দলগাও : কভিড ১৯ৰ পৰা ৰক্ষা পাবলৈ ৰাজ্যজুৰি চলি থকা দীৰ্ঘদিনীয়া লক ডাউনৰ ফলত ৰাইজৰ মাজত যি হাহাকাৰ সৃষ্টি হোৱাৰ সমান্তৰাল ভাৱে এতিয়া বানপানীৰ কবল পৰি চকুলো টুকিছে ৰাইজে। ৰাজ্যৰ শেহতীয়াকৈ হোৱা ভয়াবহ বানপানীৰ কবলত পৰা লোকসকলক সঠিক সময়ত উপযুক্ত সাহায্য প্ৰদান কৰিবলৈ দাবী জনাইছে সংগঠনটোৰ সাংগঠনিক সম্পাদক ছফিকুল ইছলামে। বানাক্ৰান্ত লোকসকলক অনতিপলমে উপযুক্ত সাহায্য প্ৰদানৰ দাবী জনায় নেতা জনে। অসম সংখ্যালঘু সংগ্ৰাম পৰিষদৰ কেন্দ্ৰীয় সমিতিৰ সাংগঠনিক সম্পাদকে দিয়া এক প্ৰেছ বিবৃত্তিযোগে জনায় যে কৰুণা মহামাৰীৰ সময়ত ৰাজ্যখনত ভয়াবহ বানপানী সৃষ্টি হৈছে।লাখ লাখ বানাক্ৰান্ত লোকৰ মাজত হাহাকাৰ সৃষ্টি হৈছে বহুতো ঠাইত ৰাস্তা ঘাট, মাথাউৰি আদি ভাঙি মানুহৰ ঘৰ-দুৱাৰ, খেতি-বাতি আদি নষ্ট হোৱাত মানুহবোৰ হতভাগ হৈ পৰিছে। কিন্তু চৰকাৰে এতিয়ালৈ ৰাইজক কোনো সাহায্য প্ৰদান কৰা নাই বুলি অভিযোগ উত্থাপিত হৈছে। সাংগঠনিক সম্পাদক ছফিকুল ইসলামে উল্লেখ কৰে যে টাংনী নদীৰ গৰাখহনীয়াৰ কবলত পৰি মঙ্গলদৈ সমষ্টিৰ অন্তৰ্গত পশ্চিম ওজাগাও, টাংনীঝাৰ, আটাকাটা, ধনশিৰী গাও, বাইগৰমাৰী, কেওৱাটচুৱা আদি গাওঁ সমুহৰ হাজাৰ হাজাৰ কৃষকৰ কৃষি ভুমি বানপানীয়ে ক্ষতি কৰাৰ লগতে কেইবাটাও মাথাউৰি, ৰাস্তা আৰু বহুতো ব্যক্তিগত পুখুৰী ভাঙি যায়। অচিৰেই এই মাথাউৰি, ৰাস্তা আদি নিৰ্মাণৰ ব্যৱস্থা কৰিবলৈ দাবী জনাইছে সংগঠনটোৰ সাংগঠনিক সম্পাদক ছফিকুল ইছলামে।
ম্যানমাৰৰ শিলৰ খনিত ভূমিস্খলন : মৃত্যু ১০০ শ্ৰমিকৰ ।
দৈনন্দিন বাৰ্তা ডেস্ক :
ম্যানমাৰৰ এটা শিলৰ খনিত ভয়াৱহ ভূমিস্খলন হোৱাত প্ৰায় ১০০জন শ্ৰমিকৰ মৃত্যু হয় ৷ ইয়াৰ লগতে কেইবাজনো লোক সন্ধানহীন হয় ৷ যুদ্ধকালীন তৎপৰতাত খনিত আবদ্ধ হৈ থকা শ্ৰমিকক উদ্ধাৰ কাৰ্য চলি আছে ৷ জানিব পৰা মতে উত্তৰ ম্যানমাৰৰ কাচিন প্ৰদেশত জেড সমৃদ্ধ পাক্তান এলেকাৰ খনিত অলংকাৰত ব্যৱহৃত শিল শ্ৰমিকসকলে সংগ্ৰহ কৰিছিল ৷ কিন্তু প্ৰৱল বৰষুণে বিপৰ্যয় নমাই আনে৷ মুহূৰ্ততে অহা প্ৰৱল বৰষুণৰ সোঁতত সোমাই পৰে বহু শ্ৰমিক ৷ শেহতীয়া বাতৰি মতে এই দুৰ্ঘটনাত ১০০ জন শ্ৰমিকৰ মৃত্যু হয় ৷ আনহাতে কেইবাজনো আহত হয় ৷ ইয়াৰে বহুৰে অৱস্থা সংকটজনক৷ ফলত মৃতকৰ সংখ্যা বৃদ্ধি পোৱাৰ সম্ভাৱনা আছে ৷
চৰকাৰৰ ভূমি নীতি সম্পৰ্কীয় অধিসূচনা প্ৰকাশৰ কেবিনেটৰ সিদ্ধান্ত বাতিলৰ দাবী : নাজিৰাৰ ৰাজপথত দাওঁ দাওঁ কৈ জ্বলিল প্ৰধানমন্ত্ৰী, মুখ্যমন্ত্ৰী, পেট্ট’লিয়াম মন্ত্ৰী যোগান মন্ত্ৰীৰ প্ৰতিকৃতি ।
নাজিৰা : জাতি-মাটি-ভেটিৰ সুৰক্ষাৰ কথা কোৱা বিজেপি দল তথা শাসনাধীস্থ চৰকাৰে অসমীয়া জাতিক নিজৰ ঘৰতে মগনীয়া কৰাৰ ষড়যন্ত্ৰ ৰচনা কৰি খিলঞ্জীয়া বিৰোধী ভূমি নীতি সম্পৰ্কীয় অধিসূচনা প্ৰকাশৰ কেবিনেটৰ সিদ্ধান্তৰ বিৰুদ্ধে অসমীয়া জাতি আৰু বিভিন্ন দল-সংগঠনে গৰজি উঠিছে। চৰকাৰৰ এনে সিদ্ধান্ত বাতিলৰ দাবী জনাই অসমৰ বিভিন্ন প্ৰান্তৰ লগতে আজি নাজিৰাতো প্ৰতিবাদৰ দাবানল উদগীৰণ ঘটে। চৰকাৰৰ এনে হঠকাৰী সিদ্ধান্ত বাতিলৰ লগতে নিত্য ব্যৱহাৰ্য সামগ্ৰীৰ আকাশলংঘী মূল্যবৃদ্ধিৰ প্ৰতিবাদত আজি বিয়লি নাজিৰা নগৰৰ ৰাজপথত দাওঁ দাওঁ কৈ জ্বলিল দেশৰ প্ৰধানমন্ত্ৰী নৰেন্দ্ৰ মোদী, প্ৰেট্ট’লিয়াম মন্ত্ৰী ধৰ্মেন্দ্ৰ প্ৰধান, অসমৰ মুখ্যমন্ত্ৰী সৰ্বানন্দ সোনোৱাল আৰু অসম চৰকাৰৰ যোগান মন্ত্ৰী ফণীভূষণ চৌধুৰীৰ প্ৰতিকৃতি। আছুৰ অৰ্ধশতাধিক কৰ্মীয়ে অংশগ্ৰহণ কৰা এই কাৰ্যসূচীত “বিজেপি নেতৃত্বাধীন চৰকাৰ হায় হায়, নৰেন্দ্ৰ মোদী-সৰ্বানন্দ সোনোৱাল মূৰ্দাবাদ, খিলঞ্জীয়া বিৰোধী ভূমি নীতি সম্পৰ্কীয় অধিসূচনা প্ৰকাশৰ কেবিনেটৰ সিদ্ধান্ত বাতিল কৰক, নিত্য ব্যৱহাৰ্য সামগ্ৰীৰ মূল্যবৃদ্ধি ৰোধ কৰক” আদি বিভিন্ন শ্ল’গানেৰে দিয়া প্ৰতিবাদী ধৰ্ণাই উত্তাল কৰি তোলে নাজিৰাৰ আকাশ-বতাহ। নিপুমণি বৰগোঁহাই, জিণ্টু বুঢ়াগোহাঁই, দ্বীপজ্যোতি বৰগোঁহাই, প্ৰতীম বৰগোঁহাই, দিপাঞ্চু দত্ত, উৎপল বড়া, চৰণ চাহু, সুৰজ কোৱৰ, উদ্দীপন গগৈ আদিকে ধৰি অৰ্ধশতাধিক আছু কৰ্মীয়ে অংশগ্ৰহণ কৰা এই প্ৰতিবাদী কাৰ্যসূচীৰ জৰিয়তে উক্ত দাবী মানি নললে অনাগত সময়ত শাসনাধিস্থ চৰকাৰৰ বিৰুদ্ধে আন্দোলন অধিক তীব্ৰতৰ হ’ব বুলি সকীয়াই দিয়ে।
ক’ৰোনাত মৃত্যু ইষ্টাৰ্ণ কমাণ্ডাৰ ব্ৰিগেডিয়াৰ বিকাশ ছামৱেল ৷
দৈনন্দিন বাৰ্তা ডেস্ক :
ভাৰতীয় সেনাৰ ইএমই ইষ্টাৰ্ণ কমাণ্ডাৰ ব্ৰিগেডিয়াৰ বিকাশ ছামৱেল ক’ভিড-১৯ত আক্ৰান্ত হৈ বৃহস্পতিবাৰে মৃত্যু হয় ৷ ক’ৰোনা ভাইৰাছৰ বিৰুদ্ধে তেওঁ ভালেমান দিন ধৰি যুঁজ কৰি আছিল ৷ তেওঁ পত্নী আৰু দুগৰাকী কন্যাক এৰি থৈ গৈছে৷ উল্লেখ্য যে তেওঁ পত্নী আৰু দুগৰাকী কন্যাও ক’ৰোনাত আক্ৰান্ত হৈছিল ৷ উল্লেখ্য যে ইষ্টাৰ্ণ কমাণ্ডাৰজন হ’ল ভাৰতীয় সেনাৰ ছটা অ’পাৰেচনেল কমাণ্ডাৰৰ এজন৷ মন কৰিব লগা যে যোৱা ৩০ জুনত বিএছএফৰ ৫৩জন জোৱান ক’ৰোনাত নতুনকৈ আক্ৰান্ত হৈছিল ৷ বিএছএফৰ মুঠ ১০১৮ জন জোৱান ক’ৰোনাত আক্ৰান্ত হয়৷ তাৰে ৬৫৯ জন সুস্থ হৈ উঠিছে ৷
২০৩৬ চন পৰ্যন্ত ৰাছিয়াৰ ৰাষ্ট্ৰপতি পদত পুটিন ৷
দৈনন্দিন বাৰ্তা ডেস্ক :
ভ্লাডিমিৰ পুটিনকে ৰাষ্ট্ৰপতি পদত ২০৩৬ চন পৰ্যন্ত থকা আৰু সাংবিধানিক সংস্কাৰৰ পক্ষে ভোট দিছে ৰাছিয়াত ৷ যোৱা সাত দিন ধৰি চলা ভোটৰ ৬০ শতাংশ গণনা বুধবাৰে সম্পন্ন হয়৷ সেই ফলাফল প্ৰকাশ কৰি এই দাবী কৰিছে মস্কোৰ ৰাষ্ট্ৰীয় নিৰ্বাচন আয়োগে ৷ আয়োগে লগতে দাবী কৰে যে ৭৬.৯ শতাংশ মানুহে সাংবিধানিক সংস্কাৰা পক্ষে মত দিছে ৷ ইয়াৰ মাজত সমকামী বিয়াত নিষেধাজ্ঞা জাৰিৰ দৰে ৰক্ষণশীল কাম যিদৰে আছে তেনেদৰে নূন্যতম পেনচন গেৰাণ্টিৰ দৰে জনমুখী কামো আছে৷ সেয়ে ভোটৰ সকলোতকৈ গুৰুত্বপূৰ্ণ অংশ আছিল পুটিনৰ পুননিৰ্বাচন ৷ কাৰণ ৰাষ্ট্ৰপতি পদত তেওঁৰ কাৰ্যকাল ২০২৪ চনত শেষ হ’ব৷ আয়োগৰ দাবী ৬৫ শতাংশ ভোটাৰে ভোট দিছিল৷ আনহাতে ভোটাৰৰ মাজত ক্ৰতি ৰখা নাছিল ক্ৰেমলিনে ৷ কোনেও যাতে ভোট দিয়াত অসুবিধা নহয় তাৰ বাবে সাত দিন ধৰি ভোটদাল চলে ৷ শেষৰ দিনা ৰাষ্ট্ৰীয় ছুটী ঘোষণা কৰে৷ ভোট দিলে বাৰী, গাড়ী, নগদ ধনৰ দৰে পুৰস্কাৰো ঘোষণা কৰে ক্রেমলিনে৷ উল্লেখ্য যে যোৱা ২২ এপ্ৰিলৰ পৰা এই প্ৰস্তাৱৰ সপক্ষে আৰু বিপক্ষে ভোটদানৰ ৷ কিন্তু ক’ভিড-১৯ৰ বাবে পিছুৱাই দিয়া হৈছিল৷ মঙলবাৰ আছিল ভোটৰ শেষ দিন ৷ সেইদিনা পুটিনে জনতাৰ উদ্দেশ্যি কৈছিল, এই সংস্কাৰ ৰাছিয়াৰ স্থিৰতা, নিৰাপত্তা আদিৰ বাবে অতি জৰুৰী ৷
অনলাইন শিক্ষা ব্যৱস্থাই ছাত্ৰ-ছাত্ৰীক সফল কৰিব নে ?
✍ জেউতি কলিতা
বৰ্তমান সমগ্ৰ বিশ্বতে ক’ৰনা ভাইৰাছ বিধে এক ভয়াৱহ ৰূপ ধাৰণ কৰি আছে আৰু এই সময়ছোৱা আমাৰ বাবে অতিকৈ ভয়াৱহক সময়। যিমানেই যুদ্ধকালীন ব্যৱস্হা গ্ৰহণ কৰা হৈছে সিমানেই নতুনকৈ ভাইৰাছত আক্ৰান্ত হৈছে লাখ লাখ লোক। এই মহামাৰীৰ পৰা নিজকে বচাই ৰাখিব পৰা একমাত্ৰ উপায় হৈছে সামাজিক দূৰত্ব বজাই ৰখা। বৰ্তমান সময়ত ক’ৰনা আক্ৰান্তৰ সংখ্যা যথেষ্ট হাৰত বৃদ্ধি পাইছে আৰু এইটো নিশ্চিত যে ভৱিষ্যতে আৰু বহু লোক এই মহামাৰীত আক্ৰান্ত হ’ব। কিন্তু আমি অলপ সময়ৰ বাবে ক’ৰনা ভাইৰাছৰ পৰা আঁতৰি আহি এটা কথা ভাবি চাওঁ আহক, যিহেতু দেশৰ বৰ্তমান পৰিস্থিতিৰ প্ৰতি লক্ষ্য ৰাখি কেন্দ্ৰীয় চৰকাৰে এক অনলাইন শিক্ষা ব্যৱস্থা গ্ৰহণ কৰিছে। কিন্তু এই শিক্ষা ব্যৱস্থাই ছাত্ৰ-ছাত্ৰীক সফল কৰিব নে ? ছাত্ৰ-ছাত্ৰী সকল যথেষ্ট ক্ষতিৰ সন্মুখীন হৈছে, কিয়নো টিভি, কম্পিউটাৰ, স্মাৰ্ট ফোন নথকা শিক্ষাৰ্থীসকল এই অনলাইন শিক্ষা ব্যৱস্থাৰ পৰা বঞ্চিত হ’ব। এই শিক্ষা ব্যৱস্থাই অধিক ক্ষতিগ্ৰস্ত কৰিব গাওঁ অঞ্চলৰ ছাত্ৰ-ছাত্ৰী সকল আৰু মধ্যবিত্ত শ্ৰেণীৰ শিক্ষাৰ্থী সকলক। কাৰণ সিহঁতৰ স্মাৰ্ট ফোন অথবা কম্পিউটাৰ থকা মানুহৰ সংখ্যা নিচেই কম। আনহাতে, গাওঁ অঞ্চলবোৰত স্মাৰ্ট ফোন থাকিলেও ইফালে আকৌ নেটৱৰ্কৰ অসুবিধাটোও আছে। যিহেতুকে অনলাইন শিক্ষা ব্যৱস্থাৰ বাবে অতিকৈ প্ৰয়োজনীয় বিষয় বস্তুটো হৈছে ইন্টাৰনেট সেৱা। তেনেস্হলত ভিতৰুৱা অঞ্চল সমূহত মোবাইল সেৱা আজিলৈকে উপলব্ধ হোৱা নাই। যিহেতু বৰ্তমান সময়ত ইন্টাৰনেট যোগে ছাত্ৰ-ছাত্ৰীসকলে পাঠদান কৰি আছে, সেই অঞ্চল সমূহৰ শিক্ষাৰ্থী সকল অনলাইন শিক্ষা গ্ৰহণৰ পৰা বঞ্চিত হৈছে।
২৬ জুনত কাহিলীপাৰাৰ ভুমিস্খলনত মৃত্যু উষা বৰা : ৰাজ্যচৰকাৰৰ হৈ মন্ত্ৰী সিদ্ধাৰ্থ ভট্টাচাৰ্যই আগবঢ়ালে ৪ লাখ টকাৰ আৰ্থিক অনুদান ।
যোৱা ২৬ জুনত মহানগৰীৰ কাহিলীপাৰাৰ ভুমিস্খলনত নিহত হোৱা উষা বৰাৰ পৰিয়াললৈ ৰাজ্য চৰকাৰে আগবঢ়ালে ৪ লাখ টকাৰ আৰ্থিক সাহৰ্য্য ৷ আজি পূৱ গুৱাহাটী সমষ্টিৰ বিধায়ক তথা গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্য উষা বৰাৰ কাহিলীপাৰাস্হিত বাসগৃহত উপস্থিত হৈ স্বামী হেমচন্দ্ৰ বৰাৰ হাতত ৰাজ্য চৰকাৰৰ তৰফৰ পৰা ৪ লাখ টকাক চেক প্ৰদান কৰে৷ মন্ত্ৰীগৰাকীয়ে লগতে শোক সন্তপ্ত পৰিয়ালবৰ্গলৈ গভীৰ সমবেদনা প্ৰকাশ কৰে৷ উল্লেখ্য যে ২৬ জুন তাৰিখে মহানগৰীৰ কাহিলীপাৰাৰ পাৱৰ হাউচৰ সমীপত এক ভুমিস্খলনৰ ফলত এখন প্ৰকাণ্ড দেৱাল খহি পৰে৷ খহি অহা দেৱালৰ শিলে হেমচন্দ্ৰ বৰাৰ বাসগৃহৰ বিস্তাৰ ক্ষতি কৰে৷ শিলৰ আঘাতত হেম চন্দ্ৰ বৰাৰ পত্নী উষা বৰা (৭২) মৃত্যু হয় ৷ দুৰ্ভাগ্যজনক ভুমিস্খলনত মৃত্যুক সাৱতি লোৱা হেমচন্দ্ৰ বৰাৰ পত্নীৰ বিয়োগত চৰকাৰৰ তৰফৰ পৰা ৪ লাখ টকাৰ এককালিন আৰ্থিক সাহৰ্য্য প্ৰদান কৰা হয় ৷
সাতশ মিটাৰ পথ নিৰ্মাণতো চূড়ান্ত হেমাহি গড়কাপ্টানী আৰু অ’এনজিচিৰ : নাজিৰা নগৰৰ ঐতিহাসিক টকৌ আলিৰে যাতায়তত যমৰ-যাতনা ভুগিছে জনগণে।
নাজিৰা : ২ শিৱসাগৰ জিলাৰ ৰাজ্যিক গড়কাপ্টানী বিভাগৰ নাজিৰা সংমণ্ডল আৰু অ’এনজিচি অসম সম্পদৰ মুখ্য কাৰ্যালয়ৰ বৰমূৰীয়া সকলৰ চূড়ান্ত অকমন্যতা আৰু হেমাহিৰ বাবেই নাজিৰা নগৰৰ ঐতিহাসিক টকৌ আলি (হবিবুৰ ৰহমান পথ)টোৰ সম্প্ৰতি মীন পাম সদৃশ দ দ গাত সমূহৰ বাবে পথটোয়েদি যাতায়তৰ ক্ষেত্ৰত জনগণে ভোগ কৰিছে যমৰ যাতনা। গড়কাপ্টানী বিভাগে অ’এনজিচি অসম সম্পদৰ নাজিৰাস্থিত মুখ্য কাৰ্যালয়ৰ প্ৰৱেশদ্বাৰৰ সন্মুখৰ পৰা ধোদৰ আলি সংযোগী প্ৰায় সাতশ মিটাৰ উপ পথছোৱা নিৰ্মাণৰ সামৰ্থ নোহোৱা হৈছে। দূৰ্নীতি-অনিয়মৰ অভিযোগেৰে সঘনাই সংবাদ মাধ্যমৰ শিৰোনামা দখল কৰা গড়কাপ্টানী বিভাগৰ নাজিৰা সংমণ্ডল কৰ্তৃপক্ষই বছৰ বছৰ ধৰি এই পথছোৱা নিৰ্মাণ নকৰাত ৰাইজে জলা-কলা খাব লগা হৈছে। এই ঐতিহাসিক পথটোৰ কাষত আছে নাজিৰা উচ্চতৰ মাধ্যমিক বহুমুখী বিদ্যালয়, নাজিৰা নগৰ বালিকা বিদ্যালয়, অসম কোম্পানী নাজিৰা ল’ৰা প্ৰাথমিক বিদ্যালয়, নাজিৰা ছোৱালী উচ্চতৰ মাধ্যমিক বিদ্যালয়। ইয়াৰ উপৰি আছে নাজিৰা মহকুমা প্ৰশাসনৰ গণৰাজ্য আৰু স্বাধীনতা দিৱস উদযাপন কৰা মুখ্যস্থল নাজিৰা খেল পথাৰৰ লগতে গান্ধী ময়দান। ইয়াৰ উপৰি এই পথেৰে ওপৰ নাজিৰা, কৈৱৰ্ত গাওঁ, বুদবাৰী সত্ৰ, ছানবছা, শেনৰ আলি, বাউলী মৈদাম, সোন্দৰ পুখুৰী আৰু অ’এনজিচিৰ নিজা দুটাকৈ আৱাস স্থলৰ বিষয়া-কৰ্মচাৰী ৰাইজৰ যাতায়ত হয়। সম্প্ৰতি এনে গুৰুত্বপূৰ্ণ পথছোৱাৰে যাতায়তৰ ক্ষেত্ৰত ত্ৰাহি মধুসূদন সুৱৰিব লগা হৈছে। এই জৰাজীৰ্ণ পথছোৱা সুপৰিকল্পিতভাৱে পুনৰ নিৰ্মাণৰ বাবে “অসম জাতীয়তাবাদী যুৱ-ছাত্ৰ পৰিষদ”, বৃহত্তৰ অসমীয়া যুৱ মঞ্চ, সংগ্ৰামী যুৱ ছাত্ৰ পৰিষদ আদিকে ধৰি বিভিন্ন জাতীয়-জনগোষ্ঠীয় সংগঠন আৰু ৰাইজে অ’ এনজিচি আৰু গড়কাপ্টানী বিভাগৰ ওচৰত বাৰম্বাৰ স্মাৰক পত্ৰ তথা আবেদন-নিবেদন কৰি অহাৰ পাছতো বিভাগৰ বৰমূৰীয়া সকলে কোনো গুৰুত্বাৰোপ কৰা নাই। উল্লেখযোগ্য যে, নাজিৰা সমষ্টিৰ বিধায়ক তথা অসম বিধান সভাৰ বিৰোধী দলপতি দেৱব্ৰত শইকীয়াৰ প্ৰচেষ্টাত বিগত বৰ্ষত গড়কাপ্টানী বিভাগে পথছোৱা মেৰামতিৰ বাবে প্ৰায় ৮ লাখ টকা আৱণ্টন দিছিল যদিও বিভাগৰ বিষয়া আৰু ঠিকাদাৰৰ হৰণ-ভোজনৰ বাবেই পথছোৱাৰ প্ৰকাণ্ড প্ৰকাণ্ড মীন পাম সদৃশ পুখুৰী সমূহেই পোত নাখালে। ঐতিহাসিক টকৌ আলিৰ এনে বিধ্বস্ত অৱস্থাৰ বাবেই সঘনাই দূৰ্ঘটনাৰ লগতে যান-বাহনৰ সঘন বিজুতি ঘটে। সেয়ে ৰাইজে গড়কাপ্টানী বিভাগ আৰু অ’এনজিচি কৰ্তৃপক্ষক শীৰ্ঘ্ৰে পথছোৱা পুনৰ নিৰ্মাণৰ বাবে দাবী জনাইছে।
অসমৰ এক লোক সংস্কৃতি আপুৰুগীয়া “পুতলা থিয়েটাৰক” জীয়াই ৰখাৰ প্ৰচেষ্টা ৰাজু বৰাৰ। সত্তৰ দশকত ৰাইজৰ অকুণ্ঠ সহাঁৰি লাভ কৰা পুতলা থিয়েটাৰ এতিয়া অতীত ।
নগাঁও : অসমৰ সংস্কৃতিৰ পথাৰত অনবদ্য এক লোক সংস্কৃতি হৈছে পুতলা থিয়েটাৰ। এসময়ত ৰাইজৰ অকুণ্ঠ সহাঁৰি লাভ কৰা ভ্ৰাম্যমান পুতলা থিয়েটাৰ এতিয়া অতীত হোৱাৰ পথত। সত্তৰ দশকতে মধ্য অসমৰ নগাঁৱৰ পশ্চিম প্ৰান্তত জনপ্ৰিয় হৈ পৰিছিল ভ্ৰাম্যমান পুতলা থিয়েটাৰ। লোককৃষ্টীৰ অন্যতম চালিকা শক্তি পুতলা অভিনয়ক সাৰথি কৰি লৈ সত্তৰ দশকতে কেইজন সংস্কৃতিবান সামাজ সংস্কৃতি লোক ক্ৰমে-প্ৰয়াত বেঠাৰাম বৰা, মিঠাবৰ ডেকা, দুখীয়া বৰা আৰু খগেন বৰাৰ নেতৃত্বত সত্তৰ দশকৰ মাজভাগতে নগাঁও জিলাৰ পশ্চিম প্ৰান্তত জন্ম হৈছিল এই পুতলা থিয়েটাৰৰ। তেতিয়াৰ পৰাই অসমৰ বিভিন্ন প্ৰান্তত দৰ্শক ৰাইজৰ সমাদৰ লাভ কৰিবলৈ সক্ষম হৈছিল এইসকল সাংস্কৃতিক মনৰ অধিকাৰী পুৰুষে৷ তেওঁলোকৰ মৃত্যুৰ পিছত পৰৰ্ৱতী সময়ত এই পুতলা থিয়েটাৰৰ ধাৰাটো অব্যাহত ৰাখি পুতলা থিয়েটাৰক সংস্কৃতিৰ পথাৰত জীয়াই ৰখাৰ প্ৰয়াস কৰিছে বৰ্তমান নগাঁৱৰ কাকমাৰীৰ নিৰণ চন্দ্ৰ বৰা আৰু প্ৰয়াত হৰিত্ৰা বৰা একমাত্ৰ পুত্ৰ ৰাজু বৰাই। নগাঁও জিলাৰ পশ্চিম প্ৰান্তৰ কাকমাৰী গাঁৱৰ ৰাজু বৰাৰ একান্ত প্ৰচেষ্টাত অংকুৰণ ঘটিছিল এটি পুতলা থিয়েটাৰ যাৰ নাম আছিল “ৰূপালীম পুতলা থিয়েটাৰ”। নগাঁৱৰ আনন্দৰাম ঢেকীয়াল ফুকন মহাবিদ্যালয় পৰা ১৯৯৬ চনতে প্ৰাণী বিজ্ঞান বিভাগত স্নাতক ডিগ্ৰী লাভ কৰা কাকমাৰী অঞ্চলৰ ৰাজু বৰাই এই প্ৰাচীন শিল্পকলা ধৰি ৰখাৰ প্ৰয়াস কৰিছে যদিও বৰ্তমান সময়ৰ প্ৰযুক্তি বিদ্যাৰ খৰটকীয়া গতিৰ লগত খাপ খাই চলিবলৈ অসমৰ্থ হৈ পৰিছে। বৰ্তমান অনাদ্ৰিত হৈ পৰিছে পুতলা থিয়েটাৰৰ পুতলা সমূহৰ লগতে থিয়েটাৰত ৱ্যৱহৃত সা-সৰঞ্জাম সমূহো ৷ এই পুতলা থিয়েটাৰৰ লগত জড়িত প্ৰায় ৩২ গৰাকী কৈ কলা-কুশলী সকলৰো সম্প্ৰতি জীৱনৰ পথ অনিশ্চয়তাৰ ফালে গতি কৰিছে। এই আপুৰুগীয়া লোক সংস্কৃতিবিধ জীয়াই ৰখাৰ বাবে ৰজাঘৰীয়াই যদি ব্যৱস্থা হাতত নলয় তেন্তে এই আপুৰুগীয়া লোক সংস্কৃতিবিধ এদিন সংস্কৃতিৰ পথাৰৰ পৰা লুপ্ত হোৱাটো প্ৰায় নিশ্চিত হৈ পৰিছে। এইবাৰ বিশেষকৈ ২০১৯-২০ বৰ্ষত লকডাউনে বাৰুকৈয়ে প্ৰভাৱিত কৰিলে এই পুতলা থিয়েটাৰৰ সংস্কৃতিকৰ লগত জড়িত কাকমাৰীৰ ৰূপালীম পুতলা থিয়েটাৰ দলটিক৷ ইফালে এই সংস্কৃতিৰ অৱনতি ঘটাৰ লগে লগে নাট্যকাৰ, পৰিচালক তথা ৰূপালীম থিয়েটাৰৰ ব্যৱস্হাপক উচ্চ শিক্ষাৰে শিক্ষিত ৰাজু বৰাই জীৱন নিৰ্বাহ কৰিবলৈ এক বিকল্প পথ গ্ৰহণ কৰিছে৷ নিজ ঘৰৰ চোতালৰ প্ৰায় দুইকঠা মাটিত বিজ্ঞান সন্মতভাৱে গ্ৰীণিফ’ল, টাৰ্কী, ব্লেক চিকেন, চিল্কি চিকেন, এ’ছিল, স্থানীয় কুকুৰা, ৰাজহাঁহ, চিনাহাঁহ, পাতিহাঁহ, ইণ্ডিয়ান ৰানাৰ, হোৱাইট প্ৰিকেন, ব’তা চৰাই, পাৰকে ধৰি প্ৰায় ১৪-১৫ বিধ বিভিন্ন প্ৰজাতিৰ চৰাই পোহপালৰে ব্যৱসায় আৰম্ভ কৰাৰ লগতে বায়’ফ্লক পদ্ধতিৰে মৎস্য পালন কৰিবলৈ বিভিন্ন প্ৰণালীৰ কাম আৰম্ভ কৰি সমগ্ৰ অঞ্চলতে স্বাৱলম্বীতাৰ এক অৰ্পূব নিদৰ্শন দাঙি ধৰিছে। ৰাজু বৰাৰ এই ফ্ৰামতে কৰ্ম কৰি পৰিয়াল পোহপাল দি আহিছে অঞ্চলৰ কেইবাটাও পৰিয়ালে। বৰ্তমান বৃদ্ধ পিতৃ নিৰণ চন্দ্ৰ বৰা, পত্নীৰ ওপৰি এগৰাকী কণ্যাৰে এখন সুখৰ সংসাৰৰ দায়িত্ব পালন কৰি আহিছে ৰাজু বৰাই৷ যোৱা ২৪ মাৰ্চৰ পৰা দেশজুৰি আৰম্ভ হোৱা লকডাউনৰ এই যতিল পৰিস্থিতিৰ সময়ত নিজ হাতৰ মুঠিত ধৰি ৰখা পুতলা থিয়েটাৰৰ পৰা কোনো উপাৰ্জন নোহোৱাত ৰাজু বৰাই আজিৰ পৰা দুবছৰ আগতে নিজ ঘৰতে মুকলি কৰা স্থানীয় কুকুৰাৰ লগতে অন্যান্য প্ৰজাতিৰ চৰাই সমূহ এখনি ফাৰ্মৰ আৰু সেই ফাৰ্মত উৎপাদিত কুকুৰা সমূহ বিক্ৰী কৰি দৈনিক আঠশ পৰা পোন্ধৰশ টকালৈকে উপাৰ্জন কৰি স্বাৱলম্বিতাৰ এক নিৰ্দশন দাঙি ধৰিছে৷ উল্লেখ্য যে, পুতলা থিয়েটাৰ দলৰ জন্মদাতা বেঠাৰাম বৰাৰ নাতি ৰাজু বৰাই বৰ্তমান নিজৰ বাহুবলেৰে কৰি গৈছে এই সকলো কাৰ্য৷ লাভ কৰা বেংকৰ পৰা কোনো ঋণ আদি৷ কৰ্মোদ্যমী ৪৬ বছৰীয়া এইগৰাকী যুৱকৰ স্বাৱলম্বীতাক শলাগ লৈছে অঞ্চলৰ বহু ৰাইজে লগতে অসমৰ আপুৰুগীয়া সংস্কৃতি এই পুতলা থিয়েটাৰৰ লগত জড়িত এই কলাকুশলী সকলক চৰকাৰৰ ফালৰ পৰা উপযোক্ত সহায় তথা সাহাৰ্যৰ আহ্বান জনাইছে সংস্কৃতি প্ৰেমী ৰাইজে৷
চীনা এপ ত্যাগ প্ৰধানমন্ত্ৰী মোডীৰ ৷
দৈনন্দিন বাৰ্তাৰ ডেস্ক :
৫৯টা চীনা এপ বন্ধ কৰাৰ দুটা দিনৰ পাছতে প্ৰধানমন্ত্ৰী নৰেন্দ্ৰ মোডীয়ে চীনা এপ উইব’ ত্যাগ কৰাৰ সিদ্ধান্ত লৈছে ৷ উল্লেখ্য যে এইটো এটা মাইক্ৰ-ব্লগিং ৱেবছাইট ৷ এই এপটোত কেইটামান বছৰৰ আগতে প্ৰধানমন্ত্ৰী মোডীয়ে যোগ দিছিল৷ উল্লেখ্য যে মোডীয়ে নিজে কৰা বুধবাৰে ইয়াত থকা প্ৰফাইল ফটো, প’ষ্ট আৰু মতামতবোৰ আঁতৰ কৰে ৷ ভিআইপি একাউণ্টবোৰৰ বাবে উইব’ এৰিবলৈ অধিক জটিল পদ্ধতি আছে৷ যাৰ কাৰণে অফিচিয়েল প্ৰক্ৰিয়া আৰম্ভ হৈছিল ৷ এই প্ৰাথমিক অনুমতি দিয়া পলম হৈছিল৷ প্ৰধানমন্ত্ৰী মোডীয়ে উইব’ত ১১৫ টা প’ষ্ট কৰিছিল ৷ এইবোৰ হাতেৰেই আঁতৰ কৰাৰ সিদ্ধান্ত লয় ৷ তাৰে ১১৩ টা আঁতৰ হয় ৷ দুটা প’ষ্ট বাকী আছে য’ত চীনৰ প্ৰধানমন্ত্ৰীৰ সৈতে প্ৰধানমন্ত্ৰীৰ ফটো আছে ৷ এইটো প’ষ্ট আঁতৰ কৰাটোত সমস্যা আছে ৷