দৈনন্দিন বাৰ্তা :
প্ৰায় এসপ্তাহৰ নাটক অৱশেষত ইতি পৰিল৷ কানপুৰত বিষয়াসহ ৮ আৰক্ষীক হত্যা কৰা ম’ষ্ট ৱানটেড গেংষ্টাৰ বিকাশ ডুবেক গ্ৰেপ্তাৰ কৰিল আৰক্ষীয়ে ৷ বৃহস্পতিবাৰে পুৱা মধ্য প্ৰদেশৰ উজ্জয়িনীৰ এটা মন্দিৰৰ পৰা এই দুৰ্ধৰ্ষ অপৰাধীটোক গ্ৰেপ্তাৰ কৰে ৷ আনহাতে প্ৰায় একে সময়তে হোৱা দুটা পৃথক এনকাউণ্টাৰত বিকাশৰ দুই সহযোগীৰ মৃত্যু হয় ৷ আৰক্ষীৰ সূত্ৰে জানিব পৰা মতে বৃহস্পতিবাৰে উজ্জয়িনীৰ মহাকালেশ্বৰ মন্দিৰত পুৱা আঠ বজাত এই অপৰাধীটোক দেখা পায় ৷ মন্দিৰৰ চৌহদৰ এখন দোকানৰ পৰা ফুলৰ মালা কিনিবৰ সময়তে দোকানীয়ে বিকাশক চিনি পালে ৷ তাৰ পাছত তেওঁ মন্দিৰৰ নিৰাপত্তাৰক্ষীক কথাটো জনায় ৷ লগে লগে আৰক্ষীলৈ খবৰ যায় ৷ নিৰাপত্তাৰক্ষীয়ে বিকাশক মন্দিৰৰ ভিতৰতে আবদ্ধ কৰি ৰাখে ৷ কিন্তু বিকাশে ভুৱা পৰিচয়পত্ৰ দেখুৱায় ৷ নিৰাপত্তাৰক্ষী নিশ্চিত আছিল যে এই ব্যক্তি বিকাশেই ৷ তাতে বিকাশৰ লগত হতাহতি আৰম্ভ হয় ৷ কিন্তু শেষ ৰক্ষা নহ’ল ৷ মন্দিৰৰ নিৰাপত্তাৰক্ষীয়ে বিকাশক আটক কৰি ৰাখে ৷ পাছত আৰক্ষীৰ হাতত অপৰাধীটোক তুলি দিয়া হয় ৷ এই মন্দিৰৰ চিচিটিভি ফুটেজত দেখা যায় যে কেইজনমান আৰক্ষীয়ে বেৰি ৰাখিছে মাস্ক পিন্ধা বিকাশক ৷ আৰক্ষীৰ জেৰাত অপৰাধীটোৱে স্বীকাৰ কৰে কানপুৰৰ বিকাশ ডুবে বুলি ৷ তাৰ পাছতে অপৰাধীটোক গ্ৰেপ্তাৰ কৰে ৷ উল্লেখ্য যে যোৱা শুকুৰবাৰে নিশা বিকাশক ধৰিবলৈ গাঁৱলৈ যোৱা আৰক্ষীৰ ওপৰত গুলী বৰ্ষণ কৰিছিল ৷ উত্তৰ প্ৰদেশৰ কানপুৰত হোৱা সেই ঘটনাত ঘটনাস্থলীতে বিষয়াসহ আঠজন আৰক্ষী নিহত হৈছিল ৷ তাৰ পাছতে বিকাশৰ সন্ধানত আছিল আৰক্ষী ৷ বুধবাৰে হাৰিয়ানাৰ ফৰিদাবাদৰ এখন হোটেলত আছিল বুলি জনাৰ কিছু সময়ৰ পাছতে বিকাশ পলাই গৈছিল ৷ কিন্তু উজ্জয়িনীৰ মন্দিৰৰ পৰা পলাব নোৱাৰিলে গেংষ্টাৰ বিকাশ ৷ আনহাতে একেটা দিনতে পুৱা আৰক্ষীৰে সৈতে হোৱা সংঘৰ্ষত বিকাশৰ দুই সহযোগীৰ মৃত্যু হয় ৷ তাৰে এটাক বুধবাৰে ফৰিদাবাদৰ হোটেলত বিকাশক ধৰিবলৈ যাওতে গ্ৰেপ্তাৰ কৰিছিল ৷ গ্ৰেপ্তাৰৰ পাছত অপৰাধীটোক কানপুৰলৈ নিয়া হৈছিল ৷ ইপিনে গৈ থকা অৱস্থাত গাড়ীৰ চকা ফুটাত আৰক্ষীৰ আগ্নেয়াস্ত্র লৈ পলাবলৈ চেষ্টা কৰিছিল প্ৰভাত নামৰ অপৰাধীটো ৷ তেতিয়া আৰক্ষীয়ে গুলী চালনা কৰে ৷ ফলত গুৰুতৰভাৱে আহত অপৰাধীটোক চিকিৎসালয়লৈ নিয়ে যদিও মৃত্যু হয় ৷ আনহাতে বিকাশৰ আন এক সহযোগী প্ৰবীন ওৰফে বৌবা ডুবেৰ আৰক্ষীৰ গুলীত মৃত্যু হয় ৷ উত্তৰ প্ৰদেশৰ এয়াৱাৰ ওচৰত দিনৰ ৩ বজাত এখন ছুইফট ডিজায়াৰ চাৰিটা দুষ্কৃতিকাৰীয়ে চুৰি কৰিছিল ৷ তাৰ প্ৰায় এঘণ্টাৰ পাছত আৰক্ষীয়ে সেই অপৰাধীক আটক কৰে ৷ তেতিয়া আৰক্ষীলৈ লক্ষ্য কৰি গুলী কৰিছিল ৷ আৰক্ষীয়ে তাৰ প্ৰত্যুত্তৰ দিয়ে৷ এই অপৰাধী চিকিৎসালয়লৈ নিয়ে যদিও মৃত্যু হয় ৷ এই অপৰাধীটোৰ পৰিচয় পোৱা নাই আৰক্ষীয়ে ৷ উল্লেখ্য যে প্ৰবীনক ধৰিবৰ বাবে আৰক্ষীয়ে ৫০ হাজাৰ টকা ঘোষণা কৰিছিল ৷

দৈনন্দিন বাৰ্তা : যোৱা শুকুৰবাৰে দুৰ্ধৰ্ষ গেংষ্টাৰ বিকাশ ডুবেক ধৰিবলৈ গৈ কানপুৰত নিহত হৈছিল আঠজন আৰক্ষী ৷ তাৰ পাছত পলাতক আছিল বিকাশ ৷ বৃহস্পতিবাৰে উজ্জয়িনীৰ এটা মন্দিৰত এই অপৰাধীটোক গ্ৰেপ্তাৰ কৰে ৷ মন্দিৰতে নিৰাপত্তাৰক্ষীয়ে বিকাশক কৰায়ত্ত কৰে ৷ ইয়াৰ পাছতে মধ্য প্ৰদেশৰ আৰক্ষীৰ হাতত বিকাশ ডুবেক তুলি দিয়া হয়৷ উল্লেখ্য যে যোৱা ৬ দিন ধৰি অপৰাধীটোক আৰক্ষীয়ে বিচাৰি পোৱা নাছিল ৷ আৰক্ষীয়ে উত্তৰ প্ৰদেশৰ অৰায়াত শেষবাৰ ফোনত নিশ্চিত কৰিছিল ৷ দিল্লীৰ এখন হোটেলৰ চিচিটিভি ফুটৱেজত বিকাশক দেখা গৈছিল ৷ সেই বিকাশ আজি কি দৰে হঠাৎ মন্দিৰত সোমাল, মধ্যপ্ৰদেশৰ আৰক্ষীয়ে নজৰ দিছিল নে, ধৰাৰ ক্ষেত্ৰত ক’লৈ গৈছিল আদি বিভিন্ন প্ৰশ্ন উদয় হৈছে ৷ উত্তৰ প্ৰদেশৰ বিৰোধী দল সমাজবাদী পার্টিৰ দাবী যে বিকাশে নিজেই ধৰা দিছে ৷ আৰক্ষীয়ে কৃতিত্ব লৈছে৷ কংগ্ৰেছ নেত্ৰী প্ৰিয়ংকা গান্ধীৰ অভিযোগ, অ’ত দিনে কিভাৱে আৰক্ষীৰ চকুৰ আগত ধূলি মাৰি ঘুৰি ফুৰিছিল বিকাশ ডুবেয়ে ? যোৱা ৬দিনত ৭০০ কিলোমিটাৰ ঘুৰিছে বিকাশে৷ হাৰিয়ানাৰ ফৰিদাবাদৰ পৰা ৰাজস্থানৰ কোটা গৈছে৷ তাত থাকি আহিছে মধ্যপ্রদেশৰ উজ্জয়িনীলৈ ৷ কানপুৰৰ ইনস্পেক্টৰ জেনেৰেল মোহিত আগৰৱালে জনায়, বিকাশৰ কেইবাজনো সহযোগীক ধৰা হৈছে৷ কেইবাজনো এনকাউণ্টাৰত মৃত্যু হৈছে ৷ স্বাভাৱিকভাৱেই জীৱন বচাই পলাই ফুৰিছিল ৷ প্ৰিয়ংকা গান্ধীয়ে কয়, উত্তৰ প্ৰদেশ চৰকাৰৰ তৎপৰতাত ব্যৰ্থ হৈছে৷ আঠজন আৰক্ষীক নিহত কৰাৰ পাছত মধ্য প্ৰদেশলৈ কি দৰে গ’ল? ইয়াৰ পৰা স্পষ্ট যে আৰক্ষী আৰু বিকাশৰ মাজত যোগাযোগ আছে৷ সমাজবাদী পাৰ্টিৰ নেতা অখিলেশ যাদৱৰ স্পষ্ট মত, উজ্জয়িনীত বিকাশে আত্মসমৰ্পণ কৰিছে ৷ অপৰাধীটোক কৰায়ত্ত কৰাত ব্যৰ্থ আৰক্ষী৷ আনহাতে বিকাশে যে আত্মসমৰ্পণ কৰিছে সেই কথা টুইটাৰত লিখিছে স্বয়ং উত্তৰ প্ৰদেশৰ আইপিএছ বিষয়া অমিতাভ ঠাকুৰে। অৱশ্যে মধ্যপ্ৰদেশ আৰক্ষীয়ে জনাইছে যে বিকাশক ধৰা হৈছে, আত্মসমৰ্পণ কৰা নাই ৷