দুদিনৰ বাবে যোৰহাটৰ গৃহত গৈ মাতৃ আৰু পুত্ৰক সাক্ষাত কৰাৰ অনুমতি বিধায়ক অখিল গগৈক ৷ শুকুৰবাৰে এই অনুমতি প্ৰদান কৰিছে NIA আদালতে ৷ অখিল গগৈয়ে এতিয়া নিজৰ সুবিধা মতে মাতৃ আৰু পুত্ৰক লগ কৰিবলৈ  দুদিনৰ বাবে যাব পাৰিব যোৰহাটৰ ঘৰলৈ। উল্লেখ্য যে, শেহতীয়াকৈ অখিল গগৈয়ে মাতৃ আৰু নিজৰ পুত্ৰক লগ কৰাৰ অনুমতি বিচাৰি আদালতত কৰিছিল আবেদন।

ইফালে অখিল গগৈৰ মাতৃ প্ৰিয়দা গগৈয়েও পুত্ৰ মুখ খন এবাৰ চাবলৈ বহু সময়ত আগ্ৰহ প্ৰকাশ কৰি আহিছিল। বিধানসভা নিৰ্বাচনৰ সময়ত অসুস্থ দেহাৰেই পুত্ৰ অখিলৰ হৈ শিৱসাগৰত প্ৰচাৰ অভিযান চলোৱা মাতৃগৰাকীৰ এই আহ্বান যেন অৱশেষত শুনিলে আদালতে। ইফালে কিছুদিন পূৰ্বে শাৰীৰিক ভাবে অসুস্থ হৈ পৰিছিল অখিল গগৈৰ পুত্ৰ নাচিকেতাও।

ডেৰ কিঃমিঃ দুৰৰ এটা গেলা কুঁৱাৰ দূষিত পানী,জুৰিৰ পানীয়েই শেষ ভৰসা বৃহত্তৰ অঞ্চলৰ জনসাধাৰণৰ ৷

 নগাঁৱৰ জনস্বাস্থ্য কাৰিকৰী বিভাগৰ অকৰ্মণ্যতাৰ বাবেই এটুপি বিশুদ্ধ খোৱা পানীৰ বাবেই হাঁহাকাৰ কৰি ফুৰিব লগীয়া হৈছে নগাঁও জিলাৰ বঢ়মপুৰ সমষ্টিৰ অন্তৰ্গত বামুণী শুকাণজুৰি অঞ্চলৰ ৰাইজে।   বিশুদ্ধ খোৱা পানীৰ কথাটো বাদেই এই দুৰ্ভগীয়া অঞ্চলবাসীয়ে আনকি গাধোৱা,কাপোৰ ধোৱা,বাচন-বৰ্তন ধোৱা আদি বিভিন্ন কামৰ‌ বাবেও প্ৰয়োজনীয় পানী কণৰ বাবেও বাট কুৰি বাই যাব লগীয়া হৈছে বহু দূৰলৈ।বামুণীৰ শুকানজুৰি অঞ্চলৰ ৰাইজে এটুপি পানী আনিবলৈ বাট কুৰি বাই যাব লগীয়া হৈছে প্ৰায় ডেৰ-দুই কিলোমিটাৰ দূৰ পৰ্যন্ত।প্ৰতিদিনে পুৱা আৰু বিয়লি অঞ্চলটোৰ পুৰুষ-মহিলা সকলে নিজৰ কান্ধত,মূৰত অথবা ঠেলাগাড়ী  চাইকেলেৰে লোটা,কলহ, প্লাষ্টিকৰ ড্ৰাম,টিং,ডেস্কি আদি  কঢ়িয়াই লৈ যায় ডেৰ-দুই কিলোমিটাৰ নিলগত শুকাণজুৰি চাহ বাগিচাৰ মাজত অৱস্থিত এটা গেলা কুঁৱা আৰু জুৰিলৈ। তাৰোপৰি আন একাংশ লোকে লোটা,কলহ,ড্ৰাম আদি লৈ নিলগৰ জুৰিৰ পৰা নিত্যব্যৱহাৰ্য পানী খিনি সংগ্ৰহ কৰিব লগীয়া হৈছে।আন একাংশ লোকে ঘৰৰ চৌহদতে খান্দি লোৱা কেঁচা কুঁৱাৰ দূষিত পানীকে ব্যৱহাৰ কৰিবলৈ বাধ্য হৈছে। অৱশ্যে অঞ্চলটোত আহোমগাঁও বিশুদ্ধ খোৱাপানী যোগান আঁচনি নামৰ জনস্বাস্থ্য কাৰিকৰী বিভাগৰ এটা পানী যোগান আঁচনি আছে যদিও প্ৰয়োজনীয় তত্বাৱধান আৰু মেৰামতিৰ অভাৱত এই আঁচনি খনো বহু দিন ধৰি বিকল হৈ আছে।স্থানীয় ৰাইজৰ বহু আবেদন নিবেদনৰ পাছতো নগাঁও জনস্বাস্থ্য কাৰিকৰী বিভাগে  আজিকোপতি পানী যোগান আঁচনিখন মেৰামতি কৰাৰ ক্ষেত্ৰত কোনো ধৰণৰ পদক্ষেপ  গ্ৰহণ নকৰিলে।ফলত উপায়বিহীন হৈ অঞ্চলটোৰ প্ৰায় তিনি শতাধিক লোকে এটুপি বিশুদ্ধ পানীৰ অভাৱত কদৰ্য পৰিৱেশত শুকাণজুৰি চাহ বাগিচাৰ মাজত অৱস্থিত এটা কুৱাঁৰ লগতে জুৰিৰ দূষিত পানী সেৱন কৰি থাকিব লগা হৈছে। তাৰোপৰি এই দূষিত পানীকে আন কামতো ব্যৱহাৰ কৰা পৰিলক্ষিত হৈছে।গেলা কুঁৱা,জুৰিৰ দূষিত পানীকে সেৱন কৰি থকা হেতুকে অঞ্চলটোৰ বহু লোক  বিভিন্ন ৰোগত আক্রান্ত  হ’বলগীয়া হৈছে। উল্লেখ্য যে, নগাঁও জিলাৰ বঢ়মপুৰ উন্নয়ন খণ্ডৰ অন্তৰ্গত বালিজুৰি আৰু বামুণী দুখনকৈ গাঁও পঞ্চায়তৰ অন্তৰ্গত বামুণী শুকাণজুৰি অঞ্চলবাসীয়ে অঞ্চলটোৰ বিশুদ্ধ খোৱাপানীৰ সমস্যাটোৰ বিষয়ে সমষ্টিটোৰ তেতিয়াৰ বিধায়ক প্ৰফুল্ল কুমাৰ মহন্তক বহু বাৰ অৱগত কৰি অনুনয় বিনুনয় কৰিছিল যদিও কোনো সুফল নাপালে বুলি স্থানীয় ৰাইজে জনাইছে।স্মৰ্তব্য যে,এক অকৰ্মন্য বিভাগত পৰিণত হোৱা নগাঁও জিলা জনস্বাস্থ্য কাৰিকৰী বিভাগটোৰ অকৰ্মন্যতাৰ বাবেই জিলা খনৰ কঠিয়াতলী বিশুদ্ধ খোৱাপানী যোগান আঁচনি,কন্দলী বিশুদ্ধ খোৱাপানী যোগান আঁচনি,নিবুকালি বিশুদ্ধ খোৱাপানী যোগান আঁচনি,পূৱ আমৰাকান্দা বিশুদ্ধ খোৱাপানী যোগান আঁচনি,গড়াজান বিশুদ্ধ খোৱাপানী যোগান আঁচনি,বৰপেটা বিশুদ্ধ খোৱাপানী যোগান আঁচনি,গেৰুৱাটী বিশুদ্ধ খোৱাপানী যোগান আঁচনি,মাহেৰীপাৰ বিশুদ্ধ খোৱাপানী যোগান আঁচনি, কছাৰী গাঁও বিশুদ্ধ খোৱাপানী যোগান আঁচনি, পশ্চিম ফুটলঝাৰ বিশুদ্ধ খোৱাপানী যোগান আঁচনি, পশ্চিম ফুটলঝাৰ বিশুদ্ধ খোৱাপানী যোগান আঁচনি,উত্তৰ ফুটলঝাৰ বিশুদ্ধ খোৱাপানী যোগান আঁচনি,উত্তৰ খাটোৱাল বিশুদ্ধ খোৱাপানী যোগান আঁচনি, দক্ষিণ খাটোৱাল বিশুদ্ধ খোৱাপানী যোগান আঁচনি,তিনিচুকীয়া বিশুদ্ধ খোৱাপানী যোগান আঁচনি,কাৱৈমাৰী বিশুদ্ধ খোৱাপানী যোগান আঁচনি,আউনিআটী সত্ৰ বৰবাৰী বিশুদ্ধ খোৱাপানী যোগান আঁচনি, বামুণী শুকাণজুৰী বিশুদ্ধ খোৱাপানী যোগান আঁচনি, জামুগুৰি বিশুদ্ধ খোৱাপানী যোগান আঁচনি, ভেকুলী গৰুবাট বিশুদ্ধ খোৱাপানী যোগান আঁচনি,পূৱ শালমৰা বিশুদ্ধ খোৱাপানী যোগান আঁচনি প্ৰমুখ্যে জিলা খনৰ বিভিন্ন অঞ্চলৰ শতাধিক বিশুদ্ধ পানীযোগান আঁচনি সুদীৰ্ঘ দিন ধৰি বিকল হৈ আছে।যাৰ ফলত  সংশ্লিষ্ট অঞ্চলৰ গঞা ৰাইজে এটুপি বিশুদ্ধ খোৱাপানীৰ বাবেও চৰম দুৰ্ভোগ ভুগিব লগা হৈছে । সংশ্লিষ্ট অঞ্চলৰ সেই পানী যোগান আঁচনি সমূহ বিকল হৈ থকা এবছৰৰ পৰা ১০বছৰ পৰ্যন্ত হ’ল।জনস্বাস্থ্য কাৰিকৰী বিভাগৰ সংশ্লিষ্ট সংমণ্ডল সমূহে বিকল হৈ থকা পানী যোগান আঁচনি সমূহ মেৰামতি কৰি সক্ৰিয় কৰি নোতোলাত সেই পানী যোগান আঁচনি সমূহৰ এলেকাধীণ শ শ গাঁৱৰ ৰাইজে দমকল,কঁৱা, কেঁচা কুঁৱা, পুখুৰী, সুঁতি,নদী আদিৰ দূষিত পানীকে সেৱন কৰি থাকিব লগীয়া হৈছে।এই দূষিত পানী সেৱন কৰি থকাৰ বাবে সেই অঞ্চলৰ ৰাইজে বিভিন্ন ৰোগত আক্ৰান্ত হোৱাও পৰিলক্ষিত হৈছে।কঠিয়াতলী, কামপুৰ,কলিয়াবৰৰ বিভিন্ন অঞ্চলৰ ৰাইজে ফ্ল’ৰাইড যুক্ত দূষিত পানী সেৱন কৰি থকাৰ ফলত মাৰাত্মক ফ্ল’ৰচিছ ৰোগত আক্ৰান্ত হৈ মৃত্যুৰ সৈতে যুঁজি থাকিব লগীয়া হৈছে।  উল্লেখ্য যে,জনস্বাস্থ্য কাৰিকৰী নগাঁও চক্ৰৰ অধীণস্থ আটাই কেইটা সংমণ্ডলেই ৰাষ্ট্ৰীয় গ্ৰাম্য খোৱা পানী যোগান আঁচনি, আঁচনিৰ তত্বাবধান আৰু মেৰামতি,খোৱাপানী বিশুদ্ধিকৰণ, বীজাণুমুক্তকৰণ,ইন্ধন,কেমিকেল আদিৰ বাবদ প্ৰতি বছৰেই কোটি কোটি টকাৰ আবন্টন লাভ কৰি আহিছে। তৎসত্বেও জিলা খনৰ বিভিন্ন প্ৰান্তত শতাধিক বিশুদ্ধ খোৱাপানী যোগান আঁচনি বিকল হৈ থকাটো অতি চিন্তনীয় বিষয়। বিশুদ্ধ খোৱাপানী যোগান আঁচনি সমূহ সক্ৰিয় কৰি ৰাখিবলৈ চৰকাৰে বিভিন্ন আঁচনিৰ বিপৰীতে প্ৰতিটো বৰ্ষতে জলস্বাস্থ্য কাৰিকৰী বিভাগৰ সংমণ্ডল সমূহক কোটি কোটি টকাৰ আবন্টন দি আহিছে যদিও সেই ধনৰ ওপৰত অবাধ লুন্ঠন চলাই থকাৰ পৰিপ্ৰেক্ষিততেই জিলা খনৰ গঞা ৰাইজৰ বাবে এতিয়াও এটুপি বিশুদ্ধ খোৱাপানী দুৰ্লভ হৈ আছে। নগাঁৱৰ বিভিন্ন অঞ্চলৰ ৰাইজে এটুপি বিশুদ্ধ খোৱাপানীৰ‌ বাবে‌ হাঁহাকাৰ কৰি ফুৰিব লগীয়া হ’লেও জনস্বাস্থ্য কাৰিকৰী নগাঁও সংমণ্ডলে কেতবোৰ আঁচনিৰ লগতে ৰাষ্ট্ৰীয় গ্ৰাম্য খোৱাপানী আঁচনিৰ (এন আৰ ডি ডব্লিউ পি)অধীণত প্ৰতিটো বিত্তীয় বৰ্ষতে কোটি কোটি টকা আৱন্টন লাভ কৰি আহিছে আৰু সংমণ্ডলটোৱেও আবন্টিত সমূদায় ধন গ্ৰাম্যাঞ্চলৰ ৰাইজক বিশুদ্ধ খোৱাপানী যোগান ধৰাৰ নামত বিভিন্ন খোৱাপানী যোগান আঁচনিৰ কামত ব্যয় কৰি অহা বুলি বিভাগীয় নথিত উল্লেখ কৰি আহিছে। তৎসত্বেও জনস্বাস্থ্য কাৰিকৰী সংমণ্ডলটোৰ অধীণস্থ নগাঁও জিলাৰ বহু অঞ্চলৰ হেজাৰ হেজাৰ লোকে আজিও এটুপি বিশুদ্ধ খোৱা পানীৰ বাবে হাঁহাকাৰ কৰি ফুৰিব লগীয়া হোৱাটো অতি দুৰ্ভাগ্যজনক বিষয়। বিশেষকৈ জিলা খনৰ ৰহা, কামপুৰ,কঠিয়াতলী, বঢ়মপুৰ, বামুণী, পুৰণিগুদাম,ৰূপহী,জুৰীয়া প্ৰমুখ্যে বিভিন্ন অঞ্চলৰ বহু গাঁৱত এতিয়াও বিশুদ্ধ খোৱাপানী ৰাইজৰ বাবে দুৰ্লভ হৈ আছে।জিলা খনৰ গঞা ৰাইজে এতিয়াও এটুপি বিশুদ্ধ খোৱাপানীৰ বাবে হাহাঁকাৰ কৰি ফুৰিব লগীয়া হৈছে যদিও বিশুদ্ধ খোৱাপানী যোগান আঁচনিৰ বিপৰীতে আবন্টিত ধনৰে অভিযন্তা,সহকাৰী কাৰ্যবাহী অভিযন্তা,কণিষ্ঠ অভিযন্তা,গুদাম ৰক্ষক,ঠিকাদাৰ সকল ঠিকেই সৱল হোৱা পৰিলক্ষিত হৈছে।

আজি মৰিগাঁও জিলাৰ ভূৰাগাঁও থানাত দিনৰ ১০.১৫ মিনিটত উপস্থিত হয় মাননীয় অসমৰ মুখ্যমন্ত্ৰী হিমন্ত বিশ্ব শৰ্মা ডঙৰীয়া। মূখ্যমন্ত্ৰী গৰাকীৰ লগতে উপস্থিত থাকে অসম আৰক্ষীৰ সঞ্চালকপ্ৰধান ভাষ্কৰ জ্যোতি মহন্ত,সাংসদ তথা বিজেপিৰ ৰাষ্ট্ৰীয় সম্পাদক দিলীপ শইকীয়া। মৰিগাঁও জিলাৰ ভূৰাগাঁও থানা অন্তৰ্গত বালিডোংগা গাঁৱৰ পথাৰৰ মৰাপাট খেতিত উদ্ধাৰ হৈছিল ৯ বছৰীয়া শিশুটিৰ মৃতদেহ। মৃত কিশোৰী গৰাকী নাম ছুমি আনছাৰী। যোৱা ২০জুন দেওবাৰে কোনো অচিনাক্ত লোকে ধৰ্ষণ কৰি মৰাপাট খেতিত নিশংস ভাৱে হত্যা কৰিছিল শিশুটিক। আজি শিশুটিৰ পৰিয়ালৰ কাষত উপস্থিত মূখ্যমন্ত্ৰী হিমন্ত বিশ্ব শৰ্মা। মূখ্যমন্ত্ৰী গৰাকীয়ে ভূৰাগাঁও আৰক্ষী থানাত উপস্থিত  হৈ হত্যাকাণ্ডৰ বলি হোৱা কণমাণি শিশুৰ পিতৃ-মাতৃৰ লগত আলোচনাত মিলিত হৈ ঘটনা সন্দৰ্ভত বুজ লোৱাৰ লগতে শোকসন্তপ্ত পৰিয়ালটিক সমবেদনা জ্ঞাপন কৰে।এক প্ৰশ্নৰ উত্তৰত মন্ত্রী গৰাকীয়ে কয় যে যোৱা কালি লাহৰীঘাটৰ কাঠনিত সংঘটিত হোৱা ৮ বছৰীয়া কন্যা শিশুৰ ধৰ্ষণকাৰীৰ আচামীক কৰায়ত্ত কৰা হৈছে। 

 চিৰিয়েল কিলাৰ হিচাপে পৰিগণিত হোৱা অসম আৰক্ষীৰ মষ্ট ৱাণ্টেড বুবু কোঁৱৰক পৰহি অসম আৰক্ষীয়ে অসম নাগালেণ্ড সীমান্তবৰ্তী গেলেকী দেওপানী সমীপৱৰ্তী অঞ্চলত গুলীয়াই হত্যা কৰা ঘটনাৰ প্ৰতিক্ৰিয়া বৰ্তমানেও অব্যাহত আছে। বিগত দুই দলকৰো অধিক কাল ৰাজ্যত ৪২ টাকৈ হত্যাৰ সৈতে জড়িত ” জল্লাদ” ৰূপী বুবু কোঁৱৰ জড়িত আছিল একাধিক অপৰাধজনিত ঘটনাত। ড্ৰাগছৰ সৰবৰাহৰপৰা, নিষিদ্ধ ঘোষিত সংগঠনলৈ মাৰণাস্ত্ৰ যোগান, গাড়ী চুৰি, ডকাইতি আদিৰ দৰে ঘটনাৰে অসম আৰক্ষীৰ বাবে মূৰৰ কামোৰণি সদৃশ হৈ পৰা বুবু কোঁৱৰে শেহতীয়াকৈ “পংখী” নামৰ এগৰাকী যুৱতীৰ সহযোগত উজনিত চলাই গৈছিল হানী ট্ৰেপিঙৰ জাল।কুখ্যাত অপৰাধী বুবু কোঁৱৰ অসম আৰক্ষীৰ এনকাউন্টাৰত নিহত হোৱাৰ পিছতেই বহু ভুক্তভগী পৰিয়ালে ন্যায় পোৱা বুলি অনুভৱ কৰিছে। সমগ্ৰ অসমৰ লগতে জন্মস্থান শিৱসাগৰ জিলাতো বুবুৰ  অপৰাধৰ তালিকা দীঘলীয়া। আমগুৰি ব্লক কংগ্ৰেছৰ সাধাৰণ সম্পাদক তথা  আঞ্চলিক পঞ্চায়তৰ সভাপতি , হালোৱাটিং আৰক্ষী থানাৰ অন্তৰ্গত নামতি নতুন লুণপুৰীয়াৰ নিবাসী হেমন্ত বৰুৱাক ২০০৮ চনৰ ২৯ জুলাইত হত্যা কৰা ঘটনাৰ মূল অভিযুক্ত আছিল বুবু কোঁৱৰ ।পত্নী বিমি বৰুৱাৰ সন্মুখতে নৃশংসভাৱে গুলিয়াই হত্যা কৰিছিল বুবু কোঁৱৰে ।এই হত্যাকাণ্ডত বুবু কোঁৱৰে ২ লাখ টকা চুপাৰি লৈ গুলীয়াই হত্যা কৰা বুলি অভিযোগ উঠিছিল।যোৱা ১৩ বছৰে হেমন্ত বৰুৱা পৰিয়ালে ন্যায় লাভ নকৰিলে যদিও মূল হত্যাকাৰী অৱশেষত আৰক্ষীৰ গুলীত মৃত্যু হয়। এই মৃত্যুত পৰিয়ালটোৱে ন্যায় পোৱা বুলি প্ৰকাশ কৰে। ইফালে ২০০৩ বৰ্ষত শিৱসাগৰ জিলাৰ গেলেকী দোলাকাষৰীয়াৰ ডিম্বেশ্বৰ কোঁৱৰৰ ঘৰত বুবুৱে সংঘটিত কৰা লোমহৰ্ষক ডকাইতি কাণ্ডৰ কথা সোঁৱৰি পৰিয়ালটোৱে এতিয়াও শিহৰিত হৈ উঠে। ডিঙিত ডেগাৰ আৰু বন্দুক লগাই বুবু কোঁৱৰে ডিম্বেশ্বৰ কোঁৱৰৰ ঘৰৰপৰা এখন গাড়ী, টিভি আৰু নগদ ধন লুটি নিছিল। আনকি ডিম্বেশ্বৰ কোঁৱৰৰ পুত্ৰকো অপহৰণৰ চেষ্টা চলাইছিল দূধৰ্ষ বুবুৱে। অৱশেষত আৰক্ষীৰ গুলীত অপৰাধ জগতৰ অঘোষিত সম্ৰাটস্বৰূপ বুবু কোঁৱৰৰ মৃত্যুত স্বস্তি অনুভৱ কৰিছে ভূক্তভোগী সকলে। ইফালে অসম আৰক্ষীয়ে নাগালেণ্ডৰ দিশৰপৰা ড্ৰাগছ আৰু মাৰণাস্ত্ৰ সহ আহি থকা অৱস্থাত বাটত ভেটাভেটি হৈ ৰখাবলৈ চেষ্টা কৰাত বুবুৱে অসম আৰক্ষীক আক্ৰমণ কৰাত উক্ত আক্ৰমণৰ প্ৰত্যুত্তৰ দিয়াত বুবু নিহত হয় বুলি সদৰী কৰিলেও এইয়া এক পৰিকল্পিত হত্যাকাণ্ড বুলি অভিযোগ কৰিছে বুবুৰ পিতৃ লোহিত কোঁৱৰে। পিতৃৰ ভাস্য অনুসৰি জেলৰপৰা ওলাই বিগত এটা মাহ আমগুৰিৰ ৰতনপুৰীয়াৰ নিজা বাসগৃহতে আছিল বুবু। পৰহি বিয়লি ৩ বজাত কোনো অজ্ঞাত লোকে ফোন কৰি বুবুক মাতি পঠিওৱাত ঘৰত কাম কৰা এজন  যুৱকৰ স্কুটীখন লৈয়েই ওলাই গৈছিল। পিতৃৰ অভিযোগ অনুসৰি ঘৰৰপৰা মাতি নি পৰিকল্পিতভাৱে হত্যা কৰা হৈছে তেওঁৰ পুত্ৰক। অৱশ্যে বুবুৰ মৃত্যুৰ বাতৰিয়ে হাঁহি বিৰিঙাইছে বুবুৰ ত্ৰাসৰ বলি হোৱা অসংখ্যজনৰ মুখত।কত গল বুবুৰ আনজন সহযোগী? : -ইফালে এম্বুচৰ সময়ত বুবুৰ সৈতে স্কুটীত আৰু এজন যুৱক প্ৰতক্ষ্য কৰা বুলি অসম আৰক্ষীয়ে সদৰী কৰিছে যদিও আনজন সহযোগী কত গল বা কোন আছিল সেইয়া এতিয়াও জানিব পৰা হোৱা নাই। আৰক্ষীয়ে গুলীয়াগুলিৰ সময়তে বুবুৰ সহযোগী জন পলাই যোৱাৰ সন্দেহ প্ৰকাশ কৰিছে। বৰ্তমানে সহযোগী জনক বিচাৰি আৰক্ষীয়ে অভিযান অব্যাহত ৰাখিছে।