ৰাজ্যত নিৰ্বাচনী আচৰন বিধি বলবৎ হোৱাৰ লগে লগে ব্যাপকৰূপে তৎপৰ হৈ পৰিছে প্ৰশাসন৷ নিৰ্বাচনী আয়োগে ৰাজনৈতিক দলৰ ওপৰিও আইন শৃংখলা জনিত বিভিন্ন ক্ষেত্ৰত বহুকেইটা গুৰুত্বপূৰ্ণ নীতি নিয়ম বান্ধি দিছে৷ আগন্তুক নিৰ্বাচনত ৰাজনৈতিক দলসমূহক এক নিদিষ্ট পৰিমানৰ ধন খৰচৰ সীমা নিৰ্ধাৰন কৰি দিয়াৰ লগতে নিৰ্বাচনত নগদ ধনৰ পয়োভৰ ৰোধ কৰাৰ বাবে নগদ ৫০ হেজাৰৰো অধিক ধন লৈ চলা ফুৰাৰ ওপৰত নিষেধাজ্ঞা আৰোপ কৰিছে৷ ইয়াৰ মাজতে তিনিচুকীয়াত  বৃহস্পতি বাৰে ভিজিলেঞ্চ গোটে অভিযান চলাই ৰাজপথৰ পৰা এজন ব্যক্তিৰ হাতৰ পৰা ১০ লাখকৈ টকা জব্দ কৰাৰ ঘটনাই বিশেষ তাৎপৰ্য বহন কৰিছে৷ জানিব পৰা মতে, জিলাখনৰ মাকুমত ৩৭ নং ৰাষ্ট্ৰীয় ঘাইপথত ভিজিলেঞ্চ গোটে তালাচী চলাই থকাৰ সময়তে এখন বিলাসী বাহনত অহা এজন ব্যক্তিৰ পৰা ১০ লাখ ৫০ হেজাৰ টকা জব্দ কৰে ভিজিলেঞ্চ গোটে৷ জব্দকৃত টকাখিনি শদিয়াৰ ৰাজকুমাৰ গুপ্তা নামৰ এজন ব্যৱসায়ীৰ বুলি জানিব পৰা গৈছে৷ এ এছ ২৩ ভি ১৮৩১ নম্বৰৰ সেউজীয়া বৰনৰ মাৰুতি বেলেনো গাড়ীত অহা ৰাজকুমাৰ গুপ্তাৰ পৰা উক্ত ধনৰাশি ভিজিলেঞ্চ গোটে জব্দ কৰে৷ তিনিচুকীয়াৰ মহকুমাধিপতি সঞ্জীৱ ফুকনৰ উপস্থিতিত আয়কৰ বিভাগে উক্ত ধনৰাশি জব্দ কৰে৷ এই সন্দৰ্ভত মহকুমাধিপতি সঞ্জীৱ ফুকনে জানিবলৈ দিয়া অনুসৰি নিৰ্বাচনী আচৰনবিধি বলবৎ হৈ থকাৰ হেতুকে ভিজিলেঞ্চ গোটে আজি এই ধনৰাশি জব্দ কৰি কোষাগাৰলৈ প্ৰেৰন কৰিছে৷ পৰবৰ্তী সময়ত ধনৰ গৰাকীয়ে আপীল কৰিব পাৰিব আৰু যদিহে তেও গ্ৰহনযোগ্য তথ্য প্ৰমান দাখিল কৰিব পাৰে তেনেহলে তেও এই ধন উভতাই পাব৷ ইফালে ৰাজকুমাৰ গুপ্তাই জানিবলৈ দিয়া মতে, শদিয়াত তেওৰ গ্ৰোচাৰী দোকান আছে, দোকানৰ বাবে সামগ্ৰী ক্ৰয় কৰিবৰ বাবে তেও এইদৰে নগদ ধন লৈ তিনিচুকীয়ালৈ ওলাইছিল৷ নিৰ্বাচনী আচৰন বিধিৰ কথা তেও নজনাৰ বাবেই এই ঘটনা সংঘটিত হয়৷

নৱ বৈষ্ণৱ ধৰ্মৰ অন্যতম কাল সংহতিৰ অধীনৰ মায়ামৰা মহাপুৰুষীয়া ধৰ্মৰ পৰম্পৰাগত ভাৱে পালন কৰি অহা অনুষ্ঠান ফাগুনৰ উচ্চ কীৰ্তন বিগত বৰ্ষসমূহৰ দৰে এইবাৰো  মটক বসতি প্ৰধান বিভিন্ন গাঁও সমূহত নিজা নিজা নামঘৰত ইতিমধ্যে সুকলমে সম্পন্ন হৈ গৈছে । চাবুৱাৰ নিকটৱৰ্তী চুঙিচুক গাঁৱৰ নামঘৰত বুধবাৰে দিবা -নৈশ বেলা এই অনুষ্ঠান সম্পন্ন হয়। সমাজৰ পৰা অপায়-অমংগল দূৰ কৰি  সমাজত শান্তি স্থাপনৰ কামনা অৰ্থে হোৱা উক্ত ধৰ্মীয় অনুষ্ঠানত মায়ামৰা ধৰ্মৰ আদ্য গুৰু শ্ৰী শ্ৰী অনিৰুদ্ধ দেৱৰ বিৰচিত ধৰ্মগ্ৰন্থ “ভক্তি মংগল ঘোষা” পাঠৰ পাছতে গায়ন-বায়ন পৰিৱেশন হয়। ভক্তপ্ৰাণ ৰাইজৰ মাজত মাহ-প্ৰসাদ বিতৰণৰ লগতে নিশালৈ এক ভোজৰ মহা আয়োজন চলে।  

বৃহস্পতি বাৰে পুৱতিনিশা ওলমি থকা অৱস্থাত উদ্ধাৰ হয় এটি মৃতদেহ । প্ৰত্যক্ষদৰ্শীয়ে এইটো এটা পৰিকল্পিত হত্যকাণ্ড বুলি সন্দেহ প্ৰকাশ কৰিছে । ৰঙিয়াৰ নিকটৱৰ্তী আৰিমত্ত নগৰত থকা এখন পথাৰৰ মাজত সংঘটিত হৈছে এই ঘটনা ।ওলমি থকা অৱস্থাত উদ্ধাৰ হয় এজন লোকৰ মৃতদেহ । মৃত লোকজনৰ নাম বলৰাম দাস বুলি জানিব পৰা গৈছে । ৰঙিয়াৰ ৭ নং ৱাৰ্ডত ভাড়াতীয়া হিচাপে পৰিয়ালৰ সৈতে আছিল বলৰাম দাস নামৰ লোকজন । লোকজনৰ টৰ্চ, চেন্দেল, গামোচা ইত্যাদী ঘটনাস্থলীৰ কাষত পৰি ৰৈছে । দৰিদ্ৰ লোকজনে আত্মহত্যা কৰিলে নে কোনো লোকে হত্যা কৰি এনেদৰে গছত ওলোমাই থৈ গৈছে সেয়া বৰ্তমানলৈ স্পষ্ট হোৱা নাই ।স্থানীয় ৰাইজে অভিযোগ কৰামতে আৰক্ষীক খবৰ দিয়াৰ পিছতো বহু পলমকৈ ঘটনাস্থলীত উপস্থিত হয় আৰক্ষীৰ লোক । এই ঘটনাই অঞ্চলযুঁৰি ব্যপক চাঞ্চল্যৰ সৃষ্টি কৰিছে ।

চাৰিলেণ্ড যুক্ত ৰাষ্ট্ৰৰ ঘাইপথ নিৰ্মাণৰ নামত জামুগুৰিহাটত ছিমপ্লেক্স নামৰ বহি:ৰাজ্যৰ কোম্পানীটোয়ে চলাইছে অনিয়ম দুৰ্নীতি।জামুগুৰিহাটৰ চকীঘাটৰ পৰা জামুগুৰি উচ্চতৰ মাধ্যমিক বিদ্যালয়ৰ  সমীপৰ ১৫নং ৰাষ্ট্ৰীয় ঘাইপথৰ সংযোগ হোৱালৈ প্ৰায় ৫কিলোমিটাৰ দৈঘ্যৰ পথটোৱা নিৰ্মাণৰ ক্ষেত্ৰত বালি মাটি ব্যৱহাৰ কৰাৰ অভিযোগ উত্থাপন কৰিছে স্থানীয় ৰাইজে। চৰকাৰী নিয়ম অনুসৰি ৰাষ্ট্ৰীয় ঘাইপথ নিৰ্বাচনৰ ক্ষেত্ৰত কাঠমাটি বা পাহাৰীয়া মাটি ব্যৱহাৰ কৰিব লাগে যদিও ছিমপ্লেক্স কোম্পানীটোৱে পথ নিৰ্মাণৰ বেলিকা জীয়া ভৰলীৰ বালি মাটি ব্যৱহাৰ কৰিছে।পূৰ্বৰ পৰাই স্থানীয় ৰাইজে এই ক্ষেত্ৰত অভিযোগ কৰি আহিছে যদিও ৰাইজৰ কথাক কোনো ধৰণৰ গুৰুত্বই নিদি বহি:ৰাজ্যৰ কোম্পানীটোৱে এইদৰেই বালিমাটি পথ নিৰ্মাণত ব্যৱহাৰ কৰি আহিছে। ইফালে জীয়া ভৰলী নদী  খান্দি  চাৰিলেণ্ড যুক্ত ৰাষ্ট্ৰৰ ঘাইপথ নিৰ্মাণ কৰাক লৈ  স্থানীয় ৰাইজৰ মাজত প্ৰতিক্ৰিয়াৰ সৃষ্টি হৈছে।

দ্বীপ জিলা মাজুলীৰ বনগাঁও চাৰিআলিস্হিত ঔষধৰ দোকান , হোটেলকে আদি কৰি কেইবাখনো দোকানত আজি ভয়ংকৰ এক অগ্নিকাণ্ড সংঘটিত হয় ।এই ভয়ংকৰ অগ্নিকাণ্ডত বহু লক্ষধিক টকাৰ সা-সম্পত্তি জাহ গৈছে বুলি জানিৱ পৰা গৈছে । অৱশ্যে কিছু পলমকৈ হ’লেও অগ্নিনিৰ্বাপক বাহিনী আৰু স্থানীয় ৰাইজৰ তৎপৰাতাত জুই নিৰ্বাপন হয়। বৈদ্যুতিক চৰ্ট চাৰ্কিটৰ ফলত এই ভয়ংকৰ অগ্নিকাণ্ড সংঘটিত হোৱাৰ সন্দেহ প্ৰকাশ কৰিছে স্হানীয় ৰাইজে ।

কেন্দ্ৰীয় চৰকাৰৰ সংখ্যালঘু উন্নয়ন পৰিক্ৰমা মন্ত্ৰালয়ৰ অৰ্থ সাহায্যত আৰু গ্ৰাম বিকাশ পৰিষদৰ উদ্যোগত নগাঁও জিলাৰ বিভিন্ন অঞ্চলৰ সংখ্যালঘু মহিলাৰ নেতৃত্ব উন্নয়নৰ ছয় দিনীয়া প্ৰশিক্ষণ শিবৰৰ আয়োজন কৰিছে। তাৰে প্ৰথমখন শিৱিৰ যোৱা ২ মাৰ্চত বটদ্ৰবাৰ ধনীয়াভেটিত অনুষ্ঠিত হয়। উক্ত অনুষ্ঠানত নগাঁও জিলা সমাজ কল্যাণ বিষয়াৰ লগতে স্থানীয় পঞ্চায়ত প্ৰতিনিধি, বিভিন্ন চৰকাৰী-বেচৰকাৰী অনুষ্ঠানৰ  বিষয়ববীয়াসকল উপস্থিত থাকে। প্ৰশিক্ষণ শিৱিৰত উপস্থিত বিশিষ্ট ব্যক্তি সকলে কয় যে – মহিলাসকল যেতিয়া শিক্ষিত হয় তেতিয়া সকলো সমস্যা সমূহ দূৰ হয়। মহিলাসকল অৰ্থনৈতিক আৰু সামাজিক ভাবে অৱহেলিত হলে এখন সমাজ উন্নয়ন নহয় বুলি তেওঁলোকে মন্তব্য কৰে। সভাত গ্ৰাম বিকাশ পৰিষদৰ মূখ্য উপদেষ্টা চিৰাজ উদ্দিন আহমেদে বৰ্তমান পৰিস্থিতিৰ ওপৰত লক্ষ্য ৰাখি কভিড-১৯ত লবলগীয়া সজাগতা, প্ৰতিৰোধ আৰু প্ৰতিকাৰৰ সম্পৰ্কে পুংখানুপুংখ ভাবে আলোচনা দাঙি ধৰে।উল্লেখ্য , যোৱা ২ ফেব্ৰুৱাৰীৰ পৰা আৰম্ভ হোৱা শিবিৰ মুঠ ৭ টা স্থানত অনুষ্ঠিত হ’ব।  প্ৰশিক্ষণ শিৱিৰৰ স্থান কেইটা ক্ৰমে- ধনীয়াভেটি, চিলঙনি কটনিগাওঁ(পানীখাইটি), ডাকৰঘাট, পানীগাওঁ, জাজৰি আৰু মৰিকলং।

সুষ্ট পঞ্চায়তী ৰাজ ব্যৱস্থা প্ৰবৰ্তনৰ বাবে নিৰ্বাচিত পঞ্চায়ত জনপ্ৰতিনিধি সকলক  বিশেষকৈ বাৰ্ড সদস্য সদস্যা সকলক প্ৰাপ্য মজুৰী প্ৰদান, পেঞ্চনৰ ব্যৱস্থা গ্ৰহন, বিভিন্ন চৰকাৰী আঁচনিত হিতাধীকাৰি হিচাপে অন্তৰ্ভুক্তিৰ ব্যৱস্থা কৰা, দৰমহা আয়োগ গঠন কৰি দৰমহা ২০,০০০ (বিশ হাজাৰ) কৰা আদি বিভিন্ন দাৱী লৈ আজি টীয়কৰ কলিয়াপানী উন্নয়ন খণ্ডৰ কাৰ্যালয়ৰ সন্মূখত এক  প্ৰতিবাদ সব্যস্ত কৰে পঞ্চায়তৰ বাৰ্ড সদস্য সদস্যা সকলে আৰু খণ্ড উন্নয়ন বিষয়াৰ হাতত স্মাৰক পত্ৰ প্ৰদান কৰে সোনকালে চৰকাৰক বঞ্চিত বেটন দিবলৈ আহ্বান জনায় ।