অসম আৰক্ষীৰ আন এক স্মাৰ্ট অপাৰেচন। কাৰ্বি আংলং জিলাৰ মাটিপুল অঞ্চলত আৰক্ষীৰ ড্ৰাগছ বিৰোধী অভিযান। বোকাজান মহকুমা আৰক্ষী বিষয়া, বোকাজান থানাৰ ভাৰপ্ৰাপ্ত বিষয়া সহ আৰক্ষীৰ  এটা দলে মঙ্গলবাৰে নিশা অভিযান চলাই। নিশা ৯.৩০ বজাত চলা অভিযানকালত মাটিপুলত এখন দুচকীয়া বাহনৰ ভিতৰত ১৫০ টা চাবোন বাকচত ১.৭৭ কিলোগ্ৰাম হেৰোইন জব্দ কৰে। লগতে গ্ৰেপ্তাৰ  কৰে দুই ড্ৰাগছ সৰবৰাহকাৰী। ধৃত সৰবৰাহকাৰী ক্ৰমে বোকাজানৰ বিমল তস্যা আৰু মৈৰাবাৰীৰ ছাদ্দাম হুছেইন।উল্লেখ্যযোগ্য যে নিশা গ্ৰেপ্তাৰ কৰা দুই ড্ৰাগছ সৰবৰাহকাৰীক আৰক্ষীয়ে থানালৈ অনাৰ পথত ছাদ্দাম হুছেইনে আৰক্ষীৰ গাড়ীৰ পৰা পলাবলৈ লওঁতে আৰক্ষীয়ে গুলীওৱাত  ছাদ্দাম হুছেইনৰ ভৰিত গুলী লাগি আহত হয়। আহত ছাদ্দাম হুছেইনক বোকাজান অসামৰিক চিকিৎসালয়ত ভৰ্তি কৰোৱা হয়।

বিশ্বনাথ জিলাৰ নদুৱাৰৰ দক্ষিণ বালিজুৰিত ১৫ নবেম্বৰ দিনা ৰাষ্ট্ৰীয় বীৰ শ্বহীদ বীৰছা মুণ্ডাৰ ১৪৬ তম জন্ম জয়ন্তী উদযাপন কৰা হয় । অসম মুণ্ডা মহাসভা পূৱ নদুৱাৰ আঞ্চলিক সমিতিৰ সৌজন্যত আৰু দক্ষিণ বালিজুৰি শাখা সমিতিৰ উদ্যোগত দিনজোৰা কাৰ্যসূচীৰে অনুষ্ঠিত হোৱা উক্ত জন্ম জয়ন্তী অনুষ্ঠানত পুৱা চাফাই অভিযানৰ পিছতে অভ্যৰ্থনা সমিতিৰ সভাপতি জিতেন মুণ্ডাৰ দ্বাৰা পতাকা উত্তোলন আৰু সম্পাদক মদন মুণ্ডাৰ স্মৃতি তৰ্পন কাৰ্যসুচীৰ অন্তত এক বাৰেবৰণীয়া সাস্কৃতিক শোভাযাত্ৰা উলিয়াই। দিনৰ এক বজাত বিশ্বনাথ জিলা অসম মুণ্ডা মহা সভাৰ সভাপতি খাণ্ডু হ’ৰ আৰু সম্পাদক বুবুল মুণ্ডাৰ আতিথ্যত মোহন মুণ্ডাৰ পৌৰোহিতত অনুষ্ঠিত হয় মুকলি সভা । মুকলি সভাত অসম মুণ্ডা মহাসভাৰ শোণিতপুৰ জিলাৰ উপ-সভাপতি চেনাৰাম মুণ্ডা,সহকাৰী সম্পাদক ৰাজু মুণ্ডা,সাংগঠ্নিক সম্পাদিকা জমিতা হ’ৰ,সাংস্কৃতিক সম্পাদিকা চম্বাৰী মুণ্ডাসহ কেইবা গৰাকী বিশিষ্ট লোকে অংশ গ্ৰহণ কৰি ৰাষ্ট্ৰীয় বীৰ ছহীদ বিৰচা মুণ্ডাৰ জীৱন সম্পৰ্কে আলোকপাত কৰে প্ৰৱীণ লেখক বিষ্ণু মুণ্ডাই। এক গাম্ভীৰ্য পূৰ্ণ সভাত কেন্দ্ৰীয় আটছাৰ প্ৰচাৰ সম্পাদক মিন্টু ভুমিজ,বিশ্বনাথ জিলা আটছাৰ শিক্ষাও সাহিত্য সম্পাদক অবিনাশ ৰাজৱাৰৰ লগতে কেইবা গৰাকী বিশিষ্ট লোকে মুণ্ডা সমাজৰ লগতে চাহ জনগোষ্ঠী আদিবাসী জাতিটো বিভিন্ন দিশত অবহেলিত হৈ অহাৰ কথা উল্লেখ কৰি ছহীদ বিৰচা মুণ্ডাৰ জন্ম জয়ন্তীত চৰকাৰে বন্ধ ঘোষনা নকৰাত ক্ষোভ প্ৰকাশ কৰি উঠি অহা প্ৰজন্মক বিৰচা মুণ্ডাৰ জীৱন সম্পৰ্কে অধ্যয়ন কৰি অনাগত দিনত তেখেতৰ জাতিৰ প্ৰতি থকা ত্যাগক জীয়াই ৰাখিবলৈ আহ্বান জনায়। লগতে মুণ্ডা জাতিৰ বাবে ৰাষ্ট্ৰীয় ছহীদ গৰাকীয়ে আমাৰ বাবে যি অনবদ্য সেৱা আগঢ়াইছে সেয়া অতুলনীয়। সেয়ে আমাৰ সমাজে তেখেতৰ আদৰ্শক সৰোগত কৰি সমাজখনক আগুৱাই নিব লাগিব তেতিয়া হে ৰাষ্ট্ৰীয় বীৰ ছহীদ গৰাকীক উচিত মৰ্য্যদা দিয়া হব বুলি মন্তব্য কৰে। দিনযোৰা কাৰ্যসূচীৰে অনুষ্ঠিত অনুষ্ঠানটিত বিভিন্ন প্ৰান্তৰ বহু কেইগৰাকী বিশিষ্ট ব্যক্তিৰ উপৰিও নদুৱাৰ শাখা আটছাৰ ভাৰপ্ৰাপ্ত সভাপতি ৰাধেশ্যাম তাঁ‌তী,সম্পাদক গ্ৰীনন্দৰ কুৰ্মী,শিক্ষাও সাহিত্য সম্পাদক চম্ৰা মুণ্ডা সাংগঠনিক সম্পাদক সঞ্জয় কুৰ্মী,অন্যতম কাৰ্যনিৰ্বাহক অৰুন গোৱালা, আদিবাসী ছাত্ৰ সন্থা নদুৱাৰ আঞ্চলিক সমিতিৰ সভাপতি অনন্ত কুজুৰ উপস্থিত থাকে।

আজি পবিত্ৰ কাতি মাহৰ অন্তিমটো দিন ।আজি পবিত্ৰ কাতি মাহৰ অন্তিমটো দিনতেই হাজোৰ হয়গ্ৰীৱ মাধৱ মন্দিৰত অগণন ভক্তৰ সমাগম হোৱা পৰিলক্ষিত হৈছে। এক লোকেলোকাৰণ্য পৰিবেশৰ সৃষ্টি হোৱা পৰিলক্ষিত হৈছে।লোক বিশ্বাস মতে হাজোৰ পবিত্ৰ তীৰ্থ স্থান হয়গ্ৰীৱ মাধৱ মন্দিৰত কাতি মাহত এপাহ তুলসি আগবঢ়াই সেৱা ললে সকলো অপায় অমঙ্গল দূৰ হোৱাৰ লগতে মনৰ আশাও পূৰ্ন হয় আৰু ৰোগ নিৰাময় হ’য়। অতীজৰে পৰা চলি অহা এই বিশ্বাসৰ বাবেই পবিত্ৰ কাতি মাহত দূৰ দূৰনিৰ পৰা সেৱা জনাবলৈ অগণন লোক আহে হয়গ্ৰীৱ মাধৱ মন্দিৰলৈ । সমান্তৰাল আজি পবিত্ৰ কাতি মাহৰ শেষৰটো দিনত হাজোৰ হয়গ্ৰীৱ মাধৱ মন্দিৰত অগণন ভক্তৰ সমাগম হোৱা পৰিলক্ষিত হৈছে । নিশ্চিতভাৱে এক আধ্যাত্মিক পৰিবেশৰ সৃষ্টি হোৱা দেখা গৈছে।

 সদৌ অসম কবি সন্মিলনৰ অন্তৰ্গত পঞ্চৰত্ন কবি চক্ৰৰ উদ্যোগত প্ৰাকৃতিক পৰিৱেশৰ মাজত এখনি কবি সন্মিলন অনুষ্ঠিত হয়। যোৱা ১৫ নৱেম্বৰত গহপুৰ মহকুমাৰ জকাপৰাস্থিত মহাবাহু ফিচাৰি প্ৰাইভেট লিমিটেডৰ আতিথ্যত অনুষ্ঠিত কবি সন্মিলনখনিত সভাপতিত্ব কৰে পঞ্চৰত্ন কবি চক্ৰৰ সভানেত্ৰী কৃপালী গোস্বামীয়ে। কবি চক্ৰৰ সম্পাদক শিৱ শংকৰ হাজৰিকাই আঁতধৰে সভাখনি উদ্বোধন কৰে গেন অসম কবি সন্মিলনৰ প্ৰাক্তন উপ-সভাপতি তথা বিশিষ্ট কবি নগেন কোঁৱৰে। সভাতে শোণিতপুৰ জিলা কবি সন্মিলনৰ প্ৰতিষ্ঠাপক সভাপতি নৰেন শৰ্মাৰ মৃত্যুত তেওঁৰ আত্মাৰ চিৰ শান্তি কামনাৰ্থে এক মিনিট মৌন প্ৰাৰ্থনা কৰা হয়। উপাসনা হাজৰিকাৰ বৰগীত পৰিৱেশনে অনুষ্ঠানৰ শুভাৰম্ভ কৰা কবি সন্মিলনত সমীক্ষক হিচাপে অবিভক্ত শোণিতপুৰ জিলা কবি সন্মিলনৰ সম্পাদক তথা অৱসৰপ্ৰাপ্ত শিক্ষক হেমেন্দ্ৰ বৰাই অংশগ্ৰহণ কৰি পঠিত কবিতাসমূহৰ ওপৰত বক্তব্য দাঙি ধৰে। সভাত কবিতা পাঠৰ কৰে অবিভক্ত শোণিতপুৰ জিলা সাহিত্য সভাৰ প্ৰাক্তন সভাপতি খগেন গোস্বামী, বিশিষ্ট কবি নগেন কোঁৱৰ, ৰুণু দেৱী বৰুৱা, ৰবীন্দ্ৰ কাকতি, তৰাৱতী গিৰি, বিপিন বৰা, লক্ষণ প্ৰধান, বিশ্বনাথ জিলা কবি সন্মিলনৰ সম্পাদক অনিত শইকীয়া, নিকুঞ্জ কোঁৱৰ মহন্ত, ভূৱন অধিকাৰী, ৰূপা শৰ্মা, সীমা দাস, সাংবাদিক নৱজিৎ শইকীয়া, শিৱ শংকৰ হাজৰিকা, কৃপালী গোস্বামীকে ধৰি একুৰি কবিয়ে। সভাতে সাংবাদিক বিপ্লৱ নেওগে এটি কবিতা আবৃত্তি কৰে। সাহিত্যানুৰাগী তথা অৱসৰপ্ৰাপ্ত খণ্ড উন্নয়ন বিষয়া ভৱেন ভট্টাচাৰ্যই সভাত উপস্থিত থাকি বক্তব্য আগবঢ়ায়। ৰবীন্দ্ৰ কাকতি, উপাসনা হাজৰিকা আৰু ৰুবী দাসে যুটীয়াভাৱে আধুনিক গীত আৰু বয়োজ্যেষ্ঠ শিল্পী বিজয় বৰাই ভূপেন্দ্ৰ সংগীত পৰিৱেশন কৰি অনুষ্ঠান জীপাল কৰা সভাতে তিনিখনকৈ কাব্য সংকলন উন্মোচন কৰা হয়। সীমা দাসৰ ‘ফাগুনীৰ ফল্গু’ আৰু ‘অশ্বৰ অশ্ৰু’ উন্মোচন কৰাৰ লগতে সভাতে তৰাৱতী গিৰিৰ ‘কবিতা কানন’ উন্মোচন কৰা হয়। উন্মোচন কৰে ক্ৰমে খগেন গোস্বামী, নগেন কোঁৱৰ আৰু নিকুঞ্জ কোঁৱৰ মহন্তই। কেইগৰাকী উন্মোচকে পৃথকে পৃথকে কেউখন কাব্য সংকলনৰ বিষয়ে নাতিদীৰ্ঘ বক্তব্য আগবঢ়ায়। শেৱালি কলিতাৰ তত্ত্বাৱধানত ভূপেন্দ্ৰ সংগীতৰ আলমত তিনিগৰাকী নৃত্য শিল্পীয়ে নৃত্য পৰিৱেশন কৰি অনুষ্ঠান সজীৱ কৰি তোলে। সভাত বিশ্বনাথ জিলা কবি সন্মিলনৰ প্ৰাক্তন সম্পাদক বিপিন বৰা, সদৌ অসম কবি সন্মিলনৰ মুখপত্ৰ ‘ সমলয়’ৰ সম্পাদক বিপুল কুমাৰ দিহিঙীয়া, মহাবাহু ফিচাৰি প্ৰাইভেট লিমিটেডৰ স্বত্বাধিকাৰী অনুপ শৰ্মা, জ্যেষ্ঠ সাংবাদিক ভুৱন শইকীয়া, বিশ্বজ্যোতি সেনিপতি, মুন গগৈকে ধৰি ভালেসংখ্যক বিশিষ্ট ব্যক্তিয়ে অংশগ্ৰহণ কৰে।নিতুল বৰা হাৱাজান ।