পৰিৱৰ্তনৰ প্ৰতিশ্ৰুতিৰে শাসনৰ বাঘজৰী হাতত লৈয়েই দুৰ্নীতি আৰু অনিয়মৰ বিৰুদ্ধে শূণ্য সহনশীলতাৰ কথা কোৱা মুখ্যমন্ত্ৰী সৰ্বানন্দ সোণোৱাল নেতৃত্বাধীন বিজেপি চৰকাৰৰ কাৰ্য্যকালত গহপুৰ মহকুমাৰ অন্তৰ্গত ছয়দুৱাৰ উন্নয়ন খণ্ড বিষয়াৰ কাৰ্য্যলয়ত প্ৰায় ৫৮ লক্ষ্যাধিশ টকাৰ এটা ভয়াবহ আৰ্থিক কেলেংকাৰী সংঘটিত হোৱাৰ এক গুৰুতৰ অভিযোগ পোহৰলৈ আহিছে।এই ভয়াবহ আৰ্থিক কেলেংকাৰী স্বয়ং ছয়দুৱাৰ উন্নয়ন খণ্ডৰ খণ্ড উন্নয়ন বিষয়া অৰুণ কুমাৰ দাসৰ পৃষ্ঠপোষকতাতে সংঘটিত হোৱা বুলি প্ৰাপ্ত অভিযোগত প্ৰকাশ পাইছে।প্ৰাপ্ত অভিযোগত প্ৰকাশ পোৱা মতে,২০১৯ বৰ্ষত ৰূপায়িত হোৱা এনৰেগা আচনিৰ সামগ্ৰীৰ বাবদ পাবলৈ থকা প্ৰায় ৫৮ লাখ টকা শেহতীয়াভাবে উন্নয়ন খণ্ডটোলৈ আবণ্টন হৈছে।উক্ত টকা যোৱা ১ ফ্ৰেব্ৰুৱাৰীত পঞ্জীয়ন ভুক্ত সাতগৰাকী ভেণ্ডৰৰ নিজা নিজা একাউন্টত অন লাইন প্ৰক্ৰিয়াৰে সোমাই।সেই অনুসৰি, সাত গৰাকী ভেণ্ডৰ ক্ৰমে ভাই হাজৰিকাৰ একাউন্টত প্ৰায় ২৩ লাখ,নিৰন হাজৰিকাৰ একাউন্টত প্ৰায় ৮ লাখ,নিডুল পাটগিৰিৰ একাউণ্টত প্ৰায় ৭ লাখ,হৰি শৰ্মাৰ একাউণ্টত প্ৰায় ৫ লাখ,বিপ্লৱ বৰাৰ একাউণ্টত প্ৰায় ৪ লাখ,পিংকু ফুকনৰ একাউণ্টত প্ৰায় ৬ লাখ আৰু বিপ্লৱ বৰুৱাৰ একাউণ্টত সোমাই প্ৰায় ৫ লাখ টকা।কিন্তু উক্ত চৰকাৰী আচনিৰ টকাক লৈ এতিয়া ভাগ-বতৰোৱাৰ হিচাপ নিকাচ চলিছে ছয়দুৱাৰ উন্নয়ন খণ্ড বিষয়াৰ কাৰ্য্যলয় কক্ষত।অভিযোগ অনুসৰি, উক্ত টকা আবণ্টন হোৱাৰ আগতীয়া খবৰ পাই খণ্ড উন্নয়ন বিষয়া অৰুণ কুমাৰ দাসে ভেণ্ডৰ সকলৰ একাউণ্টত টকা সোমোৱাৰ দুদিন পূৰ্বে একাংশ ভেণ্ডৰৰ পৰা তেওঁলোকৰ নামৰ চেকত কৌশলগতভাবে চহী কৰাই ৰাখে।যেতিয়া ১ ফ্ৰেব্ৰুৱাৰীত ভেণ্ডৰ সকলৰ একাউন্টত টকা সোমোৱা বুলি খণ্ড উন্নয়ন বিষয়াগৰাকীয়ে জানিব পাৰিলে তেতিয়া তেওঁ টকা সমূহ ভেণ্ডৰৰ পৰা চহী কৰি থোৱা চেকৰ জৰিয়তে “বিডিঅ’ ছয়দুৱাৰ” বুলি  অসম গ্ৰামীণ বিকাশ বেংকৰ বৰঙাবাৰী শাখাত থকা বেংক একাউণ্টটোলৈ  ট্ৰেণ্সৰ্ফাৰ কৰিবলৈ কৌশল অবলম্বন কৰে।সি সকল ভেণ্ডৰৰ অসম গ্ৰামীণ বিকাশ বেংকত  বেংক একাউণ্ট আছে সেইসকলৰ একাউন্টৰ পৰা ১ ফ্ৰেব্ৰুৱাৰীৰ দিনাই সমূদায় ধন বিডিঅ ছয়দুৱাৰ নামৰ বেংক একাউণ্টটোলৈ ট্ৰেণ্সৰ্ফাৰ হৈ যোৱাত বাকী সকল ভেণ্ডৰে সোমোৱা টকা খিনি যাতে বিডিঅ’ই ট্ৰেণ্সৰ্ফাৰ কৰি নিব নোৱাৰে তাৰ বাবে প্ৰয়োজনীয় কাৰ্য্যব্যৱস্থা গ্ৰহণ কৰে।জানিব পৰামতে যোৱা ১ ফ্ৰেব্ৰুৱাৰীৰ দিনা উক্ত সাত গৰাকী ভেণ্ডৰৰ ভিতৰত দুগৰাকী ভেণ্ডৰৰ প্ৰায় ১১ লাখ টকা বিডিঅ ছয়দুৱাৰ নামৰ বেংক একাউণ্টটোলৈ ট্ৰেণ্সৰ্ফাৰ হয়।জানিব পৰা মতে এনেদৰে ব্যক্তিগত বেংক একাউণ্টৰ পৰা চৰকাৰী একাউণ্টলৈ টকা ট্ৰেণ্সৰ্ফাৰ কৰা বিষয়টোক লৈ যোৱা কেইবাদিনো ধৰি ছয়দুৱাৰ উন্নয়ন খণ্ডৰ কাৰ্য্যলয়টো উত্তপ্ত হৈ আছে।অভিযোগত এই বুলিও প্ৰকাশ পাইছে যে,একাংশ প্ৰতিবাদী ভেণ্ডৰক বিডিঅ দাসে আশ্বস্ত কৰিবলৈ দহ শতাংশ পকেটস্থ কৰি বাকী টকা বিডিঅ’ক দিবলৈ মন্ত্ৰনা দিয়ে।এতিয়া প্ৰশ্ন হ’ল-দুগৰাকী ভেণ্ডৰৰ টকা ট্ৰেণ্সৰ্ফাৰ কৰি বাকী পাচ গৰাকী ভেণ্ডৰৰ টকা ট্ৰেণ্সৰ্ফাৰ কৰি নিয়াৰ ক্ষেত্ৰত কিয় ৰহস্যজনক স্থিতি গ্ৰহণ কৰিছে বিডিঅ দাসে।সচেতন ৰাইজৰ দৃষ্টিত উক্ত আপত্তিজনক বিষয়টো অনিয়মজনক হলেও বিডিঅ অৰুণ কুমাৰ দাসৰ কাৰণে ই যদি নিয়ম হয় তেন্তে বাকী পাচগৰাকী ভেণ্ডৰৰ টকাখিনি ট্ৰেণ্সৰ্ফাৰ কৰি নিবলৈ যোৱা সাত দিনত কিয় একো পদক্ষেপ গ্ৰহণ কৰা নাই তেওঁ??নিশ্চয় বাকী পাচগৰাকী ভেণ্ডৰৰ মাজত বিডিঅ অৰুণ কুমাৰ দাসৰ কমিছনৰ ভাগ-বতৰোৱা চলাৰ বাবেই তেওঁ নিশ্চুপ হৈ বহি থকা বুলি অঞ্চলটোৰ সচেতন ৰাইজে অভিযোগ উথাপন কৰিছে।এনৰেগা আচনিৰ ৰূপায়িত কামৰ আধৰুৱা হৈ পৰি ৰোৱা সামগ্ৰী পেলোৱাৰ বাবে আবণ্টিত চৰকাৰী ধন এনেদৰে আচনি ৰূপায়নত ব্যৱহাৰ নকৰি ভাগ-বতৰোৱাৰ অংক কৰাত জাঙুৰ খাই উঠিছে সদৌ অনুসূচিত জাতি ছাত্ৰ সন্থাৰ বিশ্বনাথ জিলা সমিতি।এইক্ষেত্ৰত তীব্ৰ প্ৰতিক্ৰিয়া প্ৰকাশ কৰি জিলা সমিতিৰ সাধাৰণ সম্পাদক বিপুল হীৰাই কয় যে ভেণ্ডৰ সকলৰ একাউন্টত সোমোৱা উক্ত টকা এনৰেগা আচনিৰ সামগ্ৰী পেলোৱাৰ নামত ব্যৱহাৰ কৰাটো চৰকাৰী বিধি ব্যৱস্থাৰ মাজত পৰে যদিও উক্ত চৰকাৰী টকাক লৈ ভাগ-বতৰোৱাৰ অংক কৰাটো সচাকৈয়ে দুৰ্ভাগ্যজনক।তদুপৰি ব্যক্তিগত একাউন্টৰ পৰা চৰকাৰী একাউণ্টলৈ টকা ট্ৰেণ্সৰ্ফাৰ কৰাৰ কতৃত্বক লৈ বিডিঅ গৰাকীৰ প্ৰতি প্ৰশ্ন উথাপন কৰি ছাত্র নেতা বিপুল হীৰাই বিডিঅ অৰুণ কুমাৰ দাসে ক্ষমতাৰ অপপ্ৰয়োগ কৰা বুলি উল্লেখ কৰে।তদুপৰি তেওঁ বিডিঅ দাসে অসম গ্ৰামীণ বিকাশ বেংকৰ বৰঙাবাৰী শাখাত “বিডিঅ ছয়দুৱাৰ” নামেৰে খোলা বেংক একাউন্টটোৰ বৈধ্যতাক লৈয়ো প্ৰশ্ন উথাপন কৰি কয় যে যদি এইটো চৰকাৰী একাউণ্ট হয় তেন্তে ব্যক্তিগত একাউণ্টৰ পৰা উক্ত একাউণ্টটোলৈ কি ক্ষমতাৰ ভিত্তিত টকা ট্ৰেণ্সৰ্ফাৰ কৰাৰ যোগ্যতা বিচাৰি পালে বিডিঅ অৰুণ কুমাৰ দাসে।উক্ত কেলেংকাৰীৰ বিৰূদ্ধে এক দণ্ডাধীশ পৰ্য্যায়ৰ দাবী কৰিছে বিশ্বনাথ জিলা অনুসূচিত জাতি ছাত্র সন্থাই।এই বিষয়ে ছাত্র সংগঠনটোৱে অতি সোনকালে মুখ্যমন্ত্ৰীৰ দুৰ্নীতি নিৰ্বাৰক কোষ আৰু বিশ্বনাথ জিলাৰ উপায়ুক্তক লিখিত অভিযোগ প্ৰদান কৰি এক উপযুক্ত তদন্তৰ দাবী কৰিব বুলি বিপুল হীৰাই জানিবলৈ দিছে।চৰকাৰী ধন চৰকাৰী কামত ব্যৱহাৰ নোহোৱাকৈ যাতে কাৰো পকেটত সোমাব নোৱাৰে তাৰ ওপৰত চোকা নজৰ ৰাখিব বুলি ছাত্র সংগঠনটোৱে স্পষ্ট কৰি দিছে।