যোৰাবাটৰ ১৪ মাইলত বিধ্বংসী অগ্নিকাণ্ড।
প্লাষ্টিক আৰু কাৰ্টুনৰ ডেম্পত সংঘটিত হয় অগ্নিকাণ্ডৰ ঘটনা।
চিলিণ্ডাৰ বিস্ফোৰণৰ ফলত অগ্নিকাণ্ডৰ সূত্ৰপাত। পুৱতি নিশা প্ৰায় ৩ বজাত সংঘটিত হয় এই ঘটনা।
সোণাৰিৰ লংপতীয়া ৰে’ল ষ্টেচনত তীব্ৰবেগী ৰে’লে মহটিয়ালে এজন ৰে’লৱে শ্ৰমিকক…
সোণাৰিৰ লংপতীয়া ৰে’ল ষ্টেচনত অঘটন।
তীব্ৰবেগী ৰে’লে মহটিয়ালে এজন ৰে’লৱে শ্ৰমিকক। থিতাতে নিহত নাহৰকটীয়াৰ মৃদু সোণোৱাল।
ঠিকাদাৰৰ অধীনত ৰে’লৰ চিৰি বহুওৱা কামত নিয়োজিত আছিল লোকজন
হাফলঙত জিলাভিত্তিত অনুষ্ঠিত শিক্ষক দিৱসৰ অনুষ্ঠানত মন্ত্ৰী পীযূষ হাজৰিকা
অসম চৰকাৰৰ জলসম্পদ, তথ্য আৰু জনসংযোগ আদি বিভাগৰ মন্ত্ৰী পীযূষ হাজৰিকাই মঙলবাৰে হাফলঙত আয়োজিত জিলা ভিত্তিক শিক্ষক দিৱসৰ অনুষ্ঠানত মুখ্য অতিথি হিচাপে অংশগ্ৰহণ কৰে। ডিমা হাচাও জিলাৰ ১৭ গৰাকী কৃতী শিক্ষকক সম্বৰ্ধনা জনোৱা অনুষ্ঠানটোত বক্তব্য প্ৰদান কৰি মন্ত্ৰীগৰাকীয়ে ভাৰতৰ দ্বিতীয় গৰাকী ৰাষ্ট্ৰপতি ড° সৰ্বপল্লী ৰাধাকৃষ্ণনক শ্ৰদ্ধাৰে সোঁৱৰণ কৰে।
সমাজৰ শিক্ষকসকলে জীৱন গঢ়াৰ দৰে পৱিত্ৰ কৰ্মত ব্ৰতী হৈ আমাৰ উত্তৰ প্ৰজন্মক বাট দেখুৱাই লৈ যায় বুলি উল্লেখ কৰি মন্ত্ৰীগৰাকীয়ে সমাজৰ শিক্ষকসকলৰ ত্যাগ আৰু মহানতাৰ বিষয়ে মন্তব্য প্ৰকাশ কৰে।
আনহাতে আজিৰ মোবাইল আৰু ইন্টাৰনেট নিৰ্ভৰ সময়ত শিক্ষকসকলে ছাত্ৰ-ছাত্ৰীৰ বাবে নতুন এক প্ৰত্যাহ্বানৰ মুখামুখি হোৱা বুলি উল্লেখ কৰি মন্ত্ৰী হাজৰিকাই কয় যে ছাত্ৰ-ছাত্ৰীৰ মৌলিক আৰু বৌদ্ধিক বিকাশৰ বাবে আজিৰ শিক্ষাগুৰুসকলে যথেষ্ট কষ্ট কৰিবলগাত পৰিছে।
মন্ত্ৰীগৰাকীয়ে আৰু কয় যে বৰ্তমানৰ মুখ্যমন্ত্ৰী ড° হিমন্ত বিশ্ব শৰ্মা ৰাজ্যখনৰ শিক্ষামন্ত্ৰী থকা সময়ত প্ৰথমবাৰৰ বাবে ৰাজ্যখনত টেট পৰীক্ষা অনুষ্ঠিত কৰি শিক্ষক নিযুক্তিৰ প্ৰক্ৰিয়াটো নিকা আৰু মেধাভিত্তিত কৰিবলৈ আৰম্ভ কৰিছিল। বৰ্তমানৰ চৰকাৰখনে ৰাজ্যখনৰ শিক্ষা ব্যৱস্থাৰ উন্ময়নৰ বাবে বহুতো শিক্ষকক নিযুক্তি প্ৰদান কৰা আৰু বিদ্যালয় নিৰ্মাণৰ দৰে কাম হাতত লৈ খৰতকীয়াকৈ সমাপ্ত কৰা বুলি মন্ত্ৰীগৰাকীয়ে ভাষণ প্ৰসংগত উল্লেখ কৰে।
শিক্ষক দিৱসৰ অনুষ্ঠানত অসম চৰকাৰৰ মন্ত্ৰীদ্বয় যোগান মহন আৰু নন্দিতা গাৰ্লোছাৰ লগতে উত্তৰ কাছাৰ পাৰ্বত্য স্বায়ত্বশাসিত পৰিষদৰ মুখ্য কাৰ্যবাহী সদস্য দেবলাল গাৰ্লোছা, পৰিষদৰ কেইবাগৰাকীও কাৰ্যবাহী সদস্য, আৰু জিলা আয়ুক্ত উপস্থিত থাকে।
শিক্ষক দিৱসৰ দিনাই শিক্ষাগুৰুক সম্বৰ্ধনা জনাই হাৰিভাঙ্গা উচ্চতৰ মাধ্যমিক বিদ্যালয়ৰ পৰা ১৯৯৬ বৰ্ষৰ হাইস্কুল শিক্ষান্ত পৰীক্ষাত অৱতীৰ্ণ হোৱা-ছাত্ৰ ছাত্ৰীয়ে
নলবাৰী জিলাৰ বৃহত্তৰ হাৰিভাঙ্গা গাঁৱৰ শিক্ষাৰ প্ৰাণকেন্দ্ৰ হাৰিভাঙ্গা উচ্চতৰ মাধ্যমিক বিদ্যালয়ৰ পৰা ১৯৯৬ বৰ্ষৰ হাইস্কুল শিক্ষান্ত পৰীক্ষাত অৱতীৰ্ণ হোৱা ছাত্ৰ-ছাত্ৰীসকলে প্ৰতিবছৰে তেওঁলোকৰ শিক্ষাগুৰুসকলক শিক্ষক দিৱসৰ দিনা সম্বৰ্ধনা জনোৱাৰ দৰে এইবাৰো দুগৰাকী অৱসৰী শিক্ষকক তেওঁলোকৰ নিজ নিজ বাসভৱনত গৈ সম্বৰ্ধনা জ্ঞাপন কৰে।
সেই বৰ্ষৰ শিক্ষাৰ্থী ভাৰতীয় সেনাবাহিনীৰ অৱসৰী হাবালদাৰ কুলেন কলিতাক এখনি ফুলাম গামোচাৰে আদৰণি জনাই আৰম্ভ কৰা অনুষ্ঠানটো শিক্ষক ধীৰাজ গোস্বামী আঁত ধৰে।
এখনি ফুলাম গামোচা ,এখন ধৰ্মগ্ৰন্থ আৰু সম্বৰ্ধনা পত্ৰৰে সম্বৰ্ধনা জনোৱা হয় হাৰিভাঙ্গা উচ্চতৰ মাধ্যমিক বিদ্যালয়ৰ অৱসৰী শিক্ষক ক্ৰমে শ্ৰীযুত সত্যনাথ কলিতা আৰু শ্ৰীযুত নিতাই কলিতাক।
১৯৫৮ খ্ৰীষ্টাব্দতে স্থাপিত বিদ্যালয়খনৰ পৰা শিক্ষাগ্ৰহণ কৰা বহু প্ৰাক্তন ছাত্ৰ-ছাত্ৰীয়ে ফোনযোগেও শিক্ষকসকলক শ্ৰদ্ধা আৰু প্ৰনাম জনায় । অনুষ্ঠানটোত সক্ৰিয়ভাবে অংশগ্ৰহণ কৰা প্ৰতিজন প্ৰাক্তন ছাত্ৰ ছাত্ৰীক লগতে অনুপস্হিত অংশগ্ৰহণকাৰীসকলক শিক্ষাগুৰুসকলে হৃদয় উজাৰি আশীৰ্বাদ দিয়াৰ লগতে একোজন ভাল নাগৰিক হোৱাৰ বাবে ভগৱানক প্ৰাৰ্থনা জনায়।
বহু অতীত স্মৃতি ৰোমন্থন কৰা উক্ত অনুষ্ঠানসমূহে গুৰু শিষ্যৰ মধুৰ সম্পৰ্কৰ ইংগিত বহন কৰে বুলি মন্তব্য কৰে সম্বৰ্ধনা গ্ৰহণ কৰা সত্যনাথ কলিতাই। এই অনুষ্ঠানত অংশগ্ৰহণ কৰে পশ্চিম নাম্বৰভাগ আঞ্চলিক পঞ্চায়তৰ সভাপতি উদীয়মান যুবক গোবিন্দ কলিতা,১৯৯৬ বৰ্ষৰ হাইস্কুল শিক্ষান্ত পৰীক্ষাৰ অৱতীৰ্ণ বৰ্তমান ৰেল বিভাগৰ কৰ্মচাৰী যোগেশ কলিতা,ভাৰতীয় সেনাবাহিনীৰ অৱসৰী হাবালদাৰ কুলেন কলিতা ,বিপুল হালৈ,ৰীতা কলিতা,দীপিকা বৰ্মনে।
বৰপেটা জিলাৰ আঠ গৰাকী কৃতী শিক্ষকলৈ বঁটা
বৰপেটা জিলা প্ৰশাসন আৰু শিক্ষা বিভাগৰ উদ্যোগত মঙলবাৰে বৰপেটা জিলা পুথিভঁৰাল প্ৰেক্ষাগৃহত ৬২ সংখ্যক জিলা ভিত্তিক শিক্ষক দিৱস উদযাপন কৰা হয় ৷ বৰপেটা জিলাৰ অতিৰিক্ত আয়ুক্ত ( শিক্ষা) তথা সমগ্ৰ শিক্ষাৰ জিলা মিছন সমন্বয়ক লখিমী দত্তই শিক্ষক দিৱসৰ কাৰ্যসূচীসমূহ পতাকা উত্তোলনেৰে শুভাৰম্ভ কৰে ।
ইয়াৰ পিছত স্মৃতি তৰ্পন কাৰ্যসূচী ৰূপায়ন কৰা হয়। স্মৃতি তৰ্পন কৰে বৰপেটাৰ বিদ্যালয়সমুহৰ পৰিদৰ্শক তথা জিলা প্ৰাথমিক শিক্ষা বিষয়া ৰাতুল কুমাৰ দাসে ৷ আনহাতে ডঃ সৰ্বপল্লী ৰাধাকৃষ্ণণৰ প্ৰতিচ্ছবিত মাল্যাৰ্পন আৰু বন্তি প্ৰজ্জ্বলন কৰে বৰপেটা সাহিত্য সভাৰ সভাপতি তথা মাধৱ চৌধুৰী মহাবিদ্যালয়ৰ অসমীয়া বিভাগৰ অৱসৰ প্ৰাপ্ত মুৰব্বী অধ্যাপক ডঃ বাবুল চন্দ্ৰ দাসে৷
পুৱা ১১ বজাৰ লগে লগে মুকলি সভা আৰু কৃতী শিক্ষকক বঁটা প্ৰদান অনুষ্ঠান আৰম্ভ কৰা হয়।
নিৰ্দিষ্ট বক্তা হিচাপে উপস্থিত থাকিব মধ্য কামৰূপ মহাবিদ্যালয়ৰ অধ্যক্ষ ডঃ গোপেশ চন্দ্ৰ শৰ্মাই ড° সৰ্বেপল্লী ৰাধাকৃষ্ণণৰ জীৱনৰ তাৎপৰ্য তথা কৰ্মৰাজী সোৱৰণ কৰি শিক্ষক সকলক উদ্দেশ্যে বহু পৰামৰ্শ আগবঢ়ায়। আনহাতে বিশিষ্ট অতিথি হিচাপে উপস্থিত থাকি বাউসী বাণী কান্ত কাকতি মহাবিদ্যালয়ৰ অৱসৰপ্ৰাপ্ত ভাৰপ্ৰাপ্ত অধ্যক্ষ কনক চন্দ্ৰ নাথে শিক্ষক দিৱসৰ তাৎপৰ্য বহলাই বাখ্যা কৰি শিক্ষক তথা ছাত্ৰ ছাত্ৰী সকলক উৎসাহিত কৰে।
মাল্যাৰ্পক বৰপেটা সাহিত্য সভাৰ সভাপতি ডঃ বাবুল চন্দ্ৰ দাসে শিশুসকলৰ মাজত থকা সুপ্ত প্ৰতিভা শিক্ষকসকলক জগাই তুলিবলৈ আহ্বান জনায়। আজিৰ এই গুৰুত্বপূৰ্ণ সভাত মুখ্য অতিথি হিচাপে উপস্থিত থাকি বৰপেটা জিলাৰ আয়ুক্ত আয়ুষ গৰ্গে শিশুৰ স্বাস্থ্য আৰু শিক্ষাৰ ওপৰত বেছি গুৰুত্ব দি শিশুক বিষয়বস্তুৰ লগত জড়িত কৰিবলৈ পৰামৰ্শ দিয়ে। ছাত্ৰ-ছাত্ৰীৰ পৰীক্ষাৰ নম্বৰত গুৰুত্ব দিয়াতকৈ শিশুৰ ধাৰণা মজবুত কৰাত অধিক মনোযোগ দিবলৈ তেওঁ শিক্ষকসকলক আহ্বান জনায়।
এই সভাতে বৰপেটা জিলা প্ৰশাসনে শিক্ষা বিভাগৰ উদ্যোগত বাচনি কৰা মধ্য ভলুকাবাৰী পথাৰ প্ৰাথমিক বিদ্যালয়ৰ সহকাৰী শিক্ষক চন্দন কুমাৰ দাস, চেন্ট মেৰিছ এম ই স্কুলৰ সহকাৰী শিক্ষয়িত্ৰী প্ৰণীতা পাঠক, কেওঁটকুছি মজলীয়া বিদ্যালয়ৰ জ্যেষ্ঠ সহকাৰী শিক্ষক নৱজিৎ দাস, ফুলৰা চতলা হাইস্কুলৰ ভাৰপ্ৰাপ্ত প্ৰধান শিক্ষক হাফিজ উদ্দিন, বৰতাৰীৰ বি কে হাইস্কুলৰ প্ৰধান শিক্ষক আনোৱাৰ হুছেইন, বৰপেটা টাউন হাইস্কুলৰ ভাৰপ্ৰাপ্ত প্ৰধান শিক্ষক হুমায়ুন কবিৰ ছিদ্দিকী, ৰূপসী হাইস্কুলৰ ভাৰপ্ৰাপ্ত প্ৰধান শিক্ষক দ্বিজেন্দ্ৰ শৰ্মা আৰু দক্ষিণ বৰপেটা বিদ্যামন্দিৰ উচ্চতৰ মাধ্যমিক বিদ্যালয়ৰ ভাৰপ্ৰাপ্ত অধ্যক্ষ চাৰু চক্ৰৱৰ্তীক জিলা কৃতী শিক্ষক বঁটাৰ প্ৰদান কৰা হয়। সভাৰ শেষত অসমৰ মাননীয় মুখ্যমন্ত্ৰীৰ হৈ জিলা আয়ুক্ত আয়ুষ গৰ্গ আই, এ, এছ ডাঙৰীয় ই কৃতি শিক্ষক ৰাষ্ট্ৰপতি শিক্ষক বটাঁ প্ৰাপক বিবেকানন্দ ৰায় চৌধুৰী সম্বোৰ্ধনা জনায় ৷ সম্বোৰ্ধনা পত্ৰ পাঠ কৰে অতিৰিক্ত আয়ুক্ত আৰু জিলা মিছন সমন্বয়ক লখিমী দত্তই ৷ লগতে সহযোগ কৰে জিলা আঁচনি বিষয়া ৰঞ্জন দাসে ৷
দীপক কুমাৰ দাসলৈ প্ৰশিক্ষক আৰু ক্ৰীড়া সংগঠকৰ বঁটা
নেহৰু ষ্টেডিয়ামৰ দেশভক্ত তৰুণ ৰাম ফুকন ইন্দোৰ হ’লত ৪০ সংখ্যক সম্বৰ্ধনা অনুষ্ঠানত নলবাৰীৰ দীপক কুমাৰ দাসক প্ৰদান কৰা হয় চন্দ্ৰ নাথ চক্ৰৱৰ্তী সোঁৱৰণী প্ৰশিক্ষক আৰু ক্ৰীড়া সংগঠকৰ বঁটা। এই বঁটা পোৱা খবৰে জিলা খনত আনন্দময় পৰিবেশ সৃষ্টি হৈছে।
দীপক কুমাৰ দাসৰ ঘৰ নলবাৰী জিলাৰ অন্তৰ্গত জাজিয়াবাৰী গাঁৱত। তেওঁ অসমীয়া প্ৰতিদিন, দৈনিক অসম, অসমীয়া খবৰ, দৈনন্দিন বাৰ্তাকে ধৰি অসমৰ প্ৰায় গোটেই কেইখন বাতৰি কাকতত নলবাৰীৰ লগতে বিভিন্ন জিলাৰ ক্ৰীড়াৰ বাতৰি প্ৰেৰণ কৰি আহিছে।
নলবাৰী জিলাৰ এটি অগ্ৰণী ক্ৰীড়া অনুষ্ঠান পূব নলবাৰী কচিং চেন্টাৰৰ তেওঁ প্ৰতিস্থাপক সভাপতি। ১৯৯৭ চনত জন্ম গ্ৰহণ কৰা ক্ৰীড়া অনুষ্ঠানটোৱে বিগত ৩০ বছৰ ধৰি পূব নলবাৰীৰ বৃহৎ অঞ্চলটোত ভলীবলৰ জড়িয়তে খেলুৱৈ সৃষ্টিত অৰিহনা যোগাই আহিছে।
ইতিমধ্যে উক্ত ক্ৰীড়া সংগঠনটোত প্ৰশিক্ষণ প্ৰাপ্ত সৰহ সংখ্যক খেলুৱৈয়ে এতিয়া নলবাৰী জিলা দলক প্ৰতিনিধিত্ব কৰি অসম ভলীবল সন্হাই অনুষ্ঠিত কৰি অহা বিভিন্ন পৰ্যায়ৰ আন্তঃ জিলা ভলীবল প্ৰতিযোগিতাত কেইবাবাৰো আজুৰি আনিবলৈ সক্ষম হৈছে চুড়ান্ত বিজয়ীৰ।
দীপক কুমাৰ দাস নলবাৰী ক্ৰীড়া সন্থাৰ কাৰ্যলয় সম্পাদক হোৱাৰ উপৰিও অসম ভলীবল সন্থাৰ সহ সম্পাদক হিচাপে কাৰ্যনিৰ্বাহ কৰি আছে।
নলবাৰী ক্ৰীড়া সন্থাৰ সভাপতি তথা কেবিনেট মন্ত্ৰী জয়ন্ত মল্ল বৰুৱা, উপ সভাপতি মনোজ কুমাৰ চৌধুৰী, সাধাৰণ সম্পাদক বুবুল তালুকদাৰ, ভাৰতীয় ভলীবল দলৰ প্ৰাক্তন অধিনায়ক অভিজিৎ ভট্টাচাৰ্য, অসম ভলীবল সন্থাৰ সভাপতি সুশান্ত বিশ্ব শৰ্মা, সাধাৰণ সম্পাদকক প্ৰকাশ বৰা, অসম ফুটবল সন্থাৰ কোষাধ্যক্ষ হীৰেন গগৈ, সহ সম্পাদক অভিজিৎ কলিতাকে ধৰি ক্লাৱ-সংঘ সমূহে তেওঁক অভিনন্দন জনাইছে।
ৰাষ্ট্ৰীয় শিক্ষক দিৱস উপলক্ষে নগাঁৱত ২৮গৰাকী শিক্ষকক কৃতী শিক্ষক বঁটা প্ৰদান
“শিক্ষা দিয়া আৰু শিক্ষা গ্ৰহণ কৰা এক জীৱনযোৰা প্ৰক্ৰিয়া। সু- শিক্ষাৰ জৰিয়তেহে নৱ প্ৰজন্মৰ ছাত্ৰ-ছাত্ৰীক সঠিক দিশত আগুৱাই নিব পৰা যাব।”- এই মন্তব্য নগাঁৱস্থ মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ উপাচাৰ্য ডঃ মৃদুল কুমাৰ হাজৰিকাৰ।
মঙলবাৰে নগাঁও জিলা প্ৰশাসন আৰু শিক্ষা বিভাগৰ উদ্যোগত নগাঁও চৰকাৰী বালক উচ্চতৰ মাধ্যমিক বিদ্যালয়ৰ প্ৰেক্ষাগৃহত অনুষ্ঠিত ৬২সংখ্যক ৰাষ্ট্ৰীয় শিক্ষক দিৱসৰ কাৰ্যসূচীত মুখ্য অতিথি হিচাপে অংশগ্ৰহণ কৰি উপাচাৰ্য ড: হাজৰিকাই লগতে কয় যে, এজন আদৰ্শ শিক্ষক হ’বলৈ সংবেদনশীল, সহনশীলতা আৰু বৈচিত্ৰ্যময় গুণৰ অধিকাৰী হ’ব লাগিব। সত্যক জ্ঞানলৈ ৰূপান্তৰ কৰিব পৰাটোৱেই আচল শিক্ষা।
তেওঁ মূল্যবোধৰ শিক্ষাৰ ওপৰত গুৰুত্ব প্ৰদান কৰি কয় যে নৈতিকতা অবিহনে শিক্ষা সম্পূৰ্ণ হ’ব নোৱাৰে। জিলা আয়ুক্ত নৰেন্দ্ৰ কুমাৰ শ্বাহৰ সভাপতিত্বত আৰু শিক্ষক দিৱস উদযাপন সমিতিৰ সম্পাদক যজ্ঞেশ্বৰ ৰাজখোৱাই আঁতধৰা সভাখনত নগাঁও সদৰ সমষ্টিৰ বিধায়ক ৰূপক শৰ্মাই বিশিষ্ট অতিথি হিচাপে উপস্থিত থাকি ভাষণ প্ৰসংগত কয় যে শিক্ষা এটা জাতিৰ মেৰুদণ্ড স্বৰূপ।
শিক্ষাইহে এটা জাতিৰ আমোল পৰিৱৰ্তন আনিব পাৰে আৰু শিক্ষক সকল হ’ল এগছি বন্তিৰ দৰে। যি এখন সমাজ বা দেশক পোহৰাই তুলিব পাৰে। বিধায়ক গৰাকীয়ে শিক্ষা গুৰু সকলক যথেষ্ট সন্মান কৰিব লাগে বুলিও বিশেষকৈ নৱ প্ৰজন্মৰ প্ৰতি আহ্বান জনায়। নগাঁও সংমণ্ডল বিদ্যালয়সমুহৰ পৰিদৰ্শক মৃদুল কুমাৰ নাথে আদৰণি ভাষণ প্ৰদান কৰা অনুষ্ঠানত জিলাখনৰ ২৮ গৰাকী শিক্ষকক ‘কৃতী শিক্ষক বঁটা-২০২৩’ প্ৰদান কৰা হয়।
অনুষ্ঠানতে মুখ্যমন্ত্ৰী ড :হিমন্ত বিশ্ব শৰ্মাই শিক্ষক দিৱস উপলক্ষে ২০১০ বৰ্ষৰ পৰা চলিত বৰ্ষ পৰ্যন্ত জিলাখনৰ পৰা ৰাষ্ট্ৰীয় আৰু ৰাজ্যিক পৰ্যায়ত কৃতী শিক্ষকৰ বঁটা লাভ কৰা মুঠ ২৭ গৰাকী শিক্ষকৰ বাবে প্ৰেৰণ কৰা বিশেষ প্ৰশংসা পত্ৰ আৰু গামোচা-চেলেঙেৰে সম্বৰ্ধনা জনোৱা হয়।
সভাখনত জিলাখনৰ শিক্ষা বিভাগৰ অতিৰিক্ত আয়ুক্ত মনোৰমা মৰাং, বিদ্যালয় সমূহৰ উপ-পৰিদৰ্শক দেৱেন লহকৰ, জিলা অধিবিদ্যা পৰিষদৰ সচিব ৰঞ্জিত শইকীয়া, সদৌ অসম উচ্চতৰ মাধ্যমিক শিক্ষক-কৰ্মচাৰী সন্থাৰ বিষয়ববীয়া মৃগাংক বৰা প্ৰমুখ্যে ভালে কেইগৰাকী বিশিষ্ট ব্যক্তি উপস্থিত থাকে।
গুৱাহাটীবাসী বজেলীয়া সমাজৰ শিক্ষক সম্বৰ্ধনাৰ সফল সামৰণি
মঙলবাৰে গুৱাহাটী জি. এছ. ৰোডত অৱস্থিত ল’জ কুঞ্জলতাত গুৱাহাটীবাসী বজেলীয়া সমাজৰ উদ্যোগত অনুষ্ঠিত হোৱা দুুদিনীয়াকৈ পালন কৰা শিক্ষাবিদ কামেশ্বৰ দাসৰ স্মৃতি দিৱসৰ সফল সামৰণি পৰে৷ মঙলবাৰৰ কাৰ্যসূচীত পুৱা ডক্টৰ সৰ্ব্বপল্লী ৰাধাকৃষ্ণণ আৰু কামেশ্বৰ দাসৰ প্ৰতিচ্ছবিত স্মৃতি তৰ্পণ কৰে গুৱাহাটীবাসী বজেলীয়া সমাজৰ কাৰ্যকৰী সভাপতি সুৰেণ মেধি আৰু অৱসৰপ্ৰাপ্ত এ.চি.এছ বিষয়া সত্যেন তালুকদাৰে৷
ইয়াৰ পিছতে অনুষ্ঠিত স্মৃতিচাৰণ আৰু শিক্ষক সম্বৰ্ধনা সভাত সভাপতিত্ব কৰে গুৱাহাটীবাসী বজেলীয়া সমাজৰ সভাপতি তথা বিশিষ্ট কবি নীলিম কুমাৰে৷ তেখেতৰ ভাষণত বজেলীয়া সমাজৰ লক্ষ্য আৰু উদ্দেশ্য ব্যাখ্যা কৰাৰ লগতে কামেশ্বৰ দাসৰ চমু বিৱৰণি দাঙি ধৰে৷
মুখ্য অতিথি হিচাপে অংশগ্ৰহণ কৰি কটন মহাবিদ্যালয়ৰ অৱসৰপ্ৰাপ্ত অধ্যাপক ডক্টৰ জগদীশ পাটগিৰিয়ে কামেশ্বৰ দাসৰ ওপৰত আলোচনা আগবঢ়ায় লগতে কামেশ্বৰ দাসৰ স্মৃতি যুগমীয়াকৰণত গুৰুত্ব আৰোপ কৰে৷ কামেশ্বৰ দাসৰ নাতিনী ললিতা লহকৰৰ মঙ্গলাচৰণেৰে শুভাৰম্ভণি হোৱা সভাখনত বিশিষ্ট অতিথি হিচাপে সত্যেন তালুকদাৰে কামেশ্বৰ দাসৰ ওপৰত দু-আষাৰ কয়৷
শিক্ষক দিৱসৰ লগত সংগতি ৰাখি আয়োজন কৰা এক শিক্ষক সম্বৰ্ধনা অনুষ্ঠানত বজালীৰ বিভিন্ন অঞ্চলৰ আৰু বৰ্তমানে গুৱাহাটীৰ স্থায়ী বাসিন্দা আঠগৰাকী অৱসৰপ্ৰাপ্ত শিক্ষক-শিক্ষয়িত্ৰীক সম্বৰ্ধনা জ্ঞাপন কৰা হয়৷ সভাত শিক্ষাবিদ, সু-সাহিত্যিক বজালী উচ্চতৰ মাধ্যমিক বিদ্যালয় অৱসৰপ্ৰাপ্ত শিক্ষক সতীশ চন্দ্ৰ চৌধুৰী শাৰীৰিক অসুস্থতাৰ বাবে সম্বৰ্ধনা অনুষ্ঠানত উপস্থিত থাকিব নোৱাৰিলে৷
সভাত কটন মহাবিদ্যালয়ৰ অৱসৰপ্ৰাপ্ত অধ্যাপক সুৰেণ তালুকদাৰ, কেন্দ্ৰীয় বিদ্যালয় সংগঠনৰ অৱসৰপ্ৰাপ্ত বিষয় শিক্ষক সুৰেণ গোস্বামী, ওৰাং উচ্ছতৰ মাধ্যমিক বিদ্যালয়ৰ অৱসৰপ্ৰাপ্ত বিষয় শিক্ষয়িত্ৰী হিৰণ দেৱী, ডিব্ৰুগড় মহাবিদ্যালয়ৰ অৱসৰপ্ৰাপ্ত অধ্যক্ষ কান্তেশ্বৰ তালুকদাৰ, আৰ্য্য বিদ্যাপীঠ মহাবিদালয়ৰ অৱসৰপ্ৰাপ্ত সহযোগী অধ্যাপিকা ডক্টৰ অৰ্চনা পূজাৰী, কৃষ্ণনগৰ বিদ্যাপীঠ এম. ই. স্কুলৰ প্ৰাক্তন প্ৰধান শিক্ষক চত্ৰধৰ ডেকা আৰু বজালী উচ্ছতৰ মাধ্যমিক বিদ্যালয়ৰ অৱসৰ প্ৰাপ্ত প্ৰধান শিক্ষয়িত্ৰী কবিতা চৌধুৰী সম্বৰ্ধনা সভাত উপস্থিত থাকি সম্বৰ্ধনা গ্ৰহণ কৰি তেখেতসকলৰ শিক্ষক জীৱনৰ অভিজ্ঞতাসমূহ প্ৰকাশ কৰাৰ লগতে কামেশ্বৰ দাসৰ প্ৰতি গভীৰ শ্ৰদ্ধা নিৱেদন কৰে৷
সভাখন আঁত ধৰে বিশিষ্ট আবৃত্তিকাৰ তথা শিক্ষয়িত্ৰী মামণি কলিতা ডেকাই লগতে সভাত কবি নীলিম কুমাৰৰ কবিতা ‘শিক্ষক’ আবৃত্তি কৰে৷ সভাত উপস্থিত থাকি সভাখন সুচাৰুৰূপে সম্পন্ন হোৱাত সহায় কৰাৰ বাবে গুৱাহাটীবাসী বজেলীয়া সমাজৰ সম্পাদক কন্দৰ্প কুমাৰ শৰ্মা আৰু যুটীয়া সম্পাদক খনীন্দ্ৰ নাথ দেৱচৌধুৰীয়ে সকলোকে ধন্যবাদ জনোৱাৰ লগতে কামেশ্বৰ দাসৰ পৰিয়ালবৰ্গৰ উপস্থিতি আৰু সহযোগিতাৰ বাবে কৃতজ্ঞতা জনোৱাৰ লগতে ভৱিষ্যেতেও এনেধৰণৰ সহায় সহযোগিতা আগবঢ়াবলৈ আহ্বান জনায়৷ সভাৰ শেষত শাৰীৰিক অসুস্থতাৰ বাবে সভাত উপস্থিত থাকিব নোৱাৰা সতীশ চন্দ্ৰ চৌধুৰীক হাতীগাঁও বাসগৃহত গৈ সম্পাদক কন্দৰ্প কুমাৰ শৰ্মা, যুটীয়া সম্পাদক খনীন্দ্ৰ নাথ দেৱ চৌধুৰী, সদস্য চন্দন শৰ্মা আৰু জিতেন চৌধুৰীয়ে সম্বৰ্ধনা জনায়৷
পশ্চিম নলবাৰীত শিক্ষক দিৱসঃ অৱসৰপ্ৰাপ্ত শিক্ষাগুৰুলৈ ‘জ্ঞানসিন্ধু বঁটা’
পশ্চিম নলবাৰীৰ বিভিন্ন শৈক্ষিক প্ৰতিষ্ঠানত মঙলবাৰে উলহ-মালহৰে শিক্ষক দিৱস উদযাপন কৰা হয়।
উল্লেখ্য যে পশ্চিম নলবাৰী শিক্ষা খণ্ডৰ অন্তৰ্গত ১৮৭ নং জাগাৰা প্ৰাথমিক বিদ্যালয়ত পশ্চিম নলবাৰী প্ৰাথমিক শিক্ষক সন্মিলনীৰ উদ্যোগতো উদযাপিত শিক্ষক দিৱস।
সেইমৰ্মে পশ্চিম নলবাৰী প্ৰাথমিক শিক্ষক সন্মিলনীৰ সভাপতি হৰিচৰণ তালুকদাৰৰ পৌৰোহিত্যত অনুষ্ঠিত সভাত জয়ন্ত তালুকদাৰ, মিণ্টু বৰ্মণ, সত্যেন মিশ্ৰ, মনোজ ৰাজবংশী, মহানন্দ দাস, গোকুল ডেকা, বৰ্ণালিমা গোস্বামী, ভবেশ তালুকদাৰ প্ৰভৃতি শিক্ষাব্ৰতীৰ উপৰি অঞ্চলটোৰ শিক্ষককে ধৰি দুই শতাধিক লোক উপস্থিত থাকে।
পশ্চিম নলবাৰী প্ৰাথমিক শিক্ষক সন্মিলনীৰ তৰফৰ পৰা জ্ঞানসিন্ধু বঁটাও কাৰ্যসূচীৰ সৈতে সংগতি ৰাখি কৰা হয় বুলি জানিব পৰা গৈছে। এই বছৰ পশ্চিম নলবাৰী প্ৰাথমিক শিক্ষক সন্মিলনীয়ে জ্ঞানসিন্ধু বঁটা প্ৰদান কৰে পশ্চিম নলবাৰীৰ অৱসৰপ্ৰাপ্ত কৃতী শিক্ষক নগেন ডেকাক ।
আনহাতে, ৬২৫ নং খাৰশিঠা প্ৰাথমিক বিদ্যালয়ত অনুষ্ঠিত শিক্ষক দিৱসত শিক্ষাৰ্থীৰ বাৰেৰহণীয়া কাৰ্যসূচীয়ে সকলোকে আপ্লুত কৰে । অনুষ্ঠানত উপস্থিত থাকি ঔপন্যাসিক নীলিম আকাশ কাশ্যপে শিক্ষকৰ দায়িত্ব, কৰণীয়ৰ উপৰি শিক্ষকৰ প্ৰতি সমাজৰ মনোভাৱ, দায়িত্ব আদি সম্পৰ্কত জ্ঞানগৰ্ভী ভাষণ প্ৰদান কৰে ।
ইফালে আমনি শংকৰ প্রাথমিক বিদ্যালয়ত বিদ্যালয়খনৰ পৰিচালনা সমিতি আৰু মাতগোটৰ উদ্যোগত শিক্ষক দিৱস পালন কৰি বিদ্যালয়ৰ শিক্ষক সকলক ফুলাম গামোছা আৰু কলমেৰে সম্বর্ধনা জনাই শিক্ষক সকল উৎসাহিত কৰাৰ উপৰি চামতা বালিপথাৰ স্থিত অক্মফোর্ড পেৰামেডিকেলত আৰম্বৰ পূর্ণভাবে শিক্ষক দিৱস পালন কৰাৰ লগতে এখন সভা অনুষ্ঠিত কৰে কবি ,অৱসৰ প্রাপ্ত শিক্ষক প্রবিন বর্মনৰ পৌৰহিত্যত সভা অনুষ্ঠিত হয়৷
আমন্ত্ৰিত অতিথি হিচাপে উপস্থিত থাকে শিক্ষক সমাজকর্মী তপন কুমাৰ শর্মা ,চামতা উচ্চতৰ মাধ্যমিক বিদ্যালয়ৰ প্রাক্তন অধ্যক্ষ বলেন কুমাৰ গোস্বামীয়ে ৷ ভাষণ প্রসংগত তপন কুমাৰ শর্মাই শিক্ষাব্রতী ড০ সর্ব্বপল্পী ৰাধাকৃষ্ণনৰ বিষয়ে সুন্দৰ ভাবে উল্লেখ কৰে বলেন গোস্বামীয়েও মহান ব্যক্তি গৰাকীৰ ওপৰত বক্তব্য ৰাখে, পেৰামেডিকেলৱ সঞ্চালিকা জোনালী মেধিয়ে শলাগৰ শৰাই আগবঢ়াই ৷
লাহৰীঘাটৰ বিভিন্ন শিক্ষানুষ্ঠানত উলহ মালহেৰে শিক্ষক দিৱস পালন
সমগ্র দেশে মঙলবাৰে ভাৰতৰ প্ৰয়াত উপ ৰাষ্ট্ৰপতি ড০ সৰ্বপল্লী ৰাধাকৃষ্ণণৰ দেৱৰ ১৩৫ তম জন্মদিনৰ লগতে ৬২ তম শিক্ষক দিৱস উলহ মালহেৰে পালন কৰে। তাৰে লগত সংগতি ৰাখি মৰিগাঁও জিলাৰ লাহৰীঘাট কণিষ্ঠ মহাবিদ্যালয়তো বিভিন্ন কাৰ্যসূচীৰ মাজেৰে শিক্ষক দিৱস পালন কৰা হয়।
পুৱা ১০ বজাত ড০ সৰ্বপল্লী ৰাধাকৃষ্ণণৰ প্ৰতিচ্ছবিত পুষ্পমাল্য অৰ্পণ কৰি শলিতা জ্বলাই শ্ৰদ্ধাঞ্জলি জ্ঞাপন কৰা হয়। ইয়াৰ পিছত কেক কাটি সকলোৱে মিলি জুলি আনন্দ কৰে। মুকলি সভাত কণিষ্ঠ মহাবিদ্যালয়ৰ ছাত্র ছাত্রী সকলে অধ্যক্ষ আৰু বিষয় শিক্ষকসকলক জাপি,ফুলাম গামোচা আৰু কলমেৰে সম্বৰ্ধনা জনাই শিক্ষা গুৰুসকলৰ পৰা আশীর্বাদ গ্রহণ কৰে।
মুকলি সভা সঞ্চালনা কৰে অধ্যক্ষ ফাইজুৰ ৰহমানে। আদৰণি পৰ্বৰ আঁত ধৰে বিষয় শিক্ষক আমৰুল হুছেইন আৰু কামাল উদ্দিন আহমেদে। ছাত্র-ছাত্রীসকলৰ হৈ উদ্দেশ্য বাখ্যা কৰে জাকাৰীয়া আলমে আৰু সম্বৰ্ধনা পৰ্বত সহযোগিতা কৰা ছাত্র ছাত্রীসকল ক্ৰমে মুবাশিৰ আহমেদ, নাজিৰুল ইছলাম, ৰেকিবুল ইছলাম, ৰবিউল হুছেইন, কাৰিমা খাতুন আৰু ৰুকচানা বেগমে।
আনহাতে লাহৰীঘাট চিনিয়ৰ চেকেণ্ডাৰী ইংলিচ স্কুলতো উলহ মালহেৰে পালন কৰিলে শিক্ষক দিৱসঃ
মৰিগাঁও জিলাৰ লাহৰীঘাট চিনিয়ৰ চেকেণ্ডাৰী ইংলিচ স্কুলতো বিভিন্ন কাৰ্যসূচীৰ মাজেৰে শিক্ষক দিৱস পালন কৰা হয়। পুৱা ১০ বজাত ড০ সৰ্বপল্লী ৰাধাকৃষ্ণণৰ প্ৰতিচ্ছবিত পুষ্পমাল্য অৰ্পণ কৰি শলিতা জ্বলাই শ্ৰদ্ধাঞ্জলি জ্ঞাপন কৰা হয়।
ইয়াৰ পিছত কেক কাটি সকলোৱে মিলি-জুলি আনন্দ কৰে। মুকলি সভাত বিদ্যালয় পৰিচালনা সমিতিৰ লগতে বিদ্যালয়ৰ ছাত্র ছাত্রীসকলে শিক্ষক-শিক্ষয়িত্ৰীসকলক ফুলাম গামোচা, কলম আৰু অন্যান্য উপহাৰ প্ৰদান কৰি আশীর্বাদ গ্রহণ কৰে।
ইয়াৰ পিছত ছাত্র ছাত্রী সকলে গীত নৃত্য আদিৰ দ্বাৰা পৰিবেশ মুখৰিত কৰে। মুকলি সভা সঞ্চালনা কৰে বিদ্যালয়ৰ উপাধ্যক্ষ ৰামকৃষ্ণ বাগলাৰীয়ে। আদৰণি পৰ্বৰ আঁত ধৰে অধ্যক্ষ চুলমান আলীয়ে।
দাতিয়ালবড়ি হাই স্কুলতো উলহ মালহেৰে পালন কৰিলে শিক্ষক দিৱসঃ ৫ গৰাকী চাকৰি সূত্রে বদলিকৰণ হোৱাত বিদায়ী সম্বৰ্ধনাঃ
মৰিগাঁও জিলাৰ দাতিয়ালবড়ি হাই স্কুলতো বিভিন্ন কাৰ্যসূচীৰ মাজেৰে শিক্ষক দিৱস পালন কৰা হয়। পুৱা ৯ বজাত বিদ্যালয় চৌহদত বৃক্ষ ৰোপণ কৰে প্ৰধান শিক্ষক ফজল উদ্দিন ভাসানী আৰু শিক্ষক গোটে। মুকলি সভাত দাতিয়ালবড়ি হাই স্কুলৰ ছাত্র-ছাত্রীসকলে প্রধান শিক্ষক আৰু শিক্ষক গোটৰ সকলো শিক্ষকক ফুলাম গামোচা আৰু কলমেৰে সম্বৰ্ধনা জনাই আশীর্বাদ গ্রহণ কৰে।
মুকলি সভা সঞ্চালনা কৰে প্রধান শিক্ষক ফজল উদ্দিন ভাসানীয়ে। উদ্দেশ্য বাখ্যা কৰে সহ শিক্ষক হান্নান ফাৰুকীয়ে। আদৰণি পৰ্বৰ আঁত ধৰে সহ শিক্ষক খাইৰুল ইছলামে। প্ৰথম পৰ্বৰ সম্বৰ্ধনা হোৱাৰ পিছত ছাত্র-ছাত্রীসকলে নাটক, গীত,নৃত্য আৰু কবিতা আবৃত্তি কৰি দৰ্শকৰ মন জয় কৰে।
বিয়লি ২ বজাত পুনৰ বিদ্যালয়ৰ ৫ জন শিক্ষক ক্ৰমে মাফুজুৰ ৰহমান, আব্দুল হামিদ,মহিবুল্লাহ, বিক্ৰমজিৎ তামুলী আৰু মৌলবী চাহাব উদ্দিনে চাকৰি সূত্রে বদলি কৰণ হোৱাত তেওঁ লোক আটাই কেইজনকে ফুলাম গামোচা, শৰাই, জায়নামাজ, কলম আৰু টুপিৰে বিদায়ী সম্বৰ্ধণা জনায় বিদ্যালয়ৰ শিক্ষক গোটৰ তৰফৰ পৰা। সম্বৰ্ধণা অনুষ্ঠানত সাংবাদিক খাইৰুল ইছলামকো ফুলাম গামোচা আৰু কলমেৰে সম্বৰ্ধণা জনোৱা হয়।
-খাইৰুল ইছলাম,ভূৰাগাঁও মৰিগাঁও