নুনমাটিৰ ঘটনাই উদঙাই দিলে গুৱাহাটী মহানগৰীত এতিয়াও মুক্ত ভাবে চলি আছে ড্ৰাগছৰ বেহা। নুনমাটিত স্কুটিত মৃতদেহ ওলোমাই পেলাবলৈ স্হান বিচাৰি থকা যুবকজন হৈছে শুভ্ৰজিত বৰা। অঞ্চলটোৰ ১৪ নং গনেশ মন্দিৰ পথৰ বিজয়া জ্যোতি এপাৰ্টমেন্টৰ তৃতীয় মহলাৰ কাকলি বৰাৰ কনিষ্ঠ পুত্ৰ হৈছে শুভ্ৰজিত বৰা। মৃত ৰোহিত দৰ্জি আৰু শুভ্ৰজিত দুয়ো বন্ধু আছিল ড্ৰাগছ আসক্ত। আৰক্ষীয়ে জানিবলৈ দিয়ামতে দুই বন্ধু পৃথকে পৃথকে আছিল নিচামুক্তি কেন্দ্ৰত।
কিছুদিন পূৰ্বে দুয়ো স্বগৃহলৈ আহিছিল নিচামুক্তি কেন্দ্ৰৰ পৰা। মৃত্যুৰ দিনটোত ৰোহিতে শুভ্ৰজিতক সাক্ষাৎ কৰিবলৈ গৈছিল ফ্লেটলৈ। সম্ভবত কিবা কথাত দুয়োৰে তৰ্ক বিতৰ্কৰ সৃষ্টি হোৱাত শুভ্ৰজিতে হত্যা কৰে ৰোহিতক। আৰক্ষীয়ে সন্দেহ কৰামতে দুয়ো ফ্লেটত ড্ৰাগছ সেৱন কৰিছিল। হত্যাকাণ্ড সংঘটিত কৰি নিজকে দোষমুক্ত কৰিবলৈ লিফটেৰে ৰোহিতৰ মৃতদেহ নমাই আনি স্কুটিৰ ভৰিথোৱা স্হানত মৃতদেহটো লৈ শুভ্ৰজিতে পেলাবলৈ সুবিধাজনক ঠাই বিচাৰি ফুৰিছিল। কিন্তু পথাচাৰীৰ বাবে গনেশ মন্দিৰ পথত পেলাই পলায়ন কৰে শুভ্ৰজিতে। আৰক্ষীয়ে ঘটনাস্হলীত উপস্হিত হৈ ওচৰৰ চিচি কেমেৰাৰ ফুটেজ পৰীক্ষা কৰি শুভ্ৰজিতে হত্যা কৰা নিশ্চিত হৈছিল।
নুনমাটি অঞ্চলৰ পৰাই শুভ্ৰজিত আৰক্ষীয়ে গ্ৰেপ্তাৰ কৰিবলৈ সক্ষম হয়। উল্লেখ্য যে কিছুদিন পূৰ্বে হেঙেৰাবাৰী অঞ্চলৰ পৰিত্যক্ত গৃহটো দুই ড্ৰাগছ আসক্তৰ মৃতদেহ উদ্ধাৰ হৈছিল। আৰক্ষীয়ে নিষিদ্ধ ড্ৰাগছৰ বিৰুদ্ধে কঠোৰ স্থিতি গ্ৰহন কৰাৰ পিছতো কি উৎসৰ পৰা ড্ৰাগছৰ বেহা চলি আছে সেয়া ৰহস্যজনক। একেদৰে নিজৰ সন্তানক ড্ৰাগছৰ কবলৰ পৰা মুক্ত কৰিবলৈ অভিভাৱকে নিচামুক্তি কেন্দ্ৰত ৰাখিলেও ড্ৰাগছ আসক্তই সম্পূৰ্ণ ৰূপে সুস্থ হৈ উঠা পৰিলক্ষিত হোৱা নাই। সৰ্বসাধাৰণ ৰাইজে অধিক কঠোৰ ৰূপত আৰক্ষীক অভিযান চলাই ড্ৰাগছ দৰে বিহবৃক্ষক পুলিয়ে পোখাই ধ্বংস কৰিবলৈ আহ্বান জনাইছে।
