দেৰগাঁও সমষ্টিৰ মিত্ৰজোঁটৰ উমৈহতীয়া প্ৰাৰ্থীৰূপে পুণৰবাৰ অগপৰ ভৱেন্দ্ৰ নাথ ভৰালীক প্ৰাৰ্থীত্ব প্ৰদান কৰাৰ পাছত সমষ্টিটোৰ ভোটাৰ ৰাইজৰ মাজত মিশ্ৰিত প্ৰতিক্ৰিয়াৰ সৃষ্টি হৈছে। বিশেষকৈ, বিজেপি কৰ্মীসকলৰ নিজা প্ৰাৰ্থী প্ৰক্ষেপৰ দাবীক নেতৃত্বই গুৰুত্ব নিদিয়াত বিজেপি তৃনমূলৰ কৰ্মীসকল ক্ষোভিত হৈ পৰিছে। যোৱা কায্যকালত সমষ্টি উন্নয়নত ব্যৰ্থতা, মিত্ৰজোঁটৰ কৰ্মীসকলক গুৰুত্ব নিদিয়া, দেৰগাঁৱত অগপৰ নিশকটিয়া ভেটি আদিৰ অভিযোগেৰে এইবাৰ নিৰ্বাচনত বিজেপি কৰ্মীসকলে ভঁৰালীৰ প্ৰাৰ্থীত্বৰ বিৰোধিতা কৰি যিকোনো এজন বি জে পিৰ দলীয় দাবীদাৰক দেৰগাঁৱত প্ৰাৰ্থীত্ব প্ৰদাণৰ দাবী উত্থাপন কৰিছিল। কিন্তু শেহান্তৰত পুণৰ ভৱেন্দ্ৰ নাথ ভঁৰালীকে প্ৰাৰ্থীত্ব দিয়াত অসন্তুষ্ট বিজেপিৰ একাংশ কৰ্মীয়ে চৰম ক্ষোভ প্ৰকাশ কৰি, এইবাৰ ভোট বৰ্জন, দলত্যাগ,আৰু অন্যদলৰ প্ৰাৰ্থীক সমৰ্থন আগবঢ়াব বুলি ব্যক্ত কৰিছে। শাসকীয় মিত্ৰজোঁটৰ প্ৰাৰ্থীত্বকলৈ এনে প্ৰতিক্ৰিয়া অব্যাহত থকা সময়তে বিজেপিৰ বঞ্চিত প্ৰাৰ্থীত্বৰ দাবীদাৰ, প্ৰাক্তন বিধায়িকা সুশীলা হাজৰিকাই নিৰ্বাচনত নিৰ্দলীয়ৰূপত অৱতীৰ্ণ হোৱাৰ যো-জা কৰাৰ খবৰ এক বিশেষ সুত্ৰৰ যোগেদি জানিব পৰা গৈছে। এই খৱৰে একপ্ৰকাৰ দেৰগাঁৱত মিত্ৰজোঁটৰ প্ৰাৰ্থী ভৱেন্দ্ৰ নাথ ভঁৰালীলৈ সংশয় নমাই আনিছে ।উল্লেখযোগ্য যে, কংগ্ৰেছৰ প্ৰাক্তন বিধায়িকা আৰতী হাজৰিকা কছাৰীৰ অকাল বিয়োগৰ পিছত সমষ্টিটোত এইবাৰ কংগ্ৰেছ প্ৰাৰ্থী বাণী হাজৰিকা হ’ব নতুনমুখ।তাৰোপৰি কেবাজনো দীৰ্ঘদিনীয়া দাবীদাৰৰ মাজৰ অন্যতম যোৰহাট জিলা কংগ্ৰেছ প্ৰশাসনিক সাধাৰণ সম্পাদক কৃষ্ণকান্ত দাস, উচ্চ শিক্ষিত ব্যক্তি তথা কলেজ শিক্ষক ড০ ৰমানন্দ দাসক বঞ্চিত কৰি বানী হাজৰিকাৰ প্ৰাৰ্থীত্ব লাভে কংগ্ৰেছ শিবিৰতো সমৰ্থক সকল অসন্তুষ্ট নোহোৱাকৈ থকা নাই।।ইফালে, অসম জাতীয় পৰিষদ, ৰাইজৰ দলৰ উমৈহতীয়া প্ৰাৰ্থী অৱসৰপ্ৰাপ্ত অধ্যক্ষ আনন্দ চন্দ্ৰ দাসো এগৰাকী শক্তিশালী প্ৰাৰ্থী।এনে পৰিপেক্ষিতত নতুন মুখৰ কংগ্ৰেছ প্ৰাৰ্থীগৰাকীক অভিজ্ঞতাপুষ্ট ভৱেন ভৰালীয়ে পৰাস্ত কৰি পুণৰবাৰ দেৰগাঁৱৰ আসনখন লাভৰ সম্ভাৱনা নথকাও নহয় যদিও বিজেপি নেত্ৰী তথা প্ৰাক্তন অগপ বিধায়িকা সুশীলা হাজৰিকাই প্ৰতিদ্বন্দ্বিতা আগবঢ়ালে ভৱেন ভৰালীৰ সন্মুখত যে তীব্র প্ৰত্যাহ্বান আহি পৰিব ই নিশ্চিত।অৱশ্যে সুশীলা হাজৰিকাই,নেতৃত্বৰ বিৰুদ্ধে অসন্তুষ্ট বিজেপি কৰ্মীসকলৰ আহবানত নিৰ্বাচনত প্ৰতিদ্বন্দ্বিতা কৰাৰ যো-জা চলাইছে যদিও এইয়া হৈ উঠে নে নুঠে সেইয়া এতিয়াও স্পষ্ট হোৱা নাই।

অসমৰ আসন্ন বিধান সভাৰ নিৰ্বাচনৰ দিন চমু চাপি অহাৰ লগে লগে ৰাজনৈতিক দলসমূহে নিৰ্বাচনী ততপৰতা তথা প্ৰাৰ্থী বাচনি প্ৰক্ৰিয়া সম্পন্ন কৰিছে । ইতিমধ্যে প্ৰাৰ্থীত্ব প্ৰয়াসীসকলৰ জল্পনা-কল্পনা ওৰ পেলাই 84 নং বটদ্ৰৱা সমষ্টিত বি জে পি কংগ্ৰেছ অসম জাতীয় পৰিষদ ৰাইজৰ দলে ইতিমধ্যে নিজা নিজা প্ৰাৰ্থীৰ নাম ঘোষণা  কৰিছে । সেই হিচাপে আগন্তুক 2021 চনৰ বিধানসভাৰ বটদ্ৰৱা সমষ্টিত কংগ্ৰেছে শিৱাণী বৰা বিজেপিয়ে পুনৰ আঙুৰলতা ডেকাক প্ৰাৰ্থীৰূপে প্ৰক্ষেপ কৰিছে । দিনৰ 11 বজাত বি জে পি দলৰ টিকট নিশ্চিত কৰি প্ৰাৰ্থী আঙুৰলতা  ডেকা সমষ্টি তথা নিজা গৃহভূমি অভিমুখে অহাৰ পথত বাৰপূজীয়াত উপস্থিত হোৱাৰ লগে লগে আদৰিবলৈ ৰৈথকা বিপুল সংখ্যক সমৰ্থকৰ হৰ্মাষোল্লাসৰ মাজত আঙুৰলতা জিন্দাবাদ বি জে পি জিন্দাবাদ ধ্বনিৰে ফটকা আতচবাজীৰে এক আবতৰীয়া দেৱালী পৰিবেশৰ সূচনা কৰে । পিছত উপস্থিত সমৰ্থক -ৰাইজৰ অভিনন্দন তথা আশীষলৈ সমৰ্থকসহ  সদলবলে প্ৰাক্তন বিধায়িকা গৰাকীয়ে  নিজাগৃহভূমি লৈ যাত্রা আৰম্ভ  কৰে । বি জে পি দলৰ  বিৰুদ্ধে প্ৰতিপক্ষ দলসমূহে  কেনেদৰে যুঁজত অৱতীৰ্ন  হয় সেয়া সময়তহে  দেখা পোৱা যাব ।  

প্ৰথম পৰ্যায়ৰ নিৰ্বাচনৰ দিন ঘোষণা হোৱাৰ পাছতেই ৰাজ্যৰ ভিতৰতে দ্বিতীয়গৰাকী প্ৰাৰ্থী হিচাপে বোকাখাতত আজি আম আদমী পাৰ্টিৰ প্ৰাৰ্থী ৰূপে আৰ টি আই কৰ্মী বিজয় কুটুমে মনোনয়ন পত্ৰ দাখিল কৰে ৷ ২০১৬ চনতো বোকাখাতত নিৰ্দলীয় প্ৰাৰ্থী হিচাপে প্ৰতিদ্বন্দ্বিতা কৰিছিল বিজয় কুটুমে ৷ সেইবাৰ নিৰ্বাচনত মাত্ৰ ১৩৫১ টা ভোট লাভ কৰিছিল আৰ টি আই কৰ্মী বিজয় কটুমে । মনোনয়ন পত্ৰ দাখিলৰ পাছত সাংবাদিকৰে হোৱা সাক্ষাৎকাৰত বিজয় কুটুমে দুৰ্নীতিমুক্ত আৰু এখন নিকা বোকাখাত গঢ়াৰ লক্ষ্য আগত ৰাখিয়েই মনোনয়ন পত্ৰ দাখিল কৰা বুলি মন্তব্য কৰে ৷ আম আদমী পাৰ্টিৰ নেতা তথা দিল্লীৰ মুখ্যমন্ত্ৰী অৰবিন্দ কেজৰিৱালৰ নীতি আদৰ্শৰ প্ৰতি অনুপ্ৰাণিত আৰু আকৃষ্ট হৈ আম আদমী পাৰ্টি চমুকৈ আপৰ প্ৰাৰ্থী হিচাপে মনোনয়ন পত্ৰ প্ৰদান কৰে বিজয় কুটুমে ৷ পূৰ্বৰ কংগ্ৰেছ চৰকাৰৰ দিনত আৰু বৰ্তমানৰ বিজেপি নেতৃত্বাধীন মিত্ৰজোঁটৰ চৰকাৰৰ দিনত কেবিনেট মন্ত্ৰী তথা স্থানীয় বিধায়ক অতুল বৰাই বোকাখাতত যিমান পৰিমাণৰ উন্নয়ণ সাধন কৰিব লাগিছিল, সেইয়া সমাধান কৰাত বিফল হোৱা বুলি মন্তব্য কৰে ৷ নিৰ্বাচনত তেওঁ বোকাখাতৰ পৰা বিজয়ী হ’লে স্বচ্ছ, নিকা আৰু দুৰ্নীতিমুক্ত বোকাখাত গঢ়াৰ সংকল্প আছে বুলি সাংবাদিকক জানিবলৈ দিয়ে ৷ লগতে শিক্ষিত নিৱনুৱা সকলক সংস্থাপনৰ ক্ষেত্ৰতো বিশেষ গুৰুত্ব প্ৰদান কৰাৰ উপৰিও বোকাখাতৰ উন্নয়ণত বিশেষ গুৰুত্ব প্ৰদান কৰিব বুলি সাংবাদিকক জানিবলৈ দিয়ে ৷ ইয়াৰ পূৰ্বে বোকাখাতৰ ইন্দিৰা গান্ধী স্মৃতি উদ্যানৰ সমীপৰ পৰা দলীয় সমৰ্থকসহ পদযাত্ৰা কৰি আহি বোকাখাত মহকুমা নিৰ্বাচনী বিষয়াৰ কাৰ্যালয়ত উপস্থিত হৈ দুই সমৰ্থকসহ বিজয় কুটুমে মনোনয়ন পত্ৰ নিৰ্বাচনী বিষয়া বিপুল দাসৰ হাতত মনোনয়ন পত্ৰ প্ৰদান কৰে ৷ কিন্তু পূৰ্বৰ নিৰ্বাচন দৰে এইবাৰ নিৰ্বাচনত বোকাখাতৰ জনতা জনাৰ্দনে বিজয় কুটুম প্ৰতি কি ৰায় প্ৰদান কৰে সেইয়া দুই মে’তহে জানিব পৰা যাব ৷

আগন্তুক বিধানসভা নিৰ্বাচনৰ বাবে শাসকীয় মিত্ৰজোঁটৰ  প্ৰাৰ্থীত্ব নিশ্চিত হোৱা অসম গণ পৰিষদ দলৰ প্ৰাৰ্থী তথা বৰ্তমানৰ সমষ্টিটোৰ বিধায়ক ভবেন্দ্ৰ নাথ ভঁৰালীক আজি দেৰগাঁৱত বিপুল আদৰণি জনোৱা হয়। আজি গুৱাহাটীৰ পৰা নিজৰ সমষ্টি দেৰগাঁৱলৈ অহাত নিৰ্বাচিনী প্ৰাৰ্থী তথা বৰ্তমানৰ বিধায়ক গৰাকীক সমৰ্থক সকলে আদৰি আনে। অসম গণ পৰিষদৰ দেৰগাঁও নগৰ সমিতিৰ কাৰ্যালয়ত  বিধায়ক তথা প্ৰাৰ্থী গৰাকীক সহস্ৰাধিক কৰ্মীয়ে বিপুল ভাবে আদৰণি জনায়। বৰ্তমানৰ বিধায়ক ভবেন্দ্ৰ নাথ ভঁৰালীয়ে প্ৰাৰ্থীত্ব লাভ কৰাত দলীয় কৰ্মী সকল উৎফুল্লিত হৈ আগতীয়া বিহু পতা দেখা যায়।  আনহাতে দেৰগাঁও বিধানসভা সমষ্টিটো বৰ্তমানৰ বিধায়ক গৰাকীৰ পৰিবৰ্তে ভাৰতীয় জনতা পাৰ্টীৰ পৰা প্ৰাৰ্থীত্ব প্ৰদানৰ দাবীত ভাৰতীয় জনতা পাৰ্টীৰ কৰ্মীসকলে উত্তাল পৰিৱেশৰ সৃষ্টি কৰি আহিছে। নিজৰ মিত্ৰজোঁটৰ বিধায়ক গৰাকীৰ বিৰুদ্ধেই বিভিন্ন সময়ত অকৰ্মকন্যতাৰ অভিযোগ তুলি ভাৰতীয় জনতা পাৰ্টীৰ ৰাজ্যিক সভাপতি ৰঞ্জিত দাসকে ধৰি সকলোৰে দলীয় প্ৰাৰ্থীত্বৰ দাবী জনাই আহিছিল। কিন্তু সকলোকে আচৰিত কৰি ভবেন্দ্ৰ নাথ ভঁৰালীয়ে প্ৰাৰ্থীত্ব লাভ কৰিবলৈ সক্ষম হয়। দেৰগাঁও বিধানসভা সমষ্টিত ভাৰতীয় জনতা পাৰ্টীৰ প্ৰাৰ্থীত্ব প্ৰত্যাষী সকলৰ ভিতৰত আছিল প্ৰাক্তন বিধায়িকা সুশীলা হাজৰিকা, মৃদুপৱন দাস, জয়ন্ত হাজৰিকা, জ্যোতি প্ৰকাশ নাৰায়ণ,  ৰঞ্জিত দাস আদি। ইপিনে ভবেন্দ্ৰ নাথ ভঁৰালীৰ প্ৰাৰ্থীত্ব প্ৰতিবাদত একাংশ বিজেপি দলৰ কৰ্মীয়ে দল ত্যাগৰো ভাবুকি দিয়া পৰিলক্ষিত হয়।উল্লেখ্য যে ভাৰতীয় জনতা পাৰ্টীৰ প্ৰাৰ্থীত্ব প্ৰত্যাষী মৃদু পৱন দাসে প্ৰাৰ্থী গৰাকীক গুৱাহাটীৰ পৰা নিজৰ সমষ্টি দেৰগাঁৱলৈ কৰা যাত্ৰা পথত  সংগ দিয়াৰ লগতে আদৰণিৰ সময়ত বিজেপিৰ দেৰগাঁও নগৰ মণ্ডলৰ সভাপতি দিলিপ খাউণ্ড, সম্পাদক উদয় ভাস্কৰ দত্তও উপস্থিত থাকে।

১০৭ নং থাওৰা বিধান সভা সমষ্টিৰ  বিজেপি অগপৰ মিত্রজোঁটৰ প্ৰাৰ্থী কুশল দুৱৰীক প্ৰাথীত্ব প্ৰদান কৰাৰ আনুষ্ঠানিক ঘোষণা নকৰিলেও দুৱৰীয়েই থাওৰাত প্ৰাথীত্ব পোৱাটো এক প্ৰকাৰে নিশ্চিত বুলি জানিব পাৰি উৎফুল্লিত হৈ পৰিছে থাওৰা বিজেপি। আজি দুপৰীয়া গুৱাহাটীৰ পৰা থাওৰা সমষ্টি প্ৰৱেশ পথতে এখন অত্যাধুনিক “ভিনটেজ অলফা ৰোমিঅ'” গাড়ীত বিজেপিৰ ২০২১ ৰ থাওৰা সমষ্টিৰ প্ৰাৰ্থী কুশল দুৱৰীক অাদৰি আনিলে হাজাৰোধিক বিজেপি থাওৰাৰ সৰ্মথকে । ২৭ মাৰ্চ অনুষ্ঠিত হবলগীয়া প্ৰথম পৰ্যায়ৰ নিৰ্বাচনৰ দলীয় টিকট ঘোষণাৰ পূৰ্বে ডিমৌ দিচাং ৰজাবাৰীৰ পৰা দলীয় কৰ্মকতা ,শুভাকাংক্ষীয়ে মটৰ চাইকেল গাড়ীয়ে এক বিশাল সমদলেৰে  আদৰি আনিলে  ডিমৌৰ বিজেপিৰ নিৰ্বাচনী মুখ্য কাৰ্যালয়লৈ । বিজেপিৰ প্ৰাথীত্ব লাভ কৰাৰ এক প্ৰকাৰে নিশ্চিত হোৱাত কুশল দুৱৰীক ৰেলিত থাওৰা সমষ্টিলৈ আদৰি অনাৰ পথত ৩৭ নং ঘাইপৰৰ দাঁতিত দলৰ সমৰ্থক আৰু ৰাইজে ফুলাম গামোচাৰে আদৰণি জনায় বৰ্তমানৰ বিধায়ক কুশল দুৱৰীক । ইয়াৰ পিছতে বিজেপিৰ ডিমৌৰ মুখ্য কাৰ্যালয়ত উপস্থিত হৈ দলীয় কৰ্মকৰ্তা সকলক উদেশ্য বক্তব্য ৰাখে আৰু আগন্তুক ২০ দিন থাওৰা বিজেপি তেওঁৰ হৈ কাম কৰি যাবলৈ আহ্বান জনায় আৰু তেওঁ সমষ্টিৰ ৰাইজৰ হৈ পাঁচটা বছৰ নিষ্ঠাৰে কাম কৰি যোৱাৰ প্ৰতিশ্ৰুতি দিয়ে। আনহাতে নিতাই পানীদিহিঙৰ নিতাইপুখুৰীত নিব্বাচনী মুখ্য কাৰ্যালয় আনুষ্ঠানিকভাৱে উদ্বোধন কৰে। কাৰ্যালয় উদ্ধোধনী অনুষ্ঠানত দলীয় কৰ্মী সকলক উদেশ্যি বক্তব্য ৰাখি আৰু এই নিৰ্বাচনত থাওৰা সমষ্টিৰ পৰা ১৫ হাজাৰ ভোটৰ ব্যৱধানত এইবাৰ জয়ী হৈ যাব বুলি ব্যক্ত কৰে। এই অনুষ্ঠানতে আন কেইবাটাও ৰাজনৈতিক দলৰ সদস্যই ভাৰতীয় জনতা পার্টিত আনুষ্ঠানিকভাবে যোগদান কৰে। আন্যহাতেদি ভাৰতীয় জাতীয় কংগ্ৰেছৰ থাওৰা সমষ্টিৰ প্ৰাথী হিচাপে প্ৰাক্তন বিধায়ক সুশান্ত বৰগোহাঞি নাম ইতিমধ্যে নিশ্চিত হৈছে। আগন্তুক দিনত থাওৰাত বিজেপি আৰু কংগ্রেছৰ এখন আকৰ্ষণীয় যুঁজ হোৱাটো নিশ্চিত যদিও জয় পৰাজয় সমষ্টিৰ ভোটাৰ ৰাইজেহে নিশ্চিয়তা কৰিব ।

ৰাজ্যৰ অন্যান্য সমষ্টিৰ দৰে ধেমাজি বিধানসভা সমষ্টিতো ৰাজনৈতিক বাতাবৰণ উত্তাল হৈ পৰিছে ৷ সমষ্টিটোত ৰাজনৈতিক দলবোৰে এতিয়ালৈকে প্ৰাৰ্থীৰ তালিকা চূড়ান্ত কৰা নাই যদিও সমাগত বিধানসভা নিৰ্বাচনক কেন্দ্ৰ কৰি ৰাজনৈতিক দলবোৰৰ কৰ্মী-সদস্যসকলৰ মাজত নিৰ্বাচন কেন্দ্ৰিক উছাহ বৃদ্ধি পাইছে আৰু সকলো ৰাজনৈতিক দলে নিজ নিজ দলৰ প্ৰতি ভোটাৰ ৰাইজৰ আকৰ্ষণ বৃদ্ধি কৰিবলৈ প্ৰচেষ্টা অব্যাহত ৰাখিছে ৷ আজি সন্মিলিত গণশক্তি অসম, দলৰ তৰফৰ পৰা সমাগত বিধানসভা নিৰ্বাচনক লৈ এখনি সংবাদ মেল আয়োজন কৰা হয় ৷ গোগামুখ আবতানি লত্তাত আয়োজন কৰা উক্ত সংবাদ মেলত গণশক্তিৰ কেন্দ্ৰীয় সভাপতি পৰমানন্দ ছায়েঙ্গীয়াই কয়- সন্মিলিত গণশক্তি অসমে এইবাৰ বিজেপি নেতৃত্বাধীন মিত্ৰজোঁটৰ লগত থাকিব আৰু একেলগে নিৰ্বাচনত অবতীৰ্ণ হ’ব ৷ ধেমাজি,. জোনাই, মাজুলী, শদিয়া, শিৱসাগৰ, লখিমপুৰ, গহপুৰ, নাওবৈচা, ডিব্ৰুগড়, গোলাঘাট, বোকাখাট, ডেৰগাঁও, বিহপুৰীয়া, টীয়ক, চাবুৱা, ঢকুৱাখনা, যোৰহাট, থাওৰা আদিকে ধৰি মুঠ ২১ খন বিধানসভা সমষ্টিত নিৰ্ণায়ক ভূমিকা গ্ৰহণ কৰিব আৰু আটাইকেইটা সমষ্টিতে মিত্ৰজোঁটৰ প্ৰাৰ্থীক সমৰ্থন কৰিব ৷ সমষ্টটিবোৰ মিত্ৰজোঁটক জিকাবৰ বাবে গণশক্তিয়ে সৰ্বশক্তি প্ৰয়োগ কৰিব বুলি তেওঁ দোহাৰে ৷ তেওঁ কয়- বিজেপি নেতৃত্বাধীন চৰকাৰখনে অসমৰ সামগ্ৰীক উন্নয়নৰ বাবে অভূতপূৰ্ব প্ৰচেষ্টা চলাইছে ৷ জাতি-জনগোষ্ঠীৰ মাজত একতাৰে কাম কৰি শান্তিপূৰ্ণ পৰিৱেশ নিৰ্মাণ কৰিছে ৷ সমবিকাশ আৰু সম অধিকাৰৰ জৰিয়তে অসমৰ জনতাৰ মন জয় কৰিছে ৷ এনেক্ষেত্ৰত বহুল চিন্তা আৰু অসমৰ সাৰ্বিক উন্নয়নৰ স্বাৰ্থত মিত্ৰজোঁটক সমৰ্থন কৰাটো সময়ৰ আহ্বান বুলি তেওঁ সংবাদমেলত মন্তব্য আগবঢ়ায় ৷ গণশক্তিয়ে ৰাষ্ট্ৰীয় ৰাজনৈতিক শক্তিৰ ওচৰত আত্মসমৰ্পণ কৰিছে নেকি বুলি সাংবাদিকে সোধা প্ৰশ্নৰ উত্তৰত কয়- আমাৰ কিমান শক্তি আমি ভালদৰে বুজি পাঁও ৷ গণশক্তিয়ে কৌশলগত কাৰণত সমাগত বিধানসভাৰ নিৰ্বাচনত প্ৰতিদন্দিতা নকৰিলেও এম এ চিৰ পৰিষদীয় নিৰ্বাচন, পঞ্চায়ত নিৰ্বাচনত অৱতীৰ্ণ হ’ব ৷ অৱশ্যে ৰাষ্ট্ৰীয় ৰাজনৈতিক দলবোৰে যদি আমাৰ আশা-আকাংক্ষা বা দাবীবোৰ পূৰণ নকৰে তেন্তে গণশক্তিয়ে বিকল্প চিন্তাৰে আগবাঢ়িবলৈ প্ৰস্তুত থকা বুলি তেওঁ সংবাদ মেলত সাংবাদিকক অৱগত কৰে ৷ ১০ মাৰ্চৰ পৰা গণশক্তিৰ সকলো ভাতৃ সংগঠনৰ লগত বৈঠক অনুষ্ঠিত কৰি সমাগত নিৰ্বাচনৰ ৰণকৌশল তৈয়াৰ কৰিব আৰু ঘৰে ঘৰে মিত্ৰজোঁটৰ প্ৰাৰ্থীৰ সপক্ষত প্ৰচাৰ কৰিব বুলি তেওঁ দোহাৰে  । আজিৰ সংবাদ মেলত উপস্থিত থাকে গণশক্তিৰ কেন্দ্ৰীয় উপসভাপতি সুনীল পেগু, সাধাৰণ সম্পাদক হিৰণ্য দত্ত, সম্পাদক পুৰুষোত্তম দলে আৰু গণশক্তিৰ নেতা ৰাজু পেগু ৷