দুই কণমানি।নাম নেহা খাৰীয়া (বয়স-১০) আৰু সুভাষ খাৰীয়া (বয়স-৫)।গহপুৰ আৰক্ষী থানাৰ অন্তৰ্গত গহপুৰ নগৰৰ ৬ নং ৱাৰ্ড (গোট বজাৰ) নিবাসী দিন হাজিৰা কৰা শ্ৰমিক বিকি খাৰীয়া(২৪)ৰ সন্তান তেওঁলোক।কিন্তু দুৰ্ভাগ্যজনক কথা এয়ে যে দৰিদ্ৰ পৰিয়ালটোৰ উক্ত দুই কণমানি যোৱা ৯ মে’ৰ পুৱা প্ৰায় ১০ বজাত ঘৰৰ পৰা অপহৃত হোৱাৰ পিছৰ পৰা আজিলৈকে কোনো শুংসুত্ৰ উলিয়াব পৰা নাই তেওঁৰ পিতৃ আৰু পৰিয়ালৰ লোকে।অৱশ্যে ক’ভিড মহামাৰীৰ এই ভয়াবহতাৰ মাজত কণমানি দুটিক সোশৰীৰে উদ্ধাৰ কৰিবলৈ তীব্ৰ অভিযান অব্যাহত ৰাখিছে গহপুৰ আৰক্ষী থানাৰ সহকাৰী উপ পৰিদৰ্শক ভাস্কৰ জ্যোতি নাথৰ নেতৃত্বত অভিযান চলোৱা আৰক্ষীৰ এটা অভিযানকাৰী দলে।উল্লেখযোগ্য যে,বিকি খাৰীয়া নামৰ শ্ৰমিক জন পৰিয়াল সহ গোট বজাৰ নিবাসী বুনি গোড় নামৰ মহিলাগৰাকীৰ ঘৰত ভাৰতীয়া হিচাপে থাকে।এনেদৰে যোৱা প্ৰায় তিনি মাহৰ পৰা ভাৰতীয়া হিচাপে থকাৰ পিছত অকলশৰীয়া বুনি গোড়ৰ লগত বিকি খাৰীয়াৰ পৰিয়ালটোৰ আন্তৰিক সম্পৰ্ক গঢ়ি উঠে।আৰু বিকি দিন হাজিৰা কৰিবলৈ ওলাই গ’লে মাতৃহাৰা উক্ত দুই কণমানিয়ে বুনি গোড়ৰ লগতে সময় অতিবাহিত কৰে।আনদিনাৰ দৰে যোৱা ৯ মে’ৰ পুৱা বিকি খাৰীয়া কামলৈ ওলাই যোৱাৰ সময়ত বুনি গোড়ৰ ওচৰত থৈ গৈছিল তেওঁৰ দুই সন্তান নেহা আৰু সুভাষক।সন্ধিয়া কামৰ পৰা আহি ঘৰৰ মালিকনী বুনি গোড়ৰ লগতে তেওঁৰ দুই সন্তানক ঘৰত নেদেখি বিকি খাৰীয়াই প্ৰথমে ওচৰে পাজৰে বিচাৰ-খোচাৰ কৰে যদিও তেওঁলোকৰ কোনো সন্ধান নাপালে।পিছদিনাৰ পৰা কেইবাদিনো তেওঁ সাম্ভাব্য স্থান সমূহত তেওঁলোকৰ বিচাৰ-খোচাৰ কৰে যদিও কোনো সন্ধান উলিয়াব নোৱাৰিলে।ইপিনে ঘৰৰ মালিকনী বুনী গোড়ৰ ৯৭০৬৭২৩২১০ নম্বৰৰ মবাইল ফোনটো  ৯ মে’ৰ পৰাই ছুইচ অফ হৈ পৰাত সমগ্ৰ বিষয়টো ৰহস্যজনক হৈ পৰাৰ লগতে দুই কণমানি নেহা আৰু সুভাষক বুনী গোড়ে অপহৰণ কৰি লৈ যোৱা বুলি সন্দেহ প্ৰকাশ কৰে বিকি খাৰীয়াৰ লগতে স্থানীয় ৰাইজে।যাৰ বাবে ঘটনাৰ সমস্ত কাহিনী বৰ্ণনা কৰি যোৱা ১৬ মে’ত গহপুৰ আৰক্ষী থানাত অপহৰণ সংক্ৰান্তীয় এখন এজাহাৰ দাখিল কৰে বিকি খাৰীয়াই।উক্ত এজাহাৰৰ ভিত্তিত ভাৰতীয় দণ্ডবিধীৰ ৩৬৩ ধাৰাৰ অধীনত ১২৮/২১ নম্বৰত এক গোচৰ পঞ্জীয়ন কৰি গহপুৰ আৰক্ষী থানাৰ সহকাৰী উপ পৰিদৰ্শক ভাস্কৰ জ্যোতি নাথৰ নেতৃত্বত অপহৃত দুই কণমানি নেহা আৰু সুভাষক সোশৰীৰে উদ্ধাৰ কৰা আৰু অপহৰণকাৰী বুনী গোড়ক গ্ৰেপ্তাৰ কৰিবলৈ অভিযান তীব্ৰতৰ কৰি তুলিছে।দিন-ৰাতি একাকাৰ কৰি চলোৱা  আৰক্ষীৰ এই অভিযানত বৰ্তমানলৈকে তেওঁলোকৰ কোনো সন্ধান পোৱা নাই যদিও এইক্ষেত্ৰত আৰক্ষীয়ে তেওঁলোকৰ অভিযানত অকণো ক্ৰুটি ৰখা নাই। কোনো সদাশয় লোকে এইক্ষেত্ৰত কিবা খবৰ পালে গহপুৰ আৰক্ষীৰ লগত যোগাযোগ কৰিবলৈ অনুৰোধ জনোৱা হৈছে।

 গোলাঘাটত মাৰাত্মক ভাৱে বৃদ্ধি পাইছে নিষিদ্ধ ড্ৰাগছ, ভাং আদিৰ ব্যৱসায় । গোলাঘাটৰ নৱ নিযুক্ত আৰক্ষী অধীক্ষক ডা: ৰবীন কুমাৰৰ নিৰ্দেশমৰ্মে আজি গোলাঘাটৰ ফৰকাটিং আৰক্ষীয়ে অভিযান চলাই এজন ড্ৰাগছ পেডলাৰ আৰু এজন ভাং সৰহবৰাহকাৰীক আটক কৰে।আৰক্ষীৰ অভিযানত গোলাঘাটৰ আবিদ আলি নামৰ যুৱক জনৰ পৰা ৫  গ্ৰাম ব্ৰাউন চুগাৰ জব্দ কৰাৰ বিপৰীতে ফৰকাটিং গাড়ীগাঁৱৰ অনিল বৰা নামৰ লোকজনৰ পৰা ২৪ কি:গ্ৰাম ভাং জব্দ কৰে।  ফৰকাটিং জংচনৰ সমীপত এনেধৰণৰ নিষিদ্ধ ব্যৱসায় পূৰ্বৰ পৰা চলি আছে । তেনেক্ষেত্ৰত ৰাইজে   ফৰকাটিং আৰক্ষীৰ  এনেধৰণৰ অভিযান নিয়মমাফিক নহৈ প্ৰকৃতাৰ্থত হোৱাৰ কামনা কৰিছে ।

মৰিগাঁও জিলাৰ লাহৰীঘাট সমষ্টিৰ তিনিচুকীয়া মহমাৰা গাঁও পঞ্চায়তৰ মহমাৰাত  এতিয়াও চলি আছে গৰাখহনীয়াৰ তাণ্ডৱলীলা । এয়া  আজি ১৯ মে’ৰ বিয়লিৰ গৰাখহনীয়াৰ দৃশ্য । চপৰা চপৰে খহাই নিছে মহাবাহু ব্ৰহ্মপুত্ৰ তথা লুইতৰ বুকুত । দুনাই কোৱাৰ প্ৰয়োজন নাই যে এতিয়ালৈকে কিমান ৰাজহ গাঁও লুইতৰ বুকুত বিলীন হৈ গল আৰু কিমান সহস্ৰাধিক হেক্টৰ কৃষি ভূমি  মহাবাহু ব্ৰহ্মপুত্ৰৰ বুকুত বিলীন হল,  কত জনৰ ভেটি,  সা সম্পত্তি , মন্দিৰ,  মছজিদ,  ৰাজহুৱা শিক্ষা অনুষ্টান, আৰু ধৰ্মীয় শিক্ষা অনুষ্টানৰ লগতে শ্মশান  ও কবৰস্তান  ইত্যাদি ইত্যাদি । বিনাশৰ বাহিৰে  অন্য কোনো নাই । নতুন চৰকাৰৰ নতুন জলসম্পদ মন্ত্ৰীয়ে হয়তো নতুন পদক্ষেপ লব নৈ পৰীয়া ৰাইজৰ বাবে এই  আশা কৰিছে স্হানীয় ভুক্তভোগী জন সাধাৰণৰ লগতে লাহৰীঘাট সমষ্টি বাসীয়ে ।অৱশ্যে  আশা কৰাৰ কাৰণো  আছে,  যিহেতুকে বিগত ২৫ টা বছৰে লাহৰীঘাট সমষ্টি বাসীয়ে পালে কেৱল নিৰাশা আৰু প্ৰৱঞ্চনা । 

শোণিতপুৰ জিলাৰ ৰঙাপৰা থানাৰ অৰ্ন্তগত ধুলাপাদুং চাহ বাগিছাৰ  ৪ নং শ্রমিক লাইনত যোৱা কালি নিশা এটা বনৰীয়া হাতীয়ে দুটাকৈ ঘৰ ভাঙি তহিলং কৰে। নিশা প্ৰায় ৩ টা মান বজাত  বনৰীয়া হাতীয়ে বাৰজু কালিন্দি আৰু বিজুলী কালিন্দিৰ  বাসগৃহ ভাঙি লণ্ড ভণ্ড কৰে। জানিব পৰা মতে  খাদ্যৰ সন্ধানত ওলাই অহা এটা হাতীয়ে ধুলাপাদুং চাহ বাগিচাত প্ৰবেশ কৰে আৰু প্ৰথমে বাৰজু কালিন্দিৰ ঘৰত উপদ্ৰৱ চলাই বাসগৃহ ভাঙি পেলাই আৰু তলা বন্ধৰ সময়ত প্ৰয়োজন হব পাৰে বুলি ঘৰত মজুত কৰি ৰখা প্ৰায় ৫০কেজি চাউল খাই তহিংল কৰে। ইয়াৰ পিচত হাতীটোৱে পুনৰ স্থানীয় বিজুলী কালিন্দিৰ ঘৰত আক্ৰমণ কৰে। ফলত দুয়োটা বাসগৃহৰ যথেষ্ট ক্ষতিসাধন হয়। অৱশ্যে হাতীৰ আক্ৰমণৰ উমান পাই গৃহস্থই কথমপি পলাই প্ৰাণ ৰক্ষা কৰে। উল্লেখ্য যে অঞ্চলটোত বনৰীয়া হাতীয়ে সঘনে উপদ্ৰৱ চলাই সা সম্পত্তি ধ্বংস কৰাৰ লগতে একাধিক লোকৰ হাতীৰ আক্ৰমণত মৃত্যু হৈছে। বন বিভাগে কিন্তু বনৰীয়া হাতীৰ সন্ত্ৰাসৰ পৰা অঞ্চলৰ জনসাধাৰণক সুৰক্ষা দিব নোৱাৰাৰ অভিযোগ উঠিছে।

বোকাখাত নুমলীগড়ৰ ধনশিৰি দলঙৰ সমীপৰ পূব দিশত ৩৭ নং ৰাষ্ট্ৰীয় ঘাইপথত পুখুৰী সদৃশ একাঠু পানী ৰাইজৰ মৰণ ফান্দত পৰিণত হৈছে।চাৰিলেন যুক্ত পথ নিৰ্মাণৰ নামত বৰ্তমান ৰাইজে যাতায়ত কৰি থকা উক্ত পথটো মেৰামতি নকৰাত জীয়াতু ভুগিব লগা হৈছে ৰাইজে।পথটো নিৰ্মাণৰ নামত কামৰ চূড়ান্ত হেমাহীৰ বাবে পুখুৰী সদৃশ হৈ পৰি এতিয়া একাঠু পৰ্যন্ত পানী ৰৈছে।আজি কেইবাদিনো ধৰি হোৱা নেৰানেপেৰা বৰষুণৰ ফলত পথটোত পানী ৰৈ পুখুৰী দৰে হৈ পৰিছে।পানীৰ পৰা ওলাই থকা অংশৰো অৱস্হা শোচনীয়। পথটোৰে দৈনিক বিভাগীয় বিষয়াৰ লগতে জনপ্ৰতিনিধি সকলো অহাযোৱা কৰে যদিও আজিও কাৰো চকুত নপৰিল।অংশটোত দৈনিক অনেক সৰু বৰ দুৰ্ঘটনা ঘটিছে যদিও নিৰ্বিকাৰ বিভাগীয় কতৃপক্ষ।উক্ত পথটোৰ পুখুৰী সদৃশ পৰিৱেশ আঁতৰি কৰিবলৈ ৰাইজে চৰকাৰ তথা বিভাগীয় কতৃপক্ষক অনুৰোধ জনাইছে।

 শিৱসাগৰ জিলাতো চহৰে-গাঁৱে দৈনিক ক’ভিড আক্ৰান্তৰ সংখ্যা বৃদ্ধি পাই অহাৰ সময়তে এইবাৰ শিৱসাগৰ কেন্দ্ৰীয় কাৰাগাৰৰ ভিতৰত ক’ৰনা ভাইৰাছৰ গণসংক্ৰমণ৷ দুটা দিনৰ পূৰ্বে এজন কয়দী আক্ৰান্ত হোৱাৰ পাছতেই তৎপৰতা অৱলম্বন কৰা শিৱসাগৰ জিলা স্বাস্থ্য বিভাগে আজি কাৰাগাৰৰ কাৰাবন্দীসকলৰ স্বাস্থ্য পৰীক্ষা চলোৱাত এই ভয়ংকৰ সংক্ৰমণৰ ঘটনা পোহৰলৈ আহে৷ ইতিমধ্যে ৫১ গৰাকীকৈ কৰ’নাত আক্ৰান্তৰ চিকিৎসাৰ বাবে কাৰাগাৰৰ ভিতৰতেই এটা বৃহৎ আইছ’লেশ্যন ৱাৰ্ড সৃষ্টি কৰি আক্ৰান্তসকলৰ চিকিৎসাৰ ব্যৱস্থা কৰিছে৷

বৰ্তমান ৫১৭ গৰাকীকৈ কাৰাবন্দী থকা কাৰাগাৰখনত এজন কাৰাবন্দী আক্ৰান্তৰ পাছতে পোহৰলৈ আহে এই সংক্ৰমণৰ ঘটনা৷ আজি স্বাস্থ্য বিভাগৰ এটা দলে ৫১৭গৰাকী কাৰাবন্দীৰ ভিতৰৰে ১৭৩গৰাকী কাৰাবন্দীক ৰেপিড এন্টিজেন পদ্ধতিৰে পৰীক্ষা চলোৱাত ৫১ গৰাকী আক্ৰান্ত চিনাক্ত হয়৷ ইতিমধ্যে কাইলৈহে বাকী থকা ৩৪৪ গৰাকী কাৰাবন্দীক পৰীক্ষা কৰা হ’ব বুলি জানিব পৰা হৈছে৷আনহাতে, আক্ৰান্তৰ বাবে কাৰাগাৰৰ ভিতৰতেই নিৰ্মাণ কৰা অস্থায়ী আইছ’লেশন ৱাৰ্ডত আক্ৰান্তসকলক সম্পূৰ্ণ পৃথককৈ ৰখাৰ লগতে আক্ৰান্তসকলক চিকিৎসাৰ বাবে জিলা স্বাস্থ্য বিভাগৰ তৰফৰ পৰা এগৰাকী চিকিৎসকসহ এটা স্বাস্থ্যকৰ্মীৰ দল নিয়োগ কৰা হৈছে বুলি জিলা স্বাস্থ্য বিভাগৰ সূত্ৰে জানিব পৰা গৈছে৷