দাবী কৰা ধন নিবলৈ আহি   যোৱা কালি  শনিবাৰে  লাহৰীঘাটত আটক হ’ল নিউজ পৰ্টেলৰ গুৱাহাটীৰ দুই সাংবাদিক। লাহৰীঘাটত পঞ্চায়ত সভানেত্ৰীৰ পৰা টকা নিবলৈ গুৱাহাটীৰ পৰা আহিছিল দুই  সাংবাদিক। নিউজ পৰ্টেল ” নিউজ 30 ” ৰ এই দুই সাংবাদিক হৈছে পৰ্টেলটোৰ সহকাৰী সম্পাদক ৰমেন বৰা আৰু অনুপ কলিতা।শনিবাৰে সুদূৰ গুৱাহাটীৰ পৰা এই দুই সাংবাদিকে লাহৰীঘাটৰ কুশতলিলৈ আহিছিল লাহৰীঘাটৰ কাঠনি গাঁও পঞ্চায়তৰ সভানেত্ৰী ৰৌজলীন ফাৰুকীৰ পৰা দাবী কৰা ধন।উল্লেখ্য যে গাঁও পঞ্চায়তখনত দুৰ্নীতিৰ হোৱা অভিযোগত  টকা দাবী কৰি নিবৰ বাবে আহোতেই  লাহৰীঘাটৰ আৰক্ষীয়ে যোৱা কালি   শনিবাৰে আবেলি কুশতলিৰ দুই স্বয়ম্ভূ সাংবাদিকক গ্ৰেপ্তাৰ কৰে।লগতে তেওঁলোকে লৈ অহা  AS 01D-S 8794 নম্বৰৰ পালচা বাইকখন জব্দ কৰে।অভিযোগ মতে, যোৱা কিছু দিনৰ পৰা সহকাৰী সম্পাদক ৰমেন বৰাই ফোন যোগে সভানেত্ৰী গৰাকীক হাৰাশাস্তি কৰি আহিছে। ইফালে আটকাধীন সাংবাদিক দুজনে দুই লাখ টকা দাবী কৰা অভিযোগ তুলি  সভানেত্ৰী গৰাকীয়ে লাহৰীঘাট থানাত এজেহাৰ দাখিল কৰিছে। 

গোৱালপাৰা জিলাৰ গোৱালপাৰা সদৰ বনাঞ্চলিকৰ বন বিষয়া শান্তনা মেধিৰ নেতৃত্বত চলা এটাৰ পিছত এটা সফল অভিযানে অঞ্চলটোৰ বন ধংসকাৰী কাঠ মাফিয়াৰ নিদ্ৰা হৰণ কৰিছে। ঘটনাৰ বিবৰণি মতে যোৱা নিশা ৯:৩০ মান বজাত আগিয়া আৰক্ষী চকীৰ ভাৰপ্ৰাপ্ত আৰক্ষী বিষয়া সঞ্জয় আনন্দ মুছাহাৰী আৰু গোৱালপাৰা সদৰ বনাঞ্চলিকৰ বন বিষয়া শান্তনা মেধিৰ নেতৃত্বত বনকৰ্মীৰ দল আৰু অগিয়া আৰক্ষীৰ দলে এক গোপন সুত্ৰৰ পম খেদি বনাঞ্চলত অভিযান চলাই গৰাই মাৰী বনাঞ্চলত বহু পৰিমাণৰ মুল্যৱান কাঠৰ কুণ্ডা সহ এখন অৱৈধ কাঠফলা মিল জব্দ কৰিবলৈ সক্ষম হয়। উল্লেখ্য যে মিলত গছ কাটি থকাৰ সময়তে বনআৰক্ষীৰ উমান পাই ঘটনাস্থলীৰ পলাই সাৰিবলৈ সক্ষম হয় দুৰ্বিত্তৰ দল টোয়ে। জব্দকৃত কাঠৰ কুণ্ডা খিনি ইতিমধ্যে গোৱালপাৰা সদৰ বনাঞ্চলিক কাৰ্যালয় লৈ আনে বন কৰ্মীয়ে।কাঠ খিনিৰ আনুমানিক বজাৰত মুল্য ১’৫০.০০০ টকা হ’ব।এনেকৈয়ে এচাম কাঠ মাফিয়াই বন ধংসৰ যজ্ঞ চলাই আহিছে ৷হিমন্ত বিশ্ব শৰ্মাৰ নেতৃত্বাধীন চৰকাৰ খনে পৰিবনে নাকী লগাব সেই সকল দুস্ক্‌তিকাৰিক?গোৱালপাৰা সদৰ বনাঞ্চলিক বন বিষয়া শান্তনা মেধি ,আৰক্ষী বিষয়া সঞ্জয় আনন্দ মুছাহাৰী, আৰু উপ আৰক্ষী বিষয়া পূৰ্ণ দাসৰ এই সফল অভিযানত ভূয়সী প্ৰশংসা কৰিছে অঞ্চলটোৰ সচেতন মহলে।

মুখ্যমন্ত্ৰী হিচাপে দায়িত্ব লোৱাৰ পিছত পোনপ্ৰথমবাৰৰ বাবে ধেমাজি জিলাৰ গোগামুখলৈ আহিব মুখ্যমন্ত্ৰী ডাঃ হিমন্ত বিশ্ব শৰ্মা ৷ তেওঁ গোগামুখ চেতিয়া গাঁৱত  মিচিং স্বায়ত্তশাসিত পৰিষদৰ দ্বাৰা নিৰ্মিত অভিলাষী অতিথিশালা উদ্বোধন কৰিব আৰু বিধায়ক ছিগনেশ্বাৰ পূঁজিৰে নিৰ্মাণ হৈ থকা বহুমুখী  দক্ষতা বিকাশ প্ৰকল্পটো পৰিদৰ্শন কৰিব ৷
 মিচিং স্বায়ত্তশাসিত পৰিষদৰ মুখ্য কাৰ্যবাহী সদস্য পৰমানন্দ ছায়েঙ্গীয়াই জনোৱা মতে গোগামুখ চেতিয়া গাঁৱত অৱস্থিত অতিথিশালাটো  ১.৬৯ কোটি পূঁজিৰে নিৰ্মাণ কৰা হৈছে ৷  বহুমুখী দক্ষতা বিকাশ প্ৰকল্পটো ১০ কোটি টকাৰে নিৰ্মাণ কৰি থকা হৈছে আৰু উক্ত নিৰ্মাণ কাৰ্য  বিগত বৰ্ষৰ ধেমাজি বিধানসভা সমষ্টিৰ বিধায়ক উন্নয়ন পূঁজিৰ ধনেৰে নিৰ্মাণ কৰা হৈছে ৷
ছায়েঙ্গীয়াই জনোৱা মতে, প্ৰায় ৪০০ গৰাকী -যুৱক-যুৱতীয়ে একে সময়তে বিভিন্ন বিষয়ত প্ৰশিক্ষণ ল’ব পৰাকৈ নিৰ্মাণ কৰা উক্ত কেন্দ্ৰটি অহা ডিচেম্বৰ মাহত ৰাইজক অৰ্পণ কৰিব ৷  কালিৰ অনুষ্ঠানত উপস্থিত থাকিিব শিক্ষা আৰু ভৈয়াম জনজাতি আৰু অন্যান্য পিছপৰা শ্ৰেণীৰ উন্নয়ন দপ্তৰৰ মন্ত্ৰী ডাঃ ৰণোজ পেগু,  লখিমপুৰ আৰু ধেমাজি জিলাৰ  অভিভাৱক মন্ত্ৰী  সঞ্জয় কিষান, লখিমপুৰ লোকসভা সমষ্টিৰ  সাংসদ  প্ৰদান বৰুৱা, ঢকুৱাখনা বিধানসভা সমষ্টিৰ বিধায়ক নৱকুমাৰ দলে, জোনাই বিধান সভা সমষ্টিৰ বিধায়ক ভুৱন পেগু, লখিমপুৰ বিধানসভা সমষ্টিৰ বিধায়ক  মানৱ ডেকা ৷ তদুপৰি মুখ্য কাৰ্যবাহী সদস্য ছায়েঙ্গীয়াই জনাইছে যে কাইলৈ বিশ্ব যোগ দিৱস উপলক্ষ্যে মিচিং স্বায়ত্তশাসিত পৰিষদৰ উদ্যোগত আৰু ৰুদ্ৰাক্ষ যোগ কেন্দ্ৰৰ সহযোগত গোগামুখ আবতানি লত্তাত বিশ্ব যোগ দিৱস ক’ভিড প্ৰট’কল মানি পালন কৰিব আৰু পৰিষদৰ অধ্যক্ষ, কাৰ্যবাহী, সাধাৰণ সদস্য, বিষয়া উপস্থিত থাকিব ৷

কলাগুৰু বিষ্ণুপ্ৰসাদ ৰাভা দেৱৰ পবিত্ৰ মৃত্যু তিথিত তেখেতৰ সমাধিত শ্ৰদ্ধাঞ্জলি জ্ঞাপন কৰিছে কলাগুৰুৰ জেষ্ঠ পুত্ৰ তথা তেজপুৰ সমস্তিৰ সন্মানীয় বিধায়ক পৃথ্বীৰাজ ৰাভাই। লগতে সহযোগ কৰিছে শোণিতপুৰ জিলাৰ উপায়ুক্ত ভূপেন চন্দ্ৰ দাসে।

শোণিতপুৰ জিলাৰ বৰছলা বিধানসভা সমষ্টিৰ অন্তৰ্গত ঢেকীয়াজুলি ৰাজহ চক্ৰ এলেকাৰ বালিজানত কৃষক শ্ৰমিক সুৰক্ষা সংগ্ৰাম সমিতিয়ে তীব্ৰ প্ৰতিবাদ সাব্যস্ত কৰে ৷শিঙৰীৰ পৰা ভঙামন্দিৰলৈ যোৱা অতিকৈ গুৰুত্বপূৰ্ণ পথত বালিজানত থকা ভগা দলং নিৰ্মাণৰ দাবীত সংগঠনটোৰ সীমিত সংখ্যক সদস্যই চৰকাৰৰ নীতি নিৰ্দেশনা মানি সামাজিক দুৰত্ব বৰ্তাই ৰাখি তীব্ৰ প্ৰতিবাদী কাৰ্যসূচী ৰূপায়ণ কৰে৷ কৃষক শ্ৰমিক সুৰক্ষা সংগ্ৰাম সমিতি অসমৰ সভাপতি প্ৰশান্ত বৈশ্যৰ নেতৃত্বত সংগঠনটোৰ কৰ্মকৰ্তা সকলে চৰকাৰে নিৰ্বাচনৰ পূৰ্বে দিয়া প্ৰতিশ্ৰুতি পালন কৰক,শিঙৰীৰ পৰা ভঙামন্দিৰলৈ যোৱা সংযোগী পথৰ বালিজানত থকা ভগা দলং  নিৰ্মাণৰ ব্যৱস্থা কৰক,বালিজানত থকা পকী দলং নিৰ্মাণত দুৰ্নীতি সংগঠিত কৰা জয়চোৱাল উপাধিৰ ঠিকাদাৰগৰাকীক গ্ৰেপ্তাৰ কৰক,ৰাজ্যৰ অন্যান্য প্ৰান্তৰ প্ৰতিটো জৰাজীৰ্ণ ভগা দলং নিৰ্মাণৰ ব্যৱস্থা কৰক,বিধায়ক গনেশ কুমাৰ লিম্বু হায় হায়,গনেশ কুমাৰ লিম্বু মুৰ্দাবাদ,সাংসদ পল্লৱ লোচন দাসৰ কাম নাই,অসম চৰকাৰৰ কাম নাই,কৃষক শ্ৰমিক সুৰক্ষা সংগ্ৰাম সমিতি জিন্দাবাদ আদি বিভিন্ন শ্ল’গান দি তীব্ৰ প্ৰতিবাদ সাব্যস্ত কৰে৷প্ৰতিবাদস্থলীত কৃষক শ্ৰমিক সুৰক্ষা সংগ্ৰাম সমিতি অসমৰ সভাপতি প্ৰশান্ত বৈশ্যই কেন্দ্ৰীয় তথা ৰাজ্যৰ মিত্ৰজোঁটৰ চৰকাৰৰ বিৰুদ্ধে অসন্তুষ্টি প্ৰকাশ কৰি তীব্ৰ ভাষাৰে সমালোচনা কৰে৷কৃষক শ্ৰমিক নেতা প্ৰশান্ত বৈশ্যই চৰকাৰৰ বিৰুদ্ধে ক্ষোভ উজাৰি কয় বৰ্তমানৰ মিত্ৰজোঁটৰ ৰাজ্য চৰকাৰৰ কথা আৰু কামৰ মাজত সামান্যতমো মিল নোহোৱা হৈছে৷ৰাজ্যত এতিয়া মিছা প্ৰতিশ্ৰুতিৰ বন্যা বোৱাই একাংশ দুৰ্নীতিপৰায়ণ ঠিকাদাৰক তোষামোদ কৰি ফাকি ফোকাৰ্ আশ্ৰয় লৈ এখন মেৰুদণ্ডহীন চৰকাৰ চলিছে৷প্ৰশান্ত বৈশ্যই লগতে কয় যি সময়ত চৰকাৰখনে গ্ৰামাঞ্চলৰ প্ৰতিখন বাটপথৰ লগতে জৰাজীৰ্ণ দলং সমূহ নিৰ্মাণ কৰা হৈছে বুলি একাংশ সংবাদ মাধ্যমত মিছা ঢাক-ঢোল বজাই ফুৰিছে তেনে সময়তে শিঙৰীৰ পৰা ভঙামন্দিৰলৈ যোৱা অতিকৈ গুৰুত্বপূৰ্ণ পথছোৱাৰ মধ্যভাগত  বালিজানত থকা পকী ভগা দলংখন আজিলৈকে নিৰ্মাণৰ ব্যৱস্থা নকৰা কাৰ্যই চৰকাৰৰ বাট-পথৰ লগতে দলং নিৰ্মাণৰ ক্ষেত্ৰত গ্ৰহণ কৰা পদক্ষেপৰ প্ৰকৃত জিয়া ছবিখন পোহৰলৈ আহিছে৷লগতে কৃষক শ্ৰমিক নেতা প্ৰশান্ত বৈশ্যই কয় বৰছলা বিধানসভা সমষ্টিৰ অন্তৰ্গত শিঙৰীৰ পৰা ভঙামন্দিৰলৈ যোৱা পথটোৰে এলেকাটোৰ কেইবাটাও গাৱঁৰ হেজাৰ হেজাৰ লোকে অহাযোৱা কৰে যদিও দুবছৰ মানৰ পূৰ্বে কেইবা লক্ষাধিক টকা ব্যয় সাপেক্ষে বালিজানত  নিৰ্মাণ কৰা পকী দলংখন বিগত কিছুদিনৰ পূৰ্বেই মধ্যভাগত প্ৰকাণ্ড গাতৰ সৃষ্টি হৈছে৷ফলত পথচাৰীয়ে অহাযোৱা কৰাৰ অৱস্থাত উক্ত দলঙৰ মধ্যভাগত সৃষ্টি হোৱা গাতত পৰি আঘাতপ্ৰাপ্ত হৈ চিকিৎসাধীন হৈছে৷কিন্তু ইমানৰ পিচতো আজিলৈকে বালিজানস্থিত ভাঙি থকা দলংখন  মেৰামতিৰ ব্যৱস্থা কৰা হোৱা নাই বুলি কৃষক শ্ৰমিক নেতা প্ৰশান্ত বৈশ্যই আক্ষেপ প্ৰকাশ কৰে৷সমষ্টিটোৰ বিধায়কৰ আশিষধন্য জয়চোৱাল উপাধিৰ ঠিকাদাৰগৰাকীয়ে নিম্নমানৰ সামগ্ৰী আৰু অতি পাতল ৰড ব্যৱহাৰ কৰি দলংখন নিৰ্মাণ কৰাৰ বাবেই দুবছৰৰ ভিতৰতে দলংখন জহি-খহি গৈছে বুলি কৃষক শ্ৰমিক নেতা প্ৰশান্ত বৈশ্যই অভিযোগ উত্থাপন কৰে৷চকুমুদি থকা বিভাগটোৱে জহি -খহি যোৱা উক্ত দলংখন  আজিলৈকে নিৰ্মাণৰ কোনো ব্যৱস্থা গ্ৰহণ কৰা নাই৷ এই ক্ষেত্ৰত তেজপুৰ লোকসভা সমষ্টিৰ সাংসদ পল্লৱ লোচন দাস আৰু স্থানীয় অকৰ্মণ্য বিধায়ক গনেশ কুমাৰ লিম্বুক সমষ্টিটোৰ জৰাজীৰ্ণ দলং সমূহ নিৰ্মাণৰ বাবে কেইবাবাৰো সংগঠনটোৰ তৰফৰ পৰা দাবী জনোৱাৰ পিছতো আজিলৈকে ভগা দলং সমূহ  নিৰ্মাণৰ ব্যৱস্থা নকৰাটো অতিকৈ দুৰ্ভাগ্যজনক বুলি বৈশ্যই উল্লেখ কৰে৷ৰাইজে যাতায়তৰ ক্ষেত্ৰত দুৰ্ভোগৰ সন্মুখীন হৈ থকা অৱস্থাত চৰকাৰখনে সংবাদ মাধ্যমত বাট-পথ উন্নয়নৰ শ্ল’গান দি থকা বিষয়টো  অতিকৈ আমোদজনক আৰু চৰকাৰৰ এনে প্ৰচাৰে ৰাইজৰ মাজত এতিয়া হাঁহিৰ খোৰাক যোগাইছে৷চৰকাৰৰ সংবাদ মাধ্যমত কৰা বাট-পথৰ উন্নয়নে প্ৰকৃত দুৰ্ভগীয়া জনতাক স্পৰ্শ কৰিব পৰা নাই বুলি কৃষক শ্ৰমিক নেতা প্ৰশান্ত বৈশ্যই আক্ষেপ প্ৰকাশ কৰে৷সেয়েহে চৰকাৰখনে সংবাদ মাধ্যমত উন্নয়নৰ শ্ল’গান দিয়া বন্ধকৰি প্ৰকৃততে ৰাইজৰ যাতায়তৰ ক্ষেত্ৰত গুৰুত্ব দি শিঙৰীৰ পৰা ভঙামন্দিৰ সংযোগী পথৰ বালিজানত থকা ভগা দলংখন মেৰামতি কৰাৰ লগতে ৰাজ্যৰ অন্যান্য প্ৰান্তৰ জৰাজীৰ্ণ দলং সমূহ সমূহ অতি শীঘ্ৰে নিৰ্মাণৰ দাবী জনায় কৃষক শ্ৰমিক নেতা প্ৰশান্ত বৈশ্যই ৷ অহা ৭ দিনৰ ভিতৰত উক্ত ভগা দলং নিৰ্মাণৰ ব্যৱস্থা নকৰিলে কৃষক শ্ৰমিক সুৰক্ষা সংগ্ৰাম সমিতি আৰু সংগঠনটোৰ ভগ্নী সংগঠন নাৰী সুৰক্ষা সংগ্ৰাম সমিতিয়ে পুনৰ তীব্ৰ গণতান্ত্ৰিক আন্দোলনৰ কাৰ্যসূচী গ্ৰহণ কৰিব বুলি কৃষক শ্ৰমিক নেতা প্ৰশান্ত বৈশ্যই  চৰকাৰক সকীয়াই দিয়ে৷আজিৰ প্ৰতিবাদী কাৰ্যসূচীত সভাপতি প্ৰশান্ত বৈশ্যৰ লগতে সংগঠনটোৰ কাৰ্যকৰী সভাপতি জাহেদ আলী,প্ৰচাৰ সম্পাদক পিতাম্বৰ দেৱকটা,সদস্য শ্ৰৱণ গোৱালা উপস্থিত থাকে৷