দুৰ্গা পূজা  উপলক্ষে  নলবাৰী জিলা  প্ৰশাসনৰ লগতে   ঘগ্ৰাপাৰ আৰক্ষী -গাঁও ৰক্ষী বাহিনী তৎপৰতা হোৱাৰ সময়তে  আজি  ঘগ্ৰাপাৰ আৰক্ষী থানাত  গাঁওৰক্ষী বাহিনীৰ উদ‍্যোগত দুৰ্গা পূজা উপলক্ষে এখন সজাগতা সভা অনুষ্ঠিত হয়। ঘগ্ৰাপাৰ আৰক্ষী থানাৰ চক্ৰ সংগঠক  প্ৰদীপ কুমাৰ দাসে সভাপতিত্ব  কৰা সভাখনৰ  উদ্দেশ্য বাখ্যা কৰে গাঁও ৰক্ষী বাহিনীৰ কাৰ্যকৰ্তা  আব্দুল গণিয়ে।সভাত ঘগ্ৰাপাৰ আৰক্ষী থানাৰ ভাৰপ্ৰাপ্ত আৰক্ষী বিষয়া ভাস্কৰ মল্ল পাটোৱাৰীয়ে অংশগ্ৰহণ কৰি ভাষণত নিজ নিজ এলেকাৰ ক’ভিড প্ৰটকল মানি দুৰ্গা পূজাৰ সময়ত নিজৰ কৰ্তব্য পালন কৰিবলৈ আহ্বান জনায়। উক্ত সভাত ঘগ্ৰাপাৰ থানা এলেকাৰ ১৪৫ টা গাঁও ৰক্ষী বাহিনীৰ সভাপতি-সম্পাদকলে অংশগ্ৰহণ কৰে।

জামুগুৰিহাটৰ বেংকসমুহৰ সন্মুখত এতিয়া দীঘলীয়া শাৰীৰ যেন ঢৌ উঠিছে৷জামুগুৰিহাটৰ মূল কেন্দ্ৰস্থলত থকা ইউকো বেংক,গ্ৰামীণ বিকাশ বেংক আৰু ভাৰতীয় ষ্টেট বেংকৰ সন্মুখত এতিয়া পুৱাৰপৰাই নিজৰ সাঁচতীয়া ধন উলিয়াবৰ বাবে গ্ৰামাঞ্চলৰ লোকসকলে শাৰী পাতি ৬/৭ ঘন্টা অপেক্ষা কৰিব লগীয়া হৈছে৷ভিতৰুৱা অঞ্চলসমুহৰপৰা অহা বেংকৰ উপভোক্তা লোকসকল পুৱা ৭ বজাতেই আহি শাৰী পাতি অপেক্ষা কৰিবলগীয়া হৈছে বেংকৰ ভিতৰলৈ প্ৰৱেশ কৰিবৰ বাবে৷বেংকৰ সন্মুখত বিশেষকৈ এনে অভাৱনীয় ভিৰৰ বাবে সমস্যাত পৰিছে বৃদ্ধ বৃদ্ধা তথা আদহীয়া লোকসকল৷পুৱাই আহি ঘন্টাৰ পিছত ঘন্টা ধৰি এনেদৰে ধন উলিয়াবলৈ অহা একাংশ লোক আনকি শাৰীত থিয়হি থকাৰ বাবেই মুৰ ঘুৰাই পৰি যোৱাৰ ঘটনাও সংঘটিত হৈছে৷পূজাৰ পূৰ্ৱে শ্ৰমিকৰ জৱ কাৰ্ড,বৃদ্ধ পেঞ্চন,অৰুণোদয় আঁচনিৰ ধন উলিৱাবৰ বাবে বেংকত ভিৰ হোৱা এনে পৰিৱেশ নিয়ন্ত্ৰণৰ বাবে আনকি আৰক্ষীও উপস্থিত হ’বলগীয়া হৈছে৷ইয়াৰ মাজতেই আকৌ শাৰী পাতি থকা একাংশ বৃদ্ধ বৃদ্ধা লোকক অতিক্ৰম কৰি পিছত অহা একাংশ লোকো নিজৰ স্বাৰ্থ আগত ৰাখি সুুযোগ বুজি সুবিধা লৈ বেংকত প্ৰৱেশ কৰাত বহুসংখ্যক খাতিখোৱা আদহীয়া লোক টকা উলিয়াবলৈ সুবিধা নোপোৱাৰ বাবেই উভতি যাবলগীয়া হোৱাৰ অভিযোগ পোৱা গৈছে৷তাৰোপৰি টকা উলিয়াবৰ বাবে বেংকত প্ৰৱেশ কৰিলেহে উইদ্ৰ’ৱেল ফৰ্ম লাভ কৰা যায় যদিও এক দুষ্ট চক্ৰই বেংকসমুহৰ বাহিৰত উইদ্ৰ’ৱেল ফৰ্ম বিক্ৰী কৰাৰো অভিযোগ উল্থাপিত হৈছে৷বেংকত দেখা দিয়া এনে অভাৱনীয় ভিৰৰ প্ৰতি লক্ষ্য ৰাখি বৃদ্ধ বৃদ্ধা তথা আদহীয়া লোকসকলৰ বাবে সপ্তাহৰ এটা দিন নতুবা তেনে লোকক বেংক কৰ্তৃপক্ষই শাৰী পাতি থকা স্থানৰপৰা চিনাক্ত কৰি বয়সৰ প্ৰতি সন্মান জনাই সোনকালে কামখিনি কৰাৰ সুযোগ দি নিজ গৃহলৈ উভতাই পঠোৱাৰ ব্যৱস্থা কৰিবলৈও আহবান জনাইছে সচেতন মহলে৷

মাৰ্ঘেৰিটা বিধান সভা সমষ্টিৰ অন্তৰ্গত টিৰাপ মৌজাবাসী ৰাইজৰ বহুদিনীয়া সমস্যা তথা অভাৱ পূৰণ কৰি টিৰাপগেট ৰাজ্যিক চিকিৎসালয়ত আজি মুকলি কৰা হল অত্যাধুনিক প্ৰসূতি কক্ষ। আজি এই প্ৰসূতি কক্ষটো আনুষ্ঠানিক ভাৱে মুকলি কৰে স্থানীয় বিধায়ক ভাস্কৰ শৰ্মা দেৱে।১৯৫০ চনতে প্ৰতিষ্ঠা লাভ কৰা ৰাজ্যিক চিকিৎসালয়খনত নাছিল স্থায়ী প্ৰসূতি কক্ষ। যাৰ বাবে চিকিৎসালয় খনলৈ অহা প্ৰসূতি মাতৃ সকলে যেনে ধৰণৰ উপযুক্ত সা-সুবিধা লাভ কৰিব লাগিছিল তেনে ধৰণৰ সা-সুবিধাৰ পৰা তেওঁলোক বঞ্চিত হৈ আহিছিল। টিৰাপ মৌজাৰ বিভিন্ন অঞ্চলৰ প্ৰসূতি সকলে প্ৰাথমিক চিকিৎসা সেৱা লাভ কৰাৰ বাদে উন্নত চিকিৎসাৰ বাবে প্ৰায় ২৫ কিলোমিটাৰ দূৰত্ব অতিক্ৰম কৰি মাৰ্ঘেৰিটা অসামৰিক চিকিৎসালয়লৈ যাৱ লগা হৈছিল।যাৰ ফলত বিভিন্ন সময়ত প্ৰসূতিৰ মৃত্যু পৰ্যন্ত হোৱাৰ উদাহৰণ নথকা নহয়। উক্ত এই দীৰ্ঘদিনীয়া সমস্যাটোৰ এক স্থায়ী সমাধানৰ কথা হৃদয়ংগম কৰি আগবাঢ়ি আহিল এজন হৃদয়বান ব্যক্তি। টিৰাপ অঞ্চলৰ প্ৰতিষ্ঠিত ব্যৱসায়ী তথা সমাজ সেৱক হৰেন গগৈয়ে তেখেতৰ মহানুভৱতাৰ পৰিচয় দি এটা স্থায়ী প্ৰসূতি কক্ষ নিৰ্মাণ কৰি দিয়াৰ দায়িত্ব মোৰ পাতি লয়। তেখেতে নিজ উপাৰ্জিত ধনৰ প্ৰায় ২৫ লাখ টকা ব্যয় কৰি প্ৰয়াত পিতৃ স্বৰ্গীয় যতীন গগৈৰ সোঁৱৰণত প্ৰসূতি কক্ষটো নিৰ্মাণ কৰি বহু সংখ্যক সন্মানীয় ব্যক্তি আৰু বিধায়ক ভাস্কৰ শৰ্মাৰ উপস্থিতিত ৰাইজৰ বাবে উচৰ্গা কৰে। ইয়াৰোপৰি তেখেতে অনাগত দিনত ৰাইজৰ সুবিধা হোৱাকৈ চিকিৎসালয় খনত এটা এক্সৰে মেচিন প্ৰদান কৰিব বুলিও মত প্ৰকাশ কৰে। হৰেন গগৈ দেৱৰ এই পদক্ষেপক সকলোৱে আদৰণি জনোৱাৰ লগতে তেখেতৰ এই মহানুভৱতাক সকলোৱে একমুখে প্ৰশংসা কৰে। বিধায়ক ভাস্কৰ শৰ্মাই হৰেন গগৈৰ এনে সুচিন্তা আৰু মহানুভৱতাক সন্মান প্ৰদৰ্শন কৰি আন্তৰিক কৃতজ্ঞতা জনোৱাৰ লগতে ভৱিষ্যতেও ৰাইজৰ প্ৰতি এনে ধৰণৰ সুচিন্তাৰে সহায় সহযোগ আগবঢ়াই যাবলৈ আহ্বান জনায়।