নামখলা : উত্তৰ পূৰ্বাঞ্চলত কিছুদিন ধৰি হৈ থকা নেৰানেপেৰা বৰষুণৰ ফলত দৰং জিলাৰ প্ৰায় সকলো নদী ফেনেফুটুকাৰে বাঢ়ি থকাৰ ফলত নদী কাষৰীয়া অঞ্চলত লোকসকল ভীতিগ্ৰস্ত হৈ থকাৰ সময়তে দেওবাৰে দোকমোকালি পুৱাতে দৰঙৰ ঐতিহাসিক পাথৰিঘাট আলিখাপাৰাত ননৈ নদীৰ পূৱ দিশৰ মথাউৰি প্ৰৱল বানে চিঙি পেলাই। ২৭ জুন পুৱতি নিশা মঙলদৈৰ শাকতোলা নদীৰ কেওঁট পাৰা- কলিতা পাৰাৰ মাজত মথাউৰি চিঙি পশ্চিম মঙলদৈ উন্নয়ন খণ্ডৰ ৭ খন গাঁৱত বানপানীয়ে তাণ্ডৱ চলোৱা পিছতে দেওবাৰে অৰ্থাৎ ১২ জুলাইৰ পুৱাতে ননৈ নদীৰ মথাউৰি তীব্ৰ বেগী বানে চিঙি পেলোৱাত ছিপাঝাৰ উন্নয়ন খণ্ডৰ পাথৰিঘাটৰ দাঁতিকাষৰীয়া দহখনতকৈ অধিক গাওঁ বানপানীয়ে বুৰাই পেলাই। আনহাতে পাথৰিঘাট আৰক্ষী চকীৰ ভাৰপ্ৰাপ্ত বিষয়া মহেন্দ্ৰ শৰ্মাই উপস্থিত হৈ বানপানীত ল’বলগীয়া সাৱধানতাৰ বিষয়ে জনাই আৰু সজাগ হ’বলৈ আহবান জনায় ৷ ইতিমধ্যে প্লাৱিত গাঁওসমূহৰ লোকসকল আৰু পোহনীয়া জীৱ-জন্তু বানত আবদ্ধ হৈ পৰিছে। জনসাধাৰণক উদ্ধাৰৰ বাবে প্ৰশাসনৰ পৰা একো ব্যৱস্থা লোৱা দেখা পোৱা নাই যদিও স্থানীয় ৰাইজে কলৰ ভূৰ সাজি দূৰ্গত লোকসকলক উদ্ধাৰ কৰা পৰিলক্ষিত হয় ৷

দলগাঁও : মীন পালনেৰে সৈতে শিক্ষিত নিবনুৱা যুবক, উদ্যোমী সকলক জড়িত কৰি সুফল অৰ্জন কৰিবলৈ সমৰ্থ হৈছে দৰঙৰ কৌপাটিৰ বাগিচা কাষ গাৱঁৰ গৌৰাংগ কৃষি সমবায় সমিতিয়ে। ৫১জন সদস্যৰে গঠিত কৃষি সমবায় সমিতিখনৰ অন্তৰ্গত ভূমিৰ পৰিমাণ প্ৰায় দুশ বিঘা। ইয়াৰে ৫ হেক্টৰ কালিৰ ডাঙৰ আৰু সৰু একাধিক পুখুৰীত মাছ পোহাৰ লগতে পাছৰ পোণা উৎপাদন আৰু বিজ্ঞান সন্মতভাৱে পোহাৰ ব্যৱস্থা আছে। গৌৰাংগ কৃষি সমবায় সমিতিৰ বৰ্তমানৰ সভাপতি বীৰেশ্বৰ ভদ্ৰ আৰু সম্পাদক জয়ন্ত দাসৰ পৰা জানিব পৰা মতে, মীন পালনৰ যাবতীয় কাৰিকৰী দিশত দৰঙৰ মীন বিভাগে সহযোগিতা কৰি আহিছে। মীন পালনৰ বাবে চৰকাৰী বিভিন্ন আঁচনি যথা সম্ভৱ সমূহ সফলভাৱে ৰূপায়ন কৰা হোৱা বুলিও জানিবলৈ দিয়ে। মীন পালনৰ জৰিয়তে সমবায় সমিতিখনৰ বহুকেইজন হিতাধিকাৰী স্বাৱলম্বী হ’ব পাৰিছে। বৰ্তমানে সমবায় সমিতিখনৰ অধীনত মীনপালক হিতাধিকাৰী সকলৰ মাজত বিনামূলীয়াকৈ বিভিন্ন প্ৰকাৰৰ পোণা মাছ বিতৰণৰ কাৰ্যসূচী চলাই থকা হৈছে। মুখ্যমন্ত্ৰীৰ ঘৰে ঘৰে পুখুৰী, ঘৰে ঘৰে মাছ আঁচনিৰ অধীনত আজি এই কাৰ্যসূচী মুকলি কৰে দলগাৱঁৰ ৰাজহ চক্ৰ বিষয়া সমীৰ চৌধুৰী আৰু শৰৎ গগৈয়ে। দীৰ্ঘদিনীয়া লক ডাউনৰ সময়ছোৱাত মৎস পালনে অন্য নিবনুৱা সকলক আৰ্থিক সকাহ দিব বুলি আশা কৰা হৈছে।

গুৱাহাটী : লকাডাউনৰ মাজতে আজি গুৱাহাটী মহানগৰীৰ উলুবাৰীস্থিত ৰামকৃষ্ণ মিছন পথত অৱস্থিত ড° বাণীকান্ত কাকতী বৈদ্যুতিক শ্মশান উন্মোচন কৰা হয়৷ পূৱ গুৱাহাটী সমষ্টিৰ বিধায়ক তথা গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্যই আজি দিনৰ ১২ বজাত আনুষ্ঠানিকভাৱে উন্মোচন কৰে৷ মন্ত্ৰী ভট্টাচাৰ্যই শ্মশান উন্মোচন কৰি কয় যে জি এম ডি এৰ অধীনত প্ৰায় ৫ কৌটি ৯ লাখ টকা ব্যায় সাপেক্ষে এই অত্যাধুনিক বৈদ্যুতিক শ্মশান নিৰ্মাণ কৰা হৈছে৷ কৰোনা আক্ৰান্ত হৈ মৃত্যু মুখত পৰা ব্যক্তিৰ শহদেহ শতকাৰ কৰাৰ যথেষ্ট অসুবিধা সন্মুখীত হৈছিল৷ ইয়াৰ বাবেই স্বাস্থ্য বিভাগে জিএমডিএক বৈদ্যুতিক শ্মশানখন ক্ষীপ্ৰতাৰে সম্পন্ন কৰাৰ বাবেই অনুৰোধ জনাই আহিছিল৷ সেয়েহে জি এম ডিয়ে আজি আনুষ্ঠানিকতাৰে ৰাইজৰ মাজত মুকলি কৰি দিয়ে বুলি মন্ত্ৰী ভট্টাচাৰ্যই উল্লেখ কৰে৷ উল্লেখ্য যে এতিয়াৰ পৰা গুৱাহাটী পৌৰনিগমে শ্মশানখনৰ দায়িত্ব গ্ৰহণ কৰিব৷ এই ক্ষেত্ৰত জি এম ডিএৰ মুখ্য কাৰ্যবাহী বিষয়া উমানন্দ দলেই গুৱাহাটী পৌৰনিগমৰ আয়ুক্ত দেবজ্যোতি হাজৰিকাক চুক্তিবদ্ধ ভাৱে দায়িত্ব অৰ্পণ কৰে৷ ৰামকৃষ্ণ মিছন শ্মশান সমিতিৰ মুখ্য উপদেষ্টা বিৰাজ চক্ৰৱৰ্তীয়ে পৌৰহিত্যত কৰা সভাখনত বিশিষ্ট ব্যক্তি হিচাপে জি এম ডিএৰ উপাধক্ষ্য মুকুতা ডেকা, জিএম ডিএৰ মুখ্য কাৰ্যবাহী বিষয়া উমানন্দ দলৈ, গুৱাহাটী পৌৰনিগমৰ আয়ুক্ত দেবজ্যোতি হাজৰিকা, শ্মশান সমিতিৰ সভাপতি সন্জীব ডেকা উপস্থিত থাকে৷ আনহাতে উন্মোচনী সভা অন্ত পৰাৰ পিছত মন্ত্ৰী সিদ্ধাৰ্থ ভট্টাচাৰ্যই শ্মশানখনৰ চৌহদত এটি গছপুলি ৰোপণ কৰে।