ক্ৰমশ গুৰুতৰ অৱস্থালৈ গতি কৰিছে অখিল গগৈৰ মাতৃ প্ৰিয়দা গগৈৰ স্বাস্থ্য । মঙলবাৰে সন্ধিয়া যোৰহাট চিকিৎসা মহাবিদ্যালয়ত উপস্থিত হৈ প্ৰিয়দা গগৈৰ স্বাস্থ্যৰ বুজ লয় বিধায়ক ৰূপজ্যোতি কুৰ্মীয়ে। গুৰুতৰভাৱে অসুস্থ হৈ যোৰহাট চিকিৎসা মহাবিদ্যালয়ৰ আই চি ইউত চিকিৎসাধীন হৈ থকা কাৰাবন্দী অখিল গগৈৰ মাতৃৰ স্বাস্থ্য বুজ লৈ তীব্ৰ প্ৰতিক্ৰিয়া প্ৰকাশ কৰিছে মৰিয়নীৰ বিধায়ক ৰূপজ্যোতি কুৰ্মীয়ে।

বিধায়কগৰাকীয়ে প্ৰিয়দা গগৈৰ পৰিয়ালৰ লোকৰ লগত মত বিনিময় কৰাৰ লগতে প্ৰিয়দা গগৈৰ চিকিৎসা আগবঢ়াই থকা চিকিৎসা মহাবিদ্যালয়খনৰ জ্যেষ্ঠ চিকিৎসকসকলৰ লগতো আলোচনাত মিলিত হয় ।

অখিল মাতৃৰ স্বাস্থ্যৰ বুজ লৈ ওলাই আহি সাংবাদিকৰ আগত কুৰ্মীয়ে কয়, “চৰকাৰৰ ভুলবোৰ আঙুলিয়াই দিয়া বাবে অখিল গগৈক অন্যায়ভাৱে দীৰ্ঘদিনে বন্দী কৰি ৰাখিছে বিজেপি চৰকাৰে। যাৰ বাবে মাতৃ অসুস্থ হৈ পৰিছে। খাবলৈ মন নকৰা হৈছে। স্বাস্থ্যৰ অৱনতি হৈছে। আজি তেওঁ এষাৰো কথা ক’ব পৰা অৱস্থাত নাই। মাত্ৰ চকুপানী টুুকি আছে।”বিধায়ক গৰাকীয়ে কয়, “অখিল গগৈৰ মাতৃৰ স্বাস্থ্যক লৈ আমি চিন্তিত হৈ পৰিছো। অখিল গগৈৰ মাতৃ অকল অখিল গগৈৰ মাতৃৰ নহয়। অসমৰ মাতৃ। যদি মাতৃৰ কিবা হ’বলৈ হয় তেন্তে ইয়াৰ ভয়াৱহ পৰিস্থিতি ভুগিব লাগিব বিজেপি দল আৰু চৰকাৰে।

মই আৰু বাচি নাথাকিম, শেষবাৰৰ বাবে মোৰ সোনটোৰ মুখখন চাবলৈ মন গৈছে”– এইদৰে শয্যাশায়ী প্ৰিয়দা গগৈয়ে পুত্ৰ বিচাৰি উচুপি উঠিছে। আনহাতে প্ৰিয়দা গগৈৰ দৃষ্টিশক্তিও সম্পূূূূৰ্ণ ৰূপে লোপ পোৱা বুলি জানিব পৰা গৈছে। আজি পুৱা গুৰুতৰভাৱে অসুস্থ প্ৰিয়দা গগৈক এখন এম্বুুুুলেন্সৰ যোগেদি যোৰহাট চিকিৎসা মহাবিদ্যালয়ত ভৰ্তি কৰে পৰিয়ালৰ লোকে। বছৰতকৈও অধিক দিন কাৰাবন্দী হৈ থকা কৃষক নেতা তথা ৰাইজৰ দলৰ সভাপতি অখিল গগৈৰ মাতৃ প্ৰিয়দা গগৈৰ শাৰীৰিক অৱস্থা শেহতীয়াকৈ অতি সংকটজনক হৈ পৰিছে। ৮০ৰ ঊৰ্ধ্বৰ অখিলৰ মাতৃ দীৰ্ঘদিনে মধুমেহ, হৃদৰোগ, চকুত চানি পৰা ৰোগ লগতে ককাল আৰু মাংসপেশীৰ বিষত আক্ৰান্ত হৈ আছে। আনহাতে যোৱানিশাৰ পৰা প্ৰিয়দা গগৈৰ স্বাস্থ্যৰ দ্ৰুত অৱনতি ঘটে। পুৱতিনিশাৰ পৰা প্ৰিয়দা গগৈৰ একাধিক বাৰ শৌচ-বমি হোৱা লগতে শৰীৰ একেবাৰে দুৰ্বল হৈ পৰে।

উল্লেখযোগ্য যে কাৰাৰুদ্ধ হৈ থকা পুুুুত্ৰ অখিল গগৈৰ মুুক্তিৰ কামনা কৰি বৃদ্ধা মাতৃৃ প্ৰিয়দা গগৈয়ে বিভিন্ন সময়ত চৰকাৰক কাকুুতি–মিনতি কৰি অহা লগতে নামঘৰত চাকি বন্তি জ্বলাই প্ৰাৰ্থনা কৰিছিল। অখিল মাতৃৃ প্ৰিয়দা গগৈৰ স্বাস্থ্যৰ অৱস্থাই অঞ্চলবাসীৰ লগতে কৃষক মুুুক্তি আৰু ৰাইজৰ দলৰ কৰ্মকতাসকলক উদ্বিগ্ন কৰি তুলিছে।