নাজিৰা

শিৱসাগৰ জিলাৰ নাজিৰা মহকুমাৰ শিমলুগুৰিৰ ৰে’লৱে জংচনত আজি বিয়লি প্ৰথমবাৰৰ বাবে বহিঃৰাজ্যৰ পৰা শ্ৰমিক এক্সপ্ৰেছ যোগেদি অহা ৪১ গৰাকী যাত্ৰীক নমোৱাৰ পাছত কোৱাৰেণ্টাইনৰ ব্যবস্থা কৰা হয় ৷ যোৱা দুই-তিনি দিন ধৰি নাজিৰা মহকুমা প্ৰশাসনৰ উদ্যোগত ব্যাপক প্ৰস্ততি চলোৱাৰ অন্তত বিয়লি ৩ বজাত চেন্নাইৰ পৰা অহা শ্ৰমিক এক্সপ্ৰেছৰ যোগেদি শিমলুগুৰিত শিৱসাগৰ জিলাৰ ৭ গৰাকী, চৰাইদেউ জিলাৰ ৩১ গৰাকী, ডিব্ৰুগড় জিলাৰ ২ গৰাকী আৰু তিনিচুকীয়াৰ ১ গৰাকী যাত্ৰী নামে৷ শিমলুগুৰিত স্বাস্থ্য বিভাগৰ দ্বাৰা প্ৰাৰম্ভিক পৰীক্ষাৰ অন্তত শিৱসাগৰ জিলাৰ নাজিৰাৰ দুজনক গড়গাঁও মহাবিদ্যালয়ৰ কোৱাৰেণ্টাইন চেণ্টাৰলৈ, শিৱসাগৰৰ ৫ গৰাকীক শিৱসাগৰৰ আৰু চৰাইদেউৰ ৩১ গৰাকীক নিজ নিজ জিলাৰ প্ৰতিনিধিৰ যোগেদি কোৱাৰেণ্টাইন কেন্দ্ৰলৈ লৈ যোৱাৰ লগতে বাকী ডিব্ৰুগড় আৰু তিনিচুকীয়াৰ কেইজনক উক্ত জিলালৈ প্ৰেৰণ কৰাৰ ব্যবস্থা কৰা হয়৷ আজি শিমলুগুৰিৰ ৰে’লৱে জংচনত মহকুমাধিপতি সম্প্ৰীতি গোস্বামীয়ে সম্পূৰ্ণ তদাৰক কৰাৰ লগতে জিলা উপায়ুক্ত, আৰক্ষী অধীক্ষক উপস্থিত থাকে৷ আনহাতে নাজিৰা মহকুমা কোৱাৰেণ্টাইন তদাৰকী কমিটিৰ সভাপতি বিধায়ক দেবব্ৰত শইকীয়া, উপাধ্যক্ষ ময়ুৰ বৰগোহাঁই, উপদেষ্টা প্ৰহ্লাদ গোৱালা প্ৰমুখ্যে মহকুমা আৰক্ষী বিষয়া দ্বীপজ্যোতি তালুকদাৰ  উপস্থিত থাকে৷ আনহাতে নাজিৰাৰ গড়গাঁও মহাবিদ্যালয় কোৱাৰেণ্টাইন চেণ্টাৰত কালি সন্ধিয়া পৰ্যন্ত ৪৪ গৰাকী ব্যক্তি কোৱাৰেণ্টাইনত আছিল আৰু ১২ গৰাকীক ঘৰলৈ পঠোৱাৰ ব্যবস্থা কৰা হয় বুলি জানিব পৰা গৈছে।

নগাঁও

নগাঁও জিলাৰ বিভিন্ন কৃষি চক্ৰৰ অধীনত প্ৰধানমন্ত্ৰী কৃষি সন্মান নিধি( পি এম কৃষাণ সন্মান নিধি) আচনিত ব্যাপক দুৰ্নীতি-অনিয়ম সংঘটিত হোৱাৰ অভিযোগ সৰ্বত্ৰ উত্থাপিত হৈছে। জুৰীয়া, ৰূপহী, বটদ্ৰৱাৰ পিছত এইবাৰ জিলাখনৰ কচুৱা কৃষি চক্ৰৰ অন্তৰ্গত কচুৱা, আলিটাঙনী, জুৰিৰপাৰ, মাধৱপাৰা আদি গাঁৱতো পি এম কৃষাণ সন্মান নিধি আঁচনিত শ শ ভূৱা হিতাধিকাৰীৰ নামত ব্যাপক লুন্ঠন চলিছে। এই সন্দৰ্ভত কালি স্থানীয় সমাজকৰ্মী আব্দুল জব্বৰে নগাঁও জিলা উপায়ুক্তক দাখিল কৰা অভিযোগ পত্ৰত উল্লেখ কৰা মতে, বৃহত্তৰ কচুৱা অঞ্চলত এটা দুষ্ট চক্ৰ‌ই বহু ভূৱা হিতাধিকাৰীৰ নাম কৌশলেৰে অন্তৰ্ভুক্ত কৰি বেংকৰ গ্ৰাহক সেৱা কেন্দ্ৰ(চি এচ পি)ৰ জৰিয়তে লক্ষ লক্ষ টকা আত্মসাৎ কৰিছে। উল্লেখিত গাঁৱৰ একাংশ লোক কৃষক নোহোৱা স্বত্বেও পি এম কৃষাণ নিধি আচনিত নিজৰ নাম অন্তৰ্ভুক্ত কৰাই কৃষকৰ ধন আত্মসাৎ কৰিছে। উদাহৰণ স্বৰূপে কচুৱা অঞ্চলৰ মতিউৰ ৰহমান নামৰ এজন লোকৰ পৰিয়ালত ছজন সদস্যৰ নাম এই আচনিত সন্নিবিষ্ট কৰাই কৃষকৰ ধন লাভ কৰিবলৈ সক্ষম হৈছে। অঞ্চলটোত তেনে পৰিয়াল আছে য’ত একেটা পৰিয়ালৰ একাধিক নাম অন্তৰ্ভুক্ত কৰা কৃষকৰ ধনৰ ওপৰত লুন্ঠন চলাইছে। এই সমগ্ৰ দুৰ্নীতি প্ৰক্ৰিয়াত ইউ বি আই বেংকৰ কামপুৰ শাখা, ভাৰতীয় ষ্টেট বেংক কামপুৰ শাখাৰ অধীনত থকা মাধৱপাৰা চি এচ পি, অসম গ্ৰামীণ বিকাশ বেংক কামপুৰ শাখাৰ অন্তৰ্গত জুৰিৰপাৰ, কচুৱা, মাধৱপাৰা, লুতুমমাৰী, চান্দখলা, কঠালগুৰি আদি ঠাইৰ চি এচ পিৰ বানিজ্যিক প্ৰতিনিধি জৰিত আছে। তেওঁলোকেই শ শ ভূৱা হিতাধিকাৰীৰ নামত নিজৰ আঙুলিৰ ছাপ( ফিংগাৰ প্ৰীন্ট) ব্যৱহাৰ কৰি লাখ লাখ টকা একাউণ্টৰ পৰা উঠাই লৈছে। সেয়ে সমাজকৰ্মী গৰাকীয়ে সঠিক তদন্তৰ জৰিয়তে উক্ত আচনিত দুৰ্নীতি-অনিয়ম সংঘটিত কৰা দুৰ্নীতিগ্ৰস্ত বিষয়া-কৰ্মচাৰী, চি এচ পিৰ লগতে দুষ্ট চক্ৰটোৰ বিৰুদ্ধে ব্যৱস্থা গ্ৰহণ কৰিবলৈ দাবী জনাইছে। তদন্ত কৰিলেই একাংশ ৰাজনৈতিক দলৰ নেতা-পালিনেতাৰ লগতে বহু কেইটা চি এচ পিৰ মুখা খোল বুলি সচেতন মহলে মন্তব্য কৰিছে। সমগ্ৰ লুন্ঠন কাৰ্যৰ লগত মুলতঃ জৰিত থকা চি এচ পিৰ বানিজ্যিক প্ৰতিনিধিক ধৰিলেই উৰহি গছৰ ওৰ উলাই পৰিব বুলি চৰ্চা লাভ কৰিছে।

ধুবুৰী

আজি ধুবুৰীত ভ্ৰাম্যমাণ ডাক সেৱা আৰম্ভ কৰে। এই উপলক্ষে ধুবুৰী প্ৰধান ডাকঘৰ চৌহদত গোৱালপাৰা ডাক সংমণ্ডলৰ অধীক্ষক দেবৰাজ শেঠীয়ে এই সেৱা মুকলি কৰে। ভ্ৰাম্যমাণ ডাক সেৱাৰ যোগেদি সমগ্ৰ ধুবুৰী জিলাতে বিশেষকৈ ভিতৰুৱা গ্ৰাম্য অঞ্চলসমূহত ডাকঘৰৰ দ্বাৰা উপলদ্ধ সেৱাসমূহ বিশেষকৈ ছেভিংছ, ৰেকাৰিং ডিপোজিট, সুকন্যা সমৃদ্ধি একাউণ্ট, ডাক জীৱন বীমাৰ লেনদেনৰ সেৱা আগবঢ়োৱা হ’ব। ইয়াৰ উপৰি আই পি পি বি একাউণ্ট আৰু আধাৰযুক্ত যিকোনো বেংক একাউণ্টৰ পৰা টকা উঠোৱাৰ  সুবিধাৰ লগতে ভাৰত চৰকাৰৰ বিভিন্ন জনসুৰক্ষামূলক আঁচনি যেনে প্ৰধানমন্ত্ৰী জীৱন সুৰক্ষা আঁচনি, প্ৰধানমন্ত্ৰী জীৱন জ্যোতি বীমা আঁচনি আৰু অটল পেঞ্চন আঁচনি আদিৰ সেৱা আগবঢ়োৱা হ’ব। উল্লেখযোগ্য যে আজি ধুবুৰী জিলাৰ গোলকগঞ্জৰ পাৰ্শ্বৱৰ্তী গাঁওসমূহত এই সেৱা আগবঢ়োৱা হয় আৰু কাইলৈ ঝগৰাৰপাৰ অঞ্চলত ভ্ৰাম্যমাণ ডাক সেৱা আগবঢ়োৱা হ’ব বুলি ডাক  অধীক্ষক দেবৰাজ শেঠী আৰু সহ-অধীক্ষক গিৰিকান্ত ডেকাই জানিবলৈ দিয়ে।

তিনিচুকীয়া

ডিব্ৰু-ছৈখোৱা ৰাষ্ট্ৰীয় উদ্যানৰ গাতে লাগি থকা অইল ইণ্ডিয়াৰ ৫ নং ৱেলত হোৱা বিষ্ফোৰনৰ ফলত ভয়াবহ ভাবে গেছ ৰ্নিগত হয় ।  বিষ্ফোৰনৰ ফলত সমগ্ৰ বাঘজান অঞ্চলটো গেছেৰে ধুঁৱলী-কুঁৱলী কৰি তোলে । যাৰ ফলত আতংকিত হৈ স্থানীয় ৰাইজে টালি টোপোলা বান্ধি নিজ ঘৰ এৰি প্ৰায় দুই শতাধিক পৰিয়াল পলায়ন কৰে । স্থানীয় ৰাইজৰ মতে অইলৰ অকমন্যতাৰ বাবেই এই বিষ্ফোৰনটো হব লগা হল । ইফালে অইল কতৃপক্ষই  নিৰ্গত গেছ বন্ধ কৰিবলৈ চেষ্টা অব্যাহত ৰাখিছে যদিও সফল হব পৰা নাই । আৰক্ষী অগ্নিনিৰ্বাহক বাহীনি আৰু অইল কতৃপক্ষই সমগ্ৰ অঞ্চল ঘেৰি নিৰাপত্তাৰ ব্যবস্থা কৰি ৰাখিছে যদিও যিকোনো সময়তে জুই লাগি ভয়ংকৰ ঘটনা সংঘটিত হোৱাৰ সম্ভাবনা প্ৰবল হৈ পৰিছে । ইফালে আছু, মটক মৰান আৰু প্ৰকৃতিপ্ৰেমী সংগঠনে মানব জীবন-সম্পত্তি, ৰাষ্ট্ৰীয় উদ্যান জীৱকুলৰ ৰক্ষাৰ বাবে অইলক দাবী জনাইছে । আৰু জিলাখনত ভবিষ্যতে নিৰাপত্তা ব্যবস্থা সুনিশ্বিত কৰিহে অইলে ৱেল স্থাপন কৰিব পাৰিব বুলি সকীয়নি প্ৰদান কৰিছে সংগঠন কেইটাই ।

লংকা

সমগ্ৰ অসমতে ক’ৰোনাই তীব্র ৰূপ ধাৰণ কৰা সময়তে ভূতৰ ওপৰত দানৱ পৰাদি হোজাই জিলাৰ বিভিন্ন অঞ্চলত বানে  সংহাৰী ৰূপ লৈছে। বিগত দিনকেইটাত পৰি থকা নেৰানেপেৰা বৰষুণে বহু অঞ্চল বুৰাই পেলোৱাৰ লগতে জনজীৱন স্তব্ধ কৰি পেলাইছে। নিয়মিত বৰষুণৰ ফলত কপিলীৰ বাঢ়নী পানীয়ে লংকাৰ কাষৰীয়া লস্কৰপথাৰ,  ঠাইচুপাৰ,  ফৰমাপাৰ আদি অঞ্চলত ঘৰ দুৱাৰ, কৃষি ভূমি বুৰাই পেলাইছে। উপায়ন্তৰ হৈ  বহু পৰিয়ালে পথৰ দাঁতিত আশ্ৰয় লব লগা হৈছে। ইপিনে হোজাইৰো বহু অঞ্চল কপিলী নৈৰ জলপৃষ্ঠ নিশাটোৰ ভিতৰতেই ক্ৰমাৎ ফেনে ফুটুকাৰে বঢ়াৰ ফলত নৈ পৰিয়া বহু অঞ্চল বৰ্তমান জলমগ্ন। হোজাইৰ লস্কৰ পথাৰ, যমুনাচিট, ৰাইকটা, কোমৰাকটা, নভঙা আদি কৰি ১৫ৰ অধিক গাঁও বৰ্তমান বানৰ কৱলত৷ অঞ্চলটোৰ বহু ৰাইজৰ ঘৰ বৰ্তমান বানৰ কৱলত। আনহাতে আকৌ, হোজাই-পশ্চিম কাৰ্বি-আংলং সংযোগী পথ বৰ্তমান পানীৰ তলত৷