এতিয়া ৰাজ্যখনৰ বিভিন্ন জিলাৰ একাংশ যুৱক-যুৱতী নিষিদ্ধ ঘোষিত সংগঠন আলফা ( স্বাধীন) লৈ গমন কৰি থকাৰ সময়তে বঙাইগাঁও আৰক্ষীয়ে আলফালৈ যোৱাৰ বাবে প্ৰস্তুতি চলোৱা এজন যুৱকক আটক কৰিছে ৷ সামাজিক মাধ্যম ফেছবুকত আলফালৈ যোৱাৰ বাবে ইচ্ছুক আৰু মন আছে বুলি প্ৰচাৰ চলাই আৰক্ষীৰ জালত পৰে যুৱকজন ৷ কেৱল আৰক্ষীৰ দ্বাৰা আটক হোৱাই নহয় বৰং জেল হাজোতলৈও যাবলগীয়া হ’ল যুৱকজন ৷ উল্লেখ্য যে বঙাইগাঁও আৰক্ষীয়ে আটক কৰা যুৱকজন বঙাইগাঁও সদৰ থানাৰ অন্তৰ্গত ডাউকিঝাৰৰ ডেভিদ বৰ্মন (২১) বুলি আৰক্ষীয়ে প্ৰকাশ কৰিছে ৷ এই সন্দৰ্ভত বঙাইগাঁও জিলাৰ অতিৰিক্ত আৰক্ষী অধীক্ষক লুনা সোণোৱালে সংবাদ মাধ্যমক জানিবলৈ দিয়া মতে এক বিশেষ সূত্ৰৰ পমখেদি বঙাইগাঁও আৰক্ষীয়ে শুকুৰবাৰৰ নিশা ডাউকিঝাৰৰ নিজ গৃহৰ পৰা যুৱক জনক আটক কৰে ৷ যুৱকজনক পিচত সোধ- পোচ কৰাৰ অন্তত যুৱকজনে নিষিদ্ধ ঘোষিত সংগঠন আলফাত যোগদানৰ ইচ্ছাৰ কথা আৰক্ষীৰ আগত স্বীকাৰ কৰে ৷

লগতে যুৱকজনে আলফালৈ যোৱাৰ বাবে প্ৰস্তুতি চলাইছিল বুলিও অতিৰিক্ত আৰক্ষী অধীক্ষকগৰাকীয়ে সংবাদ মাধ্যমক জানিব দিয়ে ৷ এই সম্পৰ্কত যুৱকজনৰ বিৰুদ্ধে বঙাইগাঁও সদৰ থানাত ২৪২/২০২২ (  Case No 242/2022-  U/S- 120 (B) / 121/121(A) IPC, R/W Sec -13(1)(b) U.A (P) Act, R/W Sec b6 (F) I.T Act) নম্বৰৰ এটা গোজৰ ৰুজু কৰি পিচত  গ্ৰেপ্তাৰ কৰে ৷ ধৃত যুৱকজনক আৰক্ষীয়ে শনিবাৰে বঙাইগাঁও আদালতত হাজিৰ কৰোৱাত আদালতে জেল হাজোতলৈ প্ৰেৰণ কৰে ৷ ডেভিদ বৰ্মন নামৰ যুৱকজনে বিশেষ কোনো কাম বন নকৰে ৷ ইপিনে ৰাজ্যৰ বিভিভিন্ন ঠাইৰ পৰা হঠাতে একাংশ যুৱক – যুৱতী আলফাত যোগদানৰ বাবে গৈ থকাৰ পিচত বঙাইগাঁও জিলা আৰক্ষীয়েও বিষয়টোৰ প্ৰতি গুৰুত্বাৰোপ কৰি তলে তলে চোকা দৃষ্টি ৰাখিছে ৷ লগতে সামাজিক মাধ্যমৰ ওপৰতো নজৰ ৰাখিছে ৷ আনহাতে কিছুদিন পূৰ্বে নৰ্থ বইটামাৰী অঞ্চলৰ অপৰাজিত নাথ নামৰ যুৱক এজন ঘৰৰ পৰা ওলাই যোৱাৰ পিচৰে পৰা সন্ধানহীন হৈ থকা বিষয়ত অতিৰিক্ত আৰক্ষী অধীক্ষকগৰাকীয়ে জানিবলৈ দিয়া মতে যুৱকজনেপৰিয়ালৰ লোকক আলফা ( স্বাধীন) ত যাৱলৈ ইচ্ছা প্ৰকাশ কৰে ৷ সামাজিক মাধ্যমত যুৱকজনে এই  সন্দৰ্ভত পূৰ্বে পষ্ট দিয়াৰ পিচত যুৱকজনক মতাই আনি আৰক্ষীৰ ফালৰ পৰা বুজোৱাও হৈছিল ৷ কিন্তু পিচত ঘৰৰ পৰা মই যাও বুলি কৈ ওলাই গৈছে ৷ সেয়ে বৰ্তমান যুৱকজন আলফাত যোগদান কৰিছে নে নাই এই সন্দৰ্ভত কোনো নিশ্চিত তথ্য পোৱা নাই বুলিও কয় ৷ 

গুৱাহাটী উচ্চ ন্যায়ালয়ৰ মহামান্য মুখ্য ন্যায়াধীশ এন কোটিশ্বৰ সিঙে শনিবাৰে বঙাইগাঁও জিলা আৰু সত্ৰ ন্যায়াধীশৰ আদালতত অনুষ্ঠিত দ্বিতীয় ৰাষ্ট্ৰীয় লোক আদালতৰ কাৰ্যসূচী পৰিদৰ্শন কৰে ৷ লগতে জিলা আৰু সত্ৰ ন্যায়াধীশৰ আদালতত কি কি সা-সুবিধা আছে সেয়া পৰিদৰ্শন কৰি আদালতখনৰ বিষয়ববীয়াৰ লগতো মুখ্য ন্যায়াধীশৰাকীয়ে বাৰ্তালাপ কৰে ৷ ইয়াৰ পিছতে মুখ্য ন্যায়াধীশগৰাকীয়ে বঙাইগাঁও জিলাৰ সীমান্তৱৰ্তী চাপাগুৰীস্থিত হোটেল চিগনেটত অসম ৰাজ্যিক আইন সেৱা প্ৰাধিকৰণ আৰু  “আৰণ্যক”নামৰ বন্যপ্ৰাণী প্ৰেমী সংগঠনৰ যুটীয়া উদ্যোগত আয়োজন কৰা সজাগতা কৰ্মশালাত অংশগ্ৰহণ কৰে। ভাষণ প্ৰসংগত মুখ্য ন্যায়াধীশ এন কোটিশ্বৰ সিঙে কয় যে বন্যপ্ৰাণী সম্পৰ্কীয় অপৰাধ ৰোধ কৰিবলৈ বহুপক্ষীয় প্ৰচেষ্টাৰ প্ৰয়োজন। সমগ্ৰ বিশ্বতে আজি বন্যপ্ৰাণী সম্পৰ্কীয় অপৰাধ ৰোধৰ বাবে এক জাগৰণৰ সৃষ্টি হৈছে। এই ক্ষেত্ৰত বন বিভাগ, আৰক্ষী, সীমান্ত সুৰক্ষা বাহিনী,অৰ্ধ সামৰিক বাহিনী, সেনা বাহিনী আৰু সমাজৰ আন আন বেচৰকাৰী সংগঠনবিলাকে বন্য প্ৰাণী সংৰক্ষণৰ বাবে সমন্বিত প্ৰচেষ্টাৰে কাম কৰা প্ৰয়োজন বুলিও তেওঁ উল্লেখ কৰে ।

মুখ্য ন্যায়াধীশগৰাকীয়ে কয় যে ভাৰতৰ সংবিধানত লিপিবদ্ধ আইন মতে সকলো নাগৰিকৰে এইটো মৌলিক কৰ্তব্য যে তেওঁলোকে প্ৰাকৃতিক পৰিৱেশ, বনাঞ্চল, বিল আৰু বন্য-প্ৰাণী সংৰক্ষণ কৰিব লাগে। তাৰ বাবে সীমান্তত সশস্ত্ৰ সীমাবলৰ অধীনৰ এজন জোৱান নিয়োগ কৰা হয় আৰু তেওঁ কোনো কাৰণতে নিজৰ দেশৰ বা ৰাজ্যৰ মূল্যৱান জীৱ-জন্তুসমূহ সীমান্তৰে চোৰাংভাৱে সৰবৰাহ যাতে নহয় তাৰ ওপৰত নজৰ দিব লাগে। সেনা আৰু অৰ্ধ -সামৰিক বাহিনীৰো এইটো দায়িত্ব আছে যে তেওঁলোকে বন্যপ্ৰাণী সম্পৰ্কীয় অপৰাধ ৰোধৰ ক্ষেত্ৰত  আৰক্ষী আৰু বন বিভাগক সহায়ৰ হাত আগবঢ়াব লাগে।তেওঁ আৰু কয় যে বন্যপ্ৰাণী অবৈধ সৰবৰাহ কৰা অপৰাধীক হাতেলোটে ধৰিব পাৰিলে জৰিমনা বিহা আৰু মূল্যৱান জীৱসমূহ জব্দ কৰাটোও লঘু দৃষ্টিভংগীৰে ল’ব নালাগে।গুৱাহাটী উচ্চ ন্যায়ালয়ৰ এগৰাকী ন্যায়াধীশ সৌমিত্ৰ শইকীয়াই কয় যে বন্যপ্ৰাণী সুৰক্ষা আইন,১৯৭২(Wildlife Protection Act,1972) ত বন্যপ্ৰাণী সুৰক্ষা সম্পৰ্কীয় কেবাটাও প্ৰধান দফা থকাৰ উপৰিও ফৌজদাৰী বিধিও আছে যিকেইটা সমানে প্ৰযোজ্য। 

তেওঁ আৰু কয় যে বেচৰকাৰী সংগঠন, আইন বলবৎকাৰী,বিশেষজ্ঞ,বন বিভাগ আৰু আন বহুতো লোকে বন্যপ্ৰাণী সংৰক্ষণৰ ক্ষেত্ৰত যথেষ্ট উল্লেখনীয় কাম কৰিছে। উক্ত সজাগতামূলক কৰ্মশালাত অসম আৰক্ষী,অসমৰ বন বিভাগ, সশস্ত্ৰ সীমা বলৰ উপৰিও বৰপেটা, বঙাইগাঁও, কোকৰাঝাৰ আৰু চিৰাং জিলাৰ ন্যায়ালয়ৰ বিষয়ববীয়াও অংশগ্ৰহণ কৰে।তেওঁলোকৰ ভিতৰত আছিল অসম ৰাজ্যিক আইন সেৱা প্ৰাধিকৰণৰ সদস্য সচিৱ নয়ন শংকৰ বৰুৱা, বঙাইগাঁও জিলা আইন সেৱা প্ৰাধিকৰণৰ সচিৱ তৰুণ দে’, এছ এছ বিৰ ডি আই জি  জগদীপ পাল সিং (ৰঙিয়া), এছ এছ বি বঙাইগাঁৱৰ ডি আই জি এন্টনী থানমী, মানাহ ৰাষ্ট্ৰীয় উদ্যানৰ ক্ষেত্ৰ সঞ্চালক ড:বৈভৱ চি মাথুৰ আৰু ৰায়মনা ৰাষ্ট্ৰীয় উদ্যানৰ বন সংমণ্ডল বিষয়া বিষ্ণু সিং। আনহাতে আৰণ্যকৰ বিষয়ববীয়াসকলো উপস্থিত থাকে ৷ 

আজি খানাপাৰাৰ পশু চিকিৎসা মহাবিদ্যাসয় খেলপথাৰত অসম চৰকাৰে নিযুক্তি প্ৰক্ৰিয়াৰ শুভাৰম্ভ কৰে৷ ৰাজ্যৰ প্ৰায় ২৩,০০০ যুৱক-যুৱতীক অসম চৰকাৰৰ অধীনস্থ কেইবাটাও বিভাগত নিযুক্তিপত্ৰ প্ৰদান কৰা হয়৷ পিছে, খানাপাৰাত নিযুক্তি পত্ৰ লাভ নকৰা যুৱক-যুৱতীসকলক পৰৱৰ্তী সময়ত প্ৰদান কৰা হ’ব নিযুক্তিপত্ৰ৷  আজি নিযুক্তি পত্ৰ লাভ নকৰা যুৱক-যুৱতীসকলে পৰৱৰ্তী সময়ত ক’ত কেনেকৈ নিযুক্তি পত্ৰ লাভ কৰিব সেই বিষয়ে মুখ্যমন্ত্ৰী শৰ্মাই নিজেই সবিশেষ সদৰী কৰে৷  আজি গৃহ বিভাগত ৮৮৬৭টা, প্ৰাথমিক শিক্ষা ৭৪২২টা, মাধ্যমিক শিক্ষা ৩৫১৭টা, উচ্চ শিক্ষা ১২৪টা, জনস্বাস্থ্য কাৰিকৰী ৩৩০টা, জলসম্পদ ১০৫টা, সমাজ কল্যান ৬৯টা, স্বাস্থ্য ২৪১৯টা, কৃষি ৫৫, পৰিৱেশ আৰু বন  ২৩, লোক নিৰ্মাণ ৮, খনি আৰু খনিজ পদাৰ্থ ২, শ্ৰমিক কল্যানত ১৭টা পদৰ বাবে নিযুক্তি পত্ৰ প্ৰদান কৰা হয়।

অৱশ্যে সকলো প্ৰাৰ্থীকেই খানাপাৰত নিযুক্তি পত্ৰ দিয়া নহ’ল৷ পিছে খানাপাৰাত নিযুক্তি পত্ৰ লাভ নকৰা প্ৰাৰ্থীয়ে ক’ত, কেনেকৈ লাভ কৰিব নিযুক্তি পত্ৰ? সেই সন্দৰ্ভত মুখ্যমন্ত্ৰী শৰ্মাই সদৰী কৰা অনুসৰি- জলসম্পদ বিভাগৰ নিযুক্তিৰ যাব লাগিব বশিষ্ঠৰ কাৰ্যালয়লৈ, বশিষ্ঠৰ অতিৰিক্ত মুখ্য অভিযন্তা কাৰ্যালয়লৈ গৈও লাভ কৰিব নিযুক্তি৷
সমাজকল্যাণ বিভাগৰ নিযুক্তিৰ পত্ৰৰ বাবে যাব লাগিব বেলতলালৈ, বেলতলাৰ সমাজ কল্যাণ সঞ্চালকালৈ কাৰ্যালয়ত দিয়া হ’ব নিযুক্তি পত্ৰ। বন বিভাগৰ নিযুক্তিৰ পত্ৰৰ বাবে যাব লাগিব পাঞ্জাবাৰীৰ অৰণ্য ভ্ৰমণলৈ, তাতে লাভ কৰিব নিযুক্তি পত্ৰ। জনস্বাস্থ্য কাৰিকৰী বিভাগৰ নিযুক্তি পত্ৰ হেঙেৰাবাৰীত অৱস্থিত কাৰ্যালয়ৰ পৰা  লাভ কৰিব। প্ৰাথমিক শিক্ষা সঞ্চালকালয়ত নিযুক্তি পোৱাসকলে অনলাইন যোগে ডাউনলোড কৰিব পাৰিব নিযুক্তি পত্ৰ। ইয়াৰ বাবে সন্ধিয়া ৪বজাৰ পাছত উপলব্ধ হ’ব অনলাইনত ডাউনলোড প্ৰক্ৰিয়া।

মাধ্যমিক শিক্ষাত নিযুক্তি পোৱা প্ৰাৰ্থীসকলেও অনলাইনতে পাব নিযুক্তি পত্ৰ, বিয়লি ৩বজাৰ পিছত উপলব্ধ হ’ব অনলাইন ডাউনলোড প্ৰক্ৰিয়া।উচ্চ শিক্ষাত নিযুক্তি পোৱা প্ৰাৰ্থীসকলে কাহিলীপাৰাত অৱস্থিত শিক্ষা সঞ্চালকালয় কাৰ্যালয়ত গৈ লাভ কৰিব নিযুক্তি পত্ৰ।স্বাস্থ্য বিভাগত নিযুক্তি পোৱা প্ৰাৰ্থীসকলে ডায়েৰেক্টৰ অব্ হেলথ চাৰ্ভিছত লাভ কৰিব নিযুক্তি পত্ৰ। অন্যথা অনলাইন ৱেবছাইট যোগেও লাভ কৰিব নিযুক্তি পত্ৰ।ডায়ৰেক্টৰ অব্ হেলথ ফেমেলী ৱেলফাৱাৰত যিসকলে নিযুক্তি পাইছে dhsfw.assam.gov.in যোগে লাভ কৰিব নিযুক্তি পত্ৰ। ডায়েক্টৰ অৱ মেডিকেল এডুকেশ্যনত নিযুক্তি পোৱা সকলে dme.assam.gov.inত লাভ কৰিব নিযুক্তি পত্ৰ। অটল অমৃতত নিযুক্তি পোৱাসকলেও অনলাইন ছাইটযোগে লাভ কৰিব নিযুক্তি পত্ৰ। কৃষিবিভাগত নিযুক্তি পোৱাসকলে খানাপাৰাৰ কৃষি বিভাগৰ কাৰ্যালয়ত গৈ ল’ব পাৰিব নিযুক্তি পত্ৰ।লোক নিৰ্মাণ বিভাগৰ প্ৰাৰ্থীসকলে সচিবালয়ত থকা PWDৰ কাৰ্যালয়ৰ পৰা ল’ব পাৰিব নিযুক্তি পত্ৰ। সচিবালয়ৰ ব্লক Bত লাভ কৰিব নিযুক্তি পত্ৰ।

খনি আৰু খনিজ পদাৰ্থৰ প্ৰাৰ্থীসকলে সভা সমাপ্ত হোৱাৰ পাছত পশু মহাবিদ্যালয় খেলপথাৰৰ কাৰ্যালয়ৰ পৰা ল’ব পাৰিব নিযুক্তি পত্ৰ। অন্যথা অসম সচিবালয়ৰ ব্লক Dত গৈ পোনে পোনে ল’ব পাৰিব নিযুক্তি পত্ৰ। আৰক্ষীসকলেও অনলাইন ৱেবছাইটত লাভ কৰিব নিযুক্তি পত্ৰ। ৪বজাৰ লগে লগে নিৰ্ধাৰিত ৱেবছাইটযোগে লাভ কৰিব নিযুক্তি পত্ৰ। আৰক্ষীত নিযুক্তি পোৱাসকলে ১৬তাৰিখে নিযুক্তি পত্ৰত উল্লেখ থকা নিৰ্দিষ্ট জিলাত উপস্থিত হ’ব লাগিব প্ৰাৰ্থীসকলে৷ ১৮তাৰিখৰ পৰা প্ৰাৰ্থীসকলৰ অনুশীলন আৰম্ভ হ‘ব৷

ৰাজ্যখনৰ অন্যতম ভূমিপুত্ৰ তাই আহোম সমাজৰ জাতিয় সাহিত্য মঞ্চ পূৰ্বাঞ্চল তাই  সাহিত্য সভা ক্ৰমাৎ দ্বিখণ্ডিত হোৱাৰ পথত। অৰ্থাৎ  তাই আহোম সকলৰ  ভাষা ,সাহিত্যৰ লগতে বৈদ্ধিক উৎকৰ্ষ সাধনৰ  মহান লক্ষ্যৰে বিগত ৩৮ টা বৰ্ষ অবিৰাম জাতীয় সেৱা আগবঢ়াই যোৱা পূৰ্বাঞ্চল তাই সাহিত্য সভাত উলম্ব বিভাজন ঘটিব।

৩ টা দশকৰো অধিক কাল স্বজাতিৰ বৌদ্ধিক জাগৰণ সৃষ্টি কৰি অহা তাই সাহিত্য সভাৰ পবিত্ৰ মজিয়াত শেহতীয়া ভাবে  উন্মেষ ঘটা সীমাহীন অনিয়ম দুৰ্নীতি আৰু স্বেচ্ছাচাৰী কাৰ্যকলাপত অতিষ্ঠ একাংশ  নীতিনিষ্ঠ তাই সাহিত্য সেৱকৰ মুকলি  প্ৰতিবাদ আৰু অসন্তুষ্টিৰ  পৰিণতিত এনে ভয়াবহ দুৰ্যোগৰ গ্ৰাসত নিমাৰ্জিত হোৱাৰ পথ প্ৰশস্ত হৈ পৰিছে । 

সদ্য সমাপ্তি ঘটা ৩৯ সংখ্যক পূৰ্বাঞ্চল তাই সাহিত্য সভাৰ অধিবেশনত এনে পঞ্জীভূত ক্ষোভ অসন্তুষ্টিৰ মুকলি প্ৰকাশ হোৱাৰ পৰৱৰ্তী সময়ত একাংশ নিষ্ঠাবান প্ৰবীণ নবীন সাহিত্য সেৱক প্রকাশ্যে নামি পৰিছে এক সমান্তৰাল সাহিত্য সভা গঠনত। প্ৰধানকৈ উজনি অসমৰ শিৱসাগৰ ,ডিব্ৰুগড় , যোৰহাট ,আৰু উত্তৰ অসমৰ ধেমাজি ,লখিমপুৰ আদি জিলাৰ গৰিষ্ঠ সংখ্যক তাই পণ্ডিত আৰু সাধকৰ নেতৃত্বত সঘন বৈঠক বহিছে ।

“তাই সাহিত্য সভা” নামাংকণ কৰি পূৰ্বাঞ্চল তাই সাহিত্য সভাৰ সমান্তৰাল সাহিত্য সভা গঠনৰ অন্তিম সিদ্ধান্ত গ্ৰহণ কৰি প্ৰস্তুতি ব্যাপক কৰি তুলিছে  অভ্যন্তৰত অব্যাহত থকা চূড়ান্ত অনিয়ম অনীতি আৰু মই মতালিৰাজত বিতুষ্ট তাই পণ্ডিত আৰু সাধক সমাজ। তাৰেই অংশ হিচাবে ইতিমধ্যে সাহিত্য সভাৰ মজিয়া ত্যাগ কৰা প্ৰক্ৰিয়া আৰম্ভ হৈছে উজনি অসমৰ পৰা।