নলবাৰী : আজি পবিত্ৰ আযোধ্যাত পাঁচশ বছৰীয়া এক দীঘলীয়া পৰিক্ৰমাৰ অন্তত ৰাম মন্দিৰৰ ভূমি পূজনৰ লগতে হ’ল শিলান্যাস। আযোধ্যাৰ ৰাম মন্দিৰৰ ভূমি পূজনৰ লগত সংগতি ৰাখি নলবাৰীৰ খাৰঝাৰাৰ ১০০৮ দুধনাথ বিগ্ৰহ সন্যাসী আশ্ৰমত অনুষ্ঠিত হ’ল বিষ্ণু যজ্ঞ। নলবাৰীৰ বিধায়ক অশোক শৰ্মাৰ উদ্যোগত অনুষ্ঠিত হৈছে এই যজ্ঞ। এক ঐতিহাসিক বিজয় আৰু ৰাম মন্দিৰৰ সকলো কাৰ্যসূচী শান্তিৰে পাৰ হোৱাৰ কামনাৰে আয়োজন কৰা হৈছে এই যজ্ঞৰ।এই যজ্ঞত অগণন ভক্তৰ সমাগম ঘটে। আনহাতে আজি সমগ্ৰ ভাৰতবাসীৰ বাবে ঐতিহাসিক দিন। কিয়নো আজি ভগৱান শ্ৰীৰামৰ জন্ম স্হান অযোধ্যাত ৰাম মন্দিৰৰ ভূমি পূজন কৰা হৈছে। সেই উদ্দেশ্যৰ লগত সংগতি ৰাখি নলবাৰী গণেশ মন্দিৰৰ প্ৰাংগণত হিন্দু ক্ৰান্তি দল নলবাৰী সমিতিয়ে ৰাম মন্দিৰৰ ভূমি পূজন শীৰ্ষক এক কাৰ্যসূচী ৰূপায়ণ কৰে। এই অনুষ্ঠানত ভগৱান শ্ৰীৰামৰ প্ৰতিচ্ছবিত বন্তি প্ৰজ্বলন কৰে নলবাৰীৰ বিশিষ্ট চিকিৎক ৰাকেশ জৈনে। তদুপৰি হিন্দু ক্ৰান্তি দলৰ প্ৰত্যেকজন কৰ্মীয়ে ভগৱান শ্ৰীৰামৰ চৰণত চাকি জ্বলোৱাৰ উপৰি দলটোৱে অসম চৰকাৰক নলবাৰী জিলাতো এটি ৰাম মন্দিৰ নিৰ্মাণৰ দাবী জনায়। আনহাতে এই কাৰ্যসূচীৰ অন্তত নাৰী সুৰক্ষাৰ স্বাৰ্থত হিন্দু ক্ৰান্তি দলে এখন কাৰ্যনিৰ্বাহক সভা অনুষ্ঠিত কৰে। সমান্তৰালভাৱে হিন্দু যুৱ ছাত্ৰ পৰিষদে ও শ্ৰীৰাম মন্দিৰৰ ভূমি পূজন শীৰ্ষক এক কাৰ্যসূচী পালন কৰে। যুৱ ছাত্ৰ পৰিষদে প্ৰথমতে নলবাৰী গণেশ মন্দিৰত শ্ৰীৰামৰ প্ৰতিচ্ছবিৰ চৰণত বন্তি প্ৰজ্বলন কৰে আৰু তাৰ পিছতে নলবাৰী জেল ৰোডস্থিত হনুমান মন্দিৰত ও বন্তি প্ৰজ্বলন কৰে।

গেলেকী :  শিৱসাগৰ জিলা অন্তৰ্গত ১০৮ নং শিৱসাগৰ বিধান সভা সমষ্টি হাঁহচৰা গাঁও পঞ্চায়তৰ এলেকা ১০ নং মৈৰামৰা ৱাৰ্ড  আৰু ৭ নং জাঠিপতীয়া ৱাৰ্ডৰ অন্তৰ্গত কুজিবালি চটাই আলি সংযোগী লংকাক গোঁহাই সম্প্ৰসাৰিত প্রায় আঢ়ৈ কিঃ মিঃ আলি গোবাটলৈ পৰিণত হৈছে। এইটো অঞ্চলটোৰ ৰাইজৰ যাতায়তৰ অতি প্ৰয়োজনীয় পথ। যিটো পথ বাৰিষা খৰালিৰ কোনো চিন নাই সমানেই বোকা পানী। প্রায় ৭০ দশকৰ পৰা অসম চৰকাৰৰ গড়কাপ্তানি বিভাগৰ অধীনত থকা এই পথটো আজি পৰ্য্যন্ত চৰকাৰৰ দৃষ্টি আকৰ্ষণ নোহোৱাৰ অভিযোগ ৰাইজৰ। বিগত সময়ত ১০৮ নং শিৱসাগৰ বিধান সভাৰ সমষ্টিত প্ৰতিনিধিত্ব কৰা কেইবাজনো বিধায়কক স্থানীয় ৰাইজে কেইবাবাৰো আবেদন নিবেদন কৰিও  আজি পৰ্যন্ত কোনো সঁহাৰি পোৱা নাই। উল্লেখ্য যে এই পথেদি হাঁহচৰা উচ্চ মাধ্যমিক, হাঁহচৰা উচ্চতৰ মাধ্যমিক বিদ্যালয়, ১০১৮ নং শলগুৰীয়া প্ৰাথমিক বিদ্যালয়, বোকানগৰ প্ৰাথমিক বিদ্যালয় আৰু হাঁহচৰা মজলীয়া বিদ্যালয়কে ধৰি শলগুৰীয়া গাঁও বোকানগৰ, মৈৰামৰা সত্রৰ প্রায় ৫০০ ঘৰৰ অধিক পৰিয়াল থকা লোক দৈনিক অহা যোৱাৰ একমাত্ৰ পথটো যাতায়তৰ একেবাৰে বিধ্বস্ত হৈ পৰিছে। বৰ্তমান যোৰহাট লোকসভা সমষ্টিৰ সাংসদ তপন কুমাৰ গগৈকো পথটো দৃষ্টিগোচৰ কৰোৱা হয়। লগতে উক্ত পথটোৰ সন্দৰ্ভত স্থানীয় ৰাইজে পথটো পকীকৰণ কৰিবৰ বাবে বিভাগীয় কৰ্তৃপক্ষৰ ওচৰতো বহুবাৰ আবেদন নিবেদন কৰি আহিছে। যদিও আজি পৰ্য্যন্ত বিভাগীয় কৰ্তৃপক্ষই মৌনতা অৱলম্বন কৰি গৈছে। আনহাতে পথটো নিৰ্মাণ নকৰাত ৰাইজে ক্ষোভ প্রকাশ কৰাৰ লগতে ২০২১ চনৰ নিৰ্বাচনৰ আগত পথটো পকীকৰণ কৰিবলৈ চৰকাৰক পুনৰ দাবী জনাইছে।

টিংখাং : কৃষক মুক্তি সংগ্ৰাম সমিতিৰ ডিব্ৰুগড় জিলা সমিতিৰ যুটীয়া সম্পাদক শশী শেনচোৱা আৰু হেমন্ত কোঁৱৰক টিংখাং আৰক্ষীয়ে লকডাউনৰ নিয়ম উলংঘা কৰাৰ অপৰাধত গ্ৰেপ্তাৰ কৰি জেললৈ প্ৰেৰণ কৰা ঘটনাৰ প্ৰতিবাদত আৰু বিনাচৰ্তে মুক্তিৰ দাবীত কালি চিপিআই (এম এল)ৰ সমৰ্থকসকলে ৰাজগড়ৰ শ্বহীদবেদী তিনিআলিত প্ৰতিবাদ সাব্যস্ত কৰে। এক প্ৰেছ বিবৃতিত দলটোৱে কয় যে আচলতে কা বিৰোধী আন্দোলনত দুয়োজন নেতাই সক্ৰিয় হৈ ৰাইজক সংগঠিত কৰাৰ বাবেহে শাসকীয় দলৰ হেঁচাত তেওঁলোকক গ্ৰেপ্তাৰ কৰা হৈছে। ৰাজগড়ৰ শ্বহীদবেদী তিনিআলিত লকডাউন নিয়ম মানি প্ৰতিবাদকাৰীসকলে শশী শেনচোৱা আৰু হেমন্ত কোঁৱৰক মুক্তি দিয়ক, লক ডাউনৰ নিয়ম উলংঘা কৰাৰ অপৰাধত বিমল বড়াক গ্ৰেপ্তাৰ কৰক, টিংখাং আৰক্ষী ৰাইজৰ বাবে নে বিজেপিৰ বাবে জবাব দিয়ক, বিমল বড়াক কিয় গ্ৰেপ্তাৰ কৰা নাই জবাব লাগে, লক ডাউনক ৰাজনৈতিক কামত ব্যৱহাৰ কৰা বন্ধ কৰক, প্ৰতিশোধৰ ৰাজনীতি বন্ধ কৰক, কা আমি নামানো, বিজেপি চৰকাৰ হায় হায় আদি শ্ল’গানৰে শ্বহীদবেদী তিনিআলি উত্তাল কৰি তোলে। কালিৰ কাৰ্যসূচীত কা বিৰোধী ঐক্য মঞ্চ, টিংখাঙৰ সহ সম্পাদক বলদেব তেলী উপস্থিত থাকে। চিপিআই (এম এল)ৰ ডিব্ৰুগড় জিলা সমিতিৰ সম্পাদক বিতুপন বকলীয়ালে নেতৃত্ব প্ৰদান কৰা কালিৰ কাৰ্যসূচীত দলৰ কেন্দ্ৰীয় সমিতিৰ সদস্য বলিন্দ্ৰ শইকীয়া, জিলা সমিতিৰ সদস্যা কুন্তী তাঁতী, মুকুট কোঁচ, বিনোদ মুড়া আদি উপস্থিত থাকে। আনহাতে ‘কা’ বিৰোধী ঐক্য মঞ্চ টিংখাঙৰ উদ্যোগত কালি যুৰীয়া আই থানত এখনি সংবাদ মেল অনুষ্ঠিত কৰা হয়। মঞ্চৰ সহকাৰী সম্পাদক বলিন্দ্ৰ শইকীয়াই আঁত ধৰা সংবাদ মেলত মঞ্চই বলদেব তেলীক ষড়যন্ত্ৰমূলকভাৱে গ্ৰেপ্তাৰ কৰা ঘটনাৰ তদন্তৰ দাবীত গুৱাহাটী উচ্চ ন্যায়ালয়, আৰক্ষী দায়বদ্ধতা আয়োগ, মানৱ অধিকাৰ আয়োগ আৰু অসম চৰকাৰৰ মুখ্য সচিবলৈ এখনি অভিযোগ পত্ৰ প্ৰদান কৰা হৈছে বুলি জানিবলৈ দিয়ে। মঞ্চৰ সম্পাদক বিপ্লৱ বৰুৱাই কৃষক মুক্তি সংগ্ৰাম সমিতিৰ ডিব্ৰুগড় জিলা সমিতিৰ যুটীয়া সম্পাদক শশী শেনচোৱা আৰু হেমন্ত কোঁৱৰক গ্ৰেপ্তাৰ কৰা ঘটনাৰ তীব্ৰ বিৰোধিতা কৰে। বৰুৱাই কয় যে যদি নামঘৰত চাকি জ্বলোৱাৰ যোগেদি আইন ভংগ কৰা হৈছে তেন্তে সমষ্টিৰ বিধায়ক বিমল বড়া একেটা দোষতে দোষী। তেন্তে বিধায়ক বিমল বড়াক কিয় গ্ৰেপ্তাৰ কৰা নহ’ব বুলি প্ৰশ্ন উত্থাপন কৰি বিধায়কগৰাকীক গ্ৰেপ্তাৰ কৰিবলৈ দাবী কৰে। ‘কা’ বিৰোধী মঞ্চৰ সম্পাদকগৰাকীয়ে দাবী কৰা মতে বিধায়ক বিমল বড়াই সমষ্টিটোত সামাজিক দূৰত্ব, মুখত মাস্ক আদি নিপিন্ধাকৈ সভা সমিতি অনুষ্ঠিত কৰি আহিছে। তদুপৰি বিধায়কগৰাকীয়ে সমগ্ৰ ৰাজ্যখনত সন্ধিয়াৰে পৰা বলবৎ কৰা সান্ধ্য আইন ভৰিৰে মোহাৰি সমষ্টিটোত ব্যাপকভাৱে দলীয় কাম কাজ চলাই থকা বুলি সংবাদ মেলত অভিযোগ উত্থাপন কৰিছে। সংবাদ মেলত ‘কা’ বিৰোধী কৃষক মুক্তিৰ নেতা অখিল গগৈ, দেবাংগনা কলিতাসহ কাৰাৰুদ্ধ সকলোকে অতিশীঘ্ৰে মুক্তিৰ দাবী জনাইছে। কালিৰ সংবাদ মেলত মঞ্চৰ সহকাৰী সম্পাদক বলদেব তেলী, উপ সভানেত্ৰী দুৰ্গাৱতী সোনা, সহকাৰী সম্পাদক নিতুল বৰুৱা, সহকাৰী সম্পাদক মণ্টু দিহিঙ্গীয়া প্ৰমুখ্যে কেবাগৰাকী বিষয়ববীয়া উপস্থিত থাকে।

দৈনন্দিন বাৰ্তা, নলবাৰীঃ নলবাৰী জিলা সাহিত্য সভাৰ সভাপতি, বিশিষ্ট সাংবাদিক ৰোহিনী মেধি স্মৃতি সাংবাদিক সন্মিলন আৰু আলোচনা সত্ৰ আজি অনুষ্ঠিত কৰা হয়। নলবাৰী জিলা সাহিত্য সভাৰ কাৰ্যালয়ত “ভাষাৰ শুদ্ধ প্ৰয়োগত সংবাদ মাধ্যমৰ ভুমিকা” শীৰ্ষক আলোচনা সত্ৰ উদ্বোধন কৰে নলবাৰী মহাবিদ্যালয়ৰ অধ্যাপক দীপক কলিতাই। নলবাৰী জিলাৰ বিভিন্ন প্ৰান্তৰ সাংবাদিকে অংশ লোৱা আলোচনা সত্ৰৰ সঞ্চালনা কৰে নলবাৰী জিলা সাহিত্য সভাৰ সভাপতি ধ্ৰুৱজ্যোতি শৰ্মাই।

বাতৰি যোগুতালেঃ জ্যোতিস্মান শৰ্মা