গুৱাহাটী

ক্ৰমাৎ অনিয়ন্ত্ৰিত পৰিস্থিতিলৈ গতি কৰিছে ক’ৰোনা ভাইৰাছৰ সংক্ৰমণে। ভয়াবহ হৈছে শেহতীয়া পৰিস্থিতি। প্ৰব্ৰজিত লোকৰ সংখ্যা বৃদ্ধি পোৱাৰ লগে লগে বাঢ়িছি ক’ৰোনাক্ৰান্তৰ সংখ্যা। মঙলবাৰে আগবেলাতে ওলাল নতুনকৈ ২০ জন ক’ৰোনাক্ৰান্ত ৷ সন্ধিয়ালৈ পুনৰ ওলাল ২০ জন। এইকেইজন সৰুসজাই কোৱাৰেণ্টাইন চেণ্টাৰত আছিল।সোমবাৰে বিয়লি জিএমচিএইছত মৃত্যু হোৱা ৰঙিয়াৰ নিকতবৰ্তী ডিমুৰ বাসিন্দা অমূল্য কলিতাৰ দেহত মৰণোত্তৰভাৱে ধৰা পৰিল ক’ৰোনা সংক্ৰমণ। লগে লগে কামৰূপ, বাইহাটা, নলবাৰী, ৰঙিয়া ,ছয়গাঁও আদিত ক’ৰোনা সংক্ৰমণৰ কথা পোহৰলৈ আহিল। সোমবাৰে সন্ধিয়া তথা মাজৰাতিলৈ যোৰহাট, গোলাঘাটত দুজনকৈ, কোকৰাঝাৰ, নগাৱঁত এজনকৈ আক্ৰান্ত হৈছিল। আটাইকেইজন বাহিৰৰ পৰা সোমাইছিল অসমত। মঙলবাৰে পুৱাই ওলাল মৃনাল গগৈ নামৰ মাজুলীৰ এজন যুবক। হুৱাদুৱাৰ সৃষ্টি হয় দ্বীপ জিলাখনত। পাঁচ কুৰিতকৈ অধিক লোকৰ আগমণ হৈছে বহিঃৰাজ্যৰ পৰা। সকলোৰে ভয় আৰু শংকা সেই সকলৰ প্ৰতি। গুৱাহাটীৰ ফটাশীলৰ জীতেন্দ্ৰ পাটীল নামৰ এজনো হ’ল আক্ৰান্ত। চাংসাৰী আলু গোদামৰ মালিক, ফাঁচি বজাৰৰ হোটেলৰ মালিক আৰু পৰিয়ালৰ সদস্য মাংৰু ছাহানীৰ সংস্পৰ্শলৈ অহা একাধিকৰ দেহত ওলাল ক’ৰোনা ভাইৰাছ। দিনটোৰ আগবেলাতে মুম্বাইৰ পৰা অহা শিশুসহ হোজাইৰ দুজন, চেন্নাইৰ পৰা ঘূৰি অহা বাইহাটা, নলবাৰী, ৰঙিয়া আদিৰ সাতজন, বিশ্বনাথ আৰু নলবাৰীৰ দুজনকৈ, নগাঁৱৰ এজনসহ অনেকৰ দেহত ওলাল ক’ৰোনা ভাইৰাছ।এনেকৈ বিয়লি পৰ্যন্ত আক্ৰান্তই অতিক্ৰম কৰিলে ১৫৪ সীমাৰেখা। আৰোগ্য হৈছে ৪১ জন আৰু মৃত্যু হ’ল চাৰিজনৰ। হাস্পাতালত আছে ১০৮ জন। এইসংখ্যা যিকোনো সময়তে বৃদ্ধি তথা সালসলনি হোৱাতো নিশ্চিত৷ ইফালে মন্ত্ৰী হিমন্ত বিশ্ব শৰ্মাই ডিমুৰ মৃত অমুল্য কলিতাৰ ঘৰত উপস্থিত হয়৷

লখিমপুৰ

সমগ্ৰ বিশ্বজুৰি ক’ৰোনা ভাইৰাছে সন্ত্ৰাসৰ সৃষ্টি কৰিছে। এই ভাইৰাছত ভাৰতবৰ্ষৰ লগতে ইয়াৰ বহু লোক সংক্ৰমণৰ বলি হৈছে৷ এই পর্যন্ত ৰাজ্যখনত শতাধিক লোক আক্ৰান্ত হোৱাৰ বিপৰীতে ৪১ জনে আৰোগ্য লাভ কৰিছে। ৰাজ্যখনৰ অন্যান্য জিলাৰ লগত সংগতি ৰাখি লখিমপুৰ জিলাৰ স্বাস্থ্যকৰ্মীসকলেও নিজ নিজ অঞ্চলত কঠোৰ পৰিশ্ৰম কৰি আহিছে। এইক্ষেত্ৰত লখিমপুৰ জিলা প্ৰশাসন আৰু জিলা স্বাস্থ্য অভিযানৰ সহযোগত স্বাস্থ্যকৰ্মীসকলৰ মনোবল বৃদ্ধিৰ বাবে এক পদক্ষেপ হিচাপে মঙলবাৰে জিলা উপায়ুক্ত ডাঃ জীৱন বি আৰু জিলা যুটীয়া স্বাস্থ্য সেৱা সঞ্চালক ডাঃ গুনীন কুমাৰ গগৈয়ে লখিমপুৰ জিলাৰ অন্তৰ্গত নাওবৈচা প্ৰাথমিক স্বাস্থ্য কেন্দ্ৰত এক সম্বৰ্দ্ধনা কাৰ্যসূচীত অংশগ্ৰহণ কৰে। অনুষ্ঠানটোত আশাকৰ্মী, আশা ছুপাৰভাইজাৰ, এএনএম, এমপিডব্লিউ, লেৱৰেটৰি টেকনিছিয়ান আদিকে ধৰি মুঠ ১১ জন স্বাস্থ্যকৰ্মীক জিলা উপায়ুক্ত ডাঃ জীৱন বিয়ে একোখনকৈ মানপত্ৰৰে সম্বৰ্ধনা জ্ঞাপন কৰে। পৰৱৰ্তী সময়ত জিলাৰ সকলো খণ্ড প্ৰাথমিক পৰ্যায়ত একোখনকৈ মানপত্ৰ প্ৰদানেৰে কৰ্মক্ষেত্ৰত ইতিমধ্যে অৰিহণা যোগোৱা হ’ব বুলি জিলা যুটীয়া স্বাস্থ্য সেৱা সঞ্চালক ডাঃ গুনীন কুমাৰ গগৈয়ে জনাইছে৷

টিংখাং

ৰাজ্যখনত আফ্ৰিকান ছোৱাইন ফিভাৰত আক্ৰান্ত হৈ গাহৰিৰ অপমৃত্যু হোৱাত উজনি অসমৰ গাহৰি পালকসকলে বিস্তৰ ক্ষতিৰ সন্মুখীন হ’ব লগাত পৰিছে। সম্প্ৰতি উজনি অসমৰ প্ৰায় সকলোবোৰ জিলাতে গাহৰিৰ মাংসৰ ব্যৱসায় নিষিদ্ধ হৈ আছে। অসম চৰকাৰে গাহৰিৰ দেহত আফ্ৰিকান ছোৱাইন ফিভাৰত সংক্ৰমণ ধৰা পৰা পাছতে গাহৰি মাংসৰ বেচা কিনাত নিষিদ্ধ ঘোষণা কৰিছিল। ইয়াৰ পাছৰে পৰা বজাৰত মুকলিকৈ গাহৰিৰ মাংসৰ বেচা কিনা সম্পূৰ্ণভাৱে বন্ধ হৈ আছে। অৱশ্যে ভিতৰুৱা কেতবোৰ ঠাইত একাংশলোকে চোৰাংকৈ গাহৰিৰ মাংসৰ ৰমৰমীয়া চলাই থকা বুলি জানিব পৰা গৈছে।পূৰ্বৰ তুলনাত গাহৰি মাংসৰ চাহিদা যথেষ্ট হ্ৰাস পোৱাৰ লগতে ব্যাপক হাৰত মাংসৰ দাম কমি আহিছে। জানিব পৰা মতে ৰাজ্যখনত আফ্ৰিকান ছোৱাইন ফিভাৰৰ সংক্ৰমণৰ আগলৈকে প্ৰতি কিল’গ্ৰাম গাহৰি মাংস দুশ ষাঠি টকাৰ পৰা দুশ আশী টকা পৰ্যন্ত দৰত বিক্ৰী হৈছিল। বৰ্তমান বজাৰত মুকলিভাৱে বিক্ৰী বন্ধ হৈ থকাৰ বাবে চোৰাংভাৱে কম মূল্যত গাহৰিৰ মাংস বিক্ৰী হৈ আছে বুলি জানিব পৰা গৈছে। জানিব পৰা মতে প্ৰতি কিল’গ্ৰাম গাহৰিৰ মূল্য এশ টকাৰ পৰা ডেৰশ টকালৈ হ্ৰাস পাইছে।ফলত গাহৰিৰ পালকসকলে ব্যাপক লোকচানৰ সন্মুখীন হ’ব লগা হৈছে। আনহাতে একাংশ চতুৰ ব্যৱসায়ীয়ে আফ্ৰিকান ছোৱাইন ফিভাৰৰ আতংক বিয়পাই উজনিত গাঁৱে গাঁৱে ব্যাপকহাৰত গাহৰিৰ নিধন যজ্ঞ চলাই থকা বুলি জানিব পৰা গৈছে। এই নিধন কৰা গাহৰি বিলাকৰ মাংস কম মূল্যত চোৰাংভাৱে ঠায়ে ঠায়ে বিক্ৰী কৰি আছে। গাহৰিৰ মাংস গোপনে উজনিৰ বিভিন্ন জিলাত সৰবৰাহ হৈ থকাৰ কথা জানিব পৰা গৈছে।অবাধে চলি থকা গাহৰি মাংসৰ ব্যৱসায় ৰোধৰ বাবে আৰক্ষীয়ে কঠোৰ পন্থা অৱলম্বন কৰা পৰিলক্ষিত হৈছে। জানিব পৰা মতে আৰক্ষীয়ে ইতিমধ্যে মাংসৰ চোৰাং ব্যৱসায়ত জড়িত কেবাজনো লোকক আটক কৰিবলৈ সক্ষম হৈছে। উল্লেখ্য যে আফ্ৰিকান ছোৱাইন ফিভাৰৰ সংক্ৰমণৰ ফলত শিৱসাগৰ, ধেমাজি, লখিমপুৰ, ডিব্ৰুগড়ৰ জিলাৰ বৃহৎ সংখ্যক আক্ৰান্ত হৈ অপমৃত্যু হয়। মৃত গাহৰিসমূহ নৈপৰীয়া একাংশ লোকে দিচাং, দিহিং, ব্ৰহ্মপুত্ৰকে ধৰি বহুকেইখন নৈ পেলাই দিছিল।ৰাজ্যখনৰ গাহৰি পালকসকলে ব্যাপক ক্ষতিৰ সন্মুখীন হোৱাৰ পাছতো চৰকাৰীভাৱে কোনোধৰণৰ সাহায্য লাভ কৰা নাই। এই সন্দৰ্ভত চৰকাৰক উপযুক্ত পদক্ষেপ গ্ৰহণ কৰি ক্ষতিগ্ৰস্ত লোকসকলক সাহায্য প্ৰদান কৰিবলৈ সচেতন মহলে আহবান জনাইছে। ৰাজ্যৰ বহু গ্ৰাম্য সমাজত গাহৰি পালনৰ জৰিয়তে স্বাৱলম্বী হৈ পৰিয়ালক পোহপাল দি আহিছে। তদুপৰি বহু নিবনুৱাই সম্পূৰ্ণ বিজ্ঞান সন্মত পদ্ধতিৰে ব্যৱসায়িকভাৱে গাহৰি পালন কৰি নিজৰ লগতে আন বহুতে কৰ্মসংস্থাপনৰ ব্যৱস্থা কৰিছে। সম্প্ৰতি ৰাজ্যখনত আফ্ৰিকান ছোৱাইন ফিভাৰৰ সংক্ৰমণৰ বাবে গাহৰি পালকসকল গভীৰ সংকটৰ সন্মুখীন হ’ব লগা হৈছে। ইয়াৰ প্ৰভাৱ ৰাজ্যৰ অৰ্থনীতিতো পৰাৰ সম্ভাৱনা আছে। কিয়নো ৰাজ্যখনৰ লগতে গাহৰিৰ মাংসই চুবুৰীয়া নাগালেণ্ড আৰু অৰুণাচল প্ৰদেশতো চাহিদা পূৰণ কৰি আহিছিল। জানিব পৰা মতে অসমৰ লগতে চুবুৰীয়া ৰাজ্যকেইখনলৈ প্ৰতি সপ্তাহত দুখন বিশেষ ৰেলেৰে উত্তৰ প্ৰদেশ, বিহাৰ আদিৰ পৰা বৃহৎ সংখ্যক গাহৰি আমদানি কৰা হয়।