দৈনন্দিন বাৰ্তা সেৱা, গেলেকীঃ ৰাজ্যৰ ৰাজনীতিত তোলপাৰ লগাই থকা মিঞা সংগ্ৰহালয় সন্দৰ্ভত আজি নিজৰ স্থিতি স্পষ্ট কৰি বিৰোধী দলপতি দেৱব্ৰত শইকীয়া কয় যে ডাঃ হিমন্ত বিশ্ব শৰ্মাই উক্ত বিষয়টোৰ অপ-ব্যাখ্যা কৰিছে। কংগ্ৰেছৰ বিধায়ক শ্বেৰমান আলী আহমেদে শংকৰদেৱ কলাক্ষেত্ৰত ‘মিঞা সংগ্ৰহালয়’ স্থাপনৰ দাবী কৰা বিতৰ্কৰ সৃষ্টি কৰাৰ পাছত এইবাৰ বিতৰ্কিত প্ৰসংগত নিজৰ স্থিতিস্পষ্ট কৰিছে বিধায়ক তথা বিৰোধী দলৰ দলপতি দেৱব্ৰত শইকীয়াই।

নাজিৰা সমষ্টিৰ বিধায়ক শইকীয়াৰ মতে বিষয়টো সন্দৰ্ভত অনাহকত বিজেপিয়ে বিতৰ্কৰ সৃষ্টি কৰি নিৰ্বাচনী ইছ্যু কৰিব বিচাৰিছে। তেওঁ শইকীয়াই লগতে কয় যে অসম বিধানসভাৰ শিক্ষা সম্পৰ্কীয় স্থায়ী সমিতিৰ বৈঠকত কংগ্ৰেছৰ বিধায়ক শ্বেৰমান আলী আহমেদে এই প্ৰস্তাৱ উত্থাপন কৰিছিল আৰু বৈঠকত প্ৰস্তাৱটো গৃহিত হৈছিল। উক্ত ১৫ জনীয়া সমিতিৰ ৮ গৰাকী সদস্যই শাসকদলৰ বিধায়ক।

তেনে ক্ষেত্ৰত বিষয়টোক বিজেপিয়ে নিৰ্বাচনী ইছ্যু কৰিব খোজাৰ কোনো যুক্তি নাই বুলি গুৰুত্বপূৰ্ণ মন্তব্য কৰে। বিৰোধী দলৰ দলপতি দেৱব্ৰত শইকীয়াই কয় চৰ-চাপৰিত কেৱল মিঞা লোকেই বসবাস নকৰে। উজনি অসম আৰু উত্তৰ অসমৰ বিভিন্ন চৰ-চাপৰিত মূল সুঁতিৰ অসমীয়াৰ লগতে বিভিন্ন খিলঞ্জীয়া জনগোষ্ঠীয় লোকো বাস কৰি আহিছে।আনহাতে সম্প্ৰতি নামনিৰ চৰাঞ্চলত মুছলমান লোকৰ বসতি অধিক।

দৈনন্দিন বাৰ্তা সেৱা, জামুগুৰিহাটঃ কেৱল নাৰী সুৰক্ষাৰ বাবে এখনি সংগ্ৰাম৷ এই সংগ্ৰাম কোনো প্ৰতিবাদ নহয়, “Warriors” নামেৰে আৰম্ভ কৰা ধৰ্ষণবিৰোধী, নাৰী-অধিকাৰ, সবলীকৰণ, নাৰী স্বাধীনতাৰ ওপৰত আৰম্ভ কৰা এক জাগৰণ৷ বিশ্বনাথ জিলাৰ নাগশংকৰৰ এগৰাকী উদ্যমী যুৱক,বিশিষ্ট কবি,শিক্ষক তথা সমাজসেৱক উৎপল শিৱমৰ এটা ফেচবুক প’ষ্টৰ জৰিয়তে এই জাগৰণৰ উত্থাপন হৈছিল আৰু বৰ্তমান ছ’চিয়েল মিডিয়া ফেচবুকতে সীমাবদ্ধ নাথাকি সমগ্ৰ ৰাজ্যতে বিয়পি পৰিছে জাগৰণ৷

সম্পূৰ্ণ অৰাজনৈতিক আৰু অসাম্প্ৰদায়িক তথা সামাজিক আৰু মানবীয়তাৰ প্ৰমূল্যবোধৰে আৰম্ভ কৰা এই জাগৰণৰ মূল উদ্দেশ্য হৈছে নাৰী সবলীকৰণ,নাৰী সুৰক্ষা,কন্যা শিশুৰ উন্নয়ন, ভ্ৰূণ হত্যা, ডাইনী হত্যাৰ বিপক্ষে বৈজ্ঞানীক দৃষ্টিভংগীৰ প্ৰসাৰ, কুটিৰ শিল্প,বয়ন,পশুপালন আদিৰ দ্বাৰা নাৰীক স্বাৱলম্বী হবলৈ সহায় কৰা, বিধবা বা অসহায় মহিলাক আৰ্থিক সংস্থাপন, দৰিদ্ৰ মেধাবী ছাত্ৰীক শিক্ষা গ্ৰহণত সহায় কৰা,নাৰী নিৰ্য্যাতনৰ বিপক্ষে আইনী প্ৰক্ৰিয়াৰে সহায় কৰা,ধৰ্ষণকাৰী মাত্ৰেই ফাঁচীৰ দাবী হেতু জনমত সৃষ্টি কৰা ইত্যাদি।

এই জাগৰণৰ প্ৰতি সঁহাৰি জনায়েই অসমৰ ইমূৰৰ পৰা সিমূৰলৈ  অতি কম সময়ৰ ভিতৰতে হাজাৰ হাজাৰ পুৰুষ মহিলা,আবাল বৃদ্ধ বনিতা সদলবলে আগুৱাই আহিছে আৰু অসমৰ প্ৰায় সকলো জিলাতেই “Warriors”ৰ শাখা গঠন হৈছে আৰু পূৰ্ণোদ্যমে নাৰীৰ মাজত জাগৰণ তথা সমাজ সংস্কাৰ মূলক কাম আৰম্ভ হৈছে। সেই জিলা শাখা সমূহৰ অধীনত প্ৰতিজিলাত ইতিমধ্যে কেইবাটাও আঞ্চলিক শাখাও গঠন হৈছে।

সেই উদ্দেশ্যে অসমৰ আন জিলা সমূহৰ দৰেই শোণিতপুৰ জিলাতো “Warriors” শোণিতপুৰ জিলা শাখাৰ আহ্বায়িকা  সুস্বপ্না হাজৰিকাৰ আহ্বান মৰ্মে এখনি সজাগতা সভা অনুস্থিত হয়।মুঢ়াদ’ল মাধৱ গোঁসাই থানত অনুষ্ঠিত উক্ত সভাত সভাৰ উদ্দেশ্য ব্যাখ্যা সম্পৰ্কত সুস্বপ্না হাজৰিকাই কয় “নাৰীৰ সৰ্বাংগীন বিকাশৰ বাবে সমগ্ৰ অসমতে এক জাগৰণ সৃষ্টি কৰাৰ অন্য এক নাম হৈছে ‘Warrior’।

ইয়াৰে এটি শাখা গঠন কৰাৰ উদ্দেশ্য এই সভাখন আহ্বান কৰা হৈছে যাতে অঞ্চলটোৰ বিভিন্ন সমস্যাৰে ভাৰাক্ৰান্ত নাৰী সকলক সুৰক্ষা,সুবিধা প্ৰদানেৰে আগুৱাই লৈ যাব পৰা যায়”। প্ৰায় শতাধিক মহিলাই অংশগ্ৰহণ কৰা উক্ত সভাত বিশিষ্ট অতিথিৰ আসন গ্ৰহণ কৰে Warriors ৰ মুখ্য আহ্বায়ক তথা  বিশিষ্ট কবি,শিক্ষক তথা সমাজসেৱক  উৎপল শিৱমে।“Warrior” ৰ মুখ্য উদ্দেশ্য সমূহ দাঙি ধৰি মুখ্য আহ্বায়ক গৰাকীয়ে কয় “নাৰীৰ সৰ্বাংগীন উন্নতি আৰু সবলীকৰণৰ ক্ষেত্ৰত আইনগত তথা চৰকাৰী ভাৱে বিভিন্ন ব্যৱস্থা গ্ৰহণ কৰা হৈছে যদিও নাৰীসকল এতিয়াও অসুৰক্ষিত,শোষিত আৰু অৱহেলিত হৈ আছে।

সেয়ে নাৰীৰ সুৰক্ষা তথা সবলীকৰণ আৰু প্ৰশিক্ষণৰ ক্ষেত্ৰত এক জনজাগৰণ সৃষ্টি কৰা আৰু তেওঁলোকক সহায় কৰিব পৰাকৈ এক মঞ্চ প্ৰদান কৰাটো অতি প্ৰয়োজনীয় হৈ পৰিছে। বিশেষকৈ ধৰ্ষণকাৰী সকলক উপযুক্ত শাস্তি প্ৰদানৰ বাবে ন্যায়পালিকাৰ ওচৰত জনমত গঠন কৰাটোও হৈছে Warriors ৰ আন এক মুখ্য উদ্দেশ্য”।

বিয়লি ৩ বজাৰ পৰা আৰম্ভ হোৱা উক্ত সভাত অসমৰ অন্যান্য প্ৰান্তৰ লগতে জামুগুৰিহাটতো Warriors ৰ এটা আঞ্চলিক গোট গঠন কৰা হয় আৰু সেই গোটত মূৰ্চনা কাকতি আৰু স্মৃতি হাজৰিকাক দায়িত্বত জামুগুৰি অঞ্চলৰ কেইবাখনো গাওঁৰ যুৱতী মহিলা অৰ্ন্তভূক্ত হৈ Warriors ৰ দ্বাৰা নাৰী সবলীকৰণ আৰু উন্নয়নৰ হকে কাম কৰি যাবলৈ সংকল্পবদ্ধ হয়।

উল্লেখ্য যে যোৰহাটত ১৪ টা,ডিব্ৰুগড়ত ৪টা,মাজুলী,লক্ষীমপুৰ,নাৰায়ণপুৰ,লালুক আদিতো Warriorsৰ এনে গোট গঠণ কৰি পূৰ্ণোদ্যমে নাৰীৰ মাজত জাগৰণ তথা সমাজ সংস্কাৰ মূলক কাম আৰম্ভ হৈছে।

দৈনন্দিন বাৰ্তাৰ সেৱা, সোণতলীঃ দক্ষিণ কামৰূপৰ বকো সমষ্টিৰ অন্তৰ্গত সোণতলী আঞ্চলিক মহাবিদ্যালয়ৰ অধ্যক্ষ আবুল কালাম আজাদৰ বিৰুদ্ধে দেওবাৰে মহাবিদ্যালয় খনৰে জিবিৰ সভাপতি আৰু অধ্যাপকে এখনি যুটীয়া সংবাদ মেল আয়োজন কৰে৷ অধ্যক্ষ আবুল কালাম আজাদে মহাবিদ্যালয়খনৰ বিভিন্ন শিতানৰ লাখ লাখ টকা আত্মহাত কৰাৰ অভিযোগ কৰি উক্ত সংবাদ মেলত৷

সংবাদ মেলত  মহাবিদ্যালয়ৰ জ্যেষ্ঠ সহকাৰী অধ্যাপক নৌশাদ আলী আহমেদ আৰু পৰিচালনা সমিতিৰ সভাপতি নুৰুল আমিন ভূঞাই সংবাদমেলত কয় যে ২০১৩ চনত সোণতলী আঞ্চলিক মহাবিদ্যালয়খন প্রাদেশিকীৰণ হয় যদিও দুর্ভাগ্যজনকভাৱে অধ্যক্ষৰ পদ প্রাদেশিকীৰণ নহ’ল। ফলত উচ্চ শিক্ষা বিভাগৰ সঞ্চালকৰ নিৰ্দেশমৰ্মে চিঠি নং-AHE98/2014/2 Date-12/03/14 যোগে মহাবিদ্যালয়ৰ জ্যেষ্ঠ অধ্যাপক নৌশাদ আলী আহমেদক সদস্য, বিত্তীয় দিশ তদাৰকৰ বাবে দায়িত্ব অর্পণ কৰি ডি ডি অ’ হিচাপে নিযুক্তি দিয়ে৷

আনহাতে মহাবিদ্যালয়খনৰ অধ্যক্ষ ড০ আবুল কালাম আজাদে বিগত ২০১৪ চনৰ পৰা ১৬ চনলৈ চৰকাৰী নির্দেশনাক কার্যকৰি নকৰি নিজেই বিত্ত বিভাগৰ দায়িত্ব চলাই আহিছে৷ মহাবিদ্যালয়ৰ ডি ডি অ’ৰ দায়িত্বভাৰ ৩ মাহৰ মূৰে মূৰে বৃদ্ধি কৰাৰ লগতে উন্নয়নৰ যাৱতীয় কাম ডি ডি অ’ই পৰিচালনা কৰিব লাগে বুলি পৰিচালনা সমিতিয়ে লোৱা প্ৰস্তাৱৰ কার্যকৰী ব্যৱস্থা গ্ৰহণ নকৰে অধ্যক্ষগৰাকীয়ে।

আনহাতে শিক্ষকসকলৰ দৰমহা, জৰুৰী সমস্যাৰ বাবে যোৱা ২১ মাৰ্চত মহাবিদ্যালয় পৰিচালনা সমিতি আৰু শিক্ষক গোটৰ যুটীয়া বৈঠকত ডি ডি অ’ৰ কার্যকাল পৰৱর্তী ৩ মাহৰ বাবে লোৱা প্ৰস্তাৱো অধ্যক্ষগৰাকীয়ে কার্যকৰী কৰাৰ কোনো পদক্ষেপ গ্রহণ নকৰিলে৷ চৰকাৰৰ এম এছ ডি পি আৰু ইউ জি চি আঁচনিৰ কামৰ দায়িত্ব ডি ডি অ’ক দিয়াৰ পিচতো তাক অধ্যক্ষই কার্যকৰী নকৰি পৰিচালনা সমিতি আৰু নির্মাণ কমিটিক অন্ধকাৰত ৰাখি নিজ খেয়ালখুঁচিমতে চলাই আহিছে৷

শেহতীয়াকৈ উচ্চ শিক্ষা বিভাগে PC/HE/MISC/112/2019/47 নং নির্দেশযোগে কলেজৰ যাৱতীয় নথিপত্ৰ ডি ডি অ’ক হস্তান্তৰ কৰিবলৈ নির্দেশ দিয়ে যদিও অধ্যক্ষই তাক বর্তমানলৈকে কার্যকৰী কৰা নাই৷ আনহাতে Assam Education Provinsilisation of Services of Teacher’s and Recognisation of Educational Institutions Bill-2017ত উল্লেখ কৰামতে সোণতলী আঞ্চলিক মহাবিদ্যালয়ৰ অধ্যক্ষৰ দায়িত্ব দি কলেজখন সুচাৰুৰূপে চলাই নিয়াৰ বাবে বৰ্তমানৰ ডি ডি অ’ তথা কামৰূপ জিলাৰ বিদ্যালয় সমূহৰ পৰিদৰ্শক মাধৱ চন্দ্ৰ ডেকাই পৰিচালনা সমিতিক দিয়া পৰামৰ্শ অনুযায়ী বিগত ৮ মাহে জ্যেষ্ঠ অধ্যাপক নৌশাদ আলী আহমেদে ডি ডি অ’ৰ কাৰ্যকালত যাৱতীয় বিত্তীয় হিচাপ-নিকাচ জিবি আৰু নিৰ্মাণ কমিটিৰ নিৰ্দেশমতে পৰিচালনা কৰা বুলি সংবাদমেলত উল্লেখ কৰে৷

আনকি মহাবিদ্যালয়খনৰ অধ্যক্ষ ড° আবুল কালাম আজাদে বিগত ৩৩টা বছৰ ধৰি মহাবিদ্যালয়ৰ শিক্ষাৰ্থীৰ পৰা আলোচনীৰ নামত ধন সংগ্ৰহ কৰি আহিছে যদিও আজিলৈকে আলোচনী প্ৰকাশ নকৰি লাখ লাখ টকা আত্মসাৎ কৰাৰো গুৰুতৰ অভিযোগ উত্থাপন কৰিছে জিবিৰ সভাপতি নুৰুল আমিন ভূঞাৰ লগতে অধ্যাপক নৌসাদ আলীয়ে৷