দৈনন্দিন বাৰ্তা ডেস্ক : অহা ৩১ আগষ্টত আনলক ৩ শেষ হ’ব ৷ আনহাতে ১ ছেপ্টেম্বৰৰ পৰা আনলক ৪ আৰম্ভ হ’ব ৷ যোৱা পাঁচ মাহ ধৰি দেশজুৰি বন্ধ আছে শিক্ষানুষ্ঠান ৷ আনলক ৪ আৰম্ভ হ’লে শিক্ষানুষ্ঠানবোৰ খুলিবনে নাই তাক লৈ এতিয়াও কোনো সিদ্ধান্ত লোৱা নাই কেন্দ্ৰীয় গৃহ মন্ত্ৰালয়ে ৷ দেশৰ বিভিন্ন নগৰত মেট্ৰ’ সেৱা আৰম্ভ কৰাৰ চিন্তা কৰা হৈছে ৷ অৱশ্যে এইক্ষেত্ৰত কেইখনমান ৰাজ্যৰ পৰা আপত্তি আহিছে ৷ তাৰ মাজতো মেট্ৰ’ সেৱা আৰম্ভ কৰাৰ অনুমতি দিয়াৰ সম্ভাৱনা আছে ৷ দিল্লী চৰকাৰে পৰ্যায়ক্ৰমে মেট্ৰ সেৱা মুকলি কৰিবলৈ ব্যৱস্থা হাতত লৈছে ৷ অৱশ্যে এই ক্ষেত্ৰত কেন্দ্ৰই কোনো কথা কোৱা নাই ৷ উল্লেখ্য যি ক’ৰোনা সংক্ৰমণৰ প্ৰতি লক্ষ্য ৰাখি যোৱা মাৰ্চ মাহৰ পৰা মেট্ৰ’ ৰে’ল সেৱা বন্ধ আছে৷ দিল্লীৰ মুখ্যমন্ত্ৰী অৰবিন্দ কেজৰিৱালে পৰীক্ষামূলকভাৱে দিল্লী মেট্ৰ’ আৰম্ভ কৰিবলৈ বিচাৰিছে ৷ আনহাতে কেন্দ্ৰীয় চৰকাৰে পৰ্যায়ক্ৰমে শিক্ষানুষ্ঠানবোৰ খোলাৰ কথা চিন্তা কৰিছে৷ এই ক্ষেত্ৰত কি সাৱধানতা অৱলম্বন কৰিব সেয়া স্পষ্ট নহয় ৷

দৈনন্দিন বাৰ্তা ডেস্ক : পুলৱামা কাণ্ডৰ পৰিকল্পনা কৰিছিল জইছ-ঈ-মহম্মদ সন্ত্ৰাসবাদী সংগঠনৰ প্ৰধান মাছুদ আজহাৰ আৰু ভায়েক আব্দুল ৰাউফ আজগৰে৷ অভিযোগনামাত এই কথাকে উল্লেখ কৰিছে এনআইএয়ে৷ জম্মুৰ আদালতত মঙলবাৰে ৫০০০ পৃষ্ঠাৰ অভিযোগনামা দাখিল কৰিছে এনআইএয়ে৷ তাত পুংখানুপুংখভাৱে কোৱা হৈছে, কিদৰে পাকিস্তানে পুলৱামাত আক্ৰমণ ৰচনা কৰিছিল সকলো উল্লেখ কৰিছে ৷ উল্লেখ্য য়ে ২০১৯ চনৰ ১৪ ফেব্ৰুৱাৰীত পুলৱামাত চিআৰপিএফৰ কনভয়ত সোমোৱাই দিছিল বিস্ফোৰক ভৰ্ত্তি গাড়ী ৷ আত্মঘাতী বিস্ফোৰণত শ্বহীদ হৈছিল ৪০ জন জোৱানৰ ৷ এই ঘটনাৰ চাৰ্জছীট আজি জমা দিয়া হয় ৷ ইয়াত ২০ জনৰ নাম অনা হৈছে ৷ পাকিস্তান সমৰ্থিত জইছৰ প্ৰধান মাছুদ আজহাৰ, আজহাৰৰ ভায়েকৰ নাম উল্লেখ আছে ৷ তদুপৰি আক্ৰমণত নিহত সন্ত্ৰাসবাদীৰ নাম আৰু এই কামত সমৰ্থন কৰাসকলৰ নাম আছে ৷ এনআইএৰ ডেপুটি ইনস্পেক্টৰ ছোনীয়া নাৰাঙে জনোৱা মতে এই চাৰ্জছীট যথেষ্ট দীঘলীয়া ৷ এই চাৰ্জছীটত সন্ত্ৰাসবাদীৰ কল ৰেকৰ্ড, ৱাটছৱেপ চাট দিয়া হৈছে ৷ সেই চাটত আৰডিএক্স আৰু আন বিস্ফোৰকৰ ছবিও দিয়া হৈছে ৷ পুলৱামা কাণ্ডৰ পাচত জইছৰ কমাণ্ডাৰ উমৰ ফাৰুক ভাৰতীয় সেনাৰ হাতত নিহত হয়৷ সেই ফাৰুকৰ ম’বাইলৰ পৰা এই চাট পোৱা গৈছে ৷ উল্লেখ্য যে এই আক্ৰমণক প্ৰশংসা কৰি আজহাৰে এটা ভিডিঅ’ আৰু অডিঅ’ প্ৰকাশ কৰিছিল ৷ চাৰ্জছীটত এইবোৰো দাখিল কৰা হৈছে ৷ আনহাতে পুলৱামাত আক্ৰমণৰ পাচত জইছে এক টেলিগ্ৰাম গ্ৰুপত মেছেজ দিছিল ৷ তাত লেখা হৈছিল, ১০০ ভাৰতীয় হিন্দু সৈন্যৰ মৃত্যু হৈছে৷ চাৰ্জছীটত এই মেছেজও দিয়া হৈছে ৷ উল্লেখ্য যে ২৬/‌১১ মুম্বাই আক্ৰমণৰ অন্যতম চক্ৰান্তকাৰী এই মাছুদ আজহাৰেই৷ আজহাৰৰ উপৰি চাৰ্জছীটত নাম আছে আত্মঘাতী সন্ত্ৰাসবাদী আদিল আহমেদ দাৰৰ ৷ এইজনেই সিই বিস্ফোৰক থকা গাড়ী কনভয়ত সোমোৱাই দিছিল৷ ইয়াৰ উপৰি নাম আছে গাড়ীত বোমা ৰখা উমৰ ফাৰুকৰ ৷ এই বছৰ এক সংঘৰ্ষত এই সন্ত্ৰাসবাদীৰ মৃত্যু হৈছে ৷ তদুপৰি চাৰ্জছীটত নাম আছে ছাকিৰ বছিৰ মাগৰৰ৷ সেইদিনা এই সন্ত্ৰাসবাদীয়ে সেইখন গাড়ী চলাইছিল ৷ ঘটনাস্থলীৰ ৫০০ মিটাৰৰ আগতে এই সন্ত্ৰাসবাদীয়ে গাড়ীৰ পৰা জাপ মাৰি নামি দিছিল ৷ সেই ঠাইত সন্ত্ৰাসবাদীটোৰ আচবাবৰ দোকান আছে৷ জোৱানৰ গতিবিধিৰ খবৰ দিছিল উমৰ ফাৰুকে ৷ তদুপৰি পাকিস্তান সন্ত্ৰাসবাদীৰ গাড়ী সৰবৰাহ কৰিবৰ বাবে মহম্মদ ইকবাল ৰাথেৰ, ম’বাইল দিবৰ বাবে বিলাল আহমেদ কুচে, জইছ সন্ত্ৰাসবাদী তাৰিক আহমেদ শ্বাহ, কন্যা ইনছাৰ নামো আছে চাৰ্জছীটত ৷

দৈনন্দিন বাৰ্তা ডেস্ক : ইজৰাইলৰ কিশোৰে হাজাৰ বছৰৰো অধিক সময়ৰ আগৰ কেতবোৰ সোণৰ মুদ্ৰা মাটিৰ পাত্ৰত থকা অৱস্থাত উদ্ধাৰ কৰিছে ৷ ইজৰাইলৰ পৌৰাণিক সম্পদ কৰ্তৃপক্ষই ১৮ আগষ্টত এই মুদ্ৰাবোৰ আবিষ্কাৰ কৰিছিল, কিশোৰ-কিশোৰীসকলে ইজৰাইলৰ এটা খনন কামত স্বেচ্ছাসেৱীৰ দ্বাৰা সেই ঠাইত নতুনকৈ নিৰ্মাণৰ পৰিকল্পনা কৰিছিল ৷ যিজন ব্যক্তিয়ে সেই মুদ্ৰা ১১০০ বছৰৰ আগতে পুতি ৰাখিছিল তেওঁ পুনৰুদ্ধাৰ কৰিবলৈ আৰু সুৰক্ষিত কৰিব পৰা নাছিল ৷ সেই মুদ্ৰা সংগ্ৰহ কৰোতে তেওঁ ঘুৰি আহোতে কি কি বাধা পাইছিল সেয়া কেৱল অনুমানহে কৰিব পাৰি ৷ খনন পৰিচালক লিয়াদ নাদভ-জিভে এনেদৰে কয় ৷ ইজৰাইলৰ প্ৰত্নতত্ত্ববিদ শ্বাহাৰ ক্ৰিছপিনে আব্বাচীয় ৰাজবংশৰ তাৰিখ অনুসৰি স্বৰ্ণ মুদ্ৰা গণনা কৰিছিল৷ মুদ্ৰাবোৰ গোপন কৰাৰ সময়ত এটা আৱাসিক কাৰখানা পোৱা গৈছিল ৷ তাৰ মালিকৰ পৰিচয় এতিয়াও এক ৰহস্য ৷ এয়া আশ্চৰ্যজনক আছিল৷ ওজ কোহেনে এই কথা কয়৷ স্বেচ্ছাসেৱীসকলৰ জৰিয়তে এই মুদ্ৰা পাইছিল ৷ নৱম শতাব্দীৰ আব্বাচীয় খিলাফত আমোলাত ৪২৫ ২৪ কেৰেটৰ বিশুদ্ধ সোণৰ মুদ্ৰাবোৰ তেতিয়াৰ সময় উল্লেখনীয় পৰিমাণে অৰ্থ থাকিব পাৰে ৷ পৌৰাণিক কৰ্তৃপক্ষৰ মুদ্ৰা বিশেষজ্ঞ ৰবাৰ্ট কুলে এইদৰে কয়৷ উদাহৰণ হিচাপে এই পৰিমাণৰ ধনৰ সহায়ত কোনো ব্যক্তিয়ে সেই সময়ত মিছৰৰ সৰ্বাধিক ধনী ৰাজধানী ফুস্তাতৰ অন্যতম ঠাইত এটা বিলাসবহুল ঘৰ কিনিবও পাৰে৷ কুলে এনেদৰে প্ৰকাশ কৰে ৷

অনলাইন বাৰ্তা : সমগ্ৰ বিশ্বৰ ২১০ খনৰো অধিক দেশত ক’ৰোনা ভাইৰাছত ২৩.৬৫ মিলিয়ন লোক আক্ৰান্ত হৈছে ৷ আনহাতে এই ভাইৰাছত আক্ৰান্ত হৈ ৮১১৮৯৫ জন লোকৰ মৃত্যু হৈছে ৷ ইপিনে এই ভাইৰাছত আক্ৰান্ত হৈ ১৫ মিলিয়নৰো অধিক লোক আৰোগ্য হৈছে ৷ বিশ্ব স্বাস্থ্য সংস্থাই জনোৱা মতে ক’ভিড-১৯ এতিয়াও সংক্ৰমণ হৈ আছে ৷ কিন্তু সংক্ৰমণ বৃদ্ধি আৰু মৃত্যুৰ সংখ্যা বিশ্বজুৰি কমিবলৈ ধৰিছে ৷ অৱশ্যে দক্ষিণ পূৱ এছিয়া আৰু পূৱ মেদিটেৰীয়েন অঞ্চলত ইয়াৰ বিপৰীত হৈ আছে ৷ শেহতীয়া তথ্য মতে বিশ্ব স্বাস্থ্য সংস্থাই কয় যে আমেৰিকা হ’ল সৰ্বাধিক আক্ৰান্ত এলেকা ৷ বিশ্ব স্বাস্থ্য সংস্থাৰ মতে ২৩ আগষ্টত সমাপ্ত হোৱা সপ্তাহটোত ক’ভিড-১৯ত ১.৭ মিলিয়ন নতুন আক্ৰান্ত আৰু ৩৯০০০ নতুনকৈ মৃত্যু হয় ৷ এই সংখ্যা মুঠ আক্ৰান্তৰ ৪ শতাংশ কমিছে আৰু মৃত্যুৰ হাৰ আগৰ সপ্তাহতকৈ কম৷ দক্ষিণ পূৱ এছিয়া হ’ল দ্বিতীয় সৰ্বাধিক আক্ৰান্ত এলেকা ৷ এই এলেকাত নতুনকৈ ২৮ শতাংশ আক্ৰান্ত হৈছে আৰু ১৫ শতাংশৰ মৃত্যু হৈছে৷ ভাৰত হ’ল সৰ্বাধিক আক্ৰান্ত এলেকা ৷ ইপিনে নেপালত এই ভাইৰাছ দ্ৰুতগতিত সংক্ৰমণ হৈছে ৷ লেবালন, টিউনেছিয়া আৰু জৰ্ডানত আগৰ সপ্তাহতকৈ বেছি লোক আক্ৰান্ত হৈছে ৷ ইপিনে গাজাত লকডাউন চলাই যাবলৈ লৈছে৷ দেশখনত মঙলবাৰে প্ৰথম ক’ভিড আক্ৰান্ত ধৰা পৰাৰ পাচত লকডাউন দিছে৷ দেশখনৰ চৰকাৰৰ মুখপাত্ৰই কয় যে এটা শৰনাৰ্থী পৰিয়ালৰ চাৰিজন লোক আক্ৰান্ত হয়৷ ইপিনে দুগৰাকী ইউৰোপীয়ান ৰোগী পুনৰ ক’ৰোনাত আক্ৰান্ত হৈছে৷ নেডাৰলেণ্ড আৰু বেলজিয়ামত এই ভাইৰাছত পুনৰ আক্ৰান্ত হোৱাৰ খবৰ পোৱা গৈছে৷ জাৰ্মানীত ব্যৱসায় পুনৰুজ্জীৱিত কৰাৰ ব্যৱস্থা কৰা হৈছে৷ জাৰ্মানীত নিৰ্মাণ আৰু সেৱাত জড়িত ব্যৱসায় উন্নত কৰাৰ ব্যৱস্থা হাতত লোৱা হৈছে৷ ইউৰোপৰ সৰ্ববৃহৎ অৰ্থনীতি পুনৰ ঘুৰাই অনাৰ আশাৰে কাম আৰম্ভ কৰিছে৷ ইণ্ডোনেছিয়াত নতুনকৈ ক’ৰোনাত ২৪৪৭ জন আক্ৰান্ত হৈছে ৷ দেশখনত বৰ্তমানলৈকে ১৫৭৮৫৯ জন লোক এই ভাইৰাছত আক্ৰান্ত হৈছে৷ দক্ষিণ কোৰিয়াত বিদ্যালয়বোৰ পুনৰ সংক্ৰমণৰ বাবে বন্ধ কৰিছে ৷ দক্ষিণ কোৰিয়াত নতুনকৈ ২৮০ জন আক্ৰান্ত হোৱাৰ কথা প্ৰকাশ ৷ দেশখনট ১৭৯৪৫ জন এই ভাইৰাছত আক্ৰান্ত হোৱাৰ বিপৰীতে ৩১০ জনৰ মৃত্যু হৈছে ৷ দক্ষিণ কোৰিয়াত জনসমাগম যোৱা দেওবাৰৰ পৰা বন্ধ কৰিছে ৷ ইয়াৰ লগতে বিভিন্ন অনুষ্ঠান আৰু ক্ৰীড়া বন্ধ কৰিছে ৷ বেইজিং বিশ্ববিদ্যালয়লৈ ঘুৰি অহা শিক্ষাৰ্থীৰ ভাইৰাছ পৰীক্ষা কৰাৰ ব্যৱস্থা কৰিছে ৷ অহা ৯ ছেপ্টেম্বৰৰ পৰা বিশ্ববিদ্যালয়খনৰ পাঠদান আৰম্ভ হ’ব৷ মেক্সিকোৰ বিদ্যালয়বোৰৰ নতুন বৰ্ষ আৰম্ভ কৰিছে ৷ ভাইৰাছটোৰ সংক্ৰমণৰ প্ৰতি লক্ষ্য ৰাখি স্পেইনত কেতবোৰ নতুন নিষেধাজ্ঞা প্ৰচলন কৰিছে ৷

দৈনন্দিন বাৰ্তা ডেস্ক : আৰক্ষীয়ে চিকিৎসকক আতিশয্য কৰাৰ অভিযোগত নাগালেণ্ড ইন-ছাৰ্ভিচ ডক্টৰছ এছ’চিয়েছনে অহা বুধবাৰে পুৱা ৬ বজাৰ পৰা ২৪ ঘণ্টাৰ বাবে ৰাজ্যখনৰ সকলো স্বাস্থ্য সেৱা সম্পূৰ্ণ বন্ধ ঘোষণা কৰিছে ৷ নাগালেণ্ড ইন-ছাৰ্ভিচ ডক্টৰছ এছ’চিয়েছনৰ সভাপতি ডাঃ ৰিতু থুৰ আৰু সম্পাদক ডাঃ আবু ছীকহোছে এক বিবৃতিত কয়, চিকিৎসকৰ বিপক্ষে আৰক্ষীয়ে যি বৰ্বৰতা প্ৰদৰ্শন কৰিছে তাৰ অভিযোগত সম্পূৰ্ণ বন্ধ ঘোষণাৰে প্ৰতিবাদ জনোৱা হৈছে ৷ অৱশ্যে জৰুৰীকালীন সেৱা অব্যাহত থাকিব বুলি সভাপতি আৰু সম্পাদকে জনাইছে ৷ নাগালেণ্ড ইন-ছাৰ্ভিচ ডক্টৰছ এছ’চিয়েছনৰ তৰফৰ পৰা জনাই যে যোৱা ৩ এপ্ৰিলত ডিমাপুৰত ডাঃ নোজেজল ছিজু আৰু ১৭ এপ্ৰিলত ঊষাত ডাঃ মংগশ্বিটুঙক আৰক্ষীয়ে বৰ্বৰভাৱে আতিশয্য কৰিছিল ৷ আনহাতে ঊষাত ২১ আগষ্টৰ নিশা ডাঃ আটোকাক আইআৰবি জোৱানে আতিশয্য কৰিছিল ৷ ইয়াৰ পাচতে ৰাজ্যৰ গৃহ বিভাগে এখন তিনিজনীয়া সদস্যৰ সমিতি তদন্তৰ বাবে গঠন কৰি দিছিল ৷ এই সমিতিয়ে ২৩ আগষ্টত দায়িত্ব লয় আৰু সাত দিনৰ ভিতৰত প্ৰতিবেদন দাখিল কৰাৰ কথা ৷

দৈনন্দিন বাৰ্তা ডেস্ক : পাকিস্তানৰ কৰাচীতে আছে ডাউদ ইব্ৰাহিম ৷ এই কথা স্বীকাৰ কৰিলে পাকিস্তান চৰকাৰে ৷ ১৯৯৩ চনত মুম্বাই কাণ্ডৰ মূল অভিযুক্তক আশ্ৰয় দিয়াৰ কথা অস্বীকাৰ কৰিছিল পাকিস্তানে ৷ অৱশেষত ডাউদৰ ঠিকনা প্ৰকাশ কৰিলে ইমৰান খান চৰকাৰে ৷ পাকিস্তান চৰকাৰে জনাইছে, পাকিস্তানৰ কৰাচীত ছৌদি মছজিদৰ কাষত ক্লিফটনৰ হুৱাইট হাউচত থাকে মুম্বাই বোমা আক্ৰমণৰ মূল নায়ক ডাউদ ইব্ৰাহিম ৷ উল্লেখ্য যে ডাউদ ইব্ৰাহিমে পাকিস্তানৰ চিনেমা উদ্যোগৰ লগত জড়িত বহু অভিনেত্ৰীৰ লগত নিয়মীয়াকৈ সম্পৰ্ক ৰক্ষা কৰি আছে ৷ মন কৰিব লগা যে বলীউড আৰু আণ্ডাৰৱ’ৰ্ল্ডৰ মাজত সম্পৰ্ক থকা কথাটো দীৰ্ঘদিন ধৰি প্ৰচাৰ হৈ আছে ৷ একালত বলীউডত ডাউদ ইব্ৰাহিমৰ ভাল প্ৰভাৱ আছিল ৷ ডাউদে বলীউডৰ বহু চিনেমাত পুঁজি যোগান ধৰিছে বুলিও অভিযোগত প্ৰকাশ ৷ বহু ভাৰতীয় অভিনেতাই ডাউদে আয়োজন কৰা অনুষ্ঠানত অংশগ্ৰহণ কৰা অভিযোগ আছে ৷ কিন্তু পাকিস্তানৰ চিনেমা উদ্যোগত ডাউদে নিজৰ অধিপত্য চলাই আছে ৷ পাকিস্তানৰ বৃহৎ অসামৰিক সন্মান ‘টামজা-ই-ইমতিয়াজ’ বঁটা দেশখনৰ এগৰাকী অভিনেত্ৰীয়ে লাভ কৰাৰ সময়ত, ২০১৯ চনত ডাউদ তাৰ চিনেমা উদ্যোগৰ লগত জড়িত থকাৰ কথা পোহৰলৈ আহে ৷ এই ৩৭ বছৰীয়া অভিনেত্ৰীগৰাকী হ’ল মেহবিশ হায়াত ৷ মন কৰিব লগা যে কিছু বছৰৰ আগলৈকে মেহবিশক চিনি পোৱা নাছিল ৷ কিন্তু এইগৰাকী অভিনেত্ৰী পাকিস্তানৰ সংবাদ মাধ্যম আৰু গ্লেমাৰ উদ্যোগত এতিয়া জনপ্ৰিয় নাম ৷ মেহবিশে ‘টামজা-ই-ইমতিয়াজ’ বঁটা লাভ কৰাৰ বিষয়ে পাকিস্তান চৰকাৰৰ সিদ্ধান্তক বহু লোকে প্ৰশ্ন উত্থাপন কৰিছিল ৷ এটা ৱেব পৰ্টেলে মেহবিশক ডাঙৰ সন্মান দিব বুলি সংবাদ কৰাত পাকিস্তানৰ চিনেমা উদ্যোগক আচৰিত কৰি তুলিছিল ৷ ৱেব পৰ্টেলটোৱে কৰা সংবাদ মতে চিনেমা উদ্যোগত বহু কাম কৰাৰ বাবে বা যি শাসনাধিষ্ঠিত পাকিস্তান-টেহৰীক-ই-ইনছাফ পাৰ্টিৰ লগত নিবিড় কৰাচীৰ শক্তিশালী ব্যক্তিৰ লগত সম্পৰ্ক থকাত মেহবিশে ‘টামজা-ই-ইমতিয়াজ’ বঁটা লাভ কৰিব ৷ এই খবৰৰ পাচত মেহবিশক ট্ৰোল কৰা হয়৷ তেওঁ তেওঁৰ বিৰুদ্ধে ষড়যন্ত্ৰ বুলি অভিহিত কৰিছিল ৷ প্ৰাপ্ত সূত্ৰই জনোৱা মতে সম্প্ৰতি পাকিস্তানৰ অভিনেত্ৰীৰ সৈতে ডাউদৰ নিয়মীয়া সম্পৰ্ক আছে ৷ এইগৰাকী অভিনেত্ৰী গেংষ্টাৰৰ প্ৰতি দুৰ্বল বুলি প্ৰকাশ৷ মেহবিশে এটা আইটেম নম্বৰ লৈ তেওঁৰ কেৰিয়াৰ আৰম্ভ কৰিছিল আৰু কোৱা হয় যে এই আইটেম নম্বৰৰ পাচত তেওঁ ডাউদ ইব্ৰাহিমৰ দৃষ্টি আকৰ্ষণ কৰিছিল ৷ জানিব পৰা মতে কৰাচীৰ এজন প্ৰভাৱশালী ব্যক্তিৰ সৈতে ঘনিষ্ঠতাৰ বাবে পাচত মেহবিশে বহু কেইটা বৃহৎ প্ৰকল্পত কাম কৰাৰ সুযোগ পাইছিল, যিটো ডাউদৰ বাদে আন কোনো নহয় ৷ মেহবিশৰ উত্থানত দেখা যায় যে ডাউদে এতিয়াও চিনেমা উদ্যোগত প্ৰচুৰ পৰিমাণে ব্যয় কৰিছে আৰু ডাউদে গ্লেমাৰ উদ্যোগত যিকোনোৰে কেৰিয়াৰ গঢ়িব পাৰে ৷