মাজুলী হ’ল সমগ্ৰ অসমৰ এক সাংস্কৃতিক স্বৰূপ : বৈচিত্ৰময়, বৰ্ণিল আৰু ঐক্যবদ্ধ স্থান হ’ল মাজুলী ৷ এই অনুষ্ঠানৰ  উদ্যোক্তা সকলে জানিবলৈ দিয়া মতে সহোদৰ ২০২০-২১ হ’ব এনে এক মাধ্যম য’ত অসমৰ খিলঞ্জীয়া জনজাতি আৰু অজনজাতি সমূহৰ মাজত বিদ্যমান সাংস্কৃতিক সংমিশ্ৰণৰ আনুষ্ঠানিক ৰূপত প্ৰতিফলন ঘটিব । এনে এক বৰ্ণিল , সৃজনীশীল আৰু সৌহাদ্দ্যপূৰ্ণ অভিজ্ঞতা আৰু অনুভুতিৰ সাক্ষী হ’বলৈ অনুৰোধ জনাইছে উদোক্তা সকলে। সাংস্কৃতিক অনুষ্ঠানটিত অংশগ্ৰহণ কৰিৱ – অসমৰ জনপ্ৰিয় কন্ঠশিল্পী সীমান্ত শেখৰ , দেৱজিৎ সাহা, কৃষ্ণমনি চুতীয়াকে ধৰি বহু কেইজন শিল্পী আৰু অভিনেতা অভিনেত্ৰীয়ে | এই উপলক্ষে জেংৰাইমুখৰ মৰাসুঁতি পথাৰত তুংগত হৈ উঠিছে অনুষ্ঠানৰ পূৰ্ণ প্ৰস্তুতিৰ।

ৰাজ্যৰ নাৰী সৱলীকৰণৰ লক্ষ্য আগত ৰাখি অসম চৰকাৰে গ্ৰহণ কৰা মহাত্মা গান্ধী গ্ৰাম্য নিয়োগ নিশ্চিত আইনৰ অধীনত স্ব-নিৰ্ভৰ নাৰী আত্মনিৰ্ভৰ অসম আঁচনিখন নাজিৰা উন্নয়ন খণ্ডৰ অধীনৰ শিমলুগুৰি গাঁও পঞ্চায়তত যোৱা বৃহস্পতিবাৰে শুভাৰম্ভণি কৰা হয়।  আঁচনিখনৰ ২০২০-২১ বৰ্ষৰ শুভাৰম্ভণি কৰে শিমলুগুৰি গাঁও পঞ্চায়তৰ হৈ পঞ্চায়ত সচিব মলয় কাকতিয়ে। শুভাৰম্ভণিৰ দিনটোত পঞ্চায়তটোৰ ৫ গৰাকী মহিলালৈ উদ্যান শস্যৰ বাগিছা, পথাৰৰ পুখুৰী খনন, গাহৰি আৰু কুকুৰা পালনৰ গড়াল নিৰ্মাণ আদি শিতানৰ বাবে পুঁজি আৱন্টন দিয়া হয়। লগতে এই আঁচনিসমূহ কেনেদৰে বিজ্ঞানসন্মত পদ্ধতিৰে ফলপ্ৰসু কৰি এই আঁচনিসমূহৰ জৰিয়তে আত্মনিৰ্ভৰ হব পাৰি তাৰ ওপৰত আলোকপাত কৰি পঞ্চায়ত প্ৰতিনিধিসকলৰ তৰফৰ পৰা এক সজাগতামূলক অনুস্থানৰো আয়োজন কৰা হয়। আগন্তুক সময়ত পঞ্চায়তটোৰ অধীনত মূঠ ৫২ গৰাকী মহিলাক এই আঁচনিখনৰ জৰিয়তে সামৰি লোৱা হব বুলি জানিবলৈ দুয়ে পঞ্চায়ত সচিব মলয় কাকতিয়ে।