নগাঁও, ২৩ডিচেম্বৰ:  বিজেপিৰে মিত্ৰতাক লৈ অসম গণ পৰিষদৰ নেতৃত্বৰ সৈতে ক্ৰমাৎ ব্যৱধান বৃদ্ধি পোৱা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই যোগদান কৰিব পাৰে নৱগঠিত আঞ্চলিক ৰাজনৈতিক দল অসম জাতীয় পৰিষদত। প্ৰত্যক্ষ ৰাজনীতিত যোগদানৰ পিছত কালি নিশা নগাঁৱত প্ৰথমবাৰৰ বাবে উপস্থিত হোৱা অজাপৰ সভাপতি লুৰিণজ্যোতি গগৈক আদৰণি জনোৱাৰ সময়ত দেখা গ’ল প্ৰফুল্ল মহন্তৰ শিবিৰৰ কেইবাজনো নেতা-কৰ্মীক। যোৰহাটৰ পৰা উভতি নগাঁৱৰ হোটেল নগাঁও পইণ্টত নিশা প্ৰায় ১০ বজাত উপস্থিত হোৱা জনপ্ৰিয় যুৱনেতা লুৰিণজ্যোতি গগৈক আদৰনি জনোৱাৰ সময়ত বিপুল জনসমাগম পৰিলক্ষিত হয়। “লুৰিণজ্যোতি গগৈ জিন্দাবাদ, অজাপ জিন্দাবাদ” ধ্বনিৰে নিশা নগাঁৱৰ আকাশ-বতাহ মুখৰিত হয়। নগাঁৱত উপস্থিত হয় সাংবাদিকৰ সন্মুখত লুৰিণে কয়, “ক্ষমতা কুক্ষিগত কৰাৰ স্বাৰ্থত অসম জাতীয় পৰিষদৰ জন্ম হোৱা নাই। অসমীয়া জাতিৰ স্বাভিমান ৰক্ষাৰ বাবেই এই দলৰ জন্ম হৈছে।” ইপিনে বৰ্তমান বিজেপিৰ সৈতে মিত্ৰতাৰ বিৰোধিতা কৰি অসম গণ পৰিষদৰ নেতৃত্বৰ সৈতে প্ৰত্যক্ষ সংঘাতত অৱতীৰ্ণ হোৱা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তক অসম জাতীয় পৰিষদত আদৰি ল’ব নেকি বুলি সোধা প্ৰশ্নৰ উত্তৰত লুৰীণে কয়, “প্ৰকৃত আঞ্চলিকতাবাদত বিশ্বাসী প্ৰতিজন ব্যক্তিকে অসম জাতীয় পৰিষদে আদৰি ল’ব।” উল্লেখযোগ্য যে অগপৰ কেইবাগৰাকীও জ্যেষ্ঠ নেতাই অজাপত যোগদানৰ বিষয়ে যোগাযোগ চলাই থকা বুলি মন্তব্য কৰি লুৰিণে কয় শীঘ্ৰেই এই বিষয়ে অসমবাসীয়ে গম পাব। অজাপই ভেজাল জাতীয়তাবাদক প্ৰশ্ৰয় নিদিয়ে বুলিও পৰোক্ষ ভাৱে অগপ ক কটাক্ষ কৰে। আনহাতে, অতি শীঘ্ৰেই নগাঁৱলৈ পুনৰ আহি মহাপুৰুষ শ্ৰীমন্ত শংকৰদেৱৰ জন্মস্থান বৰদোৱাত আশীষ ল’ব বুলি লুৰিণজ্যোতি গগৈয়ে সাংবাদিকক অৱগত কৰে। লুৰিণে সাংবাদিকক কয়, “গুৰুজনাই তাহানিতে গঢ়িব বিচৰা ভেদাভেদহীন সমাজক গঢ় দিয়াৰ লক্ষ্যৰে অসম জাতীয় পৰিষদে কাম কৰি যাব।” লুৰিণে লগতে কয় প্ৰকৃত অসমীয়া জাতিসত্বাক জীয়াই ৰাখিবলৈ তেঁও সদায় সংকল্পবদ্ধ।

 ডবকা, ২৩ ডিচেম্বৰঃ ২০২১ চনৰ বিধানসভা নিৰ্বাচনলৈ এতিয়াও চাৰি মাহ সময় বাকী ৷ হোজাই জিলাৰ অন্যান্য সমষ্টিৰ তুলনাত যমুনামুখত তীব্ৰ হৈ উঠিছে নিৰ্বাচনী গতিবিধি ৷ প্ৰায় আটাইকেইটা দলে ৯০ নং যমুনামুখ সমষ্টিত তীব্ৰ কৰি তুলিছে নিজ নিজ দলৰ নিৰ্বাচনী কুচকাৱাজ ৷ শাসকীয় বিজেপিৰ লগতে বিজেপিৰ মিত্ৰদল অগপই আৰম্ভ কৰিছে সমষ্টিটোত ব্যাপক সাংগঠনিক তৎপৰতা ৷ তাৰ সমান্তৰালকৈ বিৰোধী দল কংগ্ৰেছে আৰম্ভ কৰিছে নিৰ্বাচনী আখৰা ৷ সমানে দলটোৰ টিকট প্ৰত্যাশীসকলেও আৰম্ভ কৰিছে নিজৰ অনুকুলে প্ৰচাৰ ৷ যমুনামুখত কংগ্ৰেছৰ কেবা গৰাকী টিকটৰ দাবীদাৰ ৷ তাৰ মাজতে অন্যতম হল প্ৰাক্তন ব্লক কংগ্ৰেছৰ সভাপতি তথা জ্যেষ্ঠ কংগ্ৰেছ নেতা বচিৰ উদ্দিন লস্কৰ৷ লস্কৰে পূৰ্বতে দুবাৰকৈ যমুনামুখ সমষ্টিৰ পৰা প্ৰৰ্থীত্ব আগবঢ়াই পৰাজয় বৰন কৰিছিল।আগন্তক বিধান সভা নিৰ্বাচনত এ আই ইউ ডিএফৰ সতে কংগ্ৰেছৰ মিত্ৰতাক লৈ চৰ্চা অব্যাহত থকাৰ সময়তেএই জন জ্যেষ্ঠ কংগ্ৰেছী নেতাই কংগ্ৰেছ আৰু এ আই ইউ ডি এফৰেমিএতা হোৱাটো বিচাৰে । কংগ্ৰেছ নেতা জনে আজি সংবাদ মাধ্যমক জানিব দিয়া মতে কংগ্ৰেছ আৰু এ আই ইউ ডি এফ  মিত্ৰজোঁট নহলে পুনৰ দিছপুৰ দখল কৰিব বিজেপি দলে । অকল সেয়াই নহয় জ্যেষ্ঠ কংগ্ৰেছ নেতাজনে যমুনামুখ সমষ্টিৰ কংগ্ৰেছৰ যুৱ নেতা ৰেহান উদ্দিনৰ বিৰুদ্ধে সৰব হোৱা পৰিলক্ষিত হয়। কংগ্ৰেছৰ যুৱ নেতা ৰেহান উদ্দিনে সমষ্টিৰ কংগ্ৰেছৰ জ্যেষ্ঠ নেতা কৰ্মীক একাষৰীয়াকৈ থৈ তেওঁৰ ইচ্ছা অনুসৰি  আৰম্ভ কৰিছে দলীয় কাম-কাজ। যাৰ ফলত জেষ্ঠ কংগ্ৰেছ নেতা  লস্কৰ ক্ষোভিত হৈ পৰিছে কংগ্ৰেছৰ যুৱ নেতা ৰেহানৰ বিৰুদ্ধে। এই জন যুৱ নেতাৰ বাবে যমুনামুখ সমষ্টিৰ মণ্ডল কংগ্ৰেছ কমিটী সমুহত ব্যাপক বিশৃংখলতাৰ সৃষ্টি হোৱাৰ অভিযোগ কৰে জ্যেষ্ঠ কংগ্ৰেছ নেতা লস্কৰে । যমুনামুখ সমষ্টিত কংগ্ৰেছৰ ভাল দিন, বেয়া দিনত লস্কৰে কংগ্ৰেছৰ হৈ বহু কষ্ট কৰিছে ।গতিকে সমাগত বিধান সভা নিৰ্বাচনত যমুনামুখ সমষ্টিৰ পৰা কংগ্ৰেছৰ শক্তিশালী প্ৰাৰ্থিত্ব প্ৰত্যাশী লস্কৰ ৷ সমাগত ২১’ৰ বিধান সভা নিৰ্বাচনত যদি যমুনামুখ সমষ্টিত দলে টিকট প্ৰদান কৰে তেন্তে তেওঁৰ জয়  নিশ্চিত বুলি লস্কৰে দাবীকৰে। ইতিমধ্যে জেষ্ঠ নেতা লস্কৰে বিধান সভা নিৰ্বাচনৰ প্ৰতিলক্ষ্য ৰাখি পুৰণি দলীয় কৰ্মীক একগোট কৰি যমুনামুখ সমষ্টিত আৰম্ভ কৰিব নিৰ্বাচনী প্ৰচাৰ।