সাতগাঁও শাখা সাহিত্য সভাৰ চলিত মাহৰ মাহেকীয়া বৈঠক “সাহিত্য চৰা”ৰ সৈতে সংগতি ৰাখি বৃহত্তৰ সাতগাঁও অঞ্চলক বিশেষ ভাৱে প্ৰতিনিধিত্ব কৰা সামাজিক অনুষ্ঠান সাতগাঁও লাচিত পুথিভঁৰালৰ সহযোগত সাতগাঁও শাখা সাহিত্য সভাৰ সভাপতি ফুলেশ্বৰ ডেকাৰ সভাপতিত্বত আজি প্ৰয়াত সাহিত্যিক, শিক্ষাবিদ দেবেন দত্তৰ এক স্মৃতিচাৰণ অনুষ্ঠান অনুষ্ঠিত হৈ যায়। অনুষ্ঠানৰ আৰম্ভণিতে সাতগাঁও শাখা সাহিত্য সভাৰ সম্পাদক উৎপল শইকীয়াই স্বৰ্ণ শাখাৰ মৰ্য্যদা লাভ কৰিবলৈ উপনীত হোৱা সাতগাঁও শাখা সাহিত্য সভাৰ নতুনকৈ আজীৱন সদস্য লাভ কৰা সদস্য সকলক স্বাগতম জনোৱাৰ লগতে ন পুৰণি সদস্য সকলৰ সৈতে চিনাকী কৰাই দিয়ে। অনুষ্ঠানত সাতগাঁও শাখা সাহিত্য সভাৰ উপদেষ্টা অনিল চৌধুৰীয়ে প্ৰয়াত দেবেন দত্তৰ জীৱন আৰু কৰ্মৰাজিৰ মূল্যায়ন দাঙি ধৰাৰ লগতে দৈনন্দিন বাৰ্তা কাকতৰ কাৰ্যবাহী সম্পাদক তথা জ্যেষ্ঠ সাংবাদিক ডিম্পুল চুতীয়াই সংবাদ ক্ষেত্ৰ খনত প্ৰয়াত দেবেন দত্ত ছাৰৰ সান্নিধ্য আৰু অভিজ্ঞতা বৰ্ণনা কৰাৰ লগতে অসমীয়া ভাষাৰ শুদ্ধতাৰ বাবে সাংবাদিক সকলৰ মাজতো প্ৰয়াত নমস্য ব্যক্তিগৰাকীযে একক ভাবে গ্ৰহণ কৰি অহা প্ৰদক্ষেপ আৰু সংগ্ৰাম খনৰ কথা সোঁৱৰণ কৰে।

তেওঁ কয় যে প্ৰয়াত দেবেন দত্ত ছাৰ যিদৰে সাংবাদিক সকলৰ মাজত মৰম আৰু শ্ৰদ্ধাৰ আছিল, সেইদৰে বহুতৰ বাবে মুৰৰ কামোৰণি আছিল আৰু বহু সময়ত তেওঁ কৰা আমনিও সহ্য কৰিব লগীয়া হৈছিল। কাৰণ ছাৰে দৈনিক পুৱাই বাতৰি কাকতখন চোৱাৰ পিছত কাকতখনত লক্ষ্য কৰা ভুল বোৰ শুধৰাই দিব পৰাকৈ বাতৰি কাকতৰ কাৰ্যালয়লৈ পুৱাই বা সন্ধিয়া ৭-৮ মান বজাত ফোন কৰিছিল আৰু বহু সময় ধৰি অনিচ্ছা সত্ত্বেও ফোনত কথা পাতিব লগীয়া হৈছিল। যিটো সময় সংবাদ পত্ৰৰ যিকোনো সাংবাদিকৰ বাবে যথেষ্ট ব্যস্ত সময় হিচাপে পৰিগণিত হয়। অনুষ্ঠানত প্ৰয়াত দেবেন দত্তক স্মৃতিচাৰণ কৰি সাতগাঁও শাখা সাহিত্য সভাৰ সদস্যা তথা লেখিকা অঞ্জলি ডেকাই (দাস) এক চমু বক্তব্য দাঙি ধৰাৰ লগতে ” যুগান্তৰৰ এক গভীৰ প্ৰণয় ” শীৰ্ষক কবিতাটি পাঠ কৰে। অনুষ্ঠানত সু সাহিত্যিক তথা নাট্যকৰ্মী প্ৰফুল্ল বৰ্মণেও বৰেণ্য ব্যক্তি জনৰ সান্নিধ্য আৰু তেওঁৰ সৈতে হোৱা অভিজ্ঞতাৰ বিষয়ে বৰ্ননা কৰে। আজিৰ এই অনুষ্ঠানতে সাতগাঁও লাচিত পুথিভঁৰালৰ উদ্যোগত সাতগাঁও বাসিন্দা তথা সাহিত্য আৰু সামাজিক দিশৰ নেতৃস্থানীয় ব্যক্তি তথা শেহতীয়াভাবে ৰাজ্যিক কৃতি শিক্ষক বঁটা লাভ কৰা আমসং চাহ বাগান আদৰ্শ উচ্চ মাধ্যমিক বিদ্যালয়ৰ প্ৰধান শিক্ষক উপেন গোস্বামীক সম্বৰ্ধনা জনোৱা হয়।

গোস্বামীক পিতলৰ শৰাই, ফুলাম গামোচা আৰু সম্বৰ্ধনা প্ৰ পত্ৰ প্ৰদান কৰা হয়। সম্বৰ্ধনা পত্ৰ পাঠ কৰে সাতগাঁও লাচিত পুথিভঁৰালৰ সভাপতি তথা সাতগাঁও শাখা সাহিত্য সভাৰ প্ৰতিস্থাপক সভাপতি ভবেন চন্দ্ৰ দাসে। ভাষণ প্ৰসঙ্গত গোস্বামীয়ে নিজৰ কৰ্মময় জীৱনৰ বিভিন্ন দিশ সমূহৰ লগতে কৃতি শিক্ষক বটা প্ৰাপ্তিৰ ক্ষেত্ৰত গ্ৰহণ কৰিব লগীয়া প্ৰদক্ষেপ সমূহৰ বিষয়ে সবিস্তাৰে বৰ্ণনা কৰে। অনুষ্ঠানত সাতগাঁও শাখা সাহিত্য সভাৰ আজীৱন সদস্য বিপিন কলিতা, তুলতুল কুমাৰ দাস, হৰেশ্বৰ গোস্বামী আৰু সাতগাঁও শাখা সাহিত্য সভাৰ সভাপতি ফুলেশ্বৰ ডেকাই স্বৰচিত কবিতা পাঠ কৰে। জাতীয় সংগীতৰে শাখাৰ কাৰ্যসূচী সম্পূৰ্ণ কৰা অনুষ্ঠানৰ শেষত শলাগৰ শৰাই আগবঢ়াই শাখাৰ সম্পাদক সাংবাদিক উৎপল শইকীয়াই।

ৰাজ্যবাসীয়ে সকাহ পাব লোডশ্বেডিঙৰ পৰা। মুখ্যমন্ত্ৰী ড০ হিমন্ত বিশ্ব শৰ্মাই বিধান সভাত বিদ্যুতৰ নাটনি সম্পৰ্কে বিতৰ্কত অংশ গ্ৰহণ কৰি কয় যে লোড শ্বেডিংৰ সমস্যাটো সমাধান কৰা হৈছে আৰু বিগত দুদিন ধৰি ৰাজ্যখনত কোনো লোডশ্বেডিং হোৱা নাই। তেওঁ ২০১৬ চনত ৰাজ্যখনত বিদ্যুতৰ চাহিদা দৈনিক ১,৫৩৫ মেগাৱত আছিলবুলি উল্লেখকৰি ২০২০-২১ বৰ্ষত এই চাহিদা ১৮০০ মেগাৱতলৈ বৃদ্ধি পোৱা বুলি ব্যক্ত কৰে। ডঃ শৰ্মাই বিদ্যুতৰ উৎসৰ পৰা বিদ্যুত ক্ৰয় কৰাৰ পূৰ্বে কিমান পৰিমাণৰ বিদ্যুত ক্ৰয় কৰা হব সেয়া অবগত কৰাতো বাধ্যতামূলক । আনহাতে সেই পৰিমানৰ বিদ্যুত ক্ৰয় নকৰিলে উৎসক জৰিমনাসহ বিদ্যুতৰ সম্পূৰ্ণ ধন আদায় দিয়াটোও বাধ্যতামূলক । অৰ্থাত অৰ্ডাৰ দিয়া বিদ্যুত ১০০ শতাংশ ক্লয় কৰাটো বাধ্যতামূলক।

ৰাজ্যখনত হঠ্যাত বিদ্যুতৰ চাহিদা কিয় বৃদ্ধি পাইছে সেয়া এই পৰ্যন্ত জানিব পৰা নাই বুলি উল্লেখ কৰি লোডশ্বেডিঙৰ সমস্যা সমাধান কৰা হব বুলিও প্ৰতিশ্ৰুতি দিয়ে। ৰাজ্যখনে মাত্ৰ ৯ টকা ব্যয়েৰে ৪০০ মেগাৱাট বিদ্যুৎ উৎপাদন কৰে আৰু সেয়েহে আমাৰ বিদ্যুতৰ মাচুল ঘৰুৱা শ্ৰেণীৰ মহাৰাষ্ট্ৰ, তামিলনাডু, গুজৰাটৰ দৰে আন ৰাজ্যতকৈ কম। অসম বিধানসভাৰ শৰৎকালীন অধিৱেশনৰ প্ৰথম দিনা বিৰোধীৰ প্ৰস্তাৱ সন্দৰ্ভত হোৱা বিতৰ্কৰ উত্তৰ দি মুখ্য মন্ত্ৰীয়ে লগতে কয় যে ৰাজ্যখনত ৪০ হাজাৰ কোটি টকাৰে প্ৰাৰম্ভিক বিনিয়োগ কৰি শীঘ্ৰেই এটা অৰ্ধপৰিবাহী কাৰখানা স্থাপন কৰা হ’ব। তেওঁ কয়, “আমি আন ৰাজ্যৰ পৰা বিদ্যুৎ উৎপাদনৰ ওপৰত নিৰ্ভৰশীল, সেয়েহে আমি এই সমস্যাটোৰ সমাধান বিচাৰি আছো।” ৰাজ্যখনে অদূৰ ভৱিষ্যতে ৪০ হাজাৰ কোটি টকাৰ বৃহৎ বিনিয়োগেৰে এটা অৰ্ধপৰিবাহী কাৰখানা স্থাপনৰ সাক্ষী হ’ব। তেওঁ লগতে কয় যে যিবোৰ ঘৰত স্মাৰ্ট মিটাৰ স্থাপন কৰা হৈছে, সেইবোৰত বিদ্যুৎ ব্যৱহাৰৰ ক্ষেত্ৰত ৬০ শতাংশ হ্ৰাস পাইছে, যিটো সঁচাকৈয়ে এক অতি ইতিবাচক লক্ষণ। মানুহবোৰ এতিয়া সতৰ্ক হৈ আছে আৰু বিদ্যুতৰ বিচাৰ-বিচক্ষণতাৰে ব্যৱহাৰ কৰি আহিছে বুলিও তাৎপৰ্যপূৰ্ণ মন্তব্য কৰে।

চৰকাৰে বাল্যবিবাহৰ বিৰুদ্ধে অভিযান চলাই ৩,৯০৭ গৰাকী ব্যক্তিক গ্ৰেপ্তাৰ কৰিবলৈ সক্ষম হয়। বিধায়ক দেৱব্ৰত শইকীয়াৰ এক প্ৰশ্নৰ উত্তৰত গৃহ বিভাগৰ দায়িত্বত থকা মুখ্যমন্ত্ৰী ডঃ হিমন্ত বিশ্ব শৰ্মাই এই তথ্য অবগত কৰে বিধানসভাৰ মজিয়াত। ডঃ শৰ্মাই সদৰি কৰা তথ্যমতে বাল্যবিবাহৰ গোচৰত গ্ৰেপ্তাৰ কৰা ৩,৩১৯ গৰাকীৰ বিৰুদ্ধে পছকো আইনৰ ধাৰাৰ অধীনত গোচৰ চলোৱা হৈছে। আনহাতে আদালতে ৬২ গৰাকক বাল্যবিবাহ প্ৰতিৰোধী আইনৰ অধীনত দোষী সাব্যস্ত কৰি শাস্তি বিহা বুলিও ডঃ শৰ্মাই জানিবলৈ দিয়ে। একেদৰে চৰকাৰে দুৰ্নীতিৰ বিৰুদ্ধে চলোৱা অভিযানত মুঠ ৪৭৯ গৰাকী ব্যক্তিক গ্ৰেপ্তাৰ কৰিবলৈ সক্ষম হয়।

বিগত পাঁচটা বছৰত দুৰ্নীতিৰ বিৰুদ্ধে পঞ্জীয়ন হোৱা গোচৰৰ সংখ্যা ৩১৬ টা। ২০১৮ বৰ্ষৰ পৰা ২০২৩ বৰ্ষৰ জুলাই পৰ্যন্ত চি আই ডিয়ে ৯১ টা গোচৰ ৰুজু কৰাৰ সমান্তৰাল কৈ দুৰ্নীতি নিৰীক্ষণ আৰু নিবাৰণ সঞ্চালকালয়ে ২০১৮ বৰ্ষৰ পৰা ২০২৩ বৰ্ষৰ সময়চোৱাত ১৯৮ টা আৰু মুখ্যমন্ত্ৰীৰ তদাৰকী কোষে ২৭ গোচৰ পঞ্জীয়ন কৰে। গ্ৰেপ্তাৰ হোৱা মুঠ ৪৭৯ গৰাকীৰ বিপৰীতে ২৩৪ জনৰ বিৰুদ্ধে আদালতত কেচ ডায়েৰী দাখিল কৰা বুলিও ডঃ শৰ্মাই সদৰি কৰে। আনহাতে আৰক্ষীয়ে ৪৯১ গৰাকী মাটিৰ দালালক গ্ৰেপ্তাৰ কৰিবলৈ সক্ষম হয় বুলি ডঃ হিমন্ত বিশ্ব শৰ্মাই সদনক জানিবলৈ দিয়ে।

বৃহত্তৰ চচল জ্যেষ্ঠ নাগৰিক সন্মিলনৰ অষ্টম প্ৰতিষ্ঠা দিৱসৰ মুকলি সভাত সন্মিলনৰ স্মৃতিগ্ৰন্থ “জ্যেষ্ঠ প্ৰভা”উন্মোচন কৰা হয়।

ডা৹ অঞ্জনজ্যোতি চৌধুৰী আছিল মুখ্য অতিথি আৰু শ্ৰী বাণেশ্বৰ খাওণ্ড নিৰ্দিষ্ট বক্তা।

গাম্ভীৰ্যপূৰ্ণ সভা খনৰ বাবে উদ্যোক্তা সকলৰ শলাগ ল’বলগীয়া। সন্ধিয়া পৰিবেশিত সান্ত্বনা দাস বৰ্মন ৰচিত আৰু পৰিচালিত “বৃদ্ধাশ্ৰমত অন্তৰংগ আলাপ “নাটকৰ প্ৰদৰ্শন কৰা হয়।