ডবকা : ৰাজ্যৰ আন আন প্ৰান্তৰ সমান্তৰালকৈ হোজাই জিলাতো অৱ্যাহত আছে গৰুৰ চোৰাং বেহা৷ বৃহস্পতিবাৰে নিশা ডবকাৰ পৰা কাছাৰলৈ চোৰাংভাবে সৰবৰাহ কৰোতে ২০ টা গৰুসহ এখন বাৰচকীয়া ট্ৰাক জব্দ কৰে৷ জব্দ কৰা গৰু ভৰ্তি ট্ৰাকখনৰ নম্বৰৰ হ’ল AS11CC 8056 ৷ সোধপোচৰ বাবে তিনি শ্ৰমিকক আটক কৰিছে যদিওঁ চালক আৰু চোৰাং ব্যাৱসায়ী সকল পলাই যাবলৈ সক্ষম হয়৷ আটক কৰা শ্ৰমিক কেইজনৰ নাম হল ক্ৰমে নাচিৰ উদ্দিন, আব্দুল খালিক আৰু আচাব উদ্দিন৷ জানিব পৰা মতে এক গোপন তথ্যৰ ভিত্তিত হোজাইৰ আৰক্ষী অধীক্ষক অংকুৰ জৈনৰ নিৰ্দ্দেশ মৰ্মে ডবকা আৰক্ষীয়ে ডবকাৰ ৩৬ নং ৰাষ্ট্ৰীয় ঘাইপথৰ পৰা গৰুভৰ্তি ট্ৰাকখন জব্দ কৰিবলৈ সক্ষম হয়৷ জব্দ কৰা গৰু কেইটা ডবকা চহৰৰ সমীপৰ এটি পাউণ্ডত ৰাখি থৈছে৷ চোৰাংভাবে গৰুখিনি ক’ৰ পৰা কোনে, ক’লৈ সৰবৰাহ কৰিছে সেই বিষয়ে সবিশেষ তথ্য আৰক্ষীয়ে সংবাদ মাধ্যমক প্ৰকাশ কৰা নাই যদিও সাংবাদিকে চলোৱা অনুসন্ধানত গৰু খিনি ৰাঙলুৰ জনৈক আব্দুছ ছাত্তাৰ নামৰ লোকজনে ডবকাৰ NRL পেট্ৰল পাম্পৰ সমীপত গাড়ীত গৰুখিনি বোজাই কৰা হৈছে আৰু এইখিনি কাছাৰলৈ সৰবৰাহ কৰিব খুজিছিল৷ ইফালে ঈদৰ প্ৰাকমূৰ্তত এনেদৰে চোৰাংভাবে গৰু সৰবৰাহ কৰা গাড়ী জব্দ কৰিবলৈ সক্ষম হোৱা কাৰ্য্যক আদৰণি জনাইছে ডবকাবাসী ৰাইজে৷ উল্লেখ্য যে লক ডাউনৰ পূৰ্বে ডবকা, মোৰাঝাৰ, লংকা, উদালী আদি অঞ্চলৰ পৰা ব্যাপক হাৰত চোৰাংভাবে গৰু সৰবৰাহ হৈ আছিল৷ আৰক্ষীয়েও বহু গৰুৰ ট্ৰাক জব্দ কৰাৰ লগতে কেবাজনত জেললৈ প্ৰেৰণ কৰিছিল। চোৰাং গৰুৰ লগত একাংশ মুখা পিন্ধা ভদ্ৰলোক জৰিত থকাৰ অভিযোগ উঠিছে। এই চক্ৰটোৰ বিৰুদ্ধে সাংবাদিক তথা কোনো দল-সংগঠনে মাত মাতিলে চক্ৰটোৱে গভীৰ ষড়যন্ত্ৰত লিপ্ত হোৱাৰ অভিযোগ উঠিছে। হোজাই জিলা আৰক্ষী অধীক্ষকেও এটা এটাকৈ নাকী লগোৱাই চোৰাং ব্যৱসায়ী তথা চক্ৰ উৎখাত কৰিবলৈ ধৰিছে যদিও একাংশ তলতীয়া আৰক্ষীয়ে চক্ৰটোৰ সৈতে সু সম্পৰ্ক ৰক্ষা কৰাৰ অভিযোগ উঠিছে।
নামখলাৰ সৰু থেকেৰাবাৰীত ৬০ ফুট উচ্চতাৰ অমিতা গছক লৈ ৰাইজৰ মাজত কৌতূহল-চাঞ্চল্য
নামখলা : সাধাৰণতে ওখ গছ বুলিলে আমি তামোল, নাৰিকল, খেজুৰ, আম, বটগছ আদিকেই বুজো যদিও এতিয়া এই ধাৰণা সলনি কৰি অমিতা গছেও স্থান দখল কৰিছে ওখ গছৰ তালিকাত। সচৰাচৰ এডাল অমিতা গছ সৰ্বাধিক ২০-২৫ ফুট ওখ হয় যদিও দৰং জিলাৰ মঙলদৈত এডাল ৬০ ফুট উচ্চতাৰ অমিতা গছে সকলোৰে দৃষ্টি আকৰ্ষণ কৰাৰ লগতে ইয়াক কেন্দ্ৰ কৰি অঞ্চলটোত এক প্ৰকাৰ কৌতূহল আৰু চাঞ্চল্যৰ সৃষ্টি হৈছে। প্ৰাপ্ত খবৰ অনুসৰি জিলাখনৰ মঙলদৈ নগৰৰ নিকটৱৰ্তী সৰু থেকেৰাবাৰী গাঁৱৰ জমছেদ আলী নামৰ এজন লোকৰ ঘৰৰ বাৰীত আছে এই ৬০ ফুট উচ্চতাৰ অমিতা গছ গছজোপা। এতিয়া এই অসাধাৰণ অমিতা গছ জোপাক লৈ ৰাইজৰ মাজত চলিছে সৰৱ চৰ্চা। পথচাৰীয়ে জুমি জুমি চাই যোৱা এই অমিতা গছ জোপা চাবলৈ দৈনিক শ শ লোকে ভিৰ কৰিছেহি জমছেদ আলীৰ ঘৰত। সকলোকে হতভম্ব কৰি তোলা এই বিশেষ অমিতা গছজোপা সন্দৰ্ভত গৃহস্থ জমছেদ আলীয়ে সাংবাদিকৰ আগত প্ৰকাশ কৰে যে পুলি অৱস্থাত অমিতা গছজোপা সাধাৰণ অমিতা গছৰ দৰেই লহপহকৈ বাঢ়ি আহে আৰু এটা সময়ত ফল দিবলৈ আৰম্ভ কৰে। সাধাৰণতে এডাল অমিতা গছ ৪-৫ বছৰ হে জীয়াই থাকে যদিও এইজোপা অমিতা গছে প্ৰায় ১৫ বছৰ ধৰি নিয়মিতভাৱে ফল দি আহিছে বুলি জানিবলৈ দিয়ে গৃহস্থই। ইপিনে গছজোপাৰ উচ্চতা ক্ৰমাৎ বৃদ্ধি পাই অহাৰ পৰিপ্ৰেক্ষিতত গছজোপাৰ পৰা অমিতা পাৰি অনাৰ ক্ষেত্ৰত গৃহস্থই সমস্যাৰ সন্মুখীন হয়, যাৰ ফলত বিগত এবছৰ ধৰি গছজোপাৰ পৰা অমিতা খাবলৈ সক্ষম হোৱা নাই বুলি সাংবাদিকৰ আগত প্ৰকাশ কৰে গৃহস্থ জমছেদ আলীয়ে। অমিতা গছজোপাৰ সন্দৰ্ভত গৃহস্থ জমছেদ আলীৰ অনুভৱ জানিব বিচৰাত তেওঁ কয় যে এয়া আল্লা-ঈশ্বৰৰ এক লীলা। উল্লেখ্য যে ৬০ ফুট উচ্চতাৰ এই অমিতা গছজোপাৰ অমিতা বৰ্তমান বিভিন্ন চৰাই-চিৰিকটিৰ খাদ্য হৈ পৰাৰ লগতে গছজোপা চৰাই-চিৰিকটিৰ বাসস্থান হৈ পৰাৰ পৰিপ্ৰেক্ষিতত ইয়াক সম্পূৰ্ণ ৰক্ষণাবেক্ষণ দি আছে গৃহস্থই।
অসম আৰু অসমীয়া জাতি ৰক্ষাৰ স্বাৰ্থত সকলোকে এক হ’বলৈ আহ্বান
জামুগুৰিহাট : তেজ দিম, কিন্তু মাটি নিদিওঁ। অসমীয়া জাতি ৰক্ষাৰ স্বাৰ্থত সন্দেহজনক নাগৰিকৰ বিৰুদ্ধে আমি যুজঁ দি যাম৷ অংগীকাৰ কৰিছোঁ যে আমাৰ অধিকাৰৰ বিৰুদ্ধে গৈ সন্দেহজনক নাগৰিকে চকীঘাটত যি ঘৃণনীয় কাণ্ড সংঘটিত কৰিলে তাৰ উচিত জবাব দিয়া হ’ব৷ নিজৰ জীৱন দিম কিন্তু মাটি নিদিওঁ। – এই মন্তব্য চতিয়া সমষ্টিৰ বিধায়ক পদ্ম হাজৰিকাৰ। বৃহস্পতিবাৰে জামুগুৰিহাটৰ চকীঘাটত সন্দেহজনক নাগৰিকে বৰ্বৰকাণ্ড সংঘটিত কৰা স্হানত কালি পুনৰ বিধায়ক পদ্ম হাজৰিকা উপস্থিত হৈ সাংবাদিকৰ আগত এনেদৰে কয়৷ বিধায়কগৰাকীয়ে অসমবাসীলৈ পুনৰ আহ্বান জনাই কয় যে চকীঘাটৰ এই ঘটনাই কেৱল চতিয়া সমষ্টিৰ বাবেই নহয় সমগ্ৰ অসম তথা অসমীয়া জাতিৰ বাবে ঋণাত্মক বতৰা কঢ়িয়াই আনিছে। সময় থাকোতেই জাতিটোৰ স্বাৰ্থত এই অপশক্তিক ওফৰাই পেলাবলৈ সকলোকে একগোট হ’বলৈ কোৱাৰ লগতে দূৰদৰ্শীতাৰে এই বিষয়টো আলোচনা কৰিবলৈ বিধায়ক গৰাকীয়ে সকলোলৈকে আহ্বান জনাইছে। উল্লেখযোগ্য যে চতিয়া সমষ্টিৰ জামুগুৰিহাটৰ দক্ষিণ পশ্চিমাঞ্চলৰ চকীঘাটত বৃহস্পতিবাৰে সংঘটিত হোৱা ভূমিকেন্দ্ৰীক বিবাদৰ পিছত কালিও চকীঘাটত উপস্থিত হয় চতিয়াৰ বিধায়ক পদ্ম হাজৰিকা৷ চকীঘাটত বেদখলমুক্ত মাটি আত্মসহায়ক গোট, কৃষি গোট, দল-সংগঠনক বিতৰণৰ মুহুৰ্তত সংঘটিত খিলঞ্জীয়া যুৱকৰ ওপৰত সন্দেহযুক্ত নাগৰিকৰ আক্ৰমণ কোনো কাৰণতে সহ্য কৰা নহ’ব বুলি হুংকাৰ দিয়াৰ লগতে প্ৰয়োজনত তেজ দিম কিন্তু মাটি নিদিও বুলিও হুংকাৰ দিয়ে বিধায়ক পদ্মই৷ চকীঘাটৰ কাষৰ মাটি যদি আক্ৰমণকাৰী দুস্কৃতিকাৰীয়ে এৰি থৈ যাব বুলি ভাবিছে তেন্তে সেয়া ভুল ভাবিছে বুলি উল্লেখ কৰি দৰকাৰ হ’লে সেইসকল সন্দেহযুক্ত লোক যাব লাগিব কিন্তু মাটি কোনো কাৰণত এৰা নহ’ব বুলি বিধায়ক পদ্ম হাজৰিকাই ব্যক্ত কৰি এই ক্ষেত্ৰত সময় থাকোতেই সকলো একত্ৰিত হৈ যুঁজ দিবৰ বাবে আহবান জনাই৷ অন্যহাতে চকীঘাটৰ কালিৰ পৰিৱেশ শান্ত যদিও চেপা উত্তেজনা বিৰাজ কৰি আছে সমগ্ৰ অঞ্চলটিত৷ ইফালে আক্ৰমণৰ ঘটনা সন্দৰ্ভত জামুগুৰি আৰক্ষী চকীত গুৰুতৰভাৱে আঘাতপ্ৰাপ্ত ভাৰপ্ৰাপ্ত আৰক্ষী বিষয়া প্ৰাঞ্জল কুমাৰ নাথে দিয়া এজাহাৰৰ ভিত্তিত ৪৬/২০ নম্বৰত গোচৰ ৰুজু কৰি নুৰজামাল আলি(২৭) আৰু ছাদ্দাম হুছেইন(২০) নামৰ দুই আক্ৰমণকাৰীক গ্ৰেপ্তাৰ কৰাৰ লগতে আক্ৰমণৰ ঘটনাৰ লগত জড়িত আন লোকসকলকো বিচাৰি তীব্ৰ অভিযান আৰম্ভ কৰিছে আৰক্ষীয়ে৷ উল্লেখ্য যে, যোৱা ফেব্ৰুৱাৰী মাহত চতিয়া সমষ্টিৰ অন্তৰ্গত চকীঘাট, দিঘলী চাপৰী, ননকে গটাইমাৰী, গটাইমাৰী, লালেটাপু আদি চৰ চাপৰীৰ পৰা ৪৭৩ টা সন্দেহজনক পৰিয়ালক শোণিতপুৰ জিলা প্ৰশাসনে উচ্ছেদ কৰিছিল আৰু এই উচ্ছেদিত ভূমিৰ এহেজাৰ বিঘা অলপতে অসমৰ মুখ্যমন্ত্ৰী সৰ্বানন্দ সোণোৱালে স্থানীয় নিবনুৱাক কৃষি কৰ্মৰ বাবে আৱণ্টণ দিছিল৷ ইয়াৰোপৰি চৰ চাপৰি সমূহৰ শ শ বিঘা চৰকাৰী মাটি বেদখল কৰি থকা লোক সকলক চৰকাৰী মাটি এৰি দিবলৈ প্ৰশাসনে নিৰ্দেশ জাৰি কৰিছিল যদিও মাটি এৰি দিব নোখোজা একাংশ সন্দেহজনক লোকে পৰিকল্পিতভাৱে এই আক্ৰমণৰ ঘটনা সংঘটিত কৰিছিল বুলিও সন্দেহ প্ৰকাশ কৰিছে স্থানীয় সচেতন মহলে ৷
আজি ত্যাগ আৰু ভাতৃত্ববোধৰ উত্সৱ ঈদ- উজ-জোহা, নহয় সমূহীয়া নামাজ
দৈনন্দিন বাৰ্তা ডিজিটেল ডেস্কঃ দেশত কোৰোণাৰ মহামাৰীৰ সংহাৰ অব্যাহত আছে। কোৰোণাৰ ফলত অসমৰ লগতে দেশবাসীয়ে বঞ্চিত হৈছে বিভিন্ন উত্সৱ উদযাপনৰ পৰা। আজি ইছলামধৰ্মী লোকসকলৰ ত্যাগ আৰু ভাতৃত্ববোধৰ পবিত্ৰ উত্সৱ ঈদ। কোৰোণাৰ ভয়াৱহতাৰ প্ৰতি লক্ষ্য ৰাখি এইবাৰ ঈদত নহয় সামূহীয়া নামাজ। কৰোণাৰ পৰিপ্ৰেক্ষিতত চৰকাৰে নীতি নিয়ম মানি ঘৰতে নামাজ পঢ়াৰ বাবে জনসাধাৰণক আহ্বান জনাইছে।
বাতৰি যোগুতালেঃ জ্যোতিস্মান শৰ্মা
মাতৃভূমি পালেহি শ্বহীদ প্ৰণয় কলিতাৰ নশ্বৰ দেহ, বিমান বন্দৰত আৰক্ষীৰ শ্ৰদ্ধাঞ্জলী জ্ঞাপন
দৈনন্দিন বাৰ্তা ডিজিটেল ডেস্কঃ অৱশেষত মাতৃভূমিত উপস্থিত হ’ল মণিপুৰত শ্বহীদ হোৱা অসম সন্তান পাঠশালাৰ প্ৰণয় কলিতাৰ নশ্বৰ দেহ। এয়াৰ এছিয়াৰ বিশেষ বিমানেৰে প্ৰনয় কলিতাৰ নশ্বৰ দেহ মণিপুৰৰ পৰা বৰঝাৰ বিমান বন্দৰলৈ অনা হয়। বিমান বন্দৰত আৰক্ষী আয়ুক্ত, বিমান বন্দৰ কৰ্তৃপক্ষ আৰু আৰক্ষীৰ লোকে শ্ৰদ্ধাঞ্জলী জ্ঞাপন কৰাৰ পিছত এম্বুলেন্সেৰে বীৰ শ্বহীদ প্ৰণয় কলিতাৰ নশ্বৰদেহ নিজগৃহ পাঠশালালৈ লৈ যোৱা হয়। বিমানবন্দৰতে সামৰিক মৰ্যাদা দিয়া হয় শ্বহীদ গৰাকীক। মণিপুৰত বুধবাৰে নিশা অসম ৰাইফলছৰ জোৱানৰ ওপৰত উগ্ৰপন্থীয়ে চলাইছিল ভয়ংকৰ আক্ৰমণ।মণিপুৰৰ চণ্ডেলত ম্যানমাৰ বৰ্ডাৰৰ সমীপত অসম ৰাইফলছৰ জোৱানৰ ওপৰত সংঘটিত হৈছিল এই আক্ৰমণৰ ঘটনা।
বাতৰি যোগুতালেঃ জ্যোতিস্মান শৰ্মা
পঞ্জাৱত বিষাক্ত মদ পান কৰি ২১ জনৰ মৃত্যু
দৈনন্দিন বাৰ্তা ডেস্ক : পঞ্জাৱত বিষাক্ত মদ পান কৰি ২১ জন লোকৰ মৃত্যু হৈছে৷ অমৃতসৰত বুধবাৰে ৰাতি প্ৰথমে ৫জনৰ মৃত্যুৰ খবৰ আহিছিল৷ কিন্তু ইয়াৰ পাছত গুৰুদাসপুৰ আৰু তৰণ তাৰণ জিলাৰ পৰা বিষাক্ত মদ পান কৰি মৃত্যু হোৱা লোকৰ সংখ্যা আহি আছে৷ শুকুৰবাৰে ৰাতি পঞ্জাৱৰ তিনিখন জিলাত বিষাক্ত মদ পান কৰি মৃত্যু হোৱা লোকৰ সংখ্যা ২১ জন হৈছেগৈ৷ আনহাতে চিকিৎসালয়ত কেইবাজনো সংকতজনক অৱস্থাত চিকিৎসাধীন হৈ আছে৷ এই ঘটনাৰ তদন্ত নিৰ্দেশ দিছে মুখ্যমন্ত্ৰী অমৰেন্দ্ৰ সিঙে৷ মুখ্যমন্ত্ৰীজনে টুইট কৰি কয় যে বিষাক্ত মদ পান কৰি মৃত্যু হোৱাৰ ঘটনা দণ্ডাধীশ পৰ্যায়ৰ তদন্তৰ নিৰ্দেশ দিয়া হৈছে৷ জলন্ধৰ ডিভিজনৰ আয়ুক্তক এই তদন্ত পৰিচালনা কৰিব৷ সংশ্লিষ্ট আৰক্ষী অধীক্ষক আৰু অন্যান্য প্ৰশাসনিক বিষয়াই তেওঁক সহায় কৰিব৷ দোষীক কোনো কাৰণতে ৰেহাই দিয়া নহ’ব বুলি তেওঁ কয়৷ আৰক্ষীৰ সূত্ৰ মতে অমৃতসৰৰ তাৰছিক্কৰ এলেকাৰ মুচল আৰু টাংড়া গাঁৱত বিষাক্ত মদ পান কৰি ৫ জনৰ মৃত্যু হোৱাৰ কথা জানিব পাৰে৷ তাৰ কেইঘণ্টামানৰ পাছত গুৰুদাসপুৰৰ বটলা চহৰ আৰু তৰণ তাৰণ জিলাৰ পৰা এই মৃত্যুৰ খবৰ আহে৷ চুলাই মদ পান কৰি এই মৃত্যু ঘটনা হৈছে বুলি ৰাইজে মত প্ৰকাশ কৰি বিক্ষোভ কৰে৷
বিদ্যা ভাৰতী অখিল ভাৰতীয় শিক্ষা সংস্থানৰ ৰাষ্ট্ৰীয় অধ্যক্ষ শ্ৰী ডি. ৰামকৃষ্ণ ৰাওৰ প্ৰেছ বাৰ্তা । অতীতৰ অনুভৱ, বৰ্তমানৰ প্ৰত্যাহ্বান আৰু ভৱিষ্যতৰ আৱশ্যকতাৰ প্ৰতি লক্ষ্য ৰাখি নিৰ্মাণ কৰা হৈছে ৰাষ্ট্ৰীয় শিক্ষা নীতি
যোৱা ছয় বছৰ ধৰি বিভিন্ন শিক্ষাবিদ, বুদ্ধিজীৱী, আলোচক, শৈক্ষিক নেতৃত্ব, প্ৰশাসক তথা শৈক্ষিক জগতৰ অন্যান্য শুভ চিন্তকৰ পৰামৰ্শ, ভৌগোলিক দৃষ্টিৰে প্ৰায় এক লাখ গাঁৱৰ সৈতে কৰা যোগাযোগ, অসংখ্য কৰ্মশালাৰ আয়োজন আৰু আলোচনা-বিলোচনাৰ পাছত বহু প্ৰতীক্ষিত ৰাষ্ট্ৰীয় শিক্ষা নীতি ২০২০ ভাৰত চৰকাৰৰ অনুমোদনৰ পাছত জনসাধাৰণৰ হাতত আহি পৰিছে। নিশ্চিতভাৱে ই এক যুগান্তকাৰী তথা পথ প্ৰদৰ্শনকাৰী তথা প্ৰশংসনীয় পদক্ষেপ। এই ৰাষ্ট্ৰীয় শিক্ষা নীতিয়ে সৰ্বজনস্বীকৃত, একাত্ম, সৰ্বসমাৱেশী তথা উচ্চ মান সম্পন্ন শিক্ষাৰ দিশত এক শক্তিশালী পদক্ষেপ হোৱাৰ লগতে একবিংশ শতিকাৰ বাবে আৱশ্যক হোৱা কৌশল তথা মূল্যবোধ আধাৰিত, মনুষ্য নিৰ্মাণকাৰী পদ্ধতিসমূহক প্ৰযোজ্য কৰাৰ পথ প্ৰশস্ত কৰিব বুলি আশা কৰিব পাৰি। বিদ্যা ভাৰতীয়ে ৰাষ্ট্ৰীয় শিক্ষা নীতি ২০২০ক আন্তৰিকতাৰে স্বাগতম জনোৱাৰ লগতে এই আশাও প্ৰকাশ কৰে যে সাৰ্বজনীন প্ৰচেষ্টা, সহযোগিতা তথা অনুৱৰ্তী ক্ৰিয়াকলাপৰ দ্বাৰা ই নিজৰ উদ্দেশ্যত সফল হ’ব। ৰাষ্ট্ৰীয় শিক্ষা নীতিৰ মুখ্য বিন্দুবিলাকৰ ভিতৰত পঢ়াশলীয়া শিক্ষাৰ কাঠামোৰ আমূল পৰিৱৰ্তন সাধি ৫+৩+৩+৪ লৈ ৰূপান্তৰিত কৰাৰ উদ্দেশ্য হৈছে শিক্ষাক প্ৰাক্ প্ৰাথমিকৰ পৰা উচ্চতৰ মাধ্যমিকলৈকে সাৰ্বজনীন কৰা আৰু ইয়াক বৃত্তিমূলক শিক্ষাৰ লগত সংযুক্ত কৰা।
শিশু পৰিচৰ্যা আৰু শিক্ষা (Early Childhood Care and Education- ECCE) ক ব্যৱস্থিত স্বৰূপ প্ৰদান কৰিলে ই শিক্ষাৰ ভেটি গঢ়ি তুলিব লগতে স্বাস্থ্য শিক্ষা, পুষ্টি, আত্ম নিৰ্ভৰশীলতাৰ কৌশলসমূহৰ বিকাশৰ বাবে খেলৰ মাধ্যমেৰে শিক্ষাৰ যি আৰ্হি প্ৰস্তুত কৰিব, ই দেশৰ ১০ লাখ অঙ্গনবাদী কেন্দ্ৰসমূহৰ জৰিয়তে শিক্ষাৰ লগত যুক্ত হোৱা প্ৰায় ৭ কোটি শিশুক শিক্ষাৰ মূল সুঁতিৰ লগত যুক্ত কৰাত সহায়ক হ’ব।
শিক্ষা সম্পূৰ্ণ নকৰাকৈ বিদ্যালয় এৰা (dropout) শিশুৰ সংখ্যা হ্ৰাস কৰিবলৈ শিক্ষাৰ পৰিসৰৰ বৃদ্ধি ঘটাই তেওঁলোকৰ বাবে শিক্ষাৰ বহুমূখী আনুষ্ঠানিক তথা অনানুষ্ঠানিক বাট মোকলোৱাৰ নতুন ব্যৱস্থা এই শিক্ষা নীতিৰ এক অন্যতম আকৰ্ষণ বুলি কব পাৰি। সেইদৰে, সমান তথা সমাৱেশী শিক্ষাৰ মাধ্যমেৰে আৰ্থিক আৰু সামাজিক ভাৱে পাছপৰা সমাজৰ প্ৰতি বিশেষ দৃষ্টিৰে বিদ্যালয় স্তৰৰ শিক্ষাত দেখা দিয়া বৈষম্য দূৰ কৰাটোও এক উল্লেখযোগ্য পদক্ষেপ।
ভৱিষ্যত জীৱনৰ বাবে প্ৰয়োজন হোৱা কৌশল (skill) আৰু ক্ষমতাৰ বিকাশ, বিদ্যা আহৰণৰ উদ্দেশ্যৰ আধাৰত বিষয়ৰ সামগ্ৰীকতা, বৈজ্ঞানিক চিন্তাধাৰাৰ বিকাশ, ডিজিটেল সাক্ষৰতা তথা বহুভাষীক শিক্ষাৰ প্ৰসাৰৰ জৰিয়তে ভাৰতীয় ভাষাসমূহৰ বিকাশৰ দ্বাৰা ক্ৰিয়া আধাৰিত শিক্ষণৰ মাধ্যমেৰে আজিৰ প্ৰজন্মই মাত্ৰ বৰ্তমানৰ পৰিস্থিতিৰে নহয়, ভৱিষ্যতৰ ভাৰতৰ বাবেও নিজৰ ক্ষমতাৰে বলীয়ান হ’ব পাৰিব।
মূল্যাংকন পদ্ধতিক কেৱল পৰীক্ষা কেন্দ্ৰীক কৰাৰ পৰিৱৰ্তে ছাত্ৰৰ মূল্যাংকন বহুমুখী মানকৰ ওপৰত কৰা সম্পৰ্কে নিৰ্দেশাৱলীত যি পৰিৱৰ্তন হ’ব লগীয়া আছে, ই প্ৰচলিত প্ৰণালীক সহজ আৰু সৰ্বস্পৰ্শী কৰিব। এই নতুনত্বৰ সু পৰিণাম নিশ্চয় পোৱা যাব।
শিক্ষাৰ লগত জড়িত প্ৰায় সকলো ব্যক্তিয়েই শিক্ষক-শিক্ষাত পৰিৱৰ্তনৰ বাবে বাট চাই আছিল। ৰাষ্ট্ৰীয় শিক্ষা নীতি ২০২০ ত এনে বহু উদাহৰণ পোৱা যায় যে অধিক সৰ্বস্পৰ্শী ৰাষ্ট্ৰীয় পাঠ্যক্ৰম সম্ভৱতঃ ২০২১ বৰ্ষৰ পৰাই শিক্ষা ব্যৱস্থাত গুৰুত্বপূৰ্ণ সংশোধন ঘটাব।
উচ্চ শিক্ষাতো বহুতো পৰিৱৰ্তনৰ প্ৰয়োজননীয়তা আছিল। স্নাতক স্তৰত চাৰি বছৰীয়া পাঠ্যক্ৰমত অন্তৰ্ভুক্তিৰ একাধিক বিকল্প দিয়া হৈছে যিটো শিক্ষাৰ্থীসকলৰ বাবে এক সুবিধাজনক বিকল্প হিচাপে পৰিগনিত হ’ব। কেইবাটাও নীতি নিৰ্ধাৰক সংস্থাক একত্ৰীকৰণ কৰি এটাই মাত্ৰ সংস্থালৈ ৰূপান্তৰণ কৰাটো আদৰণীয় পদক্ষেপ। এটা নতুন ৰাষ্ট্ৰীয় অনুসন্ধানৰ মাধ্যমেৰে শৈক্ষিক গৱেষণাৰ বাবে বিভিন্ন ক্ষেত্ৰসমূহৰ একত্ৰীকৰণ আৰু মানদণ্ডৰ বিকাশো আনন্দৰ বিষয়।
শিক্ষা নীতিৰ যি আৰ্হি কালি প্ৰকাশ কৰা হৈছে, তাক দেখি অনুভৱ হৈছে যে অতীজৰ পৰা অভিজ্ঞতা আহৰণ কৰি, বৰ্তমানৰ প্ৰত্যাহ্বানসমূহক বুজি লৈ আৰু ভৱিষ্যতৰ আৱশ্যকতাৰ প্ৰতি লক্ষ্য ৰাখি ইয়াক তৈয়াৰ কৰা হৈছে। শিক্ষা নীতিৰ দ্বাৰাই শিক্ষা জগতৰ আমূল পৰিৱৰ্তনৰ সম্ভাৱনা আশা কৰিব পাৰি। ১৯৬৮ চনৰে পৰা শিক্ষা নীতিৰ সম্পূৰ্ণ বলবৎ কৰাটো এক ডাঙৰ প্ৰত্যাহ্বান আছিল। বিদ্যা ভাৰতীয়ে এই ৰাষ্ট্ৰীয় শিক্ষা নীতিৰ প্ৰভাৱী ক্ৰিয়ান্বয়নৰ ক্ষেত্ৰত অধিক সহযোগ কৰাৰ আশ্বাস প্ৰদান কৰিছে তথা সকলো সংশ্লিষ্ট সংস্থান, শিক্ষাবিদ, বুদ্ধিজীৱী, শৈক্ষিক চিন্তক, গৱেষক, প্ৰশাসকক ইয়াৰ প্ৰভাৱী কাৰ্যকৰীকৰণৰ বাবে যাৱতীয় সহযোগিতা আগবঢ়াবলৈ অনুৰোধ কৰিছে। চৰকাৰৰ দ্বাৰা ৰাষ্ট্ৰীয় হিতৰ বাবে গ্ৰহণ কৰা এই নতুন ৰাষ্ট্ৰীয় শিক্ষা নীতি ২০২০ ৰূপী সৎ প্ৰচেষ্টাত সহায়-সহযোগিতা আগবঢ়োৱা সকলোকে পুনৰ বাৰ অভিনন্দন জ্ঞাপন কৰিছো।
শ্ৰীযুত ডি. ৰামাকৃষ্ণ ৰাও
অখিল ভাৰতীয় অধ্যক্ষ
চীনা এপৰ পাছত ৰঙীন টিভি আমদানিত নিষেধাজ্ঞা ভাৰতৰ
দৈনন্দিন বাৰ্তা ডেস্ক : চীনৰ বিৰুদ্ধে পুনৰ পদক্ষেপ ল’লে ভাৰতে৷ ইয়াৰ আগতে ভাৰতে চীনৰ এপ নিষিদ্ধ কৰিছিল৷ এইবাৰ চীনৰ ৰঙীন টেলিভিছন আমদানিৰ ওপৰত বিধিনিষেধ আৰোপ কৰিলে ভাৰতে৷ ইয়াৰ লগে লগে চীনৰ ব্যৱসায়ৰ ওপৰত প্ৰভাৱ পৰাটো নিশ্চিত হৈ পৰিছে৷ তদুপৰি বিদেশী পণ্য আমদানি কমাই ভাৰতীয় পণ্যৰ উৎপাদন আৰু চাহিদা বাঢ়িব৷ তাৰ লগতে প্ৰধানমন্ত্ৰী নৰেন্দ্ৰ মোডীৰ স্বপ্ন আত্মনির্ভৰ ভাৰত হোৱাত সফল হ’ব৷ ডিৰেক্টৰ জেনেৰেল অব ফৰেইন ট্ৰেড (ডিজিএফটি)ৰ এক বিজ্ঞপ্তিত কোৱা হৈছে যে ৰঙীন টিভি আমদানি নীতি সংশোধন কৰা হৈছে৷ আগতে টেলিভিছন আমদানিৰ বাবে কোনো লাইচেন্সৰ প্ৰয়োজন নাছিল৷ এইবাৰ ডিজিএফটিৰ পৰা এই বিষয়ত অনুমতি ল’ব লাগিব৷ অৱশ্যে কিহৰ ভিত্তিত অনুমতি দিয়া হ’ব সেয়া স্পষ্ট নহয়৷ ৩৬ ইঞ্চিৰ পৰা ১০৫ ইঞ্চি স্ক্ৰীণৰ ৰঙীন টিভিৰ ক্ষেত্ৰত এই নিষেধাজ্ঞা জাৰি কৰা হৈছে৷ এই বিধিনিষেধৰ আওতাত আছে ৬৩ চেণ্টিমিটাৰৰ তলৰ এলচিডি টিভিও৷ উল্লেখ্য যে ভাৰতে সকলোতকৈ বেছি ৰঙীন টিভি চীনৰ পৰা আমদানি কৰে৷ ২০১৯-২০ বিত্তীয় বছৰত ৭৮১ মিলিয়ন ডলাৰৰ ৰঙীন টিভি ভাৰতে আমদানি কৰিছিল৷ চীনৰ পৰা ২৯৩ মিলিয়ন ডলাৰৰ ৰঙীন টিভি আমদানি কৰিছিল ৷
আইপিএল : আমিৰশ্বাহিত ক্ৰিকেটাৰে মানিব লগা নিয়ম প্ৰকাশ
দৈনন্দিন বাৰ্তা ডেস্ক : কেন্দ্ৰীয় চৰকাৰৰ চূড়ান্ত সিদ্ধান্ত দিবলৈ বাকী যদিও আসন্ন আইপিএলৰ বাবে সকলো কথাই হৈ গৈছে৷ সংযুক্ত আৰৱ আমিৰশ্বাহিত অহা ১৯ ছেপ্টেম্বৰৰ পৰা আৰম্ভ হ’ব এই মেগা টুৰ্ণামেণ্ট৷ ফাইনেল খেলখন ৮ বা ১০ ছেপ্টেম্বৰত হ’ব৷ দেওবাৰে আইপিএলৰ গভৰ্ণিং কাউন্সিলৰ সভাত সূচীসহ বাকী বিষয় চূড়ান্ত হোৱাৰ কথা৷ আইপিএলৰ সভাপতি ব্ৰিজেছ পেটেলে জনোৱা মতে এই মেগা টুৰ্ণামেণ্ট ডুবাই, শ্বাৰজাহ আৰু আবুধাবিত অনুষ্ঠিত হ’ব৷ ৮টা ফ্ৰেঞ্চাইজিৰ লগত শনিবাৰে সভা হোৱাৰ পাছত কেতবোৰ কথা পৰিষ্কাৰ হ’ব৷ ইয়াত সবাতোকৈ ডাঙৰ বিষয় হ’ল ক্ৰিকেটাৰসকলৰ স্বাস্থ্য৷ যাৱতীয় স্বাস্থ্য বিধি মানিয়ে আইপিএল আয়োজন কৰা হ’ব৷ জানিব পৰা মতে আঠটা ফ্ৰেঞ্চাইজিয়ে আমিৰশ্বাহিত যাৱতীয় সুৰক্ষা খুঁটিনাটি মাৰি চাব৷ ক্ৰিকেটাৰসকলৰ নিৰাপত্তাৰ বাবে কেতবোৰ বিষয়ত গুৰুত্ব আৰোপ কৰা হৈছে৷ তাৰ ভিতৰত আছে কোৱাৰেণ্টাইন বিধি৷ ডুবাইৰ বৰ্তমান স্বাস্থ্যবিধি মতে ক’ভিড নিগেটিভ ৰিপৰ্ট দেখুৱাব পাৰিলে কোৱাৰেণ্টাইনত থকাৰ প্ৰয়োজন নাই৷ কিন্তু ৰিপৰ্ট নাথাকিলে পৰীক্ষা হ’ব৷ আনহাতে ক্ৰিকেটাৰসকলে দেশ এৰাৰ আগতে দুবাৰ ক’ৰোনা পৰীক্ষা হ’ব৷ ডুবাই পোৱাৰ পাছত আকৌ দুবাৰ পৰীক্ষা হ’ব৷ ক্ৰিকেটাৰৰ উপৰি ছাপৰ্ট ষ্টাফ আৰু আনসকলৰ ৰিপৰ্ট বাধ্যতামূলক৷ তদুপৰি প্ৰতিটো ফ্ৰেঞ্চাইজিয়ে তেওঁলোকৰ ক্ৰিকেটাৰৰ বাবে জৈৱ সুৰক্ষা বলয় তৈয়াৰ কৰিব লাগিব৷ সীমিত সংখ্যক ব্যক্তিৰ বাদে আন কাৰো লগত দেখা বা কথা পতা নিষিদ্ধ৷ ইয়াৰ উপৰি যিসকলে আইপিএল খেলিবলৈ আমিৰশ্বাহি যাব, তেওঁলোকে প্ৰত্যেকে ডিএক্সবি এপ ডাউনলড কৰি ল’ব লাগিব৷ ই এটা আৰোগ্য সেতু এপৰ দৰে৷ ইয়াত সামাজিক দূৰত্ব বিধিৰ উপৰি যাৱতীয় নিয়ম দেখুওৱা থাকিব৷ ফ্ৰেঞ্চাইজিবোৰে নিজেই হোটেলৰ ব্যৱস্থা কৰিব লাগিব৷ ভাৰতীয় ক্ৰিকেট ব’ৰ্ডে এই ক্ষেত্ৰত ফ্ৰেঞ্চাইজিবোৰক সহায় কৰিব৷ তদুপৰি ড্ৰেচিং ৰোমত একেলগে ১৫ জনৰ বেছি ক্ৰিকেটাৰ থাকিব নোৱাৰিব৷
লকডাউন : মদ নাপাই ছেনিটাইজাৰ পান কৰি মৃত্যু ৯
দৈনন্দিন বাৰ্তা ডেস্ক : লকডাউনৰ বাবে মদৰ দোকান বন্ধ৷ সেয়ে মদ্যপান কৰিবলৈ নাপায় এলকহলযুক্ত ছেনিটাইজাৰ পান কৰে৷ ফলত মৃত্যুৰ মুখত পৰে ৯জনকৈ লোক৷ উল্লেখ্য যে ক’ৰোনা সংক্ৰমণৰ বাবে অন্ধ্ৰপ্ৰদেশত যোৱা ১৮ জুলাইৰ পৰা লকডাউন ১৪ দিনৰ বাবে বঢ়াই দিয়া হয়৷ তাৰ মাজতে ৰাজ্যখনৰ কুৰিছেদু এলেকাত এই ঘটনাটো সংঘটিত হয়৷ আৰক্ষীৰ সূত্ৰে জানিব পৰা মতে লকডাউনৰ বাবে কুৰিছেদু আৰু কাষৰীয়া এলেকাৰ সকলো দোকান বন্ধ আছিল৷ বন্ধ আছিল মদৰ দোকান৷ সেয়ে সেই ৯ জন লোকে ছেনিটাইজাৰকে পান কৰে৷ এই নিহত লোককেইজনৰ মাজত আছে ২৫ বছৰীয়া শ্ৰীনু, ৩৭ বছৰীয়া বি তিৰুপাতাইয়া, ৬০ বছৰীয়া জি ৰামিৰেড্ডী, ২৯ বছৰীয়া কে ৰামনাইয়া, ৬৫ বছৰীয়া ৰামনাইয়া, ৬৫ বছৰীয়া ৰাজিৰেড্ডী, ৪০ বছৰীয়া বাবু, ৪৫ বছৰীয়া চাৰ্লচ আৰু ৪৭ বছৰীয়া অগাষ্টাইন৷ মৃত্যু হোৱা সকলৰ ভিতৰত তিনিজন পেশাত ভিক্ষাৰী বুলি জানিব পৰা গৈছে৷ মৃত্যুৰ হোৱা লোককেইজনৰ হাতত ছেনিটাইজাৰ আছিল বুলি প্ৰকাশ ৷