“তোমাৰ বিয়াৰ নিমন্ত্ৰণী পত্ৰ পাইছো, অনামিকা দুৱৰা” আদি জনপ্ৰিয় কবিতাৰ স্ৰষ্টা যুৱ প্ৰজন্মৰ জনপ্ৰিয় কবি পল শেনচোৱাৰ কালি ৩৭ বছৰ বয়সত অকাল মৃত্যুক সাৱটি লয়। কালিৰ পৰা পেটৰ বিষত আক্ৰান্ত কবি জনৰ স্বাস্থ্যৰ আকস্মিক অৱনতি ঘটাত কালি পৰিয়ালৰ লোকে ডিব্ৰুগড়ৰ সৃষ্টি নাৰ্চিং হোমত ভৰ্তি কৰায় যদিও নিশা ৮ বজাত ডিব্ৰুগড়তে শেষ নিশ্বাস ত্যাগ কৰে। এসময়ত জনপ্ৰিয় আলোচনী, “মায়া” ৰ সহ সম্পাদকৰ দ্বায়িত্ব পালন কৰা শেনচোৱাৰ বহু কবিতা জনপ্ৰিয় কন্ঠশিল্পী জুবিন গাৰ্গে আবৃত্তি কৰিছিল। বিশেষকৈ তোমাৰ বিয়াৰ নিমন্ত্ৰণী পত্ৰ পাইছো, অনামিকা দুৱৰাৰ সতে মোৰ অন্তিম আলাপ ইত্যাদি কবিতাই ৰাজ্যজুৰি বিশেষ সমাদৰ লাভ কৰিবলৈ সক্ষম হৈছিল। গড়গাঁও মহাবিদ্যালয়ৰ অৱসৰপ্ৰাপ্ত অধ্যাপক তুলসী শেনচোৱাৰ একমাত্ৰ পুত্ৰ পল শেনচোৱাই মৃত্যুৰ সময়ত পিতৃ মাতৃ আৰু পত্নীক ইহ সংসাৰত এৰি থৈ গৈছে। জনপ্ৰিয় কবিজন যকৃতৰ জটিল ৰোগত আক্ৰান্ত হৈছিল বুলি পৰিয়ালৰ লোকে জানিবলৈ দিছে।

নাজিৰা আদৰ্শ আৰক্ষী থানাৰ অন্তৰ্গত সাতচৈ গ্ৰান্ট বৰচাপৰিত পৰহি  বিয়লি  পিতৃ আৰু কন্যাৰ অৰ্দ্ধগলিত মৃতদেহৰ উদ্ধাৰৰ এক কৰুণ আৰু বিভৎস ঘটনাই সমগ্ৰ নাজিৰা মহকুমাতে তীব্ৰ প্ৰতিক্ৰিয়াৰ সৃষ্টি কৰিছে । কালি গধূলি ঘটনাৰ বিষয়ে  নাজিৰা আদৰ্শ আৰক্ষী থানা অৱগত হৈ ঘটনা স্থলীত উপস্থিত হয় । ঘটনাৰ বিৱৰণি মতে বিহাৰী বাক্তি (৫১) নামৰ লোকজনে বৰফুকন গাঁঁও পঞ্চায়তৰ  সাতচৈ গ্ৰান্ট বৰচাপৰি এলেকাত নিজে এডোখৰ মাটি বাচি লৈ এটি নৰাৰ জুপুৰী সাজি লৈ কন্যাৰ সৈতে বসবাস কৰি আহিছিল আৰু জীৱিকা হিচাপে অনিয়মীয়াকৈ হাজিৰা কাম কৰি পেট প্ৰৱৰ্তাইছিল । সততে স্থানীয় লোকৰ সৈতে সংস্পৰ্শ নাৰাখি দূৰে দূৰে কাম কৰি ফুৰা লোকজনৰ কন্যা দেৱান্তী বাক্তি (১৪)য়েও এনেদৰে কিবা-কিবি কামত ঘূৰি ফুৰিছিল ।  পৰহি বিয়লি স্থানীয় লোকে হঠাৎ বিহাৰী বাক্তি আৰু দেৱান্তী বাক্তিৰ বাসগৃহটোৰ পৰা বিভৎস গোন্ধ ভাঁহি অহাৰ লগতে জুপুৰীটোৰ দুৱাৰত অজস্ৰ মাখিৰ সমাহাৰ দেখি সন্দেহত নাজিৰা আৰক্ষীক অৱগত কৰে । আত্মহত্যা বুলি সন্দেহ কৰা হোৱা ঘটনাত পিতৃৰ ওলমি থকা, মৃতদেহৰ কাষতে ১৪ বছৰীয়া কন্যাৰ মৃতদেহটো পৰি ৰৈছিল । জয়সাগৰস্থ শিৱসাগৰ অসামৰিক চিকিৎসালয়ত মৃতদেহৰ মৰণোত্তৰ পৰীক্ষা কৰাৰ পাছত ৰাইজৰ দ্বাৰা কাৰ্য্যবাহী দণ্ডাধীশৰ উপস্থিতিত সমাধিস্থ কৰা হয় । এই ঘটনাই সমগ্ৰ নাজিৰাতে তীব্ৰ প্ৰতিক্ৰিয়া সৃষ্টি কৰাৰ লগতে ক্ৰমাৎ লকডাউন অভিমুখে গতি কৰা পৰিস্থিতিত এচাম লোকৰ দুবেলা দুমুঠি আহাৰ যোগাৰ  হোৱাটো যে বন্ধ হৈ পৰিব সেয়া এক চিন্তনীয় বিষয় হৈ পৰিছে । স্থানীয় লোকৰ ভাষ্যমতে পূৰ্বতে নাজিৰাৰ ভিতৰুৱা অঞ্চল ধোবাবিলৰ ওচৰত বসবাস কৰা বিহাৰী বাক্তিয়ে বসবাস কৰা ভূমি বিক্ৰী কৰি পোনৰ বৰচাপৰিত থিতাপি লৈছিল । অৰুণোদয়, চৰকাৰী ৰেচন কাৰ্ড আদিৰ কোনো সুবিধা নোহোৱা অৱস্থাত পিতৃ-কন্যাই বহু সময়ত নিয়মীয়া খাদ্য খাবলৈ নেপাইছিল । স্থানীয় লোকে অভাৱ আৰু দাৰিদ্ৰ্যৰ বাবেই এই আত্মহত্যৰ ঘটনা সংঘটিত হোৱা বুলি সন্দেহ প্ৰকাশ কৰিছে ।