গুৱাহাটী : গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্যৰ এক নিৰ্দেশ মৰ্মে আজি গুৱাহাটী পৌৰনিগমৰ আয়ুক্ত দেবজ্যোতি হাজৰিক, পৌৰনিগমৰ মুখ্য অভিযন্তা দেৱজিত দাস সহ কেইবাগৰাকী বিষয়াৰ উপস্থিতিত অনিল নগৰৰ বোকাময় পথছোৱা পৰিস্কাৰ কৰা দেখিবলৈ পোৱা যায় ৷ যোৱা ৬ জুনত সন্ধিয়া অহা এজাক মুষলধাৰ বৰষুণে গুৱাহাটী মহানগৰীৰ বিভিন্ন অঞ্চল পানীৰে বুৰাই পেলায় ৷ প্ৰায় এঘন্টা সময় বৰষুণ দিয়াৰ ফলত অনিল নগৰ অঞ্চলত এবুকু প্ৰৰ্যান্ত পানীৰে উপচি পৰে পথচোৱা ৷ কৃত্ৰিম বানৰ ফলত কেইঘণ্টামানৰ বাবেই অঞ্চল বাসী ৰাইজে যঠেষ্ট অসুবিধাৰ সন্মুখীন হয় ৷ এই ক্ষেত্ৰত গুৱাহাটী পৌৰনিগমৰ পানীৰ পাম্পৰে কম সময়ত ভিতৰত পানী নিস্কাষণ কৰিবলৈ সক্ষম হয়৷ পথচোৱাৰ পৰা পানী নাইকিয়া হোৱাৰ পিছত বোকময় পৰিবেশৰে ভৰপুৰ হৈ থকা দেখা গৈছে৷ স্হানীয় ৰাইজৰ অভিযোগৰ ভিত্তিত আজি পুৱ গুৱাহাটী সমষ্টিৰ বিধায়ক তথা গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্যই পৌৰনিগমক পথছোৱা পৰিস্কাৰ কৰাৰ লগতে ছেনিটাইজাৰ কৰিবলৈ নিৰ্দেশ প্ৰদান কৰে ৷ সেই মৰ্মেই  পৌৰনিগমৰ আয়ুক্ত সহ মুখ্য অভিযন্তাৰ তদাৰকত পথচোৱা পৰিস্কাৰ কৰাৰ লগতে ছেনিটাইজাৰ কৰা হয় ৷ এই ক্ষেত্ৰত স্হানীয় বাসিন্দা প্ৰশান্ত বৰ্মনে মন্ত্ৰী গৰাকীৰ তাৎক্ষণিক পদক্ষেপক ধন্যবাদ জ্ঞাপন কৰে ৷ লগতে গুৱাহাটী পৌৰনিগমৰ আয়ুক্ত অভিযন্তা গৰাকীৰ পদক্ষেপক আদৰণীয় বুলি অভিষিত কৰে ৷

নগাঁও : বিগত কেইদিনমান ধৰি সংবাদ মাধ্যমত নগাঁও সদৰ সমষ্টি অথবা বঢ়মপুৰত দলীয় টিকট লাভ কৰিলে বিধানসভা নিৰ্বাচন খেলিবলৈ সাজু থকা বুলি উল্লেখ কৰি আহিছে প্ৰাক্তন ৰেলৰাজ্য মন্ত্ৰী ৰাজেন গোহাঁইয়ে।ইয়াৰ লগতে নগাঁৱৰ বিধায়ক ৰূপক শৰ্মাক সংবাদ মাধ্যমৰ আগত কটু সমালোচনা কৰি অহা ৰাজেন গোঁহাইক আজি নগাঁৱত নাম উল্লেখ নকৰাকৈ প্ৰত্যুত্তৰ দিলে বিধায়ক ৰূপক শৰ্মাই। চিগনেচাৰ প্ৰজেক্টৰ অধীনত ১০কোটি টকা ব্যয় সাপেক্ষে নগাঁৱৰ মাজৰআটিৰ পৰা বেবেজীয়া পৰ্যন্তনিৰ্মান হ’ব লগা এটি পথৰ আজি আধাৰশিলা স্থাপন কৰি বিধায়ক ৰূপক শৰ্মাই কয় যে নগাঁৱৰ উন্নয়ণৰ কৃতিত্ব কেৱল বিজেপি চৰকাৰৰহে। প্ৰধানমন্ত্ৰী নৰেন্দ্ৰ মোডী, মুখ্যমন্ত্ৰী সৰ্বানন্দ সোণোৱাল আৰু গড়কপ্তানি মন্ত্ৰী হিমন্ত বিশ্বৰ সদিচ্ছাৰ বাবেই বিগত ৪ বছৰত নগাঁও চহৰৰ বাট-পথৰ লগতে বিভিন্ন ক্ষেত্ৰত ক্ষিপ্ৰ উন্নয়ণ হৈছে। এই উন্নয়ণৰ কৃতিত্ব কোনো ব্যক্তি বিশেষৰ নহয়, বিজেপি চৰকাৰৰহে। আনহাতে নগাঁও সদৰ সমষ্টিত প্ৰাক্তন মন্ত্ৰী ৰাজেন গোঁহাইয়ে টিকট বিচৰা সন্দৰ্ভত সাংবাদিকে সোধা প্ৰশ্নৰ উত্তৰত বিধায়ক গৰাকীয়ে কয় যে নিৰ্বাচনলৈ এতিয়াও বহুদিন বাকী আছে। সেয়ে এতিয়া মোক টিকটৰ কথা নুসুধিব। এতিয়া দুৰ্যোগৰ সময়। সমগ্ৰ বিশ্বৰ লগতে নগাঁৱৰ ৰাইজো ক’ৰোণা সংক্ৰমণৰ বলি হৈছে। বানপানীয়েও ৰাইজক বিপৰ্যস্ত কৰিছে। সেয়ে এতিয়া ৰাইজক সহায় কৰাৰহে সময়। এইসময়ত ৰাইজে জনপ্ৰতিনিধিৰ পৰা ক্ষমতাৰ ৰাজনীতি নিবিচাৰে। আমি ৰাইজক সহায় কৰাৰ বাবেহে আগ্ৰহী, খোৱাকামোৰাৰ ৰাজনীতি আমি বেয়াপাঁও। উল্লেখযোগ্য যে প্ৰাক্তন মন্ত্ৰী ৰাজেন গোঁহায়ে ৰূপক শৰ্মাক সংবাদ মাধ্যমত প্ৰত্যক্ষ ভাৱে সমালোচনা কৰাৰ বিপৰীতে ৰূপক শৰ্মাই ৰাজেন গোঁহাইৰ নাম উল্লেখ নকৰাকৈয়ে সংবাদ মাধ্যমৰ সন্মুখত প্ৰত্যুত্তৰ দিলেও নগাঁৱত যে এতিয়া ৰাজেন গোঁহাই আৰু ৰূপক শৰ্মাৰ মাজত শীতল যুদ্ধৰ অৱতাৰণা ঘটিছে সেয়া স্পষ্ট হৈছে। আধাৰশিলা স্থাপন অনুষ্ঠানত নগাঁও গড়কপ্তানি বিভাগৰ অধীক্ষক অভিযন্তা পল্লৱ শৰ্মা,কাৰ্যবাহী অভিযন্তা হিতেন কলিতা, সহকাৰী অভিযন্তা অতনু শৰ্মা,প্ৰাক্তন পৌৰপতি দিগন্ত দাস, বিজেপি দলৰ নগাঁও সদৰ আৰু বঢ়মপুৰ মণ্ডলৰ সভাপতিদ্বয় ক্ৰমে দীপাংকৰ ৰয় আৰু বিজয় গুপ্তা উপস্থিত থাকে ।

নাজিৰা : ইন্ধন জাতীয় সামগ্ৰীকে ধৰি অত্যাৱশ্যকীয় সামগ্ৰীৰ মূল্যবৃদ্ধি আৰু চৰকাৰৰ নতুন উদ্যোগ নীতিৰে যি অসম বিৰোধী তথা জাতিধ্বংসী অধ্যাদেশ জাৰি কৰিছে সেই অধ্যাদেশ প্ৰত্যাহাৰৰ দাবীত আজি নাজিৰা নগৰৰ মাজমজিয়াত অসমৰ মুখ্যমন্ত্ৰী সৰ্বানন্দ সোনোৱাল , খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰী আৰু বাণিজ্য — উদ্যোগ মন্ত্ৰী চন্দ্ৰ মোহন পাটোৱাৰীৰ প্ৰতিকৃতি দাহ কৰি তীব্ৰ প্ৰতিবাদ সাব্যস্ত কৰে ” সংগ্ৰামী যুৱ – ছাত্র পৰিষদ , অসম ” ৰ নাজিৰা আঞ্চলিক সমিতিয়ে । সংগঠনটোয়ে যোগান বিভাগক দাবী উত্থাপন কৰে যে , কৰ’না মহামাৰীৰ সময়ত চৰকাৰে লকডাউনৰ দৰে পৰিস্থিতি ঘোষণা কৰিবলৈ বাধ্য হোৱাৰ সময়তে অসমৰ সাধাৰণ জনতাই অত্যন্ত আৰ্থিক অভাৱ অনাটনৰ মাজত দিন কটাবলগীয়া হৈছে । তেনে সময়তে যোগান বিভাগে অত্যাৱশ্যকীয় সামগ্ৰীৰ মূল্য নিৰ্ধাৰণৰ ক্ষেত্ৰত উপযুক্ত পদক্ষেপ গ্ৰহণ নকৰি অত্যাৱশ্যকীয় সামগ্ৰীৰ আকাশলংঘী মূল্যবৃদ্ধিয়ে সাধাৰণ জনতাক একেবাৰে কোঙা কৰি পেলাইছে । প্ৰতিবাস্থলীত উপস্থিত থাকি সংগ্ৰামী যুৱ – ছাত্ৰ পৰিষদৰ শিৱসাগৰ জিলা সমিতিৰ উপ — সভাপতি পংকজ দত্তই দাবী উত্থাপন কৰি কয় যে , অতি সোনকালে যোগান বিভাগৰ দায়িত্বত থকা মন্ত্ৰী গৰাকীয়ে মূল্য নিৰ্ধাৰণৰ ক্ষেত্ৰত সঠিক পদক্ষেপ গ্ৰহণ কৰি যোগান বিভাগটো গতিশীল কৰক , অন্যথা মন্ত্ৰী পদৰ পৰা অব্যাহতি লওক । আনহাতে ৰাজ্যিক কেবিনেটত উত্থাপিত হোৱা অনুমতি বিহীন নতুন ভূমি নীতি অধ্যাদেশ খনক সংগঠনটোয়ে পোনচাতেই নস্যাৎ কৰি খিলঞ্জীয়াক ভূমিৰ অধিকাৰ দিব নোৱাৰা বি জে পি নেৰ্তৃত্বাধীন চৰকাৰখনক তীব্ৰ ভাষাৰে নিন্দা কৰি খিলঞ্জীয়াক ভূমিৰ অধিকাৰ প্ৰদান কৰাৰ দাবী জনায় । জাতি — মাটি — ভেটিৰ কথা কৈ শাসনলৈ অহা বি জে পি নেৰ্তৃত্বাধীন চৰকাৰে উদ্যোগ স্থাপনৰ নামত অসমৰ খিলঞ্জীয়া লোকসকলৰ ভূমিৰ অধিকাৰ খৰ্ব কৰি খিলঞ্জীয়াক ভাতে মৰাৰ পৰিকল্পনা কৰা বুলি অভিযোগ কৰি সংগঠনটোৰ প্ৰতিবাদ কাৰী সকলে চৰকাৰ বিৰোধী ধৰ্ণাৰে উত্তাল কৰি তোলে ।