নগাঁও : বি ফাৰ্ম ডিগ্ৰী প্ৰদানৰ নামত নগাঁৱৰ এখন শিক্ষা প্রতিষ্ঠানৰ বিৰুদ্ধে ভয়ংকৰ জালিয়াতিৰ আশ্ৰয় লোৱাৰ অভিযোগ উত্থাপিত হৈছে । শিক্ষা প্রতিষ্ঠানখনে উচ্চতৰ মাধ্যমিকৰ বিজ্ঞান শাখাত ধনৰ বিনিময়ত চাৰ্টিফিকেট প্ৰদানৰ অভিযোগ জিলা প্ৰশাসনৰ ওচৰত দাখিল কৰিছে এগৰাকী চিকিৎসকে। হাম এক গ্ৰুপ অৱ ইনষ্টিটিউট নামৰ প্ৰতিষ্ঠানটোৰ বিৰুদ্ধে উঠিছে এই অভিযোগ। ২০১৭ চনতে ৰাষ্ট্ৰীয় সংখ্যালঘূ শিক্ষা সঞ্চালকালয়ে বাতিল কৰা সংখ্যালঘূ শিক্ষা বৰ্ডৰ নামত উচ্চতৰ মাধ্যমিক বিজ্ঞান শাখাত উৰ্ত্তীণ হোৱাৰ চাৰ্টিফিকেট প্ৰদান কৰি সেইসকল ছাত্ৰকে পুনৰ ডি ফাৰ্মৰ ডিগ্ৰী প্ৰদান কৰে এইখন প্ৰতিষ্ঠানে। আৰ কে ডি এফ আৰু এচ ভি এন নামৰ দুখন বিশ্ববিদ্যালয়ৰ পৰা BPharm, বি ফাৰ্ম, বি এ, বিএচ চি, এম এচ চি, পিএইচ ডি, এমফিল,বি এড আদি ডিগ্ৰী প্ৰদান কৰা এইখন প্ৰতিষ্ঠানে ছাত্ৰ-ছাত্ৰীৰ পৰা প্ৰতিটো ডিগ্ৰীৰ বাবদ চাৰি লক্ষাধিক টকা আদায় লয় বুলিও অভিযোগ উঠিছে।অৱশ্যে এই অভিযোগ সন্দৰ্ভত সাংবাদিকে সোধা প্ৰশ্নৰ কোনো উত্তৰ নিদিলে শিক্ষা প্ৰতিষ্ঠানখনৰ মুৰব্বী ইমামূল হাছানে।সংবাদ মাধ্যমৰ সন্মুখীন হ’ব নিবিচৰা প্ৰতিষ্ঠানটোৰ মুৰব্বী গৰাকীৰ বিৰুদ্ধে নগাঁও জিলা উপায়ুক্তক অভিযোগ দাখিল কৰিছে গোলাঘাটৰ চিকিৎসক ডা: কামাল হাছানে । ডা: হাছানৰ মতে শিক্ষা ব্যৱস্থাৰ প্ৰতি চৰম ভাবুকি কঢ়িয়াই অনা শিক্ষা প্ৰতিষ্ঠান খনে কোনোধৰণৰ পাঠদান অথবা পৰীক্ষা অনুষ্ঠিত নকৰাকৈয়ে কেৱল বৃহৎ পৰিমাণৰ ধনৰ বিনিময়ত বিভিন্ন আদবয়সীয়া লোকক প্ৰদান কৰি আহিছে ডিগ্ৰী। আনকি এজন ছাত্ৰক মাচুল সংগ্ৰহৰ নামত দুখন বিশ্ববিদ্যালয়ৰ ৰছিদ প্ৰদান কৰাৰো প্ৰমাণ ইতিমধ্যে জিলা প্ৰশাসনক দাখিল কৰিছে চিকিৎসক গৰাকীয়ে । উল্লেখযোগ্য যে প্ৰতিজন ছাত্ৰৰ পৰা ৪লাখকৈ টকা সংগ্ৰহ কৰা এইখন প্ৰতিষ্ঠানে বিগত ৫বছৰত শিক্ষাৰ নামত চলোৱা ব্যৱসায়ৰ বিৰুদ্ধে তদন্ত চলোৱাৰো দাবী তুলিছে। চিকিৎসক গৰাকীৰ মতে বহু আদবয়সীয়া লোকক কোনোধৰণৰ শিক্ষা গ্ৰহণ নকৰাকৈয়ে ৪লাখ টকাৰ বিনিময়ত ডিগ্ৰী প্ৰদান কৰা কাৰ্যই ৰাজ্যখনৰ শিক্ষাবিভাগৰ লগতে স্বাস্থ্যখণ্ডকো চৰম ক্ষতিগ্ৰস্ত কৰিব। সেয়ে উল্লেখিত শিক্ষা প্রতিষ্ঠানখনৰ বিৰুদ্ধে তদন্ত কৰি বিহিত ব্যৱস্থা গ্রহণ কৰিবলৈ ৰাজ্যৰ শিক্ষা মন্ত্ৰী ড° হিমন্ত বিশ্ব শৰ্মাক অভিযোগকাৰী চিকিৎসক গৰাকীয়ে আহ্বান জনায় । ইপিনে ইউ ই বি অৰ্থাৎ উৰ্দু এডুকেচন বৰ্ডৰ বৈধতাক লৈ দিল্লী উচ্চ ন্যায়ালয়ত গোচৰ চলি থকাৰ সময়তে নগাঁৱৰ এইখন শিক্ষানুষ্ঠানে উৰ্দু শিক্ষা ব’ৰ্ডৰ নামত চাৰ্টিফিকেট প্ৰদান কৰাৰ জৰিয়তে কোটি কোটি টকাৰ ব্যৱসায় কৰা ঘটনাৰ তদন্ত কৰাৰ প্ৰয়োজন যদিও নগাঁও জিলা প্ৰশাসনে ইমানদিনে কিয় কৰা নাই সেয়াও ৰহস্যজনক হৈ পৰিছে । আনহাতে, নাম প্ৰকাশত অনিচ্ছুক প্ৰতিষ্ঠানখনৰ একাংশ ছাত্ৰৰ মতে জিলা প্ৰশাসন তথা নগাঁও জিলা শিক্ষাবিভাগৰ একাংশ দুৰ্নীতিগ্ৰস্ত বিষয়াৰ এই প্ৰতিষ্ঠানটোৰ লগত আছে গোপন সম্পৰ্ক। পিছে শিক্ষাখণ্ডত দূৰ্নীতি তথা অনিয়ম কঠোৰ হাতেৰে দমন কৰিম বুলি হুংকাৰ দি অহা মন্ত্ৰী ড: হিমন্ত বিশ্ব শৰ্মাই এই বিষয়ত কেতিয়া তদন্ত কৰিব সেয়া আগ্ৰহৰে বাট চাইছে নগাঁৱৰ প্ৰবীণ শিক্ষাবিদ সকলে ।

গেলেকী : নাজিৰা মহকুমা অন্তৰ্গত (চেলেং পথাৰ) নিৰ্মলীয়া গাঁৱত অৱস্থিত তেল আৰু প্ৰাকৃতিক গেছ নিগমৰ এটি তেল খাদত নিয়োজিত কৰ্মচাৰীসকলৰ ৩১ জুলাইলৈকে ৫৫জন কৰ্মচাৰীৰ স্বোৱাব পৰীক্ষাৰ অন্তত ৯ গৰাকীৰ দেহত ক’ভিড-১৯ পজিটিভ পোৱা গৈছে। এই তথ্য লাভ কৰা পাছতে নাজিৰা মহকুমা প্ৰশাসনে ততালিকে তেল খাদটো কনটেইনমেণ্ট জ’ন হিচাবে চিনাক্ত কৰি ঘোষণাৰ বাবে ব্যৱস্থা গ্ৰহণৰ লগতে আক্ৰান্ত সকলক চিকিৎসালয়লৈ প্ৰেৰণ কৰিছে। ইয়াৰোপৰি তেল খাদৰ এলেকাটো বীজাণুনাশকৰণ কৰা হৈছে। ঠিক সেই সময়ত কোনো লোক প্ৰত্যক্ষ বা পৰোক্ষভাৱে তেখেতসকলৰ সংস্পৰ্শত আহিছিল বুলি অনুভৱ কৰে। তেন্তে স্ব-ইচ্ছাৰে স্বোৱাব পৰীক্ষা কৰিবৰ বাবে সদৰ প্ৰশাসনৰ তৰফৰ পৰা তেখেত লোকক অনুৰোধ জনোৱা হৈছে। আনহাতে ৰাইজক ভয় অথবা শংকা মনত নাৰাখিবৰ বাবে নাজিৰা মহকুমা প্ৰশাসনে পুনৰবাৰ অনুৰোধ জনাইছে।

জামুগুৰিহাট : জামুগুৰিহাটৰ পশ্চিমাঞ্চলৰ চকীঘাটত যোৱা ৩০ জুলাইত একাংশ সন্দেহজনক নাগৰিকৰ হাতত চক্ৰ বিষয়া,আৰক্ষী বিষয়াসহ ১২ জনকৈ খিলঞ্জীয়া লোক আক্ৰমণৰ বলি হোৱাৰ পিছত আজি জীয়া ভৰলী নদীৰ পাৰৰ সেই ঘটনাস্থলী পৰিদৰ্শন কৰি বিস্ফোৰক মন্তব্য আগবঢ়াই খুমতাইৰ বিধায়ক মৃণাল শইকীয়াই। একাংশ জাতীয় সংগঠন, কৃষক সংগঠন আৰু ভুৱা বুদ্ধিজীৱীৰ পৰা লাভ কৰা সাহসৰ বাবেই সন্দেহজনক বাংলাদেশী নাগৰিকে এইদৰে খিলঞ্জীয়াৰ ওপৰত জপিয়াই পৰিবলৈ সুবিধা পোৱা বুলি উল্লেখ কৰি নেতা বনোৱা এগৰাকী কৃষক নেতা আজি জেলত নথকা হলে এইসকল সন্দেহজনক লোকক সপক্ষে ওকালতি কৰিবলৈ জামুগুৰিহাটত উপস্থিতি হ’লহি হেতেন বুলিও উল্লেখ কৰে।নগাওঁ, মৰিগাঁও, দৰংৰ পাছত এতিয়া শোণিতপুৰ জিলাখনো বাংলাদেশী নাগৰিকৰ হাতলৈ নিবলৈ ভয়াবহ পৰিকল্পনা চলা বুলি উল্লেখ কৰি বিধায়ক শইকীয়াই এই ক্ষেত্ৰত সন্দেহজনক নাগৰিকৰ আগ্ৰাসী ৰূপ বাধা দিয়াৰ ক্ষেত্ৰত চতিয়াৰ বিধায়ক পদ্ম হাজৰিকাৰ দৰে সাহসৰে আগবাঢ়ি আহিব লাগিব বুলিও উল্লেখ কৰে। খিলঞ্জীয়াৰ ওপৰত হোৱা ভয়াৱহ আক্ৰমণৰ পাছতো প্ৰদেশ কংগ্ৰেছৰ সভাপতি ৰিপুণ বৰাই খিলঞ্জীয়াৰ পক্ষ ন’লৈ সন্দেহজনক নাগৰিকৰ পক্ষ লোৱা বুলি উল্লেখ কৰি অসমৰ বিৰোধী দল এতিয়া পাকিস্তান পন্থী বুলি বিস্ফোৰক মন্তব্য আগবঢ়াই ।অসমত এতিয়া এটা হিন্দুস্থান পন্থী আৰু আন এটা পাকিস্থান পন্থী বুলি দুটা পন্থী থকা বুলি উল্লেখ কৰি পাকিস্থান পন্থীৰ দ্বাৰা শোণিতপুৰ খনো দ্বিতীয় বাংলাদেশত পৰিণত কৰোৱাৰ ষড়যন্ত্ৰ চলা বুলি তাৎপযপূৰ্ণ মন্তব্য আগবঢ়াই ।মনকৰিবলগীয়া যে সন্দেহজনক নাগৰিকৰ কবলৰ পৰা জামুগুৰিহাটৰ চকীঘাটত বেদখল মুক্ত কৰা চৰকাৰী মাটি একাংশ আত্মসহায়ক গোটক চমজাই দিবলৈ যাওঁতে এই সন্দেহজনক নাগৰিকৰ আক্ৰমণত যোৱা ৩০ জুলাইত খিলঞ্জীয়া লোক আহত হোৱাৰ পাছত আজি সেই ঘটনাস্থলী খুমতাই বিধায়ক মৃণাল শইকীয়াই পৰিদৰ্শন কৰাৰ সময়ত তেওঁৰ সংগ দিয়ে চতিয়াৰ বিধায়ক পদ্ম হাজৰিকাই৷

গেলেকী : আজি পবিত্ৰ ঈদ-উল-জোহা অথবা ঈদ-উল-আজহা৷ সমগ্ৰ বিশ্বতে ইছলাম ধৰ্মাৱলম্বী লোকসকলে পালন কৰিছে ত্যাগৰ প্ৰতিভূ স্বৰূপ এই উৎসৱটি। শিৱসাগৰ জিলা অন্তৰ্গত নাজিৰা মহকুমা লগতে জয়সাগৰতো বিশেষ সম্প্ৰদায়ৰ লোক সকলে উলহ-মালহেৰে ঈদ-উল-জোহা পালন কৰা ৰাইজে প্ৰত্যক্ষ কৰিছে। নিজৰ প্ৰিয় সম্পদ এটি এই দিনটোত আল্লাৰ চৰণত অৰ্পন কৰে মুছলমান লোক সকলে৷ প্ৰতিবছৰে এই উৎসৱ ইছলাম ধৰ্মীয় লোক সকলে উলহ-মালহৰে পালন কৰে। যদিও বৰ্তমানে ক’ৰনা মহামাৰীৰ বাবে এই ঈদ উৎসৱ অনুষ্টূপীয়াকৈ পালন কৰা দেখা গৈছে। যিহেতু ঈদগাহ, মছজিদ সমূহত সমজুৱাকৈ ঈদৰ নামাজ পঢ়া নিষেধাজ্ঞা কৰা হৈছে। আজি পৱিত্ৰ ঈদ-উল-জোহা। ক’ৰনাকেন্দ্ৰিক পৰিস্থিতিৰ মাজতে প্ৰশাসনে জাৰি কৰা নীতি-নিয়মৰ মাজেৰে সমগ্ৰ দেশৰ লগতে অসমতো পালন কৰা হৈছে মুছলমান ধৰ্মাৱলম্বী লোকসকলৰ পৱিত্ৰ ঈদ। ঈদৰ পৰম্পৰা অনুসৰি পুৱাই পাঁচ বজাৰ পৰা ছয় বজাৰ ভিতৰত অসমৰ লগতে ভাৰতত বিভিন্ন স্থানত আদায় কৰে নামাজ। এফালে ক’ৰনা মাহামাৰীৰ সন্ত্ৰাস, ঠিক তাৰ মাজতেই শনিবাৰে অনুষ্টুপীয়াকৈ ইছলাম ধৰ্মাৱলম্বী লোকসকলে পালন কৰিলে পবিত্ৰ ঈদ-উল-জোহা৷ সম্প্ৰতি নাজিৰা, ন-মাটি, মেছাগড়, শিমলুগুৰি, চণ্টক, বিহুবৰ, চূণপুৰা, বালিঘাট, নামটি, মেজেঙ্গা, মিছাজান, বৰতল, লিগিৰীপুখুৰী, গড়আলি, মেকিপুৰ, গেলেকী, লাহনগাওঁ, শিঙিবিল, ৰঙাগড়া, ন-আলি, কলগাওঁ, জ্যোতিনগৰৰ বিপৰীতে জয়সাগৰ, ৰংঘৰ চাৰিআলি, ঢুলীয়াপাৰ, হাতীখোঁক গাওঁ, আমগুৰি আদি স্থানত সামাজিক দূৰত্ব বজাই ঈদৰ ধৰ্মীয় ৰীতি-নীতি পালন কৰিলে ইছলাম ধৰ্মাৱলম্বী লোকসকলে৷ চৰকাৰে জাৰি কৰা নিয়ম মানি তেওঁলোকে নিজৰ ঘৰতে সীমিত সংখ্যক লোকেৰে আদায় কৰিলে ঈদৰ নামাজ৷ নামাজৰ অন্তত বিশ্ব শান্তিৰ হকে আল্লাহৰ ওচৰত সকলোৱে কৰিলে দোৱা৷ ইয়াৰোপৰি লোক সকলে প্ৰশাসনে জাৰি কৰা নিয়ম অনুসৰি সম্পন্ন কৰিলে কুৰ্বানিৰ কাৰ্যসূচীও৷ ক’ৰনা মহামাৰীৰ বাবে এইবাৰ ঈদৰ উছাহ-উদ্দীপনা ম্লান পৰিলেও পৰিস্থিতিৰ প্ৰতি লক্ষ্য ৰাখি চৰকাৰৰ নীতি নিৰ্দেশনা মানি চলাত বিশেষ গুৰুত্ব প্ৰদান কৰিছে ইছলাম ধৰ্মাৱলম্বী লোকসকলে৷

ভগামুখ : দিনে দিনে ৰাজ্যত বাঢ়িছে কৰ’না আক্ৰান্ত ৰোগীৰ সংখ্যা৷ চিকিৎসাত নিয়োজিত চিকিৎসক নাৰ্চে দিনে নিশাই সেৱাৰে সুস্থ কৰি তুলিছে বহু ৰোগীক ৷ ভগামুখ আদৰ্শ চিকিৎসালয়ত স্থাপন হোৱা কোৱাৰেনটাইন চেন্টাৰত দ্বায়িত্ববাহী বিষয়া ডা° ভাষ্কৰ শইকীয়াৰ নেতৃত্বত এটি চিকিৎসক আৰু নাৰ্চ তথা চিকিৎসাকৰ্মীৰ দলে অহৰ্নিশে আগবঢ়াই আহিছে সেৱা ৷ আজি  ভাৰতীয় জনতা পাৰ্টিৰ জেষ্ঠ কৰ্মকৰ্তা সমাজকৰ্মী অসীম বৰুৱাই চিকিৎসালয়খনত উপস্থিত হৈ সকলো চিকিৎসক, নাৰ্চ আৰু চিকিৎসাকৰ্মীক তেওঁলোকৰ কৰ্মক শ্ৰদ্ধা জনোৱাৰ লগতে একোখনকৈ ফুলাম গামোচাৰে সম্বৰ্ধনা জনাই উৎসাহিত কৰি কয় যে তেখেত সকলক ভগাৱান প্ৰেৰিত দূত৷ ইয়াৰ পাচতেই তেখেতে চিন্তামণিগড়,  জেলেঙীটুপৰ বান বিধস্ত অঞ্চলত উপস্থিত হৈ দূৰ্গত সকলৰ ক্ষয় ক্ষতিৰ বুজ লোৱাৰ লগতে অতি সোনকালে অসম চৰকাৰৰ মুখ্যমন্ত্ৰী সৰ্বানন্দ সোণোৱালৰ সৈতে আলোচনাত বহি ইয়াৰ সমাধান সূত্ৰ উলিয়াব বুলি কয়৷ ইয়াৰ পিছতে বৰুৱাই ৰাইজৰ উদ্যোগত নিৰ্মাণ হৈ থকা চিন্তামণিগড় উচ্চ মাধ্যমিক বিদ্যালয়ত উপস্থিত কামৰ অগ্ৰগতি দেখি সন্তুষ্ট হয় আৰু স্বেচ্ছাসেৱী অনুস্থান ৰেঙণি এটি আশাৰ সহযোগত এটি বকুল পুলি ৰোপণ কৰে৷ তেখেতৰ এই কাৰ্য্যসূচীত যোৰহাট জিলা যুৱ মৰ্চাৰ পল্লব ভট্টাচাৰ্য, কলিয়াপানী মণ্ডল যুৱ মৰ্চা সভাপতি অজয় ভট্টাচাৰ্য,  যোৰহাট জিলা কিষাণ মৰ্চাৰ উপসভাপতি প্ৰহ্লাদ শৰ্মা উপস্থিত থাকে ৷