বানৰ বিভীষিকাময় পৰিস্থিতিৰ মাজতে বৰপেটা জিলাৰ বাঘবৰ সমষ্টিৰ আলোপতিচৰ আৰক্ষী থানাৰ অন্তৰ্গত মাজৰচৰত আজি  এক ভয়ংকৰ অগ্নিকাণ্ড সংঘটিত হোৱাত অঞ্চলজুৰি তীব্ৰ চাঞ্চল্যৰ সৃষ্টি হৈছে । জানিব পৰা মতে, ৩ নং মাজৰচৰ গাওঁৰ নিবাসী আয়নাল হকৰ পুত্ৰ আমিনুল হকৰ ঘৰত  দিনৰ প্ৰায় ১০ বজাত এক ভয়ংকৰ অগ্নিকাণ্ডৰ ঘটনা সংঘটিত হয়। আকস্মিক ভাৱে সংংঘটি হোৱা অগ্নিকাণ্ডত হকৰ থকা ঘৰটো সম্পূৰ্ণৰূপে ভষ্মীভূত হোৱাৰ লগতে ঘৰৰ ভিতৰত থকা বহু গুৰুত্বপূৰ্ণ নথি-পত্ৰ, আজবাৱ পত্ৰৰ উপৰিও নিজ ঘৰত থকা একাধিক গুৰুত্বপূৰ্ণ বয়বস্তু জুইত জাহ যায় ৷ উল্লেখ্য যে এই ভয়ংকৰ অগ্নিকাণ্ডত ঘৰৰ ভিতৰত থকা এখন পালছাৰ বাইকো সম্পূৰ্ণৰূপে ভস্মীভূত হোৱাৰ লগতে ঘৰত সাচতীয়া কৰি ৰখা নগদ ধনো ভস্মীভূত হোৱা বুলি জানিব পৰা গৈছে ৷  জুইত ভস্মীভূত হোৱা গৃহঘৰটোৰ পৰা এটা সামগ্ৰীও উলিয়াব পৰা নাই গৃহস্থ আমিনুল হকে । এই ভয়ংকৰ অগ্নিকাণ্ডত প্ৰায় ৫ লক্ষাধিক টকাৰ সা সম্পত্তি ভস্মীভূত হোবাৰ ধাৰণা কৰিছে স্থানীয় লোকে ৷ ভদীয়া বানপানীৰৰ এই সংকটময় সময়ত হঠাৎ সংঘটিত হোৱা এই অগ্নিকাণ্ডৰ ঘটনাক লৈ দৰিদ্ৰ পৰিয়ালটোৱে সম্প্ৰতি হতাশাত ভাগি পৰিছে। এই বাতৰি যুগুত কৰা লৈকে অগ্নিকাণ্ডৰ প্ৰকৃত কাৰণ জানিব পৰা হোৱা নাই যদিও ৰান্ধনীশালৰ পৰাই জুইৰ সূত্ৰপাত ঘটা বুুলি ধাৰণা কৰিছে স্হানীয় একাংশ ৰাইজে ৷ দক্ষিণ বৰপেটাৰ বৃৃহত্তৰ চৰাঅঞ্চলত অগ্নিনিৰ্বাপনৰ  কোনো বিশেষ সুবিধা নথকাত অৱশেষত স্হানীয় ৰাইজে অশেষ কষ্ট কৰি অগ্নি নিৰ্বাপন কৰিবলৈ সক্ষম হয় ৷ এই ভয়ংকৰ অগ্নিকাণ্ডৰ পৰা কথমপি ৰক্ষা পৰে গাঁৱখনৰ কেইবাটাও পৰিয়ালৰ অতি কমেও ১০ টা গৃহ । এই ঘটনাই সমগ্ৰ মাজৰচৰ অঞ্চলত তীব্ৰ চাঞ্চল্যৰ সৃষ্টি হৈছে ৷

মিথ্যাচাৰত পৰিণত বিধায়ক ভাস্কৰ শৰ্মাৰ প্ৰতিশ্ৰুতি ৷ নিৰ্বাচনৰ পূৰ্বে প্ৰতিশ্ৰুতি প্ৰদান কৰি বাঃ বাঃ লোৱা জন প্ৰতিনিধি ভাস্কৰ শৰ্মা এতিয়া ৰাইজৰ সমালোচনাৰ পাত্ৰ। শীঘ্ৰেই ৰাইজৰ জংগী আন্দোলনৰ সন্মুখিন হোৱাৰ আশংকা মাৰ্ঘেৰিটা সমষ্টিৰ বিধায়ক ভাস্কৰ শৰ্মা ৷ মাৰ্ঘেৰিটা বিধান সভা সমষ্টিৰ জাগুন গাঁও পঞ্চায়তৰ অন্তৰ্গত ১০ নং ৱাৰ্ডৰ জাগৰী বন গাওঁৰ মূল পথটোৰ জৰাজীৰ্ণ অৱস্থাই জ্বলা-কলা খুৱাইছে সমগ্ৰ গাঁওবাসীক । পথছোৱাৰ ভালে সংখ্যক অংশত এতিয়া পুখুৰী সদৃশ গাঁত ৷ পথটোৰ শোচনীয় অৱস্থাৰ ফলত স্কুল-কলেজৰ ছাত্ৰ-ছাত্ৰী, ৰোগীক চিকিৎসালয়লৈ অনা-নিয়া কৰা, ৰাইজৰ হাট বজাৰলৈ অহা যোৱা কৰা ইত্যাদি ইত্যাদি এশ এবুৰি সমস্যাই দেখা দিছে। গাঁৱৰ ৰাইজৰ অভিযোগ অনুসৰি ২০২১চনৰ বিধান সভা নিৰ্বাচনৰ পূৰ্বে শাসকীয় দলৰ নেতা পালি নেতা তথা স্বয়ং সেই সময়ৰ প্ৰতাপী বিধায়ক ভাস্কৰ শৰ্মাই বাৰিষাৰ পূৰ্বে উক্ত পথছোৱা নিৰ্মান কৰি দিয়াৰ প্ৰতিশ্ৰুতি প্ৰদান কৰিছিল। বিধায়ক গৰাকীয়ে দিয়া সেই প্ৰতিশ্ৰুতি যে মিথ্যাচাৰৰ বাদে আন একো নাছিল সেইয়া পথটোৰ বৰ্তমানৰ শোচনীয় অৱস্থাই প্ৰমাণ কৰিছে। উক্ত পথছোৱা পকীকৰণটো বাদেই আজি পৰ্য্যন্ত এটা শিল গুটিও পেলোৱা পৰিলক্ষিত নহল ৷ উল্লেখ্য যে অঞ্চলটোৰ সৰহ সংখ্যক লোকে তেখেত সকলৰ খেতিত উৎপাদিত কেঁচা চাহ পাত,তামোল,শাক পাচলি ইত্যাদি সামগ্ৰী সমূহ বিক্ৰী কৰাৰ সময়ত উক্ত পথেৰে সৰু সৰু গাড়ীৰে বজাৰলৈ নিব লগা হয়। কিন্তু দুৰ্ভাগ্যজনক কথাটো হৈছে যে বৰ্তমানৰ পথছোৱাৰ শোচনীয় অৱস্থাৰ ফলত গাওঁ বাসীয়ে তেখেত সকলৰ খেতিত উৎপাদিত সামগ্ৰী সমূহ বহু দূৰ চাইকেল অথবা পিঠিত বুকি নিব লগা হোৱাত চৰম বিপদৰ সন্মুখীন হৈছে।গাঁওবাসীয়ে সংবাদ মাধ্যমৰ যোগেদি সমষ্টিটোৰ বিধায়ক ভাস্কৰ শৰ্মাক অতি সোনকালে পথছোৱা নিৰ্মাণ কৰি দিবলৈ আহ্বান জনাইছে।

টীয়ক জগদুৱাৰ চাহ বাগিচাৰ দ্বীপজ্যোতি লোহাৰ নামৰ এজন যুৱকে ঘৰত কোনো নথকাৰ সুযোগ গ্ৰহন কৰি  বাগিচাৰ  মানসিক ভাবে অসুস্থ এগৰাকী যুৱতীৰ লগত অপকৰ্মত লিপ্ত হোৱাত যুৱতী গৰাকী অন্ত:সত্তা হয় ।এই সন্দৰ্ভত যুৱতী গৰাকীক পৰিয়ালৰ লোকে সোধাপোচা কৰাত যুৱতী গৰাকীয়ে দ্বীপজ্যোতিৰ নাম কয় । এই সন্দৰ্ভত দেওবাৰে যুৱতী গৰাকীৰ পৰিয়ালৰ লোকে  সন্মীলিত নাৰী অধিকাৰ সুৰক্ষা মঞ্চ উজনি অসমৰ টীয়ক আঞ্চলিকৰ বিষয়ববীয়া তুতুমনি হাজৰিকাক ঘটনাৰ সন্দৰ্ভত অৱগত কৰাত জগদুৱাৰ বাগানৰ বজাৰ গৃহত এখন ৰাইজমেল অনুষ্ঠিত কৰে আৰু সমগ্ৰ বিষয়টোৰ সন্দৰ্ভত অভিযোগকাৰী যুৱকজনক সোধপোচ কৰাত যুৱকজনে যুৱতী গৰাকীৰ লগত যৌন নিৰ্যাতন চলোৱাৰ কথা স্বীকাৰ কৰে । ইফালে যুৱতী গৰাকীৰ পৰিয়ালে টীয়ক আৰক্ষী চকীৰ এজাহাৰ দাখিল কৰাত আৰক্ষীয়ে ধৃত দ্বীপজ্যোতিক আটক কৰে। অন্যহাতে ধৃত যুৱকজনে ঘটনাটোৰ লগত আন এজন যুৱকো জড়িত আছে বুলি আৰক্ষীৰ আগত স্বীকাৰোক্তি দিয়াত আৰক্ষীয়ে যুৱকজনৰ ভাষ্যৰ সত্যতা কিমান তাৰ ওপৰত তদন্ত চলাই আছে । অন্যহাতে ধৃত যুৱক দ্বীপজ্যোতিক জেল প্ৰেৰণ কৰা গৈছে বুলি জানিব পৰা গৈছে।

ওদালগুৰি জিলাৰ  মাজবাট বিধানসভা সমষ্টিৰ অন্তৰ্গত ওৰাংত অৰ্থাৎ  অসমৰ ভিতৰতে ৰসগোল্লা , মিঠাই প্ৰসিদ্ধ ঠাই ওৰাং চাৰিআলিৰ পঞ্চায়তৰ প্ৰেক্ষাগৃহত  ৫ আগষ্ট দেওবাৰে ওৰাংৰ স্থানীয় গোর্খা সমাজৰ তিজ মহাউৎসব ধুম ধামেৰে পালন কৰা হয় । গোর্খা সমাজে পূৰ্বৰে পৰা পালন কৰি অহা তিজ উৎসৱত গোর্খা সম্প্ৰদায়ৰ  বিশেষকৈ সকলো মহিলা সকলৰ উৎসৱ বুলি জনাজাত । এই উৎসৱত বিবাহিতা মহিলা সকলে নিজ নিজ মাকৰ ঘৰত আহি গাঁও বা অঞ্চলৰ মহিলা সকলৰ সতে নাচ গান কৰি আনন্দ উল্লাহ কৰা নিয়ম পূৰ্বৰে পৰা গোর্খা সমাজে পালন কৰি আহিছে । তাৰে পৰিপ্ৰেক্ষিত আজি ওৰাং অঞ্চলৰ মহিলা সকল এক গোট হৈ এক সাংস্কৃতিক অনুষ্ঠানৰ আয়োজন কৰা হৈছিল । উক্ত সাংস্কৃতিক অনুষ্ঠানত স্থানীয় মহিলা ,ছোৱালী সকলে নাচ গান কৰি সকলোকে নিজ নিজ প্ৰতিভা দেখুৱাৰ লগতে আনন্দ উল্লাহ কৰা পৰিলক্ষিত হৈছে । ওৰাংত অনুষ্ঠিত এই সাংস্কৃতিক অনুষ্ঠানত স্থানীয় জেষ্ঠ সকলৰ লগতে বহুতো গণ্য মান্য ব্যক্তিৰ লগতে মাজবাট সমষ্টিৰ যুৱ নেতা কিশোৰ শৰ্মায়েও উক্ত অনুষ্ঠানত উপস্থিত হৈ তিজ সম্পৰ্কে কিছু বক্তব্য আগবঢ়ায় । এই তিজ উৎসৱৰ সময়ত বিবাহিতা মহিলা সকলে তিজ উৎসৱ অহাৰ কেইদিন আগতেই  নিজৰ মাৰ ঘৰলৈ আহি বাল্য কালৰ বান্ধৱী সকলৰ সতে মিলি সকলো মহিলা একত্ৰিত হৈ নাচ গান কৰাৰ লগতে ব্ৰত ৰাখে । যিসকল বিবাহিতা তেওঁলোকে নিজৰ স্বামীৰ দীৰ্ঘায়ু ,স্বামীৰ লগত মিলা প্ৰীতিৰে থকাৰ আশাৰে দিনৰ দিনটো পানী পর্যন্ত নোখোৱাকৈ উপাশ ৰখা আৰু অবিবাহিতা মহিলা বা পুৰুষ সকলেও শিৱৰ দৰে বৰ বা পাৰ্বতীৰ দৰে স্ত্ৰী পোৱাৰ বাবে ব্ৰত ৰখাৰ নিয়ম গোর্খা সকলে পূৰ্বৰে পৰা পালন কৰি আহিছে ওৰাংত অনুষ্ঠিত এই অনুষ্ঠানত গোর্খা মহিলা সকলে আধুনিক নৃত্য , তিজৰ অন্যতম নৃত্য , সংগীনি নৃত্য , সুকুৰী নৃত্য , গ্ৰুপ ডান্স আদি মহিলা সকলে  প্ৰদৰ্শন কৰে । উক্ত নৃত্যত স্থানীয় বহুতো মহিলা সকলৰ লগতে বৰ্তমানৰ ভিচিডিচি চেয়েৰমেন , প্ৰাক্তন চেয়েৰমেন বেণুধৰ অধিকাৰী , সমাজ সেৱক মুক্ত শৰ্মা , শংকৰ অধিকাৰী , ৰাজেন শৰ্মা , ভূপেন শৰ্মা , মুকুন্দ অধিকাৰী , যাদৱ ৰেগ্মী , নিতা দেৱী,ইন্দ্ৰ ঢকাল  আদিকে ধৰি বহুতো জেষ্ঠ সকল উপস্থিত থাকে ।

বঙাইগাঁও জিলাৰ উপায়ুক্ত ডা:এম এচ লক্ষ্মী প্ৰিয়াই শনিবাৰে কাৰ্যালয়ৰ সভাকক্ষত কৃষি,কৃষি অভিযান্ত্ৰীকিকৰণ , জিলা উদ্যোগ আৰু বাণিজ্য কেন্দ্ৰ,আই উপত্যকা বন সংমণ্ডল, সামাজিক বনানীকৰণ, সমবায়, ৰেচম, দুগ্ধ  উন্নয়ন বিভাগ,মীন বিভাগ,হস্ততাঁত আৰু বস্ত্ৰ শিল্প ,পশুপালন,ৰাষ্ট্ৰীয় গ্ৰাম্য জীৱিকা মিছন,ৰাষ্ট্ৰীয় নগৰীয়া জীৱিকা মিছন আদি বিভাগৰ কাম-কাজৰ পৰ্যালোচনা কৰে। কৃষি বিভাগৰ অধীনত পি এম কিষাণ আঁচনিৰ হিতাধিকাৰী চূড়ান্তকৰণ সন্দৰ্ভত উপায়ুক্ত ডা:এম এচ লক্ষ্মী প্ৰিয়াই জিলা কৃষি বিষয়াৰ পৰা বুজ লয়।আনহাতে কে চি চি,প্ৰধানমন্ত্ৰী কৃষি সিঁচাই যোজনা আদিৰ ক্ষেত্ৰত কৃষি উন্নয়ন বিষয়াসকলক সক্ৰিয়ভাৱে কাম কৰিবলৈ উপায়ুক্তগৰাকীয়ে নিৰ্দেশ দিয়ে।সেইদৰে বঙাইগাঁও জিলাৰ পৰা কৃষি উৎপাদিত যিকোনো সামগ্ৰী বিশেষকৈ নেমু টেঙা বিদেশলৈ পঠাব পাৰি নেকি সেই সম্পৰ্কে উপায়ুক্তগৰাকীয়ে কৃষি বিষয়াক ব্যৱস্থা ল’বলৈ পৰামৰ্শ দিয়ে। তদুপৰি কৃষি যান্ত্ৰীকিকৰণ বিভাগৰ অধীনত বিতৰণ কৰিবলৈ বাকী থকা পাৱাৰটিলাৰ সম্পৰ্কতো বুজ লয়। সামাজিক বনানীকৰণৰ অধীনত প্ৰতিখন শিক্ষানুষ্ঠানত নিজৰ চৌহদত অন্তত ২১ টাকৈ গছপুলি ৰোপন কৰিবলৈ চৰকাৰে দিয়া পৰামৰ্শ সন্দৰ্ভত উপায়ুক্ত ডা:লক্ষ্মী প্ৰিয়াই কয় যে বীৰঝৰা মহাবিদ্যালয়ৰ ওচৰত থকা খাচ মাটিত গছপুলি ৰোপন কৰিব পৰা যাব। 

আনহাতে হস্ততাঁত আৰু বস্ত্ৰ শিল্প বিভাগৰ বিষয়াই জানিবলৈ দিয়ামতে সূতাৰ পাছবুক থকা শিপীনীয়ে বৰ্তমান ৫০ শতাংশ ৰেহাই মূল্যত য়াৰ্ন বেংকৰ পৰা সূতা কিনিব পাৰিব বুলি জনায়।পূৰ্বতে এই ৰেহাই আছিল ৩০ শতাংশ। ৰেচম বিভাগৰ অধীক্ষকে জানিব দিয়ে যে নাৰ্চাৰীত যিমান সংখ্যক চোম গছৰ পুলি আছে সেয়া ছেপ্টেম্বৰ মাহৰ ভিতৰত ৰোপন কৰিব লাগিব ৷ আনহাতে ৰাষ্ট্ৰীয় গ্ৰামীণ জীৱিকা মিছনৰ অধীনত যিসকল মৌ-পালকে ইতিমধ্যে  বিদেশৰ জাতৰ মৌমাখি ৫ বাকচ পালন কৰিছিল সেয়া আমাৰ ইয়াৰ জলবায়ুৰ লগত খাপ নোখোৱা বাবে মৰি গ’ল বুলি জিলা প্ৰকল্প বিষয়াই জনায়।গতিকে বৰ্তমানে মৌমাখি পালক সকলে এতিয়া আমাৰ দেশীয় জাতৰ মৌমাখি ব্যৱসায়ভিত্তিত পালন কৰাৰ বাবে আগ্ৰহ প্ৰকাশ কৰিছে বুলি জিলা প্ৰকল্প বিষয়াই সভাত জনায়।ইফালে ৰাষ্ট্ৰীয় নগৰীয়া জীৱিকা মিছনৰ জিলা প্ৰকল্প বিষয়াই কয় যে নাবাৰ্ডে পৃষ্ঠপোষকতা কৰিলে এইবেলি অন্তত ৭ দিনৰ বাবে আত্ম-সহায়ক গোটৰ মেলা পতাৰ কথা ভৱা হৈছে ৷  পৰ্যালোচনা সভাত জিলা উন্নয়ন আয়ুক্ত ভাস্কৰ দাসৰ লগতে বিভাগীয় বিষয়াসকলো উপস্থিত থাকে।

ঢেকীয়াজুলি উন্নয়ন খণ্ডৰ অন্তৰ্গত অমিয়পুৰ গাঁও পঞ্চায়তৰ নাৰেংকাতি কছাৰি গাঁৱত ২০১৯-২০২০ বিত্তীয় বৰ্ষত মহাত্মা গান্ধী ৰাষ্ট্ৰীয় নিয়োগ নিশ্চিত আইন(এমজিএনৰেগা)ৰ অধীনত দুই লক্ষাধিক টকাৰ এক আঁচনি ৰূপায়নৰ নামত গুৰুতৰ দুৰ্নীতি সংঘটিত হৈছে। এই প্ৰতিবেদনৰ সৈতে প্ৰকাশ পোৱা পকী ফলকৰ ফটোখনেই এই দুৰ্নীতি প্ৰতিপন্ন কৰিছে । ফলকখনত উল্লেখ থকা তথ্য অনুসৰি, নাৰেংকাতি কছাৰি গাঁৱত অৱস্থিত নাৰেংকাতি উচ্চতৰ মাধ্যমিক বিদ্যালয়ত এখন ফুলৰ বাগিছা গঢ়ি তোলাৰ এক আঁচনি ৰূপায়নৰ বাবে ২০১৯-২০২০ বৰ্ষত ২,১৯,৬২৮ টকা এমজিএনৰেগাৰ অধীনত অনুমোদিত হৈছিল । ইয়াৰে ২,০৭,৬৬৮ টকা মজুৰিৰ বাবে ধাৰ্য কৰা হৈছিল সৰ্বমুঠ ১০৭৬ টা দিন মজুৰিৰ বিপৰীতে । আনহাতে ,মুঠ অনুমোদিত ধনৰ ১১,৯৬০ টকা ধাৰ্য কৰা হৈছিল আঁচনিখন ৰূপায়নত প্ৰয়োজন হোৱা সামগ্ৰীৰ বাবে ।আমাৰ হাতত পৰা তথ্যত প্ৰকাশ পোৱা মতে, আঁচনিখনৰ সমুদায় ধনেই ইতিমধ্যে ব্যয় কৰা হৈছে ।কিন্তু বাস্তৱত দেখা গৈছে আঁচনিৰ তথ্য উল্লেখ থকা পকী ফলকখনৰ বাহিৰে বিদ্যালয়খনৰ চৌহদত আঁচনিখন ৰূপায়নৰ কোনোধৰনৰ অস্তিত্বই নাই । স্থানীয় বহুকেইজন লোকে এই প্ৰতিবেদকক জানিবলৈ দিয়া মতে, ফলকখন স্থাপন কৰা স্থানত চাৰি ট্ৰেক্টৰ মাটি ভৰোৱা হৈছিল আৰু সেই মাটিখিনি চাৰিজন শ্ৰমিকে এদিনতে কোৰেৰে মিলাই সমান কৰি দিছিল । আন এদিন শ্ৰমিক চাৰিজনে ফুলনিৰ বেৰ দিবলৈ কিছু পৰিমানে বাঁহৰ গোজ বা খুঁটি প্ৰস্তুত কৰিছিল যদিও আজি পৰ্যন্ত বেৰ নিৰ্মাণ কৰা নহ’ল । গোজখিনি সেই ঠাইতে পৰি থাকি শুকাই পচি গৈছে। এনেদৰে চাৰি ট্ৰেক্টৰ মাটি কটা আৰু মাটি মিলোৱা আৰু সামান্য পৰিমাণৰ বাঁহৰ গোজ প্ৰস্তুতৰ কামত নিয়োজিত শ্ৰমিকৰ অতি বেছি পোন্ধৰ- বিশটামান মজুৰিৰ বাবদ আঁচনিখনৰ অনুমোদিত মজুৰিৰ ধনৰ পৰা দৰাচলতে ২৮৯৫ৰ পৰা ৩৮৬০ টকাহে ব্যয় হৈছে বুলি স্থানীয় লোক সকলে জনায়। আনহাতে, সামগ্ৰীৰ নামত চাৰিডাল বাঁহৰ বাহিৰে আন একোৱেই ক্ৰয় কৰা নাই বুলিও স্থানীয় লোক কেইগৰাকীয়ে কয় । এনেদৰে, এডালো ফুলৰ পুলি ৰোপন নকৰাকৈ তথা ফুলনিৰ বেৰ নিৰ্মাণ নকৰাকৈয়ে নাৰেংকাতি উচ্চতৰ মাধ্যমিক বিদ্যালয়ত এখন অস্তিত্বহীন ফুলনি গঢ়ি দুই লক্ষাধিক টকাৰ এমজিএনৰেগাৰ মজুৰিৰ ধন জালিয়াতিৰে সৰকাই নিয়ে পঞ্চায়ত প্ৰতিনিধি, গ্ৰামীণ ৰোজগাৰ সহায়ক আৰু একাংশ স্থানীয় বিজেপি কৰ্মীৰে গঠিত এক চক্ৰই । একেদৰে ভুৱা নথিৰে চক্ৰটোৱে সৰকায় সামগ্ৰীৰ নামত ধাৰ্য কৰা ধনৰাশিও ।উল্লেখযোগ্য যে,  বিদ্যালয়খনৰ চৌহদত উন্মুক্ত ভূমিত জিলিকি থকা আঁচনিখনৰ তথ্য সম্বলিত পকী ফলকখনে এমজিএনৰেগাৰ নামত ঢেকীয়াজুলিৰ একাংশ পঞ্চায়তত কেনে প্ৰহসন চলি আহিছে তাকেই জলজল পটপটকৈ দাঙি ধৰিছে । নাৰেংকাতি কছাৰি গাঁৱৰ সচেতন ৰাইজে এই আঁচনিখনৰ ৰূপায়নত সংঘটিত গুৰুতৰ দুৰ্নীতিৰ শীঘ্ৰে তদন্ত কৰি দোষীৰ বিৰুদ্ধে ব্যৱস্থা গ্ৰহণৰ লগতে ফুলনিখনৰ নিৰ্মাণৰ কাম সম্পূৰ্ণ কৰিবলৈ শোণিতপুৰ জিলা প্ৰশাসনক দাবী জনাইছে ।