অনলাইন বাৰ্তা : ভাৰতৰ বিৰুদ্ধে চক্ৰান্ত কৰিবলৈ গৈ পুনৰ ব্যৰ্থ হ’ল পাকিস্তান ৷ ৰাষ্ট্ৰসংঘৰ নিৰাপত্তা পৰিষদৰ ১২৬৭ কমিটীৰ সহায়ত দুই ভাৰতীয় নাগৰিকক আন্তৰ্জাতিক সন্ত্ৰাসবাদী সজোৱাৰ চেষ্টা কৰিছিল ইমৰান খান চৰকাৰে ৷ ১২৬৭ কমিটীৰ কামৰ পদ্ধতিত ধৰ্মীয় ৰং লগাই ৰাজনীতি কৰিবলৈ বিচাৰিছিল ৷ কিন্তু প্ৰতিৱেশী চিৰবৈৰী দেশখনৰ সেই উদ্দেশ্য পুৰণ নহ’ল ৷ আন্তৰ্জাতিক মহলৰ সহায়ত নতুন দিল্লীক বিপদত পেলাবলৈ গৈ নিজেই বিপদৰ সন্মুখীন হ’ল পাকিস্তান ৷ ৰাষ্ট্ৰসংঘৰ নিৰাপত্তা পৰিষদ (ইউএনএছচি)ৰ ১২৬৭ কমিটীৰ প্ৰস্তাৱনা অনুসৰী অংগাৰা আপ্পাজি আৰু গোবিন্দ পাটনায়ক নামৰ দুজন ভাৰতীয় নাগৰিকক আন্তৰ্জাতিক সন্ত্ৰাসবাদী সজোৱাৰ চেষ্টা কৰিছিল পাকিস্তানে ৷ ইয়াৰ বাবে নিৰাপত্তা পৰিষদত প্ৰস্তাৱ দাখিল কৰা হৈছিল ৷ কিন্তু ইয়াত কোনো প্ৰমাণ জমা দিব পৰা নাছিল ৷ তদুপৰি ইছলামাবাদৰ এই প্ৰস্তাৱৰ পত্ৰপাঠ বাতিল কৰি দিয়ে আমেৰিকা, ফ্ৰান্স, জাৰ্মানী, বেলজিয়াম আৰু ব্ৰিটেইনে ৷ বুধবাৰে এই বিষয়টোৰ কথা উল্লেখ কৰি পাকিস্তানৰ অপচেষ্টা ৰখাৰ বাবে নিৰাপত্তা পৰিষদৰ সদস্যসকলক ধন্যবাদ জনায় ৰাষ্ট্ৰসংঘত ভাৰতৰ স্থায়ী প্ৰতিনিধি টি এছ তিৰুমূৰ্তিয়ে ৷ তেওঁ টুইট কৰি কয়, ৰাষ্ট্ৰসংঘৰ নিৰাপত্তা পৰিষদৰ ১২৬৭ কমিটীৰ কাৰ্য পদ্ধতিত ধৰ্মীয় ৰং সানিবলৈ চেষ্টা কৰিছিল পাকিস্তানে ৷ কিন্তু তেওঁলোকৰ এই উদ্দেশ্য ব্যৰ্থ কৰে নিৰাপত্তা পৰিষদে ৷ পাকিস্তানৰ এই অপচেষ্টা ৰোধ কৰাত পৰিষদৰ সকলো সদস্যক ধন্যবাদ জনায় ৷

দৈনন্দিন বাৰ্তা ডেস্ক : ক’ৰোনাৰ বাবেই দেশৰ অৰ্থনীতিৰ দুৰৱস্থা হ’ল ৷ ইয়াৰ লগতে বহু মানুহ কৰ্মহীন হ’ল ৷ গাঁৱৰ পৰা নগৰলৈকে সকলোতে একেই ছবি ৷ দিন হাজিৰা কৰা মানুহে ঘৰতে বহি থাকিব লগা হ’ল ৷ এইবাৰ নগৰত থকা কাম হেৰুৱা মানুহক কৰ্মসংস্থাপন দিব কেন্দ্ৰীয় চৰকাৰে ৷ চহৰাঞ্চলত নিবনুৱাৰ বাবে চাকৰিৰ প্ৰকল্প এনৰেগা প্ৰসাৰ ঘটোৱাৰ কামনা কৰিছে মোডী চৰকাৰে ৷ অৱশ্যে ডাঙৰ চহৰবোৰত নহয়, দেশৰ সৰু সৰু চহৰবোৰত ১০০ দিনৰ কাম আৰম্ভ কৰাৰ চিন্তা কৰিছে চৰকাৰে ৷ এই প্ৰসংগত কেন্দ্ৰীয় আৱাস আৰু নগৰ উন্নয়ন মন্ত্ৰালয়ৰ যুটীয়া সচিব সঞ্জয় কুমাৰে জনায়, সৰু চহৰত এই প্ৰকল্পৰ কাম হ’ব পাৰে ৷ যোৱা বছৰৰ পৰা এই বিষয়ে চিন্তা কৰিছে চৰকাৰে ৷ বৰ্তমান পৰিস্থিতিত এই পৰিকল্পনা অধিক ত্বৰান্বিত হৈছে ৷ ইয়াৰ বাবে প্ৰাথমিক পৰ্যায়ত ৩৫০ বিলিয়ন টকা খৰচ হ’ব বুলি সচিবজনে জনাইছে ৷ জানিব পৰা মতে, চলিত বছৰত গ্ৰামীণ কৰ্মসংস্থাপনৰ প্ৰকল্পত ১ ট্ৰিলিয়নৰ বেছি টকা দিছে মোডী চৰকাৰে ৷ যি প্ৰকল্পত কৰ্মীৰ বছৰী ১০০ দিনত প্ৰতিদিনে ২০২ টকা উপাৰ্জন কৰে ৷ উল্লেখ্য যে কংগ্ৰেছৰ তৰফৰ পৰা বাৰম্বাৰ দাবী কৰা হৈছিল যে চহৰাঞ্চলত ১০০ দিনৰ কাম আৰম্ভ কৰা হওক ৷ এইবাৰ সেই দাবীক কাৰ্যত হাত দিছে কেন্দ্ৰীয় চৰকাৰে ৷ পৰিসংখ্যা মতে লকডাউনৰ বাবে মাৰ্চ মাহৰ পৰা দেশত প্ৰায় ১ কোটি ২০ লাখ মানুহে কাম হেৰুৱাইছিল ৷ নিবনুৱাৰ হাৰ ২৩ শতাংশ বাঢ়িছিল ৷

দৈনন্দিন বাৰ্তা ডেস্ক : কেন্দ্ৰীয় মন্ত্ৰীসভাই বুধবাৰে অসামৰিক কৰ্মচাৰীৰ বাবে দক্ষতা তৈয়াৰ কৰা কৰ্মসূচী মিছন কৰ্মযোগী অনুমোদন কৰে ৷ ইয়াৰ দ্বাৰা ভৱিষ্যতে তেওঁলোকক সহায় কৰিব বুলি জনাইছে ৷ এয়া চৰকাৰৰ সকলোতকৈ বৃহৎ মানৱসম্পদ উন্নয়ন সংস্কাৰ, কেন্দ্ৰীয় মন্ত্ৰী প্ৰকাশ জাভেদকাৰে মন্ত্ৰীসভাৰ সিদ্ধান্ত সম্পৰ্কে এক প্ৰেছ বিজ্ঞপ্তিত এই কথা জনাইছে ৷ প্ৰধানমন্ত্ৰীৰ অধ্যক্ষতাত নিৰ্বাচিত কেন্দ্ৰীয় মন্ত্ৰী আৰু মুখ্যমন্ত্ৰীৰে এক শীৰ্ষ এইচআৰ কাউঞ্চিল হ’ব ৷ বিশিষ্ট চিন্তাবিদ (বিশিষ্ট শিক্ষাবিদ আৰু বিশ্ব নেতা) আৰু অসামৰিক সেৱাৰ নেতৃত্ব ইয়াত থাকিব ৷ এই আঁচনিত চৰকাৰী কৰ্মচাৰী কেনে হোৱা উচিত সেই বিষয়ে চৰকাৰৰ দৃষ্টিভংগীৰ ওপৰত ভিত্তি কৰিব ৷ বিশ্বৰ এক প্ৰত্যাহ্বান মোকাবিলা কৰাত আজি এজন অসামৰিক কৰ্মচাৰীক কল্পনাপ্ৰসূত আৰু উদ্ভাৱনী, উদ্যমী আৰু শালীন, পেশাদাৰ আৰু প্ৰগতিশীল, উদ্যমী আৰু সক্ষম, স্বচ্ছ আৰু প্ৰযুক্তি সক্ষম আৰু গঠনমূলক আৰু সৃজনশীল হ’ব, কৰ্মচাৰী আৰু প্ৰশিক্ষণ বিভাগৰ সচিব চি চন্দ্ৰমৌলিয়ে এইদৰে কয় ৷ তেওঁ মন্ত্ৰী জাভেদকাৰৰ সৈতে সংবাদ মেলত ভাষণ দিয়ে ৷ তেওঁ লগতে কয় যে মিছন কর্মযোগী ব্যক্তি (অসামৰিক কৰ্মচাৰী) আৰু প্ৰাতিষ্ঠানিক সক্ষমতা বৃদ্ধিত মনোনিৱেশ কৰিব ৷ বিভাগবোৰৰ পৰা সচিব পৰ্যন্ত সকলোৰে বাবে এই আঁচনি অধিগম্য হ’ব৷ ইয়াত দুটা পথ থাকিব, স্ব-চালিত, য’ত আধিকাৰিক আগ্ৰহৰ ক্ষেত্ৰত বাচি ল’ব পাৰিব আৰু গাইড কৰিব পাৰে, য’ত বিষয়াসকলে তেওঁলোকৰ তেওঁলোকৰ কাম কাৰ্যকৰিভাৱে সম্পাদন কৰিবৰ বাবে সেয়া সৰবৰাহ কৰা হ’ব৷ আনহাতে কেন্দ্ৰীয় মন্ত্ৰীসভাই আন তিনিখন বুজাবুজি চুক্তিত অনুমোদন কৰে বুলি মন্ত্ৰী জাভেদকাৰে কয় ৷

দৈনন্দিন বাৰ্তা ডেস্ক : গালৱান উপত্যকাত সেনাৰ সংঘৰ্ষৰ পাচত কাৰ্যত ভাৰত-চীনৰ ছাইবাৰ যুদ্ধ আৰম্ভ হয় ৷ প্ৰথম পৰ্যায়ত ৫৯টা এপ নিষিদ্ধ কৰাৰ পাচত কেন্দ্ৰই জনাইছিল, কেন্দ্ৰৰ ২৫০টা এপ পৰ্যৱেক্ষণৰ ভিতৰত ৰাখিছে ৷ পূৱ লাডাখত পুনৰ চীনে অনুপ্ৰৱেশৰ চেষ্টা চনাই থকাৰ সময়তে এইবাৰ ১১৮টা এপ নিষিদ্ধ কৰিলে মোডী চৰকাৰে ৷ এইবোৰৰ ভিতৰত সবাতোকৈ গুৰুত্বপূৰ্ণ এপটো হ’ল ‘পাবজী’। ভাৰতে এই এপবোৰ পুনৰ ডাউনলড কৰিবলৈ নিদিয়ে ৷ এই সকলোবোৰ মিলি ২২৪টা চীনা এপ নিষিদ্ধ কৰিলে ভাৰতে ৷ কেন্দ্ৰীয় তথ্য প্ৰযুক্তি মন্ত্ৰালয়ে জনোৱা মতে তথ্য প্ৰযুক্তি আইনৰ ৬৯এ ধাৰাত এই এপবোৰ নিষিদ্ধ কৰা হৈছে ৷ কাৰণ হিচাপে কোৱা হৈছে, এই সকলো এপ ইমান কামত লিপ্ত, যিটো ভাৰতৰ সার্বভৌমত্ব আৰু অখণ্ডতা, প্ৰতিৰক্ষা, নিৰাপত্তা আৰু জনস্বাৰ্থৰ পৰিপন্থী ৷ কোটি কোটি ভাৰতীয় ম’বাইল আৰু ইণ্টাৰনেট ব্যৱহাৰকাৰীৰ নিৰাপত্তাৰ স্বাৰ্থত এই সিদ্ধান্ত লোৱা হয় বুলি জনাইছে তথ্য প্ৰযুক্তি মন্ত্ৰালয়ে ৷ স্মৰ্তৱ্য যে যোৱা ১৫ জুনত গালৱান উপত্যকাত প্ৰকৃত নিয়ন্ত্ৰণ ৰেখাত সেনাৰে সংঘৰ্ষত কমাণ্ডাৰ পৰ্যায়ৰ এজন বিষয়া আৰু ১৯জন জোৱানৰ মৃত্যু হৈছিল ৷ তাৰ পাচতে নতুন দিল্লী-বেইজিঙৰ মাজত সংঘাত চৰম পৰ্যায়ত উপনীত হয় ৷ তাৰ ফলতেই যোৱা ২৯ জুনত টিকটক, ইউচি ব্ৰাউজাৰ, শ্বেয়াৰইট, উইচাট, ভিগ’ লাইভসহ ৫৯টা এপ নিষিদ্ধ কৰিছিল তথ্য প্ৰযুক্তি মন্ত্ৰালয়ে ৷ তাৰ কিছু দিনৰ পাচত এই সকলো এপৰ সহযোগী আন ৪৯টা এপ বাতিল কৰা হৈছিল ৷ ইয়াৰ লগতে কেন্দ্ৰই জনাই যে সকলো মিলি ২৫০ টা চীনা এপ কেন্দ্ৰই তীক্ষ্ণ দৃষ্টি ৰাখিছে ৷ সেই তালিকাৰ পৰাই ১১৮টা এপ নিষিদ্ধ কৰা হ’ল ৷ তথ্য প্ৰযুক্তি মন্ত্ৰালয়ে জনাইছে যে সমাজৰ বিভিন্ন স্তৰৰ পৰা পাবজীৰ দৰে কিছু এপ লৈ অভিযোগ দিছিল বিভিন্ন মহলে ৷ গ্ৰাহকৰ তথ্য হাতত লৈ সেই তথ্যৰ অপব্যৱহাৰসহ নানা অভিযোগ উত্থাপন হৈছিল ৷ মন্ত্ৰালয়ে লক্ষ্য কৰিছে, এয়া অতি গুৰুতৰ উদ্বেগৰ বিষয় ৷ কেন্দ্ৰীয় গৃহ মন্ত্ৰালয়ে ছাইবাৰ ক্ৰাইম শাখাক এই এপবোৰ ব্লক কৰিবলৈ কৈছিল ৷