মেঘালয়ৰ ৰাজধানী চহৰ শ্বিলঙৰ পৰা জি এছ ৰোডৰে গুৱাহাটীহৈ বৰঝাৰস্থিত লোকপ্রিয় গোপীনাথ বৰদলৈ আন্তৰ্জাতিক বিমানবন্দৰলৈ ৰাজ্যখনৰ পৰা দৈনিক দেশৰ বিভিন্ন প্ৰান্তলৈ বিমানেৰে অহা-যোৱা কৰিবৰ বাবে কেবা শতাধিক লোকৰ আগমন হয় । ইফালে বৰ্দ্ধিত যান বাহনৰ বাবে শ্বিলং চহৰত যানজটৰ সমস্যাই ভয়াবহ ৰূপ ধাৰণ কৰিছে । সমান্তৰালভাৱে শ্বিলঙৰ পৰা বৰঝাৰ বিমানবন্দৰলৈ প্ৰায় ১২৮ কিঃমিঃ দৈৰ্ঘ্যৰ পথছোৱাত কেৱল যানজটৰ বাবে প্ৰায় চাৰিৰ পৰা পাচ ঘণ্টা সময়ৰ প্ৰয়োজন হয় ।এই সমস্যাটো সমাধান কৰাৰ বাবে মেঘালয় চৰকাৰে শ্বিলঙৰ পৰা মাইৰাংহৈ জিৰাং – ৰাণী -আজাৰা সংযোগী পথচোৱা উন্নীতকৰণৰ বাবে আঁচনি গ্ৰহণ কৰিছে । উল্লেখযোগ্য যে শ্বিলঙৰ পৰা মাইৰাং চহৰলৈ দূৰত্ব মাত্ৰ ৪০ কিঃমিঃ । তেনেদৰে মাইৰাঙৰ পৰা অসমৰ ৰাণী হৈ ৩৭ নং ৰাষ্ট্ৰীয় ঘাইপথৰ আজাৰা ৰাণীগেটলৈ দূৰত্ব প্ৰায় ৭৯ কিঃমিঃ । ৰাণীগেটৰ পৰা বৰঝাৰ বিমানবন্দৰলৈ দূৰত্ব প্ৰায় ২ কিঃমিঃ । অৰ্থাৎ শ্বিলঙৰ পৰা মাইৰাং -ৰাণী – আজাৰা ( এম আৰ এ ) সংযোগী পথৰ দূৰত্ব হব প্ৰায় ১১৯ কিঃমিঃ । ইতিমধ্যে মেঘালয় চৰকাৰে বৰঝাৰ বিমানবন্দৰলৈ অহা যোৱা কৰিবৰ বাবে বিকল্প পথ হিচাপে ঘোষনা কৰিছে এম আৰ এ পথচোৱা । অতি গুৰুত্বপূৰ্ণ বুলি বিবেচিত কৰি ৭৯ কিঃমিঃ দৈৰ্ঘ্যৰ এম আৰ এ পথচোৱাৰ উন্নীতকৰণৰ বাবে ১৯৬ কৌটি টকাৰ অনুমোদন দিছে । যোৱা ২৪ ফেব্ৰুৱাৰীত পশ্চিম খাচী পাহাৰ জিলাৰ মাইৰাঙত পথচোৱাৰ নিৰ্মাণকাৰ্যৰ আধাৰশিলা স্থাপন কৰে মেঘালয় বিধানসভাৰ অধ্যক্ষ মেটবাহ লিংডোৱে । এই উপলক্ষে আয়োজিত অনুষ্ঠানত মেঘালয়ৰ পৰিবহন মন্ত্ৰী এছ এইছ ধৰ , জলসম্পদ মন্ত্ৰী বি নংছেই , জিৰাঙৰ বিধায়ক চছঠেং চতুন , গড়কাপ্তানী বিভাগৰ সচিব টি জি নেনগং , মুখ্য অভিযন্তা এল ডি চুচিযাং , মাইৰাং মহকুমাৰ মহকুমাধিপতি এ নংবৰীকে ধৰি উচ্চপদস্থ বিষয়া সকল আৰু বহু ৰাইজ উপস্থিত থাকে । আনহাতে আধাৰশিলা স্থাপন অনুষ্ঠানত গড়কাপ্তানী বিভাগৰ সচিবে দুবছৰৰ ভিতৰত পথচোৱাৰ উন্নীতকৰণৰ কাম সম্পূৰ্ণ হব বুলি ঘোষনা কৰে । ইফালে পৰ্যটনৰ প্ৰচুৰ সম্ভাবনা থকা কিন্তু প্ৰচাৰৰ অভাৱত উপেক্ষিত হৈ থকা এম আৰ এ পথচোৱা উন্নীতকৰণ হলে পথচোৱাৰ প্ৰায় ১৭ কিঃমিঃ অংশ তথা গুৱাহাটীৰ পশ্চিম প্ৰান্তৰ আজাৰাৰ পৰা অসম মেঘালয় সীমান্তৰ ৰাণী শুকুৰবৰীয়ালৈ বৃহত্তৰ অঞ্চলটোৰ আক্ষৰিক অৰ্থতে পৰিবৰ্তন হোৱাটো নিশ্চিত । নয়নাভিৰাম প্ৰাকৃতিক সৌন্দৰ্য্যৰে ভৰপূৰ অঞ্চলটোৰ মাজেৰে থকা পথচোৱাৰ মাজেৰে মানুহৰ আহ – যাহ আৰম্ভ হলে আৰ্থ সামাজিক ক্ষেত্ৰখনতো ইতিবাচক প্ৰভাৱ পৰিব । জানিব পৰা মতে পশ্চিম গুৱাহাটীৰ বিধায়ক ৰমেন্দ্ৰ নাৰায়ণ কলিতাই পশ্চিম গুৱাহাটী সমষ্টিৰ এক বিস্তৃত অঞ্চল মেঘালয়ৰ ৰি ভয় জিলা আৰু জিৰাং সমষ্টিয়ে আৱৰি থকা বাবে দুয়োখন ৰাজ্যৰ বৃহত্তৰ স্বাৰ্থত অসম সংযোগী পথ সমুহ উন্নীতকৰণ কৰাৰ লগতে সীমা সমস্যা সমাধানৰ বাবে ২০১৮ চনতে মেঘালয় চৰকাৰৰ গড়কাপ্তানী বিভাগৰ মন্ত্রীলৈ পত্ৰ প্ৰেৰণ কৰিছিল । আনকি এই সন্দৰ্ভত বিধায়ক কলিতাই জিৰাং সমষ্টিৰ বিধায়ক চছঠেং চতুনৰ সৈতেও নিৰন্তৰ যোগাযোগ অব্যাহত ৰাখিছিল । ইফালে প্ৰতিশ্ৰুতি অনুসৰি বিধায়ক ৰমেন্দ্ৰ নাৰায়ণ কলিতায়ো বিগত চাৰে চাৰি বছৰত পশ্চিম গুৱাহাটী সমষ্টিৰ মেঘালয় সংযোগী পথ সমূহ অসম চৰকাৰৰ জৰিয়তে উন্নয়ন সাধন কৰিছে । শেহতীয়াভাবে মেঘালয় চৰকাৰে এম আৰ এ পথটো উন্নীতকৰণৰ বাবে গ্ৰহণ কৰা সিদ্ধান্তক আদৰণি জনাইছে বিধায়ক ৰমেন্দ্ৰ নাৰায়ণ কলিতাই ।
‘অসমত কেৱল জয় আই অসম ধ্বনিহে চলিব, ভাৰত মাতা কি জয় চলিবলৈ দিয়া নহব’
‘অসমত কেৱল জয় আই অসম ধ্বনিহে চলিবলৈ দিয়া হব । কোনো কাৰণতে ভাৰত মাতা কি জয় দিবলৈ দিয়া নহব । উপনিৱেশকাৰী দখলত থাকি নিজৰ মাতৃভূমিক প্ৰতিক্ষণতে তুচ্চ-তাচিল্য কৰা মুখ্যমন্ত্ৰী সৰ্বানন্দ সোনোৱাল আৰু মন্ত্ৰী ড° হিমন্তবিশ্ব শৰ্মাই এইবাৰ এটা কথা বুজি পোৱা উচিত সমাগত এইবাৰ বিধান সভা নিৰ্বাচনত দিছপুৰত এখন খিলঞ্জীয়া জনসাধাৰণৰ জাতীয়তাবাদী চৰকাৰ গঠন হব ।’ ৰাজ্যৰ নৱগঠিত নতুন আঞ্চলিক ৰাজনৈতিক দল ‘ৰাইজৰ দল’ৰ আজি চৰাইদেউ জিলাৰ মাহমৰাৰ দেউঘৰীত অনুষ্ঠিত এক বিশাল জন সমাৱেশত মুখ্য অতিথি হিচাপে উপস্থিত থাকি এনদৰে শাসকীয় চৰকাৰখনৰ বিৰুদ্ধে হুংকাৰ প্ৰদান কৰে দলটোৰ কেন্দ্ৰীয় কাৰ্যকৰী সভাপতি ভাস্কো ডি শইকীয়াই । ইয়াৰ উপৰিও দলটোৰ কেন্দ্ৰীয় কাৰ্যকৰী সভাপতিগৰাকীয়ে লগতে কয় যে, দিল্লীয়ে কেৱল অসমত ভাৰত মাতা কি জয় ধ্বনি দি অসমৰ সম্পদ লুন্ঠন কৰি অসমৰ অৰ্থনীতি কোঙা কৰি পেলাব বিচাৰিছে । তদুপৰি সমাগত ২১ৰ বিধান সভা নিৰ্বাচনত এইবাৰ ভাৰত মাতা কি জয় আৰু জয় আই অসমৰ মাজত নিৰ্বাচনী যুঁজ হব । অসমৰ কোনো খিলঞ্জীয়া জনসাধাৰণে ত্ৰিপুৰাৰ দৰে দ্বিতীয় শ্ৰেণী নাগৰিক হিচাপে জীয়াই থাকিব নিবিচাৰে । অসমৰ প্ৰতিটো সম্পদ, প্ৰতিটো অধিকাৰ খিলঞ্জীয়া জনসাধাৰণৰ হাতত তুলি ধৰিবলৈ সমাগত বিধান সভা নিৰ্বাচনত সকলো আঞ্চলিক ৰাজনৈতিক দল একত্ৰিত হৈ বিদেশীৰ পৰা অসমক মুক্ত কৰিব লাগিব । আনহাতে দলটোৰ কাৰ্যকৰী সভাপতিগৰাকীয়ে লগতে কয় যে, নাগৰিকত্ব সংশোধনী আইনৰ দৰে জাতিধ্বংসী আইন অসমত জাপি দি অসমৰ নিজ মাতৃভূমিতে খিলঞ্জীয়া জনসাধাৰণক সংখ্যালঘু কৰিব বিচৰা বিজেপি চৰকাৰে আন্দোলনৰ নামত ৫ জনকৈ ফুলকুমলীয়া শিশুক হত্যা কৰা ঘটনা কোনোজন অসমীয়াই আজিও পাহৰিব পৰা নাই । কৃষকনেতা অখিল গগৈক কাৰাৰুদ্ধ কৰি বিজেপি চৰকাৰে যি নিৰ্বাচনৰ ৰণ কৌশল ৰচনা কৰিছে । এইবাৰ ইয়াৰ যোগ্য প্ৰত্যুত্তৰ দিবলৈ সমাগত বিধান সভা নিৰ্বাচনত দিছপুৰত এখন খিলঞ্জীয়া জাতীয়তাবাদী চৰকাৰ গঠন কৰিব লাগিব । ৰাইজৰ দলৰ মাহমৰা সমষ্টি সমিতিৰ সভাপতি জীৱেশ্বৰ চুতীয়াৰ সভাপতিত্বত অনুষ্ঠানত সভাখন আঁত ধৰে সমষ্টি সমিতিৰ সম্পাদক শোভন ফুকনে । প্ৰায় পাঁচ সহস্ৰাধিক ব্যক্তি উপস্থিত থকা সভাখনৰ আৰম্ভণীতে আদৰণী ভাষণ প্ৰদান কৰে ৰাইজৰ দলৰ সাধাৰণ সম্পাদক অংকুৰ শইকীয়াই । সাধাৰণ সম্পাদকগৰাকীয়ে ভাষণ প্ৰসঙ্গত অসমত বিজেপি চৰকাৰখনে সাম্প্ৰদায়িক বীজ ৰোপন কৰি ধৰ্মীয় ভিত্তিত জনসাধাৰণক ভাগ ভাগ কৰিব বিচৰা কৰা কাৰ্যটো অতি নিন্দনীয় । বিজেপি চৰকাৰক কঠোৰ সমালোচনা কৰি সাধাৰণ সম্পাদকগৰাকীয় কয় যে, অসমত কেৱল খিলঞ্জীয়াৰ অধিপত্য বিস্তাৰ কৰিব পৰা চৰকাৰ গঠন কৰি প্ৰধানমন্ত্ৰী, গৃহমন্ত্ৰী আৰু মুখ্যমন্ত্ৰী সৰ্বানন্দ সোনোৱাল, মন্ত্ৰী ড° হিমন্তবিশ্ব শৰ্মাক চিৰদিনৰ বাবে বিদায় দিব লাগিব । সমাৱেশত ৰাইজৰ দলৰ উপ-সভাপতিদ্বয় লু-চ্যুনশ্যাম গোঁহাই, পদ্মনাথ দাস, সাধাৰণ সম্পাদক লোহিত গগৈ, ৰাইজৰ দলৰ চৰাইদেউ জিলা সমিতিৰ সভাপতি মণিদীপ মহন, মৰাণ মহাবিদ্যালয়ৰ বুৰঞ্জী বিভাগৰ অধ্যাপক তুলসী দাস, কেন্দ্ৰীয় সমিতিৰ সম্পাদক ধ্ৰুৱজ্যোতি ফুকন, দাদুল আলি, নীলাম্বৰ গগৈ, হিৰণ্য বৰপাত্ৰগোঁহাই, কৃষক মুক্তি সংগ্ৰাম সমিতিৰ চৰাইদেউ জিলা সমিতিৰ সভাপতি শিৱ বড়া, নাৰী মুক্তিৰ সভানেত্ৰী হেলেন চৌধুৰী, আয়োজক সমিতিৰ সভাপতি থানুৰাম বৰুৱা, হেমেন পেগুকে ধৰি ভালেসংখ্যক শীৰ্ষ নেতা উপস্থিত থাকে । আনহাতে সমাৱেশৰ আৰম্ভণীতে লোকশিল্পী মহেন্দ্ৰ বৰুৱাৰ নেতৃত্বত এটা মহিলাৰ শিল্পী দলে টাই আহোম আৰু মাতৃভাষাত জাতীয় সংগীত পৰিৱেশন কৰে । আনহাতে পুৱাৰ ১০ বজাত ৰাইজৰ দলৰ কেন্দ্ৰীয় কাৰ্যকৰী সভাপতি ভাস্কো ডি শইকীয়াক মৰাণৰ পৰা প্ৰায় পাঁচশ বাইক ৰেলীৰে মৰাণ-কচুমাৰি- মাহমৰা-বৰবিল পথেৰে আদৰি আনে । ইয়াৰ মাজতে ২নং বৰবিল গাঁৱত গুপ্তহত্যাৰ বলি হোৱা কৃষক উমা গগৈৰ ছয়জনীয়া পৰিয়ালৰ সমাধিস্থলীত ভাস্কো ডি শইকীয়া আৰু সাধাৰণ সম্পাদক লোহিত গগৈয়ে শ্ৰদ্ধাঞ্জলী জ্ঞাপন কৰে ।
ধেমাজিত নিৰ্বাচনী আচৰণ বিধি সম্পৰ্কত নৱনিযুক্ত জিলা উপায়ুক্ত ড° জীৱন বিৰ সংবাদমেল
আগন্তুক বিধানসভা নিৰ্বাচনত ধেমাজি জিলা প্ৰশাসনৰ প্ৰস্তুতি আৰু নিৰ্বাচনী আচৰণ বিধি সম্পৰ্কত উপায়ুক্ত ড° জীৱন বি য়ে আজি ধেমাজি উপায়ুক্ত কাৰ্যালয়ৰ সভাকক্ষত এখন সংবাদমেল সম্বোধন কৰে । সংবাদমেলত জিলা উপায়ুক্তগৰাকীয়ে আগন্তুক বিধানসভা নিৰ্বাচন সুচাৰুৰূপে অনুস্থিত কৰিবলৈ জিলা প্ৰশাসনৰ প্ৰস্তুতি সম্পৰ্কত সংবাদমাধ্যমক অৱগত কৰে ৷
উল্লেখযোগ্য যে ১১৩ নং ধেমাজি (অনুসূচিত জনজাতি) সমষ্টিত এইবাৰ শেহতীয়া তথ্য অনুসৰি মুঠ ২৪৭২০৭ ভোটাৰৰ ১২৪৬৬৪ জন পুৰুষ আৰু ১২২৫৪৩ জন মহিলা ভোটাৰ । সমষ্টিটোত এইবাৰ ৫ টা জ’ন আৰু ৩০ টা চেক্টৰত মুঠ ৩৫৬ টা ভোটগ্ৰহণ কেন্দ্ৰ সাজু কৰা হৈছে । কভিদ প্ৰট’কল আনুসৰি, এটা ভোটগ্ৰহণ কেন্দ্ৰত সৰ্বাধিক ১০০০ জন ভোটাৰহে ৰখা হৈছে ।
আনহাতে ভোটগ্ৰহণ কেন্দ্ৰত সকলোধৰণৰ কভিদ প্ৰট’কল সম্পূৰ্ণৰূপে মানি চলা হ’ব বুলি জানিবলৈ দিয়ে উপায়ুক্তগৰাকীয়ে ৷ ইপিনে তেওঁ সাধাৰণ ভোটাৰক নিচিন্ত মনেৰে ভোটদান কৰিবলৈ আহিবলৈ আহ্বান জনায় । তদুপৰি এইবাৰ ৮০ উৰ্দ্ধৰ নাগৰিক আৰু বিশেষভাৱে সক্ষম নাগৰিকে আগতীয়াকৈ পোষ্টেল বেলটৰ জড়িয়তে ঘৰৰ পৰাই ভোটদান কৰিব পাৰিব বুলিও উপায়ুক্তই উল্লেখ কৰে ।
সংবাদমেলতে উপায়ুক্তই নিৰ্বাচনৰ আচৰণ বিধি উলংঘা সম্পৰ্কে অভিযোগৰ বাবে স্থাপন কৰা অভিযোগ কক্ষত ০৩৭৫৩-২২৪০১৪ অথবা ৭৫৭৭০৩৫৬৩৯ নম্বৰত যোগাযোগ কৰিব পাৰিব বুলি উল্লেখ কৰে । আনহাতে সংবাদ মেলখনতে ধেমাজি জিলাৰ আৰক্ষী অধীক্ষক ডা° ধনঞ্জয় ঘনৱাটে সংবাদ কৰ্মীসকলক আৰক্ষী বিভাগৰ নিৰ্বাচন সংক্ৰান্তীয় প্ৰস্তুতিৰ বিষয়ে অৱগত কৰে । তেওঁ ধেমাজি আৰক্ষীৰ নিয়ন্ত্ৰণ কক্ষৰ যোগাযোগৰ বাবে ৬০২৬৯০০৩৫৬ নম্বৰ উপলব্ধ থাকিব বুলি জানিব দিয়ে । জিলা উপায়ুক্ত আৰু আৰক্ষী অধীক্ষকে শান্তিপূৰ্ণ নিৰ্বাচন অনুস্থিত কৰাৰ ক্ষেত্ৰত সকলো সংবাদকৰ্মীৰে সহযোগিতা বিচাৰে ।
আনহাতে আজি পুৱা ১১ বজাত জিলা উপায়ুক্ত, ড° জীৱন বি ৰ অধ্যক্ষতাত জিলা উপায়ুক্তৰ কাৰ্যালয়ৰ সভাগৃহত জিলা আৰক্ষী অধীক্ষক আৰু সকলো ৰাজনৈতিক দলৰ প্ৰতিনিধিৰ উপস্থিতিত নিৰ্বাচনী আচৰণবিধি সম্পৰ্কত এখনি জৰুৰী সভা অনুস্থিত হয় । সভাখনত উপায়ুুক্তগৰাকীয়ে নিৰ্বাচন সংক্ৰান্তীয় নীতি নিৰ্দেশনাসমূহ, পোষ্টেল বেলট প্ৰক্ৰিয়া তথা ভোটদানৰ ক্ষেত্ৰত নিৰ্বাচনী আয়োগে নিৰ্ধাৰণ কৰা ক’ভিদ ১৯ ৰ নিৰ্দেশাৱলীসমূহ বিশদভাৱে ব্যাখ্যা কৰে ।
আনহাতে নিৰ্বাচনী প্ৰচাৰৰ ক্ষেত্ৰটো ৰাজনৈতিক দলবোৰক ক’ভিদ প্ৰ’টকল মানি চলিবলৈ তেওঁ আহ্বান জনায় । সভাখনত জিলা নিৰ্বাচনী বিষয়া স্বৰাজ ভাৰত লাগাছুয়ে নিৰ্বাচন সংক্ৰান্তীয় কিছু ব্যাখ্যা আগবঢ়ায় ।
আনহাতে নিৰ্বাচনী আচৰণবিধি বলৱৎ হোৱাৰ লগে লগে জিলা আৰক্ষী প্ৰশাসনৰ লগতে নিৰ্বাচনী ব্যয় নিৰীক্ষণ কোষ আৰু ফ্লাইং স্কোৱাদসমূহ সষ্টম হৈ পৰা বুলি উপায়ুক্তই ৰাজনৈতিক দলৰ প্ৰতিনিধিসকলক অৱগত কৰে ৷ সভাখনত উপায়ুক্ত ড° জীৱন বি, আৰক্ষী অধীক্ষক ডা° ধনঞ্জয় ঘনাৱটৰ লগতে জিলা পৰিষদৰ মূখ্য কাৰ্যবাহী বিষয়া মনোজ কুমাৰ বৰুৱা, জিলা উন্নয়ন আয়ুক্ত দিপাংকৰ দাস, জিলা নিৰ্বাচনী বিষয়া স্বৰাজ ভাৰত লাগাছু, অতিৰিক্ত আৰক্ষী অধীক্ষক এম.এন. দেউৰী আৰু জিলা প্ৰশাসনৰ কেইবাগৰাকীও বিষয়া উপস্থিত থাকে ৷
ব্যতিক্ৰমী প্ৰয়াসেৰে দেৰগাঁৱৰ এগৰাকী শিক্ষয়িত্ৰী, ছাত্ৰ ছাত্ৰীক দিছে ব্যতিক্ৰমী শিক্ষা
দেৰগাঁৱৰ এগৰাকী শিক্ষয়িত্ৰী, কুৰালগুৰি উচ্চতৰ মাধ্যমিক বিদ্যালয়ৰ অধ্যক্ষা জ্যোতি কুমাৰী শৰ্মা বৰঠাকুৰৰ ব্যতিক্ৰমী প্ৰয়াসে গ্ৰাম্যাঞ্চলৰ ছাত্ৰ ছাত্ৰী সকলক অত্যুতসাহী কৰি তুলিছে। শিক্ষয়িত্ৰী গৰাকীয়ে এক ব্যতিক্ৰমী যাত্ৰাৰে গ্ৰাম্যাঞ্চলৰ ছাত্ৰ ছাত্ৰী সকলৰ মাজত বিজ্ঞান ভিত্তিক মানসিকতা গঢ়ি তোলাৰ লক্ষ্যৰে বহুকেইখন বিদ্যালয়ৰ ছাত্ৰ ছাত্ৰীৰ মাজত এক সজাগতা সৃষ্টি কৰিবলৈ সক্ষম হৈছে। বিজ্ঞান বিষয়টো ছাত্ৰ ছাত্ৰী সকলৰ মাজত কি দৰে জনপ্ৰিয় কৰি তুলিব পাৰি আৰু বিজ্ঞান কি দৰে ছাত্ৰ ছাত্ৰী সকলৰ সহজে বোধগম্য হয় তাৰ বাবে অহৰহ প্ৰচেষ্টা চলায় আহিছে। অলপতে শিক্ষয়িত্ৰী গৰাকীয়ে উত্তৰ গোলাঘাট শিক্ষাখণ্ডৰ অন্তৰ্গত বোকোৰা মিলন জনজাতি মধ্য ইংৰাজী বিদ্যালয় আৰু বোকোৰা প্ৰাথমিক বিদ্যালয়ৰ ছাত্ৰ ছাত্ৰী সকলৰ মাজত পেলনীয়া সামগ্ৰীৰে কিদৰে ব্যৱহাৰযোগ্য সামগ্ৰী তৈয়াৰ কৰিব পাৰি তাৰ এক প্ৰশিক্ষণ প্ৰদান কৰে। পেলনীয়া সামগ্ৰীৰে অতি সহজে ডাষ্টবিন আদি তৈয়াৰ কৰিব পৰা কৌশল প্ৰদানে ছাত্ৰ ছাত্ৰী সকলক অত্যুতসাহী কৰি তোলে।”বিজ্ঞান এক খেল”, “হাতে-কামে বিজ্ঞান শিকোঁ আহা” আদি শ্লোগানেৰে গাঁৱে-ভূঞে বিজ্ঞানক জনপ্ৰিয় কৰি তুলিবলৈ সক্ষম হোৱা এই গৰাকী বিজ্ঞান প্ৰেমী শিক্ষয়িত্ৰীৰ এনে ব্যতিক্ৰমী প্ৰয়াসক সকলোৱে শলাগ লৈছে।
ডিগবৈ সমষ্টিত কংগ্ৰেছ পৰা সাত গৰাকীয়ে বিচাৰিছে দলীয় টিকট, তেওঁলোক কোন কোন…
দেশৰ নিৰ্বাচন আয়োগে যোৱা ২৬ তাৰিখে ঘোষণা কৰা অনুসৰি অসমত ২১ ৰ বিধান সভা নিৰ্বাচনৰ প্ৰথম পৰ্যায়ৰ ভোটগ্ৰহণ অহা ২৭ মাৰ্চত অনুষ্টিত হব ৷ সেই অনুসৰি প্ৰতিটো ৰাজনৈতিক দলে অহা ৯ মাৰ্চৰ ভিতৰত প্ৰথম পৰ্যায়ৰ বাবে মনোনয়ন পত্ৰ দাখিল কৰিব লাগিব ৷ তাৰ বাবে সমষ্টিয়ে সমষ্টিয়ে প্ৰতিটো দলে নিজৰ নিজৰ দলীয় প্ৰাৰ্থী তালিকা প্ৰস্তুত কৰিবলৈ উঠি পৰি লাগিছে ৷
পথম পৰ্যায়ত অনুষ্টিত হবলগা আন আন সমষ্টিৰ লগতে তিনিচুকীয়া জিলাৰ ১২৩ নং ডিগবৈ সমষ্টিও অন্তভূক্ত ৷ ডিগবৈ সমষ্টিৰ পৰা এইবাৰ কংগ্ৰেছ দলৰ হৈ সাত গৰাকী প্ৰাৰ্থীয়ে ইতিমধ্যে টিকটৰ বাবে আবেদন কৰিছে ৷
সেই তালিকাত আছে অসম প্ৰদেশ কংগ্ৰেছৰ সাধাৰণ সম্পাদকদ্বয় গৌতম ধানোৱাৰ, (ডিগবৈ) মৌচম বৰুৱা, (মাকুম) হাপজান ব্লক কংগ্ৰেছৰ সভাপতি তথা কংগ্ৰেছৰ জ্যেষ্ঠনেতা ভাস্কৰ জীৱন বৰুৱা, (ডিগবৈ) তিনিচুকীয়া জিলা মহিলা কংগ্ৰেছৰ সভানেত্ৰী গীতাঞ্জলি সোনোৱাল, (ৰামনগৰ) তিনিচুকীয়া জিলা কংগ্ৰেছৰ সম্পাদক ৰত্নেশ্বৰ গোহাঁই, (বাৰেকুৰী) তিনিচুকীয়া জিলা যুৱ কংগ্ৰেছৰ সভাপতি শিৱনাথ চেতিয়া, (তিনিচুকীয়া) ৮ নং গোলাই জিলা পৰিষদৰ প্ৰাক্তণ সদস্য অশোক শৰ্মা (ডিগবৈ) ৷
উল্লেখ যে আগন্তোক নিৰ্বাচনৰ বাবে ডিগবৈ সমষ্টিৰ পৰা আবেদন কৰা এই সাত গৰাকী কংগ্ৰেছ দলৰ নেতাৰ পৰা যি কোনো এজনে দলীয় টিকট লাভ কৰিবলৈ সক্ষম হব ৷ বৰ্তমান প্ৰাৰ্থীত্ব সম্ভাৱনা শীৰ্ষত আছে ২০১৬ চনত সমষ্টিটোৰ পৰা প্ৰতিদ্বন্দ্বীতা কৰা গৌতম ধানোৱাৰ লগতে জ্যেষ্ঠনেতা ভাস্কৰ জীৱন বৰুৱা, মহিলা নেত্ৰী গীতাঞ্জলি সোনোৱাল আৰু যুৱনেতা মৌচম বৰুৱা ৷
উল্লেখ যে বিগত ৩৭ বছৰে কংগ্ৰেছ দলে শাসন কৰা পিছত ২০১৬ চনত ডিগবৈ সমষ্টিত দলটো পৰাজিত হৈছিল ৷ শেহতীয়াকৈ সমষ্টিতটো পুনৰ উদ্ধাৰ কৰিবলৈ দলটোৱে যেনেদৰে দলীয় কাম কাজ সমূহ কৰিব লাগিছিল সেই ধৰণে গঢ়ি তুলিব পৰা নাই ৷ ইয়াৰ উপৰিও সমষ্টিটোত চাহ বাগিছা ভোট সমূহ দুভাগ হোৱাত কংগ্ৰেছ দল দুৰ্বল হৈ পৰা দেখা গৈছে ৷ এতিয়া সময়হে কব ডিগবৈ সমষ্টিৰ দলটোৱে পুনৰ উদ্ধাৰ কৰিব পাৰিব নে নাই ৷ অৱশ্যে নিৰ্বাচনৰ বাবে দলটোৱে সমষ্টিত বিভিন্ন সভা সমিতি অনুষ্টিত কৰিছে ৷
বৰ্তমান বিজেপি বিধায়ক গৰাকীৰ বাসগৃহ নিচেই কাষতে ইতিমধ্যে হাজাৰ হাজাৰ কংগ্ৰেছ কৰ্মীৰ উপস্থিতিত অনুষ্টিত সভাৰ জড়িয়তে ডিগবৈ সমষ্টিত বৰ্তমানেও যে কংগ্ৰেছ দলৰ ককাল ভঙা নাই তাকে প্ৰমান কৰি দিছে ৷
আগন্তুক নিৰ্বাচনত যদিহে বিশেষ কিবা পৰিৱৰ্তন নহয় তেন্তে সমষ্টিটোত শাসনাধিস্থ বিজেপি আৰু কংগ্ৰেছ দলৰ মাজতে মুল যুঁজখন হৈ উঠিব ৷ যদি কোনো প্ৰাৰ্থীয়ে দল সলনি কৰে তেন্তে তিনিকোনিয়া প্ৰতিদ্বন্দিতা হোৱাৰ সম্ভাৱনা আছে ডিগবৈ সমষ্টিত ৷
অসমৰ ক’ভিড পৰিস্থিতি স্বাভাৱিক আৰু নিয়ন্ত্ৰনাধীন, কেন্দ্ৰীয় স্বাস্থ্য মন্ত্ৰী অশ্বিনী চৌবেৰ ঘোষণা
অসমৰ ক’ভিড পৰিস্থিতি সম্পূৰ্ণ স্বাভাবিক আৰু নিয়ন্ত্ৰনাধীন। ক’ভিডক লৈ কোনোৱে শংকিত আৰু আতংকিত হোৱাৰ কাৰণ নাই। আমি অসমক এখন কভিডমুক্ত ৰাজ্যলৈ উন্নীতকৰণ কৰাৰ বাবে চেষ্টা অব্যাহত ৰাখিছোঁ। এই মন্তব্য ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰণালয়ৰ ৰাজ্যিক মন্ত্ৰী অশ্বিনী চৌবেৰ।
২৮ ফেব্ৰুৱাৰীত মহানগৰীৰ গুৱাহাটীৰ হোটেল ৰেডিচন ব্লুত আয়োজিত এক সংবাদ মেলত ভাগ লৈ এই মন্তব্য কৰে কেন্দ্ৰীয় মন্ত্ৰী অশ্বিনী চৌবেই। মন্ত্ৰী চৌবেই কয় অসমত এতিয়ালৈকে কভিডত ২.১৬ লাখতকৈ অধিক লোক আক্ৰান্ত হৈছিল। কিন্তু ইয়াৰে ২.১৪ লাখতকৈ অধিক লোক সুস্থ হৈ উঠিছে। সুস্থ হোৱা লোকৰ সংখ্যা ৯৮ শতাংশতকৈ অধিক। অসমৰ কভিড কেন্দ্ৰীক পৰিস্থিতি ভাৰতৰ আন ৰাজ্যতকৈ বহু উন্নত।
ৰাজ্যৰ মুখ্যমন্ত্ৰী সৰ্বানন্দ সোনোৱাল আৰু স্বাস্থ্যমন্ত্রী ড০ হিমন্ত বিশ্ব শৰ্মাৰ তৎপৰতাত কভিড পৰিস্থিতি নিয়ন্ত্ৰণ কৰিব পৰা গৈছে। তেনেদৰে দেশক কভিডৰ পৰা মুক্ত কৰাৰ লক্ষ্যৰে টীকাকৰণ কৰাৰ দ্বিতীয় পৰ্যায় পহিলা মাৰ্চৰ পৰা আৰম্ভ হ’ব। এই পৰ্যায়ত ৬০ ৰ ঊৰ্ধৰ প্ৰায় ১০ কৌটি লোকক সামৰি লোৱা হ’ব।
তাৰ পাছত তৃতীয় পৰ্যায়ত ৪৫ বছৰ ঊৰ্ধৰ লোকক সামৰি লোৱা হ’ব। ইয়াৰ পূৰ্বে ২৬ জানুৱাৰীত সামৰণি পৰা প্ৰথম পৰ্যায়ৰ টীকাকৰণ পৰ্বত দেশত ১.৪৫ কৌটি স্বাস্থ্যকর্মী আৰু কভিডৰ বিৰুদ্ধে যুঁজ দি অহা লোকক সামৰি লোৱা হৈছে।
প্ৰধানমন্ত্ৰী নৰেন্দ্ৰ মোদীৰ মাৰ্গদৰ্শনৰ বাবে ভাৰতে দেশীয় প্ৰযুক্তিৰে নিৰ্মিত ভেকচিনে বিশ্বজুৰি সমাদৰ লাভ কৰিছে। বিশ্বৰ বহু দেশে ভাৰতৰ পৰা কভিড ভেকচিন আমদানি কৰিছে। আনকি কভিডৰ ভৰপক সময়ত আমি বিশ্বৰ ১০৭ খন দেশক হায়দ্ৰক্লৰিন টেবলেট যোগান ধৰিছিলো। ব্ৰাজিলৰ ৰাষ্ট্ৰপতিয়ে ইয়াৰ বাবে প্ৰধানমন্ত্ৰী নৰেন্দ্ৰ ভাই মোদীক হনুমানৰ লগত তুলনা কৰিছিল।
দ্বিতীয় পৰ্যায়ৰ টীকাকৰণ দেশত প্ৰায় ৩০ হাজাৰ স্বাস্থ্যকেন্দ্ৰত অনুষ্ঠিত হব। ইয়াৰে ২০ হাজাৰ ব্যক্তিগত খণ্ডত সম্পন্ন হব। চৰকাৰী খণ্ডৰ ১০ হাজাৰ কেন্দ্ৰত টীকাকৰণ বিনামূলীয়া হব যদিও ব্যক্তিগত খণ্ডত টীকাকৰণৰ বাবদ ২৫০ টকা লোৱা হ’ব ।
আনহাতে ৰাজ্যৰ আগন্তক নিৰ্বাচন সন্দৰ্ভত মন্ত্রী চৌবেই মত বিনিময় কৰি কয় ৰাজ্যৰ ৰাজনৈতিক বিজেপিৰ অনুকূল। মুখ্যমন্ত্ৰী সৰ্বানন্দ সোণোৱালৰ নেতৃত্বত বিগত প্ৰায় পাঁচটা বছৰত ৰাজ্যখনে বহু উন্নয়ন সাধন কৰিবলৈ সক্ষম হৈছে।
প্ৰধানমন্ত্ৰী নৰেন্দ্ৰ মোদীয়ে অসমসহ উত্তৰ পূৰ্বাঞ্চলৰ প্ৰতি অতি সংবেদনশীল আৰু বিগত পাঁচ বছৰত তেওঁ প্ৰায় ৩৫ বাৰ উত্তৰ পূৰ্বাঞ্চলৰ ৰাজ্য সমূহ ভ্ৰমণ কৰিছে। আমি অসমত আশা কৰা ধৰণে বিজেপি মিত্ৰজোঁটে ১০০ খনতকৈ অধিক আসন পাম।
আনহাতে চৌৱেই সৰ্বানন্দ সোণোৱালৰ নেতৃত্বত পুনৰ ৰাজ্যত বিজেপি চৰকাৰ গঠন হব বুলি ব্যক্ত কৰি এইবাৰৰ কেন্দ্ৰীয় বাজেটত অসমৰ বাবে ৫৩ হাজাৰ কৌটি টকা ধার্য কৰা হৈছে বুলি কয়।
বাক্সাৰ তিনিটা সমষ্টিত ৫,৩৬,৯৯৫ গৰাকী ভোটাৰে কৰিব ভোটদান : স্থাপন হ’ব ২৫ টা মহিলা ভোট কেন্দ্ৰ
বিধানসভা নিৰ্বাচনৰ বাবে নির্বাচনী অধিসূচনা জাৰি কৰাৰ পিছতে শান্তিপূর্ণভাৱে নির্বাচন অনুষ্ঠিত কৰিবলৈ তৎপৰ হৈ পৰিছে বাক্সা জিলা প্রশাসন ৷ ইতিমধ্যে নিৰ্বাচনৰ কামত জড়িত চেলসমূহৰ লগতে ফ্লাইং স্কোৱাডসমূহ সক্ৰিয় হৈ উঠিছে নিৰ্বাচনী কামৰ বাবে ৷ বাক্সা জিলাৰ তিনিটা বিধানসভা সমষ্টিত তৃতীয় পৰ্যায়ত অনুষ্ঠিত হ’বলগীয়া নিৰ্বাচনক লৈ আজি বাক্সা জিলা উপায়ুক্তৰ সভাকক্ষত অনুষ্ঠিত হয় এক সংবাদমেল ৷
সংবাদমেলত জিলা উপায়ুক্ত তথা ৰিটাৰ্ণি বিষয়া ৰঞ্জন শৰ্মাই নির্বাচনী আয়ােগে প্রণয়ণ কৰা নির্বাচন সংক্রান্তীয় নীতি-নির্দেশনাসমূহ, পােষ্টেল বেলট প্ৰক্ৰিয়া তথা ভােটদানৰ ক্ষেত্ৰত নির্বাচনী আয়ােগে নিৰ্ধাৰণ কৰা ক’ভিড-১৯ৰ নির্দেশাৱলীসমূহ বিষদভাবে ব্যাখ্যা কৰে ৷ বাক্সা জিলাৰ অন্তৰ্গত তিনিটা বিধানসভা সমষ্টি ক্ৰমে ৫৮ নং তামুলপুৰ, ৬২ নং বৰমা আৰু ৬৩ নং চাপাগুৰি বিধানসভা সমষ্টিত ৫,৩৬,৯৯৫ গৰাকী ভোটাৰে ভোটদান কৰিব ৷
জিলা উপায়ুক্ত ৰঞ্জন শৰ্মাই জানিবলৈ দিয়া মতে তামুলপুৰত ২,১০,৩৭৯ গৰাকী, বৰমাত ১,৬৫,৮৪৮ গৰাকী আৰু চাপাগুৰিত ১,৫৭,৩৬৮ গৰাকী ভোটাৰে ৭৮৮ টা ভোটকেন্দ্ৰত ভোটদান কৰিব ৷ ইয়াৰ বাবে বিধানসভা সমষ্টি তিনিটা ১৯ টা জ’ন আৰু ৭৬ টা চেক্টৰত বিভক্ত কৰা হৈছে বুলি জানিব দি উপায়ুক্ত ৰঞ্জন শৰ্মাই ৩৭৮২ গৰাকী পোলিং বিষয়া নিয়োগ কৰিব বুলি কয় ৷ তেওঁ কয় যে সমষ্টি তিনিটাত ২৫ টা মহিলা ভোট কেন্দ্ৰ স্থাপন কৰাৰ বিপৰীতে দুটাকৈ আদৰ্শ ভোটকেন্দ্ৰ স্থাপন কৰিব ৷ উল্লেখ্য যে এইবাৰ জিলাখনৰ তিনিটা সমষ্টিত মুঠ ৯২৭৪ গৰাকী নতুন ভোটাৰ বৃদ্ধি পাইছে ৷
আনহাতে ক’ভিড-১৯ৰ প্ৰতি লক্ষ্য ৰাখি মাস্ক, সামাজিক দূৰত্ব মানি চলাৰ ক্ষেত্ৰত বিশেষ গুৰুত্ব দিব বুলি উপায়ুক্ত গৰাকীয়ে সংবাদমেলত প্ৰকাশ কৰে ৷ সম্পূৰ্ণ ক’ভিড প্ৰট’কল মানি ভোট গ্ৰহণৰ ব্যৱস্থা কৰা হ’ব ৷ প্ৰতিটো ভোটগ্ৰহণ কেন্দ্ৰত স্কেনিং মেচিনৰ সহায়ত ভোটাৰৰ উষ্ণতা পৰীক্ষা কৰা হ’ব। উষ্ণতা বেছি থাকিলে তেওঁলোকক আছুতীয়া কক্ষত ৰখা হ’ব আৰু ভোট গ্ৰহণৰ শেষৰ সময়ত তেওঁলোকৰ ভোট গ্ৰহণ কৰা হ’ব ৷ নিৰ্বাচনী বিষয়াসকলক হেণ্ড গ্লোভচ্ ,চেনিটাইজাৰ আদি যোগান ধৰা হ’ব ৷
আনহাতে ৰাজনৈতিক দলৰ প্ৰাৰ্থীয়ে এইবাৰ নিৰ্বাচনত সৰ্বমুঠ ৩০ লাখ ৮০ হাজাৰ টকা খৰচ কৰিব পাৰিব লগতে ক’ভিড-১৯ৰ নীতি-নিয়ম সমূহ মানি চলাৰ লগতে ৰাজনৈতিক দলৰ প্ৰাৰ্থীয়ে মনোনয়ন দিয়াৰ সময়ত মাত্ৰ দুজন লোকক লগত লৈহে প্ৰৱেশ কৰিব পাৰিব বুলি জানিব দিয়ে। প্ৰতিটো ৰাজনৈতিক দলকে শান্তিপূর্ণভাবে নির্বাচন অনুষ্ঠিত কৰাত আৰক্ষী প্রশাসনক সহযােগিতা আগবঢ়াবলৈ উপায়ুক্ত গৰাকীয়ে আহ্বান জনায়।
তদুপৰি এইবেলি ভোটগ্ৰহণৰ ক্ষেত্ৰত দিব্যাংগ ভোটাৰসকলৰ বাবে লোৱা হৈছে বিশেষ ব্যৱস্থা ৷ প্ৰতিটো ভোটগ্ৰহণ কেন্দ্ৰৰ অধীনত থকা দিব্যাংগ ভোটাৰসকলৰ তথ্য আগতীয়াকৈ সংগ্ৰহ কৰিব প্ৰশাসনে ৷ দিব্যাংগ ভোটাৰসকলে ইচ্ছা কৰিলে ডাক বেলটৰ যোগেও ভোটদান কৰিব পাৰিব ৷ নিৰ্বাচনী আয়োগৰ নিৰ্দেশনা অনুসৰি প্ৰতিজন দিব্যাংগ ভোটাৰ আৰু ৮০ বছৰ বয়সৰ উৰ্ধৰ ভোটাৰৰ ক্ষেত্ৰত লোৱা হ’ব এই ব্যৱস্থা ৷ ভোটাৰৰ ওজৰ আপত্তি আৰু সহায়ৰ বাবে জিলা প্ৰশাসনে মুকলি কৰিছে ১৯৫০ টোলফ্ৰী নম্বৰ ৷
আজিৰ এই নিৰ্বাচনী সংবাদমেলত উপায়ুক্তগৰাকীৰ লগতে জিলা নিৰ্বাচনী বিষয়া মানৱেন্দ্ৰ ভৰালী, অতিৰিক্ত উপায়ুক্তদ্বয় অৰুণ কুমাৰ ব্ৰহ্ম আৰু সঞ্জীৱ শৰ্মাও উপস্থিত থাকে ৷ উল্লেখ্য যে অহা ৬ এপ্ৰিলত তৃতীয় পৰ্যায়ত অনুষ্ঠিত হব বাক্সা জিলাৰ ৩ টা বিধানসভা সমষ্টিৰ ভোটগ্ৰহণ
অসমত শক্তিশালী ৰূপত আত্মপ্ৰকাশ এন পি পি’ৰ
অসমৰ বিধান সভা নিৰ্বাচনৰ দিন চমু চাপি অহাৰ লগে লগে অন্য ৰাজনৈতিক দল সমূহৰ লগতে শেহতীয়াকৈ সৰ্বভাৰতীয় ৰাজনৈতিক দল নেচনেল পিপলছ পাৰ্টি, চমুকৈ এন.পি.পি য়ে ২০ ফেব্ৰুৱাৰীত দলৰ কেন্দ্ৰীয় সভাপতি তথা মেঘালয়ৰ মুখ্যমন্ত্ৰী কৰ্ণাড কে চাংমাৰ উদ্যোগত গুৱাহাটীত অনুষ্ঠিত এক বিশেষ সভা। উক্ত সভাতেই অসম ৰাজ্যিক সমিতিৰ শাখা পুণৰ গঠন কৰা হয়। উক্ত সভাই যোৰহাটৰ বিশ্বজিৎ বৰুৱাক তত্বাবধায়ক আৰু জোনাই মহাবিদ্যালয়ৰ অৱসৰপ্ৰাপ্ত অধ্যক্ষ পূৰ্ণকান্ত পেগু, আবুল হুছেইন, আৰু পাৰ্থ প্ৰতীম মহন্তক সম্পাদক হিচাপে দায়িত্ব ভাৰ অৰ্পণ কৰে। এন পি পিৰ অসম প্ৰদেশৰ তত্বাবধায়ক বিশ্বজিৎ বৰুৱাই জনোৱা মতে আগন্তুক নিৰ্বাচনত অসমৰ ২০-৩৫ টা সমষ্টিত দলে প্ৰাৰ্থী ঠিয় কৰোৱাব। বৰুৱাৰ মতে দলটোৱে ইতিমধ্যে টীয়ক ,মৰিয়ণি, আমগুৰিকে ধৰি অসমৰ বহুকেইটা সমষ্টিত সমষ্টি ভিত্তিক তদৰ্থ সমিতি সমূহ গঠন কৰিছে।তেওঁৰ মতে ২৫ ফেব্ৰুৱাৰীত জিতু দুৱৰা, প্ৰশান্ত পাছনী,প্ৰকাশ বৰুৱা, অম্বৰীশ কৃষ্ণ শইকীয়া প্ৰমুখ্যে ৯ জন সদস্যক লৈ টীয়ক সমষ্টিৰ তদৰ্থ সমিতি খন গঠন কৰিছে। উল্লেখযোগ্য যে দলটোৰ প্ৰথম খন প্ৰাৰ্থী তালিকা ৫ মাৰ্চত প্ৰকাশ পাব।
বৰপেটা জিলাৰ বালাপাৰা আৰক্ষী চকীৰ সন্মুখতে বৰলা আমদহ সভাত জুৱাৰ মুকলি বেহা
বৰপেটা জিলাৰ বালাপাৰা আৰক্ষী চকীৰ অন্তগৰ্ত বৰলা (আমদহ) সভাত ২/৩ দিন ধৰি অব্যাহত আছে জুবাৰ মুকলি ৰমৰমীয়া বেহা। প্ৰাপ্ত অভিযোগ অনুসৰি বালাপাৰা আৰক্ষী চকীৰ ছত্ৰ ছায়াত একাংশ জুৱা মাফিয়াই সভা,পূজাৰ গইনা লৈ অব্যাহত ৰাখিছে অবৈধ জুৱাৰ ঘাটি।যাৰ পৰিপ্ৰেক্ষিতত বহু উদীয়মান যুৱক বিপথে পৰিচালিত হোৱা বুলি পৰিলক্ষিত হৈছে।বিভিন্ন দল সংগঠনে এনে ঘৃণীয় কাৰ্য্যক কঠোৰ ভাষাৰে সমালোচনা কৰি বালাপাৰা আৰক্ষীৰ নিৰৱ ভুমিকাক লৈ অসন্তুষ্টি প্ৰকাশ কৰিছে। এনে অসামাজিক কাৰ্য্য ৰোধ কৰাৰ লগতে এনে কাৰ্য্যত জড়িত লোকক কৰায়ক্ত কৰি দৃষ্টান্তমূলক শাস্তি বিহাৰ দাবী কৰিছে। প্ৰশ্ন হয় স্থানীয় বালাপাৰা আৰক্ষী চকীৰ চকুৰ আগত জুৱা চলি থকাৰ পিছতো চকু মুদা কুলিৰ ভাও কিয় জুৰিছে ? জুৱাৰ লগত আৰক্ষীৰ কিয় মিতাৰালি ? কাৰ বলেৰে বলিয়ান এই সকল জুৱা মাফিয়া??বৰপেটা জিলা প্ৰশাসনে উৎখাত কৰিবলৈ সক্ষম হৱনে এই সমূহ সভাই পূজাই গঢ় লৈ উঠা অবৈধ জুৱাৰ ঘাটি নে এনেদৰেই আৰক্ষী চকুৰ সন্মুখতে চলি থাকিৱ অবৈধ জুৱাৰ ঘাটি ? পৰবৰ্তী পৰ্য্যায়ত প্ৰশাসনে এই সকল অবৈধ জুৱাৰীৰ ওপৰত কি ব্যবস্থা লয় সেয়া লক্ষণীয় হৱ ?
মহামৃত্যুঞ্জয় মন্দিৰত মহাদেৱৰ আৰাধনাত ব্যস্ত বিশ্ববিখ্যাত ড্ৰামবাদক শিৱমণি
আজি মহামৃত্যুঞ্জয় মন্দিৰৰ প্ৰাণপ্ৰতিষ্ঠা উৎসৱ। বিশ্বৰ ভিতৰতে সৰ্ববৃহৎ লিঙ্গাকাৰ শিৱমন্দিৰত আজিৰে পৰা আৰম্ভ হৈছে প্ৰাণপ্ৰতিষ্ঠা মহোৎসৱ। দক্ষিণ ভাৰতৰ দুইশতাধিক ব্ৰাহ্মণে অংশগ্ৰহণ কৰিছে এই প্ৰাণ প্ৰতিষ্ঠা মহোৎসৱত। কিন্তু মহামৃত্যুঞ্জয় মন্দিৰত আন এক দৃশ্যই আজি সকলোকে আকৰ্ষিত কৰিছে। আজি মন্দিৰৰ প্ৰাণ প্ৰতিষ্ঠা মহোৎসৱত পুৱাৰে পৰা মহাদেৱৰ আৰাধনাৰে ড্ৰামবাদন কৰিছে বিশ্ববিখ্যাত ড্ৰামবাদক শিৱমণিয়ে। মূৰত গামোচাৰে পাগুৰি মাৰি পুৱাৰে পৰা শিৱমণিয়ে মহামৃত্যুঞ্জয় মন্দিৰৰ ভিতৰত কৰিছে ড্ৰামবাদন। জনপ্ৰিয় সংগীত পৰিচালক এ আৰ ৰহমানৰ সৈতে ড্ৰামবাদন কৰা শিৱমণিয়ে পুৱাৰে পৰা কৰা ড্ৰামবাদনে আকৰ্ষিত কৰিছে দৰ্শনাৰ্থীক। অহা ৫মাৰ্চ পৰ্য্যন্ত মহামৃত্যুঞ্জয় মন্দিৰত চলিব এই প্ৰাণ প্ৰতিষ্ঠা মহোৎসৱ।