নগাঁও জিলাৰ পুৰণিগুদাম আৰক্ষী চকীৰ অন্তৰ্গত ভীমৰ গাওঁত সংঘটিত হোৱা পথ দুৰ্ঘটনা এজন ব্যক্তি মৃত্যু হোৱাৰ লগতে দুজন ব্যক্তি গুৰুত্বৰ ভাৱে আহত হয়। দুৰ্ঘটনাত সন্দৰ্ভত জানিব পৰা মতে ভীমৰগাওঁৰ তুলাৰাম দাস নামৰ ব্যক্তিজনে ৩৭ নং ৰাষ্ট্ৰীয় ঘাইপথ পাৰ হ’ব খোজোতে চামগুৰি অভিমুখে তীব্ৰ বেগেৰে গৈ থকা   as02af1986 নম্বৰ বাইক খনেৰে খুন্দা মৰাত তুলাৰাম দাস (৫৭) ব্যক্তিজন থিতাতে নিহত হোৱাৰ লগতে বাইক চালকৰ লগতে  আৰোহী যুৱতী গুৰুত্বৰ ভাৱে  আহত হয়। পাছত পুৰণিগুদাম আৰক্ষী দুৰ্ঘটনা স্থলিত উপস্থিত হৈ আহত ব্যক্তি দুজনক নগাওঁ ভুগেশ্বৰী ফুকননী অসামৰিক চিকিৎসালয়লৈ প্ৰেৰণ কৰা লগতে নিহত হোৱা দাসৰ মৃতদেহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে ।

বিশ্বনাথ জিলাৰ অন্তৰ্গত অসম অৰুণাচল সীমান্তৱৰ্তীৰ ছেলাইখাতিৰ লগতে পাৰ্শ্বৱৰ্তী এলেকা সমুহৰ  ৰাইজে  ক’ৰোনা মহামাৰীৰ শেহতীয়া পৰিস্থিতিৰ প্ৰতি লক্ষ্য ৰাখি বিবাহ অনুষ্ঠানৰ লগতে ধৰ্মীয় অনুষ্ঠান সমুহ আয়োজন কৰাৰ পৰা সম্পুৰ্ণ ৰূপে বিৰত আছে ৷ সম্প্ৰতি ক’ভিড-১৯ দ্বিতীয়টো ঢৌৱে মৃত্যুৰ বিভিষিকা সৃষ্টিত এতিয়া গাঁৱৰ পৰিৱেশতো গঞা ৰাইজ আতংকিত হোৱা দেখা গৈছে। বিশ্বনাথ জিলা প্ৰশাসনৰ তৰফৰ পৰা ব্যৱসায়ীক প্ৰতিষ্ঠান সমুহ দিনৰ ২ বজাৰ পৰা  বন্ধৰ ঘোষনা কৰিছে ৷ লগতে শিক্ষানুষ্ঠান সমুহ বন্ধ ৰাখিছে। ইয়াৰ উপৰিও  সকলো কাৰ্যালয়  ২ বজাৰ পৰাই বন্ধ  থকাৰ নিৰ্দেশনা জাৰি কৰিছে  ৷বিবাহৰ অনুষ্ঠান হলে ২০ জন লোকৰ হে উপস্থিতিৰ অনুমতি আছে ৷ধৰ্মীয় পৰম্পৰা ৰক্ষাৰ বাবে অভ্যৰ্থনাৰ অনুমতি নাই বুলি জানিব পৰা গৈছে ৷আনহাতে সন্ধিয়া ৬ বজাৰ পৰা পুৱা ৫ বজালৈ সান্ধ্য আইন বলবৎ থাকাত চৌদিশে জনশূণ্য পৰিৱেশ  ৷অসম অৰুণাচল সীমান্তৱৰ্তীৰ  বৃহত্তৰ এলেকাকে ধৰি মহজুলি পথাৰ ব্যৱসায়ীক প্ৰতিষ্ঠান সমুহ দিনৰ ২ বজাৰ পৰাই বন্ধ হোৱা  পৰিলক্ষিত হৈছে ৷আনহাতে ঠায়ে ঠায়ে কভিদ১৯ৰ উদ্বেগজনক  পৰিস্থিতিক লৈ বিশেষ সজাগতামুলক কাৰ্যসুচীও ৰূপায়ণ কৰাৰ লগতে অসম অৰুণাচল সীমান্তৱৰ্তীৰ   সচেতন লোকসকলক সজাগতা অনা পৰিলক্ষিত হৈছে।

 গোলাঘাটত পুনৰ  দুজনৰ ক’ভিডত আক্ৰান্ত হৈ মৃত্যু। আজিলৈকে  মৃতকৰ সংখ্যা ৭ জনলৈ বৃদ্ধি ।গোলাঘাট জিলা ক’ভিড চিকিৎসালয়ত ক’ভিডত আক্ৰান্ত হৈ  নিশা এজনৰ মৃত্যু হোৱা বিপৰীতে আজি পুৱা আন এজন ৰোগীৰ মৃত্যু হয়। উল্লেখ্য যে গোলাঘাট জিলা কাজিৰঙা দ গাঁৱৰ তোলন গগৈ নামৰ ৩৫ বছৰীয় লোকজন  নিশা ১১.৫০ বজাত ক’ভিডত আক্ৰান্ত হোৱাত কভিড চিকিৎসালয় ভৰ্তি কৰায় যদিও ১:৪৫ বজাত লোকজনৰ মৃত্যু হয়। আনহাতে আজি পুৱা গোলাঘাট লাইফ লাইন চিকিৎসালয় সমীপৰ নিবাসী ভৱেন্দ্ৰ শৰ্মা নামৰ  লোকজন পুৱা কভিড চিকিৎসালয়ত মৃত্য হয়। বৰ্তমান গোলাঘাটত কভিডত আক্ৰান্ত হৈ মৃত্যু লোকৰ সংখ্যা ৭ জনলৈ বৃদ্ধি পোৱাৰ লগতে কালিলৈকে আক্ৰান্তৰ সংখ্যা বৃদ্ধি হৈ ১২৩৫ জন হৈছে।

এগৰাকী প্ৰাপ্ত বয়স্ক যুৱতীয়ে নিজৰ ইচ্ছাৰে এজন যুৱকৰ সৈতে পলাই যোৱাৰ পিছত পৰৱৰ্তী আৰক্ষীয়ে যুৱক-যুৱতীক উদ্ধাৰ কৰি যুৱকৰ বিৰুদ্ধে অপহৰণৰ গোচৰ ৰজু কৰি জেলত প্ৰেৰণ কৰাক লৈ ডবকাত ব্যাপক প্ৰতিক্ৰিয়াৰ সৃষ্টি হৈছে ৷ প্ৰাপ্ত বাতৰি অনুসৰি ডবকা থানাৰ অন্তৰ্গত ভেলৌগুৰি পথাৰৰ জনৈক জাকিৰৰ কন্যা আৰু চাংমাজী মিকিৰ পথাৰ গাঁৱৰ ৰাজীব আহমদ নামৰ এহাল যুৱক-যুৱতী যোৱা ১ মে’ৰ পৰাই ঘৰৰ পৰা অন্তৰ্ধান হয় ৷ পৰৱৰ্তী যুৱক-যুৱতীহালে গুৱাহাটীৰ এখন হোটেলত আশ্ৰয় লয় ৷ ঘটনা সম্পৰ্কত যুৱতী গৰাকীৰ পিতৃয়ে তেওঁৰ ‘নাবালিকা’ কন্যাক অপহৰণ কৰি লৈ যোৱা বুলি ডবকা আৰক্ষী থানাত এখন এজাহাৰ দাখিল কৰে ৷ আৰক্ষীয়ে যুৱকজনৰ বিৰুদ্ধে অপহৰণসহ কেবাটাও ধাৰাত ২০১/২১ নম্বৰত গোচৰ ৰুজু কৰি তদন্ত আৰম্ভ কৰে ৷ তদন্তৰ মাজতে যোৱা নিশা গুৱাহাটী আৰক্ষীৰ সহযোগত অন্তৰ্ধান হোৱা যুৱক-যুৱতীক উদ্ধাৰ কৰি ডবকা আৰক্ষীয়ে নিজৰ জিম্মাত লয় ৷ আজি যুৱকজনক ডবকা আৰক্ষীয়ে জেল হাজোতলৈ প্ৰেৰণ কৰাৰ লগতে যুৱতী গৰাকীক জবানবন্দী লিপিৱদ্ধ কৰিবলৈ ন্যায়িক প্ৰক্ৰিয়া আৰম্ভ কৰে ৷ ইপিনে, যুৱকজনক আৰক্ষীয়ে জেল হাজোতলৈ প্ৰেৰণ কৰাত ডবকাত ব্যাপক প্ৰতিক্ৰিয়াৰ সৃষ্টি হৈছে ৷ যুৱকজনৰ পৰিয়ালৰ লোকে কৰা অভিযোগ মতে, যুৱক-যুৱতীৰ মাজত দীৰ্ঘদিনৰ পৰা প্ৰেমৰ সম্পৰ্ক চলি আছে ৷ আনকি কিছু বছৰ পূৰ্বে সেই একে গৰাকী যুৱতী ঘৰৰ পৰা পলাই আহি যুৱকজনৰ ঘৰত উপস্থিত হৈছিল ৷ তেতিয়াই সমাজৰ লোকে যুৱতীগৰাকী প্ৰাপ্তবয়স্ক নোহোৱাত পিতৃৰ ওচৰত চমজাই দিয়া হৈছিল ৷ ইতিমধ্যে ওঠৰ বছৰ সম্পূৰ্ণ কৰা যুৱতীগৰাকীৰ পৰিয়ালে যুৱকজনৰ লগত বিয়া নিদিয়াৰ কথা কোৱাত যোৱা ১ মে’ৰ দিনা দুয়ো ঘৰৰ পৰা অন্তৰ্ধান হয় ৷ এইহাল যুৱক-যুৱতীৰ মাজত দীৰ্ঘদিনৰ পৰা প্ৰেমৰ সম্পৰ্ক চলি থকাৰ প্ৰমাণ হিচাপে যুৱকজনৰ পৰিয়ালৰ লোকে দুয়োৰ কিছু অন্তৰঙ্গ মুহূৰ্তৰ ফটোও সংবাদ মাধ্যমৰ লোকক প্ৰদৰ্শন কৰে ৷ লগতে যুৱতী গৰাকী যে সাবালক, তাৰ প্ৰমাণ হিচাপে জন্মৰ প্ৰমাণ থকা আধাৰ কাৰ্ডো যুৱকৰ পৰিয়ালে প্ৰদৰ্শন কৰে ৷ দুয়ো নিজৰ সন্মতিতে ঘৰৰ পৰা পলাইছিল, দুয়োৰে মোবাইল নম্বৰ পৰীক্ষা কৰিলে বহু কথা জলজল-পটপট হৈ ওলাই পৰিব ৷ এহাল প্ৰাপ্ত বয়স্ক যুৱক-যুৱতীয়ে নিজৰ পছন্দ অনুযায়ী বিবাহপাশত আৱদ্ধ হব পাৰে, এই সম্পৰ্কে দেশৰ উচ্চতম ন্যায়ালয়ে বহুকেইটা নিৰ্দেশ দি থৈছে ৷ তাৰ মাজতে ডবকা আৰক্ষীয়ে এগৰাকী প্ৰেমিক যুৱকৰ বিৰুদ্ধে মাৰাত্মক ধাৰাত গোচৰ ৰুজু কৰি জেললৈ প্ৰেৰণ কৰা সহজভাৱে লোৱা নাই ৷