নলবাৰী জিলাৰ ঘগ্ৰাপাৰ ৰাজহ চক্ৰৰ অন্তৰ্গত বিলপাৰ গাঁৱৰ ধনী ডেকা আৰু কনিকা ডেকাৰ একমাত্ৰ পুত্ৰ সন্তান ২১ বছৰীয়া যুৱক ৰতন ডেকা চিকিৎসাৰ অভাবত কৰুণ ভাবে  মৃত্যুক সাবটিব লগা হয়। । জানিব পৰা মতে বুধবাৰে ৰাতিপুৱা ৰতনৰ স্বাস্থ্যৰ অধিক অৱনতি ঘটাত সন্ধিয়া ভাগত ৰতন ডেকাক  ৰঙিয়া এখন ব‍্যাক্তিগত চিকিৎসালয়ত ভৰ্তি কৰা হয় যদিও সন্ধিয়াভাগত তাতে তেওঁৰ মৃত্যু হয়। উল্লেখ‍্য যে  ৰতন ডেকাৰ দুয়োটা বৃক্কই বিকল বুলি চিকিৎসকে জনোৱাৰ পিছত পৰিয়ালটোৰ লগতে গাঁওবাসীয়ে কান্দোনত ভাগি পৰিছিল।পিতৃ শাৰীৰিক ভাবে অসুস্থ কাৰণে ৰতন ডেকাই পিতৃ মাতৃৰ বাবে দুবেলাৰ ভাতমুঠি যোগাৰ কৰিবলৈ ৰঙিয়াৰ এখন কিতাপ তথা বাতৰি কাকতৰ দোকানত কাম কৰি কোনোমতে চলি আছিল।কিছুদিন পুৰ্বে হঠাৎ ৰতন শৰীৰিক  ভাবে অসুস্থ হৈ পৰাত পৰিয়ালে  চৰকাৰী আৰু বেচৰকাৰী চিকিৎসালয়ত পৰীক্ষা নিৰীক্ষা কৰাৰ পিছত ৰতনৰ দুয়োটা বৃক্কই বিকল হোৱা বুলি ডাক্তৰে জনোৱাৰ পিছত পৰিয়ালটোৰ লগতে ৰতনৰ জীৱনলৈ ঘোৰ অমানিশা নামি আহে।পিতৃ-মাতৃয়ে আনৰ পৰা ধন ধাৰত লৈ বিভিন্নখন চিকিৎসালয়ৰ লগতে গুৱাহাটী মেডিকেল কলেজ হাস্পাতালতো চিকিৎসা কৰিলে যদিও ধনৰ অভাৱত উন্নত চিকিৎসাৰ পৰা থমকি ৰৱলগা হয়। উল্লেখ‍্য যে চিকিৎসকে ৰতনৰ চিকিৎসাৰ বাবে ৩০/৩৫ লাখ টকাৰ প্ৰয়োজন বুলি কোৱাত   উপায়ন্তৰ হৈ পিতৃ মাতৃৰ লগতে গাঁওবাসীয়ে অসম চৰকাৰ তথা মুখ্য মন্ত্ৰী হিমন্ত বিশ্ব শৰ্মাক সহায়ৰ আহ্বান জনোৱাৰ লগতে নলবাৰী বিধায়ক জয়ন্ত মল্ল বৰুৱাৰ নলবাৰী সেৱ কেন্দ্ৰত  সহায় বিচাৰি আবেদন-নিবেদন কৰিছিল যদিও কোনো সুফল নাপালে বুলি পৰিয়ালৰ তৰপৰ জানিব   পৰা গৈছে।উল্লেখ‍্য যে ৰাজ‍্য চৰকাৰে দুখীয়া দৰিদ্ৰ লোকৰ বাবে কেইবাখনো অভিলাষী আঁচনি গ্ৰহণ কৰিছে যদিও ৰতনৰ দৰে এনেকুৱা দাৰিদ্ৰ যূৱকৰ ক্ষেত্ৰত কোনো এখন চৰকাৰী আঁচনিয়ে কিয় ঢুকি নাপালে বুলি ঘগ্ৰাপাৰ আঞ্চলিক ছাত্ৰ সন্থা,অসম জাতীয়তাবাদী যূৱ ছাত্ৰ পৰিষদ,ঘগ্ৰাপাৰ আঞ্চলিক সমিতিকে ধৰি পৰিয়ালয়ে ক্ষোভ প্ৰকাশ কৰিছে।

টীয়কৰ অগ্ৰণী কাব্যানুষ্ঠান ”শিকলি”ৰ উদ্যোগত প্ৰৱৰ্তন কৰা  বাৰ্ষিক বঁটা ” প্ৰয়াত চন্দ্ৰকান্ত হাজৰিকা আৰু পুতু হাজৰিকা সোঁৱৰণী টীয়কপৰীয়া সাহিত্য বঁটা  ২০২১ ”  প্ৰদানৰ অৰ্থে   ‘ ৰহস্য সম্ৰাট ‘ খ্যাত বৰেণ্য  সাহিত্যিক  ৰঞ্জু হাজৰিকাক নিৰ্বাচিত কৰা হৈছে ।২০২০ চনত পোনপ্ৰথমবাৰৰ বাবে এই বঁটা প্ৰদান কৰা হৈছিল বৰেণ্য সাহিত্যিক ,গৱেষক অধ্যাপক তথা চিত্ৰকৰ ড° ভাৰত বৰাক ।অসমীয়া সাহিত্যজগতৰ ‘ৰহস্য সম্ৰাট ‘ , এক বিস্ময়কৰ প্ৰতিভা তথা সাতশৰো অধিক অভিলেখ সংখ্যক গ্ৰন্থ ৰচনা কৰা    সাহিত্যিক ৰঞ্জু হাজৰিকাক দ্বিতীয় বৰ্ষৰ বাবে এই বঁটা প্ৰদান কৰিবলৈ সুযোগ লাভ কৰাৰ বাবে সন্তুষ্টি  প্ৰকাশ কৰিছে ‘শিকলি’ কাব্যালোচনীৰ মুখ্য সম্পাদক অৰূপজ্যোতি হাজৰিকা , সহকাৰী সম্পাদক হেমন্তজ্যোতি গগৈ আৰু এই বঁটাৰ দাতা  টীয়ক নিবাসী কবি দেৱজিত হাজৰিকাই । উক্ত বঁটাটিত থাকিব গামোচা -চেলেং , প্ৰশস্তি পত্ৰ , স্মাৰক , গ্ৰন্থৰ টোপোলা তথা নগদ ধন । আগন্তুক বসন্ত ঋতুত এক গাম্ভীৰ্যপূৰ্ণ অনুষ্ঠানৰ যোগেদি বৰেণ্য সাহিত্যিকগৰাকীক উক্ত বঁটাটি প্ৰদান কৰা হ’ব বুলি জনায় শিকলিৰ মুখ্য সম্পাদক অৰূপজ্যোতি হাজৰিকাই ।

 বুধবাৰে অসম চৰকাৰৰ বিত্ত আৰু সমাজ কল্যাণ বিভাগৰ মন্ত্ৰী তথা নলবাৰী জিলাৰ অভিভাৱক মন্ত্ৰী অজন্তা নেওগে মুখ্যমন্ত্ৰীৰ ক’ভিড বিধৱা সাহাৰ্য্য আঁচনি’ৰ অধীনত নলবাৰী জিলাত দ্বিতীয় পৰ্য্যায়ত ১৮ গৰাকী হিতাধিকাৰীৰ মাজত আঢ়ৈ লাখ টকাকৈ চেক বিতৰণ কৰে।উল্লেখ্য যে যোৱা জুলাই মাহত প্ৰথম পৰ্য্যায়ত ৩৫ গৰাকী হিতাধিকাৰীৰ মাজত এই চেক বিতৰণ কৰা হৈছিল। জিলা উপায়ুক্তৰ কাৰ্য্যালয়ৰ সভাকক্ষত নলবাৰী সমষ্টিৰ বিধায়ক জয়ন্ত মল্ল বৰুৱা আৰু উপায়ুক্ত গীতিমণি ফুকন সহিত বুধবাৰে বিয়লি ৪.৩০ বজাৰ পৰা অনুষ্ঠিত সভাখনত অভিভাৱক মন্ত্ৰী গৰাকীয়ে কেন্দ্ৰীয় আৰু ৰাজ্যিক চৰকাৰী অন্যান্য গুৰুত্বপূৰ্ণ আঁচনিসমূহ যেনে- অৰুনোদয়, বিধৱা পেঞ্চন আঁচনি, বৃদ্ধ পেঞ্চন আঁচনি, দিব্যাংগ পেঞ্চন আঁচনি, অটল অমৃত যোজনা, প্ৰধানমন্ত্ৰীৰ জন আৰোগ্য আঁচনি, প্ৰধানমন্ত্ৰী আৱাস যোজনা আদিৰ হিতাধিকাৰীসকলৰ সৈতে মত বিনিময় কৰে আৰু এই আঁচনি সমূহৰ অধীনত পাবলগীয়া সুবিধা বা প্ৰাপ্য সহজতে, সময়মতে আৰু সঠিকমতে পাই আছে নে নাই তাৰ বিষয় সন্দৰ্ভত সবিশেষ বুজ লয়। মন্ত্ৰী গৰাকীয়ে একেখন সভাতেই কেইটামান বিভাগৰ কামৰ পৰ্য্যালোচনাও কৰে । বৰ্তমানৰ ক’ভিডৰ বিৰুদ্ধে চৰকাৰৰ তৰফৰ পৰা সফলতাৰে চলাই অহা যুঁজখন আৰু অধিক ফলপ্ৰসু কৰাৰ বাবে স্বাস্থ্য বিভাগৰ যুটীয়া সঞ্চলকক নিৰ্ধাৰিত সময়সীমাৰ ভিতৰত ১০০% ক’ভিড টীকাকৰণ শুনিশ্চিত কৰিবলৈ কয়।তেখেতে লগতে কয় যে – পৰৱৰ্তী সময়ত ক’ভিডৰ তৃতীয়টো ঢৌ আহিলেও অৰ্থনীতিৰ ক্ষতিৰ প্ৰতি লক্ষ্য ৰাখি চৰকাৰে লক ডাউন ঘোষনাৰ পৰা বিৰত থকাৰ এটা পৰিকল্পনাত আছে আৰু তেনেস্থলত ক’ভিডৰ সৈতে সহাৱস্থান কৰি আগুৱাই যাওঁতে দুয়োপালি প্ৰতিষেধক গ্ৰহণ কৰাটো অত্যন্ত গুৰুত্বপূৰ্ণ বুলি বিবেচিত হৈছে কিয়নো দুয়োপালি গ্ৰহণ কৰাসকল ক’ভিডৰ কৱলত কোনো প্ৰকাৰে পৰিলেও বৰ বেছি এটা ক্ষতিৰ সন্মুখীন হ’বলগীয়া নহ’ব। সমাজ কল্যাণ বিভাগৰ তৰফৰ পৰা বিতৰণ কৰি থকা পুষ্টিকৰ খাদ্য সামগ্ৰী শিশুসকলে সময়মতে পাই আছে নাই তাৰো বুজ লয়। তেখেতে খাদ্য সামগ্ৰী সমূহ আকৰ্ষণীয় পেকেটিং কৰি দিয়াৰো পৰামৰ্শ আগবঢ়ায়। ঠিক সেইদৰে মন্ত্ৰী গৰাকীয়ে জনস্বাস্থ্য কাৰিকৰী বিভাগৰ অধীনত চলি থকা ‘জল জীৱন মিছন’ৰ কামৰো অগ্ৰগতিৰ বুজ লয় আৰু নিৰ্ধাৰিত সময়ত কাম সম্পূৰ্ণ কৰাৰ বাবে বিভাগীয় বিষয়াক কঠোৰভাৱে সঁকিয়াই দিয়ে। ইতিমধ্যে লৈ থোৱা কামসমূহ সম্পুৰ্ণ কৰিব নোৱাৰা ঠিকাদাৰসকলক নতুন কোনো কাম নিদিয়াৰ বাবেও মন্ত্ৰী গৰাকীয়ে সকলো বিভাগকে সাৱধান কৰি দিয়ে।আজিৰ এই সভাত নলবাৰী জিলা পৰিষদৰ সভাপতি নিতুল ডেকা আৰু মুখ্য কাৰ্যবাহী বিষয়া জয়ন্ত গোস্বামী, বিশিষ্ট সমাজকর্মী মৃগাংক তালুকদাৰ, অতিৰিক্ত উপায়ুক্তসকল ক্ৰমে-কল্পনা ডেকা, ফিৰদৌছ আলম, সম্প্ৰীতি গোস্বামী আৰু ছয়নিকা ঠাকুৰীয়া, মহকুমাধিপতি (সদৰ) সঞ্জীৱ ফুকন আৰু জিলা প্ৰশাসনৰ অন্যান্য সংশ্লীষ্ট বিষয়াবৰ্গ উপস্থিতি থাকে।