ৰাজ্য চৰকাৰে সমাজ কল্যাণ বিভাগে জনকল্যাণমূলক বিভিন্ন আঁচনিৰ দ্বাৰা শিশু শিক্ষাৰ উন্নয়নৰ বাবে। যথেষ্ট পৰিমাণৰ বাজেট ৰাখে। তাৰ ভিতৰত অংগনৱাড়ী কেন্দ্ৰবোৰো সামৰি লোৱা হয়। সম্প্রতি লক ডাউনৰ প্ৰতি ৰাখি অংগনৱাড়ী কেন্দ্ৰৰ পাঠদান সমূলি বন্ধ যদিও শিশুৰ খাদ্য সামগ্রী আদি নিয়মিত ভাৱে বিভাগে কেন্দ্ৰত যোগান দি আছে। কেনেকৈ বিতৰণ কৰিছে সেয়া আমাৰ কবলৈ একো নাই কাৰণ বিভাগে হয়তো তথ্য পাতি পাই আছে। এতিয়া মূল বিষয় লৈ আহো। এই কেন্দ্ৰটিলৈ মন কৰক, কিমান সুন্দৰ ঠাই আৰু পৰিবেশত বনোৱা হৈছে। জনবহুল এলেকাৰ ওপৰিও লাহৰীঘাট বজাৰলৈ যোৱা চৰকাৰী পথৰ দাঁতিত। কেন্দ্ৰটিৰ পশ্চিম ফালে মৰিতলী প্ৰাথমিক বিদ্যালয়ৰ প্ৰাক্তন সভাপতিৰ ঘৰ, দক্ষিণে অৰ্থাৎ যাৰ পদূলীত কেন্দ্ৰটি স্হাপন কৰা হৈছে   বৰ্তমান এই কেন্দ্ৰ পৰিচালনা সমিতিৰ সভাপতিৰ পূত্ৰৰ। পূৱফালে কেন্দ্ৰৰ  পৰা মাথো ২০০ মিটাৰ দূৰৈত ধিঙ্গৰআটি গাৱত কৰ্মী তথা B L O মাহফুজা বেগম বাইদেউৰ ঘৰ। এতিয়া হয়তো সকলোৱে ভাবি আছে কেন্দ্ৰটো নিশ্চয় বহু নামজ্বলা হব। ৰব এইখিনিতে কাহিনী শেষ হোৱা নাই, অলপ ধৈর্য ধৰি শুনক আৰু দৃশ্য বোৰ উপভোগ কৰক, কাৰণ বাতৰিৰ পিছত হয়তো কেন্দ্ৰৰ ৰূপ ৰেখা সলনি হৈ যাব। এয়া মৰিগাঁও জিলাৰ লাহৰীঘাট সংহত শিশু উন্নয়ন আঁচনিৰ অধীনস্থ ১২৪ নং মৰিতলী পথাৰ অংগনৱাড়ী কেন্দ্র।

যি কেন্দ্রত কোনো দিনেই চাইনবোৰ্ড বা ফলক লগোৱা হোৱা নাই। স্হানীয় ৰাইজৰ অভিযোগ মতে বিগত ২ বছৰ ধৰি সম্পূর্ণ ৰূপে তলা বন্ধ ৰখাত কেন্দ্ৰটিৰ ভিতৰ চৰাত হাবি জংগলে বনাঞ্চলৰ ৰূপ লৈছে। যত দিনতে সাপৰ ভয় লাগে। কেন্দ্ৰটিৰ মূধচৰ কেবাটাও টিনপাত   ধুমুহাৰ ফলত খঁহি ভিতৰতে পৰি আছে। বৰষুণৰ পানীয়ে এই হাবি জংগলৰ সৃষ্টি হৈছে। এতিয়া কথা হল কেন্দ্ৰটিৰ টিনপাত খহি পৰা, বৰষুণৰ পানী পৰি ভিতৰত প্ৰকাণ্ড গছ, বন জংগলে ছানি ধৰা এমাহ দুমাহে নহয়। অৱশ্যে অনবৰতে দুটা খীৰিকী খুলা আছে, যাৰ ফলত দৰ্শকে অনায়াসে প্ৰাকৃতিক দৃশ্য উপভোগ কৰিব পাৰে। আৰু আমাৰ সাংবাদিকেও দৃশ্যৰ ফটো, ভিজুৱেল লবলৈ সুবিধা পালে। যদি কৰ্মী বা পৰিচালনা সমিতিয়ে বিভাগীয় কতৃপক্ষক এই বিষয়ে জ্ঞাত কৰিছে তেন্তে আমাৰ কবলগীয়া একো নাই। কিন্তু এটা কথা সত্য যে ভিতৰত থকা গছৰ দৃশ্যই প্ৰমাণ কৰে যে কেই বছৰ লাগিছে ডাঙৰ হবলৈ। আমাৰ কাম সত্য পোহৰলৈ আনি দিয়া, বাকি দায়িত্ব বিভাগীয় কতৃপক্ষৰ। উল্লেখ্য যে লাহৰীঘাট সংহত শিশু উন্নয়ন আঁচনিৰ অধীনস্থ বহু কেন্দ্ৰতেই নাম ফলক পৰিলক্ষিত নহয় ইয়াৰ বা কি ৰহস্য সেয়া হয়তো অজ্ঞাত। 

কামৰূপ জিলাৰ হাজো আৰক্ষী থানাৰ অন্তৰ্গত নতুন দিহিনা নিবাসী এগৰাকী ৪০ বছৰীয়া ব্যক্তি চাৰি বছৰ ধৰি ৰহস্যজনকভাৱে নিৰুদ্দেশ হৈ আছে । উল্লেখযোগ্য যে কামৰূপ জিলাৰ বাইহাটা চাৰিআলিত তামোল পানৰ খুচুৰা ব্যৱসায়ৰে পৰিয়াল পোহপাল দিয়া নতুন দিহিনা নিবাসী ৰামেশ্বৰ দাসে কৰ্মব্যস্ততাৰ তাগিদাত প্ৰতিদিনেই ঘৰলৈ অহা যোৱা কৰিছিল । কিন্তুু ২০১৮ চনৰ ৩ এপ্ৰিল তাৰিখৰ পৰা ৰাতিপুৱাতে কামলৈ বুলি ওলাই যোৱা ৰামেশ্বৰ দাস আজি পৰ্যন্ত ঘৰলৈ ওভতি নাহিল। যাৰ বাবে পত্নীনিৰুবালা দাসে দুই সন্তানৰ সৈতে আজি চাৰিবছৰে স্বামীক বিছাৰি ফুৰিছে যদিও আজি পৰ্যন্ত কোনো সম্ভেদ নাই ৰামেশ্বৰ দাসৰ । স্বামীবিহিন পত্নী নিৰুবালা দাসে দুই পুত্ৰসহ আৰ্থিক ভাৱে জুৰুলা হৈ আনৰ ঘৰত কাম কৰি পৰিয়াল পোহপাল দিব লগীয়া হৈছে। তদুপৰিসমগ্ৰ ঘটনাক কেন্দ্ৰ কৰি অঞ্চলজুৰি তীব্ৰ চাঞ্চল্যৰ সৃষ্টি হোৱা পৰিলক্ষিত । অৱশ্যে ঘটনা সন্দৰ্ভত হাজো আৰক্ষী থানাতো এজাহাৰ দাখিল কৰিছিল যদিও ঘৰৰ পৰিয়ালে আজি পৰ্যন্ত একো শুংসুত্ৰ পোৱা নাই নিৰুদ্দেশ হোৱা ব্যক্তি গৰাকীৰ । যাৰ বাবে আজি অসহায় পৰিয়ালটোৱে সংবাদ মাধ্যমৰ ওচৰ চাপে । কোনো সদাশয় লোকে ব্যক্তিগৰাকীৰ কিবা সম্ভেদ পালে ৭৫৭৭০৬৩০০৮ নম্বৰত যোগাযোগ কৰিবলৈ পৰিয়ালৰ লোকে কাতৰ ভাৱে অনুৰোধ জনাইছে ।

দৰং জিলাৰ লোক নিৰ্মাণ বিভাগৰ দায়িত্ববাহী ঠিকাদাৰৰ লগতে বিভাগীয় বিষয়াৰ চুড়ান্ত হেমাহি আৰু গাফিলতিৰ বাবে ছিপাঝাৰ সমষ্টিৰ  অন্তৰ্গত ১৫ নং ৰাষ্ট্ৰীয় ঘাইপথ সংযোগী দুমুনিচকী-দিপিলা পথটি এজাক বৰষুণতে  জীয়াতু ভুগিছে পথটিৰে অহা-যোৱা কৰা ৰাইজে ।

অভিযোগ অনুসৰি উক্ত পথচোৱাৰ  দুমুনিচকীৰ পৰা দিপিলালৈ যোৱা পথটিত ঠায়ে ঠায়ে কেইবাটও অংশত পানী জমা হোৱা দেখা  গৈছে।  কেইবা মাহ ধৰি  যমৰ যাতনা ভুগিব লগীয়া হৈছে যান-বাহনৰ লগতে পথচাৰী সকলে ।  কেইবাটাও অংশত এজাক বৰষুণ দিলেই পানী জমা হৈ  পৰে এই পথটোত । উল্লেখযোগ্য যে , খাছ সোণাপুৰ , লাউজন , ছেঙেলিয়াজাৰ  আদি অঞ্চলৰ ৰাইজে জিলাৰ সদৰ মঙলদৈ তথা বাইহাটা চাৰিআলিলৈ এই পথেৰেই নিতৌ অহাযোৱা কৰে । 

প্ৰণিধানযোগ্য যে  পথটোৰে  গধুৰ যান-বাহন দৈনিক অহা-যোৱা কৰাৰ ফলত সততে পথটো জৰাজীৰ্ণ হৈ পৰে বুলি দাবী কৰিছে সচেতন মহলে । ইফালে উক্ত পথচোৱাৰ দুমুনিচকী অঞ্চলত নলাৰ ব্যৱস্থা কৰি দিবলৈ স্থানীয় ৰাইজে দাবী জনাই আহিছিল যদিও আজিলৈ লোকনিৰ্মাণ  বিভাগে গুৰত্ব প্ৰদান নকৰিলে । এই ক্ষেত্ৰত ছিপাঝাৰ সমষ্টিৰ বিধায়ক পৰমানন্দ ৰাজবংশীৰ লগতে লোক নিৰ্মাণ বিভাগৰ দৃষ্টি গোচৰ কামনা কৰিছে অঞ্চলটোৰ ৰাইজে।

শিলচৰ ৰে’ল ষ্টেচনত আৰু শিলচৰ আই এচ বি টি চৌহদত প্ৰৱেশ কৰি শিলচৰৰ দুটা তথাকথিত বাঙালী সংগঠন বি ডি ৱাই এফ আৰু সদৌ বাঙালী যুৱ-ছাত্ৰ সংস্থাৰ কিছুসংখ্যক  নেতা – কৰ্মীয়ে অসমীয়া ভাষাত লিখা জলজীৱন মিছনৰ চৰকাৰী ফলকত  ক’লা ৰং সানি ‘ বাঙালী লিখুন ‘ বুলি  লিখি  অসমীয়া ভাষাক অপমান কৰা কাৰ্যৰ বিৰুদ্ধে জাঙুৰ খাই উঠিছে এতিয়া ৰাজ্যৰ দল-সংগঠন। এই লৈ ২০অক্টোবৰত  ওদালগুৰি জিলাৰ মাজবাট  আৰক্ষী থানাত বি ডি ৱাই এফৰ উপদেষ্টা প্ৰদীপ দত্ত ৰায় আৰু সদৌ অসম বাঙালী যুৱ-ছাত্র সংস্থাৰ নেতা সমৰ দেৱ আৰু ৰাজু দাসৰ বিৰুদ্ধে পৃথকে পৃথকে দুখন এজাহাৰ দাখিল কৰে অসম জাতীয়তাবাদী যুৱ ছাত্ৰ পৰিষদ মাজবাট আঞ্চলিক সমিতি ,  মাজবাট শতদল সাহিত্য সভা, সদৌ অসম কোছ-ৰাজবংশী সন্মিলনী মাজবাট আঞ্চলিক সমিতি আৰু সদৌ অসম ছাত্ৰ সন্থা মাজবাট আঞ্চলিক সমিতিয়ে। সংগঠন কেইটাৰ নেতৃবৰ্গই মাজবাট থানাৰ ভাৰপ্ৰাপ্ত আৰক্ষী বিষয়া গৰাকীৰ হাতত দাখিল কৰা এজাহাৰত দুখনত উল্লেখ কৰে যে শিলচৰৰ তথাকথিত বাঙালী সংগঠন বি ডি ৱাই এফৰ উপদেষ্টা প্ৰদীপ দত্ত ৰায় আৰু সদৌ অসম বাঙালী যুৱ-ছাত্র সংস্থাৰ নেতা সমৰ দেৱ আৰু ৰাজু দাসৰ নেতৃত্বত সংগঠন দুটাৰ একাংশ নেতা কৰ্মীয়ে শিলচৰ ৰে’ল ষ্টেচন আৰু শিলচৰৰ আই এচ বি টিৰ চৌহদত প্ৰবেশ কৰি অসমীয়া ভাষাত লিখা চৰকাৰৰ জলজীৱন  মিছনৰ ফলক সমূহত ক’লা ৰং সানি ‘বাঙালী লিখুন’ বুলি যি দুষ্কৰ্ম সংঘটিত যি ধৰণেৰে অসমীয়া ভাষা আৰু বৃহত্তৰ অসমীয়া জাতিক অপমান কৰিলে ই কেতিয়াও গ্ৰহণ যোগ্য নহয়। সংগঠন দুটাৰ নেতৃত্বই অসমতে অসমীয়া ভাষাটোক অপমান কৰি অসমীয়া সমগ্ৰ অসমীয়া জাতিক ধৰি নানান গালি-গালাজেৰে  অসমত বসবাস কৰা অসমীয়া আৰু বাঙালীৰ মাজত থকা শান্তি- সম্প্ৰীতি বিনষ্ট কৰিছে। লগতে এই দুষ্কৰ্মৰ জৰিয়তে প্ৰদীপ দত্ত ৰায় , সমৰ দেৱ আৰু ৰাজু দাসে দুয়োটা ভাষীক সম্প্ৰদায়ৰ মাজত সাম্প্ৰদায়িক সংঘৰ্ষ লগাবলৈ কু- চক্ৰান্ত ৰচনা কৰা বুলিও এজাহাৰত উল্লেখ কৰে। এজাহাৰ দাখিল কৰা সংগঠন সমূহৰ নেতৃত্বই অতি শীঘ্ৰে উক্ত পদকীয়া তিনিওজনৰ লগতে এই চক্ৰান্তৰ লগত জৰিত অইন দুষ্কৃতিকাৰী সকলকো কাৰায়ত্ব কৰি ৰাজ্যত যাতে এই ঘটনাকলৈ কোনো ধৰনৰ আইনগত পৰিস্থিতিৰ উদভৱ নহয় তাৰ বাবে বিহীত ব্যৱস্থা গ্ৰহণ কৰিবলৈ আৰক্ষী প্ৰশাসনৰ ওচৰত দাবী জনাইছে।