দৈনন্দিন বাৰ্তা:

ভাৰতৰ স্বাধীনতা আন্দোলনৰ সেনানী শ্বহীদ  কুশল কোঁৱৰৰ ৭৭ তম মৃত্যু  দিৱসটি তেখেতৰ কৰ্মস্হলী  ধনশিৰি মহকুমাৰ সৰুপথাৰতো ধনশিৰি মহকুমা প্ৰশাসনৰ উদ্যোগত  অনুষ্ঠিত কৰা হয়৷  পুৱা ন বজাত সৰুপথাৰ ৰাজহুৱা ভৱন চৌহদত শ্বহীদ গৰাকীৰ প্ৰতিমূৰ্ত্তিত ধনশিৰি মহকুমাৰ মহকুমাধিপতি দিবাকৰ নাথে বন্তি প্ৰজ্বলন আৰু পুস্পাঞ্জলি অৰ্পণ কৰি শ্ৰদ্ধা নিবেদন কৰে৷ ইয়াৰ উপৰিও সৰুপথাৰ সুমহীয়া স্বাস্হ্য কেন্দ্ৰটো শ্বহীদ জনাৰ মৃত্যু তিথি উপলক্ষে শ্ৰদ্ধাঞ্জলি অৰ্পন কৰা হয়৷  কিন্তু ইয়াৰ মাজতে অভিযোগ উঠিছে অসম চৰকাৰে শ্বহীদ জনৰ ত্যাগক চৰম অপমান কৰাৰ৷ মূখ্যমন্ত্ৰী সৰ্বানন্দ সোণোৱালে ২০১৮ চনত আজিৰ দিনটোতে শ্বহীদ কুশল কোঁৱৰৰ বাসগৃহলৈ আহি সৰুপথাৰ ৰেল ষ্টেচনৰ সমীপত ৰেল বগৰোৱা স্হানত শ্বহীদ কুশল কোঁৱৰৰ স্মৃতি ৰক্ষাৰ স্বাৰ্থত এখন উদ্যান স্থাপন কৰা হ’ব বুলি ঘোষণা কৰিছিল৷ স্বাধীনতা সেনানীয়ে বৃটিছ সেনাবাহিনীৰ ৰেল বগৰোৱা স্হান সৰুপথাৰৰ শুকান নলাৰ কাষতে স্হাপন কৰাৰ কথা আছিল মুখ্যমন্ত্ৰীয়ে ঘোষণা কৰা স্বহীদ স্মৃতি উদ্যানখন৷ কিন্তু সেই ঘোষণা আজিও কাৰ্য্যকৰী নহ’ল৷ উকা হৈয়ে থাকিল শুকান নলাৰ পাৰ৷ সৰুপথাৰৰ ৰেল ষ্টেছনৰ উন্নয়নৰ লগতে মুখ্যমন্ত্ৰীৰ কেইবাটাও গুৰুত্বপূৰ্ণ ঘোষণা আজিও কাৰ্য্যকৰী নহল৷ এই ক্ষেত্ৰত অসম চৰকাৰে ব্যৱস্থা গ্ৰহণ নকৰাত উদ্বেগ প্ৰকাশ কৰে মুক্তি যুঁজাৰু সংস্থাৰ লগতে সৰুপথাৰৰ বিভিন্ন দল-সংগঠনে৷

দৈনন্দিন বাৰ্তা :

সংবাদ মাধ্যমত বাতৰি প্ৰকাশৰ পিছতেই গহপুৰ নিগমৰ দৰিদ্ৰ ৰোগীয়া আইতাক সহায়ৰ হাত বিশ্বনাথ জিলা পৰিষদৰ সভানেত্রী লাৱণ্য চাৰিঙীয়াই। গহপুৰ নিগমৰ পাৰ্বতী নাথ নামৰ এগৰাকী সত্তোৰোৰ্দ্ধৰ আইতাৰ জীৱন দুৰ্দশাৰ কথা প্ৰকাশ পাইছিল সংবাদ মাধ্যমত। সাত বছৰ কাল ৰোগীয়া দেহাৰে কেইটামান ফটা বস্তাত মজিয়াত শুই জীৱন নিৰ্বাহ কৰিছিল। এক অস্বাস্থ্যকৰ পৰিৱেশত দিন-নিশা পাৰ কৰিছিল আইতা গৰাকীয়ে। বিশ্বনাথ জিলা পৰিষদৰ সভানেত্রী লাৱণ্য চাৰিঙীয়া উপস্থিত হৈ আইতা গৰাকীৰ স্বাস্থ্য অৱস্থা বুজ লৈ আইতাক কিছু খাদ্য সামগ্ৰী প্ৰদান কৰা লগতে খোৱা পানী বাবে এটা দালকল প্ৰদান কৰে। ইয়াৰোপৰি পূৱ ডুবিয়া পঞ্চায়ৰ সভাপতি উপস্থিত হৈ নিজা ববীয়াকৈ এটা পানী ফিল্টাৰ দিয়া কথা সদৰী কৰে।

দৈনন্দিন বাৰ্তা:

দীৰ্ঘদিনীয়া লকডাউনৰ ফলত ব্যৱসায় কৰিবলৈ যাব নোৱাৰি গভীৰ সংকটৰ সন্মুখীন হোৱা উজনি মাজুলীৰ মৃৎশিল্পৰ ব্যৱসায়ী সকল এতিয়া ভৰ বাৰিষা মৰণত শৰণ দি বনিজলৈ যাত্ৰাৰ বাবে সাজু হৈ উঠিছে। ব্যৱসায়ৰ বাবে সাজু হোৱা ব্যৱসায়ী সকলৰ পৰা জানিব পৰা মতে, ইতিমধ্যে তেওঁলোকৰ ৫০ শতাংশ কলহ টেকেলি নষ্ট হৈছে। বৰ্তমানো বহুতো লোকে প্ৰকৃতিৰ প্ৰতিকূলতাৰ বাবে বনিজলৈ যাবলৈ সাহস গোটাব পৰা নাই আৰু তেওঁলোকৰ কলহ টেকেলিসমূহ নদীৰ পাৰতে যহি খহি যাবলৈ আৰম্ভ কৰিছে। উল্লেখযোগ্য যে, শালমৰাৰ লোকসকলে মৃৎ শিল্পৰ ব্যৱসায়ৰ জৰিয়তে বছৰটোৰ ভাত মোকোলাই। কিন্তু চলিত বৰ্ষত ব্যৱসায়ৰ ভৰপক সময়তে ক’ভিড ১৯ৰ বাবে লক ডাউন আৰম্ভ হোৱাত কোনোজন ব্যৱসায়ীয়েই বনিজলৈ যাব নোৱাৰি বৰ্তমান গভীৰ আৰ্থিক সংকটৰ সন্মুখীন হৈছে। এনে পৰিপ্ৰেক্ষিতত এই মৃৎ শিল্পৰ ব্যৱসায়ীসকলক আৰ্থিক সাহাৰ্য প্ৰদান কৰিবলৈ সচেতন মহলে চৰকাৰলৈ আহ্বান জনাইছে।