বটদ্ৰৱা : বটদ্ৰৱা সমষ্টিত আঞ্চলিকতাবাদ অথবা জাতীয়তাবাদৰ কথা উত্থাপন হ’লেই প্ৰয়াত কৰ্মপ্ৰাণ মন্ত্ৰী দীগেন চন্দ্ৰ বৰাৰ কথা ৰাইজৰ মনলৈ আহে। ছবছৰীয়া ঐতিহাসিক অসম আন্দোলনৰ পৰবৰ্তী সময়ছোৱাত গঠিত অগপ দলৰ পৰা প্ৰতিদ্বণ্দীতা আগবঢ়ায় তেওঁ বটদ্ৰৱাত জাতীয়তবাদৰ বুনিয়াদ শক্তিশালী ৰূপত প্ৰতিষ্ঠা কৰিছিল। অগপৰ উত্তৰণৰ বাবে দীগেন বৰাকে প্ৰমুখ্য কৰি অজস্ৰজন দলীয় নেতা কৰ্মীৰ ত্যাগ, কৰ্মনিষ্ঠা আৰু জাতীয়দায়বদ্ধতাক মই আজি শ্ৰদ্ধাৰে সোঁৱৰণ কৰিছো – এই মন্তব্য অগপৰ মহিলা নেত্ৰী মামনি বৰাৰ। বটদ্ৰৱা সমষ্টিৰ অসম গন পৰিষদৰ ৩৬ সংখ্যক প্ৰতিষ্ঠা দিৱস উপলক্ষ্যে প্ৰয়াত কৰ্মপ্ৰাণ মন্ত্ৰী দীগেন বৰাৰ সপোনক বাস্তৱত ৰূপায়িত কৰাৰ লক্ষ্যৰে আগন্তুক নিৰ্বাচনত বটদ্ৰৱা সমষ্টিৰ অগপয়ো টঙালি বান্ধিছে। প্ৰতিষ্ঠা দিৱস উপলক্ষ্যে পুৱা পতাকা উত্তোলন কৰে বটদ্ৰৱা বিধান পৰিষদৰ সভানেত্ৰী মামনি। শ্বহীদ তৰ্পন কৰে অগপৰ কেন্দ্ৰীয় কাৰ্যনিৰ্বাহক সদস্য ফটিক চন্দ্ৰ বৰাই আৰু স্মৃতি তৰ্পন কৰে ক্ষীতেশ্বৰ বৰাই। ইয়াৰ পিছতে বটদ্ৰৱা বিধান পৰিষদৰ সাংগঠনিক সম্পাদক অভিজি দাসে আঁত ধৰা সভাত নিজ হাতিচোঙৰ জেষ্ঠ নাগৰিক যতীন বৰঠাকুৰ, দিলীপ দেৱ গোস্বামী, চাবুকধৰাৰ সুৰেন দেউৰজা, ভকতগাঁৱৰ নোমল ছন্দ্ৰ বৰা, ধনীয়াভেটিৰ আব্দুল ৰাজ্জাককে প্ৰমুখ্য কৰি বটদ্ৰৱা সমষ্টিৰ কেইবাগৰাকী জেষ্ঠ নাগৰিকক বটদ্ৰৱা বিধান পৰিষদৰ তৰফৰ পৰা গামোচা, চেলেং, সম্বৰ্ধনা পত্ৰৰে আদৰণি জনাই। সভাত অসম যুৱ পৰিষদৰ কেন্দ্ৰীয় সম্পাদক অনন্ত ফুকন, বটদ্ৰৱা সমষ্টি সমিতিৰ সম্পাদক জগত বৰা, উপ-সভাপতি আনোৱাৰ হুছেইন, উন্তিৰাম দাস, দীনবন্ধু পাটৰকে প্ৰমুখ্য কৰি প্ৰায় শতাধিক ৰাইজ উপস্থিত থাকে।

ডিজিটেল ডেস্কঃ এছ আই কেলেংকাৰীৰে জড়িত থকা অপৰাধত নলবাৰী আৰক্ষীয়ে বৰনদ্দীৰ পৰা আটক কৰিছিল কমল হাজৰিকা নামৰ এজন ব্যক্তিক। আটকাধীন ব্যক্তিজনক আৰক্ষীয়ে হঠা এৰি দিয়াত ৰাইজৰ মাজত প্ৰতিক্ৰিয়াৰ সৃষ্টি হৈছে। অসম চৰকাৰৰ মন্ত্ৰী চন্দ্ৰ মোহন পাটোৱাৰীৰ ঘনিষ্ঠ ৰূপে পৰিচিত কমল হাজৰিকা কিয় আৰক্ষীয়ে এৰি দিলে এই সন্দৰ্ভত জানিব পৰা মতে আজ এজন কমল হাজৰিকা বুলি এই লোকজনক আৰক্ষীয়ে আটক কৰিছিল। বিজেপি নেতা কমল হাজৰিকাক এৰি দিয়াৰ পিচত আৰক্ষীয়ে নাম একে বুলি যুক্তি দিলেও সেয়া বিশ্বাসযোগ্য হয় নহয় সময়তহে গম পোৱা যাব। আৰক্ষীৰ মতে বঙাইগাওৰ কমল হাজৰিকাক গ্ৰেপ্তাৰ কৰিব লাগিছিল যদিও ভুল ক্ৰমে আটক কৰা হৈছিল এইজন কমল হাজৰিকাক।

চাংসাৰি : এপিএছচি কেলেংকাৰীতকৈ অধিক ভয়াবহ হিচাপে পৰিগণিত হৈছে ৰাজ্য কপোৱা অসম আৰক্ষীৰ উপ–পৰিদর্শক কেলেংকাৰী। এই কেলেংকাৰীয়ে ৰাজ্যৰ অন্যান্য প্ৰান্তৰ লগতে মন্ত্ৰী হিমন্ত বিশ্বৰ সমষ্টি জালুকবাৰীৰ চাংসাৰিকো কপাই তুলিছে। এছ আই পদৰ পৰীক্ষাৰ প্রশ্নকাকত ফাদিলৰ ব্যাপক কেলেংকাৰিৰ ঘটনা চাংসাৰিতো সম্প্রসাৰিত হোৱাত এতিয়া ৰাজনৈতিক কিম্বা সচেতন মহলত তীব্র প্রতিক্রিয়াৰ সৃষ্টি হৈছে৷ কিয়নো এছ আই কেলেংকাৰীৰ ঘটনাৰ সৈতে জড়িত হৈ পৰা সমষ্টিটোৰ এজন বিজেপি পালিনেতা তথা বেজেৰা মণ্ডলৰ উপ–সভাপতি হিচাপে নিযুক্ত চাংসাৰিৰ জিণ্টু নাথক শোণিতপুৰৰ জামুগুৰিহাটৰ পৰা আৰক্ষীয়ে এদিন পূৰ্বে গ্ৰেপ্তাৰ কৰাৰ পিছতে অঞ্চলটোত তীব্ৰ চাঞ্চল্যৰ সৃষ্টি হৈছে। উল্লেখ্য যে ৫ অক্টোবৰৰ নিশা চি আই ডিয়ে চাংসাৰি থানাৰ সহযোগত চাংসাৰিত অভিযান চলাই দুই পৰীক্ষার্থী মৃণাল কুমাৰ নাথ আৰু কাকুমণি নাথক গ্রেপ্তাৰ কৰিছিল ৷ পৰৱর্তী সময়ত আটকাধীন দুই পৰীক্ষার্থীৰ স্বীকাৰোক্তিৰ ভিত্তিত জিণ্টু নাথক বিচাৰি তেওঁৰ ঘৰত অভিযান চলায় যদিও সেই সময়ত তেওঁ ঘৰত নাছিল ৷ অৱশেষত নিজ শহুৰেকৰ ঘৰৰ পৰা গোপন সূত্ৰৰ পম খেদি জিন্টু নাথক গ্ৰেপ্তাৰ কৰিবলৈ সক্ষম হয় চিআইডিয়ে। জানিব পৰা মতে, জিণ্টু নাথৰ লিংকৰ জৰিয়তে ভার্গৱ গ্রেণ্ডত ধৃত দুই প্রার্থী পৰীক্ষাত অৱতীর্ণ হোৱাৰ সুযোগ পাইছিল ৷ অৱশ্যে জিণ্টু নাথৰ লিংকত ধনৰ লেনদেন থকা আৰু কেইবাজনো পৰীক্ষার্থী আছে যদিও বর্তমান তেওঁলোক পলাতক হৈ আছে বুলি জানিব পৰা গৈছে ৷ ইপিনে, একাংশই অভিযোগ কৰা মতে, চি আই ডি তথা আৰক্ষীয়ে জিন্টু নাথেৰে বিজেপিৰ শীৰ্ষ পৰ্য্যায়ৰ নেতা মন্ত্ৰীৰ সম্পৰ্ক থকা বাবেই এছ আই কেলেংকাৰীত জড়িত জিন্টুৰ তদন্ত প্ৰক্ৰিয়া অতি লেহেমীয়া গতিত চলাইছে বুলি অভিযোগ তুলিছে। আনকি, চি আই ডিৰ তদন্তত পোহৰলৈ অহা জিন্টু নাথৰ সৈতে জড়িত হৈ থকা চাংসাৰিৰ কোন সেই চৰকাৰী চাকৰি কৰা ব্যক্তি, আজিলৈকে চি আই ডিয়ে কিয় ৰাজহুৱা কৰা নাই সেই ব্যক্তিৰ নাম বুলি প্ৰশ্ন কৰি চি আই ডি তথা আৰক্ষীৰ ভূমিকাক সন্দেহৰ দৃষ্টিৰে চাইছে একাংশ সচেতন ৰাইজে। ইয়াৰ উপৰিও এছ আই কেলেংকাৰীৰ সমান্তৰালকৈ ইতিমধ্যে হৈ যোৱা জল সিঞ্চনৰ এলডিএ চাকৰিৰ বাবেও চাংসাৰিত চাকৰিৰ বজাৰ এগৰাকী ৰাজ্যিক মন্ত্ৰীৰ একেবাৰে ঘনিষ্ঠই মেলি দিছিল বুলি সামাজিক মাধ্যমত ব্যপক চৰ্চা হৈছে। আনকি এটা চাকৰিৰ বাবদ ৯ লাখ পৰ্যন্ত কলা ধন লৈ এই চাকৰি সমূহ প্ৰদান কৰিব বুলিও অভিযোগ উত্থাপিত হৈছে বিভিন্ন মাধ্যমত আৰু এই সকলোবোৰ এছ আই কেলেংকাৰীত জড়িত হৈ থকা কিছু সংখ্যকে চলাই নিছিল বুলি বিভিন্নজনে অভিযোগ উত্থাপিত কৰিছে। যাৰবাবে এই ক্ষেত্ৰত সোণোৱাল চৰকাৰক ইয়াৰ ওপৰত তদন্তৰ জৰিয়তে শীঘ্ৰেই ব্যৱস্থা গ্ৰহণ কৰিবলৈ সচেতন ৰাইজে দাবী উত্থাপন কৰিছে।

ভূৰাগাওঁ : মৰিগাঁও জিলা অতিৰিক্ত আৰক্ষী অধীক্ষক শুভাশীষ বৰুৱাৰ নেতৃত্বত চলা এক অভিযানত লাহৰীঘাট থানাৰ অন্তৰ্গত তিনিচুকীয়া বজাৰৰ পৰা কোটি টকীয়া সংখ্যালঘু ছাত্ৰবৃত্তি কেলেংকাৰীত জড়িত মহম্মদ আলী জিন্না নামৰ বিজেপি নেতাজনৰ লগতে তাইজুল ইছলাম আৰু ৰুহুল আমিন নামৰ আন দুজন লোকক গ্ৰেপ্তাৰ কৰিবলৈ সক্ষম হয়। উল্লেখ্য যে ধৃত জিন্না কুশতলি মণ্ডল বিজেপিৰ উপ-সভাপতি হোৱাৰ উপৰিও তুলসীবৰি গাঁও পঞ্চায়তৰ বিজেপি দলৰ আঞ্চলিক পঞ্চায়ত সদস্যাৰ স্বামী বুলি জানিব পৰা গৈছে। আনহাতে পেছাত বেংক গ্ৰাহক কেন্দ্ৰৰ সেৱক মহম্মদ আলি জিন্নাই তিনিচুকীয়া বজাৰত স্থাপন কৰা এছবিআই বেংকৰ চিএছপিৰ মাধ্যমৰে সংখ্যালঘু বৃত্তিৰ ধন হৰলুকিৰ দৰে দুষ্কাৰ্যত জড়িত বুলি অভিযোগ উঠিছে। এক সূত্ৰৰ পৰা জানিব পৰা অনুসৰি ধৃত জিন্নাই ভুৱা নথিপত্ৰৰে বহুলোকৰ নামত ভূৱা একাউণ্ট খুলি সংখ্যালঘু ছাত্ৰ-ছাত্রীৰ নামত আবন্টিত জলপানিৰ ধন আত্মসাৎ কৰি অহা বুলি বিভিন্ন মহলে অভিযোগ কৰি আহিছে। সেই অভিযোগৰ ভিত্তিত মৰিগাঁও জিলাত সংখ্যালঘু বৃত্তি কেলেংকাৰী আৰু চাইবাৰ অপৰাধৰ গোচৰ তদন্ত কৰি অহা মৰিগাঁও আৰক্ষীয়ে লাহৰীঘাটৰ তিনিচুকীয়াৰ পৰা বিজেপি নেতা মহম্মদ আলি জিন্নাক গ্ৰেপ্তাৰ কৰা লগতে ধৃত জিন্নাৰ চিএছপি পৰা কম্পিউটাৰ সহ বহু নথি পত্ৰ জব্দ কৰা বুলি জানিব পৰা গৈছে। অৱশ্যে বাতৰি লিখা পৰলৈকে সংবাদ মাধ্যমক কোনো তথ্য অৱগত নকৰা মৰিগাঁও আৰক্ষীৰ শীৰ্ষ নেতৃত্বই। আনহাতে দুৰ্নীতিৰ ক্ষেত্ৰত শূণ্য সহনশীল নীতি গ্ৰহণ কৰা চৰকাৰৰ শাসকীয় বিজেপি দলৰ ইজনৰ পিছত সিজন নেতা বিভিন্ন কেলেংকাৰীত জড়িত হোৱা বিষয়টোৱে তাৎপৰ্য বহন কৰিছে। লাহৰীঘাটৰ বিজেপি নেতা মহম্মদ আলি জিন্নাই নিজৰ sbi csp কেন্দ্ৰটোৰ জড়িয়তে শতাধিক লোকৰ ভূৱা একাউণ্ট খুলি ছাত্ৰ বৃত্তিৰ ধন আত্মসাৎ কৰে। ইতিমধ্য উক্ত বিষয়টো সন্দৰ্ভত লাহৰীঘাট থানাত ৪০৭/২০ নম্বৰৰ ভাৰতীয় দণ্ডবিধি আইনৰ ৪০৬/৪২০/৪৭১ /৩৪ ধাৰাত গোচৰ ৰুজু কৰি আৰক্ষীয়ে তদন্ত অব্যাহত ৰাখিছে।