অসম ৰাজ্যিক প্ৰাথমিক শিক্ষক সন্মিলনীৰ আহ্বানত আৰু মুছলপুৰ মহকুমা প্ৰথমিক শিক্ষক সন্মিলনীৰ উদ্যোগত আজি বাক্সা জিলা প্ৰাথমিক শিক্ষা বিষয়াৰ কাৰ্যালয় ঘেৰাও কাৰ্যসূচী ৰূপায়ণ কৰা হয়। ৰাতিপুৱা ১১ বজাত মুছলপুৰ দূৰ্গা মন্দিৰ প্ৰাংগণত মুছলপুৰ মহকুমাৰ দুই শতাধিক প্ৰাথমিক শিক্ষকে সমবেত হৈ “স্নাতক শিক্ষকৰ পৰা কাঢ়ি নিয়া ৮৭০০ গ্ৰেড পে’ ঘূৰাই দিয়ক”, “নতুন পেঞ্চন নীতি বাতিল কৰক”, “প্ৰাথমিক বিদ্যালয়ত প্ৰধান শিক্ষকৰ পদ সৃষ্টি কৰক” আদি শ্লোগানেৰে সমদল কৰি মুছলপুৰৰ ৰাজপথ উত্তাল কৰি তোলে। ইয়াৰ পিছতে শিক্ষকসকলে জিলা কেন্দ্ৰত থকা প্ৰাথমিক শিক্ষা বিষয়াৰ কাৰ্যালয় ঘেৰাও কৰি বিষয়া গৰাকীৰ জৰিয়তে তেওঁলোকৰ দাবী সমূহ সমাধান কৰাৰ বাবে শিক্ষা মন্ত্ৰীলৈ স্মাৰক পত্ৰ প্ৰেৰণ কৰে।

ৰাজ্যৰ মহিলা অভিযন্তা সকলৰ একমাত্ৰ আৰু উমেহতীয়া সংগঠন ‘অসম মহিলা অভিযন্তা সন্থা’ৰ উদ্যোগত যোৱা  ১৮ ফেব্ৰুৱাৰীত  গুৱাহাটীৰ  চচলৰ টেপুৰাম টেৰন হাইস্কুলত  ছাত্ৰ ছাত্ৰী সকলৰ বাবে এক বিনামূলীয়া   দন্ত পৰীক্ষা শিবিৰ অনুস্থিত হয়।

ভঙাগড়স্থিত “ৰিজিঅনেল ডেন্টেল ক্লিনিক”ৰ  ৬ জনীয়া দন্ত চিকিৎসকৰ এটি দল শিবিৰত উপস্থিত  ছাত্ৰ ছাত্ৰী সকলৰ  দাঁত পৰীক্ষা কৰি যাৱতীয় পৰামৰ্শ আৰু চিকিৎসা সেৱা  আগবঢ়ায়। তেনেদৰে   ছাত্ৰ  ছাত্ৰী সকলে নিজৰ  দাঁত দুপাৰি সুস্থ কৰি ৰাখিবলৈ পৰিস্কাৰ কৰি ৰখাৰসজাগতা অনাৰ  উদ্দেশ্যে অসম মহিলা অভিযন্তা সন্থাৰ তৰফৰ পৰা উপস্থিত সকলো ছাত্ৰ ছাত্ৰীকে টুথপেষ্ট আৰু  টুথব্ৰাচ উপহাৰ দিয়া হয় ।  তদুপৰি  ক’ভিড-১৯ মহামাৰীৰ  সংক্ৰমন পৰা নিজকে  ৰক্ষা কৰিবলৈ স্কুলখনৰ ছাত্ৰ ছাত্ৰী সকলৰ মাজত মাস্ক বিতৰণ কৰা হয়।

উইপ্ৰ ইণ্ডিয়া আৰ্থিয়ান এৱাৰ্ড প্ৰগেমত অসমৰ ভিতৰত দ্বিতীয় স্হান প্ৰাপক নাজিৰা জ’ভিয়েল ভেলী বিদ্যালয়ৰ সপ্তম শ্ৰেণীৰ ছাত্ৰ ফাহিম ইৰফান আহমেদক কোম্পানীটোৰ তৰফৰ পৰা  ১৮ ফেব্ৰুৱাৰীত বিদ্যালয়ত বঁটা প্ৰদান কৰে। উল্লেখ্য যে দেশৰ অগ্ৰনি কম্পিউটাৰ প্ৰতিষ্ঠান উইপ্ৰ ইণ্ডিয়া লিমিটেডে প্ৰতিবছৰে বিদ্যালয় আৰু মহাবিদ্যালয় পৰ্য্যায়ত ছাত্ৰ-ছাত্ৰীসকলৰ মাজত অনুষ্ঠিত কৰি আহিছে উইপ্ৰ আৰ্থিয়ান এৱাৰ্ড প্ৰগেম।দলগতভাবে ছাত্ৰ-ছাত্ৰীসকলে পানী,জৈৱ-বৈচিত্ৰ্য আৰু আৱৰ্জনাৰ ওপৰত প্ৰকল্প প্ৰস্তুত কৰি কোম্পানীটোৰ ওচৰত দাখিল কৰিব লাগে।২০২০বৰ্ষৰ কোম্পানীটোৰ এই সৰ্বভাৰতীয় প্ৰতিযোগিতাত বিদ্যালয় পৰ্যায়ত নাজিৰা মহকুমাৰ তিনি বিদ্যালয় ক্ৰমে গেলেকী জাতীয় বিদ্যালয়ৰ এটা ছাত্ৰ ছাত্ৰী ৰ  দলে দলগতভাবে প্ৰথম স্হান আৰু বাউলী মৈদাম উঃমাঃবিদ্যালয়ৰ এটা ছাত্ৰ ছাত্ৰীৰ দলে তৃতীয় স্হান দখল কৰাৰ বিপৰীতে নাজিৰা নগৰৰ আগশাৰী ব্যক্তিগত খণ্ডৰ বিদ্যালয় জ’ভিয়েল বিদ্যালয়ৰ সপ্তম শ্ৰেণীৰ ছাত্ৰ ফাহিম ইৰফান আহমেদে এককভাবে আৱৰ্জনাৰ ওপৰত প্ৰকল্প প্ৰস্তুত কৰি অসমৰ ভিতৰত দ্বিতীয় স্হান দখল কৰি নাজিৰাৰ লগতে বিদ্যালয়খনলৈ গৌৰৱ কঢ়িয়াই আনিছে।১৮ফেব্ৰুৱাৰীত উইপ্ৰৰ মূূূূখ্য বিষয়া অনুৰাগ বেহাৰৰ হৈ বিদ্যালয়খনৰ অধ্যক্ষ শিল্মী বড়াই  উইপ্ৰ ইণ্ডিয়া আৰ্থিয়ান এৱাৰ্ডত দ্বিতীয় স্হান প্ৰাপ্ত ফাহিম ইৰফান আহমেদক  বঁটা প্ৰদান কৰে।একেটা অনুষ্ঠানতে শ্ৰেষ্ঠ প্ৰকল্প প্ৰস্তুতকৰণত সহায় কৰা বিদ্যালয়খনৰ শিক্ষয়ত্ৰী ফিৰদৌচী খাতুনক কোম্পানীটোৰ তৰফৰ পৰা এখন প্ৰমাণ পত্ৰ প্ৰদান কৰে।উল্লেখ্য যে এইখন বিদ্যালয়ৰ পৰা কেইবাজনো ছাত্ৰই বিগত সময়ত বিভিন্ন বিষয়ত কৃতিত্ব লাভ কৰিছে।

২০২০ বৰ্ষৰ হাইস্কুল শিক্ষান্ত পৰীক্ষাত হোজাই জিলাৰ বৰবহা হাইস্কুলৰ পৰা সৰ্বোচ্চ নম্বৰ লাভ কৰি উত্তীৰ্ণ হোৱা মেধাৱী ছাত্ৰ আশিস দাসক আজি ‘বিভা বৰকটকী প্ৰতিভা বঁটা’ প্ৰদান কৰা হয় । বিভা বৰকটকী একাডেমি ফাউণ্ডেচনৰ তৰফৰ পৰা উক্ত বঁ‌টাটি আগবঢ়োৱা হয়। বৰবহা হাইস্কুলত অনুষ্ঠিত বঁটা প্ৰদান অনুষ্ঠানত মুখ্য অতিথি হিচাপে অংশগ্ৰহণ কৰি নগাঁও আৰু হোজাই জিলাৰ বিদ্যালয়সমূহৰ পৰিদৰ্শক মৃদুল কুমাৰ নাথে মেধাৱী ছাত্ৰ আশিস দাসক বঁটাটি প্ৰদান কৰে । বঁটা প্ৰদান কৰি দিয়া ভাষণত বিদ্যালয়সমূহৰ পৰিদৰ্শক নাথে পিতৄ , মাতৃ  আৰু শিক্ষাগুৰুৰ প্ৰতি শ্ৰদ্ধাশীল হৈ ছাত্ৰ – ছাত্ৰী সকলক অধ্যয়নত ব্ৰতী হবলৈ আহ্বান জনায় । প্ৰসংগ ক্ৰমে তেওঁ নিজৰ জীৱনৰ উদ্ধৃতিৰে  ছাত্ৰ অৱস্থাত কঠোৰ শ্রমৰ মাজেৰে কেনেদৰে শিক্ষা গ্রহণ কৰিছিল সেই বিষয়ে ছাত্ৰ- ছাত্ৰী সকলক অৱগত কৰি সকলো প্ৰত্যাহ্বান নেওচি আগবাঢ়ি যাবলৈ আহ্বান জনায় । বিদ্যালয়খনৰ প্ৰধান শিক্ষক ৰূপক ৰয়ৰ সভাপতিত্বত অনুষ্ঠিত সভাখনত সাংবাদিক জিতেন বৰকটকীয়ে প্ৰকৃত শিক্ষা আহৰণেৰে   নিজকে প্ৰস্তুত কৰি  সমাজৰ হিতৰ বাবে মনোনিৱেশ কৰিবলৈ ছাত্ৰ ছাত্ৰী সকলক আহ্বান জনায় । সভাত  বিভা বৰকটকী একাডেমি ফাউণ্ডেচনৰ হৈ আদৰণি ভাষন প্ৰদান কৰে বিভা বৰকটকীৰ কনিষ্ঠ পুত্র তথা নগাঁও মহাবিদ্যালয়ৰ অধ্যক্ষ ড০ শৰৎ বৰকটকীয়ে। ইয়াৰ পূর্বে বিভা বৰকটকীৰ প্ৰতিচ্ছবিত বিশিষ্ট অতিথি সকলৰ লগতে তেওঁৰ পৰিয়ালৰ সদস্য আৰু বিদ্যালয়খনৰ শিক্ষক, ছাত্ৰ-ছাত্ৰী সকলে শ্ৰদ্ধাঞ্জলি জ্ঞাপন কৰে। আনহাতে সভাস্থলীত উপস্থিত থকা অঞ্চলটোৰ শ্ৰমজীৱি পাঁচ গৰাকী মহিলাক মাতৃ জ্ঞান কৰি অধ্যক্ষ ড০ শৰৎ বৰকটকীয়ে তেওঁলোকৰ চৰণ স্পৰ্শ কৰি সেৱা জনাই একোটিকৈ উপহাৰ প্ৰদান কৰে । এই ক্ষেত্রত ড০ বৰকটকীক সহযোগ কৰে তেওঁৰ পত্নী তথা নগাঁও চৰকাৰী উচ্চতৰ মাধ্যমিক বালক বিদ্যালয়ৰ অধ্যক্ষা দীপিকা লস্কৰে। উল্লেখ্য যে বৰবহা অঞ্চলৰ প্ৰয়াত শিক্ষাবিদ তথা সমাজসেৱক নীলকান্ত বৰকটকীৰ  পৰিবাৰ বিভা বৰকটকীৰ স্মৃতিত পৰিয়ালৰ লোকে বৰবহা হাইস্কুলৰ পৰা হাইস্কুল শিক্ষান্ত পৰীক্ষাত সৰ্বোচ্চ নম্বৰ লাভ কৰা শিক্ষাৰ্থীজনক বিগত তিনি বছৰে বিভা বৰকটকী বঁটা প্ৰদান কৰি আহিছে ।বঁটা প্ৰদান অনুষ্ঠানত বিভা বৰকটকীৰ জ্যেষ্ঠ পুত্র অনন্ত বৰকটকী, কনিষ্ঠ পুত্র ড০ শৰৎ বৰকটকী, বোৱাৰী দীপিকা লস্কৰ, নগাঁও চৰকাৰী উচ্চতৰ মাধ্যমিক বালক বিদ্যালয়ৰ শিক্ষক হিৰণ্য শৰ্মাৰ উপৰি বৰবহা হাইস্কুলৰ শিক্ষক আৰু ছাত্ৰ-ছাত্ৰী সকল উপস্থিত থাকে । আনহাতে বিদ্যালয়খনত আজি‌ দশম শ্রেণীৰ ছাত্র-ছাত্রী সকলৰ এখনি বিদায় সভাও অনুষ্ঠিত হয় ।