গেলেকী : চৰাইদেউ জিলাৰ সমাজ কল্যাণ বিভাগৰ তত্বাৱধানত ১ৰ পৰা ৩০ ছেপ্তেম্বৰ ২০২০লৈকে পালন কৰা ৰাষ্ট্ৰীয় পোষণ মাহ ২০২০ৰ সামৰণি অনুষ্ঠান ২ অক্টোবৰৰ দিনা জিলা উপায়ুক্তৰ সভাগৃহত অনুষ্ঠিত হয়। এই উপলক্ষে আয়োজন কৰা গাম্ভীৰ্যপূৰ্ণ সভাখনিত সভাপতিত্ব কৰে চৰাইদেউ জিলাৰ উপায়ুক্ত পলাশ ৰঞ্জন ঘৰফলীয়াই। সভাত মুখ্য অতিথি হিচাপে উপস্থিত থাকি সোণাৰি সমষ্টিৰ বিধায়িকা নৱনীতা সন্দিকৈয়ে কয় যে সমাজৰ উঠি অহা শিশু তথা গৰ্ভৱতী আৰু প্ৰসূতি মাতৃসকলক স্বাস্থ্যৱান আৰু নিৰোগী কৰি ৰাখিবলৈ পোষণ অভিযানৰ প্ৰয়োজনীয়তা আছে। এটি সুস্থ সবল শিশুৱেহে সমাজৰ শ্ৰীবৃদ্ধি কৰিব পাৰে। বিধায়িকাগৰাকীয়ে লগতে পোষণ মাহ ২০২০ উপলক্ষে অংগনবাড়ী কেন্দ্ৰসমূহত স্থাপন কৰা শাকনিবাৰীসমূহ নিজে পৰ্যবেক্ষণ কৰাৰ ইচ্ছা প্ৰকাশ কৰে। সভাৰ আৰম্ভনিতে ভাৰপ্ৰাপ্ত জিলা সমাজ কল্যাণ বিষয়া জাহ্নৱী গোস্বামীয়ে আদৰণী ভাষণ প্ৰদান কৰাৰ লগতে সভাৰ উদ্দেশ্য ব্যাখ্যা প্ৰদান কৰে। পোষণ অভিযানৰ জিলা সমন্বয়ক দ্বীপেন বৰুৱাই পোষণ মাহত সম্পাদন কৰা কাৰ্যাৱলী সমূহৰ ওপৰত প্ৰস্তুত কৰা এটি ভিডিঅ’ প্ৰদৰ্শন কৰে। তাৰ পাছতেই পোষণ মাহ উপলক্ষে শিক্ষা বিভাগৰ সহযোগত দুটা পৰ্যায়ত অনুষ্ঠিত কৰা ৰচনা প্ৰতিযোগিতাৰ বিজয়ী ছাত্ৰ-ছাত্ৰীসকলক নগদ ধন আৰু প্ৰমাণ পত্ৰেৰে পুৰষ্কৃত কৰা হয়। শলাগৰ শৰাই আগবঢ়ায় লাকুৱা প্ৰকল্পৰ শিশু উন্নয়ন বিষয়া ৰিণু বৰাই। আজিৰ সভাখনত চৰাইদেউ জিলা পৰিষদৰ মুখ্য কাৰ্যবাহী বিষয়া ৰঞ্জিত স্বৰ্গীয়াৰী, অতিৰিক্ত উপায়ুক্তদ্বয় মোচুমী চেতিয়া আৰু মনোৰমা মৰাং, সহকাৰী আয়ুক্ত সমুজ্জ্বল বৰা, জিলা স্বাস্থ্য বিভাগৰ যুটীয়া সঞ্চালক নিজৰা দেৱী, শিশু উন্নয়ন প্ৰকল্প বিষয়া, মুখ্য সেৱিকাবৃন্দ, পোষণ অভিযানৰ কৰ্মচাৰীবৃন্দৰ লগতে জিলাখনৰ বিভিন্ন বিভাগৰ বিষয়া-কৰ্মচাৰীসকল উপস্থিত থাকে।

উজনি মাজুলীঃ আজি ২ অক্টোবৰ জাতিৰ পিতা মহাত্মা গান্ধীৰ জন্ম জয়ন্তীৰ উপলক্ষত মাজুলীৰ ঢেকীয়াজুলিত অখিল ভাৰতীয় বিদ্যাৰ্থী পৰিষদে এখনি যোগাত্মক চিন্তা ধাৰাৰে ছাত্র ছাত্ৰী সকলৰ মাজত শৈক্ষিক দিশৰ প্ৰতি লক্ষ্য ৰাখি চিত্ৰাংকণ আৰু মহামানৱ গৰাকীৰ ওপৰত বক্তৃতা প্ৰতিযোগিতা অনুষ্ঠিত কৰে । সভাখনিত সভাপতিৰ আসন অলংকৃত কৰে ঢেকীয়াজুলি প্ৰাথমিক বিদ্যালয় পৰিচালনা সমিতিৰ সভাপতি সুন্দৰ দাসে। গান্ধীজীৰ বিষয়ে কণ কণ ছাত্ৰ ছাত্ৰী সকলক বহল ভাবে আলোচনা আগবঢ়াই ৰাষ্ট্রীয় স্বয়ংসেৱক সংঘৰ মাজুলী জিলাৰ প্ৰচাৰক বুবুল চন্দ্ৰ ডেকাই লগতে বিদ্যাৰ্থী পৰিষদৰ মাজুলী জিলাৰ সাংগঠনিক সম্পাদক ৰূপজ্যোতি সোনোৱালে। সভাত উপস্থিত থাকে পৰিষদৰ জিলা সহ:সংযোজক মনু নেৱাৰ, জিলা সম্পৰ্ক প্ৰমুখ ভাৰ্গব প্ৰতীম বৰুৱাৰ লগতে পৰিষদৰ সক্ৰিয় কার্যকৰ্তা সকল। সভাখনিৰ আঁত ধৰে ঢেকীয়াজুলি শাখাৰ সহ:সম্পাদক বাস্তৱ দাসে।

বিলাসীপাৰা : ধুবুৰী জিলাৰ বিলাসীপাৰা মহকুমা আৰক্ষী প্ৰশাসনৰ উদ্যোগত ক’ৰোণা মহামাৰী সজাগতাৰ বাবে বিলাসীপাৰা গান্ধী চকত অসম আৰক্ষী দিৱস উপলক্ষে আজি ৰাইজৰ মাজত মাক্স বিতৰণী অভিযান হাত লয় আৰক্ষীয়ে। উল্লেখ্য যে মাক্স বিতৰণী অভিযানটোত উপস্থিত থাকে বিলাসীপাৰা মহকুমা আৰক্ষী বিষয়া, বিলাসীপাৰা আৰক্ষী নিৱেশৰ ভাৰপ্ৰাত্ত বিষয়া মহেশ নাৰ্জাৰী, বিলাসীপাৰা আৰক্ষী নিৱেশৰ টাউন পৰিদৰ্শক প্ৰণৱ ডোলী উপস্থিত থাকে।

নলবাৰী : ভাৰত চৰকাৰৰ নিৰ্দেশনা অনুসৰি নলবাৰী সৰিয়হতলীস্থিত ১৩৬ নং বেটেলিয়ন চিআৰপিএফ বাহিনীয়ে “ফিট ইণ্ডিয়া” শীৰ্ষক এক কাৰ্যসূচী ৰূপায়ণ কৰে। এই কাৰ্যসূচীৰ লগত সংগতি ৰাখি চিআৰপিএফ বাহিনীৰ চাউনীৰ পৰা প্ৰায় ১০ কিলোমিটাৰ দৌৰৰ অনুষ্ঠিত কৰা হয়। ইতিমধ্যে যোৱা ১ ছেপ্তেম্বৰৰ পৰা আৰম্ভ হোৱা “ফিট ইণ্ডিয়া”ৰ এই কাৰ্যসূচীত চিআৰপিএফ বাহিনীৰ ৭০০ জন সদস্যসহ সদস্যসকলৰ ১৫০ গৰাকী পৰিয়ালৰ লোকে ৫৫,৪১২ কিলোমিটাৰ দৌৰ সম্পূৰ্ণ কৰিছে। এই কাৰ্যসূচীৰ যোগেৰে জনসাধাৰণক শাৰিৰীক সুস্থতাৰ মহত্ব জনাবলৈ চিআৰপিএফ কেম্পৰ ওচৰৰ এলেকাত জোৱানসকলে বেনাৰ পোষ্টাৰসহ বিভিন্ন কাৰ্যসূচী হাতত লয়। আৰু চিআৰপিএফ বাহিনীৰ এই কামত স্থানীয় ৰাইজে ও সহায় সহযোগিতা আগবঢ়ায়। ইয়াৰ পূৰ্বেও ১৩৬ নং বেটেলিয়ন চিআৰপিএফ বাহিনীয়ে খেলো ইণ্ডিয়া, স্বচ্ছ ভাৰত অভিযানৰ দ্বাৰা জন কল্যাণ তথা কৰ’ণা মহামাৰীৰ ভীষণ সময়ত হেণ্ড গ্লোবছ, চেনেটাইজাৰ, মাস্ক আদি বিতৰণ কৰি ৰাইজক সজাগ কৰি আহিছে। আজিৰ এই কাৰ্যসূচীত ১৩৬ নং বেটেলিয়নৰ কামানডেন্ট পিচি চৌহান সহ চি আৰ পি এফৰ বিষয়ববীয়া, জোৱানসকলৰ লগতে স্হানীয় ৰাইজে ও অংশগ্ৰহণ কৰে। উল্লেখ্য যে এই “ফিট ইণ্ডিয়া” শীৰ্ষক কাৰ্যসূচী যোৱা ১ ছেপ্তেম্বৰৰ পৰা ২ অক্টোবৰ লৈ অনুষ্ঠিত কৰা হৈছে।

মুদৈজান : অসম আৰক্ষীৰ ৫৯৭ টা উপ পৰিদৰ্শক পদৰ বাবে হোৱা পৰীক্ষাৰ প্ৰশ্নকাকত ফাদিল হোৱাৰ পাছত ৰাজ্যজুৰি প্ৰতিবাদ অব্যাহত থকাৰ মাজতেই আকৌ প্ৰতিবাদত উত্তাল হৈ পৰে টীয়ক। টীয়ক আঞ্চলিক ছাত্ৰ সন্থাৰ উদ্যোগত, শিমলুগুৰি মৌজা আছু, যুৱ ছাত্ৰ পৰিষদৰ টীয়ক আঞ্চলিক সমিতি, টীয়ক আঞ্চলিক চুতীয়া ছাত্ৰ সন্থা আৰু আটছা টীয়ক উপ শাখাৰ সহযোগত ৩৭ নং ৰাষ্ট্ৰীয় ঘাইপথৰ ওপৰত অৰ্ধশতাধিক ছাত্ৰকৰ্মীয়ে মুখ্যমন্ত্ৰীৰ লগতে তেওঁৰ ব্যক্তিগত সহায়কৰ নাম সাঙোৰ খোৱাত মুখ্যমন্ত্ৰীৰ পদত্যাগৰ লগতে চিবিআই তদন্তৰ দাবীৰে মুখ্যমন্ত্ৰী সৰ্বানন্দ সোণোৱালৰ প্ৰতিমূৰ্তি দাহ কৰে। কাৰ্যসূচীত উপস্থিত থাকি সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে ৰাজ্য চৰকাৰক তীব্ৰ সমালোচনা কৰি কয়, সততে নিবনুৱাক সংস্থাপনৰ ক্ষেত্ৰত স্বচ্ছ আৰু নিকা ব্যৱস্থাৰে নিযুক্তিৰ কথা কোৱা বিজেপি নেতৃত্বাধীন চৰকাৰৰ কাৰ্যকালত টকাৰ বলতেই বহু মেধাসম্পন্ন পৰীক্ষাৰ্থীয়ে নিযুক্তি নাপাই আৰু তাৰ এক জ্বলন্ত উদাহৰণ আৰক্ষীৰ উপ পৰিদৰ্শক পদৰ বাবে হোৱা পৰীক্ষা। তেওঁ লগতে মুখ্যমন্ত্ৰীয়ে কথাই প্ৰতি শূণ্য সহনশীলতাৰ দৃষ্টি দাঙি ধৰাবোৰ যে শূন্যত গদা ঘূৰোৱাৰ দৰে কথা বুলি কয়। আনহাতে টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞাই কয়, মধ্যপ্ৰদেশৰ ব্যাপন কেলেংকাৰীতকৈও ভয়াৱহ আৰক্ষীৰ উপ- পৰিদৰ্শকক পৰীক্ষাৰ কেলেংকাৰী। বাৰে প্ৰতি লাখ লাখ নিবনুৱাক মাধমাৰ সোধাই অহা চৰকাৰখনে দুৰ্নীতিৰ পাহাৰ গঢ়ি তুলিছে বুলি অভিযোগ উত্থাপন কৰে। লগতে এই ঘটনাৰ লগত জড়িত প্ৰতিজন ব্যক্তিয়ে উচিত শাস্তি পাব লাগিব বুলি তেওঁ কয়। কাৰ্যসূচীত উপস্থিত থাকি শিমলুগুৰি মৌজা আছুৰ উপদেষ্টা যদুমণি বৰুৱা, টীয়ক আছুৰ সম্পাদক প্ৰীতমজ্যোতি শইকীয়া, যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱা, সম্পাদক প্ৰশান্ত দত্ত, টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়া, সম্পাদক বিশ্বজিৎ বৰা আৰু আটছা টীয়ক উপ শাখাৰ সভাপতি এপল কিষ্কো, সম্পাদক ৰোহিত ৰাজোৱাৰে বিজেপিৰ শাসনকালত শিক্ষিত নিবনুৱাক বঞ্চিত কৰি চৌদিশে গঢ়ি উঠা দুৰ্নীতিৰ বৃহৎ বজাৰখনৰ অন্ত অসমৰ ৰাইজে অনাগত অসম বিধানসভাৰ নিৰ্বাচনত দিব বুলি কয়। কাৰ্যসূচীত টীয়ক আছুৰ উপ সভাপতি পাপু কলিতা, ৰক্তিম হাজৰিকা, সহকাৰী সম্পাদক ভাস্কৰ গগৈ, দীপাংকৰ বেজবৰা, ৰূপক সৰকাৰ, প্ৰচাৰ সম্পাদক দীপাংকৰ দাস, শিক্ষা সম্পাদক স্বপ্ননীল বৰুৱাৰ লগতে কেন্দ্ৰীয় শাখা, জগদুৱাৰ, বলমা, কাৱৈমাৰী, কলিয়াপানী শাখা ছাত্ৰ সন্থাৰ বিষয়ববীয়াসকল উপস্থিত থাকে।

দৈনন্দিন বাৰ্তা ডেস্ক : সামাজিক সাংস্কৃতিক ক্ষেত্ৰখনত বিগত এটা দশক বিভিন্ন ধৰণে জড়িত হৈ ৰাইজৰ সৈতে একাত্মতা গঢ়ি তুলিবলৈ সক্ষম হোৱা অসমৰ অগ্ৰণী স্বেচ্ছাসেৱী অনুষ্ঠান ‘সঁহাৰি’ৰ তৰফৰ পৰা শেহতীয়াকৈ ভাৰতীয় জনতা পাৰ্টিৰ ৰাষ্ট্ৰীয় সাধাৰণ সম্পাদক ৰূপে নিৰ্বাচিত সাংসদ দিলীপ শইকীয়াক অভিনন্দন জ্ঞাপন কৰা হয়। শক্তিশালী জনসংখ্যা আইন প্ৰৱৰ্তন তথা দৰং জিলাক ৰে’ল মানচিত্ৰৰ অন্তৰ্ভুক্তকৰণকে ধৰি একাধিক বিষয় পৱিত্ৰ সদনত বলিষ্ঠভাৱে উত্থাপন কৰি অহা বাকপটু সাংসদগৰাকীক ‘উত্তৰ পূৱৰ বলিষ্ঠ কণ্ঠস্বৰ’ আখ্যা দিয়ে সঁহাৰিৰ সভাপতি প্ৰিয়ঙ্কু নাৰায়ণ বৰুৱাই। স্বেচ্ছাসেৱী অনুষ্ঠান ‘সঁহাৰি’ৰ হৈ সাধাৰণ সম্পাদক প্ৰসেনজিৎ বৰুৱা প্ৰমুখ্যে জয়ন্ত বৰুৱা, কাবেৰী গোস্বামী, শেখৰ জ্যোতি নাথ, দ্বিপেন কলিতা, চিৰঞ্জীতা ৰয় চৌধুৰীয়ে সাংসদগৰাকীক বাসভৱনত সাক্ষাৎ কৰি আন্তৰিক সম্ভাষণ জনায়।

গেলেকী : নাজিৰা ৰে’ল ষ্টেচনৰ কাষৰ এটা মুছলমান সম্প্ৰদায়ৰ পৰিয়ালে দীৰ্ঘদিনে আশ্ৰয় দি আহিলে এজন হিন্দু ধৰ্মৰ বৃদ্ধ লোকক। বিগত ২০ বছৰে পৰিয়ালটোৱে ৰোগাক্ৰান্ত বৃদ্ধজনক আশ্ৰয় প্ৰদান কৰাৰ লগতে নিজ পৰিয়ালৰ এজন সদস্য হিচাপে প্ৰতিপাল কৰি আহিছিল। এই মুছলমান পৰিয়ালটোৱে দাঙি ধৰিলে মানৱতাৰ আন এক নিদৰ্শন। অৱশেষত বিহাৰৰ পৰা পৰিয়ালৰ লোক আহি ঘৰলৈ লৈ যায় বৃদ্ধ লোকজনক৷ ৮০ৰ দশকতে কৰ্মসূত্ৰে বিহাৰৰ পৰা আহি নাজিৰাত কাম কৰি জীৱন নিৰ্বাহ কৰিছিল দুখী ভগত নামৰ লোকজনে৷ কিন্তু প্ৰায় ২০ বছৰ পূৰ্বে অচিন ৰোগত আক্ৰান্ত হৈছিল দুখী ভগত৷ ফলত ভাড়াঘৰৰ মালিকে ৰাখিবলৈ অমান্তি হয় দুৰ্ভগীয়াক। ভাড়াঘৰৰ মালিকে ঘৰৰ পৰা উলিয়াই দিয়াৰ পিছত থাকিবলৈ ঠাই নাপাই নাজিৰা ৰে’ল ষ্টেচনতে থাকিবলৈ লয় লোকজনে। কিন্তু লোকজনৰ অসহায় অৱস্থা চকুত পৰিছিল কাষৰে এগৰাকী মুছলমান মহিলাৰ। লগে-লগে মহিলাগৰাকীয়ে দুখী ভগতক নিজৰ ঘৰলৈ লৈ আহি সুস্থ কৰাৰ বিপৰীতে পিছত মহিলা গৰাকীয়ে নিজৰ ঘৰতেই আশ্ৰয় দিয়ে। মুছলমান পৰিয়ালটোৱে চকুৰে নেদেখা দুখী ভগতৰ চিকিত্‍সা কৰোৱাই ঘূৰাই আনে দৃষ্টিশক্তিও। তেতিয়াৰ পৰা প্ৰায় ২০/২২ বছৰ ধৰি দুখী ভগত বুলবুল, ৰেবুল আৰু আবুলহতৰ ঘৰৰে এজন সদস্য হৈ পৰে। অৱশেষত আজি বিহাৰৰ পৰা দুখী ভগতৰ নাতি আহি ঘৰলৈ লৈ যায় দুখী ভগতক। যোৱাৰ সময়ত কান্দোনত ভাঙি পৰিল দুখী ভগত। পৰিয়ালটোৱেও বৃদ্ধজনক বিদায় দিয়াৰ সময়ত মৰ্মাহত হৈ পৰিল৷ নাতিয়ে দুখী ভগতক নতুন জীৱন দিয়াৰ লগতে আশ্ৰয় দিয়াৰ বাবে মুছলমান পৰিয়ালটোক ধন্যবাদ জনালে। সঁচাকৈ এয়াই যেন সঁচা মানৱতা। সমাজত এচামে যিমানেই সাম্প্ৰদায়িক বিষবাষ্প বিয়পাবলৈ চেষ্টা কৰিছে। ঠিক তাৰ সমান্তৰালকৈ আন একাংশই কিন্তু সমাজলৈ এনেদৰেই প্ৰেৰণ কৰি আহিছে এক ইতিবাচক বাৰ্তা।