সাপেখাতী
অসম এতিয়া সৰ্বত্ৰে মহামাৰী ক’ৰোনাৰ গৰাহত ত্ৰস্তমান হৈ থকাৰ সময়তে জৰুৰীকালীন সেৱাত আত্মনিয়োগ কৰি থকা পুলিচ প্ৰশাসন, চিকিৎসক, সংবাদকৰ্মীকে ধৰি বিভিন্ন স্তৰৰ লোকসকলে দিনেই নিশাই একাকাৰ কৰি ৰাইজৰ সেৱাত ব্ৰতী হৈ আছে।তেনে এক জটিল সময়তে চৰাইদেউ জিলাৰ সাপেখাতীৰ মাজমজিয়াত অস্থায়ীভাৱে সাপেখাতীৰ উচ্চতৰ মাধ্যমিক বিদ্যালয়ত স্থাপিত কোৱেৰেণ্টাইন চেণ্টাৰত নিয়োজিত চিকিৎসক, আৰক্ষী প্ৰশাসনৰ লগতে বিভিন্ন অঞ্চলত এই দুৰ্বিসহ দিনটো সংবাদ সংগ্ৰহত ব্যস্ত সাংবাদিকসকলক আগন্তুক দিনসমূহত দুগুন উৎসাহেৰে কৰ্ম প্ৰেৰণা যোগোৱাৰ উদ্দেশ্যেৰে আজি সাপেখাতী উচ্চতৰ মাধ্যমিক বিদ্যালয় কৰ্তৃপক্ষৰ হৈ অধ্যক্ষ ৰবীন বৰুৱা, বিষয় শিক্ষক অৱিকল গায়ন, প্ৰশান্ত ফুকন, নন্দ কুর্মী সহিতে একোখন কৈ ফুলাম গামোচাৰে শুভেচ্ছামূলক সম্বৰ্ধনা জনায়। উক্ত অনুষ্ঠানত সম্বৰ্ধনা গ্ৰহণ কৰে সাপেখাতী ক্ষুদ্ৰ প্ৰাথমিক চিকিৎসালয়ৰ চিকিৎসক ধ্ৰুৱলোচন নাথ, সাপেখাতী প্ৰেছ ক্লাবৰ সম্পাদক গৌতম গগৈ, সাংবাদিক মুকুল বড়া, সাংবাদিক মিন্টু বড়া, সাংবাদিক নৱদ্বীপ বৰুৱাৰ লগতে অন্য চিকিৎসা কৰ্মীসকলে৷ উক্ত অনুষ্ঠানটোৰ আঁত ধৰে বিদ্যালয়ৰখনৰ শিক্ষক প্ৰশান্ত ফুকনে লগতে আৰম্ভণিতে বিদ্যালয়ৰ অধ্যক্ষ ৰবীন বৰুৱাই সকলোকে এনে জটিল সময়তো নিজ কৰ্মত পিছ নুহুকি নিষ্ঠা আৰু দুগুণ কর্ম উদ্যোমেৰে আগবাঢ়ি যোৱাত ধন্যবাদ দিয়াৰ লগতে ভৱিষ্যতেও এনে সুন্দৰ মনোবৃত্তিৰে আগুৱাই যাবলৈ আহ্বান জনায়।
