ক’ভিড-১৯ৰ  পৰিস্থিতি  মুকাবিলা কৰা বিশ্বনাথ জিলা প্ৰশাসনে সৰ্বোতভাৱে ব্যৱস্থা গ্ৰহন কৰা স্বত্তেও পৰিস্থিতি   অনুকুল নোহোৱাত সমগ্ৰ বিশ্বনাথ জিলা খনতে সম্পূৰ্ণ  লকডাউনৰ ঘোষনা কৰিছে  ৷  ক’ভিডৰ শোচনীয় পৰিস্থিতিৰ বাবে জিলাখনৰ অভিভাৱক মন্ত্ৰী পিযুষ  হাজৰিকাৰ নিৰ্দেশ ক্ৰমে বিশ্বনাথ জিলা উপায়ুক্তৰ সভাকক্ষত অনুষ্ঠিত হোৱা  এক পৰ্যালোচনা সভাত ক’ভিড-১৯  পৰিস্থিতি নিয়ন্ত্ৰণৰ বাবে কেইবাটাও গুৰুত্বপুৰ্ন  সিদ্ধান্ত গ্ৰহন  কৰে ৷ বিশেষকৈ মদৰ  প্ৰচলন থকা স্থান সমুহত ক’ভিড-১৯ ৰ গণ সংক্ৰমনৰ আশংকা প্ৰকাশ কৰা  মন্ত্ৰী পিযুষ হাজৰিকাই মদৰ ঘাটি সমুহ উৎখাত  কৰাৰ কাঢ়া নিৰ্দেশ দিয়ে ৷ মন্ত্ৰীৰ নিৰ্দেশৰ  পাছতেই বিশ্বনাথ জিলা প্ৰশাসনে মুখ্যতঃ মদৰ ঘাটি উৎখাত কৰাৰ বাবে তৎপৰ হৈ পৰে ৷ ইতিমধ্যে আৰক্ষীয়ে  জিলাখনৰ বিভিন্ন স্থানত মদৰ সাম্ভাৱ্য ঘাটি সমুহ চিনাক্ত কৰি  অভিযান তীব্ৰতৰ কৰি তুলিছে ৷  জানিব পৰা মতে  অসম অৰুণাচল সীমান্তৱৰ্তীৰ বিভিন্ন অঞ্চলকে ধৰি মদৰ ঘাটি হিচাবে  খ্যাত  মহজুলি বস্তি আৰু মহজুলি পথাৰত  বালিচাং আৰক্ষী চকীৰ ভাৰপ্ৰাপ্ত বিষয়া আব্বাছ আলিৰ নেতৃত্বত C.R.P.F , আবকাৰী বিভাগ আৰু মহিলা আৰক্ষীৰ দলে  আকস্মিক ভাবে  সুৰা উৎখাত কৰাৰ  অভিযান চলাই ৷ অভিযানৰ সময়ছোৱাত মিনা কিলিংপীৰ গৃহত ২০০ লিটাৰ , সিং বে’ৰ গৃহত ১০০ লিটাৰ ,মিলী বেপীৰ গৃহত ১৫০ লিটাৰৰ উপৰিও , মানিক বে , দিলীপ তিমুং আৰু মাইসিং তিমুঙৰ গৃহৰ পৰা ৬৫০ লিটাৰকে  ধৰি সৰ্বমুঠ  ১১০০ লিটাৰ  মদ জব্দ কৰিবলৈ সক্ষম হয় ৷ অৱশ্যে আৰক্ষী অহাৰ গম পায়েই  মদ বেপাৰী  সকলে পলাই সাৰিবলৈ সক্ষম হোৱাত এই পৰ্যন্ত কাকো গ্ৰেপ্তাৰ কৰিব পৰা নাই ৷  কৰ্তব্যৰত অৱস্থাত থকা বালিচাং আৰক্ষী বিষয়াক সোধা এক প্ৰশ্নৰ উত্তৰত ক’ভিড -১৯ পৰিস্থিতি সুস্থিৰ অবস্থালৈ নহা আৰু  মদৰ ঘাটি সম্পুৰ্ন ৰূপে উৎখাত নকৰা পৰ্যন্ত এই অভিযান ধাৰাবাহিক ভাবে চলি থাকিব বুলি জানিব দিয়ে ৷ অভিযানৰ এই কাৰ্যত বিশেষ ভাবে সহযোগ দিয়ে বালিচাং , লচমনবস্তি আৰু মহজুলি বস্তিৰ গাওঁৰক্ষী বাহিনী সম্পাদক  সকল ক্ৰমে বালিৰাম ৰংপী , জগন্নাথ কুৰ্মী আৰু ৰেৱন শৰ্মাই ৷ আৰক্ষীৰ এই কাৰ্যত সচেতন লোক সকলে  সন্তুষ্টি প্ৰকাশ কৰে ৷

মৰিগাঁও জিলাৰ লাহৰীঘাটৰ তৰাবৰীত চাৰিমাহ ধৰি বিদ্যুৎৰ পৰা বঞ্চিত হৈ আছে লাহৰিঘাট বিদ্যুৎ উপ সংমণ্ডৰ অধীনস্ত কাঠনিৰ  তৰাবৰীবাসী।গাঁওখনত বিদ্যুৎৰ যোগান দিয়া ট্ৰেন্সফৰ্মাৰটো হঠাৎ বিকল হৈ পৰাত এতিয়া বিপদত পৰিছে গাওঁখনৰ ৰাইজে। কিয়নো বিদ্যুৎ বিভাগে ট্ৰেন্সফৰ্মৰত বাকী থকা সম্পূৰ্ণ বিল আদায় নিদিয়ালৈকে বিদ্যুৎৰ সংযোগ নিদিয়াৰ হুংকাৰ প্ৰদান কৰিছে গাঁওবাসীক।গড়খহনীয়াৰ কবলত পৰা গাঁওখনৰ বিদ্যুৎৰ কিছু  গ্ৰাহক  অন্য ঠাইলৈ ঢাপলিমেলাত এতিয়া সম্পূৰ্ণ বিল আদায় দিয়াত অসম্ভব হৈ পৰিছে গাঁওবাসীৰ।যাৰ কাৰণে বিল আদায় দিয়া গ্ৰাহকো এতিয়া বিদ্যুৎৰ মুখ নেদেখা হৈছে।সম্প্ৰতি প্ৰচণ্ড ৰ’দ আৰু নিশাৰ ভাগতো উৎকট গৰমত চৰম অস্বস্তিত ভুগিছে কাঠনিৰ তৰাবৰীৰ বাসিন্দাসকলে ।উপায়ন্তৰ হৈ এতিয়া  বিদ্যুৎ বিভাগৰ বিৰুদ্ধে প্ৰতিবাদত নামিছে বিদ্যুৎৰ পৰা বঞ্চিত লোক সকলে ।এই সন্দৰ্ভত সংবাদ মাধ্যমৰ জড়িয়তে শক্তি মন্ত্ৰী  বিমল বৰাৰ সহায় বিচাৰিছে তৰাবৰীৰ বাসিন্দাসকলে।

ওদালগুৰি জিলাৰ ধনশ্ৰীঘাট, ওৰাং , ৰৌতা মাজবাট  আদি অঞ্চলত ওৰাং আৰক্ষীয়ে ইতিমধ্যে ক’ভিড প্ৰ’টকল ভংগ কৰা সকলৰ বিৰুদ্ধে অভিযান চলাই আহিছে ৷ ৰাজ্যৰ ৭ খন জিলাত লক ডাউন চলি থকা সময়ত কিছু লোকে ক’ৰোণা নীতি নিৰ্দেশনা একেবাৰেই অৱজ্ঞা কৰি অহাৰ কৰ্ম কাণ্ড বোৰে জিলাখনৰ সচেতন মহলক বাৰুকৈ  চিন্তিত  কৰি তুলিছে । ওদালগুৰি জিলাত  ক’ৰোণাৰ  সংক্ৰমন বৃদ্ধি হোৱাত ডিমাকুছি,ধনশ্ৰী,বেটালী,বাহিপুখুৰী চাহ বাগিছা  হট স্পট  হিচাপে চিহ্নিত হৈ অহা পিছতো ওদালগুৰি জিলাৰ  ওৰাং,ৰৌতা,মাজবাট আদি  অঞ্চলৰ বজাৰ হাটত ক’ৰোণাৰ প্ৰতি লক্ষ্য ৰাখি চৰকাৰে বান্ধি দিয়া নীতি নিৰ্দেশনাক একাংশ ৰাইজে বুঢ়া আঙুলি দেখুৱাই অহা পৰিলক্ষিত হৈছে । জিলাখনৰ বেছিভাগ অঞ্চলৰ বজাৰ হাট, দোকান পোহৰ আদিত  সঠিক ভাবে মাস্ক পৰিধান নকৰাকৈ বহু লোক ঘূৰি ফুৰাত  প্ৰশাসনৰ নীতি নিৰ্দেশনাক অৱজ্ঞা কৰি সমাজৰ বাবে বিপদ মাতি আনিছে । ক’ভিড ১৯ সংক্ৰমনে দিনক দিনে জিলাখনত  ভয়ংকৰ ৰূপ ধাৰণ কৰিছে পাঁচ মহীয়া শিশু পর্যন্ত এই ৰোগৰ কবলত পৰি মৃত্যুৰ মুখত পাৰি অহা ঘটনা পোহৰলৈ অহা স্বত্বেও এতিয়াও সজাগ সচেতন হোৱা নাই বহু লোক । ফলত চিন্তিত হৈছে স্বাস্থ্য কৰ্মী তথা জিলাৰ সচেতন মহল । ৰাজ্যৰ লোকে ক্ৰমান্বয়ে লক ডাউন হ্ৰাস পাব , কিছু পৰিমানে ক’ৰোণা মহামাৰীৰ  সংক্ৰমণ ৰোধ কৰা সম্ভৱ হব  বুলি প্ৰথম অৱস্থাত  আশা কৰা হৈছিল যদিও এইসকল অসচেতন লোকৰ বাবে পৰিস্হিতি অধিক বেয়ালৈ গতি কৰিছে । এইসকল অসচেতন লোকে বাইক,চাৰিচকীয়া যান বাহন আদি  লৈ  যধে মধে ঘূৰি থকাত ওৰাং আৰক্ষী থানাই শ শ লোকক জৰিমনা বিহিব বাধ্য হৈছে ৷স্বাস্থ্য বিভাগ আৰক্ষী প্ৰশাসন , বিভিন্ন দল সংগঠনে ক’ভিড নীতি নিৰ্দেশনা অৱলম্বন কৰিবলৈ বাৰম্বাৰ আহ্বান জনাই অহাৰ পিছতো  সকলো নীতি নিৰ্দেশনা উলঙ্ঘন কৰি বাইক লৈ হেলমেট , লাইচেন্স ,গাড়ীৰ কাগজ পত্ৰ আদি লগত নোলোৱাকৈ অনাই বনাই ঘূৰি ফুৰা লোকৰ উৎপাত প্ৰতিদিনে বৃদ্ধি হোৱাত ওৰাং আৰক্ষীয়ে ক’ভিড আইন,SOP আদি  উলঙ্ঘন কৰি বাইক ,গাড়ীত  ঘূৰি ফুৰা লোক সকলক জৰিমনা বিহিবলৈ অৱশেষত বাধ্য হৈছে ৷  ক’ৰোণা দ্বিতীয় পৰ্য্যায় আৰাম্ভ হোৱাৰে পৰা  ৯ জুলাইলৈকৈ ওৰাং আৰক্ষীয়ে ৮০ হাজাৰ টকা ক’ভিড নীতি নমনা লোকৰ পৰা জৰিমনা বিহিবলৈ সক্ষম হয় । ওৰাং আৰক্ষী থানাৰ ভাৰপ্ৰাপ্ত আৰক্ষী বিষয়া দিপক দাসৰ নেতৃত্বত ক’ভিড প্ৰট’কল আৰু যান বাহন আইন ভংগ কৰা সকলক জৰিমনা কৰা কাৰ্যক ওৰাং সাংবাদিক সংস্থা ,ওদালগুৰি জিলা সচেতন নাগৰিক সমিতিয়ে প্ৰশংসা কৰাৰ  লগতে  শলাগ হৈছে ৷তদুপৰি ওৰাং আৰক্ষীয়ে স্বাস্থ্য বিভাগৰ প্ৰতিটো কাৰ্য্যসূচীত প্ৰত্যক্ষ ভাবে সহায় সহযোগিতা কৰি থকা দেখিবলৈ পোবা গৈছে ৷কনটেইণ্টমেট জ’নত,ক’ভিড আক্ৰান্ত সকলে ক’ভিড আইন ভংগ কৰি উৎপাত কৰা সকলকো নিয়ন্ত্ৰন কৰিবলৈ সক্ষম হোৱা দেখা গৈছে ৷

চৰাই পোৱালিক খোৱাবলৈ জামুক বুটলিবলৈ গৈছিল কণমানি গৰাকী

▶ভূৰাগাঁৱৰ শিশু ধৰ্ষণ তথা হত্যাকাণ্ডৰ তদন্ত অব্যাহত৷

▶চৈয়দ আলী ওৰফে ‘পঠা”ক আজি পুৱতি নিশা ঘটনাস্থলীলৈ নিলে আৰক্ষীয়ে৷

▶দণ্ডাধীশৰ উপস্থিতিত বিশাল আৰক্ষী বাহিনীৰ উপস্থিতিত ঘটনাস্থলীলৈ নিলে চৈয়দক৷

▶আৰক্ষীৰ ওচৰত গুলীবিদ্ধ ‘পঠা’ৰ সমগ্ৰ জঘন্য কাণ্ডৰ বৰ্ণনা।

▶পুৱা ৫ বজাতে চৰাই পোৱালিক খোৱাবলৈ জামুক বুটলিবলৈ গৈছিল কণমানি গৰাকী।

▶মৰাপাটৰ খেতিৰ মাজত ‘পঠা’ই এই জঘন্য কাণ্ড সংঘটিত কৰিছিল।

▶নিশংসভাৱে ধৰ্ষণ কৰি হত্যা কৰা হৈছিল কণমানি জনীক।

▶হত্যাৰ পাছতো যৌন উৎপীড়ন কৰা হৈছিল।

▶মৰিগাঁও আৰক্ষীয়ে এই জঘন্য কাণ্ড সংঘটিত কৰা ৬৫ বছৰীয়া ছৈয়দ আলীক গ্ৰেপ্তাৰ কৰিছিল।

▶কিছুদিন পূৰ্বে ‘পঠা’ক ভৰিত গুলীয়াইছিল আৰক্ষীয়ে৷

বাক্সাৰ তামুলপুৰত আৰক্ষীৰ এনকাউনণ্টাৰ।

▶নাৰী অপহৰণকাৰী তথা নাৰী ব্যৱসায়ী জেহিৰুল ইছলামক গুলীয়ালে আৰক্ষীয়ে।

▶প্ৰেমৰ চলনাৰে জেহিৰুলে শিশু সহ মহিলাক অপহৰণ কৰি বিক্ৰী কৰিছিল বিহাৰৰ কিষাণগঞ্জ জিলাৰ প্ৰেমনগৰৰ নিষিদ্ধ এলেকাত।

▶আৰক্ষীৰ অস্ত্ৰ কাঢ়ি পলায়ন কৰিবলৈ চেষ্টা কৰাত আৰক্ষীয়ে জেহিৰুললৈ লক্ষ্য কৰি গুলীচালনা কৰে।

▶জেহিৰুলৰ ঘৰ ধুবুৰীৰ দক্ষিণ শালমাৰা অঞ্চলত।

▶বৃহস্পতিবাৰে আৰক্ষীৰ এটি দলে গুৱাহাটীৰ পৰা গ্ৰেপ্তাৰ কৰিছিল জেহিৰুলক।

▶আৰক্ষীয়ে তদন্তৰ বাবে ৰামেচুবৰী গাঁওলৈ লৈ যোৱা অৱস্থাত আন্ধাৰৰ সুযোগ লৈ আৰক্ষীৰ অস্ত্ৰ কাঢ়ি পলায়ন কৰিবলৈ চেষ্টা কৰিছিল জেহিৰুলে।

▶আৰক্ষীয়ে জেহিৰুললৈ লক্ষ্য কৰি গুলি চালনা কৰাত ভৰিত গুলি লাগি আহত হয়।

পশ্চিম কামৰূপ বন সংমণ্ডলৰ অধীনস্থ সংৰক্ষিত বনাঞ্চল সমূহৰ মূ্ল্যৱান গছ- গছনিৰ ধ্বংসযজ্ঞ ৰুধিবলৈ  বনকৰ্মীয়ে অব্যাহত ৰাখিছে প্ৰচেষ্টা ৷ এই  ক্ষেত্ৰত চোৰাং কাঠৰ ব্যৱসায়ৰ বিৰুদ্ধে বকোৰ বন বিভাগে বিশেষ তৎপৰতাৰে অসম- মেঘালয়ৰ সীমান্তলৈকে অব্যাহত ৰাখিছে অভিযান ৷ বৃহস্পতি বাৰে সন্ধিয়া অসম- মেঘালয় সীমান্তত বকো বন বিভাগে চোৰাং কাঠৰ বিৰুদ্ধে চলায় এক সফল অভিযান ৷ বকোস্থিত শিংৰা বনাঞ্চলিক বিষয়া আব্দুল ৰৌফ আহমেদৰ নেতৃত্বত বকোৰ পৰা প্ৰায় ৪০ কিলোমিটাৰ নিলগৰ অসম- মেঘালয়ৰ সীমান্তৰ দূৰ্গম অঞ্চল পিচলেংত বনৰক্ষী বাহিনীয়ে চলায় এই অভিযান ৷  উল্লেখ্য, মেঘালয়ৰ পৰা চোৰাং কাঠ ব্যৱসায়ীয়ে  মূল্যৱান চোৰাং কাঠৰ কুণ্ডা বিভিন্ন ঠাইলৈ চোৰাংকৈ সৰবৰাহৰ উদ্দেশ্য সীমান্তৰ পিচলেংত জমা কৰি ৰখা বুলি নিৰ্ভৰযোগ্য সূত্ৰে লাভ কৰা তথ্যৰ ভিত্তিত চলোৱা অভিযানটোত  বন বিভাগে বৃহৎ পৰিমাণৰ চোৰাং কাঠৰ কুণ্ডা জব্দ কৰিবলৈ সক্ষম হয় । মেঘালয়ৰ পৰা আনি জমা কৰি ৰখা চোৰাং খোকন কাঠৰ এই প্ৰকাণ্ড প্ৰাক্ণ্ড কুণ্ডাসমূহ পিচত  বকোৰ বনৰক্ষী বাহিনীয়ে জব্দ কৰি বনাঞ্চলিকৰ কাৰ্যালয়লৈ লৈ আহে ৷ ইফালে, বনাঞ্চলিক বিষয়াই জনোৱা মতে, মেঘালয়ৰ এই চোৰাং খোকন কাঠৰ কুণ্ডাসমূহ  কামৰূপ পাৰ হৈ ব্ৰক্ষ্মপুত্ৰৰ নদী পথেৰে  হৈ বৰপেটা জিলাৰ বিভিন্ন ঠাইলৈকে চোৰাং ব্যৱসায়ীয়ে  সৰবৰাহ কৰাৰ পৰিকল্পনা কৰিছিল । বনৰক্ষী বাহিনীৰ হাতত জব্দ হোৱা চোৰাং কাঠখিনিৰ বজাৰ মূল্য প্রায় ৬০ হাজাৰ টকা হ’ব বুলি জানিব পৰা গৈছে।

মটৰচাইকেল চুৰি চক্ৰৰ বিৰুদ্ধে চিৰাং আৰক্ষীৰ সফল অভিযান । ৰাজ্যত নতুন চৰকাৰ গঠনৰ কিছু দিনৰ ভিতৰতে মুখ্যমন্ত্ৰী ডʼ হিমন্ত বিশ্ব শৰ্মাৰ কঠোৰ নিৰ্দেশ মৰ্মে তাৎক্ষণিকভাৱে তৎপৰ হৈ উঠে অসম আৰক্ষী আৰু ২০ জুনৰ পৰা ৩০ জুনলৈ মাত্ৰ ১০ দিনৰ ভিতৰতে চিৰাং আৰক্ষীয়ে তীব্ৰ অভিযান চলাই জিলা খনৰ বিভিন্ন থানা এলেকাৰ পৰা মুঠ ৩০ খন চুৰি হোৱা মটৰচাইকেল উদ্ধাৰ কৰে ।ইয়াৰ পিছৰ পৰ্যায়ত যোৱা ৩০ জুন তাৰিখৰ পৰা ৯ জুলাই লৈকে চিৰাং আৰক্ষীয়ে ৩৬ খন চুৰি হোৱা মটৰচাইকেল উদ্ধাৰ কৰাৰ লগতে ইতিমধ্যে ৪ জনকৈ মটৰচাইকেল চুৰি চক্ৰৰ সদস্যক গ্ৰেপ্তাৰ কৰিবলৈ সক্ষম হয় ।যোৱা ১৮ দিনত চিৰাং আৰক্ষীয়ে জিলা খনৰ পৃথকে পৃথকে স্থানত অভিযান চলাই মুঠ ৬৬ খন চুৰি যোৱা মটৰচাইকেল উদ্ধাৰ কৰি এক নজীৰ স্থাপন কৰিছে ।উল্লেখযোগ্য যে বাইক চুৰিৰ বিৰুদ্ধে চিৰাং আৰক্ষীৰ এয়া এক বৃহৎ সাফল্য। এই বাইক চুৰিৰ সমগ্ৰ চক্ৰৰ তথ্য অতি সোনকালেই পোহৰলৈ আহিব বুলি চিৰাং আৰক্ষীয়ে সদৰী কৰে।