কলিয়াবৰ
কলিয়াবৰৰ জখলাবন্ধা আৰক্ষী নিৱেশৰ অন্তৰ্গত ন-জানৰ পৰা দুজন ড্ৰাগ্ছ সৰবৰাহকাৰী গ্ৰেপ্তাৰ কৰে। বৃহস্পতিবাৰে নিশা এক গোপন সূত্ৰৰ পম খেদি বাগৰী টহলদাৰী চকীৰ অন্তৰ্গত কুঠৰীৰ ন-জানৰ পৰা চাৰিটা সন্দেযুক্ত হিৰ’ইনৰ টেমা জব্দ কৰে আৰক্ষীয়ে। গ্ৰেপ্তাৰ কৰা ড্ৰাগছ্ সৰবৰাহকাৰী দুজন হ’ল ক্ৰমে কামালুদ্দিন আৰু ইণ্টাজুল আলিক ৩৭ নং ৰাষ্ট্ৰীয় পথত এ এছ ০২ বি ০৪৮৩ বাহনখনৰ পৰাই আৰক্ষীয়ে আটক কৰি সোধা পোচাৰ অন্তত গ্ৰেপ্তাৰ কৰে।
কলিয়াবৰ
ক’ৰোনা সংক্ৰমণ প্ৰতিহত কৰিবলৈ সমগ্ৰ ৰাষ্ট্ৰতে বলৱৎ চতুৰ্থ পৰ্যায়ৰ লকডাউন। এই জটিল সময়ছোৱাত কলিয়াবৰ সমষ্টিৰ প্ৰতিটো পৰিয়ালৰ কাষত স্থানীয় বিধায়ক তথা মন্ত্ৰী কেশৱ মহন্ত। অগপ দলীয় কৰ্মীক লগত লৈ পদুলিয়ে পদুলিয়ে খাদ্য তথা অত্যাৱশ্যকীয় সামগ্ৰী বিতৰণ কৰিছে। ধাৰাবাহিকভাৱে যোৱা এঘাৰ দিন এই বিতৰণ প্ৰক্ৰিয়া চলি থকাৰ পিছত শুকুৰবাৰে দ্বাদশ দিনত ভৰি দিলে। শুকুৰবাৰে বেঙেনাআটি, বৰুৱাআটি গাঁৱত সাহায্য সামগ্ৰী বিতৰণ কৰে। উপস্থিত গাঁওবাসীক ক’ৰোনা সন্ত্ৰাসৰ বিৰুদ্ধে ৰাইজক সজাগ হৈ একত্ৰিতভাৱে যুঁজিবলৈ আহ্বান জনায়৷ এই বিতৰণকালত মন্ত্ৰী কেশৱ মহন্তই ভূৰবন্ধাৰ পৰা আমবাগান গড়কাপ্তানী পথ নিৰ্মাণৰ শুভাৰম্ভণী কৰে।
* অসমে বিচাৰে দুসপ্তাহৰ লকডাউন বৃদ্ধি৷
* অসমত লকডাউনকালীন দৈনিক লোকচান এহেজাৰ কোটি৷
* বহিৰাজ্যৰ পৰা অহা শ্ৰমিক-কৰ্মী হ’ব অসমৰ স্কীল ফৰ্চ, বোজাৰ পৰিবৰ্তে বহিংৰাজ্যৰ পৰা অহা শ্ৰমিক-কৰ্মী হ’ব অসমৰ স্কীল ফৰ্চ৷
* বোজাৰ পৰিবৰ্তে সম্পদ হ’ব৷ অসমে দিব নিযুক্তি৷
* সাংবাদিক সকলে বহু ৰিক্স লৈছে ক’ৰোনা ভাইৰাছৰ বাতৰি পৰিবেশনৰ কৰিছে৷ তাৰ বাবে মই ধন্যবাদ, কৃতজ্ঞতা জনাইছো। সকলো সুৰক্ষিত থাকক৷
লংকা
ক’ভিড-১৯ মহামাৰীৰ আতংকৰ মাজতে সাংবাদিকসকলে নিজৰ জীৱন তুচ্ছ কৰি হ’লেও নিজৰ তথা পৰিয়ালৰ কথা নাভাবি প্ৰতি মুহূৰ্তৰ খবৰ জনসাধাৰণৰ মাজলৈ আগবঢ়াই নিয়ে। তদুপৰি আৰক্ষী সকলেও দিনে নিশাই সেৱা আগবঢ়াই আহিছে। সেয়ে আৰক্ষী আৰু সাংবাদিকসকলক উৎসাহ যোগোৱাৰ বাবে শুকুৰবাৰে ঔমপ্ৰকাশ প্ৰমিলা দেৱী সোঁৱৰণী টাষ্টৰ উদ্যোগত লংকা আৰক্ষী থানাৰ চৌহদত টাষ্টৰ অধ্যক্ষ ৰোহিত আগৰৱালাই মাস্ক আৰু হেণ্ড ছেনিটাইজাৰ বিতৰণ কৰে। লংকাৰ প্ৰায় ২০ গৰাকী সাংবাদিক আৰু সকলো আৰক্ষীৰ হৈ লংকা আৰক্ষী থানাৰ ভাঃ বিষয়া বিশ্বজোতি শৰ্মাক মাস্ক আৰু হেণ্ড ছেনিটাইজাৰ বিতৰণ কৰি ৰোহিত আগৰৱালাই কয় যে সাংবাদিক আৰু আৰক্ষীসকলৰ কৰ্মৰ প্ৰতি শ্ৰদ্ধা আৰু সন্মান জনাই তেওঁলোকক উৎসাহ যোগোৱাৰ বাবেই তেও এই কাৰ্যসূচী হাতত লৈছে।
দৰং
হিন্দু-মুছলিমৰ সমন্বয় ক্ষেত্ৰত পৰিণত হ’ল দৰঙৰ ঐতিহ্যমণ্ডিত খটৰা সত্ৰ৷ এজন মুছলমান যুৱক ঐতিহাসিক খটৰা সত্ৰত উপস্থিত হৈ সত্ৰখনৰ ভকতসকলৰ খবৰ লোৱাৰ উপৰি ভকতসকলৰ ওচৰত আঁঠু লৈ গ্ৰহণ কৰিলে আশীৰ্বাদ৷ যুৱ সমাজ কৰ্মী চৈয়দ আব্দুল্লা নামৰ যুৱকজনে ভকতসকলক যোগান ধৰিলে অত্যাৱশ্যকীয় সামগ্ৰী৷ যিহেতু লকডাউনৰ সময়ৰে পৰা খটৰা সত্ৰ পৰিচালনা সমিতিয়ে দৰ্শনাৰ্থীৰ বাবে বন্ধ ৰাখিছে সত্ৰ দৰ্শনৰ বাবে দুৱাৰ৷ তাৰ পৰিপেক্ষিতত সত্ৰ পৰিচালনাৰ দায়িত্বত থকা ভকতসকলৰ যথেষ্ট অসুবিধাৰ সন্মুখীন হ’বলগীয়া হৈছে ৷ ৪৫০ বছৰ পূৰ্ৱে মাধৱদেৱৰ প্ৰিয় শিষ্য লেচাকোনীয়া গোৱিন্দ আতৈ প্ৰতিষ্ঠা কৰা সত্ৰখনত সমন্বয়ৰ বাৰ্তা কঢ়িয়াই আছে পূৰ্বৰে পৰা৷ একে অনুষ্ঠানতে ভকতসকলৰ চৰণত সেৱা জনাই আশীৰ্বাদ গ্ৰহণ কৰাৰ উপৰি ভকতসকলক আহাৰ যোগান ধৰে যুৱ সমাজ কৰ্মী কন্দৰ্প কলিতাই৷ বিশ্বব্যাপী সংহাৰী ৰূপ লোৱা ক’ভিড-১৯ত যে অকল মুছলমান লোকে আক্ৰান্ত হৈছে সেয়া নহয়৷ ব্যাধিয়ে নাচায় জাতি নাচায় ধৰ্ম৷ সেয়ে শংকৰ আজানৰ দেশত জাতি ধৰ্ম পাহৰি আৰ্তজনক সহায় কৰিবলৈ অহা চৈয়দ আব্দুল্লাই দেখুওৱা আদৰ্শই হিন্দু-মুছলিমৰ সমন্বয়ৰ বাৰ্তা পুনৰ প্ৰতিফলন হ’ল খটৰা সত্ৰত৷ অনুষ্ঠানত উপস্থিত থাকে খটৰা সত্ৰৰ সভাপতি যাদৱ মহন্ত আৰু সত্য বৈশ্য ৷
নাজিৰা
দেশজুৰি চলি থকা লকডাউলৰ মাজতে নাজিৰা জলসম্পদ উপ সংমণ্ডল কাৰ্যালয়ত মদৰ ৰাগিত মাতাল বিষয়াৰ মাজত সংঘটিত এক চুৰিকাঘাটৰ ঘটনাই নাজিৰাৰ সৰ্বত্ৰে চাঞ্চল্যৰ সৃষ্টি কৰিছ। কাৰ্যালয়টোৰ চৌহদতে কাৰ্যালয়ৰ মুৰব্বী উপসংমণ্ডল বিষয়া তথা অভিযন্তা শান্তনু বৰাক পৰহি নিশা বিভাগটোৰে কনিষ্ঠ অভিযন্তা অৰুণ চন্দ্ৰ বৰুৱাই উপৰ্যুপৰি চুৰিকাঘাট কৰে। যাৰ ফলত গুৰুতৰভাৱে আহত হোৱা বিষয়াজন ততালিকে চিকিৎসালয়ত ভৰ্তি কৰোৱা হয়৷ জানিব পৰা মতে শিমলুগুৰিস্থিত পৰিদৰ্শন বাংলাত থকা নাজিৰা জলসম্পদ বিভাগৰ উপ-সংমণ্ডল কাৰ্যালয়ত যোৱা নিশা কোনো বিষয়লৈ দুয়োজন বিষয়াৰ মাজত বাক-বিতণ্ডাৰ সৃষ্টি হয়। এই বাক -বিতণ্ডাই ক্ৰমান্বয়ে তীব্ৰ ৰূপ ধাৰণ কৰাত কনিষ্ঠ অভিযন্তাজনে বিষয়া শান্তনু বৰাক চুৰিৰে আক্ৰমণ কৰে। এই ঘটনাৰ সময়ত আন এজন ব্যক্তিও উপস্থিত আছিল বুলি জানিব পৰা গৈছে। এই চাঞ্চল্যকৰ ঘটনা সংঘটিত কৰি কনিষ্ঠ অভিযন্তাজনে কাৰ্যালয়ৰ পৰা পলায়ন কৰে৷ ইফালে জলসম্পদ উপসংমণ্ডলৰ কাৰ্যালয়ত সংঘটিত এই ঘটনাৰ বিষয়ে জানিব পাৰি ঘটনাস্থলীত স্থানীয় আৰক্ষী উপস্থিত হয় আৰু বিষয়াজনক চিকিৎসালয়ত ভৰ্তি কৰে। অন্যহাতে কাৰ্যালয়টোৰ চৌহদত থকা বিভাগীয় বলেৰ’ গাড়ীখনৰ ভিতৰত তেজৰ চেকুৰা প্ৰতক্ষ্য কৰাৰ লগতে সুৰা সেৱন কৰা গিলাচ উদ্ধাৰ হৈছে৷ ইফালে বৰ্তমান ডিব্ৰুগড়ৰ এখন চিকিৎসালয়ত চিকিৎসাধীন হৈ থকা শান্তনু বৰা সংকটমুক্ত বুলি জানিব পৰা গৈছে। আৰক্ষীয়ে কাৰ্যালয়ত উপস্থিত হৈ সমগ্ৰ ঘটনাৰ তদন্ত অব্যাহত ৰাখিছে৷
নাজিৰা
সমগ্ৰ বিশ্ব তথা ভাৰতবৰ্ষত এতিয়া ক’ৰোনা ভাইৰাছৰ আতংকময় পৰিস্থিতিৰ সময়ত নৰেন্দ্ৰ মোডী চৰকাৰে ৰাজহুৱা খণ্ডৰ বৃহৎ উদ্যোগীক প্ৰতিষ্ঠান তেল আৰু প্ৰাকৃতিক গেছ নিগম (অ’ এন জি চি)ৰ চি এছ আৰ অৰ্থাৎ সামাজিক দায়বদ্ধতা আঁচনিখন চিৰদিনৰ বাবে বন্ধ কৰি এই আঁচনিৰ পুঁজি পি এম কেয়াৰ্ছ ফাণ্ড অৰ্থাৎ প্ৰধানমন্ত্ৰীৰ সাহায্য পুঁঁজিলৈ সংগৃহীত কৰাৰ সিদ্ধান্ত গ্ৰহণ কৰিছে। কেন্দ্ৰীয় চৰকাৰৰ ক’ৰ্পৰেট মন্ত্ৰ্যালয়ৰ দ্বাৰা জাৰি কৰা জাননীত এই কথা স্পষ্টভাৱে প্ৰকাশ পাইছে যে ৰাজ্য চৰকাৰৰ মুখ্যমন্ত্ৰীৰ সাহায্য পুঁঁজি অথবা ৰাজ্যিক সাহায্য পুঁজি আদিলৈ বন্ধ হ’ব ৰাজ্যখনৰ ৰাজহুৱা খণ্ডৰ উদ্যোগীক প্ৰতিষ্ঠানসমূহৰ পৰা সম্পাদন হ’বলগীয়া সামাজিক দায়বদ্ধতা উন্নয়ন আঁঁচনিৰ বিপৰীতে পুঁজিৰ আৱণ্টন। উল্লেখযোগ্য যে কেন্দ্ৰীয় ক’ৰ্পৰেট মন্ত্ৰ্যালয়ৰ পৰা প্ৰকাশিত ফাইন নং চি এছ আৰ ১-৪-২০২০ চি এছ আৰ এম চি এ আৰু জাননী নং ১৫-২০২০ৰ মতে প্ৰকাশ পোৱা সিদ্ধান্ত মৰ্মে ক’ৰ্পৰেটসমূহে ক’ৰোনা প্ৰতিৰোধী যুঁজৰ বাবে মুখ্যমন্ত্ৰীৰ সাহায্য পুঁঁজিলৈ অথবা ৰাজ্যিক সাহায্য পুঁঁজিলৈ আগবঢ়াই অহা আৰ্থিক বৰঙণি ক’ৰ্পৰেটসমূহৰ সামাজিক দায়বদ্ধতা শিতানৰ পুঁজি হিচাপে গণ্য কৰা নহ’ব। ইয়াৰ পৰীৱৰ্তে কেন্দ্ৰীয় চৰকাৰে নতুনকৈ মুকলি কৰা পি এম কেয়াৰ্ছ ফাণ্ডতহে এই পুঁজি জমা হ’ব আৰু এই পুঁজিকহে কেন্দ্ৰীয় চৰকাৰে চি এছ আৰ হিচাপে গণ্য কৰিব৷ জাননীখনৰ পৰা এইটো কথা স্পষ্ট হৈ পৰিছে যে ক’ৰোনাৰ গইনা লৈ কেন্দ্ৰীয় চৰকাৰে দীৰ্ঘম্যাদী কালৰ বাবে ৰাজহুৱা খণ্ডৰ উদ্যোগ-প্ৰতিষ্ঠানৰ পৰা সামাজিক দায়বদ্ধতা উন্নয়ন আঁচনিৰ সমুদায় পুঁজি পি এম কেয়াৰ্ছ ফাণ্ডলৈ সংগৃহীত কৰিব আৰু ৰাজ্য চৰকাৰে এই আঁচনিৰ পৰা বঞ্চিত হ’ব৷ ইতিমধ্যে প্ৰকাশ পাইছে আৰু অভিযোগ উত্থাপিত হৈছে যে পি এম কেয়াৰ্ছ ফাণ্ডত সংগৃহীত হ’বলগীয়া এই পুঁঁজিৰ কোনো নীতি-নিয়মৰ বিধিগত সিদ্ধান্ত প্ৰৱৰ্তিত হোৱা নাই আৰু এই পুঁজি কেগৰ হিচাপ পৰীক্ষাৰ আওতাৰ বাহিৰত থাকিব৷ উল্লেখযোগ্য যে অসমৰ ৰাজহুৱা খণ্ডৰ বৃহৎ প্ৰতিষ্ঠান হ’ল অ’এন জি চি। ৰাজহুৱা খণ্ডৰ উদ্যোগ প্ৰতিষ্ঠান হিচাপে অ’এন জি চিৰ স্থানীয়ভাৱে আৰ্থ সামাজিক উন্নয়নৰ ক্ষেত্ৰত দায়বদ্ধতা আছে আৰু মুখ্যমন্ত্ৰী সাহায্য পুজি অথবা ৰাজ্যিক দূৰ্যোগ পুজিলৈ সাহায্য হিচাপে চি এছ আৰ শিতানত প্ৰতি সময়তে বৃহৎ পৰিমাণৰ পুঁজি যোগান ধৰি আহিছে। কিন্তু এতিয়াৰ পৰা চি এছ আৰ শিতানত এই পুঁজি স্থানীয়ভাৱে সামাজিক উন্নয়নত ব্যৱহাৰ আৰু মুখ্যমন্ত্ৰীৰ পুঁজিৰ লগতে আন আন আঁচনিত ব্যয় কৰিব পৰাকৈ সাহায্য আগবঢ়োৱাত অ’এনজিচিৰ পথ বন্ধ হ’ল। লগতে মুখ্যমন্ত্ৰীৰ সাহায্য পুঁজিলৈ চি এছ আৰ পুঁজি আগবঢ়োৰ পথ বন্ধ হ’ল অ’এনজিচিৰ। এই খবৰ সদৰী হোৱাৰ লগে লগে জাঙুৰ খাই উঠিছে বিভিন্ন জাতী-জনগোষ্ঠীয় সামজিক সংগঠন। গৰিষ্ঠ সংখ্যক সংগঠনে কেন্দ্ৰীয় চৰকাৰৰ এনে সিদ্ধান্ত হঠকাৰী বুলি অভিহিত কৰি এনে সিদ্ধান্ত শীঘ্ৰে প্ৰত্যাহাৰ নকৰিলে কেন্দ্ৰীয় চৰকাৰৰ বিৰুদ্ধে ৰণডংকা সূচনা কৰি গণ আন্দোলন গঢ়ি তুলিবলৈ বাধ্য হ’ব বুলি সঁকীয়াই দিছে বিভিন্ন জাতীয়-জনগোষ্ঠীয় সামাজিক সংগঠনে৷Attachments area
টীয়ক
বিশ্ব ত্ৰাস ক’ৰোনাৰ প্ৰভাৱত আজি সমগ্ৰ বিশ্ব দিশহাৰা দেশে দেশে গৃহবন্দীসকলো দেশৰ শিক্ষা ব্যৱস্থা স্থবিৰ কৰি দেশৰ সকলো শিক্ষানুষ্ঠান বন্ধ তাৰ মাজতে অসমৰ শৈক্ষিক নগৰী হিচাপে পৰিচিত যোৰহাট জিলাৰ টীয়কৰ অন্যতম অগ্ৰণী শিক্ষা অনুস্থান ৰেণু বড়া মেমৰিয়েল একাডেমীৰ দশম বাৰ্ষিক প্ৰতিষ্ঠা দিৱস শুকুৰবাৰে অনুষ্টুপীয়াকৈ পালন কৰা হয়। চৰকাৰী সকলো নীতি নিৰ্দেশনা অৱলম্বন কৰি কনিষ্ঠ মহাবিদ্যালয়খনৰ অধ্যক্ষ কুলধৰ বৰাই পতাকা উত্তোলন আৰু তাৰ পাছত স্মৃতি তপৰ্ণ কৰে সঞ্চালক প্ৰাণ কমল বড়াই। উক্ত কাৰ্যসূচীত মহাবিদ্যালয়ৰ দাঁতিকাষৰীয়া কেইজন মান প্ৰাক্তন ছাত্ৰ-ছাত্ৰী তথা শিক্ষক উপস্থিত থাকে আৰু সকলোকে চৰকাৰী নিৰ্দেশনা তথা সামাজিক দূৰত্ব মানি চলিবলৈ আহ্বান জনাই সঞ্চালকগৰাকীয়ে।
নাজিৰা
ক’ভিড-১৯ ক’ৰোনা ভাইৰাছৰ আতংক অব্যাহত থকাৰ সময়তে বহিঃৰাজ্যত থকা কৰ্মৰত হাজাৰ হাজাৰ লোক ইতিমধ্যে অসমত আহি উপস্থিত হৈছেহি আৰু শিৱসাগৰ জিলাখনৰ মুঠ ১০১৫ জন লোক বৃহস্পতিবাৰে সন্ধিয়া ৰাজধানী এক্সপ্ৰেছ যোগে দিল্লীৰ পৰা ডিব্ৰুগড়ত উপস্থিত হোৱাৰ পিছতেই অসম ৰাজ্যিক পৰিবহণ নিগমৰ বাছত এগৰাকী দণ্ডাধীশৰ নেতৃত্বত ডিব্ৰুগড়ৰ পৰা শিৱসাগৰলৈ অনা হয়। এইসকলৰ শিৱসাগৰ জিলা খনত ১৮ টা কুৱাৰেণ্টাইন চেণ্টাৰত ৰখাৰ ব্যৱস্থা কৰা হৈছে আৰু চেণ্টাৰসমূহত ১০১৫খন বিছনা সাজু কৰি তোলা হৈছে৷ ইয়াৰে সৰ্বাধিক নাজিৰা বিধান সভা সমষ্টিত ৭ টা কুৱাৰেণ্টাইন চেণ্টাৰত ২৯৯ জন লোকক ৰখাৰ ব্যৱস্থা কৰিছে নাজিৰা মহকুমা প্ৰশাসনে৷ নাজিৰা মহকুমাটোৰ গড়গাঁও মহাবিদ্যালয়ৰ অস্থায়ী কুৱাৰেণ্টাইন চেণ্টাৰত সৰ্বাধিক ১০০ জন লোকৰ বাবে, নাজিৰা চকীমুখস্থ জৱাহৰ নৱোদয় বিদ্যালয়ৰ চেণ্টাৰত ৬৪ জন, নাজিৰা মহাবিদ্যালয়ৰ চেণ্টাৰত ৩০ জন, নাজিৰা উচ্চতৰ মাধ্যমিক বহুমুখী বিদ্যালয়ৰ চেণ্টাৰত ৪০ জন, শ্ৰী শ্ৰী গোবৰৰ্ধনধাৰী গো-শালা চেণ্টাৰত ১৫ জন, গেলেকী মহাবিদ্যালয়ৰ চেণ্টাৰত ৩০ জন, গেলেকী ত্ৰিবেণী হাইস্কুল চেণ্টাৰত ২০ জনকে ধৰি নাজিৰা মহকুমাৰ ৭ টা কুৱাৰেণ্টাইন চেণ্টাৰত ২৯৯ জন বহিঃৰাজ্যত কৰ্মৰত থকা আৰু ইতিমধ্যে গৃহাভিমুখে অহা লোকক কুৱাৰেণ্টাইন কৰি ৰখাৰ ব্যৱস্থা কৰা হৈছে। ইতিমধ্যে যোৱা নিশা গড়গাঁও মহাবিদ্যালয় কুৱাৰেণ্টাইন চেণ্টাৰত এজনক ৰখা হৈছে। উল্লেখযোগ্য যে থাওৰা বিধান সভা সমষ্টিৰ ডিমৌ আই টি আই কুৱাৰেণ্টাইন চেণ্টাৰত ৭৬ জন, বকতা নেমুগুৰী চেণ্টাৰত ৪০ জন, দেওপানী হাইস্কুল চেণ্টাৰত ৪০ জন লোকক ৰখাৰ ব্যৱস্থা কৰা হৈছে। আমগুৰি বিধান সভা সমষ্টিৰ জাঁজী হেমনাথ শৰ্মা মহাবিদ্যালয়ৰ চেণ্টাৰত ১৫ জন, হেমচন্দ্ৰ গোস্বামী উচ্চতৰ মাধ্যমিক বিদ্যালয়ৰ চেণ্টাৰত ৫০ জন আৰু আমগুৰি মহাবিদ্যালয়ৰ চেণ্টাৰত ৭০ জন লোকক কুৱাৰেণ্টাইন কৰি ৰখাৰ ব্যৱস্থা কৰা হৈছে। তেনেকৈ শিৱসাগৰ বিধান সভা সমষ্টিৰ আৰৱান মডেল হস্পিটেল কুৱাৰেণ্টাইন চেণ্টাৰত ৪০ জন, এছ আই আৰ ডিত ২৫ জন, আৰ জি পেট্ৰলিয়াম ইনষ্টিটিউট চেণ্টাৰত ১০ জন, শিৱসাগৰ ছোৱালী মহাবিদ্যালয়ৰ চেণ্টাৰত ১০০ জন, পিয়লি ফুকন ইনড’ৰ ষ্টেডিয়াম চেণ্টাৰত ৫০ জন লোকক কুৱাৰেণ্টাইন কৰি ৰখাৰ ব্যৱস্থা গ্ৰহণ কৰিছে শিৱসাগৰ জিলা প্ৰশাসনে। উল্লেখযোগ্য যে বহিঃৰাজ্যত কৰ্মৰত এইসকল লোকক কুৱাৰেণ্টাইন চেণ্টাৰত চিকিৎসক, স্বাস্থ্য কৰ্মচাৰীসকলৰ দ্বাৰা স্বাস্থ্য পৰীক্ষা কৰাৰ পিছতহে সঠিক সিদ্ধান্ত লোৱা হ’ব তেওঁলোকক কুৱাৰেণ্টাইন চেণ্টাৰত ৰখা হ’বনে অথবা নিজ গৃহলৈ পঠাই হোম কুৱাৰেণ্টাইন কৰি ৰখা হ’ব ৷
লংকা
মহামাৰী ক’ৰোনাই সমগ্ৰ দেশতে তীব্র ৰূপ ধাৰণ কৰাৰ সময়তে গ্ৰাম্য উন্নয়নৰ সকলো আঁচনি সফলতাৰে ৰূপায়ণ কৰি যাতে গ্ৰাম্য দুখীয়া জনসাধাৰণক প্ৰকৃতাৰ্থত সহায় কৰাৰ লগতে প্ৰত্যাহ্বানৰ সন্মুখীন হোৱা ৰাজ্যৰ অৰ্থনৈতিক পৰিকাঠামো সৱল ৰূপত ধৰি ৰাখিবলৈ গ্ৰামোন্নয়ন বিভাগৰ সকলো বিষয়া-কৰ্মচাৰীক নিৰ্দেশ প্ৰদান কৰে পঞ্চায়ত আৰু গ্ৰামোন্নয়ন মন্ত্ৰী নৱ কুমাৰ দলেয়ে। হোজাই জিলাত গ্ৰামোন্নয়ন আঁচনিসমূহৰ ৰূপায়ণৰ অগ্ৰগতিৰ বুজ ল’বলৈ বৃহস্পতিবাৰে উপস্থিত হৈ উপায়ুক্তৰ সভাকক্ষত মন্ত্ৰী গৰাকীয়ে বিভাগীয় বিষয়াসকলৰ সৈতে এক সভাত মিলিত হৈ আঁচনি ৰূপায়ণৰ ক্ষেত্ৰত সন্মুখীন হোৱা অসুবিধা সমূহৰ বিষয়ে বিশেষকৈ খণ্ড উন্নয়ন বিষয়াসকলৰ পৰা বুজ লয়। সভাত বিভাগৰ প্ৰধান সচিব ডাঃ জে বি এক্কা আৰু আয়ুক্ত হেমেন দাসৰ নেতৃত্বত উচ্চ পর্যায়ৰ বিষয়াসকলৰ সৈতে ক্ষেত্ৰিয় বিষয়াসকলে গ্ৰামোন্নয়নৰ অধীনৰ বিভিন্ন আঁচনি যেনে এমজি এনৰেগা, পিএম এৱাই-জি, চৰ্তুদশ বিত্তীয় আয়োগ, এন এছ এপি, ৰাষ্ট্ৰীয় গ্ৰামীণ জীৱিকা অভিযান আদি আঁচনি ৰূপায়ণৰ সম্পর্কে আলোচনা কৰে। আনহাতে ক’ৰোনা ভাইৰাছৰ সংক্ৰমণে জনস্বাস্থ্যৰ লগতে দেশৰ আৰ্থ- সামাজিক আদি সকলো খেত্ৰতে অনা প্ৰত্যাহ্বানৰ মুখামুখি হৈ ৰাজ্যখনৰ উন্নয়ন সাধিবলৈ সকলোৱে একাগ্ৰতা আৰু সংগবদ্ধ ভাৱে কাম কৰিব লাগিব বুলি মন্ত্রী গৰাকীয়ে উল্লেখ কৰে। মন্ৰীগৰাকীয়ে আৰু কয় যে এই সংকটপূর্ণ সময়ত এমজি এনৰেগাৰ জৰিয়তে গ্ৰাম্য দুখীয়া জনসাধাৰণৰ লগতে বহিঃৰাজ্যৰ পৰা অহা নিবনুৱা লোকসকলকো মজুৰিভিত্তিক কামেৰে উপকৃত কৰি গ্ৰাম্য দুখীয়া জনসাধাৰণৰ জীৱিকা অৰ্জনত বিশেষ ভূমিকা পালন কৰি গ্ৰাম্য অৰ্থনীতি মজবুত কৰিবলৈ আহবান জনায়। তদুপৰি কৰণা মহামাৰীৰ বাবে মানি চলিবলীয়া সামাজিক দূৰত্ব, মাস্ক পৰিধান আৰু হাত ধোৱাকে ধৰি সকলো নীতি নিয়ম মানি চলিবলৈ আহবান জনোৱাৰ লগতে চতুৰ্দশ বিত্তীয় আয়োগৰ অধীনত ৰাজহুৱা অনুষ্ঠান প্ৰতিষ্ঠান আদি ছেনিটাইজ কৰাৰ উপৰি সামাজিক সুৰক্ষা সুনিশ্চিত কৰিবলৈ সৌৰশক্তি চালিত বিদ্যুৎ যোগান ব্যবস্থা সুপৰিকল্পিতভাৱে হাতত ল’বলৈ নিৰ্দেশ প্ৰদান কৰে। ইয়াৰ উপৰি এই দুৰ্যোগপূৰ্ণ পৰিস্থিতিত অসম ৰাজ্যিক গ্ৰামীণ জীৱিকা অভিযানৰ অধীনৰ আত্মসহায়ক গোটসমূহলৈ বেংক ঋণ প্ৰদানৰ ব্যৱস্থা কৰাৰ লগতে তেওঁলোকে গ্ৰহণ কৰা কাৰ্যসমূহ বহল ভিত্তিত প্ৰসাৰ কৰিবৰ বাবে নিৰ্দেশ দিয়ে। ইয়াৰ জৰিয়তে জীৱন জীৱিকাৰ লগতে সমাজৰো উন্নয়ন হোৱাৰ লগতে জিলাখনৰ উপায়ুক্ত গৰাকীক এই সকলো ক্ষেত্ৰত তদাৰক কৰিবলৈ নিৰ্দেশনা দিয়ে৷