চাংসাৰি : এতিয়া আৰু মৃত্যু শিল্প নহয়, নাই মানবতাৰ প্ৰশ্ন। কভিড ৰোগক দোহাই আন ৰোগৰ চিকিৎসা সেৱা বাতিলৰ বাবেই বহু সাধাৰণ ৰোগীৰ চিকিৎসা অবিহনে মৃত্যু ঘটিছে। স্বাস্থ্যখণ্ডৰ ঢাক ঢোল বজাই থকাৰ মাজতে শনিবাৰে নিশা স্বাস্থ্যমন্ত্ৰীৰ সমষ্টিৰ উত্তম বৰুবা নামৰ এজন লোকৰ বিনা চিকিৎসাই মৃত্যুক লৈ ক্ষোভিত হৈ পৰিছে আত্মীয় স্বজনৰ লগতে স্হানীয় ৰাইজ। খবৰ অনুসৰি শনিবাৰে আবেলি শৰীৰ অসুস্থ হোৱা সত্ত্বেও পত্নীৰ সতে উত্তৰ গুৱাহাটী খণ্ড প্ৰাথমিক চিকিৎসালয়লৈ গৈ স্বাস্থ্য পৰীক্ষা কৰোৱাত উত্তম বৰুৱাৰ  কভিড লক্ষণ নাই বুলি কলে চিকিৎসকে। ইয়াৰ পিছত উত্তৰ গুৱাহাটী ৰুদ্ৰেশ্বৰৰ উত্তম বৰুৱা নামৰ ৪৮ বছৰীয়া লোক জনৰ ডায়েবেটিছ ৰোগ চিকিৎসাৰ বাবে নিয়া হৈছিল নাৰায়ণা হাস্পটালত। কিন্তু চিকিৎসালয় কৰ্তৃপক্ষই পোনে পোনে ৰাখিবলৈ অস্বীকাৰ কৰাত আয়ুস চন্দা হাস্পটাললৈ নিয়া হ’ল। একেদৰেই প্ৰত্যাখ্যান কৰাত জি এম চি লৈ নিয়া হ’ল উত্তম বৰুৱাক। কিন্তু জি এম চিতো যথেষ্ট পলম হোৱাত কৰুণ মৃত্যুক সাবটিলে উত্তমে। পৰিয়ালৰ সূত্ৰে জানিব দিয়া মতে চিকিৎসালয়ৰ বাহিৰতে বহু সময় অপেক্ষাৰ পিছত জি এম চিৰ চিটিস্কেন বিছনাত ভৰোৱাৰ পিছতে কৰুণ মৃত্যুক সাবটিলে উত্তম বৰুৱাই। এজমা আৰু মধুমেহ ৰোগত আক্ৰান্ত উত্তমৰ হঠাতে চুগাৰ নিম্নগামী হৈছিল আৰু স্কেনাৰত সোমোৱাৰ পিছত হাৰ্ট বিকল হৈ মৃত্যু হ’ব পাৰে বুলি পৰিয়ালৰ লোকে সন্দেহ কৰিছে।  কিন্তু পৰিয়ালৰ আক্ষেপ কি ৰোগত উত্তম ঢুকাল চিকিৎসকে নজনালে। পৰিয়াল তথা একাংশ ৰাইজৰ আক্ষেপ জি এম চি এইচত মানবীয় দৃষ্টিৰে চিকিৎসাত পলম নকৰা হ’লে এজন সুঠাম যুবকৰ  জীবন আধাতে সামৰিব লগা নহ’লহেতেন।  উত্তম গুচি গ’ল কৰুণভাৱে আৰু ইতিকিং কৰি গ’ল অসমৰ স্বাস্থ্যখণ্ডক। দুই সন্তানৰ মাতৃয়ে এতিয়া যেন নিয়তিক ধিয়াই কন্দাৰ বাহিৰে উপায় নাই। উত্তৰ গুৱাহাটীত এই কৰুণ ঘটনা সংঘটিত হোৱাৰ পিছতে একাংশই স্বাস্থ্য খণ্ডৰ উন্নতিৰ জয়ঢোল বজোৱা মন্ত্ৰী হিমন্ত বিশ্ব শৰ্মাক ধিক্কাৰ প্ৰদান কৰি অতিশীঘ্ৰেই এনে কৰুণ ঘটনা দুনাই নহ’বলৈ কৰোনাৰ উপৰিও অন্য ৰোগৰ চিকিৎসাৰ ক্ষেত্ৰত কানষাৰ দিবলৈ মন্ত্ৰীগৰাকীক আহ্বান জনাইছে।

লংকা : সততে বিৰ্তকিত মন্তব্য কৰি সকলোৰে দৃষ্টি আকর্ষণ কৰা হোজাই সমষ্টিৰ বিধায়ক শিলাদিত্য দেৱে বিজেপি দলৰ পৰা লৱ অৱসৰ । অহা ১৪ জুলাইত তেখেতে আনুষ্ঠানিক ভাৱে পদত্যাগ পত্ৰ কৰিব প্ৰেৰণ । ইতিমধ্যেই তেখেতে বিজেপিৰ জেষ্ঠ নেতা সকলৰ লগতে সভাপতি ৰঞ্জিত দাসক হোৱাটছআপ যোগেদি ইতিমধ্যেই জনাইছে । হিন্দুত্ববাদী চিন্তাধাৰাৰে সদায় আগবঢ়া আগন্তক নিৰ্বাচনৰ প্ৰাকমূৰ্হতত শিলাদিত্য দেৱৰ এই মন্তব্য ই ইতিমধ্যে বিশেষ তাৎপর্য বহন কৰিছে। আজি শিলাদিত্য দেৱে সংবাদমাধ্যমক জনোৱা মতে বিজেপি দলত পুৰণি দলীয় কৰ্মীক কোনো গুৰুত্ব প্ৰদান নকৰে বুলি গুৰুতৰ অভিযোগ আনিছে । বিজেপিত বৰ্তমান কোনো নেতৃত্ব নাই। অনুশাসন নাই। আনহাতে আন এক গুৰুতৰ অভিযোগ কৰি কয় যে সভাপতি ৰঞ্জিত দাসে তেওঁৰ কথাত কোনো গুৰুত্ব নিদিয়ে। তেওৰ ফোন কৰিলেও ফোন ৰিচিভ নকৰে আৰু হোৱাটচআপও নাচায় । সেয়হে শিলাদিত্যই ১৪ জুলাই তাৰিখে অৱসৰ লʼৱ । যদিও বিধায়ক হিচাপে সময়সীমা থকা লৈকে তেওঁ নিজৰ সমষ্টিত ৰাইজৰ হকে কাম কৰি যাৱ । ভবিষ্যতে শিলাদিত্যই কোনো ৰাজনৈতিক দলত যোগদান নকৰে বুলিও ষ্পষ্ট কৰি দিয়ে ।নীতি আদৰ্শ ভংগ হ’লে দল জীয়াই নাথাকে । অসমৰ বিজেপি দলত নীতি আদৰ্শ নাইকীয়া হৈছে বিপদত পৰিলে বহু কেইজনক ৰাজ্যিক নেতাক কথাবোৰ কৱ লাগে । অসমৰ বিজেপিত দলকেন্দ্ৰীক ৰাজনীতি চলি আছে সেয়হে বিপদত পৰাত কৈ আৰু ৰাইজৰ আগত লাজ পোৱাতকৈ আতৰি যোৱাটোৱেই ভাল হʼৱ । ৰাজ্যিক বিজেপিৰ কান্ধত মোনা লৈ থকা ব্যক্তি জনেই ধংস কৰিব অসমৰ বিজেপি দল । কান্ধত মোনা লোৱা ব্যক্তি জনৰ নাম নকও যদিও দলে গম পাই কাৰ কথা কোৱা হৈছে । অৱসৰ লোৱাৰ পিছত পুনৰ বিজেপিলৈ আনিবলৈ উৰ্ধতম কৰ্তৃপক্ষই কলেও অহাৰ কথা ভাৱা নাই বুলি সাংবাদিকৰ আগত স্পষ্ট কৰে বিধায়ক গৰাকীয়ে ।

গুৱাহাটী : গুৱাহাটী মহানগৰীত লকডাউন চলি থকা সময়তে এচাম অসাধু ব্যৱসায়ীয়ে আৰক্ষীক মেনজ কৰি নিজৰ ব্যৱসায় সুচাৰুৰূপে চলায় আছে ৷ মহানগৰীৰ লকডাউনৰ সময়ছোৱাত মাছ – মাংসৰ ব্যৱসায় প্ৰতিষ্ঠান বন্ধ যদিও এচাম ব্যৱসায়ীয়ে অধিক চৰা দামত মাছ – মাংস বিক্ৰী কৰা দেখিবলৈ পোৱা গৈছে ৷ ইয়াৰ মাজতে আজি পুৱা ৯ বজাত চানমাৰি আৰক্ষীয়ে বয়লাৰ মুৰ্গী কঢ়িয়াই অনা পিক-আপ ভেন এখন জব্দ কৰে ৷ চানমাৰি আৰক্ষীয়ে জানিবলৈ দিয়া মতে নাম্বাৰ বিহীন বলেৰো পিক-আপ ভেন খনে বকোৰ পৰা খানাপাৰালৈ বয়ালাৰ মুৰ্গী কঢ়িয়াই আনি থকা অৱস্থাত শিলপুখুৰী অঞ্চলত আৰক্ষীয়ে গাড়ী খন জব্দ কৰিবলৈ সক্ষম হয় ৷ আৰিফুল ইছলাম নামৰ গাড়ীচালক জনে গাড়ীখন চলাই আনিছিল ৷ পিছত গাড়ীৰ সৈতে চালকক আৰক্ষীয়ে চানমাৰি থানলৈ আনে ৷ চানমাৰি থানাৰ ভাৰপ্ৰাপ্ত বিষয়াগৰাকী সংবাদ মাধ্যমক জানিবলৈ দিয়ে যে গাড়ী খন নতুন ৷ সেইবাবেই নম্বৰ প্লেট সংলগ্ন হোৱা নাই ৷ ইতিমধ্যে আৰক্ষীৰ তৰফৰ পৰা গাড়ীখনৰ স্বত্বাধিকাৰী আৰু চালকৰ বিৰুদ্ধে গোচৰ ৰুজু কৰিছে ৷

ওদালগুৰি : ওদালগুৰি জিলাৰ মাজবাট আৰক্ষী থানাৰ এলেকাৰ গছেনপুৰ গাঁৱত ১১ জুলাই তাৰিখে টাৰ্ছিলা কান্দুলনা (২৪) নামৰ এগৰাকী মহিলাৰ দেহত ক’ৰোনা পজিটিভ ধৰা পৰাৰ লগতে সমগ্ৰ ওদালগুৰি জিলাতে ১১ জুলাই তাৰিখে ৯ গৰাকী নতুনকৈ কোভিড-১৯ আক্ৰান্ত হোৱা ঘটনাই অঞ্চল জুৰি তীব্ৰ আতংকিত কৰি তুলিছে । স্বাস্থ্য বিভাগৰ পৰা জানিব পৰা মতে জিলা খনৰ মাজবাটৰ গছেনপুৰ গাঁৱৰ উক্ত মহিলা গৰাকী কেইদিনমানৰ আগতে দিল্লীৰ পৰা আহিছিল । ক’ ৰোনা পজিটিভত আক্ৰান্ত সাত মাহৰ গৰ্ভৱতী মহিলা গৰাকীক মাজবাটৰ গছেনপুৰ গাঁৱৰ পৰা স্বাস্থ্য বিভাগৰ লোক আৰু আৰক্ষী প্ৰশাসনে প্ৰায় আঢ়ৈ কিলোমিটাৰ দূৰ খোজ কাঢ়ি প্ৰৱল বৰষুণ আৰু বানপানীকো নেওচি আনিছে স্বাস্থ্য কৰ্মী আৰু আৰক্ষী প্ৰশাসনৰ এটি দলে ।সাত মহীয়া গৰ্ভৱতী ক’ৰোনাত আক্ৰান্ত মহিলা গৰাকীক স্বাস্থ্য বিভাগৰ লোক সকলে প্ৰৱল বৰষুণৰ মাজতে ছাতিৰে সাহসৰে আগুৱাই নি সযতনে ১০৮ নং গাড়ীত উঠাবলৈ সক্ষম হয় । উক্ত অভিযানত ওৰাং খণ্ড প্ৰাথমিক স্বাস্থ্য কেন্দ্ৰৰ ব্লক বিপিএম পংকজ কুমাৰ সভাপন্ডিতৰ লগতে অতুল শইকীয়া ,আশা ছুপাৰভাইজাৰ অৰ্চনা ডেকা আৰু ৰঞ্জনা দাস ৰাভাৰ উপৰিও স্বাস্থ্য কৰ্মী বিপ্লবজ্যোতি ডেকা আছিল । ইয়াৰ লগতে মাজবাট আৰক্ষী থানাৰ ভাৰপ্ৰাপ্ত আৰক্ষী বিষয়া ৰাজা ইৰছাদৰ লগত আৰক্ষীৰ লোকও স্বাস্থ্য কৰ্মী সকলৰ লগত উপস্থিত হয় ক’ৰোনা পজিটিভ আক্ৰান্ত গৰ্ভৱতী মহিলা গৰাকীক নিৰাপদে ওদালগুৰি অসামৰিক চিকিৎসালয়লৈ উন্নত চিকিৎসাৰ বাবে প্ৰেৰণ কৰিবলৈ সক্ষম হয় । এই গৰ্ভৱতী মহিলাৰ সৈতে নতুনকৈ ক’ৰোনা পজিটিভত আক্ৰান্ত ৮ গৰাকী লোককো ১১ জুলাই তাৰিখে ওদালগুৰি অসামৰিক চিকিৎসালয়লত ভৰ্তি কৰা হয় । আক্ৰান্ত লোকসকল হ’ল ক্ৰমে উমা শংকৰ (২৪), তাপস পাল (৪৫), জাইউল হক (৩১), ৰোহন আলি (২৪), ফীৰদাস ৰহমান (৩৭), তেৰচিলা কান্দুলনা (২৫),পল্টন মূৰমূ (৪০) আৰু পুপেন চাওঁৰা (৩০) । এতিয়ালৈ সমগ্ৰ ওদালগুৰি জিলাত মুঠ আক্ৰান্তৰ সংখ্যা ২৩৬ গৰাকী , ইয়াৰে ১৯৭ গৰাকী লোক সুস্থ হোৱাৰ পিছত ঘৰলৈ যাবলৈ দিয়া হৈছে আৰু ৩৮ গৰাকী চিকিৎসাধীন হৈ থকাৰ বিপৰীতে ৮ জুলাই তাৰিখে ক’ৰোনাত আক্ৰান্ত মাজবাটৰ যুৱক জিতেন্দ্ৰ প্ৰসাদ (৩০) ৰ মৃত্যু হৈছে।