মিচিং স্বায়ত্তশাসিত পৰিষদৰ  মুখ্য কাৰ্যবাহী সদস্য  পৰমানন্দ ছায়েঙ্গীয়াৰ নেতৃত্বত আৰু  মিচিং স্বায়ত্তশাসিত পৰিষদৰ অধ্যক্ষতাত আজি পৰিষদৰ কাৰ্যালয়ত এখনি কেবিনেট বৈঠক অনুষ্ঠিত হয় ৷ উক্ত কেবিনেটত মাজুলীৰ ৩২ নং ৰাদাং- ৰৃক্কং পৰিষদীয় সমষ্টিৰ  সাধাৰণ সদস্য  উমা পাঠৰীক  কাৰ্যবাহী সদস্য হিচাপে নতুনকৈ অন্তৰ্ভুক্ত কৰা হয় ৷  নতুন কাৰ্যবাসী সদস্য পাঠৰিক পৰিষদৰ  মীন আৰু  হাট-ঘাটৰ কাৰ্যবাহী সদস্যৰ   দায়িত্ব দিয়া হয় ৷ আজি কাৰ্যবাহী সদস্য পাঠৰিক পৰিষদৰ কাৰ্যালয়ত শপত বাক্য পাঠ কৰায় ৷ ইপিনে আজি পৰিষদৰ কেবাটাও বিভাগৰ  দপ্তৰৰ  সাল-সলনি কৰি স্বাস্থ্য আৰু পৰিয়াল কল্যাণ,  ভূমি আৰু  ৰাজহ  বিভাগৰ দায়িত্বত থকা কাৰ্যবাহী সদস্য  পুৰুষোত্তম দলেৰ  কুটিৰ শিল্প বিভাগটো পৰিষদৰ  জলসম্পদ বিভাগৰ কাৰ্যবাহী সদস্য নৰেশ কুম্বাঙক, মুখ্য  কাৰ্যবাহী সদস্য  পৰমানন্দ ছায়েঙ্গীয়াৰ   দায়িত্বত থকা   হাট-ঘাটৰ বিভাগটো নতুনকৈ কেবিনেটত অন্তৰ্ভুক্ত হোৱা কাৰ্যবাহী সদস্য উমা পাঠৰীক, সামাজিক বনানিকৰণ বিভাগটো ভৈয়াম জনজাতি আৰু অন্যান্য পিছপৰা শ্ৰেণীৰ কল্যাণ বিভাগৰ দায়িত্বত থকা কাৰ্যবাহী সদস্য মলেন্দ্ৰ নাৰ্জাৰীক আৰু পৰিবহণ বিভাগটো কৃষি আৰু মীন বিভাগৰ দায়িত্বত থকা দেৱৰঞ্জন মৰাঙক অৰ্পণ কৰে  ৷ পৰিষদৰ বিশেষ কৰ্মৰত বিষয়া ডাঃ অনিল কুমাৰ পেগুৱে জনোৱা মতে কেবিনেটৰ উল্লেখিত সিদ্ধান্তবোৰৰ উপৰিও পৰিষদৰ দ্বাৰা ৰূপায়িত আঁচনিৰ ওপৰত বিস্তৃতভাৱে আলোচনা কৰা হৈ পৰিষদৰ দ্বাৰা ৰূপায়িত সকলো  আঁচনি সমূহ দ্ৰুত কৰিবলৈ সকলোকে আহ্বান জনায় ৷

সদৌ অসম সৰ্বশিক্ষা ৩য়, ৪ৰ্থ বৰ্গৰ কৰ্মচাৰী ঐক্যমঞ্চৰ তৰফৰ দেশৰ ক’ভিড পৰিস্হিতি মোকাবিলা কৰাৰ বাবে অসম চৰকাৰৰ সাহাৰ্যপুঁজিলৈ কিছু অনুদান আগবঢ়ায়। যোৱা ১৭জুন তাৰিখে ঐক্যমঞ্চৰ এটা সজাতি দ’লে  অসম সচিবালয়ৰ মুখ্যমন্ত্ৰীৰ কাৰ্যালয়ত মুখ্যমন্ত্ৰী ড° হিমন্ত বিশ্ব শৰ্মাক সাক্ষাৎ কৰি ঐক্যমঞ্চৰ জমা পুঁজিৰ তৰফৰ পৰা ১,৩১,০০০(একলাখ একত্ৰিশ হাজাৰ) টকা ড্ৰাফট্ যোগে  মুখ্যমন্ত্ৰীৰ সাহাৰ্য পুঁজিলৈ বৰঙনি আগবঢ়ায়। আনহাতে  সমগ্ৰ অসমতে সৰ্বশিক্ষাৰ কৰ্মৰত ৩৩ খন জিলাৰ বিভিন্ন পৰ্য্যায়ৰ বিষয়া কৰ্মচাৰীৰ তৰফৰ পৰা মুখ্যমন্ত্ৰী সাহাৰ্য পুঁজিলৈ এদিনৰ দৰমহা কৰ্তনৰ পৰা প্ৰায় ২৪,৫০,৬৩৭(চৌব্বিশ লাখ পঞ্চাশ হাজাৰ ছশ সাতত্ৰিশ) টকা দিয়া হয় বুলি ঐক্য মঞ্চৰ তৰফৰ পৰা জানিবলৈ দিয়ে। মুখ্যমন্ত্ৰী সাক্ষাৎ অনুষ্ঠানত উপস্থিত থাকে ঐক্যমঞ্চৰ কাৰ্যকৰী সভাপতি ইন্দ্ৰশেখৰ শৰ্মা, ভূদেৱ গোস্বামী, সাধাৰণ সম্পাদক উত্তম দত্ত, যুটীয়া সম্পাদক মনোজ ডেকা আৰু কাৰ্যকৰী সদস্য ক্ৰমে জিতু বৰুৱা, হেমন্ত শৰ্মা আৰু ৰঞ্জোৎপল বৰঠাকুৰ। দ’লটিয়ে লগতে মুখ্যমন্ত্ৰীক সৰ্বশিক্ষাৰকৰ্মচাৰীসকলৰ চাকৰীৰ ম্যাদ আৰু নিৰাপত্তা ৬০ বছৰলৈ সুঃনিশ্চিত কৰিবলৈ জনোৱা অনুৰোধৰ প্ৰতি সহাৰি জনাই মুখ্যমন্ত্ৰী ড° হিমন্ত বিশ্ব শৰ্মাই অতি কমদিনৰ ভিতৰতে সমস্যা সমাধান কৰাৰ আশ্বাস প্ৰদান কৰে বুলি ঐক্যমঞ্চৰ তৰফৰ পৰা জানিবলৈ দিয়ে। মুখ্যমন্ত্ৰীক সাক্ষাৎ কৰা সময়ত ঐক্যমঞ্চৰ সজাতি দ’লটিক সংগ দিয়ে মুখ্যমন্ত্ৰীৰ ৰাজনৈতিক সচিব তথা নলবাৰী সমষ্টিৰ মাননীয় বিধায়ক জয়ন্ত মল্ল বুজৰবৰুৱাই।

 দেশৰ মহাৰত্ন উদ্যোগ তেল আৰু প্ৰাকৃতিক গেছ নিগম ( অ’ এন জি চি ) অসম সম্পদৰ একাংশ বহিৰাগত – অনাঅসমীয়া বিষয়াই কিছু বছৰ ধৰি অসম আৰু অসমীয়া জাতিক কৰি অহা প্ৰতাৰণা আৰু অসম বিৰোধী ষড়যন্ত্ৰৰ বিৰুদ্ধে আজি নিগমৰ অসম সম্পদৰ  নাজিৰাস্থ মুখ্য কাৰ্যালয় সন্মুখত ক্ষোভৰ বৰ্হিপ্ৰকাশ ঘটাই জিলাখনৰ শতাধিক ঠিকাদাৰে অৱস্থান ধৰ্মঘটৰ জৰিয়তে প্ৰতিবাদ সাব্যস্ত কৰে । অ’ এন জি চি , অসম সম্পদৰ একাংশ বহিৰাগত বিষয়াৰ অসম বিৰোধী ষড়যন্ত্ৰৰ বাবেই শেহতীয়াকৈ থলুৱা ক্ষুদ্ৰ ঠিকাদাৰ তথা শ শ পৰিয়ালক ভাতে মাৰি এপ’ল’ প্ৰতিষ্ঠানক ঔষধ যোগান তথা ফাৰ্মাচীৰ আৱণ্টনৰ ঠিকা অৰ্পণ কৰে । তাৰোপৰি অ’ এন জি চিৰ অসম সম্পদৰ অধীনত বছৰ বছৰ ধৰি পেট প্ৰৱতাই থকা শ শ পৰিয়ালক ভাতে মৰাৰ ব্যৱস্থাৰে GeM ৰ জৰিয়তে যান – বাহনকে ধৰি বিভিন্ন বিভাগৰ ঠিকা কাম গতাই দিয়াৰ ষড়যন্ত্ৰৰ বিৰুদ্ধে সৰৱ হৈ এপ’ল’ আৰু GeM ব্যৱস্থা প্ৰত্যাহাৰৰ দাবীত  আজি নাজিৰাস্থ  অ’ এন জি চি মুখ্য কাৰ্যালয়ৰ প্ৰৱেশ দ্বাৰৰ  সন্মুখত শিৱসাগৰ জিলা অ.এন.জি.চি ঠিকাদাৰ সন্হাই অৱস্হান ধৰ্মঘট কাৰ্য্যসূচী ৰূপায়ন কৰে । বিশেষকৈ এই ঠিকাদাৰ সকলে কেন্দ্ৰীয় চৰকাৰে অ’ এন জি চি ক বান্ধি  দিয়া নীতি নিৰ্দেশনাক লৈও ক্ষোভ প্ৰকাশ কৰে য’ত অ’ এন জি চি য়ে GeM Potal প্ৰক্ৰিয়াৰে নিবিদা আদায় দিয়াৰ কথা প্ৰকাশ কৰিছে  । এই বিষয়ক লৈ থলুৱা ঠিকাদাৰ সকলে বিৰোধিতা কৰি এপ’ল’ ক প্ৰদান কৰা ঔষধ তথা ফাৰ্মাচীৰ ঠিকা আৰু GeM প্ৰত্যাহাৰ নকৰিলে  অনাগত দিনত  অ’ এন জি চিয়ে তীব্ৰ প্ৰতিবাদৰ সন্মুখীন হোৱাৰ লগতে অ’ এন জি চিৰ যদি কিবা অনিষ্ট হয় ইয়াৰ বাবে ঠিকাদাৰ সন্হাক দোষাৰোপ কৰিব নোৱাৰিব বুলি স্পষ্ট কৰি ইয়াৰ বাবে কেন্দ্ৰীয় , ৰাজ্য চৰকাৰ আৰু অ’ এন জি চি কৰ্তৃপক্ষ জগৰীয়া হ’ব বুলি সকীয়াই দিয়ে । উক্ত অৱস্থান ধৰ্মঘট কাৰ্যসূচীত সদৌ শিৱসাগৰ জিলা ছাত্ৰ সন্থাৰ বিষয় – ববীয়াই অংশগ্ৰহণ কৰে । আনহাতে অ’ এন জি চিৰ এনে অসম বিৰোধী ষড়যন্ত্ৰৰ বিৰুদ্ধে অসম আৰু অসমীয়া জাতিসত্ত্বা জীয়াই ৰথাৰ স্থাৰ্থত  জাতীয় ভাৱাপন্ন সংগঠন সমূহক আগবাঢ়ি আহিবলৈ আহ্বান জনাইছে শিৱসাগৰ জিলা ( অ’ এন জি চি ) ঠিকাদাৰ সন্থাই ।